16 мая.

Канон преподобному Феодосию, игумену Печерскому, начальнику в Российстей земли монашескаго общаго жития

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 8:

Возвы́сився на доброде́тель, измла́да возлюби́в мона́шеское житие́, к жела́нию до́блественне дости́г, всели́лся еси́ в пеще́ру и, украси́в житие́ твое́ поще́нием и све́тлостию, в моли́твах, я́ко безпло́тен, пребыва́л еси́, в Росси́йстей земли́, я́ко све́тлое свети́ло, просия́в, о́тче Феодо́сие, моли́ Христа́ Бо́га спасти́ся душа́м на́шим.

Кано́н, гла́с 8.

Пе́снь 1.

Ирмос: Колесницегони́теля фарао́ня погрузи́ чудотворя́й иногда́ Моисе́йский же́зл, крестообра́зно порази́в и раздели́в мо́ре, Изра́иля же беглеца́, пешехо́дца спасе́, пе́снь Бо́гови воспева́юща.

Припев: Преподо́бне о́тче Феодо́сие, моли́ Бо́га о нас.

Богоуго́дный по́двиг стяжа́в, о́тче Феодо́сие, богови́дец яви́лся еси́. Те́мже моли́ся Бо́гу, Ему́же угоди́л еси́, отгна́ти мра́к неве́дения моего́, сло́во же блаже́нное вдохну́ти, воспе́ти тя́.

Припев: Преподо́бне о́тче Феодо́сие, моли́ Бо́га о нас.

От ма́терня чре́ва прилепи́лся еси́ Бо́гу, преподо́бне, я́ко прему́дрый Па́вел и проро́к же дре́вле Иереми́я. Те́мже тя́ Боже́ственная благода́ть устна́ми, Феодо́сие, Бо́жия слугу́ нарече́.

Сла́ва Отцу́ и Сы́ну и Свято́му Ду́ху:

Спаси́теля за́поведи послу́шав от ю́ности, му́дре, жи́знь сию́ нивочто́же положи́в, кре́ст жела́я носи́ти на ра́менах твои́х, вся́ земна́я возненави́дел еси́, на небе́сная взира́я, Феодо́сие.

И ны́не и при́сно и во ве́ки веко́в. Ами́нь.

Богородичен: Вопло́щся от пречи́стых Твои́х ложе́сн, Де́во Пресвята́я, Бо́жие Сло́во все́х просвети́ богоразу́мия све́том и челове́ков торжество́ ли́ку Ангельскому сподо́би, на небе́сная возве́д.

Пе́снь 3.

Ирмос: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, еди́не Человеколю́бче.

Припев: Преподо́бне о́тче Феодо́сие, моли́ Бо́га о нас.

Нетле́нными да́ры и духо́вными, свя́те, боже́ственную твою́ и блаже́нную обогати́в ду́шу, ви́дети возжеле́л еси́ гро́б Госпо́день, но свы́ше бы́л еси́ возбране́н Бо́жиим смотре́нием.

Припев: Преподо́бне о́тче Феодо́сие, моли́ Бо́га о нас.

Же́ртва соверше́нна, и́стинна и непоро́чна восхоте́в бы́ти Агнца, взе́млющему, блаже́нне, пречи́стою кро́вию грехи́ всего́ ми́ра, безкро́вную же́ртву себе́ приноси́л еси́.

Сла́ва Отцу́ и Сы́ну и Свято́му Ду́ху:

Уста́вов ты́ стяжа́тель от версты́ ю́ностныя, о́тче, бы́в и самоде́ржец ума́, мирски́я пучи́ны избежа́в, наставле́ние прия́л еси́ от Боже́ственнаго Ду́ха.

И ны́не и при́сно и во ве́ки веко́в. Ами́нь.

Богородичен: Ра́дуйся, ро́ждшая Еди́на все́х Го́спода; ра́дуйся, челове́ком ра́дость провозвести́вшая; ра́дуйся, ски́ние и несеко́мая горо́, ве́рных утвержде́ние, еди́на Препе́тая.

Та́же седа́лен свята́го, гла́с 4:

Па́че ума́ челове́ча яви́лся еси́, преподо́бне, на земли́, Бо́жий са́д свяще́нный, посреде́ до́му Госпо́дня стоя́, подае́ши пло́д боле́зней твои́х ученико́м твои́м: от у́ст бо твои́х благода́ть Ду́ха возрасти́л еси́, о́браз бы́в подвиго́в и уста́в лю́бящих Го́спода. Его́же ны́не моли́ти не преста́й спасти́ся пою́щим тя́.

Пе́снь 4.

Ирмос: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра Отча, и на́шу нищету́ посети́в. Те́м с проро́ком Авваку́мом зову́ Ти: си́ле Твое́й сла́ва, Человеколю́бче.

Припев: Преподо́бне о́тче Феодо́сие, моли́ Бо́га о нас.

Благода́ть Ду́ха возрасте́ в тебе́, о́тче, егда́ ро́ждшую тя́ ви́дел еси́, пла́чущуюся и рыда́ющую кре́пце, ты́, предстоя́в струя́ми сле́зы точа́щей, непоколеби́мь сто́лп и неподви́жимь пребы́л еси́.

Припев: Преподо́бне о́тче Феодо́сие, моли́ Бо́га о нас.

Лю́тыми челове́ки вра́г вселука́вый тща́шеся отто́ргнути тебе́, Феодо́сие, от гнезда́ преукраше́на, жела́ема тобо́ю, но ты́ сего́ нивочто́же вмени́л еси́, полки́ сего́ отгоня́ моли́твами твои́ми и поя́: си́ле Твое́й сла́ва, Человеколю́бче.

Сла́ва Отцу́ и Сы́ну и Свято́му Ду́ху:

Окропля́я себе́ дожде́м духо́вным, и живо́тным исто́чником напоя́яся, язы́ком наста́вника Анто́ния, кла́с боже́ственный прозя́бл еси́ и пита́еши мно́жества, неистощи́мая вои́стинну Ио́сифова жи́тница бы́в.

И ны́не и при́сно и во ве́ки веко́в. Ами́нь.

Богородичен: Кто́ изрещи́ досто́йно возмо́жет чуде́с Твои́х, Чи́стая, глубину́? Тобо́ю бо ве́сь ми́р, хвалу́ Ти́ принося́, поми́лован быва́ет и избавля́ется от бе́д лю́тых и разли́чных зо́л, враго́в же и напа́стей.

Пе́снь 5

Ирмос: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся.

Припев: Преподо́бне о́тче Феодо́сие, моли́ Бо́га о нас.

Доброде́тельных по́двиг твои́х возсия́ исправле́ние, о́тче: жили́ще бо, бы́вшее дре́вле ху́до, простра́нно сотвори́л еси́, мно́ги приве́д покло́нники Бо́гу, подаю́щему си́м вся́к дово́л твои́ми моли́твами.

Припев: Преподо́бне о́тче Феодо́сие, моли́ Бо́га о нас.

Све́тлыми заря́ми подвиго́в твои́х отгони́мо быва́ше мно́жество бесо́в от твоего́ жили́ща, сше́ствоваше бо ти́ все́х Творца́ благода́ть Ду́ха и сла́вна тя́ яви́, Феодо́сие.

Сла́ва Отцу́ и Сы́ну и Свято́му Ду́ху:

Спа́са Ще́драго посреде́ це́ркве воспе́л еси́, те́мже щедро́ты Своя́ бога́тыя посла́ тебе́, оскуде́ния разреша́я печа́ль, приснотеку́щия же да́ры источа́я ста́ду твоему́.

И ны́не и при́сно и во ве́ки веко́в. Ами́нь.

Богородичен: Превы́шши была́ еси́ вы́шних си́л, Богоблагода́тная, заче́ншая Сло́во, вся́ческая сло́вом сотво́ршее, и ро́ждшая от Отца́ пре́жде ве́к неизрече́нно ро́ждшееся.

Пе́снь 6.

Ирмос: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя.

Припев: Преподо́бне о́тче Феодо́сие, моли́ Бо́га о нас.

Моли́твами, и бде́нием, и псало́мскими пе́нии непреста́нными, твою́ ду́шу ра́й Боже́ственный сотвори́л еси́, живоно́сное возрасти́в дре́во честно́е я́ве, Спа́са и Го́спода.

Припев: Преподо́бне о́тче Феодо́сие, моли́ Бо́га о нас.

Изво́лил еси́ та́йное смире́ние, Влады́чне нищете́ подо́бяся, блаже́нне: во́лею бо твое́ю в путеше́ствии, повеле́нием лени́ваго раба́ везти́ во́з к боже́ственному ме́сту прия́л еси́, иде́же покланя́емь от срета́ющих позна́лся еси́.

Сла́ва Отцу́ и Сы́ну и Свято́му Ду́ху:

Подо́бяся но́ги Умы́вшему Свои́м ученико́м, богому́дре, во́ду че́рпати и на ра́му носи́ти изво́лил еси́ и дрова́ свои́ма рука́ма принося́ и сеча́ нача́льника трудо́в себе́ мона́хом показа́л еси́.

И ны́не и при́сно и во ве́ки веко́в. Ами́нь.

Богородичен: Умерщвле́н бы́сть, Богоро́дице, Тобо́ю многоко́зненный вра́г, всю́ тва́рь пре́жде тле́ю погуби́вый, ме́ртвии же Тобо́ю к жи́зни взыдо́хом, и́бо родила́ еси́ вои́стинну жи́знь все́х, Го́спода.

Конда́к, гла́с 3.

Звезду́ Росси́йскую дне́сь почти́м, от восто́ка возсия́вшую и на за́пад прише́дшую, всю́ же страну́ сию́ чудесы́ и добро́тою обогати́вшую и вся́ ны́ соде́янием и благода́тию мона́шескаго уста́ва, блаже́ннаго Феодо́сия.

Икос:

Кто́ изрещи́ возмо́жет по́двиги твоя́, о́тче? Или́ кто́ изочте́т мно́жества трудо́в твои́х и чуде́с ди́вных? Еще́ бо во пло́ти сы́й, Безпло́тнаго ви́дел еси́, в пло́тяне о́бразе бесе́дующа к тебе́ и да́р принося́ща тебе́, Бо́гом по́сланное зла́то. Па́че челове́ка ты́ яви́лся еси́ смире́нием и кро́тким нра́вом и духо́вныя му́дрости испо́лнен. Те́м, Ду́ха в себе́ прие́мь, во све́те ви́ден бы́л еси́, я́ко со́лнце, сия́я. И мене́, тебе́ пою́ща, просвети́ сия́нием твои́м, преподо́бне, мона́шескаго уста́ва, боже́ственный Феодо́сие.

Пе́снь 7.

Ирмос: От Иуде́и доше́дше, о́троцы, в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.

Припев: Преподо́бне о́тче Феодо́сие, моли́ Бо́га о нас.

К моли́твам твои́м, блаже́нне, вся́к прибега́я ве́рою, никогда́же постыди́тся: прие́млет бо благода́ть проше́ния, о́тче, и возврати́вся, лику́ет, поя́: благослове́н Бо́г оте́ц на́ших.

Припев: Преподо́бне о́тче Феодо́сие, моли́ Бо́га о нас.

Ты́ оте́ц яви́лся еси́ и засту́пник си́рым, и вдови́цам наде́жда, и боля́щим все́м воста́ние, о́тче, бы́л еси́. Те́мже пое́м: благослове́н Бо́г оте́ц на́ших.

Сла́ва Отцу́ и Сы́ну и Свято́му Ду́ху:

Удобре́ние мона́хом и пу́ть спасе́ния челове́ком ты́ бы́л еси́: обога́щ бо вся́ твои́ми глаго́лы боже́ственных та́ин, учи́л еси́ глаго́лати: благослове́н Бо́г оте́ц на́ших.

И ны́не и при́сно и во ве́ки веко́в. Ами́нь.

Богородичен: Из деви́ческия утро́бы вопло́щся, Христе́, яви́лся еси́ на спасе́ние на́ше. Те́м, Твою́ Ма́терь ве́дуще Богоро́дицу, благода́рственно пое́м: благослове́н Бо́г оте́ц на́ших.

Пе́снь 8.

Ирмос: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Припев: Преподо́бне о́тче Феодо́сие, моли́ Бо́га о нас.

Якоже проро́к боже́ственный, прови́дя ду́хом, явля́ешися, Феодо́сие преблаже́нне: и́бо повелева́еши я́ве испо́лнити обеща́нное Пресвяте́й Богоро́дице; о́н же, уди́влся, испове́да чи́стым смы́слом, прославля́я Бо́га.

Припев: Преподо́бне о́тче Феодо́сие, моли́ Бо́га о нас.

К твоему́ жили́щу прири́ща, я́ко еле́нь ко исто́чнику, приснотеку́щую нетле́нную пи́щу получи́ти благочести́вый кня́зь, и́же зе́млю сию́ содержа́й. Хотя́ у́бо свечеря́ти ему́, блаже́нне, но оскуде́ние строи́телю извеща́ющу, повеле́нием твои́м напо́лнися ме́да ве́сь сосу́д тво́й.

Сла́ва Отцу́ и Сы́ну и Свято́му Ду́ху:

Твоя́ по́двиги воспе́ша Ангельския си́лы, Феодо́сие, и твое́ житие́ ли́к преподо́бных похвали́, све́тлое и украше́нное мона́хов ра́дование. Те́м и ны́не, сра́дуяся Ему́ и свеселя́ся, пое́ши согла́сно: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

И ны́не и при́сно и во ве́ки веко́в. Ами́нь.

Богородичен: Тя́, Пречи́стая Богоро́дице, жи́зни моея́ предлага́ю Храни́тельницу и Засту́пницу непобеди́му, Помо́щница ми́ бу́ди от бе́д и скорбе́й, избавля́ющи Твоего́ недосто́йнаго раба́, любо́вию пою́ща: о́троцы, благослови́те, свяще́нницы, воспо́йте, лю́дие, превозноси́те Чи́стую во ве́ки.

Песнь 9

Ирмос: Устраши́ся вся́к слу́х неизрече́нна Бо́жия снизхожде́ния, я́ко Вы́шний во́лею сни́де да́же и до пло́ти, от деви́ческаго чре́ва бы́в Челове́к. Те́мже Пречи́стую Богоро́дицу, ве́рнии, велича́ем.

Припев: Преподо́бне о́тче Феодо́сие, моли́ Бо́га о нас.

Па́мять твоя́ дне́сь на́м, я́ко со́лнце, возсия́, преподо́бне: ра́дуемся, целу́юще ра́ку твою́ и, я́ко о́крест Боже́ственнаго киво́та стоя́ще, ве́рно пое́м твое́ успе́ние с вы́шними чи́нми, Феодо́сие.

Припев: Преподо́бне о́тче Феодо́сие, моли́ Бо́га о нас.

Ра́дуйся, земле́ Ро́сская, прие́мши сокро́вище некра́домо от Го́спода, помо́щника вели́ка богоблаже́ннаго и засту́пника те́пла Феодо́сия, и с ли́ком по́стническим весели́ся и ты́, нача́ло гра́де Ро́сский.

Припев: Преподо́бне о́тче Феодо́сие, моли́ Бо́га о нас.

Собра́ся торжество́ ны́не в па́мяти твое́й воспева́ти Го́спода, тебе́ пода́вша до́брыя по́двиги, я́же ты́ претерпе́л еси́. Те́мже моли́ся Ему́, свя́те, изба́витися ста́ду твоему́ от собла́зн вра́жиих, е́же ты́ стяжа́л еси́, му́дре, моли́твами твои́ми.

Сла́ва Отцу́ и Сы́ну и Свято́му Ду́ху:

Спаси́ мя, еди́не Изба́вителю, блудни́цы и блу́днаго прие́мый те́плое покая́ние и мытаре́во, Спа́се, воздыха́ние, и бу́ди ми́лостив, Христе́, мне́, блу́дному, моли́твами Твоего́ уго́дника, отгоня́я грехо́в мои́х мно́жество.

И ны́не и при́сно и во ве́ки веко́в. Ами́нь.

Богородичен: Пощади́ мя, Спа́се рожде́йся, и сохрани́в Ро́ждшую Тя́ без тли́ по рождестве́, егда́ ся́деши суди́ти дела́ моя́, грехи́ моя́ презре́в и беззако́ния, Безгре́шен сы́й и Ми́лостив, я́ко Человеколю́бец.

Свети́лен.

Све́т Единосу́щныя Тро́ицы восприе́мь в се́рдце твое́м, Феодо́сие, отце́м о́тче, благочести́выя просвети́л еси́, в пеще́ре укре́плься с вели́ким Анто́нием, Ангелом единокро́вне. С ни́миже помина́й тебе́ ве́рою воспева́ющих.

Молитва преподобному Феодосию, игумену Киево-Печерскому

О, свяще́нная главо́, А́нгеле земны́й и челове́че Небе́сный, преподо́бне и Богоно́сне о́тче наш Феодо́сие, изря́дный слуго́ Пресвяты́я Богоро́дицы, во и́мя Ея́ свято́е оби́тель пречу́дну на гора́х Пече́рских сооруди́вый, и в ней чуде́с мно́жеством просия́вый! Мо́лим тя со усе́рдием мно́гим, моли́ся за нас ко Го́споду Бо́гу, и испроси́ от Него́ вели́кия и бога́тыя ми́лости: ве́ру пра́ву, наде́жду спасе́ния несомне́нну, любо́вь ко всем нелицеме́рну, благоче́стие непоколеби́мое, душ и теле́с здра́вие, жите́йских потре́б дово́льство, и да не во зло обрати́м блага́я, да́руемая нам от щедрода́тельныя Его́ десни́цы, но в сла́ву и́мени Его́ свята́го, и во спасе́ние на́ше. Сохрани́, уго́дниче Бо́жий, предста́тельством твои́м святы́м страну́ на́шу, Це́рковь Православноросси́йскую, град твой, и Ла́вру твою́ невреди́мыми от вся́каго зла, и вся лю́ди притека́ющия на поклоне́ние к честно́му твоему́ гро́бу и пребыва́ющия во святе́й оби́тели твое́й, осени́ Небе́сным твои́м благослове́нием и от вся́ких зол и бед ми́лостивно изба́ви. Наипа́че же в час кончи́ны на́шея покажи́ нам многомо́щное твое́ покрови́тельство: да изба́вимся моли́твами твои́ми ко Го́споду вла́сти лю́таго мироде́ржца и сподо́бимся насле́дити Ца́рство Небе́сное. Яви́ нам, о́тче, благосе́рдие твое́ и не оста́ви нас си́рых и безпо́мощных, да вы́ну славосло́вим ди́внаго во святы́х Свои́х Бо́га, Отца́, и Сы́на, и Свята́го Ду́ха, и твое́ свято́е заступле́ние, во ве́ки веко́в. Ами́нь.