Шрифт

13 мая.

Канон святителю Игнатию Брянчанинову, епископу Кавказскому и Черноморскому

Святителя Игнатия Брянчанинова, епископа Кавказскаго и Черноморскаго
Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 8:

Правосла́вия побо́рниче, покая́ния и моли́твы де́лателю и учи́телю изря́дный, архиере́ев богодухнове́нное украше́ние, мона́шествующих сла́во и похвало́: писа́нии твои́ми вся́ ны́ уцелому́дрил еси́. Цевни́це духо́вная, Игна́тие богому́дре, моли́ Сло́ва Христа́ Бо́га, Его́же носи́л еси́ в се́рдце твое́м, дарова́ти на́м пре́жде конца́ покая́ние.

Ин тропа́рь, гла́с то́йже:

Избра́нник возлю́блен Христо́ви яви́лся еси́, Тому́ скорбьми́ мно́гими и моли́твою непреста́нною прилепи́вся, благода́ть Ду́ха Свята́го стяжа́в, учи́тель изря́ден лю́дем бы́л еси́. Помина́й на́с, святи́телю Игна́тие, богоно́се Росси́йский, да уче́нии и моли́твами твои́ми покая́ние спаси́тельное обря́щем и любо́вию серде́чною Христу́ усво́имся.

По 50-м псалме́ стихи́ра, гла́с 6:

Позна́л еси́ та́йну святы́я трапе́зы Госпо́дни в сия́нии свети́ла вели́каго: я́коже со́лнце, учи́л еси́, во вся́цей ка́пли росы́ отображе́но е́сть, та́кожде и в трапе́зе Госпо́дни ки́йждо приобще́н е́сть Христу́ всеце́ло по Божеству́ и челове́честву. К сему́ же та́инству со стра́хом Бо́жиим и неосужде́нно приступа́ти твои́ми моли́твами, свя́те Игна́тие, на́с сподо́би.

Кано́н святи́теля, гла́с 8.

Пе́снь 1.

Ирмос: Колесницегони́теля фарао́ня погрузи́ чудотворя́й иногда́ Моисе́йский же́зл, крестообра́зно порази́в и раздели́в мо́ре, Изра́иля же беглеца́, пешехо́дца спасе́, пе́снь Бо́гови воспева́юща.

Припев: Святи́телю о́тче Игна́тие, моли́ Бо́га о нас.

Пу́ть духо́вный, к Бо́гу Жи́ву веду́щий, преше́л еси́, святи́телю Игна́тие, я́сно указу́я на́м, ка́ко подоба́ет стезю́ жития́ земна́го преходи́ти, уче́нию Христо́ву вне́млюще.

Припев: Святи́телю о́тче Игна́тие, моли́ Бо́га о нас.

Пе́рвую степе́нь в ле́ствице доброде́телей Ева́нгельских, нищету́ духо́вную, узре́л еси́, о́тче, и то́й после́довати, ту́ю возлюби́ти, то́ю пути́ духо́внаго нача́ло полага́ти заве́т тво́й да́л еси́.

Сла́ва Отцу́ и Сы́ну и Свято́му Ду́ху:

Нищета́ ду́ха, — ре́кл еси́, — со́ль е́сть все́х же́ртв духо́вных, нищета́ бо ду́ха блаже́нство пе́рвое нарече́ся во святе́м Ева́нгелии Христо́ве, е́йже вси́ про́чии блаже́нства, кро́тость, милосе́рдие, се́рдца чистота́, после́дуют и е́ю соверша́ются.

И ны́не и при́сно и во ве́ки веко́в. Ами́нь.

Богородичен: Ма́ти Све́та, Пречи́стая Богороди́тельнице, житие́ спаси́тельно на земли́ с Сы́ном и Бо́гом Твои́м соверши́вшая, на́с, недосто́йных, укрепи́, от грехо́в изба́ви и к пра́вде ве́чней ше́ствовати утверди́.

Пе́снь 3.

Ирмос: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, еди́не Человеколю́бче.

Припев: Святи́телю о́тче Игна́тие, моли́ Бо́га о нас.

Пра́вду Христо́ву в житии́ свое́м воспису́я, святи́телю Христо́в Игна́тие, обре́л еси́ на пути́ се́м, е́же пла́кати и рыда́ти о соде́янных злы́х и к Спаси́телю ми́ра притека́ти.

Припев: Святи́телю о́тче Игна́тие, моли́ Бо́га о нас.

В ю́ности пла́чем и́ноческим го́рце воспла́кал еси́ в ке́ллии свое́й о разруше́нии хра́ма се́рдца челове́ческаго, Бо́гом созда́ннаго Богослуже́ния возвы́шеннаго ра́ди, о плене́нии души́ и ума́, от си́х же все́х то́кмо еди́нем Богочелове́ком Спаси́телем изба́вимся.

Сла́ва Отцу́ и Сы́ну и Свято́му Ду́ху:

И па́ки пла́чь стяжа́л еси́, о́тче, в и́ночестем житии́ твое́м, егда́ вся́ прегра́ды, от Бо́га удаля́ющия тя́, препобеди́л еси́. Сего́ пла́ча ра́ди помяни́ на́с, чту́щих святу́ю па́мять твою́.

И ны́не и при́сно и во ве́ки веко́в. Ами́нь.

Богородичен: Де́во Пречи́стая, печа́ли на́ша и ско́рби утоля́ющая, пла́чь спаси́тельный подава́й на́м, да о бе́здне зо́л на́ших и непра́вд воспла́чем пред Тобо́ю.

Седа́лен, гла́с 3:

Поуча́л еси́, о́тче достохва́льне, я́ко моли́тву чи́сту стяжа́ти, та́же чу́вство покая́ния и пла́ча возлюби́ти дово́льно е́сть, во е́же спасе́ние ве́чное улучи́ти, его́же и на́с, гре́шных, сподо́би моли́твами твои́ми, свя́те

Пе́снь 4.

Ирмос: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра Отча, и на́шу нищету́ посети́в. Те́м с проро́ком Авваку́мом зову́ Ти: си́ле Твое́й сла́ва, Человеколю́бче.

Припев: Святи́телю о́тче Игна́тие, моли́ Бо́га о нас.

Та́йны жития́ и́ноческаго взыску́я, блаже́нне Игна́тие, позна́л еси́, я́ко ка́ятися подоба́ет и тру́д и́ноческий ничто́же и́но е́сть, е́же де́лание непреста́ннаго покая́ния.

Припев: Святи́телю о́тче Игна́тие, моли́ Бо́га о нас.

В покая́нии, слеза́х и пла́че о соде́янных злы́х узре́л еси́, о́тче, спасе́ния пу́ть, к го́рней жи́зни веду́щий, и́же предлежи́т и вся́кому нося́щему и́мя Христо́во.

Сла́ва Отцу́ и Сы́ну и Свято́му Ду́ху:

Ре́кл еси́, о́тче преподо́бне, я́ко до́лжно е́сть покая́нием стра́сти отсека́ти, та́же покая́нием доброде́лание стяжа́ти, и а́ще не у́зрит о́ко на́ше, я́ко гре́шни есмы́, не и́мамы спасе́ния ве́чнаго улучи́ти.

И ны́не и при́сно и во ве́ки веко́в. Ами́нь.

Богородичен: Ма́ти Бо́жия, гре́шных Спору́чнице и Помо́щнице, пу́ть на́ш, к Бо́гу веду́щий, покая́нием и́стинным укрепи́, зре́нием греха́ и испове́данием его́ напра́ви.

Пе́снь 5

Ирмос: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся.

Припев: Святи́телю о́тче Игна́тие, моли́ Бо́га о нас.

Пла́чем и покая́нием непреста́нным ду́шу твою́ снабдева́я, о́тче Игна́тие, де́латель моли́твы яви́лся еси́, сию́ от во́зраста младе́нческаго возлюби́в, и в основа́ние жи́зни духо́вныя положи́л еси́.

Припев: Святи́телю о́тче Игна́тие, моли́ Бо́га о нас.

Моли́твою усе́рдною житие́ твое́ от ю́ности укрепля́я, да́же до кончи́ны по́двиг тво́й моли́твенный ко Христу́ Бо́гу соблюда́л еси́, и́мже о Бо́зе Спа́се утвержда́яся.

Сла́ва Отцу́ и Сы́ну и Свято́му Ду́ху:

В во́зраст му́жеский прише́д, мона́хов нача́льник бы́в и многообра́зныя ско́рби испыту́я, в моли́тве тве́рдей и непреста́нней со мно́гими слеза́ми осла́бу и отра́ду и́стинную почерпа́л еси́, о́тче всеблаже́нне.

И ны́не и при́сно и во ве́ки веко́в. Ами́нь.

Богородичен: Де́во Пречи́стая, Ма́ти Христа́ Бо́га, вене́ц моли́твы неусыпа́ющия, о на́с, гре́шных, мольбу́ Бо́гу принеси́ и моле́нием Твои́м от напа́стей и скорбе́й на́с изба́ви.

Пе́снь 6.

Ирмос: Моли́тву пролию́ ко Го́споду, и Тому́ возвещу́ печа́ли моя́, я́ко зол душа́ моя испо́лнися, и живо́т мой а́ду прибли́жися, и молю́ся, я́ко Ио́на: от тли, Бо́же, возведи́ мя.

Припев: Святи́телю о́тче Игна́тие, моли́ Бо́га о нас.

Яви́лся еси́ учи́тель моли́твы серде́чныя, о́тче на́ш Игна́тие, я́сно наставля́я, ка́ко до́лжни есмы́ пред лице́м Христо́вым предстоя́ти и моли́тву покая́ния твори́ти.

Припев: Святи́телю о́тче Игна́тие, моли́ Бо́га о нас.

Подоба́ет на моли́тве, — поуча́л еси́, о́тче, — вста́ти в ли́це прокаже́нных, слепы́х, глухи́х, хромы́х и та́ко ко Христу́, от се́рдца сокруше́ннаго, от нищеты́ ду́ха на́шего, моли́тву тща́тися твори́ти.

Сла́ва Отцу́ и Сы́ну и Свято́му Ду́ху:

Егда́ тишина́ возве́ет в се́рдце на моли́тве, — поуча́л еси́, о́тче, — и ми́р ко все́м, смире́ние, сострада́ние и любо́вь к челове́ком, тогда́ позна́ем, я́ко благода́ть Ду́ха Свя́та сие́ соде́ла.

И ны́не и при́сно и во ве́ки веко́в. Ами́нь.

Богородичен: Ма́ти Бо́жия, Ду́ха Свята́го прия́телище непостижи́мое, о сме́ртных на́с моли́ся и моли́тву на́шу к Бо́гу упра́ви.

Конда́к, гла́с 8.

Аще и соверша́л еси́ стезю́ жития́ земна́го, святи́телю Игна́тие, оба́че непреста́нно зре́л еси́ зако́ны бытия́ ве́чнаго, сему́ поуча́я ученики́ словесы́ мно́гими, и́мже после́довати и на́м, свя́тче, помоли́ся.

Икос:

Ре́кл еси́, о́тче, в писа́ниих твои́х, я́ко подоба́ет име́ти стра́х Бо́жий, да́бы вступи́ти в соверше́нство все́х доброде́телей, любо́вь Бо́жию, и та́ко Отцу́ Небе́сному уподо́битися. Сему́ уче́нию после́довати и на́м, свя́тче, помоли́ся.

Пе́снь 7.

Ирмос: Отроцы евре́йстии в пещи́ попра́ша пла́мень дерзнове́нно и на ро́су о́гнь преложи́ша, вопию́ще: благослове́н еси́, Го́споди Бо́же, во ве́ки.

Припев: Святи́телю о́тче Игна́тие, моли́ Бо́га о нас.

В зи́мнем обнаже́нии ве́твей древе́сных поуча́лся еси́, о́тче, та́йне воскресе́ния ме́ртвых, я́коже бо дре́во во вре́мя свое́ ли́ствием покрыва́ется, та́ко и ко́сти челове́ческия оживу́т и, обле́кшеся пло́тию, в ми́р но́вый вступи́ти и́мут.

Припев: Святи́телю о́тче Игна́тие, моли́ Бо́га о нас.

Позна́л еси́, о́тче, ели́ко возмо́жно, та́йну кончи́ны бытия́ челове́ческаго, та́йну естества́ Ангельскаго и души́ челове́ческия, и возда́л еси́ благодаре́ние Бо́гу.

Сла́ва Отцу́ и Сы́ну и Свято́му Ду́ху:

Еди́наго то́кмо Бо́га, Ду́ха Истины, испове́дал еси́, Иже Еди́н всесоверше́н е́сть, Ему́же покланя́ющеся, тя́, о́тче, велича́ем.

И ны́не и при́сно и во ве́ки веко́в. Ами́нь.

Богородичен: Де́во Мари́е, Ма́ти Неизрече́ннаго Све́та, на́с, гре́шных, от мы́сленных паде́ний огради́, Боже́ственное же уче́ние Це́ркве Святы́я в сердца́х на́ших укрепи́.

Пе́снь 8.

Ирмос: На горе́ святе́й просла́вльшася, и в купине́ огне́м Присноде́вы Моисе́ови та́йну я́вльшаго, Го́спода по́йте и превозноси́те во вся́ ве́ки.

Припев: Святи́телю о́тче Игна́тие, моли́ Бо́га о нас.

Возлюби́л еси́, о́тче, служи́ти бра́тии сло́вом Бо́жиим, и бы́сть тебе́ служе́ние сие́ в по́двиг жития́ твоего́, на́м же в ра́дование непрело́жное, вопию́щим ти́: не оста́ви на́с, о́тче, сло́вом и моли́твами твои́ми.

Припев: Святи́телю о́тче Игна́тие, моли́ Бо́га о нас.

В служе́нии Сло́ву услы́шал еси́ в души́ твое́й гла́с увере́ния во спасе́нии, сего́ ра́ди прии́скренне возлюби́л еси́ бли́жних твои́х и са́мое то Сло́во Бо́жие.

Сла́ва Отцу́ и Сы́ну и Свято́му Ду́ху:

Поуча́л еси́ бли́жних твои́х, святи́телю, я́ко Спаси́тель на́ш е́сть Огнь небе́сный, Иже и в словесе́х Его́ ева́нгельских де́йствует.

И ны́не и при́сно и во ве́ки веко́в. Ами́нь.

Богородичен: Ма́ти Бо́жия, Бо́га Сло́ва ро́ждшая, да́ждь сло́во рабо́м Твои́м, е́же сказа́ти та́йну всеми́лостиваго заступле́ния Твоего́, в та́йне рожде́ния Сло́ва, Христа́ Бо́га, я́вльшуюся.

Песнь 9

Ирмос: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее небе́с. Те́м Тя́, Богоро́дицу, Ангелов и челове́к чинонача́лия велича́ют.

Припев: Святи́телю о́тче Игна́тие, моли́ Бо́га о нас.

Мно́ги труды́ и боле́зни подъя́в в житии́ твое́м, святи́телю всече́стне, Кресту́ Христо́ву, све́тло сия́ющу, поклони́лся еси́ и моли́тву твою́ ко Христу́ просте́рл еси́.

Припев: Святи́телю о́тче Игна́тие, моли́ Бо́га о нас.

Скорбьми́ обурева́емый, зре́л еси́ в виде́нии в ке́ллии свое́й Стра́нника, посети́вшаго тя́. Отку́ду ше́ствуеши? И где́ селе́ние Твое́? Почто́ досе́ле оставля́л еси́ е́? — сла́дце вопия́л еси́, о́тче, я́вльшемуся ти́ Христу́.

Сла́ва Отцу́ и Сы́ну и Свято́му Ду́ху:

В хожде́нии пред Го́сподем позна́л еси́, о́тче, судьбы́ оте́чества твоего́, та́же и кончи́ну твою́ я́сно прови́дел еси́, к Бо́гу Сло́ву, Христу́ возлю́бленному, моли́твенно устремля́яся.

И ны́не и при́сно и во ве́ки веко́в. Ами́нь.

Богородичен: Ма́ти Бо́жия, сия́ние неизрече́ннаго Све́та, стопы́ на́ша к жи́зни ве́чней напра́ви, проща́ющи вся́ зла́я, на́ми соде́янная.

Свети́лен святи́теля:

Имя Богоно́сца пресла́внаго в мона́шестем о́бразе твое́м восприе́мь, о́тче Игна́тие, святи́телю всече́стне, Христа́ моли́твою непреста́нною вну́трь се́рдца твоего́ всели́л еси́ и бы́л еси́ учи́тель, к Све́ту невече́рнему веды́й, богоно́сец вои́стинну досточу́дный яви́вся.

Молитва святителю Игнатию (Брянчанинову), епископу Кавказскому и Черноморскому

О, вели́кий и пречу́дный уго́дниче Христо́в, святи́телю о́тче Игна́тие! Ми́лостиво приими́ моли́твы на́ша, с любо́вию и благодаре́нием тебе́ приноси́мыя! Услы́ши нас си́рых и безпо́мощных, к тебе́ с ве́рою и любо́вию припа́дающих и твоего́ те́плаго предста́тельства о нас пред Престо́лом Го́спода Сла́вы прося́щих. Ве́мы, я́ко мно́го мо́жет моли́тва пра́ведника, Влады́ку умилостивля́ющая. Ты от лет младе́нческих Го́спода пла́менно возлюби́л еси́ и Ему́ Еди́ному служи́ти восхоте́в, вся кра́сная ми́ра сего́ ни во что́же вмени́л еси́. Ты отве́ргся себе́ и взем крест твой, Христу́ после́довал еси́. Ты путь у́зкий и приско́рбный жития́ и́ноческаго во́лею себе́ избра́л еси́ и на сем пути́ доброде́тели вели́кия стяжа́л еси́. Ты писа́ньми твои́ми сердца́ челове́ков глубоча́йшаго благогове́ния и поко́рности пред Всемогу́щим Творцо́м исполня́л еси́, гре́шников же па́дших му́дрыми словесы́ твои́ми в созна́нии своего́ ничто́жества и своея́ грехо́вности, в покая́нии и смире́нии прибега́ти к Бо́гу наставля́л еси́, ободря́я их упова́нием на Его́ милосе́рдие. Ты николи́же притека́вших к тебе́ отверга́л еси́, но всем оте́ц чадолюби́вый и па́стырь до́брый был еси́. И ны́не не оста́ви нас, усе́рдно тебе́ моля́щихся и твоея́ по́мощи и предста́тельства прося́щих. Испроси́ нам у человеколюби́ваго Го́спода на́шего здра́вие душе́вное и теле́сное, утверди́ ве́ру на́шу, укрепи́ си́лы на́ша, изнемога́ющия во искуше́ниих и скорбе́х ве́ка сего́, согре́й огне́м моли́твы охладе́вшая сердца́ на́ша, помоги́ нам, покая́нием очи́стившимся, христиа́нскую кончи́ну живота́ сего́ получи́ти и в черто́г Спа́сов преукраше́нный вни́ти со все́ми избра́нными и та́мо ку́пно с тобо́ю покланя́тися Отцу́ и Сы́ну и Свято́му Ду́ху во ве́ки веко́в. Ами́нь.

Окончание

По прочтении канона и молитвы, чти:

Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:

Го́споди, поми́луй, трижды.

И отпуст.

Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.

Святителя Игнатия Брянчанинова, епископа Кавказскаго и Черноморскаго