6 марта.

Канон преподобному Тимофею, иже в Символех.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Бо́же оте́ц на́ших, творя́й при́сно с на́ми по Твое́й кро́тости, не отста́ви ми́лость Твою́ от на́с, но моли́твами и́х в ми́ре упра́ви живо́т на́ш.

Кано́н преподо́бнаго, гла́с 8.

Пе́снь 1.

Ирмос: Пои́м Го́сподеви, вси́ лю́дие, в мо́ри Чермне́м фарао́на погрузи́вшему, побе́дную пе́снь пою́ще, я́ко просла́вися.

Припев: Преподобне отче Тимофее, моли Бога о нас.

Тя́, мы́сленную звезду́, на высоте́, о́тче, воздержа́ния просия́вшую све́тло и ве́рных сердца́ озаря́ющу, блаже́нне Тимофе́е, восхваля́ем при́сно.

Припев: Преподобне отче Тимофее, моли Бога о нас.

Име́я к Бо́гу протяже́нно ума́ твоего́ о́ко, уны́ния со́н от души́ оттря́сл еси́, о́тче, и хра́м бы́л еси́ Боже́ственнаго Ду́ха, и ме́сто свяще́ния, Тимофе́е.

Сла́ва Отцу́ и Сы́ну и Свято́му Ду́ху:

Лука́ваго ко́зни, смире́нием огражде́н, о́тче, преше́л еси́ невре́дно, и к Бо́гу возвы́сился еси́, и Того́ сла́вы вы́ну наслажда́ешися, блаже́нне Тимофе́е.

И ны́не и при́сно и во ве́ки веко́в. Ами́нь.

Богородичен: Несказа́нно Бо́га, Творца́ вся́ческих, во чре́ве заче́ншую безсе́менно и пло́тию я́ко и́стинно ро́ждшую Богоро́дицу, Отрокови́цу, и де́вствующую, пе́сньми почита́ем.

Пе́снь 3.

Ирмос: Утвержде́ние мое́, Спа́се, еси́, прибе́жище мое́ и си́ла, поколеба́вшееся се́рдце мое́ утверди́ в стра́се Твое́м, я́ко не́сть свя́т, я́коже Ты́, Бо́г на́ш.

Припев: Преподобне отче Тимофее, моли Бога о нас.

Ущедря́я все́х ми́лованием, и́ный Авраа́м бы́л еси́, прие́мля отвсю́ду приходя́щия, о Тимофе́е, и те́ми угожда́я все́х Бо́гу.

Припев: Преподобне отче Тимофее, моли Бога о нас.

Умертви́л еси́, о́тче, я́же на земли́ твоя́ у́ды, я́ко глаго́лет апо́стол, жи́зни небе́сней прича́стник показа́лся еси́, в не́йже чту́щия тя́ при́сно помина́й.

Сла́ва Отцу́ и Сы́ну и Свято́му Ду́ху:

Восто́ка твои́х де́л, о́тче, со́лнце бы́л еси́ незаходи́мо, луча́ми по́двиг концы́ озаря́я при́сно и де́монов разоря́я омраче́ние.

И ны́не и при́сно и во ве́ки веко́в. Ами́нь.

Богородичен: Свята́я Де́во, Царя́ ца́рствующих Роди́тельнице, плени́цы прегреше́ний мои́х расто́ргни и наста́ви к покая́ния стезя́м моли́твами Твои́ми.

Седа́лен, гла́с 8.

Научи́вся Сло́ву, на́с ра́ди от Де́вы ро́ждшемуся без истле́ния, Сего́ Божество́ безбо́жным пропове́дал еси́ и мно́ги приве́л еси́ Бо́гови ве́рою, свяще́нных чуде́с мно́гими явле́ньми. Те́мже, богоно́се, святу́ю твою́ па́мять творя́ще, благода́тию твое́ю ду́ши просвеща́ем и согла́сно вопие́м ти́: богоно́се Тимофе́е, моли́ Христа́ Бо́га грехо́в оставле́ние пода́ти чту́щим любо́вию святу́ю па́мять твою́.

Сла́ва, И ны́не, Богородичен:

Яко невозде́ланная, Де́во, лоза́, красне́йший Гро́зд прозябла́ еси́, источа́ющ на́м вино́ спасе́ния, все́х веселя́щее ду́ши же и телеса́. Те́мже я́ко вину́ Тя́ до́брых блажа́ще при́сно, со Ангелом вопие́м Ти́: ра́дуйся, Благода́тная.

Пе́снь 4.

Ирмос: Из горы́ приосене́нныя, Сло́ве, проро́к, еди́ныя Богоро́дицы, хотя́ща воплоти́тися богови́дно усмотри́ и со стра́хом славосло́вяше си́лу Твою́.

Припев: Преподобне отче Тимофее, моли Бога о нас.

Ты́, моли́твами утвержда́яся при́сно, мы́сленных враго́в лу́ки и стре́лы, я́коже младе́нец стреля́ния, вмени́л еси́, о́тче пресла́вне Тимофе́е.

Припев: Преподобне отче Тимофее, моли Бога о нас.

Еже к на́м Христо́ва смотре́ния любо́вию покланя́яся, богому́дре, о́бразу, искуше́ние му́к претерпе́л еси́, от сего́ отмета́ющихся, о Тимофе́е!

Сла́ва Отцу́ и Сы́ну и Свято́му Ду́ху:

Якоже не́кий сто́лп, непоколеби́мь бы́л еси́, при́сно к Бо́гу в славосло́вии ника́коже почива́я, в си́х пребы́л еси́ красота́х прича́стник, о Тимофе́е.

И ны́не и при́сно и во ве́ки веко́в. Ами́нь.

Богородичен: Но́во на земли́ родила́ еси́ Отроча́, е́же от Отца́ пре́жде все́х ве́к рожде́ннаго нетле́нно, Ма́ти Чи́стая, христиа́н исправле́ние.

Пе́снь 5

Ирмос: Мра́к души́ моея́ разжени́, Светода́вче Христе́ Бо́же, началоро́дную тму́ изгна́в бе́здны, и да́руй ми́ све́т повеле́ний Твои́х, Сло́ве, да у́тренюя, сла́влю Тя́.

Припев: Преподобне отче Тимофее, моли Бога о нас.

Умо́м очище́нным предстоя́ Тро́ице, блаже́нне, и отону́дными заря́ми осия́емь, о́тче, су́щия ны́ во тме́, бе́дствующия душе́вными страстьми́, просвеща́еши всегда́.

Припев: Преподобне отче Тимофее, моли Бога о нас.

Пло́ть воздержа́нием, ду́шу безстра́стием украси́в, му́дре, Царя́ вся́ческих уго́дник яви́лся еси́ и от Него́ я́ве чуде́с да́ры прия́л еси́, Тимофе́е.

Сла́ва Отцу́ и Сы́ну и Свято́му Ду́ху:

Не умо́м льсти́вным, но просты́м се́рдцем проси́вши, приступи́вшая непло́ды ве́рною моли́твою благоча́дна явля́ется от непло́дства, пою́щи Христа́ Бо́га на́шего.

И ны́не и при́сно и во ве́ки веко́в. Ами́нь.

Богородичен: Всели́вся во чре́во Твое́ Живы́й в вы́шних, Тя́ соде́ла небе́с ши́ршую, Мари́е Богоро́дице: Его́же о все́х на́с, я́ко Блага́я, не преста́й моля́щи, Богоневе́сто.

Пе́снь 6.

Ирмос: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Припев: Преподобне отче Тимофее, моли Бога о нас.

До́бре твое́ соблюда́я де́вства досто́инство во все́й твое́й жи́зни, жене́ никогда́же в лице́ зре́л еси́, е́же от сего́ вре́д до конца́ отрази́в.

Припев: Преподобне отче Тимофее, моли Бога о нас.

В приста́нище мы́сленное устреми́лся еси́, волна́ми сласте́й не омочи́вся, всеблаже́нне Тимофе́е, но Ду́ха живоно́сными ве́тры до́бре преплы́л еси́, всесла́вне.

Сла́ва Отцу́ и Сы́ну и Свято́му Ду́ху:

Удали́лся еси́ псало́мски, в гора́х живы́й, в пусты́нях при́сно, му́дре, водворя́яся, до́ндеже вше́л еси́ в Бо́жий гра́д небе́сный, Тимофе́е блаже́нне.

И ны́не и при́сно и во ве́ки веко́в. Ами́нь.

Богородичен: На плещу́ херуви́мску неопи́санно Седя́й опи́санно в Твое́ чре́во всели́ся пло́тию, а не Божество́м, и из Тебе́ про́йде, спаса́я мя́, Всенепоро́чная.

Конда́к, гла́с 4.

Яко звезда́ многосве́тлая, от восто́ка возсия́в, озари́л еси́ в сердца́х ве́рных доброде́тели чуде́с твои́х, чудотво́рче всеблаже́нне Тимофе́е.

Пе́снь 7.

Ирмос: Ангелом о́троки из огня́ спасы́й и гремя́щую пе́щь преложи́вый на ро́су, благослове́н еси́, Бо́же оте́ц на́ших.

Припев: Преподобне отче Тимофее, моли Бога о нас.

Угаси́в страсте́й пла́мень сле́з росо́ю, благода́ть чуде́с источи́л еси́, и́миже очища́еши скве́рны страсте́й, Тимофе́е.

Припев: Преподобне отче Тимофее, моли Бога о нас.

Блаже́нство Боже́ственное нело́жно получи́л еси́, кро́тких, преподо́бне, насле́довал еси́ зе́млю и ра́дости избра́нных насыща́яся.

Сла́ва Отцу́ и Сы́ну и Свято́му Ду́ху:

Разреше́ние грехо́в творя́щим любо́вию свяще́нную па́мять твоего́ преставле́ния, я́ко дерзнове́ние обре́т, блаже́нне, испроси́.

И ны́не и при́сно и во ве́ки веко́в. Ами́нь.

Богородичен: Изба́вленнии вси́ от пе́рвыя кля́твы пресвяты́м Рождество́м Твои́м, благослове́нная Еди́на, Тя́ благослови́м, Богоро́дице Нескве́рная.

Пе́снь 8.

Ирмос: Покрыва́яй вода́ми превы́спренняя Своя́, полага́яй мо́рю преде́л песо́к и содержа́й вся́, Тя́ пое́т со́лнце, Тя́ сла́вит луна́, Тебе́ прино́сит пе́снь вся́ тва́рь, я́ко Соде́телю все́х во ве́ки.

Припев: Преподобне отче Тимофее, моли Бога о нас.

Страстоуби́йца бы́л еси́ воздержа́нием мно́гим и зе́льными боле́зньми бде́ния, восхожде́ньми при́сно доброде́телей, преподо́бне, поуча́яся в се́рдцы и от сла́вы преходя́ в сла́ву неконча́емыя жи́зни и нетле́ния.

Припев: Преподобне отче Тимофее, моли Бога о нас.

Яко же́ртву, преподо́бне, моли́твы твоя́ к Бо́гу Пречи́стому ты́ прине́сл еси́, чи́сты от души́, Боже́ственно де́йство от Него́ прия́л еси́ чуде́с: де́моны отгоня́ти и челове́ческия цели́ти не́мощи.

Сла́ва Отцу́ и Сы́ну и Свято́му Ду́ху:

Ненавистозло́бен и незло́бив, ми́лостив, и кро́ток, и пра́вдою укра́шен, о́тче, бы́л еси́, преподо́бен, непоро́чен, оша́яся вся́кия непра́вды, сто́лп мона́шествующих, те́мже тя́ почита́ем, ве́рнии, во ве́ки.

И ны́не и при́сно и во ве́ки веко́в. Ами́нь.

Богородичен: Еди́ну Тя́ избра́, добро́ту Иа́ковлю, Отчее Сло́во и во утро́бе Твое́й всели́ся, я́коже благоволи́, па́че все́х красне́йший Челове́к, Всечи́стая, про́йде, омраче́нное на́ше очища́я естество́.

Песнь 9

Ирмос: Благослове́н Госпо́дь Бо́г Изра́илев, воздви́гнувый ро́г спасе́ния на́м в дому́ Дави́дове, Отрока Своего́, в ни́хже посети́ на́с Восто́к с высоты́ и напра́вил ны́ е́сть на пу́ть ми́ра.

Припев: Преподобне отче Тимофее, моли Бога о нас.

Свяще́ния хра́м, умиле́ния исто́чник, сострада́ния струя́ яви́лся еси́, му́дре, любве́ же безме́рная пучи́на, Госпо́день уго́дник нело́жен, и небе́сный граждани́н, и Ангелов единокро́вник, и чуде́с точе́ние.

Припев: Преподобне отче Тимофее, моли Бога о нас.

Хвали́тися ми́лости, о́тче, суда́ све́дый, не презре́л еси́ стра́нна, но все́м бла́г, милосе́рдия отве́рзл еси́, преподо́бне, оте́ц бы́в си́рых и вдови́ц засту́пник, и наги́х одея́ние, и пи́ща а́лчущих.

Припев: Преподобне отче Тимофее, моли Бога о нас.

От земли́ отлучи́лся еси́ к небеси́, иде́же име́л еси́, еще́ ходя́ во пло́ти, до́бре житие́, преподо́бне, на́м очище́ние согреше́ний моля́ дарова́ти, ве́рно чту́щим твою́ святу́ю па́мять.

Сла́ва Отцу́ и Сы́ну и Свято́му Ду́ху:

Струю́ на́м всегда́ честна́я твоя́ ра́ка исцеле́ний источа́ет, о́тче, страсте́й излия́ния вся́ческих изсуша́ющи и вся́ку напоя́ющи ду́шу к благопло́дию Боже́ственному, свяще́нне Тимофе́е, Христо́в уго́дниче.

И ны́не и при́сно и во ве́ки веко́в. Ами́нь.

Богородичен: Глаго́лом Твои́м после́дующе, ро́ди родо́в, Блаже́нная, Тя́ блажи́м при́сно: Бо́га бо, и́стинно Блаже́ннаго, родила́ еси́, Пресвята́я Чи́стая, вся́ блаже́нны Тому́ рабо́тающия нело́жно творя́ща.

Молитва

О свяще́нная главо́, преподо́бне о́тче, преблаже́нне а́вво Тимофе́е, не забу́ди убо́гих твои́х до конца́, но помина́й нас всегда́ во святы́х и благоприя́тных моли́твах к Бо́гу: помяни́ ста́до твое́, е́же сам упа́сл еси́, и не забу́ди посеща́ти чад твои́х моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ ду́ша со а́нгельскими во́инствы, со безпло́тными ли́ки, с небе́сными си́лами, у престо́ла Вседержи́телева предстоя́щи, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.