11 мая.

Канон иной святителю Кириллу, епископу Туровскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Благоче́стия ревни́телю и рачи́телю, и́ноков и сто́лпников похвало́, святи́телю Ту́ровския па́ствы пресла́вне, златослове́сный учи́телю, све́тлым уче́нием богоразу́мия своего́ просвети́вый концы́ Ру́сския, в моли́тве к Бо́гу благода́тный гре́шников споспе́шниче, Кири́лле богому́дре, моли́ Христа́ Бо́га утверди́тися на́м, сооте́чественником твои́м, во Правосла́вии, благоче́стии и единомы́слии.

По 50-м псалме́ стихи́ра, гла́с 6:

Наста́ дне́сь вели́кое торжество́ в кра́и на́шем: прославля́ем бо златоу́стаго Кири́лла, мно́гими вои́стинну де́лы и словесы́ Бо́гу послужи́, ны́не же во оби́телех го́рних Христу́ предстои́т и приле́жно мо́лится о все́х с любо́вию чту́щих па́мять его́.

Ин кано́н. Гла́с 8.

Пе́снь 1.

Ирмос: Пои́м Го́сподеви, прове́дшему лю́ди Своя́ сквозе́ Чермно́е мо́ре, я́ко Еди́н сла́вно просла́вися.

Припев: Святителю отче Кирилле, моли Бога о нас.

Ту́ровскаго святи́теля Кири́лла, земли́ на́шея вели́каго свети́льника, сподо́би, Го́споди, воспе́ти ми́ недосто́йному.

Припев: Святителю отче Кирилле, моли Бога о нас.

Устне́ имы́й нечи́стая, дерза́ю восхвали́ти архипа́стыря, яви́вшаго ча́дом церко́вным пра́вило ве́ры и о́браз смире́ния.

Сла́ва Отцу́ и Сы́ну и Свято́му Ду́ху:

Река́ уче́ний боже́ственных яви́лся еси́, святи́телю Кири́лле, и напая́еши при́сно мое́ изсо́хшее се́рдце.

И ны́не и при́сно и во ве́ки веко́в. Ами́нь.

Богородичен: Голуби́це Пренепоро́чная, Ма́ти Христа́ Бо́га, приведи́ мя́ жа́ждущаго ко исто́чнику жи́зни ве́чныя.

Пе́снь 3.

Ирмос: Утвержде́й в нача́ле небеса́ ра́зумом и зе́млю на вода́х основа́вый, на ка́мени мя́, Христе́, за́поведей Твои́х утверди́, я́ко не́сть свя́т па́че Тебе́, Еди́не Человеколю́бче.

Припев: Святителю отче Кирилле, моли Бога о нас.

Оста́вив ми́ра сего́ тле́нная, и́го Христо́во на ра́мо возложи́в, поне́сл еси́ труды́ сугу́быя, на столпе́ в затво́ре те́снем.

Припев: Святителю отче Кирилле, моли Бога о нас.

Воздержа́нием и́стинным и моли́твою непреста́нною возше́л еси́ на ве́рх доброде́телей, подо́бно дре́вним вели́ким подви́жником.

Сла́ва Отцу́ и Сы́ну и Свято́му Ду́ху:

Сто́лпника но́ваго тя́ ве́мы, о́тче на́ш Кири́лле, и ле́ствичника преди́внаго, наста́вника благоче́стия.

И ны́не и при́сно и во ве́ки веко́в. Ами́нь.

Богородичен: Еди́ну Благослове́нную, Пречи́стую Влады́чицу, воспева́ем вси́ ве́рнии, я́ко одушевле́нное не́бо и престо́л херуви́мский.

Конда́к, гла́с 3.

В Ту́рове, свя́те, священноде́йствитель показа́лся еси́, Христо́во бо, о́тче Кири́лле, Ева́нгелие испо́лнив, положи́л еси́ ду́шу твою́ о лю́дех твои́х и соблю́л еси́ еди́нство Це́ркве Ру́сския. Сего́ ра́ди освяти́лся еси́, я́ко вели́кий таи́нник Бо́жия благода́ти.

Икос:

Воспои́м ны́не святи́теля Кири́лла пе́сньми, Ту́ровским лю́дем па́стыря и учи́теля, и всея́ Ру́сския земли́ Златоу́ста, да предста́тельством его́ просвети́мся, и боже́ственных слове́с его́ поуче́нием отста́нем вся́кия ле́сти и суеты́, порабо́таим неле́ностно Го́сподеви и яви́мся чи́сти душа́ми и телесы́, я́коже и се́й уго́дник Христо́в и вели́кий таи́нник Бо́жия благода́ти.

Седа́лен, гла́с 4:

От ю́ности взе́м кре́ст тво́й, благочести́во Христу́ после́довал еси́, увяди́в плотско́е мудрова́ние воздержа́нием. Те́мже на святи́тельском седа́лищи се́д, возвели́чил еси́ Влады́ку и Того́ Пречи́стую Ма́терь, о́тче Кири́лле богоблаже́нне.

Ин седа́лен, гла́с 8.

Юже с высоты́ му́дрость уве́дев и благода́ть слове́с от Бо́га, просия́л еси́ на Руси́ я́ко вторы́й Златоу́ст, сло́во Бо́жие неле́ностно пропове́дал еси́, вся́кое беззако́ние и ле́сть попра́в словесы́ твои́ми. Те́мже по Бо́зе ре́вностию кня́зя обличи́в, и Федо́рца посрами́л еси́ ерети́ческое мудрова́ние. Святи́телю Кири́лле, моли́ Христа́ Бо́га прегреше́ний оставле́ние дарова́ти пра́зднующим любо́вию святу́ю па́мять твою́.

Сла́ва, и ны́не, Богородичен:

От Тро́ицы Еди́наго неизрече́нно заче́нши, Де́во, и чу́дно Сего́ родила́ еси́ па́че сло́ва и мы́сли, и о́бщно Боже́ственнаго естества́ устро́ила еси́ челове́ческое естество́, дре́вле изгна́нное. Те́мже, соше́дшеся, Рождество́м Твои́м вси́ спа́сшиися, Всенепоро́чная, Твои́м словесе́м после́дующе, достодо́лжно Тя́ ублажа́ем, моля́ще Христа́ Бо́га прегреше́ний оставле́ние дарова́ти ве́рою Тя́ сла́вящим, Ма́терь Его́.

Пе́снь 4.

Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Припев: Святителю отче Кирилле, моли Бога о нас.

Кири́лла богому́драго, Боже́ственных Писа́ний рачи́теля, ко святи́тельскому служе́нию Вели́кий Архиере́й Христо́с призва́л е́сть.

Припев: Святителю отче Кирилле, моли Бога о нас.

Аще и жела́л еси́ уклони́тися от сла́вы земны́я, но оба́че не возмо́гл еси́ презре́ти избра́ния Бо́жия.

Сла́ва Отцу́ и Сы́ну и Свято́му Ду́ху:

Гла́с тво́й, о́тче Кири́лле, и до ны́не слы́шен е́сть: не пренебрега́йте, христиа́не, соверше́нием Боже́ственныя Евхари́стии.

И ны́не и при́сно и во ве́ки веко́в. Ами́нь.

Богородичен: Освяще́нная Трапе́зо, на Не́йже Хле́б сла́дкий испече́ся, Богоро́дице Мари́е, помога́й пою́щим Тя́.

Пе́снь 5

Ирмос: Утренююще, вопие́м Ти́: Го́споди, спаси́ ны, Ты́ бо еси Бо́г на́ш, ра́зве Тебе́, ино́го не ве́мы.

Припев: Святителю отче Кирилле, моли Бога о нас.

Оглаша́юся твои́ми словесы́ благода́тными, Ту́ровский святи́телю, я́же Це́рковь Ру́сская, а́ки би́сер многоце́нный сохраня́ет.

Припев: Святителю отче Кирилле, моли Бога о нас.

Златослове́сный учи́телю, па́че все́х возсия́вый на Руси́, о́тче на́ш Кири́лле, предста́тельствуй за па́ству твою́ пред Го́сподем.

Сла́ва Отцу́ и Сы́ну и Свято́му Ду́ху:

Люде́й правосла́вных хода́тай, апо́столом подо́бник во благове́стиих и бде́ниих, вои́стинну, о́тче, яви́лся еси́.

И ны́не и при́сно и во ве́ки веко́в. Ами́нь.

Богородичен: Роди́вся от Де́вы, ми́р просвети́л еси́, Христе́ Бо́же, и мене́ от прегреше́ний мои́х изба́ви, я́ко Человеколю́бец, и упра́ви живо́т мо́й, молю́ Тя.

Пе́снь 6.

Ирмос: Ри́зу мне́ пода́ждь све́тлу, одея́йся све́том, я́ко ри́зою, многоми́лостиве Христе́ Бо́же на́ш.

Припев: Святителю отче Кирилле, моли Бога о нас.

Аще и не и́мамы, гре́шнии, еле́я до́брых де́л, но моли́твами святи́теля Кири́лла, Светода́вче, на́с просвети́.

Припев: Святителю отче Кирилле, моли Бога о нас.

Тме суеве́рия, отше́дшей иногда́ от па́ствы твоея́, не да́ждь ны́не поглоти́ти на́с, о́тче Кири́лле.

Сла́ва Отцу́ и Сы́ну и Свято́му Ду́ху:

Ору́жием вооружи́вся сло́ва Бо́жия, отгна́л еси́ мглу́ бесо́вскую и посе́кл еси́ нечести́вое ерети́ческое те́рние.

И ны́не и при́сно и во ве́ки веко́в. Ами́нь.

Богородичен: Госпоже́ Пречи́стая, не оста́ви мя́ во мра́це ги́блема, но умоли́ Сы́на Своего́ поми́ловати мя́ окая́ннаго.

Конда́к, гла́с 5:

Бо́дрствуя в моли́твах, послуша́ния и благоче́стия до́брый рачи́тель бы́в, терпе́нию и смире́нию науча́л еси́ па́ству свою́, доброде́тельми преподо́бия и пра́вды ста́до Христо́во озаря́я, и медото́чными словесы́ всю́ зе́млю Ру́сскую пита́я, на пра́вый пу́ть за́поведей Госпо́дних си́лою ду́ха твоего́ наставля́л еси́ все́х, и ны́не просвети́, я́ко со́лнце, лю́ди омраче́нныя грехми́ и к покая́нию на́с приведи́.

Икос:

Прииди́те дне́сь, лю́дие, похва́лим своего́ святи́теля, глаго́люще ему́: ра́дуйся, Кири́лле, святи́телю честны́й и учи́телю на́ш, други́й Златоу́сте, на Руси́ па́че все́х возсия́, святы́м и пресве́тлым уче́нием твои́м концы́ Ру́сския просвети́в; ра́дуйся, я́ко со́лнце, омраче́нныя и те́мныя богоразу́мием просвеща́еши и умудря́еши! Мо́лим ти ся, святи́телю, ма́лое сие́ моле́ние принося́ще: моли́ о на́с Вседержи́теля, Ему́же ны́не предстои́ши со дерзнове́нием, от належа́щих бе́д, скорбе́й, боле́зней и томле́ния вра́жия изба́витися, и от наше́ствия безбо́жнаго ага́рянскаго и междоусо́бныя бра́ни сохрани́тися на́м и во Правосла́вии все́м утверди́тися. Да улучи́м по ми́лости Бо́жией моли́твами твои́ми грехо́в отпуще́ние и присносу́щных бла́г наслажде́ние, с ве́рою и любо́вию, со умиле́нием при́сно тебе́ пою́щия: ра́дуйся, златослове́сный и кро́ткий Росси́йский учи́телю богому́дре Кири́лле, покая́ния, чистоты́ и благоче́стия усе́рдный ревни́телю и моли́твенниче о спасе́нии ду́ш на́ших.

Пе́снь 7.

Ирмос: В нача́ле зе́млю основа́вый, и небеса́ сло́вом утверди́вый, благослове́н еси́ во ве́ки, Го́споди, Бо́же оте́ц на́ших.

Припев: Святителю отче Кирилле, моли Бога о нас.

Уве́дев непотре́бное умышле́ние раздели́ти Це́рковь Ру́сскую, со дерзнове́нием, о́тче, обличи́л еси́ слепца́ и хромца́.

Припев: Святителю отче Кирилле, моли Бога о нас.

Сла́вным и кра́сным ми́ра сего́ не угожда́л еси́, святи́телю Кири́лле, но Еди́ному Го́споду со благогове́нием порабо́тал еси́.

Сла́ва Отцу́ и Сы́ну и Свято́му Ду́ху:

Тро́ицы Пресвяты́я служи́телие, Единосу́щныя и Неразде́льныя, николи́же посра́мятся, ни в се́м ве́це, ни в бу́дущем.

И ны́не и при́сно и во ве́ки веко́в. Ами́нь.

Богородичен: Иера́рхов похвало́, иере́ев украше́ние, люде́й Бо́жиих покро́ве ши́рший о́блака — Ты́ еси́, Ма́ти Де́во.

Пе́снь 8.

Ирмос: На горе́ святе́й просла́вльшася, и в купине́ огне́м Присноде́вы, Моисе́ови та́йну я́вльшаго, Го́спода по́йте и превозноси́те во вся́ ве́ки.

Припев: Святителю отче Кирилле, моли Бога о нас.

Апо́столом подо́бяся, благове́стниче преди́вный, изъясни́л еси́ ве́рным во вся́ком де́ле и сло́ве Боже́ственная Писа́ния.

Припев: Святителю отче Кирилле, моли Бога о нас.

Глаго́лы богодухнове́нныя, путеводя́щия в небе́сное Ца́рствие, пропове́дал еси́ пра́отцем на́шим, первоучи́телю Кири́ллу подража́я.

Сла́ва Отцу́ и Сы́ну и Свято́му Ду́ху:

Освяще́нный богоно́сче, мѵ́ром пома́занный святи́телю Бо́жий, Тро́ицу во Еди́ном Существе́ пое́ши и превозно́сиши во вся́ ве́ки.

И ны́не и при́сно и во ве́ки веко́в. Ами́нь.

Богородичен: Обра́дованная, ра́дуйся, с Тобо́ю Госпо́дь, со арха́нгелом Гаврии́лом и мы́ воспева́ем дерзнове́нно.

Песнь 9

Ирмос: Проявле́нное на горе́ законополо́жнику во огни́ и купине́, Рождество́ Присноде́вы, в на́ше ве́рных спасе́ние, пе́сньми немо́лчными велича́ем.

Припев: Святителю отче Кирилле, моли Бога о нас.

Покая́ния наста́вниче, моли́твенниче преизя́щный, помоли́ся Христу́ Бо́гу о почита́ющих па́мять твою́.

Припев: Святителю отче Кирилле, моли Бога о нас.

Отче Кири́лле, Ту́ровский Златоу́сте, восхваля́ем тя́ немо́лчно, пе́сньми свяще́нными велича́юще.

Сла́ва Отцу́ и Сы́ну и Свято́му Ду́ху:

Юноши и ста́рцы, вся́к во́зраст и сосло́вие, поуча́ются твои́ми, святи́телю, наказа́ньми и исправле́ньми.

И ны́не и при́сно и во ве́ки веко́в. Ами́нь.

Богородичен: Сло́ва па́че сло́ва ро́ждшая, Пречи́стая, моли́ся приле́жно ко Влады́це, в небе́снем Отече́стве со святи́телем Кири́ллом и на́м водвори́тися.

Свети́лен:

Све́тлым уче́нием богоразу́мия своего́ просвети́, блаже́нне о́тче, все́х соверша́ющих па́мять твою́.

Сла́ва И ны́не.

Ра́дуйся, гра́де Ту́рове на́ш древне́йший, сла́внаго твоего́ иера́рха Кири́лла святы́я мо́щи храня́щий, я́ко то́й тя́ по все́м конце́м ру́сским просла́ви, и я́ко втора́го Златоу́ста его́ дне́сь воспева́й пе́сньми.

Молитва Богоносному отцу нашему Кириллу, епископу Туровскому

О предивный подвижниче, преславный святителю, златословесный Святыя Руси учителю, великий угодниче Божий богомудре Кирилле! Воспевая прославльшагося в тебе Бога, к тебе прибегаем и, чтуще твою память, молимся: буди ходатай за нас, недостойных, пред Господом Богом. Твоими молитвами и заступлением да утвердится в нас истинный дух живой веры и святаго благочестия, да сохранимся вси мы благодатию Божиею от неверия и суеверия, от падения греховнаго и духовныя немощи.

Святителю Кирилле! Да будут молитвами твоими во Отечестве нашем пастыри словеснаго стада Христова духом горящий, Господеви работающий. Ты, блаженне Кирилле, и словом, и писанием учил еси древле князей и всех людей земли Русския ходити достойно звания своего христианскаго. Призри и на нас, чад и учеников твоих, и умоли Бога, да низпослет стране нашей твердость и благоустроение, законам нашим святость и силу, правителем и судиям мудрость, усердие, безкорыстие и нелицеприятие. Испроси у Всещедраго Бога вся благопотребная нам для спасения: немощным — в вере и добрых делех укрепление, падшим — возстание, подвизающимся — доброе преуспеяние.

О пречудне святителю Кирилле! Сам зриши страну, в нейже родился и много потрудился еси; зриши народ, егоже древле просветил еси. Сам веси, яже требуем, веси наша немощи и согрешения. Буди же нам помощник, покровитель, заступник и управитель жизни нашея. Да под твоим покровом и заступлением достойно будем славити Отца и Сына и Святаго Духа, ныне и присно, и во веки веков. Аминь.