10 мая.

Канон преподобному Стефану, игумену Печерскому, епископу Владимиро-Волынскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 8:

Правосла́вия наста́вниче, благоче́стия учи́телю и чистоты́, Волы́нския па́ствы свети́льниче, архиере́ев богодухнове́нное удобре́ние, Стефа́не прему́дре, уче́ньми твои́ми вся́ просвети́л еси́, цевни́це духо́вная, моли́ Христа́ Бо́га спасти́ся душа́м на́шим.

Велича́ние:

Велича́ем тя́, святи́телю о́тче Стефа́не, и чте́м святу́ю па́мять твою́, ты́ бо мо́лиши за на́с Христа́ Бо́га на́шего.

Кано́н свята́го, гла́с 6:

Пе́снь 1.

Ирмос: Волно́ю морско́ю скры́вшаго дре́вле, гони́теля мучи́теля — под земле́ю скры́ша спасе́нных о́троцы; но мы́ я́ко отрокови́цы, Го́сподеви пои́м, сла́вно бо просла́вися.

Припев: Преподобне отче Стефане, моли́ Бо́га о нас.

Зри́ши ны́не, преподо́бне, Бо́жия и Ангельския све́тлости на небеси́, предстоя́ у престо́ла Влады́ки ми́ра ви́димаго же и неви́димаго; помоли́ся у́бо о мне́ многогре́шнем, да досто́йне воспою́ честну́ю твою́ па́мять.

Припев: Преподобне отче Стефане, моли́ Бо́га о нас.

Ангелом равноссе́льник счи́слился еси́, о́тче преподо́бне, на земли́ во пло́ти, я́коже безпло́тен, Ангельски пожи́в и мно́гими доброде́тельми, па́че же души́ чистото́ю и незло́бием Го́сподеви угоди́в, от черто́гов небе́сных назира́й на́с, пою́щих тя́.

Сла́ва Отцу́ и Сы́ну и Свято́му Ду́ху:

Сосу́д бы́в свяще́н Ду́ха Свята́го, сугу́бую благода́ть Того́жде Всеосвяща́ющаго Ду́ха восприя́л еси́, преподо́бне Стефа́не, егда́ Бо́жиим промышле́нием поста́влен бы́л еси́ во епи́скопа гра́ду Влади́миру; моли́ся о па́стве твое́й ко Го́споду.

И ны́не и при́сно и во ве́ки веко́в. Ами́нь.

Богородичен: Тебе́ пе́сньми немо́лчными ублажа́ем, Де́во Богоро́дице, я́же от Тро́ицы еди́наго во чре́ве прии́мши, боже́ственными рука́ми Пресу́щное Сло́во носи́ла еси́ Непрело́жное и Неизме́нное; избавля́й на́с, Засту́пнице на́ша, от вся́ких бе́д.

Пе́снь 3.

Ирмос: Тебе́, на вода́х пове́сившаго всю́ зе́млю неодержи́мо, тва́рь, ви́девши на ло́бнем ви́сима, у́жасом мно́гим содрога́шеся, не́сть свя́т, ра́зве Тебе́, Го́споди, взыва́ющи.

Припев: Преподобне отче Стефане, моли́ Бо́га о нас.

Укрепле́н бы́в си́лою Бо́жиею и по́мощию Богома́тере, за́поведь духо́внаго отца́ твоего́, преподо́бнаго Феодо́сия, безбе́дне испо́лнил еси́, е́же прилежа́ти построе́нию но́ваго хра́ма во оби́тели, те́мже, соверши́в се́й, небеси́ подо́бящийся хра́м, возвели́чил еси́ Го́спода и Пречи́стую Де́ву Богоро́дицу.

Припев: Преподобне отче Стефане, моли́ Бо́га о нас.

Преподо́бне о́тче Стефа́не! Кто́ не подиви́тся безме́рному твоему́ смире́нию, кро́тости и незло́бию? Егда́ бо бра́тия распала́ема зло́бою диа́вольскою, изгна́ше тя́ из оби́тели, ты́ я́коже овогда́ блаже́нный первому́ченик, моли́лся еси́ о вражду́ющих на тя́, глаго́ля: Го́споди, не поста́ви и́м греха́ сего́.

Сла́ва Отцу́ и Сы́ну и Свято́му Ду́ху:

Истиннаго Све́та заря́ми облистава́емь, к Тому́ невече́рнему Све́ту но́выя полки́ и́ночествующих пове́л еси́, бли́зь святы́я оби́тели Пече́рския, с по́мощию ча́д твои́х духо́вных но́вую оби́тель Кло́вскую основа́л, и та́мо во сла́ву Пречи́стыя Де́вы Богоро́дицы хра́м но́вый созда́в.

И ны́не и при́сно и во ве́ки веко́в. Ами́нь.

Богородичен: Сы́й естество́м Госпо́дь, все́м невмести́мый Единоро́дный Сы́не Бо́жий, в Тебе́ вмести́ся, Де́во Богоро́дице, пло́ть от Тебе́ прии́мь и стра́шная кре́стная страда́ния претерпе́в за безме́рное милосе́рдие к на́м, земноро́дным, да спасе́т на́с по неизрече́нней Свое́й ми́лости.

Седа́лен, гла́с 3:

Во́зрастом де́тищь бы́в, преподо́бне Стефа́не, прия́л еси́ и́го Христо́во благо́е и бре́мя Его́ ле́гкое на плещи́ твоя́, руководи́мь во и́ночестем житии́ от преподо́бнаго Феодо́сия Пече́рскаго. Та́же возраста́я в по́двизех и доброде́телех и́ноческих, и са́м бы́л еси́ игу́мен и руководи́тель бра́тии в житии́ духо́внем. По́слежде же, я́ко му́ж учи́телен, поста́влен бы́л еси́ во епи́скопа гра́ду Влади́миру и до́бре упа́сл еси́ ста́до Христо́во. Моли́ся, свя́тче, о чту́щих любо́вию па́мять твою́ святу́ю.

Пе́снь 4.

Ирмос: На Кресте́ Твое́ Боже́ственное истоща́ние прови́дя, Авваку́м, ужа́сся, вопия́ше: Ты́ си́льных пресе́кл еси́ держа́ву, Бла́же, приобща́яся су́щим во а́де, я́ко Всеси́лен.

Припев: Преподобне отче Стефане, моли́ Бо́га о нас.

Влади́мир, гра́д земли́ Волы́нския, прия́т тя́ от оби́тели Кло́вския архиере́я богому́дренна, па́стыря учи́тельна и наста́вника просвеще́нна Ду́хом Бо́жиим, Ему́же, свя́те, моли́ся о чту́щих тя́.

Припев: Преподобне отче Стефане, моли́ Бо́га о нас.

Якоже во дни́ ю́ности моея́ чуде́сне благоуве́тлив бы́л еси́, о́тче преподо́бне, к непотре́бному слузе́ твоему́, си́це и до ста́рости же и престаре́ния моего́ не оста́ви мя́ кроме́ твоего́ мощна́го заступле́ния.

Сла́ва Отцу́ и Сы́ну и Свято́му Ду́ху:

Те́ло и ду́шу грехми́ окаля́х сту́дными и безме́стными, и того́ ра́ди не́мощи и неду́зи отягоща́ют мя́, окая́ннаго; преподо́бне Стефа́не, помоли́ся у́бо ны́не ко Го́споду о мне́, многоне́мощнем, и о все́х неду́гующих и стра́ждущих лю́дех, да спасе́мся.

И ны́не и при́сно и во ве́ки веко́в. Ами́нь.

Богородичен: Человеколю́бца ро́ждши Бо́га, Боголюби́вая Влады́чице Де́во Богоро́дице, Ма́ти милосе́рдия еси́ все́м лю́дем, обремене́нным грехи́, скорбми́ и боле́зньми мно́гими, моли́, Влады́чице, Сы́на Твоего́, да спасе́т на́с от обстоя́щих бе́д.

Пе́снь 5

Ирмос: Богоявле́ния Твоего́, Христе́, к на́м ми́лостивно бы́вшаго, Иса́ия, Све́т ви́дев Невече́рний, из но́щи у́треневав взыва́ше: воскре́снут ме́ртвии, и воста́нут су́щии во гробе́х, и вси́ земноро́днии возра́дуются.

Припев: Преподобне отче Стефане, моли́ Бо́га о нас.

Еди́ницу несозда́нную, Тро́ицу единосу́щную и неразде́льную, Предве́чнаго Триеди́наго Бо́га, Творца́ и Вседержи́теля миро́в вселе́нныя, богосло́вил еси́, Стефа́не, просвеща́я благочести́выя лю́ди свяще́нными твои́ми богосло́вии.

Припев: Преподобне отче Стефане, моли́ Бо́га о нас.

Престо́лу Бо́жию предстоя́, богоблаже́нне Стефа́не, со дерзнове́нием, я́ко па́стырь до́брый и засту́пник на́м усе́рдный, любо́вию пра́зднующих ны́не пречестну́ю па́мять отше́ствия твоего́ ко Го́споду, моли́твами твои́ми спаса́й от вся́ких бе́д.

Сла́ва Отцу́ и Сы́ну и Свято́му Ду́ху:

Ра́дуйся, святи́телю Бо́жий, о́тче Стефа́не, я́ко в при́сней ти́ земли́ Волы́нстей ве́ра Правосла́вная от ле́т дре́вних, от дни́й твоего́ зде́ святи́тельства, пребыва́ет на тве́рдем основа́нии, а́ще и мно́го обурева́ема быва́ет от многоразли́чных напа́стей; моли́ся, да и во пре́дняя непозы́блема бу́дет.

И ны́не и при́сно и во ве́ки веко́в. Ами́нь.

Богородичен: Аз, Преблагослове́нная Влады́чице моя́, Де́во Богоро́дице, прибега́ю к Твоему́ честно́му покро́ву и многомо́щному заступле́нию, и ве́м, я́ко Тобо́ю обря́щу спасе́ние. Споспешеству́ема бо хода́тайствы преподо́бнаго отца́ на́шего Стефа́на, вся́ мо́жеши о на́с у Сы́на Твоего́ и Бо́га на́шего.

Пе́снь 6.

Ирмос: Ят бы́сть, но не удержа́н в пе́рсех ки́товых Ио́на: Тво́й бо о́браз нося́, Страда́вшаго, и погребе́нию да́вшагося, я́ко от черто́га от зве́ря изы́де. Приглаша́ше же кустоди́и: храня́щии су́етная и ло́жная, ми́лость сию́ оста́вили есте́.

Припев: Преподобне отче Стефане, моли́ Бо́га о нас.

Возсия́ ти́ в виде́нии нощне́м све́т неизрече́нный над ме́стом, иде́же погребе́но бы́сть честно́е те́ло учи́теля твоего́, преподо́бнаго Феодо́сия. Тогда́ со игу́меном оби́тели Кло́вския Кли́ментом потща́лся еси́ к ме́сту тому́, да просла́виши Бо́га, ди́внаго во святы́х Свои́х.

Припев: Преподобне отче Стефане, моли́ Бо́га о нас.

Оте́ц преподо́бных ли́к, совоку́пльшеся в но́щь чу́днаго виде́ния неизрече́ннаго све́та в пеще́ре Феодо́сиевей, Стефа́н блаже́нный, архипа́стырь Волы́нский, Кли́мент, Кло́вский игу́мен, Иоа́нн, игу́мен Пече́рский и преподо́бный Не́стор Летопи́сец, изъя́ша из не́др земли́ нетле́нное те́ло свята́го Феодо́сия.

Сла́ва Отцу́ и Сы́ну и Свято́му Ду́ху:

Спаси́телю Бо́гу возда́ша преподо́бнии отцы́ хвалу́ и благодаре́ние, я́ко блаже́ннаго первонача́льника и́ноческаго жития́ на гора́х Ки́евских, преподо́бнаго Феодо́сия, честно́е те́ло в не́дрех земли́ нетле́нно сохрани́ся, и та́ко испо́лнися писа́ние, е́же глаго́лет: не да́си преподо́бному Твоему́ ви́дети истле́ния.

И ны́не и при́сно и во ве́ки веко́в. Ами́нь.

Богородичен: Ле́стию дре́вле пра́отцы на́ша изгна́ зми́й из рая́, Ты́ же си́х, о Богома́ти, воззвала́ еси́ Рождество́м Твои́м к ве́чному блаже́нству. Обновля́йся у́бо, Ада́ме, и Ево весели́ся, проро́цы со апо́столы и му́ченики ликовству́йте, и преподо́бнии со святи́тели весели́теся.

Конда́к, гла́с 4:

Доброде́телей мно́гих учи́телю изря́дный и иера́рхов честно́е и ди́вное украше́ние, Стефа́не преблаже́нне, и ны́не отгоня́й во́лки мы́сленныя от ста́да, Бо́гом тебе́ вруче́ннаго, святы́ми твои́ми моли́твами подава́й чту́щим тя́ доброде́телей исправле́ние и собла́знов избавле́ние, па́че же утверди́ в земли́ на́шей Правосла́вие неруши́мо до сконча́ния ве́ка.

Икос:

Беды́ мно́ги, я́ко река́ многово́дная обыше́дше обыдо́ша ны́не Це́рковь на́шу Правосла́вную, не́когда тобо́ю, святи́телю, окормле́нную и упра́вленную, и во́лны си́х бе́д с я́ростию устремля́ются во е́же низпроврещи́ с основа́ния, на не́мже стои́т Це́рковь свята́я и зи́ждется благоче́стие христиа́н правосла́вных. Ве́рующе же непрело́жным глаго́лом Христо́вым, тве́рдо упова́ем, я́ко и врата́ а́дова не одоле́ют Це́ркви Бо́жией до ве́ка. Оба́че, па́ки и па́ки уми́льно про́сим тя́, архиере́ю на́ш предо́брый, многомо́щными твои́ми моли́твами заступа́й в земли́ на́шей Правосла́вие от враго́в его́ неруши́мо до сконча́ния ве́ка.

Пе́снь 7.

Ирмос: Неизрече́нное чу́до: в пещи́ Изба́вивый преподо́бныя о́троки из пла́мене, во гро́бе ме́ртв бездыха́нен полага́ется, во спасе́ние на́с пою́щих: Изба́вителю Бо́же, благослове́н еси́.

Припев: Преподобне отче Стефане, моли́ Бо́га о нас.

Апо́столом равноче́стнии священнонача́льницы, Ефре́м Переясла́вский, Стефа́н Влади́мирский и ини́и боголюбе́знии епи́скопи, совоку́пльшеся с со́нмом игу́менов и и́ноков, со свети́льники мно́гими и пе́нием пренесо́ша, торжеству́юще, мо́щи преподо́бнаго Феодо́сия из пеще́ры в вели́кую це́рковь оби́тели Пече́рския, и в ра́дости воспева́юще Го́сподеви: Изба́вителю Бо́же, благослове́н еси́.

Припев: Преподобне отче Стефане, моли́ Бо́га о нас.

Ве́лию и сугу́бую ра́дость и утеше́ние восприя́л еси́, святи́телю Стефа́не, в пренесе́ние честны́х и многоцеле́бных моще́й преподо́бнаго Феодо́сия: се́ бо, ему́же прее́мник на игу́менстве бы́л еси́, сы́новний до́лг почита́ния тому́ яви́л еси́, и уте́шен бы́л еси́ священнослуже́нием в со́зданном тобо́ю хра́ме Успе́ния Богома́тере, того́ ра́ди воспе́л еси́: Изба́вителю Бо́же, благослове́н еси́.

Сла́ва Отцу́ и Сы́ну и Свято́му Ду́ху:

Иерусали́ма вы́шняго насле́дниче, свя́те Стефа́не, с го́рних высо́т назира́й твою́ па́ству Волы́нскую и моли́твами твои́ми соблюда́й ю́ непреста́нно во правосла́вии тве́рду и непоколеби́му. Оба́че и вся́цей души́ христиа́нстей, скорбя́щей же и озло́бленней, ми́лости Бо́жия и по́мощи тре́бующей, неусы́пный бу́ди засту́пник и ско́рый помо́щник, да с тобо́ю Го́сподеви пое́м: Изба́вителю Бо́же, благослове́н еси́.

И ны́не и при́сно и во ве́ки веко́в. Ами́нь.

Богородичен: Еди́ну от все́х родо́в, Чи́стую Голуби́цу, избра́ Тя́ Человеколю́бец Госпо́дь в неискусобра́чную Ма́терь Христа́ Спа́са на́шего: от Твои́х бо крове́й восприи́мь пло́ть Единоро́дный Сы́н Бо́жий, обожи́ те́м оземлени́вшееся и грехо́вное челове́чество, и возведе́ ро́д на́ш от земли́ к небеси́. Те́мже в ра́довании серде́ц пое́м Ему́: Изба́вителю Бо́же, благослове́н еси́.

Пе́снь 8.

Ирмос: Ужасни́ся, боя́йся, Не́бо, и да подви́жатся основа́ния земли́: се́ бо в мертвеце́х вменя́ется в Вы́шних Живы́й, и во гро́б ма́л странноприе́млется. Его́же о́троцы благослови́те, свяще́нницы воспо́йте, лю́дие превозноси́те во вся́ ве́ки.

Припев: Преподобне отче Стефане, моли́ Бо́га о нас.

Освяща́еми есмы́ луча́ми твои́х, о́тче доброде́телей и свяще́нных моли́тв, и те́ми ко́зний лука́вых и вся́ческих наве́тов вра́жиих свобожда́емся, пою́ще и превознося́ще Го́спода во ве́ки.

Припев: Преподобне отче Стефане, моли́ Бо́га о нас.

Тече́ние жития́ твоего́ соверши́в богоуго́дне, де́монская по́лчища победи́л еси́, Стефа́не блаже́нне, того́ ра́ди вене́ц блаже́нства ве́чнаго прия́л еси́ от Го́спода, поя́ и превознося́ Его́ во ве́ки.

Сла́ва Отцу́ и Сы́ну и Свято́му Ду́ху:

Воплоще́нно Сло́во богосло́вил еси́, и лю́ди от бесо́вския ле́сти и и́дольскаго нече́стия спа́сл еси́, богоно́сне Стефа́не, спаса́й и ны́не лю́ди твоя́ от нече́стия, да вси́ с тобо́ю Го́спода пое́м и превозно́сим во ве́ки.

И ны́не и при́сно и во ве́ки веко́в. Ами́нь.

Богородичен: Роди́вся от Пренепоро́чныя Де́вы, ми́р просвети́л еси́, Христе́ Спа́се на́ш. Яко Благи́й и Человеколю́бец, изба́ви на́с от прегреше́ний на́ших, и моли́твами Богоро́дицы в ми́ре упра́ви живо́т на́ш, да Тя́ превозно́сим во ве́ки.

Песнь 9

Ирмос: Не рыда́й Мене́, Ма́ти, зря́щи во гро́бе, Его́же во чре́ве без се́мене зачала́ еси́ Сы́на: воста́ну бо, и просла́влюся, и вознесу́ со сла́вою, непреста́нно я́ко Бо́г, ве́рою и любо́вию Тя́ велича́ющия.

Припев: Преподобне отче Стефане, моли́ Бо́га о нас.

Арха́нгел и все́х небе́сных си́л превы́сшей, Преблагослове́нней Де́ве Богоро́дице, усе́рдно порабо́тал еси́ в житии́ твое́м, святи́телю Стефа́не, и ны́не, я́ко дерзнове́ние ве́лие имы́й ко Влады́чице, не оскудева́й усе́рдными твои́ми к Не́й моли́твами о мне́, гре́шнем и непотре́бнем, о при́сных ро́да моего́ и о все́х при́сных ми́ лю́дех, да покры́ет Пречи́стая все́х на́с от вся́ких бе́д и напа́стей честны́м Свои́м омофо́ром.

Припев: Преподобне отче Стефане, моли́ Бо́га о нас.

Го́рести, и ско́рби, и лю́тыя печа́ли обстоя́т мя́, бу́ри и треволне́ния жите́йская обурева́ют, не́мощами душе́вными и неду́гами теле́сными многоле́тне одержи́мь е́смь: засту́пниче мо́й усе́рдный, святи́телю Стефа́не, предваря́яй проше́ния тре́бующих твоея́ по́мощи, помози́ ми́ в ста́рости мое́й, я́коже во дни́ ю́ности благоволи́л еси́ ко мне́, и заступи́ мя́ от вся́ких бе́д и боле́зней.

Сла́ва Отцу́ и Сы́ну и Свято́му Ду́ху:

О все́х гре́шных лю́дех, не о себе́ то́кмо возношу́ к тебе́, хода́таю на́ш, свя́тче Стефа́не, сия́ убо́гая и недосто́йная моли́твенная пе́сни и словеса́, оба́че услы́ши мя́ непотре́бнаго и предста́тельствуй пред Го́сподем Бо́гом на́шим, Бо́гом милосе́рдия и щедро́т, да гре́шных у́бо покая́ние прии́мет и ми́лостивно те́х поми́лует, отмета́ющихся же и́стины да наста́вит на пути́ и́стины.

И ны́не и при́сно и во ве́ки веко́в. Ами́нь.

Богородичен: Воспо́йте, лю́дие, воспо́йте Го́сподеви пе́cнь но́ву, по́йте и́мени Христа́ Спа́са на́шего, возсия́вшаго боголе́пно из чре́ва Неискусобра́чныя Де́вы Мари́и; лику́йте, ве́рнии ро́ди челове́честии, в весе́лии восплещи́те рука́ми, се́ бо Ма́ти Христа́ Бо́га на́шего даде́ся на́м Ма́ти милосе́рдия, я́коже и со Креста́ возлю́бленному ученику́ во утеше́ние и ве́чную все́м земноро́дным отра́ду рече́ Христо́с: се́ Ма́ти твоя́.

Свети́лен:

Спаси́, спаси́ ве́рныя лю́ди Твоя́, Премилосе́рдый Отче на́ш Небе́сный и Предве́чный Царю́ веко́в, Го́споди, от вся́ких зо́л, от вся́ких напа́стей, от вся́ких ко́зний враго́в на́ших, ви́димых же и неви́димых; соблюди́, о Го́споди, в земли́ на́шей, от ве́ка су́щей правосла́вней, святу́ю ве́ру Правосла́вную, неруши́му во ве́ки пре́дния. Тя́ бо мо́лит о се́м и ве́рный слуга́ Тво́й, па́стырь на́ш до́брый, Стефа́н блаже́нный.

Сла́ва И ны́не:

Стефа́н чу́дный, и́ноков му́дрый наста́вник, кро́тости же, воздержа́ния и незло́бия учи́тель изря́дный, дне́сь в па́мяти блаже́ннаго преставле́ния своего́ к небе́сным, да похва́лится от лико́в и́ночествующих. Вси́ же правосла́внии ро́ди Волы́нстии, ублажи́те дне́сь архипа́стыря своего́, непреста́нно моля́щася ко Го́споду о спасе́нии ду́ш на́ших.

Тропарь преподобному Стефану, игумену Печерскому, епископу Владимиро-Волынскому, глас 8

Уче́нию повину́яся Богоно́снаго Феодо́сия,/ поста́влен бысть от него́ вождь бы́ти свято́му его́ ста́ду,/ е́же до́бре пасы́й,/ це́рковь Богоро́дицы, во́лею Тоя́ осно́ванную чу́дне,/ соверши́л еси́ благоле́пно,/ приснопа́мятне Стефа́не,// в не́йже нам, моля́щимся, испроси́ от Христа́ Бо́га ве́лию ми́лость.

Ин тропарь преподобному Стефану, игумену Печерскому, епископу Владимиро-Волынскому, глас 8

Правосла́вия наста́вниче,/ благоче́стия учи́телю и чистоты́,/ Волы́нския па́ствы свети́льниче,/ архиере́ев Богодухнове́нное удобре́ние,/ Стефа́не прему́дре,/ уче́ньми свои́ми вся просвети́л еси́, цевни́це духо́вная,// моли́ Христа́ Бо́га спасти́ся душа́м на́шим.

Ин тропарь преподобному Стефану, игумену Печерскому, епископу Владимиро-Волынскому, глас 2

Я́ко сый Богоно́снаго Феодо́сия учени́к/ и и́стинный жития́ его́ подража́тель,/ пе́рвый по нем бре́мя настоя́тельства понесы́й,/ те́мже и моще́й его́ честны́х самови́дец бы́ти сподо́бился еси́,/ я́же с про́чими святоле́пно прине́с,/ насле́дил еси́ с те́мже Ца́рство Небе́сное,/ Е́же получи́ти и нам, чту́щим тя, Стефа́не,// Го́сподеви моли́ся.

Кондак преподобному Стефану, игумену Печерскому, епископу Владимиро-Волынскому, глас 6

Зави́дя враг честно́му ти житию́,/ изри́нул тя бя́ше злоко́знством свои́м от нача́льства па́ствы,/ но ты, изгна́н быв,/ и на ино́м ме́сте це́рковь Богоро́дицы воздви́гл еси́,/ за что и Та са́ном почте́ тя архиере́йства,/ в не́йже ты до́бре упа́с вруче́нная ти о́вцы,/ пре́йде во весе́лии ко Христу́, Стефа́не,// Ему́же моли́ся о нас, рабе́х твои́х.

Ин кондак преподобному Стефану, игумену Печерскому, епископу Владимиро-Волынскому, глас 1

Проходя́, всеблаже́нне, доброде́тельми от си́лы в си́лу/ и всех, с тобо́ю су́щих, о́ными провозвыша́я,/ всем служи́л еси́, Стефа́не, и угожда́л,/ тем избра́н был еси́ всем,/ в дому́ Бо́жия Ма́тере су́щим, в старе́йшину./ Последи́ же и на степе́нь архиере́йства возведе́н был еси́,/ и, ста́до Христо́во до́бре упас,// моли́ Его́ о нас, ча́дех твои́х.

Ин кондак преподобному Стефану, игумену Печерскому, епископу Владимиро-Волынскому, глас 4

Стефа́н, испо́лнь ве́ры и благоче́стия,/ соверши́тель Бо́гом основа́нныя це́ркве Пече́рския,/ днесь, я́ко вели́кое свети́ло, всем возсия́,/ Христо́во ста́до богоуго́дно упа́с/ в неусы́пных стра́жех нощны́х./ Его́же чту́ще, прино́сим песнь/ еди́ному Тебе́, Христу́, всех Влады́це,/ моля́ще поми́ловати нас// того́ благоприя́тными моли́твами.

Молитва

О свяще́нная главо́, преподо́бне о́тче, преблаже́нне а́вво Стефа́не, не забу́ди убо́гих твои́х до конца́, но помина́й нас всегда́ во святы́х и благоприя́тных моли́твах к Бо́гу: помяни́ ста́до твое́, е́же сам упа́сл еси́, и не забу́ди посеща́ти чад твои́х моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ ду́ша со а́нгельскими во́инствы, со безпло́тными ли́ки, с небе́сными си́лами, у престо́ла Вседержи́телева предстоя́щи, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.