12 мая.

Канон преподобному Нектарию Оптинскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропáрь, глaс 3:

Чу́днаго Некта́рия в пе́снех духо́вных восхва́лим/ и благоче́стное житие́ того́ ублажи́м,/ я́ко мирско́е мудрова́ние посрами́/ и христолюби́вым лю́дем путь покая́ния показа́./ Сего́ ра́ди ны́не вопие́м:// ра́дуйся, о́тче богому́дре, ве́рным утвержде́ние.

Кано́н преподо́бнаго. Глас 8.

Песнь 1

Ирмос: Песнь возсле́м, лю́дие,/ чу́дному Бо́гу на́шему,/ свободи́вшему Изра́иля от рабо́ты,/ песнь побе́дную пою́ще и вопию́ще:// пои́м Тебе́ еди́ному Влады́це.

Припев: Преподобне отче Нектарие, моли Бога о нас!

Некта́рие о́тче, го́речь отыми́ страсте́й и Боже́ственную сла́дость усто́м пода́ждь, пе́сненно воспе́ти твое́ всечестно́е преставле́ние.

Припев: Преподобне отче Нектарие, моли Бога о нас!

Ева́нгельскою лозо́ю процве́л еси́, о́тче, и, то́ки чуде́с источи́в, умиле́нием напои́л еси́ ча́да твоя́, приснопа́мятне.

Припев: Преподобне отче Нектарие, моли Бога о нас!

Красне́йшее твое́ торжество́ вся собра́ во оби́тель тебе́ любе́зную по́чести тебе́ возда́ти пе́сненно, Христо́в уго́дниче Некта́рие.

Сла́ва Отцу́ и Сы́ну и Свято́му Ду́ху:

Терпя́ потерпе́л еси́ ско́рби и озлобле́ние врага́ и во изгна́нии му́жественно подвиза́лся еси́. Сего́ ра́ди внят Госпо́дь моли́тве твое́й и по сме́рти свободи́ тя от плене́ния.

И ны́не и при́сно и во ве́ки веко́в. Ами́нь.

Богоро́дичен: А́нгелов песнь еси́ и земны́х хвале́ние, бесо́в посрамле́ние и ве́рных вене́ц, Мари́е Де́во, Тя сла́вящия спаса́й.

Песнь 3

Ирмос: Сочини́ мя, Го́споди,/ си́льным люде́й Твои́х,/ опоясу́я си́лою,/ и лу́ки ра́тников сокруши́,// и нищеты́ моея́ рог возвы́си.

Припев: Преподобне отче Нектарие, моли Бога о нас!

Раче́нием всесвяты́м распала́емь, раче́ния греха́ отврати́лся еси́ и, тьму страсте́й разгна́в и де́монскую зло́бу посрами́в, запина́тель зми́я яви́лся еси́, всему́дре Некта́рие.

Припев: Преподобне отче Нектарие, моли Бога о нас!

Боже́ственное любому́дрие возлюби́л еси́ и му́дрость ми́ра пости́гл еси́, венце́м смиренному́дрия увенча́вся, Некта́рие богому́дре.

Припев: Преподобне отче Нектарие, моли Бога о нас!

О́птинский небосво́д озари́л еси́, я́ко звезда́ в нощи́, и мощьми́ твои́ми, о́тче преподо́бне, я́ко о́блаком све́тлым, осени́л еси́ собра́ние ве́рных.

Сла́ва Отцу́ и Сы́ну и Свято́му Ду́ху:

Жела́нием в го́рняя ум впери́л еси́ и земна́я преоби́дел еси́, блаже́нне, в по́двизех не пощади́в те́ло, ни ду́шу твою́, сего́ ра́ди, живоно́сную ме́ртвость стяжа́в, то́ю живи́ши ме́ртвыя душе́ю.

И ны́не и при́сно и во ве́ки веко́в. Ами́нь.

Богоро́дичен: Е́ва разреша́ется кля́твы, и враг закля́тый связу́ется, Рождество́м бо Твои́м, Влады́чице Чи́стая, жи́знь ве́чная возсия́, тля потреби́ся и ве́рным отра́да дарова́ся.

Седа́лен, глас 6:

Внима́я словесе́м Госпо́дним, преподо́бне, кро́тости и смире́нию се́рдца научи́лся еси́ и, ничи́мже смуща́емый, поко́й в души́ твое́й обре́л еси́, те́мже и, отроча́ти ма́лому подо́бяся, согреша́ющих исправля́л еси́ ду́хом кро́тости и бли́жняго с любо́вию наставля́л еси́. Сего́ ра́ди моли́ся, блаже́нне, и подража́ющим ти простоты́ и незло́бия дости́гнути.

Сла́ва, и ны́не, Богоро́дичен:

Ты еди́на во всех ро́дех, Де́во Пречи́стая, Ма́ти яви́лася еси́ Бо́жия. Ты Божеству́ была́ еси́ Жили́ще, Всенепоро́чная, не опа́льшися Огне́м непристу́пнаго Све́та. Те́мже Тя вси ублажа́ем и мо́лим, Мари́е Богоневе́сто: сотвори́ ны жили́ща Ду́ха Свята́го.

Песнь 4

Ирмос: Богоно́сный Ду́хом Святы́м просвети́вся проро́к Авваку́м,/ в после́дняя Твое́ прише́ствие прови́дев, вопия́ше:/ внегда́ прибли́житися ле́том, позна́ешися:/ внегда́ приити́ вре́мени, яви́шися.// Сла́ва си́ле Твое́й, Го́споди.

Припев: Преподобне отче Нектарие, моли Бога о нас!

Светоно́сная ра́ка твоя́, я́ко ка́мень драги́й, сия́ет чудесы́ и благода́тных исцеле́ний испуща́ет лучи́, всебога́те Некта́рие, с ве́рою к тебе́ притека́ющим.

Припев: Преподобне отче Нектарие, моли Бога о нас!

Треволне́ния страсте́й уставля́еши и тишину́ Иису́сову подае́ши, о́тче Некта́рие преподо́бне, я́ко Того́ ве́рный раб быв и благода́ти сосу́д испо́лненный.

Припев: Преподобне отче Нектарие, моли Бога о нас!

Внегда́ прибли́жишася ле́та, позна́лся еси́, уго́дниче Бо́жий Некта́рие, из-под спу́да возсия́в мощьми́ благода́тными, и тьму неве́рия разори́л еси́ кре́постию Го́спода твоего́.

Сла́ва Отцу́ и Сы́ну и Свято́му Ду́ху:

Е́ллинское мудрова́ние посрами́л еси́ и, юро́дством благослове́нным прикры́вся, вне Христа́ и́щущих му́дрость обличи́л еси́, небе́сный у́ме, Некта́рие, тайнове́дче блаже́нный.

И ны́не и при́сно и во ве́ки веко́в. Ами́нь.

Богоро́дичен: На река́х ско́рби пла́кахом и избавле́ния ча́яхом, Всеми́лостивая Ма́ти Спа́са, внегда́ прии́де по́мощь Твоя́, я́же стра́стнаго плене́ния свободи́ ны.

Песнь 5

Ирмос: Мрак души́ моея́/ разжени́, Светода́вче Христе́ Бо́же,/ началоро́дную тьму изгна́в бе́здны,/ и да́руй ми свет повеле́ний Твои́х, Сло́ве,// да у́тренюя сла́влю Тя.

Припев: Преподобне отче Нектарие, моли Бога о нас!

На тебе́ показа́ ми́лость Свою́ Госпо́дь и вся хоте́ния Своя́ в тебе́ испо́лни, ты бо муж пра́ведный яви́лся еси́, богому́дре о́тче, се́рдце чи́сто стяжа́в, многоразли́чными дарова́нии испо́лнено.

Припев: Преподобне отче Нектарие, моли Бога о нас!

Испо́лни ра́дости собра́ние ве́рных, обстоя́щих ра́ку моще́й твои́х, преиспо́лнену благода́ти, свя́те Некта́рие, и осла́бу пода́ждь, и избавле́ние от лю́тых грехопаде́ний на́ших.

Припев: Преподобне отче Нектарие, моли Бога о нас!

Иде́же упоко́ися те́ло твое́, столп благода́ти осиява́ет ве́рныя, и о́блак моли́тв твои́х, преподо́бне, ороша́ет всех притека́ющих и любо́вию мо́щи твоя́ лобыза́ющих.

Сла́ва Отцу́ и Сы́ну и Свято́му Ду́ху:

О́птинская ра́дость ты еси́, о́тче Некта́рие, и приснопребыва́ющее ста́рцев весе́лие, вся печа́ли жите́йския моли́твою разве́явый и в смех претвори́вый де́монская нападе́ния.

И ны́не и при́сно и во ве́ки веко́в. Ами́нь.

Богоро́дичен: Боле́зни утоли́, Влады́чице Де́во, Врача́ челове́ком ро́ждшая, и огнь любосла́стный угаси́ одожде́нием цельбоно́сных моли́тв Твои́х, Всеще́драя, да́рующи лю́дем Твои́м ве́лию ми́лость.

Песнь 6

Ирмос: Во Исаа́це страсть прописа́вый,/ и во Ио́не погребе́ние прообразова́вый,/ и воскресе́ние всем подая́й,/ Тебе́ вопие́м с проро́ком:// от тли нас возведи́, Благоутро́бне Го́споди.

Припев: Преподобне отче Нектарие, моли Бога о нас!

Ра́дости неизглаго́ланныя испо́лнил еси́, о́тче, оби́тель твою́ честны́х моще́й возвраще́нием, те́мже и чад твои́х немо́лчныя гла́сы приими́, вы́ну пою́щих твое́ из земны́х недр обре́тение.

Припев: Преподобне отче Нектарие, моли Бога о нас!

Еже́ по о́бразу Христо́ву послуша́нию вда́лся еси́ и, всеме́рный иску́с проше́д и доброде́телию воскре́с, стра́сти погре́бл еси́, сла́вою ста́рчества украси́вся, Некта́рие.

Припев: Преподобне отче Нектарие, моли Бога о нас!

Терпе́ние Анато́лиево и любо́вь Амвро́сиеву стяжа́в, кро́тости же и смире́нию Ио́сифа и Варсоно́фия до́блести подража́я, вся дарова́ния отце́в вмести́л еси́, преподо́бне.

Сла́ва Отцу́ и Сы́ну и Свято́му Ду́ху:

Ше́ствуя неукло́нно святооте́ческою стезе́ю, прему́дре а́вво, го́рних оби́телей дости́гл еси́, оба́че и ны́не не оставля́еши моли́твами твои́ми бра́тию земны́я оби́тели твоея́, иде́же нача́ло подвиго́м полага́л еси́.

И ны́не и при́сно и во ве́ки веко́в. Ами́нь.

Богоро́дичен: Е́вино преслуша́ние испра́вила еси́, Пречи́стая Де́во Влады́чице, Арха́нгелова гла́са послу́шавши, се Раба́ Госпо́дня есмь, рекла́ еси́, и кля́тва прама́терня потреби́ся.

Конда́к, глас 8:

От ста́рцев смире́нных и богому́дрых, Амвро́сия и Анато́лия,/ от сея́ лучеза́рныя дво́ицы,/ восприя́л еси́ благода́ть окормле́ния ста́рческаго, благоуха́нне о́тче Некта́рие:/ сый свобо́ден от всех, всем себе́ порабо́тил еси́,/ тяготы́ мона́хов и миря́н поне́сл еси́,/ до конца́ испо́лнивый зако́н Христо́в,// от Него́же прия́л еси́ вене́ц нетле́нный.

И́кос:

Я́ко Елиссе́й от Илии́ чрез ми́лоть сугу́бую благода́ть улучи́, та́ко ты, богому́дре о́тче Некта́рие, чрез свои́х боже́ственных наста́вников свы́ше дар ста́рческаго служе́ния восприя́л еси́ и в тя́жкое вре́мя гоне́ний на ве́ру Христо́ву ученико́м свои́м и всем, и́щущим духо́внаго наставле́ния, усе́рдно послужи́л еси́, с ни́миже досто́йно тя восхваля́ем: Ра́дуйся, смире́нный носи́телю ста́рческия благода́ти; ра́дуйся, па́стырю до́брый слове́сных ове́ц. Ра́дуйся, учи́телю кро́тости и незло́бия; ра́дуйся, кре́пкий испове́дниче Христо́в. Ра́дуйся, малоду́шныя наста́вивый ко спасе́нию кре́стным сло́вом; ра́дуйся, неутвержде́нныя отврати́вый от ересе́й и раско́лов. Ра́дуйся, бу́йством про́поведи му́дрость ми́ра сего́ посрами́вый; ра́дуйся, в не́мощи ди́вную си́лу Бо́жию яви́вый. Ра́дуйся, свети́льниче, во тьме горя́й и светя́й; ра́дуйся, сто́лпе ве́ры правосла́вныя. Ра́дуйся, оте́ческих преда́ний храни́телю; ра́дуйся, сотаи́нниче собо́ра ста́рцев благода́тных. Ра́дуйся, ста́рче Некта́рие, О́птинская похвало́.

Песнь 7

Ирмос: Бо́жия снизхожде́ния/ огнь устыде́ся в вавило́не иногда́,/ сего́ ра́ди о́троцы в пещи́ ра́дованною ного́ю,/ я́ко во цве́тнице лику́юще, поя́ху:// благослове́н еси́, Бо́же оте́ц на́ших.

Припев: Преподобне отче Нектарие, моли Бога о нас!

Радостотво́рный пра́здник днесь, и печа́ли прогна́ние, и скорбя́щим утеше́ние и отра́да: мо́щи блаже́ннаго Некта́рия с на́ми пребыва́ют, те́мже да́руется всем оби́льно весе́лие.

Припев: Преподобне отче Нектарие, моли Бога о нас!

Ад челюстьми́ свои́ми тя не сокруши́, а́ще и сокры́то бысть под земле́ю честно́е те́ло твое́, оба́че уста́ на́ша испо́лнишася песнопе́ний, егда́ благовре́менне, ста́рче Некта́рие, из недр земны́х мо́щи святы́я яви́л еси́.

Припев: Преподобне отче Нектарие, моли Бога о нас!

Да́же до после́дних земли́ простре́ся сла́ва твоя́, преподо́бне, те́мже от се́вера и ю́га, за́пада и восто́ка ча́да твоя́ прихо́дят поклони́тися моще́м, вопи́юще: благослове́н еси́, Бо́же оте́ц на́ших.

Сла́ва Отцу́ и Сы́ну и Свято́му Ду́ху:

О́птинский столп ты еси́, и сла́вы ста́рчества вене́ц благоуха́нный, во оби́тель твою́ возврати́лся еси́, и приложи́вся ко отце́м, возвесели́л еси́ небе́сных, Некта́рие, и земноро́дных обра́довал еси́, вопию́щих: благослове́н еси́, Бо́же оте́ц на́ших.

И ны́не и при́сно и во ве́ки веко́в. Ами́нь.

Богоро́дичен: Све́щнице Свещи́ Боже́ственныя, я́же есть Сын Твой, прише́дый пло́тию в мир, мрак плотска́го мудрова́ния потреби́, Пресвята́я, и Ду́ха огнь в сердца́ земноро́дных всели́, благослове́н еси́, А́вво О́тче, вопию́щих.

Песнь 8

Ирмос: Мусики́йским орга́ном согласу́ющим,/ и лю́дем безчи́сленным покланя́ющимся о́бразу в Деи́ре,/ три о́троцы не повину́вшеся,/ Го́спода воспева́ху,// и славосло́вяху во вся ве́ки.

Припев: Преподобне отче Нектарие, моли Бога о нас!

Тро́ицы уго́дниче всеблаги́й, пе́сненныя приими́ венцы́, я́же ча́да твоя́ сплето́ша тебе́ усе́рдием, и небе́сных венце́в сподо́би нас, любо́вию воспева́ющих тя.

Припев: Преподобне отче Нектарие, моли Бога о нас!

Нечести́выя сове́ты разори́л еси́, ми́ра посрами́в плотско́е мудрова́ние; благоче́стие же возвести́л еси́, преподо́бне, и богому́дренно утверди́л еси́, в простоте́ Христо́ве и благода́ти.

Припев: Преподобне отче Нектарие, моли Бога о нас!

О тебе́ хва́лимся, и о тебе́ пое́м, я́ко оте́ц еси́ наш чадолюби́вый, не оста́вил еси́ нас си́рых, ниже́ оби́тель твою́, но возврати́лся еси́ в ню мощьми́, Некта́рие преподо́бне.

Сла́ва Отцу́ и Сы́ну и Свято́му Ду́ху:

Вели́ка обре́те тя помо́щника в беда́х земля́ Ру́сская и оби́тель О́птинская, в не́йже по́двигом многообра́зным подвиза́вся, и юро́дства и́го подъе́м, Некта́рие ста́рче, врага́ обличи́л еси́, и малоду́шныя утверди́л еси́.

И ны́не и при́сно и во ве́ки веко́в. Ами́нь.

Богоро́дичен: О́блаче све́тлый, Со́лнце Христа́ нося́й, Всепе́тая и Пречи́стая Де́во, мглу греха́ разве́й мольба́ми твои́ми, да озаря́еми луча́ми Сы́на Твоего́, воспое́м Тя и ублажи́м во вся ве́ки.

Песнь 9

Ирмос: Благослове́н Госпо́дь Бог Изра́илев,/ воздви́гнувый рог спасе́ния нам,/ в дому́ Дави́дове о́трока своего́:/ в ни́хже посети́ нас восто́к с высоты́,// и напра́вил ны есть на путь ми́ра.

Припев: Преподобне отче Нектарие, моли Бога о нас!

Сла́достно благоуха́ют мо́щи твоя́, присноблаже́нне ста́рче Некта́рие, по́двигом бо всему́дрым подвиза́вся, в ме́ру отце́в твои́х дости́гл еси́, и сочета́лся еси́ с ни́ми в духо́вный соу́з, сего́ ра́ди тя велича́ем.

Припев: Преподобне отче Нектарие, моли Бога о нас!

Посети́л еси́ нас, из юдо́ли подзе́мныя светоявле́нно возвы́сився, те́мже от но́щи страсте́й изба́ви, блаже́нне, притека́ющия к ра́це моще́й твои́х, и благоче́стно ти покланя́ющияся.

Припев: Преподобне отче Нектарие, моли Бога о нас!

О, возвраще́ния твоего́ к нам! Нищету́ обогати́л еси́ на́шу многоце́нным би́сером, моще́й твои́х предложе́нием, и ку́плю спасе́ния де́яти помога́еши, тя велича́ющим, прему́дре Некта́рие.

Сла́ва Отцу́ и Сы́ну и Свято́му Ду́ху:

И ду́хом пребу́ди с на́ми, Некта́рие, те́лом благоуха́нным почти́вый О́птину, и пресла́достным одари́ утеше́нием пра́зднующих собра́ние, де́монов же прогони́ и стра́сти вся́ческия отжени́ жезло́м твои́м па́стырским.

И ны́не и при́сно и во ве́ки веко́в. Ами́нь.

Богоро́дичен: Мари́е Де́во, А́нгелы све́тлы посли́, умири́ти мир и в душа́х смяте́ние, и мра́чныя полки́ бесо́вския потреби́, Богора́дованная, Ты бо еси́ Небе́сных и земны́х Цари́ца Всепобеди́тельная.

Свети́лен:

Заверши́л еси́ чреду́ ста́рцев ди́вных из среды́ оби́тели О́птинския, преподо́бне ста́рче Некта́рие, преукра́шенный доброде́тельми мона́шескими, те́мже украси́л еси́ не́бо О́птины, я́ко при исхо́де ве́чера, егда́ не́бо украша́ется свети́лом нощны́м.

Моли́тва

О преподо́бне и богоблаже́нне о́тче Некта́рие, присносве́тлый свети́льниче ста́рчества О́птинскаго! Юро́дство подъе́мый и безу́мие ми́ра обличи́вый, от богобо́рных злоключе́ния до́бльственне претерпе́вый и блаже́нства изгна́нных ра́ди Го́спода Иису́са вкуси́вый. При́зри ны́не с Небесе́ и от ра́йскаго са́да к нам прини́кни. Возвы́си на́ше мудрова́ние от земны́х попече́ний и о Небе́снем жи́тельстве помышля́ти научи́. Я́ко боже́ственными доброде́тельми себе́ украси́вый и от плодо́в ра́йских сла́дости насы́тивыйся, треволне́ния страсте́й исхити́ и го́рькаго грехолю́бия нас изба́ви всеизря́дным твои́м предста́тельством. В ве́ре правосла́вней до после́дняго издыха́ния утверди́ ны стоя́ти и по оте́ческим стопа́м умудри́ нас ходи́ти. Го́спода Бо́га умоли́, богому́дре о́тче, от кова́рных сете́й гряду́щаго анти́христа нас изба́вити, да ми́рное и благоче́стное житие́ в ве́це сем сконча́ем и ра́йских селе́ний по твои́м моли́твам насле́дити сподо́бимся, иде́же ку́пно с тобо́ю и со все́ми ста́рцы О́птинскими воспое́м и просла́вим Безнача́льную и Неразде́льную и Единосу́щную Тро́ицу, Отца́, и Сы́на, и Свята́го Ду́ха, во ве́ки веко́в. Ами́нь.