15 мая.
Канон равноапостольному Борису, царю Болгарскому (в Крещении Михаилу).
![равноапостольному Борису, царю Болгарскому (в Крещении Михаилу) равноапостольному Борису, царю Болгарскому (в Крещении Михаилу)](img_i/091.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропа́рь, гла́с 6:
Испо́лнен стра́ха Бо́жия/ и Креще́нием святы́м просвеще́н,/ был еси́ жили́ще Свята́го Ду́ха,/ благове́рный царю́ Бори́се./ Утверди́в же ве́ру Правосла́вную на земли́ Бо́лгарстей/ и жезл ца́рствия оста́вив,/ всели́лся еси́ в пусты́ню,/ процве́л еси́ в по́двизех/ и обре́л еси́ благода́ть пред Го́сподем./ Ны́не же предстоя́ Престо́лу Всевы́шняго,/ моли́ дарова́ти нам, моля́щимся тебе́,/ спасе́ние душ на́ших.
Кано́н свята́го. Гла́с 8.
Пе́снь 1.
Ирмос: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.
Припе́в: Святы́й благове́рный царю́ Бори́се, моли́ Бо́га о нас.
Ца́рским путе́м неукло́нно ше́ствуя из Еги́пта идолослуже́ния/ к Чермно́му мо́рю Креще́ния с наро́дом свои́м,/ благода́рственно с ве́рою воспе́л еси́ Изба́вителю и Бо́гу на́шему.
Припе́в: Святы́й благове́рный царю́ Бори́се, моли́ Бо́га о нас.
А́ще и фараони́тское противле́ние пога́ных вельмо́ж путь твой хотя́ше препя́ти/ и в ра́бство бесо́в верну́ти вме́сто свобо́ды во Христе́,/ но ты, ше́ствуя побе́дне, воспе́л еси́ Изба́вителю и Бо́гу на́шему.
Сла́ва Отцу́ и Сы́ну и Свято́му Ду́ху:
Ра́зумом непоколе́блемым устреми́лся еси́, святы́й царю́,/ к но́вому зако́ну благоче́стия, Бо́гом да́нному,/ авраа́мски вся непреподо́бная же́ртвуя/ и с умиле́нием воспева́я Изба́вителю и Бо́гу на́шему.
И ны́не и при́сно и во ве́ки веко́в. Ами́нь.
Богородичен: Свобожде́ние на́ше Рождество́м Твои́м/ прови́де в купине́ неопали́мой вели́кий Моисе́й, Чи́стая,/ и нас, изба́вленных, наста́ви непреста́нно пе́ти с ра́достию Изба́вителю и Бо́гу на́шему.
Пе́снь 3.
Ирмос: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.
Припе́в: Святы́й благове́рный царю́ Бори́се, моли́ Бо́га о нас.
Тве́рдый тя ка́мень ве́ры прия́т на основа́нии,/ те́мже врата́ а́дова воста́нием не поколеба́, утвержде́ннаго в Го́споде се́рдца твоего́,/ и вознесе́ся рог твой на враги́ твоя́.
Припе́в: Святы́й благове́рный царю́ Бори́се, моли́ Бо́га о нас.
Высо́кая глаго́лющии на Бо́га падо́шася,/ ты же, со смире́нием богоуго́дным и си́лою Креста́ победи́в,/ вознесе́н был во отца́ всего́ наро́да твоего́ и в сы́на Отца́ Небе́снаго.
Сла́ва Отцу́ и Сы́ну и Свято́му Ду́ху:
Обетова́нных благ лю́бящим Бо́га жела́я,/ вся я́ко уме́ты вмени́л еси́/ и по́двиг вели́кий равноапо́стола подъя́л еси́,/ со все́ми боря́ся, до́ндеже вконе́ц победи́в, Бо́гу угоди́л еси́.
И ны́не и при́сно и во ве́ки веко́в. Ами́нь.
Богородичен: Оби́лие благода́тей Бо́жиих излия́ся на род челове́ческий стра́нным рождество́м Твои́м, Пречи́стая,/ низведе́ бо во ад Рожде́нный Тобо́ю кня́зя ми́ра сего́/ и нас вла́сти его́ свободи́.
Та́же седа́лен, гла́с 2.
Милосе́рдие щедро́т Бо́жиих излия́ся на зе́млю Бо́лгарскую Креще́нием,/ я́коже дождь на руно́,/ и́же не возврати́ся тощ, до́ндеже напои́ вся./ Те́мже прозябо́ша се́мена ца́рствия/ и принесо́ша плодоноше́ние в Вы́шнюю жи́тницу,/ водя́щу, я́коже оте́ц, де́ти своя́ благове́рному царю́ Бори́су,/ крести́вшему себе́ и лю́ди своя́.
Пе́снь 4.
Ирмос: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.
Припе́в: Святы́й благове́рный царю́ Бори́се, моли́ Бо́га о нас.
Слу́ха Госпо́дня услы́шав, ко спасе́нию всех зову́щаго,/ и́го подъя́л еси́ Христо́во, крести́вся нелицеме́рно,/ и совмести́л еси́ ца́рская с благоче́стием,/ днем в багряни́це, но́щию же во вре́тищи Бо́гу моля́ся.
Припе́в: Святы́й благове́рный царю́ Бори́се, моли́ Бо́га о нас.
Твоя́ доброде́тель во всю зе́млю изы́де Бо́лгарскую/ и во о́браз всем лю́дем твои́м тя возвы́си,/ те́мже с любо́вию вла́сти твое́й повинова́хуся не то́кмо за гнев, но и за со́весть.
Сла́ва Отцу́ и Сы́ну и Свято́му Ду́ху:
А́може грех нече́стия умно́жися,/ преизбы́точествова благода́ть по апо́стольскому глаго́лу/ и возсия́ по Креще́нии богобоязли́вая душа́ твоя́ све́том/ от ю́га прише́дшаго Со́лнца пра́вды, Христа́ Бо́га на́шего.
И ны́не и при́сно и во ве́ки веко́в. Ами́нь.
Богородичен: Внегда́ прибли́жися ле́то благоволе́ния Бо́жия,/ прия́ла еси́ от Арха́нгела, Пречи́стая, благове́щение ра́дости,/ я́ко хо́щет Тобо́ю Бог роди́тися во свет язы́ком и сла́ву Изра́иля.
Пе́снь 5
Ирмос: У́тренююще, вопие́м Ти:/ Го́споди, спаси́ ны,/ Ты бо еси́ Бог наш,/ ра́зве Тебе́, ино́го не ве́мы.
Припе́в: Святы́й благове́рный царю́ Бори́се, моли́ Бо́га о нас.
Исполня́я вся до́лжная,/ во е́же све́ту пове́лений Божи́их возсия́ти новокреще́нным лю́дем,/ прия́л еси́ в зе́млю твою́ учи́телей слове́нских и уще́дрил еси́ я,/ в де́ле апо́стольства им посо́бствуя.
Припе́в: Святы́й благове́рный царю́ Бори́се, моли́ Бо́га о нас.
Во О́хрид град Кли́мента посла́в с Нау́мом,/ в Пресла́ве же Иоа́нна Екза́рха име́я с Константи́ном, и Фео́дора Ду́кса, и Хра́бра,/ процве́л еси́ в сло́ве, я́ко фи́никс,/ и, я́ко кедр лива́нский, умно́жился еси́.
Сла́ва Отцу́ и Сы́ну и Свято́му Ду́ху:
Бога́тно удобри́в ду́ши люде́й твои́х слове́нскою кни́гою/ и напои́в жа́ждущих благода́тию сло́ва,/ тогда́ пра́вде научи́шася живу́щии на земли́ Бо́лгарстей/ и вконе́ц преста́ нече́стие и́дольское.
И ны́не и при́сно и во ве́ки веко́в. Ами́нь.
Богородичен: О́гнь Тобо́ю супоста́ты пояде́, Пречи́стая,/ родила́ бо еси́ еди́наго Христа́ Спа́са на́шего,/ нас от ра́бства свободи́вшаго и Жизнь нам сме́ртию Свое́ю пода́вшаго.
Пе́снь 6.
Ирмос: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, яко Ио́на:/ от тли, Бо́же, возведи́ мя.
Припе́в: Святы́й благове́рный царю́ Бори́се, моли́ Бо́га о нас.
Рим затме́нный оста́вив,/ к восто́ку светле́йшаго Правосла́вия обрати́лся еси́/ и, Фо́тия Патриа́рха свята́го оглаше́ние прии́м,/ ка́ко подоба́ет в дому́ Бо́жий жи́ти, уве́дел еси́.
Припе́в: Святы́й благове́рный царю́ Бори́се, моли́ Бо́га о нас.
И́стину о Це́ркви Бо́лгарстей утверди́ти жела́я,/ к Собо́ру Константинопо́льскому обрати́лся еси́,/ отону́дуже архиепи́скопа получи́в,/ основа́ние кре́пкое автокефа́лии во времена́ ве́чная положи́л еси́.
Сла́ва Отцу́ и Сы́ну и Свято́му Ду́ху:
Сей день вои́стинну сотвори́ Госпо́дь,/ в о́ньже ты вся твоя́ прекра́сне соде́лал еси́,/ благове́рный царю́ Бори́се,/ те́мже возра́доватися нам подоба́ет Го́сподеви,/ па́мять твою́ пра́зднующе.
И ны́не и при́сно и во ве́ки веко́в. Ами́нь.
Богородичен: Цари́це Небе́сная, Де́во Пресвята́я,/ я́ко иму́щи ве́лие дерзнове́ние к Сы́ну Твоему́,/ свободи́ ны предста́тельством Твои́м от звере́й преиспо́дних/ и, я́ко проро́ка Ио́ну, спаси́ ны.
Конда́к, гла́с 8.
Взбра́нный воево́до Бо́га Вы́шняго,/ си́лою Креста́ победи́вый воста́ние тьмы/ и насади́вый благоче́стие на земли́ твое́й,/ име́яй же дерзнове́ние ко Го́споду,/ сохраня́й моли́твами твои́ми достоя́ние твое́, да зове́м ти:/ ра́дуйся, равноапо́стольне царю́ Бори́се,/ крести́телю земли́ Бо́лгарския.
Икос:
Возсия́вшу в Вифлее́ме Со́лнцу пра́вды/ и дне́ви светле́йшему наста́вшу на земли́,/ лю́дие бо́лгарстии, я́коже де́лателие о́нии,/ седя́ху во тьме се́ни сме́ртныя и пра́здни де́лания спаси́тельнаго./ Но обре́т я Госпо́дь ми́лостию Про́мысла Своего́ в час девя́тый,/ избра́ царя́ Бори́са в приста́вника Своего́,/ и́мже введе́ я в виногра́д Це́ркве Своея́ две́рию Креще́ния/ и возмезди́ ра́вным с пе́рвыми де́латели воздая́нием./ Те́мже, Его́ благодаря́ще, тому́ вопие́м:/ ра́дуйся, равноапо́стольне царю́ Бори́се, крести́телю земли́ Бо́лгарския.
Пе́снь 7.
Ирмос: О́троцы евре́йстии в пещи́/ попра́ша пла́мень дерзнове́нно/ и на ро́су огнь преложи́ша, вопию́ще:/ благослове́н еси́, Го́споди Бо́же, во ве́ки.
Припе́в: Святы́й благове́рный царю́ Бори́се, моли́ Бо́га о нас.
Апо́стольски ве́ру насажда́я,/ хра́мы и́стинному Бо́гу воздви́гл еси́ на земли́ твое́й,/ иде́же иере́ом честны́м сло́во пропове́дати и та́инства соверша́ти взыва́ющим:/ благослове́н еси́, Го́споди Бо́же, во ве́ки.
Припе́в: Святы́й благове́рный царю́ Бори́се, моли́ Бо́га о нас.
Ра́дость ве́лию даде́ ти Бог,/ внегда́ в Тивериопо́ли мо́щи святы́х пятна́десяти му́чеников из-под спу́да откры́шася,/ и зна́мения сотвори́ша ся, и в Брега́льницу пренесо́ша, всем лю́дем, взыва́ющим:/ благослове́н еси́, Го́споди Бо́же, во ве́ки.
Сла́ва Отцу́ и Сы́ну и Свято́му Ду́ху:
С бытие́ ви́дя твои́х вожделе́ний, я́ко благоче́стие насади́ся труды́ твои́ми,/ Це́рковь украси́ся со́нмом свяще́нства самовла́стнаго,/ сло́во слове́нское освяти́ся Богослуже́нием,/ Бо́га преи́скренне благодари́л еси́, взыва́я:/ благослове́н еси́, Го́споди Бо́же, во ве́ки.
И ны́не и при́сно и во ве́ки веко́в. Ами́нь.
Богородичен: Твоея́ ми́лости не отста́ви от нас, Богоро́дице,/ возлю́бленнаго Ти ра́ди царя́ Бори́са,/ и́же Сы́на Твоего́ и Тя́ в болга́рех просла́ви, зову́щих:/ благослове́н еси́, Го́споди Бо́же, во ве́ки.
Пе́снь 8.
Ирмос: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.
Припе́в: Святы́й благове́рный царю́ Бори́се, моли́ Бо́га о нас.
В боле́знь лю́тую впад и се́рдцем горя́ Бо́гу лу́чше угоди́ти,/ ца́рства отре́клся еси́ и, во и́ноческий о́браз оде́явся,/ непреста́нною моли́твою превозноси́л еси́ Христа́ во ве́ки.
Припе́в: Святы́й благове́рный царю́ Бори́се, моли́ Бо́га о нас.
Оби́тель воздви́г великому́ченику Пантелеи́мону,/ в ней всели́лся еси́ и, седмочи́слен ным посо́бствуя,/ с про́чиими в кни́гах неуста́но потруди́лся еси́,/ превознося́ Христа́ во ве́ки.
Сла́ва Отцу́ и Сы́ну и Свято́му Ду́ху:
Преспе́яние ду́ха ти дарова́ препросла́вленный Госпо́дь,/ и был еси́ о́браз по́двига Христо́ва,/ наставля́я люде́й твои́х дея́нием па́че, не́жели сло́вом,/ и превознося́ Христа́ во ве́ки.
И ны́не и при́сно и во ве́ки веко́в. Ами́нь.
Богородичен: О́блаче пресве́тлый, ороша́яй огнь и прохлажда́яй пла́мень,/ ороси́ мя благода́тию и прохлади́ разже́ннаго грехо́м,/ во е́же благода́рственно превозноси́ти Сы́на Твоего́ во ве́ки.
Пе́снь 9.
Ирмос: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее Небе́с/ Тем Тя, Богоро́дицу,/ А́нгелов и челове́к чинонача́лия велича́ют.
Припе́в: Святы́й благове́рный царю́ Бори́се, моли́ Бо́га о нас.
Люде́й твои́х наста́вив на путь спасе́ния и де́ло твое́ соверши́в,/ кончи́ну блаже́нную прия́л еси́ земна́го жития́/ и, в Ца́рство преше́д Небе́сное,/ мо́лишися непреста́нно о всех нас.
Припе́в: Святы́й благове́рный царю́ Бори́се, моли́ Бо́га о нас.
Ублажа́ем тя, равноапо́стола земли́ Бо́лгарския,/ Креще́нием святы́м и пи́смены слове́нскими/ вве́дшаго люде́й твои́х во свет ве́ры Христо́вы/ и моля́щагося непреста́нно о всех нас.
Сла́ва Отцу́ и Сы́ну и Свято́му Ду́ху:
Челове́ческим сло́вом тя просла́вихом, а́нгельских похва́л досто́йнаго,/ но, снизходя́, приими́ любо́вь се́рдца на́шего/ и бу́ди нам хода́тай ко Го́споду,/ моля́ся непреста́нно о всех нас.
И ны́не и при́сно и во ве́ки веко́в. Ами́нь.
Богородичен: Избра́нная от всех родо́в, Богоневе́сто,/ низложи́ си́льныя в го́рдости серде́ц их и вознеси́ смире́нныя,/ а́лчущия испо́лни вся́ческих благ и богатя́щияся отпусти́ тщи,/ вся бо мо́жеши, ели́ка хо́щеши, Всепе́тая.
Свети́лен.
Сро́днаго нам апо́стола, благове́рнаго Бори́са,/ пе́сньми почти́м вси, бра́тие,/ нас Креще́нием Бо́гу соедини́вшаго, и в Правосла́вии наста́вльшаго,/ и путь спасе́ния нам соде́лавшаго,/ и́мже сам пе́рвый проше́д, всех ве́рных нас возво́дит в Ца́рствие Небе́сное.
Молитва
О вели́кий уго́дниче Христо́в, благове́рный царю́ Бори́се, бо́лгарскаго ро́да крести́телю и всех нас пред Бо́гом предста́телю. И́же, нече́стие отри́нув язы́ческое и, во Еди́наго И́стиннаго Бо́га ве́ровав,Боже́ственное Креще́ние восприя́л еси́ и све́том благоче́стия просвети́л еси́ всю зе́млю бо́лгарскую; по сих же тле́нный вене́ц земна́го ца́рства оста́вив, безмо́лвное житие́ возлюби́л еси́ и подъя́л еси́ труды́ вели́кия, во е́же по́двигом и́ночества Правосла́вие на земли́ твое́й утверди́ти, бде́нными моли́твами благоутро́бие Небе́снаго Царя́ преклоня́я к новокреще́нным лю́дем. К тебе́ у́бо ны́не, я́коже ча́да ко отцу́, усе́рдно прибега́ем, гре́шнии и недосто́йнии, и в сокруше́нии се́рдца уми́льно глаго́лем: при́зри ми́лостивно с Небе́сных высо́т на моле́ние на́ше и твои́ми к Бо́гу моли́твами утверди́ нас незы́блемо в ве́ре Правосла́вней. Соблюди́ оте́чество твое́ и лю́ди от вся́каго зла́го обстоя́ния, прося́ нам у Го́спода Бо́га на́шего всех, я́же ко вре́менней и ве́чней жи́зни, благопотре́бных благи́х, я́ко да благоче́стно пожи́вше в ве́це сем, сподо́бимся и ра́йския жи́зни наслади́тися, иде́же вку́пе с тобо́ю и все́ми святы́ми просла́вим Отца́, и Сы́на, и Свята́го Ду́ха во ве́ки веко́в. Ами́нь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![равноапостольному Борису, царю Болгарскому (в Крещении Михаилу) равноапостольному Борису, царю Болгарскому (в Крещении Михаилу)](img_b/091.jpg)