15 мая.

Канон на перенесение мощей святых мучеников Бориса и Глеба, во святом Крещении Романа и Давида

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Дне́сь церко́вная разширя́ются не́дра, прие́млющи бога́тство Бо́жия благода́ти, веселя́тся Ру́сстии собо́ри, ви́дяще пресла́вная чудеса́, я́же твори́те приходя́щим к ва́м ве́рою, святи́и чудотво́рцы Бори́се и Гле́бе, моли́те Христа́ Бо́га, да спасе́т ду́ши на́ша.

Ин тропа́рь, гла́с 2:

Правди́вая страстоте́рпца и и́стинная Ева́нгелия Христо́ва послу́шателя, целому́дренный Рома́не с незло́бивым Дави́дом, не сопроти́в ста́ста врагу́ су́щу бра́ту, убива́ющему телеса́ ва́ша, душа́м же косну́тися не могу́щу. Да пла́чется у́бо злы́й властолю́бец, вы́ же ра́дующеся с ли́ки Ангельскими, предстоя́ще Святе́й Тро́ице, моли́теся о держа́ве сро́дников ва́ших, богоуго́дней бы́ти, и сыново́м Росси́йским спасти́ся.

Кано́н му́чеником, гла́с 8.

Пе́снь 1.

Ирмос: Сокруши́вшему бра́ни мы́шцею Свое́ю и прове́дшему Изра́иля сквозе́ Чермно́е мо́ре, пои́м Ему́, я́ко Изба́вителю на́шему Бо́гу, я́ко просла́вися.

Припев: Святи́и му́ченицы Борисе и Глебе, моли́те Бо́га о нас.

Похва́лим, ве́рнии, пресла́вную и честну́ю дво́ицу, прехва́льных му́ченик Рома́на и Дави́да, и́миже Христо́с просвети́ всю́ страну́ Ру́сскую.

Припев: Святи́и му́ченицы Борисе и Глебе, моли́те Бо́га о нас.

Дарова́вшему си́м да́р благода́ти исцеле́ния, стра́сти и неду́ги исцеля́ти, Влады́це Христу́ воспои́м Спа́су и Изба́вителю на́шему, я́ко просла́вися.

Сла́ва Отцу́ и Сы́ну и Свято́му Ду́ху:

Якоже рече́ Христо́с: ве́руяй в Мя́, дела́, я́же Аз творю́, и то́й сотвори́т, и бо́льша си́х. Сия́ прие́мша, святи́и му́ченицы, боля́щия исцеля́ете и ду́хи бесо́вския отго́ните.

И ны́не и при́сно и во ве́ки веко́в. Ами́нь.

Богородичен: Честне́йшую херуви́м и сла́внейшую серафи́м, ро́ждшую на земли́ Бо́га Сло́ва, чистоты́ хра́м душе́вный, Богоро́дицу Мари́ю ве́рно восхва́лим.

Пе́снь 3.

Ирмос: Утверди́ся се́рдце мое́ во Го́споде, вознесе́ся ро́г мо́й в Бо́зе мое́м, разшири́шася на враги́ моя́ уста́ моя́, возвесели́хся о спасе́нии Твое́м.

Припев: Святи́и му́ченицы Борисе и Глебе, моли́те Бо́га о нас.

Честны́м пренесе́нием теле́с ва́ших, сла́внии, просла́вися честна́я Це́рковь, иму́щая в себе́ благода́ти сокро́вище неоску́дное и пречу́дное.

Припев: Святи́и му́ченицы Борисе и Глебе, моли́те Бо́га о нас.

Святы́я ра́ки ва́ши честны́я иму́щи в себе́ да́ры благода́тныя, пресла́вная телеса́ ва́ша, святи́и му́ченицы Бори́се и Гле́бе, врачи́ неду́жным.

Сла́ва Отцу́ и Сы́ну и Свято́му Ду́ху:

Све́тел вои́стину и прече́стен Вышегра́д, превы́ше бо все́х градо́в превознесе́ся, имы́й в себе́ честну́ю це́рковь, в ню́же пренесе́ни бы́ша би́сери многоце́ннии.

И ны́не и при́сно и во ве́ки веко́в. Ами́нь.

Богородичен: Утверди́, Де́во, помышле́ние мое́ и у́м мо́й пла́вающий утиши́, Ко́рмчию бо родила́ еси́ и Очи́стника собла́зном на́шим.

Седа́лен святы́х, гла́с 8:

Христо́вы уве́девше за́поведи благи́я, Того́ возлюби́вше, страстоно́сцы сла́внии, о убие́нии телесе́ неради́сте, ду́ши же прекра́сныя в ру́це Христу́ преда́сте: о́в, копие́м пробода́емь, веселя́щеся, други́й же, я́ко а́гня, без ми́лости закала́емь, сего́ ра́ди прия́ша да́р исцеле́ния, му́ченицы самобра́тнии, моли́те Христа́ Бо́га грехо́в оставле́ние дарова́ти чту́щим любо́вию святу́ю па́мять ва́шу.

Пе́снь 4.

Ирмос: Проро́к Авваку́м у́мныма очи́ма прови́де, Го́споди, прише́ствие Твое́, те́м и вопия́ше: от ю́га прии́дет Бо́г. Сла́ва си́ле Твое́й, сла́ва снизхожде́нию Твоему́.

Припев: Святи́и му́ченицы Борисе и Глебе, моли́те Бо́га о нас.

Бра́тие прекра́снии, ра́дуйтеся, я́ко венцы́ жела́емыя от Бо́га прие́мше и сего́ ра́ди оста́вльше всю́ сла́ву тле́ющую, да Христа́ приобря́щете еди́наго, Би́сера безце́ннаго.

Припев: Святи́и му́ченицы Борисе и Глебе, моли́те Бо́га о нас.

Христо́вы уве́девше за́поведи Боже́ственныя и Тому́ после́дующе, — воста́нет бо, — рече́, — бра́т на бра́та, — сего́ ра́ди прия́сте ну́ждную сме́рть, я́ко а́гнцы закала́еми.

Сла́ва Отцу́ и Сы́ну и Свято́му Ду́ху:

Прободе́ному на Кресте́ копие́м тебе́ ра́ди после́дуя стопа́м, Агнцу Бо́жию, сла́вный страда́льче, уби́йцам не проти́влься, Бори́се чу́дный, во́ине до́блий.

И ны́не и при́сно и во ве́ки веко́в. Ами́нь.

Богородичен: Ра́дуйся, душе́вная Це́рковь и руно́ пречи́стое богоро́сное, воды́ живы́я исто́чниче неистека́ющий, Влады́чице, запечатле́нный де́вством, рабы́ Своя́ сохрани́ от все́х зо́л.

Пе́снь 5

Ирмос: Го́споди Бо́же на́ш, ми́р да́ждь на́м, Го́споди Бо́же на́ш, стяжи́ ны, Го́споди ра́зве Тебе́ ино́го не ве́мы, и́мя Твое́ имену́ем.

Припев: Святи́и му́ченицы Борисе и Глебе, моли́те Бо́га о нас.

Яко Агнец беззло́бив, не рету́я же, ни вопия́, Сы́н Бо́жий веде́ся на сме́рть. Вы́ же, Сему́ после́дующе, не от врага́, но от сро́дника убие́ни бы́сте.

Припев: Святи́и му́ченицы Борисе и Глебе, моли́те Бо́га о нас.

Во́зрастом и ю́ностию о любви́ преле́стней небрего́сте, святи́и, Христо́вы за́поведи исполня́юще, ве́чную жи́знь приобрето́сте.

Сла́ва Отцу́ и Сы́ну и Свято́му Ду́ху:

Вторы́й Солу́нь ра́дуется — в стране́ Ру́сстей Вышегра́д сла́вный, име́я в себе́ благода́ть сла́вну пренесе́нием теле́с ва́ших.

И ны́не и при́сно и во ве́ки веко́в. Ами́нь.

Богородичен: Уврачу́й, Пречи́стая Влады́чице, ду́шу мою́, молвы́ же и напа́сти бесо́вския прогоня́щи, Врача́ бо страсте́м родила́ еси́ и Творца́ все́х.

Пе́снь 6.

Ирмос: Яко во́ды морски́я, Человеколю́бче, волна́ми жите́йскими обурева́юся, те́мже, я́ко Ио́на, та́ко вопию́ Ти́: возведи́ от тли́ живо́т мо́й, Благоутро́бне Го́споди.

Припев: Святи́и му́ченицы Борисе и Глебе, моли́те Бо́га о нас.

Вся́ко ме́сто освяти́ся и и́же в неду́зех исцелева́ются посеще́нием ва́шим, врачи́ пресла́внии, слепи́и прозира́ют, хро́мии хо́дят, слу́цыи простира́ются.

Припев: Святи́и му́ченицы Борисе и Глебе, моли́те Бо́га о нас.

Во всю́ зе́млю изыдо́ша веща́ния апо́стольская, ва́шими же чуде́с исцеле́нии вселе́нная испо́лнися, ве́рным бо источа́ете здра́вие оби́льно, сла́внии.

Сла́ва Отцу́ и Сы́ну и Свято́му Ду́ху:

Сло́во Твое́ испо́лнися, Человеколю́бче, е́же рече́ ученико́м Свои́м: гра́д бо не укры́ется, верху́ горы́ стоя́. И се́ бо Вышегра́д просвеща́ет всю́ зе́млю Ру́сскую явле́нием святы́х Твои́х, Го́споди.

И ны́не и при́сно и во ве́ки веко́в. Ами́нь.

Богородичен: Всепе́тая Де́во, све́тлый о́блаче, прожени́ мра́к души́ моея́, Яже Со́лнце пра́ведное ро́ждшая, и наста́ви мя́ на стезю́ живо́тную мольба́ми Свои́ми, Пренепоро́чная.

Конда́к, гла́с 4.

Яви́ся дне́сь в стране́ Ру́сстей благода́ть исцеле́ния все́м, к ва́м, блаже́ннии, приходя́щим и вопию́щим: ра́дуйтеся, засту́пницы те́плии.

Икос:

Новоявле́нных му́ченик пресла́вная па́мять дне́сь Ру́сстей земли́ све́тло возсия́, све́тлы бо яви́стеся зве́зды от Бо́га, чудесы́ облиста́юще, и́хже в па́мять Госпо́дь все́м ве́рным подае́т исцеле́ние и в темни́це избавле́ние. Те́мже и мы́, немощни́и, прииди́те, воспои́м сия́, да восприи́мем здра́вие, просвеща́ете бо слепы́я и неду́жныя исцеля́ете, засту́пницы те́плии.

Пе́снь 7.

Ирмос: Халде́йская пе́щь, огне́м распаля́емая, ороша́шеся Ду́хом, Бо́жиим предстоя́нием, о́троцы поя́ху: благослове́н еси́, Бо́же оте́ц на́ших.

Припев: Святи́и му́ченицы Борисе и Глебе, моли́те Бо́га о нас.

Вра́жия исчеза́ют полцы́, и пога́нская телеса́ постла́на быва́ют под но́ги во́инов на́ших, призыва́ющих имена́ святы́я ва́ша, му́ченицы Христо́ви.

Припев: Святи́и му́ченицы Борисе и Глебе, моли́те Бо́га о нас.

Пресла́вно просла́вися вся́ко ме́сто и страна́, в ни́хже созда́ни бы́ша честны́я це́ркви все́ми ве́рными, о и́мени ва́шем, сла́внии Христо́ви му́ченицы.

Сла́ва Отцу́ и Сы́ну и Свято́му Ду́ху:

Кто не диви́тся зе́млен ва́шему целому́дрию, ца́ри и кня́зи, судии́ же и вси́ ве́рнии, ва́ша чудеса́ пресла́вная ви́дяще, неисце́льныя бо стра́сти исцеля́ете вопию́щим: благослове́н Бо́г оте́ц на́ших.

И ны́не и при́сно и во ве́ки веко́в. Ами́нь.

Богородичен: Пречи́стая Влады́чице, Влады́ку все́х ро́ждшая, влады́чества мя́ зла́го свободи́в, наста́ви на пу́ть живо́тный, Благослове́нная Богоро́дице Прера́дованная.

Пе́снь 8.

Ирмос: Покрыва́яй вода́ми превы́спренняя Своя́, полага́яй мо́рю преде́л песо́к, и содержа́й вся́, Тя́ пое́т со́лнце, Тя́ сла́вит луна́, Тебе́ прино́сит пе́снь вся́ тва́рь, я́ко Соде́телю все́х во ве́ки.

Припев: Святи́и му́ченицы Борисе и Глебе, моли́те Бо́га о нас.

Помо́щники в ско́рбех, и в напа́стех, и беда́х, и в темни́це избавле́ние, и на бра́ни заступле́ние ва́шим посеще́нием от Бо́га прие́млем, призыва́юще ва́с, хра́брии, бра́тие прекра́снии.

Припев: Святи́и му́ченицы Борисе и Глебе, моли́те Бо́га о нас.

Исцеля́ете стра́сти, и бе́сы прого́ните, и напа́сти разоря́ете все́м, сла́вящим пресла́вно свято́е пренесе́ние теле́с ва́ших, всехва́льнии му́ченицы Христо́ви, засту́пницы гра́ду на́шему.

Сла́ва Отцу́ и Сы́ну и Свято́му Ду́ху:

О, блаже́нная, свята́я вои́стину, дво́ице преди́вная! Вы́ кня́зи князе́м, хра́бри же Христо́ви му́ченицы, о на́с те́плии моли́твеницы, вы́ бо обрета́етеся вско́ре, от бе́д избавля́юще.

И ны́не и при́сно и во ве́ки веко́в. Ами́нь.

Богородичен: Омраче́ние души́ моея́ прожени́, Всечи́стая Де́во, неразу́мия се́рдце мое́ просвети́ и у́м мо́й озари́, ро́ждшая Вели́каго сове́та Ангела, Иису́са Человеколю́бца, Бо́га же и Челове́ка, во обое́м соверше́на.

Песнь 9

Ирмос: Благослове́н Госпо́дь Бо́г Изра́илев, воздви́гнувый ро́г спасе́ния на́м в дому́ Дави́дове, Отрока Своего́, в ни́хже посети́ на́с Восто́к с высоты́ и напра́вил ны́ е́сть на пу́ть ми́ра.

Припев: Святи́и му́ченицы Борисе и Глебе, моли́те Бо́га о нас.

Благослове́н Госпо́дь Бо́г все́х, страну́ же и вся́ лю́ди защища́я, чту́щих ва́ши ра́ки, сла́внии, в честне́й це́ркви, в ню́же принесе́ни бы́сте свята́я телеса́ ва́ша сла́вная, Рома́не и Дави́де.

Припев: Святи́и му́ченицы Борисе и Глебе, моли́те Бо́га о нас.

Боже́ственною ре́вностию распала́еми, о че́сти земне́й и вла́сти небрего́сте, Христо́вы за́поведи соблюда́юще Боже́ственныя, те́мнаго кня́зя попра́ли есте́, святи́и.

Сла́ва Отцу́ и Сы́ну и Свято́му Ду́ху:

Благослове́н Госпо́дь, Бо́г Изра́илев, венча́вый дво́ицу пречестну́ю, в стране́ Ру́сстей уго́дников Свои́х, и́миже посети́ на́с, Светода́вче, свы́ше, умоле́н быва́я си́ми о на́с, Спа́се на́ш.

И ны́не и при́сно и во ве́ки веко́в. Ами́нь.

Богородичен: Благослове́н, Госпоже́, Пло́д Твоего́ чре́ва, призва́вый на́с из тмы́ и се́ни сме́ртныя и освяти́вый Себе́ лю́ди избра́нны. Сего́ моли́, Пречи́стая Влады́чице, рабо́м Свои́м побе́ды дарова́ти на враги́ проти́вныя.

Свети́лен.

Прииди́те, приступи́те, ве́рнии, в Боже́ственную це́рковь пресла́вных му́ченик Рома́на и Дави́да, и́же оста́виша сла́ву вре́менную и возлюби́ша сла́ву безконе́чную и в не́й лику́ют с небе́сными чи́нми. Моли́те о на́с, честну́ю ва́шу па́мять пра́зднующих.

Молитва благоверным князьям Борису и Глебу, во святом Крещении Роману и Давиду

О, дво́ице свяще́нная, бра́тие прекра́сная, до́блии страстоте́рпцы Бори́се и Гле́бе, от ю́ности Христу́ ве́рою, чи́стотою и любо́вию послужи́вшии, и кровми́ свои́ми, я́ко багряни́цею укра́сившиися и ны́не со Христо́м ца́рствующии, не забу́дите и нас су́щих на земли́, но я́ко те́плии засту́пницы, ва́шим си́льным хода́тайством пред Христо́м Бо́гом, сохрани́те ю́ных во святе́й ве́ре и чистоте́ неврежде́нными от вся́каго прило́га неве́рия и нечистоты́, огради́те всех нас от вся́кия ско́рби, озлобле́ний и напра́сныя сме́рти, укроти́те вся́кую вражду́ и зло́бу, де́йством воздвиза́емую от бли́жних и чу́ждых. Мо́лим вас, христолюби́вии страстоте́рпцы, испроси́те у Великодарови́таго Влады́ки всем нам оставле́ние прегреше́ний на́ших, единомы́слие и здра́вие, избавле́ние от наше́ствия иноплеме́нных, междоусо́бныя бра́ни, я́звы и гла́да. Снабдева́йте свои́м заступле́нием всех чту́щих святу́ю па́мять ва́шу во ве́ки веко́в. Ами́нь.