5 марта.

Канон преподобному Льву, епископу Катанскому.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Пра́вило ве́ры и о́браз кро́тости, воздержа́ния учи́теля, яви́ тя ста́ду твоему́, я́же веще́й и́стина, сего́ ра́ди стяжа́л еси́ смире́нием высо́кая, нището́ю бога́тая, о́тче Льве́, моли́ Христа́ Бо́га спасти́ся ду́шам на́шим.

Кано́н. Гла́с 8.

Пе́снь 1.

Ирмос: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Припев: Преподобне отче Льве, моли Бога о нас.

Свети́льника тя́ боже́ственна Христо́ва све́тла Це́рковь стяжа́вши, Льве́ му́дре, доброде́телей твои́х сия́ньми и чуде́с бога́тно просвеща́ется.

Припев: Преподобне отче Льве, моли Бога о нас.

От младе́нства возложи́л еси́ себе́ сама́го все́х Влады́це, и умерщвле́нием сласте́й жива́ Сего́ бы́л еси́ же́ртва, закала́я себе́ без кро́ве, блаже́нне.

Сла́ва Отцу́ и Сы́ну и Свято́му Ду́ху:

Житие́ твое́ сия́ет, доброде́тельми укра́шено и чуде́с блиста́ньми удобре́но, богоно́се, проявле́на тя́ все́м соде́ла.

И ны́не и при́сно и во ве́ки веко́в. Ами́нь.

Богородичен: Хра́м Ты́ была́ еси́ Бо́жий, Нескве́рная Отрокови́це, Все́льшемуся па́че ума́ в Тя́, Богоро́дице, и ле́сть от ду́ш челове́ческих Отгна́вшему.

Пе́снь 3.

Ирмос: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, еди́не Человеколю́бче.

Припев: Преподобне отче Льве, моли Бога о нас.

Спаси́тельна, о́тче, и благоче́стна уче́ния правосла́вия храня́ невре́дна, ста́до упа́сл еси́ на па́житех живоно́сных и в небе́сную огра́ду вве́л еси́.

Припев: Преподобне отче Льве, моли Бога о нас.

Возше́д на высоту́ доброде́телей, преподо́бне, пома́зание свяще́нно прия́л еси́ и Превысо́каго, всему́дре, восхвали́л еси́ высоча́йшим седа́лищем, послужи́в благода́тию Тому́, я́ко Ангел.

Сла́ва Отцу́ и Сы́ну и Свято́му Ду́ху:

Напа́сти претерпе́в Христа́ ра́ди, преподо́бне, безсме́ртию причасти́лся еси́ обоже́ния; мѵ́ро же благово́нно непреста́нно источа́я, освяща́еши ве́рою к тебе́ притека́ющия.

И ны́не и при́сно и во ве́ки веко́в. Ами́нь.

Богородичен: Угля Боже́ственнаго и светоза́рнаго клеще́, купино́, огне́м не опали́вшися Божества́, хвра́стныя моя́ вся́ попали́ стра́сти и огня́ исхити́ ве́чнующаго.

Седа́лен, гла́с 3.

Вели́кое со́лнце, вселе́нней возсия́л еси́ доброде́телей твои́х сия́ньми, и чуде́с све́тлостию просвети́в ве́рных собо́ры, и отгна́в страсте́й омраче́ние, Льве́ преподо́бне, Христа́ Бо́га моли́ дарова́ти на́м ве́лию ми́лость.

Сла́ва, и ны́не, Богородичен:

Боже́ственнаго естества́ не отлу́чься, пло́ть бы́в во чре́ве Твое́м, но Бо́г вочелове́чився, пребы́сть, Иже по рождестве́ Ма́терь Тя́ Де́ву, я́ко пре́жде рождества́, сохрани́в Всенепоро́чну, еди́н Госпо́дь: Того́ приле́жно моли́ дарова́ти на́м ве́лию ми́лость.

Пе́снь 4.

Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Припев: Преподобне отче Льве, моли Бога о нас.

Земледе́лав ни́ву твоего́ ра́зума, стокра́тный кла́с прине́сл еси́, пребога́те, доброде́телей боже́ственных и исцеле́ний.

Припев: Преподобне отче Льве, моли Бога о нас.

Свята́я твоя́, сла́вне, ра́ка вы́ну еле́й святы́й источа́ет, освяща́ющи ду́ши, ве́рою к тебе́ притека́ющия.

Сла́ва Отцу́ и Сы́ну и Свято́му Ду́ху:

Неду́гов очище́ние, лука́вых де́монов отгони́тель, святи́телю, бы́л еси́ и ве́рных челове́ков прибе́жище.

И ны́не и при́сно и во ве́ки веко́в. Ами́нь.

Богородичен: Все́м Невмести́мый, Пречи́стая, вмеща́ется во утро́бе Твое́й, спаса́я мя́ бла́гостию, погруже́ннаго мно́гими грехи́.

Пе́снь 5

Ирмос: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся.

Припев: Преподобне отче Льве, моли Бога о нас.

Умо́м чисте́йшим Ума́ все́х Вино́внаго смотря́я, от Него́ прия́л еси́ дарова́ний зарю́, богодохнове́нне, исцеле́ний свяще́нная светоли́тия, и́миже разреша́еши страсте́й омраче́ние.

Припев: Преподобне отче Льве, моли Бога о нас.

Пре́лестьми де́монскими вся́ ве́рующия Христу́ прельща́ющаго, о́гненному суду́ пре́дал еси́ пра́ведно, блаже́нне, и ду́ши изба́вил еси́ всегуби́тельнаго сего́ вре́да, я́ко па́стырь и́стинен и спаси́телен.

Сла́ва Отцу́ и Сы́ну и Свято́му Ду́ху:

Разгоре́вшуся огню́ посреди́ ста́л еси́, неопали́мь, пресла́вне: Боже́ственная бо роса́ Свята́го окружи́ тя Ду́ха, я́ко священнотаи́нника, я́ко служи́теля Боже́ственныя сла́вы, я́ко вы́шния све́тлости прича́стника.

И ны́не и при́сно и во ве́ки веко́в. Ами́нь.

Богородичен: Ви́девше дре́вле боже́ственнейше, Богора́дованная, честни́и проро́цы та́инства глубину́ неизрече́нную честна́го Рождества́ Твоего́, Пречи́стая, разли́чными о́бразы, я́ко вмести́ша, Сего́ провозвести́ша.

Пе́снь 6.

Ирмос: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя.

Припев: Преподобне отче Льве, моли Бога о нас.

Слепи́и моли́твами твои́ми, о́тче, прия́ша прозре́ние, богому́дре: Христа́ бо соде́йственника име́я и к Нему́ души́ твоея́ о́чи стяжа́в вы́ну, проше́ния бога́тно прия́л еси́.

Припев: Преподобне отче Льве, моли Бога о нас.

Бы́л еси́ царю́, чу́дне, стра́шен, внегда́ иды́й во дворы́ его́, носи́л еси́ оде́ждою у́глие горя́щее: прославля́ше бо тя́ Бо́г, Его́же житие́м твои́м, Льве́, просла́вил еси́.

Сла́ва Отцу́ и Сы́ну и Свято́му Ду́ху:

Благоуха́ет ра́ка моще́й твои́х и излива́ет при́сно, всеблаже́нне, я́коже исто́чник чи́ст и благово́нный, еле́й Боже́ственный, и́мже отгоня́ются неду́зи от ве́рных и здра́вие тре́бующим да́руется.

И ны́не и при́сно и во ве́ки веко́в. Ами́нь.

Богородичен: Освяти́ ду́шу мою́, Де́во, Свято́е ро́ждшая Сло́во, вои́стинну во святы́х я́ко пречи́сто почива́ющаго Еди́наго Бо́га на́шего, и да́руй ми́, я́ко ми́лостива, умиле́ния ту́чу, Всенепоро́чная.

Конда́к, гла́с 8.

Якоже свети́льника превели́ка, Це́рковь и́мать, всеблаже́нне, тебе́, па́че со́лнца сия́юща, ю́же твои́ми моли́твами сохрани́, блаже́нне, непобеди́му, и непоколеби́му от е́реси вся́кия, и нескве́рну, я́ко приснопа́мятный.

Пе́снь 7.

Ирмос: Отроцы евре́йстии в пещи́ попра́ша пла́мень дерзнове́нно и на ро́су о́гнь преложи́ша, вопию́ще: благослове́н еси́, Го́споди Бо́же, во ве́ки.

Припев: Преподобне отче Льве, моли Бога о нас.

Чино́м боже́ственным безпло́тным с пло́тию подо́бяся, богому́дре, служи́л еси́ Бо́гу, непреста́нно воспева́я: благослове́н еси́, Го́споди Бо́же, во ве́ки.

Припев: Преподобне отче Льве, моли Бога о нас.

Уши глухи́я, всеблаже́нне, моли́твами твои́ми отве́рзл еси́ боже́ственными и хромы́м я́вственно пода́л благотече́ние, — благослове́н еси́, — вопия́, — Го́споди Бо́же, во ве́ки.

Сла́ва Отцу́ и Сы́ну и Свято́му Ду́ху:

Ма́нием Боже́ственным Влады́ки неопале́н пребы́л еси́, вше́д, посреди́ огня́; неприча́стный же Сего́, судо́м пра́ведным опаля́ется Илиодо́р, моли́твою твое́ю.

И ны́не и при́сно и во ве́ки веко́в. Ами́нь.

Богородичен: Твоего́ чре́ва не опали́ Божества́ Огнь, Де́во Ма́ти, воплоща́ется из Тебе́, концы́ ороша́я Боже́ственными све́тлостьми. Сего́ ра́ди Тя́ пое́м.

Пе́снь 8.

Ирмос: Победи́тели мучи́теля и пла́мене благода́тию Твое́ю бы́вше, за́поведем Твои́м зело́ прилежа́ще, о́троцы вопия́ху: благослови́те, вся́ дела́ Госпо́дня, Го́спода.

Припев: Преподобне отче Льве, моли Бога о нас.

Излия́ся благода́ть, о́тче, во устна́х твои́х, священнотаи́нниче, сего́ ра́ди тя́, Льве́, Бо́г пома́за, святи́теля, лю́дем, вопию́щим: благослови́те, вся́ дела́ Госпо́дня, Го́спода.

Припев: Преподобне отче Льве, моли Бога о нас.

Царю́, всеблаже́нне, Преве́чнующему благоугоди́л еси́, земно́му, Льве́, царю́ предста́л еси́, у́глие нося́ и сего́, о́тче, ужаса́я мы́сль чудоде́йствы, зело́ пресла́вными.

Сла́ва Отцу́ и Сы́ну и Свято́му Ду́ху:

Яко ма́слина, о́тче, насажде́на бы́в плодови́та в дому́ Госпо́дни, пло́д приноша́еши по кончи́не, от боже́ственнаго те́ла твоего́ еле́й боже́ственный, ве́рных вся́к неду́г отгоня́я всегда́, к тебе́ с любо́вию, му́дре, притека́ющих.

И ны́не и при́сно и во ве́ки веко́в. Ами́нь.

Богородичен: Хоте́нием вся́ соверша́яй, Всенепоро́чная, Благослове́нная, восхоте́в, во чре́во Твое́ всели́ся, и пло́тию яви́ся, и обожи́ мя, истле́вша пре́жде льсти́ваго злы́м сове́том.

Песнь 9

Ирмос: Устраши́ся вся́к слу́х неизрече́нна Бо́жия снизхожде́ния, я́ко Вы́шний во́лею сни́де да́же и до пло́ти, от деви́ческаго чре́ва бы́в Челове́к. Те́мже Пречи́стую Богоро́дицу, ве́рнии, велича́ем.

Припев: Преподобне отче Льве, моли Бога о нас.

Да тя́ боже́ственными гла́сы блажи́м, преподо́бно пожи́вша, и на небеса́ возше́дша, и, ра́дующася, от страсте́й, и скорбе́й на́с моли́твами твои́ми спаса́й, и от обстоя́ний, святи́телю и па́стырю досточу́дне.

Припев: Преподобне отче Льве, моли Бога о нас.

Яко розга́ виногра́да и́стиннаго бы́в, о́тче, прозя́бл еси́ доброде́тельны гре́зны, чуде́с сла́дость иска́пающия, от ни́хже пию́ще ве́рно, здра́вие прие́млют и ра́дость хва́лящии тя́ при́сно, Льве́ всему́дре.

Припев: Преподобне отче Льве, моли Бога о нас.

Те́ло твое́ бы́сть хра́м Свята́го и Честна́го, о́тче, Ду́ха и ны́не лежи́т вну́трь Боже́ственнаго хра́ма, его́же созда́л еси́ в сла́ву, Льве́, и че́сть Луки́и му́ченицы, чуде́с источа́я на́м ре́ки, благоче́стно тя́ почита́ющим.

Сла́ва Отцу́ и Сы́ну и Свято́му Ду́ху:

Якоже со́лнце светоза́рно, доброде́тельными свеща́ми концы́ озаря́я при́сно, и ны́не к Све́ту премину́л еси́ незаходи́мому. Те́мже светоно́сную твою́ па́мять пра́зднующия, Льве́ пребога́те, омраче́ний вселю́тых изба́ви.

И ны́не и при́сно и во ве́ки веко́в. Ами́нь.

Богородичен: Страшу́ся Твоего́, Еди́не Царю́, втора́го прише́ствия и убоя́хся, безме́рно согреши́в Тебе́ и по ра́зуме не утве́рждься; но я́ко сы́й Бла́г, обрати́ и спаси́ мя ро́ждшия Тя́ благоприя́тными, Иису́се, моли́твами.

Молитва

О свяще́нная главо́, преподо́бне о́тче, преблаже́нне а́вво Льве, не забу́ди убо́гих твои́х до конца́, но помина́й нас всегда́ во святы́х и благоприя́тных моли́твах к Бо́гу: помяни́ ста́до твое́, е́же сам упа́сл еси́, и не забу́ди посеща́ти чад твои́х моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ ду́ша со а́нгельскими во́инствы, со безпло́тными ли́ки, с небе́сными си́лами, у престо́ла Вседержи́телева предстоя́щи, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.