5 марта.

Канон преподобномученику Корнилию игумену Псково-Печерскому.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Пско́во-Пече́рская оби́тель,/ издре́вле сла́вная чудесы́ ико́ны Богома́терни,/ мно́гия и́ноки Бо́гови воспита́,/ тамо и преподо́бный Корни́лий/ по́двигом до́брым подвиза́ся,/ чу́дную Богома́терь сла́вя,/ инове́рный просвеща́я,/ и́ноки и мно́гия лю́ди спаса́я,/ оби́тель же свою́ ди́вно украша́я и огражда́я./ Та́мо и му́ченичества вене́ц/ по мно́гих ле́тех па́стырства своего́ до́блестне прия́т./ Те́мже воспои́м, лю́дие,/ Христа́ Бо́га и Пречи́стую Его́ Ма́терь возблагодари́м,/ я́ко дарова́ нам преподобно́мученика славна́/ и моли́твенника о ду́шах на́ших достоблаже́нна.

Кано́н. Гла́с 8.

Пе́снь 1.

Ирмос: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Припев: Преподобне отче Корнилие, моли Бога о нас.

Умиле́ния ми́ во́ду изле́й, Го́споди, в се́рдце, и у́м озари́ досто́йно воспе́ти Твоего́ уго́дника, преподо́бнаго Корни́лия.

Припев: Преподобне отче Корнилие, моли Бога о нас.

Мона́хов наста́вник и учи́тель нелицеприя́тен бы́л еси́ и, Бо́гу си́х приводя́, му́ченическим венце́м от земна́го царя́ венча́лся еси́, блаже́нне.

Сла́ва Отцу́ и Сы́ну и Свято́му Ду́ху:

Христо́вым светоли́тием просвеща́ем, преподо́бне о́тче Корни́лие, моли́твами твои́ми, преблаже́нне, омраче́нную ду́шу мою́ просвети́, я́ко да воспева́ю тя́.

И ны́не и при́сно и во ве́ки веко́в. Ами́нь.

Богородичен: Тишина́ Ты́, Влады́чице, и приста́нище погиба́ющим в мо́ре грехо́в, те́мже к Тебе́ притека́ющих не отри́ни, Присноде́во, но спаси́ Твои́м предста́тельством Богома́терним.

Пе́снь 3.

Ирмос: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, еди́не Человеколю́бче.

Припев: Преподобне отче Корнилие, моли Бога о нас.

Просвети́л еси́ лю́ди, и́долом служа́щия, све́том и́стинныя ве́ры, озари́ и на́с, гре́шных, прибега́ющих к Твоему́ заступле́нию, благода́тию от Всеблага́го Человеколю́бца.

Припев: Преподобне отче Корнилие, моли Бога о нас.

Все́м бла́га духо́вныя и теле́сныя де́я, наве́том злы́х пло́ть твоя́ умертви́ся со святы́ми же ду́х тво́й всели́ся, и ны́не с ни́ми моли́ся Христу́ о на́с, преподо́бне.

Сла́ва Отцу́ и Сы́ну и Свято́му Ду́ху:

Ны́не в безконе́чную сла́ву преше́д от земли́, окая́нную ду́шу мою́ страстьми́, преподо́бне, приле́жным очище́нием твоея́ моли́твы уврачу́й.

И ны́не и при́сно и во ве́ки веко́в. Ами́нь.

Богородичен: То́чию в хра́ме Твое́м, а́ки в корабле́, Тобо́ю окормля́емем, Богоро́дице, избавля́емся ны́не от вра́г ви́димых и неви́димых и укрепля́емся Твое́ю по́мощию, Присноде́во.

Ин конда́к, глас 2:

Из мла́да, Корни́лие чу́дный, трудо́м и по́двигом себе́ преда́в, игу́меном Пско́во–Пече́рстей оби́тели поста́влен бы́л еси́, о́бразом ве́ры и по́стническаго жития́ все́м бы́в, мно́гия лю́ди к Бо́гу приве́л еси́. За своя́ же вели́кия доброде́тели за́вистию от злы́х гони́м, му́ченически ду́шу свою́ Бо́гови пре́дал еси́. Того́ ра́ди с ве́рою возопии́м: преподобному́чениче Корни́лие достосла́вный, моли́ Христа́ Бо́га спасти́ся душа́м на́шим.

И́н и́кос:

Из мла́да спасе́ния вожделе́в, преподо́бне Корни́лие, в Пско́во–Пече́рскую оби́тель прите́кл еси́ к чу́дней ико́не Богома́тери. Ту́ постри́гся, обе́ты и́ночества прия́в, Ева́нгельскими доброде́тельми просия́л еси́, те́мже и вожде́м бра́тии поста́влен бы́л еси́. Все́м служа́ и помога́я, да вся́чески все́х спасе́ши, труды́ и по́двиги своя́ усугу́бил еси́. Ливо́нскую чудь к Правосла́вней ве́ре обрати́л еси́, це́ркви и при́чты и́м устро́ив. Оби́тель свою́ до́брыми хра́мы, списа́нием чуде́с Богома́терних и трудо́в пе́рвых подви́жников пече́рских всю́ду просла́вил еси́; за́вистию же зло́бных люде́й по мно́гих ле́тех па́стырства своего́ земны́м царе́м к Небе́сному Царю́ му́ченически предпо́слан бы́л еси́ в ве́чное жили́ще к ли́ку святы́х. Те́мже, досточу́дне Корни́лие, моли́ Христа́ Бо́га и Пречи́стую Его́ Богома́терь дарова́ти на́м оставле́ние прегреше́ний и ве́лию ми́лость.

Пе́снь 4.

Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Припев: Преподобне отче Корнилие, моли Бога о нас.

Оби́тель бя́ше издре́вле святы́х в Богозда́нней пеще́ре, Бо́гу Еди́ному ве́домая, ты́ же, о́тче Корни́лие, те́м подража́я и ме́сто и́х по́двигов почита́я, мно́жество и́ноков к Бо́гу приве́л еси́.

Припев: Преподобне отче Корнилие, моли Бога о нас.

Не оста́ви, Корни́лие преподо́бне, твои́ми по́тами и труда́ми возраще́нныя сея́ оби́тели, но охраня́й ю́, и́бо и врази́ тя́ ви́деша охраня́ющим ю́ и укрепля́ющим.

Сла́ва Отцу́ и Сы́ну и Свято́му Ду́ху:

Многоболе́зненныя стра́сти всегда́ врачу́еши приступа́ющих к тебе́, благода́ть бо, преподо́бне, прии́м от Го́спода, содева́ти зна́мения и чудеса́.

И ны́не и при́сно и во ве́ки веко́в. Ами́нь.

Богородичен: Утоли́, Богома́ти, свире́пствующую бу́рю неве́рия и ожесточе́ния, злы́я стра́сти, поглоти́ти хотя́щия Тя́ сла́вящих и о́браз Тво́й почита́ющих, но заступи́ на́с моли́твами преподо́бнаго Твоего́.

Пе́снь 5

Ирмос: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир пода́ждь нам,/ Человеколю́бие.

Припев: Преподобне отче Корнилие, моли Бога о нас.

Я́ко ка́мень драги́й огради́л еси́ кре́пко оби́тель от ра́тников злы́х, преподо́бне, изыма́я и свобожда́я и́ноков от страсте́й и доброде́тельми горе́ возводя́.

Припев: Преподобне отче Корнилие, моли Бога о нас.

Да не оскуде́ют, о́тче, твои́ми моли́твами и́стиннии подви́жницы благоче́стия во оби́тели твое́й, но ку́пно со святы́м чудотво́рцем Никола́ем, ему́же охране́ние ея́ вве́рил еси́, до трубы́ Арха́нгела соблюди́ ю́.

Сла́ва Отцу́ и Сы́ну и Свято́му Ду́ху:

Преподо́бне о́тче, помози́ оби́тели твое́й, насе́льником и все́м на́м вся́ ко́зни лука́ваго отража́ти, я́коже ты́ иногда́ отража́л еси́ ви́димыя враги́ и неви́димыя.

И ны́не и при́сно и во ве́ки веко́в. Ами́нь.

Богородичен: Мглу́ страсте́й на́ших разреши́, Де́во, и благода́тною си́лою Сы́на Твоего́ отжени́ враго́в кова́рство и наве́ты диа́вола от ра́б Твои́х, Тя́ сла́вящих.

Пе́снь 6.

Ирмос: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя.

Припев: Преподобне отче Корнилие, моли Бога о нас.

Пречи́стыя до́м, преподо́бне, огради́л и украси́л еси́, те́мже и са́м ны́не во оби́тели Ея́ на Небеси́ и на земли́ в хра́ме Ея́ досто́йно обита́еши.

Припев: Преподобне отче Корнилие, моли Бога о нас.

Уте́ши и утиши́ на́с, си́рых, и в доброде́тели ни́щих, преподобному́чениче, жите́йскую го́рдость отрева́я и моли́тве и́стинней науча́я.

Сла́ва Отцу́ и Сы́ну и Свято́му Ду́ху:

Соде́яв, пресла́вне, ду́шу твою́ хра́м Свято́му Ду́ху, бы́л еси́ насле́дник Го́рняго Ца́рствия, с Вы́шними си́лами и со все́ми святы́ми моли́ся ко Го́споду о спасе́нии ду́ш на́ших.

И ны́не и при́сно и во ве́ки веко́в. Ами́нь.

Богородичен: Сохрани́ до́м Тво́й, Богоро́дице, до сконча́ния ве́ка и не оста́ви на́с, си́рых, без Твоея́ Ма́терния по́мощи и предста́тельства преподо́бных Твои́х.

Конда́к, гла́с 4.

Све́тлый свети́льник Правосла́вия и сугу́бая Пско́вския земли́ защи́та бы́л еси́, многобо́жие искореня́я и лю́ди к Бо́гу наставля́я. До́м Богома́тери тобо́ю укрепи́ся и просла́вися, доброде́тельми же укра́шен, вене́ц му́ченика прия́л еси́, помина́й на́с, ча́д твои́х, и у Го́спода, преподобному́чениче Корни́лие.

И́кос:

Бо́гом возлю́бленный игу́мен изря́дный, ве́ры Христо́вой апо́стол и му́ченик, все́м милосе́рдый, и ни́щих пита́тель, от и́долов лю́ди приведы́й к Бо́гу и́стинному, ве́ре наставля́я и Бо́жия хра́мы устроя́я, во оби́тели Пречи́стыя мона́хов мно́жества собра́л еси́, те́мже Богома́терь просла́ви Своя́ о́бразы дела́ми чу́дными, и́хже свиде́тель нело́жен бы́л еси́; и ны́не же от ско́рбных обстоя́ний избавля́еши, да с ве́рою и любо́вию пое́м ти́: ра́дуйся, преподобному́чениче Корни́лие.

Пе́снь 7.

Ирмос: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще:/ отце́в Бо́же, благослове́н еси́.

Припев: Преподобне отче Корнилие, моли Бога о нас.

Ио́ны первонача́льника, гони́телей не́когда избе́гшаго, му́ченичество восприя́л еси́, сла́вне, те́мже с ни́м Бо́гу моли́ся, да сохрани́т оби́тель ва́шу невреди́му и на́с покая́нием к ва́м привлече́т.

Припев: Преподобне отче Корнилие, моли Бога о нас.

Ма́рк, пусты́нник та́йный, а́ки Мелхиседе́к, не́мощию тя́ вразуми́, Корни́лие, о и́мени свое́м, его́же смире́нию поревнова́ти научи́ на́с, блаже́нне.

Сла́ва Отцу́ и Сы́ну и Свято́му Ду́ху:

Просвети́в твое́ се́рдце, преподо́бне, мона́хов бы́л еси́ наста́вник, наказу́я и уча́ и все́х приводя́ к Бо́жией во́ле, поя́: оте́ц на́ших Бо́же, благослове́н еси́.

И ны́не и при́сно и во ве́ки веко́в. Ами́нь.

Богородичен: Да заградя́тся, Богоро́дице, Твои́ми моли́твами уста́ лжи́вая и льсти́вая не ве́дущих над ве́рными покро́ва Твоего́, и спаси́ все́х, Де́во, Тебе́ и́стинно служа́щих и Христо́во и́го благо́е до́бре несу́щих.

Пе́снь 8.

Ирмос: Царя́ Небе́снаго,/ Его́же пою́т вой А́нгельстии,/ хвали́те и превозноси́те во вся ве́ки.

Припев: Преподобне отче Корнилие, моли Бога о нас.

Вразумля́еши живу́щия во огра́де твое́й, преподо́бне, явля́яся и́м я́ве и во сне́ наставля́я, но и все́м, моля́щимся тебе́, чу́дно помога́еши и от злы́х бе́д избавля́еши.

Припев: Преподобне отче Корнилие, моли Бога о нас.

Моли́ о на́с, преподо́бне, и не забу́ди к тебе́ притека́ющих, в ско́рбех и печа́лех су́щих, подая́й утеше́ние от твое́й ра́ки цельбоно́сныя.

Сла́ва Отцу́ и Сы́ну и Свято́му Ду́ху:

Процве́л еси́ я́ко фи́никс Дави́дски, о́тче, и оби́тель яви́лся еси́ Ду́ха Пресвята́го, о на́с непреста́нно моли́ почита́ющих ве́рою пречестну́ю па́мять твою́, преподо́бне Корни́лие.

И ны́не и при́сно и во ве́ки веко́в. Ами́нь.

Богородичен: Ве́к скончава́ется, любо́вь оскудева́ет, побе́ду лука́вый торжеству́ет, и кто́ на́м помощи́ мо́жет, а́ще не Ты́, Де́во, Чу́дная Ма́ти, огради́ши Кресто́м Сы́на Твоего́.

Песнь 9

Ирмос: Вои́стину Богоро́дицу,/ Тя испове́дуем,/ спасе́ннии Тобо́ю, Де́во Чи́стая,/ с Безпло́тными ли́ки Тя велича́юще.

Припев: Преподобне отче Корнилие, моли Бога о нас.

В дому́ Богома́тери, я́коже в Гефсима́нии, почива́еши ны́не, блаже́нне, иде́же, служа́ умиле́нне, предстоя́л еси́ Престо́лу Бо́жию смире́нно, в верте́пе освяще́нному.

Припев: Преподобне отче Корнилие, моли Бога о нас.

Никто́же неуте́шен отхо́дит от твоея́ ра́ки, преподо́бне, но исцеле́ние ду́ш и теле́с ве́рующим подае́ши всегда́ изоби́льно.

Сла́ва Отцу́ и Сы́ну и Свято́му Ду́ху:

Зри́ши Бо́жия и А́нгельския све́тлости патриа́рх и му́ченик и апо́стольския красоты́, моли́ с ни́ми Человеколю́бца оставле́ние грехо́в и жития́ исправле́ние дарова́ти на́м, преподо́бне, хва́лящим тя́.

И ны́не и при́сно и во ве́ки веко́в. Ами́нь.

Богородичен: Тишина́ ве́лия бы́сть в пеще́ре су́щим, суе́т ми́ра избе́гшим святы́м. Ты́, о Ма́ти Де́во, Небе́сную тишину́ ниспосли́ и на́м, Чи́стая, Тебе́ велича́ющим.

Свети́лен:

Свяще́нством досто́йно облече́н, удобре́н же зело́ преподо́бием, Богоро́дицы до́м украси́в и просла́вив, язы́цы ко Христу́ приве́л еси́, усече́нием же ме́чным седи́на твоя́ обагри́ся кро́вию, Корни́лие, и ны́не со святы́ми Христу́ предстоя́, моли́ почита́ющим па́мять твою́ земно́е ше́ствие в ми́ре прейти́ и одесну́ю Судии́ предста́ти.

Моли́тва

Святы́й преподобному́чениче Корни́лие,/ смире́нно припада́ем к раце моще́й твои́х/ и уми́льно мо́лим тя:/ ми́лостиво призри́ на ско́рби на́ша душе́вныя и теле́сныя/ и изба́ву нам пода́ждь;/ помози́ нам, свя́тче Бо́жий, от наве́та злых челове́к, от ни́хже и сам ты неви́нно на земли́ пострада́л еси́./ Защити́ нас от наси́лия диа́вола,/ стра́стно вою́ющаго в не́мощных удесех на́ших;/ умоли́ Го́спода Бо́га и Пречи́стую Его́ Ма́терь даро́вати нам ти́хое и безгре́шное житие́,/ взаи́мную бра́тскую нелицеме́рную любо́вь/ и ми́рную христиа́нскую кончи́ну,/ да чи́стою со́вестию предста́нем нелицеме́рному стра́шному суди́лищу Христо́ву/ и в Ца́рствии Его́ просла́вим Животворя́щую Тро́ицу, Отца́, и Сы́на, и Свята́го Ду́ха, во ве́ки веко́в. Ами́нь.