10 мая.
Канон священномученику Симеону, сроднику Господню
![священномученика Симеона, сродника Господня священномученика Симеона, сродника Господня](img_i/021.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропа́рь, гла́с 1:
Христо́ва тя́ сро́дника, Симео́не священнонача́льниче, и му́ченика тве́рда свяще́нно восхваля́ем, пре́лесть потреби́вшаго и ве́ру соблю́дшаго. Те́мже, дне́сь всесвяту́ю твою́ па́мять пра́зднующе, грехо́в разреше́ние моли́твами твои́ми прие́млем.
Кано́н свята́го. Гла́с 4.
Пе́снь 1.
Ирмос: Воспою́ Тебе́, Го́споди Бо́же мо́й, я́ко изве́л еси́ лю́ди из рабо́ты еги́петския, покры́л же еси́ колесни́цы фарао́новы и си́лу.
Припев: Священномучениче Симеоне, моли́ Бо́га о нас.
Симео́не свяще́нне, Влады́це, венцено́сец, предстоя́, любо́вию па́мять твою́ творя́щим всесвяще́нную согреше́ний разреше́ние проси́.
Припев: Священномучениче Симеоне, моли́ Бо́га о нас.
Ве́трилом окриля́емь, святи́телю, кре́стным, я́ко вои́стинну хла́дом ду́ха, бу́ри ми́мо те́кл еси́ пре́лести, всесла́вне.
Сла́ва Отцу́ и Сы́ну и Свято́му Ду́ху:
Миром боже́ственным пома́за свяще́нника тя́ лю́дем Иже от коле́на Иу́дова прозябы́й Христо́с, Симео́не свяще́нне и Ангелом собесе́дниче.
И ны́не и при́сно и во ве́ки веко́в. Ами́нь.
Богородичен: Яко су́щи тва́рей вы́шша, все́х Творца́ и Бо́га во чре́ве зачала́ еси́, Де́во, и родила́ еси́ челове́ком на избавле́ние.
Пе́снь 3.
Ирмос: Лу́к си́льных изнемо́же, и немощству́ющии препоя́сашася си́лою, сего́ ра́ди утверди́ся в Го́споде се́рдце мое́.
Припев: Священномучениче Симеоне, моли́ Бо́га о нас.
Манове́нием к Бо́гу обожа́емь, ве́сь, Симео́не, светови́ден бы́л еси́, муче́ния облиста́я сия́нием, свяще́нне.
Припев: Священномучениче Симеоне, моли́ Бо́га о нас.
Утро су́щим во тме́ возсия́л еси́, Пра́вды показу́я Со́лнце, из о́блака, Де́вы Отрокови́цы, челове́ком возсия́вшее.
Сла́ва Отцу́ и Сы́ну и Свято́му Ду́ху:
Мирски́я сла́сти возненави́дел еси́, святи́телей красота́ ле́потна бы́л еси́ и страда́нием небе́сныя сла́вы, о́тче, сподо́бился еси́.
И ны́не и при́сно и во ве́ки веко́в. Ами́нь.
Богородичен: Ве́сь похвале́ний побежда́ется зако́н о Тебе́, Богороди́тельнице Всенепоро́чная: Бо́г бо из Тебе́, я́коже ве́сть, на́с ра́ди Челове́к бы́сть.
Седа́лен, гла́с 4.
Яко звезду́ вели́ку, Це́рковь, стяжа́вши дне́сь богогла́снаго Симео́на, просвеща́ется, зову́щи: ра́дуйся, му́чеников честны́й нача́льниче.
Сла́ва, и ны́не, Богородичен:
Пречи́стеи ру́це Твои́, Де́во Ма́ти, просте́рши, покры́й упова́ющия на Тя́ и Сы́ну Твоему́ зову́щия: все́м пода́ждь, Христе́, ми́лости Твоя́.
Пе́снь 4.
Ирмос: Любве́ ра́ди, Ще́дре, Твоего́ о́браза на Кресте́ Твое́м ста́л еси́, и раста́яшася язы́цы: Ты́ бо еси́, Человеколю́бче, кре́пость моя́ и хвале́ние.
Припев: Священномучениче Симеоне, моли́ Бо́га о нас.
Священноде́йствовав же́ртвы безкро́вныя за тя́ Пожре́нному, и са́м поже́рлся еси́, я́ко а́гнец, и Тому́ прине́слся еси́, богому́дре пребога́те.
Припев: Священномучениче Симеоне, моли́ Бо́га о нас.
Сотро́шася пред лице́м твои́м, святи́телю, нече́стия го́ры, и хо́лми де́монов вси́ раста́яшася, Христу́ укрепля́ющу тя́.
Сла́ва Отцу́ и Сы́ну и Свято́му Ду́ху:
Высоча́йшее житие́ имы́й, преблаже́нне, хотя́й, возне́слся еси́ на дре́во, Боже́ственней стра́сти подо́бяся ми́р возне́сшаго.
И ны́не и при́сно и во ве́ки веко́в. Ами́нь.
Богородичен: Прови́дя рождество́ Твое́, Пречи́стая, Тя́ Авваку́м пропису́ет, я́ко присе́нную го́ру, из нея́же еди́н Бо́г на́ш проше́л е́сть.
Пе́снь 5
Ирмос: Просвеще́ние Твое́, Го́споди, низпосли́ на́м и от мглы́ прегреше́ний разреши́ ны, Бла́же, Тво́й ми́р да́руяй.
Припев: Священномучениче Симеоне, моли́ Бо́га о нас.
Во́лею, блаже́нне, пре́дал еси́ себе́ ве́сь сожещи́ся огне́м муче́ния, блаже́нне Симео́не, во благово́ние та́йно соблюда́емь.
Припев: Священномучениче Симеоне, моли́ Бо́га о нас.
Яко овча́ непоро́чное, пре́дал еси́ себе́ пострада́ти усе́рдно, подо́бяся Христу́, на́с ра́ди пло́тию пострада́вшему и стра́сти отгна́вшему.
Сла́ва Отцу́ и Сы́ну и Свято́му Ду́ху:
Хра́м Боже́ственнаго Ду́ха бы́в, прему́дре, хра́мы и́дольския низложи́л еси́ си́лою твои́х моли́тв и заблужде́нныя к све́ту наста́вил еси́.
И ны́не и при́сно и во ве́ки веко́в. Ами́нь.
Богородичен: О на́с моли́ Христа́, от Твои́х чи́стых крове́й, Пречи́стая Отрокови́це, в пло́ть веще́ственную обле́кшася и челове́ки обно́вльша.
Пе́снь 6.
Ирмос: Возопи́, прообразу́я погребе́ние тридне́вное, проро́к Ио́на, в ки́те моля́ся: от тли́ изба́ви мя́, Иису́се, Царю́ си́л.
Припев: Священномучениче Симеоне, моли́ Бо́га о нас.
Научи́лся еси́ пресла́вно от боже́ственнаго сия́ния, я́же к боже́ственному тя́ наставля́юща животу́, пребога́те, и неизрече́ннаго яви́лся еси́, святи́телю, испо́лнен ра́зума.
Припев: Священномучениче Симеоне, моли́ Бо́га о нас.
Во́д тя́ живото́чных испо́лнена духо́вных, я́коже и́ну реку́, из Еде́ма исходя́щую, Симео́не, боже́ственная Це́рковь ра́дуется, иму́щи.
Сла́ва Отцу́ и Сы́ну и Свято́му Ду́ху:
Се́л еси́ на высо́це престо́ле, наме́стник бы́в Иа́кова и нра́вом прича́стник, святи́тельство же муче́нием просвети́в, блаже́нне.
И ны́не и при́сно и во ве́ки веко́в. Ами́нь.
Богородичен: Исцели́ неисце́льныя стра́сти, Богоневе́сто, души́ моея́, врача́ Христа́ ро́ждши челове́ком, страстьми́ Свои́ми исцели́вша стра́сти.
Конда́к, гла́с 4.
Яко звезду́ преве́лию, Це́рковь, иму́щи дне́сь богоглаго́ливаго Симео́на, светово́дится, зову́щи: ра́дуйся, му́чеников честны́й ве́нче.
Пе́снь 7.
Ирмос: Авраа́мстии иногда́ в Вавило́не о́троцы пе́щный пла́мень попра́ша, пе́сньми взыва́юще: оте́ц на́ших Бо́же, благослове́н еси́.
Припев: Священномучениче Симеоне, моли́ Бо́га о нас.
Те́ло му́кам преда́в по Христе́ усе́рдно, не измени́лся еси́, ни ослабе́л, взыва́я, чу́дне: благослове́н Бо́г оте́ц на́ших.
Припев: Священномучениче Симеоне, моли́ Бо́га о нас.
Боже́ственною, преблаже́нне, любо́вию разже́гся, мы́слию огня́ веще́ственна си́льнейши, вопия́, бы́л еси́: благослове́н Бо́г оте́ц на́ших.
Сла́ва Отцу́ и Сы́ну и Свято́му Ду́ху:
Яко Влады́ка, о́тче, на Кре́ст воздви́глся еси́, изравне́нием стра́сти украша́яся, и пое́ши, веселя́ся: оте́ц на́ших Бо́же, благослове́н еси́.
И ны́не и при́сно и во ве́ки веко́в. Ами́нь.
Богородичен: Де́во Богома́ти Отрокови́це, де́монов стру́пе и Ангелов благоукраше́ние, челове́ков спасе́ние, смире́нную ду́шу мою́ вра́жия ле́сти изба́ви.
Пе́снь 8.
Ирмос: На Кресте́ пло́тию пригвожде́ннаго и показа́вшаго на́м ору́жие во спасе́ние, о́троцы, превозноси́те Христа́ Бо́га на́шего во ве́ки.
Припев: Священномучениче Симеоне, моли́ Бо́га о нас.
Всю́ зарю́ Уте́шителеву чи́стым твои́м, Симео́не, прие́м се́рдцем, тму́ де́монов несве́тлую потреби́л еси́, ве́рныя просвети́в.
Припев: Священномучениче Симеоне, моли́ Бо́га о нас.
Мо́ре лю́таго злове́рия изсуши́в, струя́ми боже́ственных уче́ний твои́х вся́ку напои́л еси́ ду́шу, кла́с ве́ры плодонося́щую.
Сла́ва Отцу́ и Сы́ну и Свято́му Ду́ху:
Яви́лся еси́ свяще́нник, твое́ю кро́вию, му́чениче, вше́д в Це́рковь Боже́ственну, иде́же всегда́ зри́ши тебе́ ра́ди, я́ко непоро́чно а́гня, Поже́ршагося.
И ны́не и при́сно и во ве́ки веко́в. Ами́нь.
Богородичен: Да Тя́ гла́сы благода́рственными, возвесели́вшую на́ш ро́д, воспое́м: покры́й и сохрани́ на́с, Богоневе́сто, от вся́каго вре́да.
Песнь 9
Ирмос: Рождество́ Твое́ нетле́нно яви́ся: Бо́г из боку́ Твое́ю про́йде, я́ко плотоно́сец яви́ся на земли́ и с челове́ки поживе́. Тя́, Богоро́дице, те́м вси́ велича́ем.
Припев: Священномучениче Симеоне, моли́ Бо́га о нас.
Якоже сто́лп о́гнен, преблаже́нне, яви́лся еси́, лю́ди предводя́ но́выя из еги́петския ле́сти, и к земли́ обетова́ния Боже́ственнаго, му́чениче, священнотаи́нниче всече́стне, преве́л еси́.
Припев: Священномучениче Симеоне, моли́ Бо́га о нас.
Си́мон Симео́н сугу́бо зва́ние име́л еси́, сугу́бо естество́м су́щее Сло́во пред безбо́жными богосло́вив и Кресту́ прибли́жився: те́мже тя́ вси́, соше́дшеся, ублажа́ем.
Сла́ва Отцу́ и Сы́ну и Свято́му Ду́ху:
Де́нь пра́здника па́мять твою́ соверша́ет Це́рковь, с боже́ственным тя́ почита́ющи Иа́ковом, Симео́не, моле́бно: его́же седа́лище прия́л еси́, свяще́нне.
И ны́не и при́сно и во ве́ки веко́в. Ами́нь.
Богородичен: Све́том мя́ озари́ боже́ственным, Све́та жили́ще, Де́во, страсте́й мои́х тму́ и сласте́й глубо́кую но́щь, Богороди́тельнице Пречи́стая, отгоня́щи.
Тропарь апостолу и священномученику Симеону, епископу Иерусалимскому, сроднику Господню, глас 1
Христо́ва тя сро́дника, Симео́не священнонача́льниче,/ и му́ченика тве́рда свяще́нно восхваля́ем,/ пре́лесть потреби́вшаго/ и ве́ру соблю́дшаго./ Те́мже, днесь всесвяту́ю твою́ па́мять пра́зднующе,// грехо́в разреше́ние моли́твами твои́ми прие́млем.
Ин тропарь апостолу и священномученику Симеону, епископу Иерусалимскому, сроднику Господню, глас 4
В ми́ре ра́дуешися, Симео́не Иерусали́мский,/ любе́зно Христу́ Бо́гу,/ те́ло душе́вное чи́сто сохрани́в,/ претерпе́вый страсть теле́сную, долготерпели́ве, кре́пко,/ и в коне́ц на кресте́ ра́спят бысть./ Ты бо, И́стинному Рачи́телю подо́бяся,/ и от ми́ра ско́ро отлучи́ся,/ лю́тыя я́звы на себе́ понесе́// и мо́лишися о душа́х на́ших.
Кондак апостолу и священномученику Симеону, епископу Иерусалимскому, сроднику Господню, глас 4
Я́ко звезду́ преве́лию, Це́рковь, иму́щи днесь Богоглаго́ливаго Симео́на,/ светово́дится, зову́щи:// ра́дуйся, му́чеников честны́й ве́нче.
Молитва
О святы́й уго́дниче Бо́жий, священному́чениче Симео́на! По́двигом до́брым подвиза́вся на земли́, восприя́л еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже взира́юще на святы́й твой о́браз, ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![священномученика Симеона, сродника Господня священномученика Симеона, сродника Господня](img_b/021.jpg)