16 мая

Канон преподобным Иулиании и Евпраксии Московским

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропарь, глас 1:

Христу Жениху уневеститися возжелавшыя / и подвиги иноческия Того ради понесшыя, / добродетельным житием и любовию ко всем / себе украсившыя, преподобныя Иулиание и Евпраксие, / во граде Москве первыя обители девическия / устроительницы явистеся / и трудов и подвигов брата вашего святителя Алексия / ревнительницы показастеся. / Сего ради, ныне на Небесех вкупе с ним торжествующе, / молите граду Москве в Православии утвердитися, / обители вашей сохранитися / и спастися душам нашым.

Ин тропарь, глас тойже:

Христу Жениху уневеститися возжелавшыя, / преподобныя Иулиание и Евпраксие, / во граде Москве обители девическия устроительницы явистеся / и брату вашему, святителю Алексию, в подвизех подражасте. / Сего ради, ныне на Небесех вкупе с ним торжествующе, / молите обители вашей сохранитися, / граду Москве в Православии утвердитися / и спастися душам нашым.

Канон, глас 8.

Песнь 1

Ирмос: Колесницегонителя фараоня погрузи, / чудотворяй иногда / Моисейский жезл, крестообразно поразив / и разделив море: / Израиля же беглеца, пешеходца спасе, / песнь Богови воспевающа.

Припев: Святи́и преподобнии Иулиание и Евпраксие, моли́те Бо́га о нас.

Сподоби нас, Господи, / достойно воспети постническия подвиги и преславная чудеса преподобных Иулиании и Евпраксии, / в них же имя Твое славно прославися.

Припев: Святи́и преподобнии Иулиание и Евпраксие, моли́те Бо́га о нас.

Возлюбившя от юности всемилостиваго Бога, / иноческий путь избрали есте, святыя, / и, обеты монашеския даже до конца соблюдшя, / спасение обрели есте.

Сла́ва Отцу́ и Сы́ну и Свято́му Ду́ху:

Ведая всеблагий Господь благое желание сердец ваших, / благослови обитель девичию во славнем граде Москве устроити, / идеже ищущии спасения Христа обретаху.

И ны́не и при́сно и во ве́ки веко́в. Ами́нь.

Богородичен: Тебе, Премилостивая Владычице, усердно молимся / и всю надежду на Тя возлагаем. / Избави от всякия скорби и нужды страну нашу Российскую.

Песнь 3

Ирмос: Утверждей в начале Небеса разумом / и землю на водах основавый, / на камени мя, Христе, заповедей Твоих утверди, / яко несть свят паче Тебе, Едине Человеколюбче.

Припев: Святи́и преподобнии Иулиание и Евпраксие, моли́те Бо́га о нас.

Древним преподобным женам подражающя, Иулиание и Евпраксие, / на земли ангельски пожили есте, / темже и ныне с Небесными Силами во обителех райских сликовствуете.

Припев: Святи́и преподобнии Иулиание и Евпраксие, моли́те Бо́га о нас.

Любовию и чистотою сердечною уневестилися есте Единому Жениху Небесному / и, верность Ему соблюдшя, / с мудрыми девами в брачный чертог вошли есте.

Сла́ва Отцу́ и Сы́ну и Свято́му Ду́ху:

Яко верныя ученицы, / предали есте себе, блаженныя, в послушание святителю Алексию, / брату вашему по плоти, / с нимже ныне возносите теплыя молитвы за землю Русскую.

И ны́не и при́сно и во ве́ки веко́в. Ами́нь.

Богородичен: Тебе, Пречистая Владычице, / песнь хвалебную приносим, / яко Рождшимся от Тебе род человеческий спасеся.

Седален, глас 4:

Днесь людие московстии, собравшеся во обитель Зачатьевскую, / радости исполняются и со умилением взывают: / о, преподобныя жены, Иуалиание и Евпраксие, / сохраните место святое сие и не престаните молитися о нас, / недостойных чадех ваших, / честную память вашу празднующих.

Слава, и ныне, Богородичен:

Спаси от бед рабы Твоя, Богородице, / яко вси по Бозе к Тебе прибегаем, / яко нерушимей Стене и Предстательству.

Песнь 4

Ирмос: Ты моя Крепость, Господи, / Ты моя и Сила, / Ты мой Бог, Ты мое Радование, / не оставль недра Отча, / и нашу нищету посетив. / Тем со пророком Аввакумом зову Ти: / силе Твоей слава, Человеколюбче.

Припев: Святи́и преподобнии Иулиание и Евпраксие, моли́те Бо́га о нас.

Любве ради ко Христу вся земная ни во чтоже вменившя, / труды многия во обители понесли есте. / Ныне же, блаженныя, радуетеся со ангелы в чертозе Царя Небеснаго, / прославляюще Его неизреченную милость.

Припев: Святи́и преподобнии Иулиание и Евпраксие, моли́те Бо́га о нас.

Не дали есте сна очима вашима, ни дремания веждома, / но бодрено в житии Христу послужившя / и любовь к людем явившя, святыя, / образ добронравнаго жития иноком показали есте.

Сла́ва Отцу́ и Сы́ну и Свято́му Ду́ху:

Приемшя светильники вашя и елеем добродетелей исполнившя, преподобныя, / изыдосте в сретение Жениху Христу, / Иже и введе вас в чертог небесный.

И ны́не и при́сно и во ве́ки веко́в. Ами́нь.

Богородичен: Молим Тя, Дево, Мати Пречистая, / подаждь нам прощение множества прегрешений / и исцели душы нашя.

Пе́снь 5

Ирмос: Вскую мя отринул еси / от лица Твоего, Свете Незаходимый, / и покрыла мя есть чуждая тьма, окаяннаго; / но обрати мя и к свету заповедей Твоих / пути моя направи, молюся.

Припев: Святи́и преподобнии Иулиание и Евпраксие, моли́те Бо́га о нас.

Возлюбившя покаяние, воздержание предивное явисте / и, святым житием себе украсившя, удалистеся славы земныя. / Сего ради обретосте славу жизни небесныя и радость неизреченную.

Припев: Святи́и преподобнии Иулиание и Евпраксие, моли́те Бо́га о нас.

Яко кадило благовонное, быша молитвы вашя, преблаженныя, / имиже и ныне всех, приходящих к вам с верою и любовию, / на путь спасения наставляете.

Сла́ва Отцу́ и Сы́ну и Свято́му Ду́ху:

Во дни святительства брата вашего Алексия явилися есте светильницы благочестия, / дарующя сирым и убогим утешение, / страждущим же и немощным заступление.

И ны́не и при́сно и во ве́ки веко́в. Ами́нь.

Богородичен: Творец всех явися из Тебе, Пречистая Владычице, / милостивно нас возлюбивый / и от работы вражия избавивый.

Песнь 6

Ирмос: Очисти мя, Спасе, / многа бо беззакония моя, / и из глубины зол возведи, молюся: / к Тебе бо возопих, и услыши мя, / Боже спасения моего.

Припев: Святи́и преподобнии Иулиание и Евпраксие, моли́те Бо́га о нас.

Не прельсти вы лукавый соблазнами мира сего и сластьми житейскими, / но, мужественне его препобедившя, преподобныя, / в терпении стяжали есте душы вашя.

Припев: Святи́и преподобнии Иулиание и Евпраксие, моли́те Бо́га о нас.

Сердца вашя обители Духа Святаго соделаша, святыя, / темже и нам помозите сердца очистити от всякия скверны, / наставницы премудрыя.

Сла́ва Отцу́ и Сы́ну и Свято́му Ду́ху:

Огнь Божественныя любве имущя в душах вашых, молитвенницы чудныя, / светом Христовым просветите душы / верою и любовию почитающих вас.

И ны́не и при́сно и во ве́ки веко́в. Ами́нь.

Богородичен: Пречистая Богородице Дево, / укрепи веру Православную в стране нашей / и сохрани нас от всякаго зла.

Кондак, глас 2:

Что вас наречем, богомудрыя Иулиание и Евпраксие? / Немощныя сосуды естеством, / но подвиги и труды мужески понесосте; / смиренныя жены, / но славы отцев воистинну сподобистеся; / рода честнаго от земных, / но умалением себе Небеснаго отечества достигосте. / Молите усердно Владыку Христа спастися душам нашым.

Икос:

Христову Церковь украсившя житием вашим, преподобныя Иулиание и Евпраксие, / дивныя наставницы в подвизех иночествующым / и утешительницы всем притекающым к вам явилися есте. / Сего ради ныне восхваляем вас песньми духовными, жены богомудрыя, / и с любовию взываем: / молите усердно Владыку Христа спастися душам нашым.

Песнь 7

Ирмос: Божия снизхождения / огнь устыдеся в Вавилоне иногда, / сего ради отроцы в пещи радованною ногою, / яко во цветнице ликующе, пояху: / благословен еси, Боже отец наших.

Припев: Святи́и преподобнии Иулиание и Евпраксие, моли́те Бо́га о нас.

Общаго жития женскаго на Руси ревнительницы бывшя, премудрыя Иулиание и Евпраксие, / собрасте многия инокини во обитель вашу, / юже не оставите молитвами вашими.

Припев: Святи́и преподобнии Иулиание и Евпраксие, моли́те Бо́га о нас.

Всем приходящым к вам были есте, яко матери и сестры любезныя: / алчущих напитавшя, жаждущих напоившя, / странных упокоившя, скорбящих утешившя.

Сла́ва Отцу́ и Сы́ну и Свято́му Ду́ху:

Видя Господь веру вашу и усердие преизрядное, преблаженныя Иулиание и Евпраксие, / дарова вам благодать чудеса творити, / да прославят люди Бога, дивнаго во святых Своих.

И ны́не и при́сно и во ве́ки веко́в. Ами́нь.

Богородичен: Помилуй нас, Владычице, Мати Бога нашего, / чающих Твоея помощи и заступления, / Тя бо едину по Бозе Заступницу имамы.

Песнь 8

Ирмос: Седмерицею пещь / халдейский мучитель / богочестивым неистовно разже, / силою же лучшею спасены сия видев, / Творцу и Избавителю вопияше: / отроцы благословите, / священницы, воспойте, / людие, превозносите во вся веки.

Припев: Святи́и преподобнии Иулиание и Евпраксие, моли́те Бо́га о нас.

Сугубую благодать восприемшя, / боголюбивых жен явилися есте наставницы прехвальныя. / С ними же Христу Богу и Церкви святей добре послужили есте.

Припев: Святи́и преподобнии Иулиание и Евпраксие, моли́те Бо́га о нас.

Богобоязненна и благочестива бывши, преподобная Иулиание, / научала еси ближния твоя благоговению и страху Божию, / имиже всяк, хотяй спастися, / обрящет премудрость и любовь Божию.

Сла́ва Отцу́ и Сы́ну и Свято́му Ду́ху:

Единаго Бога взыскующи, / имела еси собеседники Ангелы Божия, преподобная мати Евпраксие. / Ныне же с ними воспеваеши славу Троице Единосущней и Нераздельней.

И ны́не и при́сно и во ве́ки веко́в. Ами́нь.

Богородичен: Превечнаго Бога родила еси, Пресвятая Мати Дево, / Егоже поем и превозносим во вся веки.

Песнь 9

Ирмос: Ужасеся о сем Небо / и земли удивишася концы, / яко Бог явися человеком плотски, / и чрево Твое бысть пространнейшее Небес. / Тем Тя, Богородицу, / Ангелов и человек чиноначалия величают.

Припев: Святи́и преподобнии Иулиание и Евпраксие, моли́те Бо́га о нас.

Яко горлицы непорочныя и голубицы чистыя, / принесли есте душы вашя в жертву живую Христу, Богу нашему, / Егоже ныне со всеми святыми величаете.

Припев: Святи́и преподобнии Иулиание и Евпраксие, моли́те Бо́га о нас.

Днесь ликовствуют людие и воспевают Господеви песнь благодарственную: / слава Тебе, Боже, / даровавшему престольному граду Москве святыя заступницы.

Сла́ва Отцу́ и Сы́ну и Свято́му Ду́ху:

Радуйся ныне обитель Зачатиевская, града Москвы украшение, / в тебе бо прославишася преподобныя жены Иулиания и Евпраксия, / благочестием и добронравным житием возсиявшыя.

И ны́не и при́сно и во ве́ки веко́в. Ами́нь.

Богородичен: Очисти нас от всякия скверны, Пресвятая Мати Дево, / и избави муки вечныя, / Ты бо еси Заступница всесильная рода христианского.

Светилен:

Пресветлую память вашу празднующе, / умиленно взываем к вам, досточудныя Иулиание и Евпраксие: / молитеся ко Господу, / да и мы сподобимся быти причастники света невечерняго.

Слава, и ныне, Богородичен:

Исповедуем Тя, Всенепорочная Дево, Владычицу Богородицу, / родила бо еси Бога неизреченно, / даровавшаго нам спасение и велию милость.

Молитва

О, преподобныя Иулиание и Евпраксие, подвижницы Христовы, инокинь московских наставницы и всех прибегающих к вам скорые помощницы! Вы от юности Бога возлюбившя, иноческаго жития возжелали есте и благословением митрополита Алексия, святаго брата вашего, обитель девичию устроили есте. В нейже, усердно потрудившяся, молитвою, постом и бдением сердца очистили есте и образ благонравнаго жития показали есте.

Темже, яко имеющя дерзновение ко Всемилостивому Спасу, не оставите места сего святаго, и инокинь, чающих вашея помощи и заступления. Сохраните град Москву от всяких бед и напастей, междоусобныя брани и нашествия иноплеменников. Нам же, почитающим вас любовию, даруйте мир и единомыслие, да, вашыми молитвами соблюдаеми и сохраняеми, исповедуем Святую Троицу, Отца и Сына и Святаго Духа. Аминь.