18 мая.

Канон преподобномученику Ефрему Новому, Неамакрийскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 1:

Я́ко со́лнце, возсия́л еси́ в горе́ Амо́мстей,/ преподобному́чениче Христо́в Ефре́ме,/ и, ва́рварская нахожде́ния претерпе́в,/ му́ченически к Бо́гу отше́л еси́./ Сего́ ра́ди благода́ть при́сно источа́еши/ благоче́стно зову́щим:/ сла́ва Да́вшему ти кре́пость,/ сла́ва Просла́вльшему тя,// сла́ва Де́йствующему тобо́ю всем исцеле́ния.

Кано́н, гла́с 1.

Пе́снь 1.

Ирмос: Твоя́ победи́тельная десни́ца/ боголе́пно в кре́пости просла́вися:/ та бо, Безсме́ртне,/ я́ко всемогу́щая, проти́вныя сотре́,// изра́ильтяном путь глубины́ новосоде́лавшая.

Припев: Преподобному́чениче Ефре́ме, моли́ Бо́га о нас.

Сла́вою боже́ственною укра́шен и све́та неизрече́ннаго испо́лнен, Ефре́ме богоно́се, сло́во ми пода́ждь и просвеще́ние ми да́руй моли́твами твои́ми, я́ко да воспою́ страда́ния твоя́.

Припев: Преподобному́чениче Ефре́ме, моли́ Бо́га о нас.

Ум твой повеле́ньми Госпо́дними изде́тска к жи́зни лу́чшей напра́вил еси́, и мона́х богоно́сный и непоро́чный в горе́ Непоро́чных соде́лался еси́.

Сла́ва Отцу́ и Сы́ну и Свято́му Ду́ху:

Си́лу от Бо́га прии́м и благоче́стия явля́я кре́пость, ага́рянская лю́тая муче́ния му́жественне претерпе́л еси́, Ефре́ме богоно́се, егда́ простро́ша на дре́ве те́ло твое́.

И ны́не и при́сно и во ве́ки веко́в. Ами́нь.

Богородичен: Вся чи́стая и избра́нная, де́вства блиста́ющая благода́тьми, яви́лася еси́, Всенепоро́чная, и Бо́га родила́ еси́ воплоща́ема всем земноро́дным во спасе́ние.

Пе́снь 3.

Ирмос: Еди́не ве́дый челове́ческаго существа́ не́мощь,/ и ми́лостивно в не́ вообра́жся,/ препоя́ши мя с высоты́ си́лою,/ е́же вопи́ти Тебе́, Святы́й,// одушевле́нный хра́ме неизрече́нныя сла́вы Твоея́, Человеколю́бче.

Припев: Преподобному́чениче Ефре́ме, моли́ Бо́га о нас.

Возвы́сив ум твой к Бо́гу, пло́ти мудрова́ние благода́тию Свята́го Ду́ха умертви́л еси́ и, боле́зньми по́стническими предподвиза́я себе́ ко страда́нию, безстра́стия сосу́д яви́лся еси́, Ефре́ме всеблаже́нне.

Припев: Преподобному́чениче Ефре́ме, моли́ Бо́га о нас.

Егда́ ви́дел еси́ полки́ ага́рянския, я́ко зве́ри лю́тыя, на боже́ственную огра́ду твою́ напа́дшия, стал еси́ неукло́нно и небоя́зненно проти́ву ко́знем их и му́ки ве́лия, богоно́се, претерпе́л еси́.

Сла́ва Отцу́ и Сы́ну и Свято́му Ду́ху:

Долговре́менная муче́ния претерпева́я я́ко безпло́тен, велиа́ра льсти́ваго вся́кую си́лу тве́рдым противле́нием твои́м, о́тче Ефре́ме, победи́л еси́ и му́чеников вене́ц от Бо́га прия́л еси́, блаже́нне.

И ны́не и при́сно и во ве́ки веко́в. Ами́нь.

Богородичен: Я́ко честне́йший храм и де́вства всесвято́е селе́ние, Чи́стая, святы́х Святе́йшее Сло́во пло́тски нам родила́ еси́. Те́мже те́пле вопию́ Ти: очи́сти, Де́во, се́рдце мое́ от вся́кия скве́рны.

Седа́лен, гла́с 4:

А́нгельски пожи́в в воздержа́нии мно́зем, крове́й тече́ньми святы́я ри́зы твоя́ обагри́л еси́, преподо́бне. Те́мже во обои́х по́двизех све́тло блиста́я, пода́ждь нам свы́ше те́плыми твои́ми моли́твами во всем по́мощь, Ефре́ме скоропослу́шне.

Сла́ва, и ны́не, Богородичен:

Неизрече́нно Ро́ждшая Творца́ вся́ческих, изба́ви тле́ния нечи́стых страсте́й, всегда́ мя оскверня́ющих. Виждь сле́зы души́ моея́, Богоро́дице, и очи́сти ум мой от помышле́ний безме́стных, и даждь се́рдцу моему́ умиле́ние, молю́ся.

Пе́снь 4.

Ирмос: Го́ру Тя, благода́тию Бо́жиею приосене́нную,/ прозорли́выма Авваку́м усмотри́в очи́ма,/ из Тебе́ изы́ти Изра́илеву провозглаша́ше Свято́му,// во спасе́ние на́ше и обновле́ние.

Припев: Преподобному́чениче Ефре́ме, моли́ Бо́га о нас.

Просте́рше ва́рвары те́ло твое́, преподо́бне, ура́ниша е́ нестерпи́мыми му́ками, ты же, ко Го́споду горе́ очи́ма серде́чныма взира́я, до́блественне вся претерпе́л еси́.

Припев: Преподобному́чениче Ефре́ме, моли́ Бо́га о нас.

Любве́ ра́ди ко Христу́ бие́мый и сокруша́емый нечести́выми ага́ряны, ра́довался еси́, свя́те, и вся о́стрия губи́теля кре́постию твое́ю притупи́л еси́, преподобному́чениче Ефре́ме свяще́ннейший.

Сла́ва Отцу́ и Сы́ну и Свято́му Ду́ху:

Пре́жде неве́домь, о́тче, яви́лся еси́ игу́мении Мака́рии, я́же, услы́шавши рече́ния святы́х усте́н твои́х, и́мя твое́ и житие́, преподобному́чениче Ефре́ме, в ми́ре су́щим возвести́ла есть.

И ны́не и при́сно и во ве́ки веко́в. Ами́нь.

Богородичен: Престо́л яви́лася еси́ Бо́га Вы́шняго, та́йны непостижи́мыя вмести́лище, содержа́щи на рука́х Исто́чника жи́зни. Сего́ ра́ди мо́лимся Тебе́, блага́я Одиги́трие: изведи́ ны из про́пасти поги́бели и бу́ди нам спаси́тельное приста́нище.

Пе́снь 5

Ирмос: Просвети́вый сия́нием/ прише́ствия Твоего́, Христе́,/ и освети́вый Кресто́м Твои́м ми́ра концы́,/ сердца́ просвети́ све́том Твоего́ Богоразу́мия// правосла́вно пою́щих Тя.

Припев: Преподобному́чениче Ефре́ме, моли́ Бо́га о нас.

По чу́днем обре́тении моще́й твои́х, Ефре́ме преподобному́чениче, де́йством неизрече́нным и́мя твое́ честно́е и по́двиг кре́пкий неве́дущим тя лю́дем откры́л еси́.

Припев: Преподобному́чениче Ефре́ме, моли́ Бо́га о нас.

Ра́ка святы́х моще́й твои́х, богоно́се, благода́ть Ду́ха Пресвята́го источа́ет, и излива́ет исцеле́ний боже́ственныя струи́, отгоня́ющи стра́сти лю́тыя и вся́кая искуше́ния.

Сла́ва Отцу́ и Сы́ну и Свято́му Ду́ху:

Всем призыва́ющим и́мя твое́, свя́те Ефре́ме, многообра́зне явля́ешися и подае́ши благода́ть. Те́мже Атти́ческая страна́, чуде́с твои́х испо́лнившися, велича́ет Го́спода.

И ны́не и при́сно и во ве́ки веко́в. Ами́нь.

Богородичен: Жизнода́вца Бо́га пло́тию ро́ждшая, Пречи́стая Влады́чице, оживи́ мя, умерщвле́на ле́стию лю́таго ратобо́рца, и к жи́зни лу́чшей возведи́ мя.

Пе́снь 6.

Ирмос: Обы́де нас после́дняя бе́здна,/ несть избавля́яй,/ вмени́хомся я́ко о́вцы заколе́ния./ Спаси́ лю́ди Твоя́, Бо́же наш:// Ты бо кре́пость немощству́ющих и исправле́ние.

Припев: Преподобному́чениче Ефре́ме, моли́ Бо́га о нас.

Му́чеников тве́рдость яви́в, му́ченическия све́тлости показа́лся еси́ прича́стник, богоно́се о́тче Ефре́ме, проти́ву я́рости зверонра́вных ага́рян неустраши́мо ополчи́вся.

Припев: Преподобному́чениче Ефре́ме, моли́ Бо́га о нас.

Но́вый в преподо́бных и му́ченицех Ефре́м всесла́вный Боже́ственным Ду́хом вся́ ве́рныя к весе́лию та́инственному созыва́ет. Его́же честно́е страда́ние пе́сньми восхва́лим.

Сла́ва Отцу́ и Сы́ну и Свято́му Ду́ху:

Кре́постию богода́нною я́ко му́ченик боже́ственный облачи́вся, разсла́бленныя воздвиза́еши, Ефре́ме прему́дре, и одержи́мым мно́гими неду́ги избавле́ние подае́ши.

И ны́не и при́сно и во ве́ки веко́в. Ами́нь.

Богородичен: В печа́лех и напа́стех и искуше́ниих су́щим ра́дость непостижи́мым Рождество́м Твои́м источи́ла еси́, Богоро́дице Присноде́во. Те́мже и мене́ ве́чныя ра́дости сподо́би.

Конда́к, гла́с 3.

На горе́ Амо́мстей до́бре подвиза́лся еси́, богому́дре,/ и та́мо му́ченическое тече́ние сконча́л еси́./ Те́мже, преподобному́чениче Ефре́ме,/ Жизнода́вец сугу́быми венцы́ досто́йно увенча́ тя,// приле́жно моля́щася о душа́х на́ших.

Икос:

От ю́ности Христу́ после́довав, о́тче, мирска́го мяте́жа и плотски́я сла́сти всеконе́чне отве́рглся еси́ и, боже́ственною любо́вию распала́емь, в горе́ Амо́мон а́нгельски пожи́л еси́, по́стническими же труды́ ду́шу и те́ло очи́стив, боже́ственныя благода́ти жили́ще яви́лся еси́. Та́же и, скверноуби́йственными рука́ми находя́щих иноплеме́нник ят быв, му́ченическую кре́пость показа́л еси́ и, многообра́зным му́кам и терза́нием противуста́в, за Христа́ ну́ждно умерщвле́н был еси́. Те́мже, преподобному́чениче Ефре́ме, Жизнода́вец сугу́быми венцы́ увенча́ тя, приле́жно моля́щася о душа́х на́ших.

Пе́снь 7.

Ирмос: Тебе́ у́мную, Богоро́дице, пещь/ разсмотря́ем ве́рнии:/ я́коже бо о́троки спасе́ три Превозноси́мый,/ мир обнови́, во чре́ве Твое́м всеце́л,// хва́льный отце́в Бог и препросла́влен.

Припев: Преподобному́чениче Ефре́ме, моли́ Бо́га о нас.

По́стнический по́двиг боже́ственною любо́вию соверша́я, преподо́бне Ефре́ме, кровьми́ страда́ния себе́ омочи́л еси́ и, я́ко же́ртва непоро́чная, Созда́вшему вся́ческая прине́слся еси́, велича́я Того́, я́ко хва́льнаго отце́в Бо́га и препросла́вленнаго.

Припев: Преподобному́чениче Ефре́ме, моли́ Бо́га о нас.

Ра́ка моще́й твои́х, о́тче Ефре́ме, си́лою боже́ственною неду́ги исцеля́ющи и де́моны прогоня́ющи, здра́вие излива́ет и благово́ние Небе́сное источа́ет всем, благоче́стно к тебе́ притека́ющим.

Сла́ва Отцу́ и Сы́ну и Свято́му Ду́ху:

Атти́честии собо́ри и афи́няне благогове́йнии во оби́тель твою́ честну́ю с ве́рою притека́ют, прося́ще бога́тную благода́ть твою́, Ефре́ме, А́нгелов соприча́стниче. Ю́же пода́ждь и нам, преподобному́чениче, услажда́я ду́ши на́ша.

И ны́не и при́сно и во ве́ки веко́в. Ами́нь.

Богородичен: Я́ко неистощи́мый исто́чник щедро́т боже́ственных, Всенепоро́чная, жа́ждущей души́ мое́й во́ду жи́зни ны́не источи́, и зной безме́рных мои́х скорбе́й утоли́, да пою́, Богоро́дице, сла́ву Твою́ несказа́нную.

Пе́снь 8.

Ирмос: В пещи́ о́троцы Изра́илевы,/ я́коже в горни́ле,/ добро́тою благоче́стия чисте́е зла́та блеща́хуся, глаго́люще:/ благослови́те, вся дела́ Госпо́дня, Го́спода,// по́йте и превозноси́те во вся ве́ки.

Припев: Преподобному́чениче Ефре́ме, моли́ Бо́га о нас.

Терпя́щу ти го́рькая досажде́ния от мучи́телей, о́тче Ефре́ме, боже́ственным твои́м смире́нием сломи́л еси́ врага́ горды́ню превознесе́нную, взыва́я: благослови́те, вся дела́ Госпо́дня, Го́спода, по́йте и превозноси́те во вся ве́ки.

Припев: Преподобному́чениче Ефре́ме, моли́ Бо́га о нас.

Вои́стину от Христа́ по достоя́нию просла́влен был еси́, о́тче, и по вре́мени мно́зе, я́ко сокро́вище нам яви́лся еси́, Ефре́ме, науча́я взыва́ти: благослови́те, вся дела́ Госпо́дня, Го́спода, по́йте и превозноси́те во вся ве́ки.

Сла́ва Отцу́ и Сы́ну и Свято́му Ду́ху:

Кре́пость души́ твоея́ показу́я, ка́плющею кро́вию твое́ю зло́бное неи́стовство ага́рян потопи́л еси́. И внегда́ умира́ти тебе́, благода́ти Ду́ха Свята́го испо́лнився, моли́лся еси́, Ефре́ме: Влады́ко Христе́, в ру́це Твои́ предаю́ дух мой.

И ны́не и при́сно и во ве́ки веко́в. Ами́нь.

Богородичен: Неискусому́жно родила́ еси́ Христа́, и по Рождестве́ я́ко пре́жде Рождества́, пребыва́еши Присноде́ва Чи́стая. Сего́ ра́ди взыва́ем Ти: ра́дуйся, чистоты́ сосу́де всесвяще́нный, еди́на Благода́тная, во вся ве́ки.

Песнь 9

Ирмос: О́браз чи́стаго Рождества́ Твоего́,/ огнепали́мая купина́ показа́ неопа́льная,/ и ны́не на нас напа́стей свире́пеющую угаси́ти мо́лимся пещь,/ да Тя, Богоро́дице,// непреста́нно велича́ем.

Припев: Преподобному́чениче Ефре́ме, моли́ Бо́га о нас.

Му́ченически запечатле́в житие́ твое́, вене́ц Небе́сный от Христа́ прия́л еси́, о́тче, и Дре́ву Жи́зни предста́л еси́, Ефре́ме преподобному́чениче, ве́чныя ра́дости сподобля́емый и прича́стием боже́ственным обожа́емый.

Припев: Преподобному́чениче Ефре́ме, моли́ Бо́га о нас.

Ра́вный преподо́бным яви́лся еси́, о́тче, в посте́ и моли́тве жи́тельствуя, и равноче́стен страстоте́рпцем соде́лался еси́, терпя́ ага́рян нахожде́ние, Ефре́ме преподобному́чениче. Те́мже сугу́быя по́чести улучи́л еси́.

Припев: Преподобному́чениче Ефре́ме, моли́ Бо́га о нас.

Па́мять соверша́юще днесь твоего́ кре́пкаго страда́ния, вопие́м ти: всегда́ сохраня́й от вся́кия ну́жды и ско́рби оби́тель твою́, чту́щую тя, Ефре́ме преподобному́чениче, и нам подава́й я́же ко спасе́нию поле́зная.

Сла́ва Отцу́ и Сы́ну и Свято́му Ду́ху:

Ну́жднейшую смерть претерпе́л еси́, преподобному́чениче, и бу́рею нестерпи́мых мук ти́хаго приста́нища ве́чныя сла́вы и све́тлости дости́гл еси́. Те́мже всегда́ моли́ся о чту́щих тя, о́тче Ефре́ме, блаже́нне.

И ны́не и при́сно и во ве́ки веко́в. Ами́нь.

Богородичен: Высоту́ несказа́ннаго Рождества́ Твоего́, Де́во, кто изглаго́лет? Ты бо пло́тию родила́ еси́ Безпло́тнаго, Бо́га же и Челове́ка. Сего́ ра́ди Тя, Богоро́дице, непреста́нно велича́ем.

Свети́лен.

По́стническими боре́ньми житие́ твое́ просвети́л еси́, и му́ченическими по́двиги я́ко же́ртва благово́ннейшая и приноше́ние благоприя́тное Го́сподеви прине́слся еси́, Ефре́ме. Те́мже всегда́ моли́ся о ве́рою почита́ющих свяще́нная страда́ния твоя́.

Молитва

О святы́й о́тче Ефре́ме, преподо́бных единовсе́льниче и му́чеников соприча́стниче, возлюби́вый Го́спода Бо́га всем се́рдцем и Тому́ да́же до конца́ после́довавый! Ты пе́рвее посто́м и моли́твою ду́шу твою́ очи́стил еси́ и произволе́нием тве́рдым, я́коже мече́м, вся стра́стныя по́мыслы посе́кл еси́. Та́же, егда́ прии́де вре́мя твоего́ страда́ния, не убоя́лся еси́ мучи́телей, но моли́твою к Бо́гу отрази́л еси́ нахожде́ния диа́вола. И я́коже еди́н от дре́вних вели́ких страстоте́рпцев, претерпе́л еси́ вся му́ки, ели́ка безу́мнии врази́ измы́слити возмого́ша. Коне́чне же и смерть за ве́ру правосла́вную прия́л еси́ и си́лою Креста́ Христо́ва ага́рянское нече́стие посрами́л еси́. Сего́ ра́ди прославля́ем по́двиги твоя́, о́тче Ефре́ме, почита́ем страда́ния и мо́лимся: умилосе́рдися о нас гре́шных, и житие́ на́ше плодоно́сно покажи́. Да паду́т оби́льныя сле́зы покая́ния на изсо́хшую зе́млю душ на́ших, и да обрати́тся сия́ из пусты́ни непло́дныя в сад боже́ственных доброде́телей, да утверди́тся огра́дою воздержа́ния, да процвете́т цве́том чистоты́ и целому́дрия и принесе́т плод стори́чный де́лы милосе́рдия и любве́ к Бо́гу и бли́жнему. Да услы́шим и мы сла́дкий глас Влады́ки Христа́: прииди́те, благослове́ннии Отца́ Моего́, насле́дуйте угото́ванное вам Ца́рствие от сложе́ния ми́ра. Ами́нь.

Молитва иная

О преподобному́чениче Ефре́ме, ди́вный чудотво́рче и вели́кий ми́ру свети́льниче! Ты от ю́ности Христа́ возлюби́в, Тому́ Еди́ному вседу́шно после́довал еси́. Жития́ же мона́шескаго взыску́я, на горе́ Амо́мон всели́лся еси́ и та́мо, плоть распина́я и непреста́нную моли́тву в се́рдце твое́м соверша́я, мно́гими слеза́ми ду́шу твою́ от страсте́й очи́стил еси́. Сего́ ра́ди угото́вася тебе́ путь превосхо́днейший, не то́кмо в Сы́на Бо́жия ве́ровати, но и по Нем страда́ти. Те́мже му́ки горча́йшия за Христа́ ра́достно прия́л еси́ и, ника́коже ага́рян нечести́вых устраши́вся, на до́лзе вре́мени муче́ния теле́сная терпе́л еси́, та́же, ди́вное му́жество показу́я, кровь твою́, я́ко многоце́нное ми́ро, на зе́млю пролия́л еси́. Егда́ же безу́мнии ага́ряне, жела́вшии тя от Христа́ отри́нути, узре́ша, я́ко ничто́же успева́ют, на дре́ве стремгла́в простро́ша тя и па́лицею горя́щею свято́е те́ло твое́ прободо́ша. Ты же, претру́дный путь свой соверши́в, кро́тко ду́шу твою́ в ру́це Бо́жии пре́дал еси́. Те́мже, я́ко мо́лния, на Не́бо возше́л еси́, дости́гнув возлю́бленнаго тобо́ю Го́спода. И́же прие́м тя, я́ко ве́рнаго во́ина, увязе́ главу́ твою́ честну́ю венце́м нетле́нныя сла́вы и отре́ вся́кую слезу́ твою́, на ве́ки с Собо́ю сочетава́я. Кто ны́не возмо́жет разлучи́ти тя от любве́ Бо́жия? Кто исхи́тит у тебе́ све́тлую диади́му, дарова́нную Небе́сным Царе́м? Кто лиши́т тя ве́чнаго жи́тельства во гра́де Госпо́днем? Вои́стину неотъе́млемое насле́дие и прича́стие со святы́ми восприя́л еси́ на Небесе́х. Ны́не же на земли́ просия́ сла́ва твоя́, святы́й о́тче Ефре́ме. А́ще бо и безве́стно в ми́ре сем пострада́л еси́, оба́че Творе́ц вся́ческих, ве́дый та́йная, в после́док дний сих я́ви сокрове́нныя в земли́ твоя́ мо́щи, по́двиги твоя́ явле́ны сотвори́ и дарова́ ти ве́лию благода́ть исцеле́ний в по́мощь и утеше́ние ро́ду христиа́нскому. Сего́ ра́ди пото́ки чуде́с источи́л еси́, о́тче Ефре́ме, притека́ющим ко святе́й твое́й ра́це, разсла́бленныя укрепля́я, слепы́м зре́ние подава́я, хромы́я возставля́я и ины́ми мно́гими и неисце́льными неду́ги содержи́мыя лю́ди врачу́я. И да́же до днесь вся концы́ вселе́нныя просвеща́еши многоразли́чными ди́вными чудесы́ и виде́нии. О свя́тче Бо́жий, не оста́ви и нас, убо́гих, оскуде́вших в ве́ре, любви́ и до́брых де́лех, возста́ви нас, па́дших в стра́сти, да́руй нам сле́зы покая́ния, утверди́ твое́ю кре́пкою к Бо́гу моли́твою, исцели́ на́ша неду́гующия ду́ши и телеса́. Просвети́ наш ум после́довати ева́нгельским за́поведем, возжзи́ в сердца́х на́ших неугаси́мую любо́вь ко Спа́су и бли́жним на́шим, да́руй нам благи́ми де́лы прославля́ти Отца́ на́шего Небе́снаго, Ему́же подоба́ет вся́кая сла́ва, честь и поклоне́ние, со Единоро́дным Его́ Сы́ном, и с Пресвяты́м, и Благи́м, и Животворя́щим Его́ Ду́хом, ны́не и при́сно, и во ве́ки веко́в. Ами́нь.