11 мая.

Канон первый святителю Кириллу, епископу Туровскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Благоче́стия ревни́телю и рачи́телю, и́ноков и сто́лпников похвало́, святи́телю Ту́ровския па́ствы пресла́вне, златослове́сный учи́телю, све́тлым уче́нием богоразу́мия своего́ просвети́вый концы́ Ру́сския, в моли́тве к Бо́гу благода́тный гре́шников споспе́шниче, Кири́лле богому́дре, моли́ Христа́ Бо́га утверди́тися на́м, сооте́чественником твои́м, во Правосла́вии, благоче́стии и единомы́слии.

Величание:

Величаем тя, / Туровский подвижниче и святителю Кирилле, / златословесный Российский учителю, / и чтем святую память твою, / ты бо еси усердный пред Богом предстателю за род наш / и теплый молитвенниче о спасении душ наших.

Канон 1-й, Глас 6.

Песнь 1.

Ирмос: Сече́ное сече́тся мо́ре Чермно́е, волнопита́емая же изсуша́ется глубина́, та́яжде ку́пно безору́жным бы́вши проходи́ма, и всеору́жным гро́б. Пе́снь же богокра́сная воспева́шеся: сла́вно просла́вися Христо́с, Бо́г на́ш.

Святой Троице: Слава Тебе, Боже наш, слава Тебе.

Смы́сла Пода́телю Триипоста́сный Бо́же, Ты́ да́ждь на́м ра́зум и сло́во, да, отве́рзше недосто́йная уста́, воспои́м святи́теля Кири́лла, Ту́ровския земли́ па́стыря и учи́теля и всея́ Руси́ свети́льника.

Припев: Святителю отче Кирилле, моли Бога о нас.

Весели́ся ны́не и ра́дуйся, гра́де Ту́рове, ни чи́мже ме́ньший ты́ еси́ в зе́млях Белору́сских, но па́че сла́вою и че́стию возвели́ченный изря́дных уго́дников Бо́жиих, от ни́хже мы́ святи́теля Кири́лла дне́сь благогове́йно прославля́ем.

Сла́ва Отцу́ и Сы́ну и Свято́му Ду́ху:

Я́коже уме́ты вмени́л еси́ бога́тство тле́нное и сла́ву скороги́бнущую, избра́нниче Бо́жий Кири́лле, от ю́ности яви́вый ума́ твоего́ боже́ственная устремле́ния, я́же ко спасе́нию, во объя́тия О́тча пу́ть указу́ющая.

И ны́не и при́сно и во ве́ки веко́в. Ами́нь.

Богородичен: Ти́хое Приста́нище к Тебе́ прибега́ющих, Преблагослове́нная Влады́чице, моли́ из Тебе́ воплоще́ннаго Христа́ Бо́га на́шего, во е́же бежа́ти на́м суеты́ ми́ра сего́, и во вся́ком ме́сте и зва́нии небе́снаго Ца́рствия удосто́итися.

Песнь 3

Ирмос: Госпо́дь, Сы́й, все́х и Зижди́тель Бо́г, созда́нное, Безстра́стный, обнища́в, Себе́ соедини́, и Па́сха, за я́же хотя́ше умре́ти, Са́м Сы́й, Себе́ предпожре́: яди́те, — вопия́, — Те́ло Мое́ и ве́рою утверди́теся.

Припев: Святителю отче Кирилле, моли Бога о нас.

Измла́да прилежа́л еси́, о́тче, уче́нию кни́жному, и Боже́ственным Писа́нием свы́ше укрепля́емь и просвеще́н, прише́л еси́ во оби́тель и́ноческую порабо́тати Го́сподеви.

Припев: Святителю отче Кирилле, моли Бога о нас.

Те́ло твое́ посто́м и бде́нием сотвори́л еси́ прия́телище Ду́ха Свята́го, о́тче свяще́ннейший, Кири́лле богому́дре, и́ноком яви́лся еси́ о́браз и пра́вило, па́че все́х тружда́яся.

Сла́ва Отцу́ и Сы́ну и Свято́му Ду́ху:

Е́же не и́мать послуша́ния ко игу́мену и все́й во Христе́ бра́тии, я́коже обеща́ся при постриже́нии, таковы́й мона́х спасе́н бы́ти не мо́жет, — взыва́л еси́ непреста́нно, преподо́бнейший, да не уло́вишися в бесо́вския се́ти.

И ны́не и при́сно и во ве́ки веко́в. Ами́нь.

Богородичен: Лю́дие непокори́вии и суему́дреннии, почто́ в похоте́ниих свои́х косне́ете? Поревну́йте послуша́нию Богоотрокови́цы, Я́же Гаврии́лу рече́: Се́ раба́ Госпо́дня. И та́ко мы́сляще и де́юще смире́нию нелицеме́рному навыко́сте.

Кондак, глас 3.

В Ту́рове, свя́те, священноде́йствитель показа́лся еси́, Христо́во бо, о́тче Кири́лле, Ева́нгелие испо́лнив, положи́л еси́ ду́шу твою́ о лю́дех твои́х и соблю́л еси́ еди́нство Це́ркве Ру́сския. Сего́ ра́ди освяти́лся еси́, я́ко вели́кий таи́нник Бо́жия благода́ти.

Седален, глас 4:

От ю́ности взе́м кре́ст тво́й, благочести́во Христу́ после́довал еси́, увяди́в плотско́е мудрова́ние воздержа́нием. Те́мже на святи́тельском седа́лищи се́д, возвели́чил еси́ Влады́ку и Того́ Пречи́стую Ма́терь, о́тче Кири́лле богоблаже́нне.

Песнь 4

Ирмос: Прови́дев проро́к та́йну Твою́ неизрече́нную, Христе́, провозгласи́: положи́л еси́ тве́рдую любо́вь кре́пости, О́тче Ще́дрый, Единоро́днаго бо Сы́на, Благи́й, очище́ние в ми́р посла́л еси́.

Припев: Святителю отче Кирилле, моли Бога о нас.

Ева́нгельских слове́с уче́нием после́дуя, о́тче Кири́лле, избра́л еси́ те́сный пу́ть и та́ко возше́л еси́ на ве́рх доброде́телей, на столпе́ еди́н затвори́вся, подвиза́яся в посте́ и богомы́слии.

Припев: Святителю отче Кирилле, моли Бога о нас.

Избе́г суесло́вия и пра́здности, Боже́ственными Писа́нии у́м сво́й просвети́л еси́, и во свяще́ннем безмо́лвии очи́стил еси́ от страсте́й ду́шу, я́же всего́ ми́ра вя́щше.

Сла́ва Отцу́ и Сы́ну и Свято́му Ду́ху:

Изволе́нием Ду́ха Свята́го избра́ша вси́ лю́дие тя́, о́тче Кири́лле, во архипа́стыря Ту́ровскаго, ты́ же, неотсту́пному моле́нию и́х повину́яся, за послуша́ние са́н восприя́л еси́, не ра́ди себе́, но ра́ди сла́вы Бо́жия.

И ны́не и при́сно и во ве́ки веко́в. Ами́нь.

Богородичен: Престо́ле о́гненный, ра́дуйся, Неве́сто неневе́стная, Ма́ти Пречи́стая, Пала́то преукраше́нная, Киво́те святы́й, Бо́га Невмести́маго Вмести́лище.

Пе́снь 5

Ирмос: Сою́зом любве́ связу́еми, апо́столи, влады́чествующему все́ми себе́ Христу́ возло́жше, кра́сны но́ги очища́ху, благовеству́юще все́м ми́р.

Припев: Святителю отче Кирилле, моли Бога о нас.

Раче́ние о па́стве своея́ име́я, ко спасе́нию вы́ну все́х наставля́л еси́, сло́вом и житие́м бы́ти христиа́нскаго зва́ния досто́йны.

Припев: Святителю отче Кирилле, моли Бога о нас.

Едине́ние ду́ха в сою́зе ми́ра соблюда́л еси́, по апо́столу, богому́дре, и ра́спри тлетво́рныя и лука́вая разделе́ния пресека́л еси́.

Сла́ва Отцу́ и Сы́ну и Свято́му Ду́ху:

Про́клят вся́к, и́же мы́слит зла́я, раздели́ти ма́терь на́шу Це́рковь Ру́сскую, таковы́й е́сть богоотсту́пник, — дерзнове́нно провозгласи́л еси́, святи́телю Кири́лле.

И ны́не и при́сно и во ве́ки веко́в. Ами́нь.

Богородичен: Отсека́ют са́ми себе́ от Це́ркве Бо́жия, не чту́щия правосла́вно Пречи́стую Богоро́дицу, мы́ же ве́рнии немо́лчно Ю велича́ем, Засту́пницу на́шу усе́рдную.

Песнь 6

Ирмос: Бе́здна после́дняя грехо́в обы́де мя́, и, волне́ния не ктому́ терпя́, я́ко Ио́на Влады́це, вопию́ Ти: от тли́ мя возведи́.

Припев: Святителю отче Кирилле, моли Бога о нас.

До́браго Па́стыря Христа́ стопа́м после́дуя, взыска́ти овча́ поги́бшее прише́дшаго, святи́телю Кири́лле, потща́лся еси́, да никто́же в па́стве твое́й от злове́рия поги́бнет.

Припев: Святителю отче Кирилле, моли Бога о нас.

Орга́н Уте́шителя Ду́ха и́стины бы́в, наста́вил еси́, о́тче, твои́ми писа́нии сыно́в земли́ Ру́сския пресека́ти ко́зни лука́внующих.

Сла́ва Отцу́ и Сы́ну и Свято́му Ду́ху:

Боголю́бскому кня́зю Андре́ю мно́гая посла́ния душеполе́зная написа́в, яви́лся еси́, богодухнове́нный Кири́лле, среди́ бу́рь жите́йских путево́ждь ко спасе́нию.

И ны́не и при́сно и во ве́ки веко́в. Ами́нь.

Богородичен: На небеса́ возвела́ еси́ естество́ челове́ческое, в ти́не страсте́й иногда́ лежа́вшее, Преблагослове́нная Ма́ти и Де́во, Христа́ Бо́га ро́ждшая.

Кондак, глас 5:

Бо́дрствуя в моли́твах, послуша́ния и благоче́стия до́брый рачи́тель бы́в, терпе́нию и смире́нию науча́л еси́ па́ству свою́, доброде́тельми преподо́бия и пра́вды ста́до Христо́во озаря́я, и медото́чными словесы́ всю́ зе́млю Ру́сскую пита́я, на пра́вый пу́ть за́поведей Госпо́дних си́лою ду́ха твоего́ наставля́л еси́ все́х, и ны́не просвети́, я́ко со́лнце, лю́ди омраче́нныя грехми́ и к покая́нию на́с приведи́.

Икос:

Прииди́те дне́сь, лю́дие, похва́лим своего́ святи́теля, глаго́люще ему́: ра́дуйся, Кири́лле, святи́телю честны́й и учи́телю на́ш, други́й Златоу́сте, на Руси́ па́че все́х возсия́, святы́м и пресве́тлым уче́нием твои́м концы́ Ру́сския просвети́в; ра́дуйся, я́ко со́лнце, омраче́нныя и те́мныя богоразу́мием просвеща́еши и умудря́еши! Мо́лим ти ся, святи́телю, ма́лое сие́ моле́ние принося́ще: моли́ о на́с Вседержи́теля, Ему́же ны́не предстои́ши со дерзнове́нием, от належа́щих бе́д, скорбе́й, боле́зней и томле́ния вра́жия изба́витися, и от наше́ствия безбо́жнаго ага́рянскаго и междоусо́бныя бра́ни сохрани́тися на́м и во Правосла́вии все́м утверди́тися. Да улучи́м по ми́лости Бо́жией моли́твами твои́ми грехо́в отпуще́ние и присносу́щных бла́г наслажде́ние, с ве́рою и любо́вию, со умиле́нием при́сно тебе́ пою́щия: ра́дуйся, златослове́сный и кро́ткий Росси́йский учи́телю богому́дре Кири́лле, покая́ния, чистоты́ и благоче́стия усе́рдный ревни́телю и моли́твенниче о спасе́нии ду́ш на́ших.

Песнь 7

Ирмос: О́троцы в Вавило́не пе́щнаго пла́мене не убоя́шася, но, посреде́ пла́мене вве́ржени, ороша́еми, поя́ху: благослове́н еси́, Го́споди, Бо́же оте́ц на́ших.

Припев: Святителю отче Кирилле, моли Бога о нас.

Испо́лнив служе́ние свое́, преше́л еси́ в жи́знь безконе́чную, подвиза́я все́х с тобо́ю взыва́ти: благослове́н еси́, Го́споди, Бо́же оте́ц на́ших.

Припев: Святителю отче Кирилле, моли Бога о нас.

Христолю́бцы, лику́йте, соверша́юще па́мять святи́теля Кири́лла, и в весе́лии подвиза́йте все́х пе́ти: благослове́н еси́, Го́споди, Бо́же оте́ц на́ших.

Сла́ва Отцу́ и Сы́ну и Свято́му Ду́ху:

Оте́ческаго благоче́стия ревни́телие, держа́щии свята́го Кири́лла моли́твы и кано́ны, воспо́йте с на́ми вку́пе: благослове́н еси́, Го́споди, Бо́же оте́ц на́ших.

И ны́не и при́сно и во ве́ки веко́в. Ами́нь.

Богородичен: Упова́ющии на Тя́, Богоро́дице, николи́же посра́млены су́ть, но под кро́вом Твои́м сохраня́еми, благословля́ют Твое́ пред Бо́гом предста́тельство.

Песнь 8

Ирмос: За зако́ны оте́ческия блаже́ннии в Вавило́не ю́ноши, предбе́дствующе, царю́ющаго оплева́ша повеле́ние безу́мное и, совоку́плени, и́мже не свари́шася огне́м, Держа́вствующему досто́йную воспева́ху пе́снь: Го́спода по́йте, дела́, и превозноси́те во вся́ ве́ки.

Припев: Святителю отче Кирилле, моли Бога о нас.

Кири́лле святи́телю, реши́ти же и вяза́ти от Бо́га име́я вла́сть, вся́ разреши́ грехопаде́ния твою́ па́мять соверша́ющих, покая́ние те́плое принося́щих, к Ча́ше Безсме́ртия приступа́ющих, вопию́ще во умиле́нии: Го́спода по́йте, дела́, и превозноси́те во вся́ ве́ки.

Припев: Святителю отче Кирилле, моли Бога о нас.

Ра́дуйся, святе́йшая Митропо́лие, Це́рковь Белору́сская, я́ко труба́ возглаша́й в де́нь па́мяти святи́теля Кири́лла, и́бо Госпо́дь благослови́ и умно́жи тя́, архиере́и, свяще́нницы, и́ноцы и вся́ ча́да твоя́ ны́не велегла́сно взыва́ют: Го́спода по́йте, дела́, и превозноси́те во вся́ ве́ки.

Сла́ва Отцу́ и Сы́ну и Свято́му Ду́ху:

А́нгелы и челове́цы вку́пе дне́сь лику́ют, прославля́юще святи́теля Кири́лла, па́ства Ту́ровская пра́зднует благогове́йно, я́ко христиа́ном подоба́ет, и хвалу́ Бо́гови воздае́т: Го́спода по́йте, дела́, и превозноси́те во вся́ ве́ки.

И ны́не и при́сно и во ве́ки веко́в. Ами́нь.

Богородичен: Шата́нием язы́ческим и суему́дрием плотски́м ослепле́н, у́м гордели́вый не мо́жет пости́гнути та́инство рождества́ Твоего́, Присноде́во, но чи́ст и смире́н се́рдцем, Тя́ ве́дая и́стинную Богоро́дицу, взыва́ет: Го́спода по́йте, дела́, и превозноси́те во вся́ ве́ки.

Песнь 9

Ирмос: Ве́чное обре́тше избавле́ние, от пра́отца Ада́ма свы́ше рожде́нное, ро́ду стра́шнаго изрече́ния, рождество́ со безпло́тными непостижи́мое славосло́вим, Богоро́дицу Тя́ пе́сньми велича́юще.

Припев: Святителю отче Кирилле, моли Бога о нас.

Ежеле́тняя па́мять твоя́, сла́вне, духо́вная весна́ все́м ве́рным яви́ся, зима́ грехо́вная упраздни́ся, и лику́ет дне́сь па́ства Ту́ровская, я́коже цвета́ми, пе́сньми Це́рковь Христо́ву украша́ющи.

Припев: Святителю отче Кирилле, моли Бога о нас.

Ны́не с на́ми веселя́тся святи́и му́ченицы Бори́с и Гле́б, и Лавре́нтий и Марти́н затво́рницы, и кня́зи Андре́й и Бори́с, и свяще́ннейшии страда́льцы Мака́рий, Иоа́нн и ини́и мно́зии, вку́пе со святи́телем Кири́ллом, Ту́ровския земли́ свети́льницы.

Сла́ва Отцу́ и Сы́ну и Свято́му Ду́ху:

Иорда́нским струя́м подо́бящися, взыгра́й, реко́ При́пяте, ко свяще́нному Днепру́ и гора́м Ки́евским во́ды своя́ несу́щи и возвраща́ющи вспя́ть кресты́ ка́менныя, я́же и до ны́не зе́млю Ту́ровскую освяща́ют.

И ны́не и при́сно и во ве́ки веко́в. Ами́нь.

Богородичен: Ея́же ра́ди просла́вися земля́ на́ша да́же и до Ки́ева, Пречу́дная Ма́ти Бо́жия, на кресте́ Купя́тицкий о́браз Сво́й яви́вшая и на́с гре́шных ми́лостивно утеша́ющая, при́сно хвале́бными гла́сы Тя́ велича́ем.

Светилен:

Све́тлым уче́нием богоразу́мия своего́ просвети́, блаже́нне о́тче, все́х соверша́ющих па́мять твою́.

Молитва Богоносному отцу нашему Кириллу, епископу Туровскому

О предивный подвижниче, преславный святителю, златословесный Святыя Руси учителю, великий угодниче Божий богомудре Кирилле! Воспевая прославльшагося в тебе Бога, к тебе прибегаем и, чтуще твою память, молимся: буди ходатай за нас, недостойных, пред Господом Богом. Твоими молитвами и заступлением да утвердится в нас истинный дух живой веры и святаго благочестия, да сохранимся вси мы благодатию Божиею от неверия и суеверия, от падения греховнаго и духовныя немощи.

Святителю Кирилле! Да будут молитвами твоими во Отечестве нашем пастыри словеснаго стада Христова духом горящий, Господеви работающий. Ты, блаженне Кирилле, и словом, и писанием учил еси древле князей и всех людей земли Русския ходити достойно звания своего христианскаго. Призри и на нас, чад и учеников твоих, и умоли Бога, да низпослет стране нашей твердость и благоустроение, законам нашим святость и силу, правителем и судиям мудрость, усердие, безкорыстие и нелицеприятие. Испроси у Всещедраго Бога вся благопотребная нам для спасения: немощным — в вере и добрых делех укрепление, падшим — возстание, подвизающимся — доброе преуспеяние.

О пречудне святителю Кирилле! Сам зриши страну, в нейже родился и много потрудился еси; зриши народ, егоже древле просветил еси. Сам веси, яже требуем, веси наша немощи и согрешения. Буди же нам помощник, покровитель, заступник и управитель жизни нашея. Да под твоим покровом и заступлением достойно будем славити Отца и Сына и Святаго Духа, ныне и присно, и во веки веков. Аминь.