2 марта.
Канон великомученику Феодору Тирону.
![Святому великомученику Феодору Тирону Святому великомученику Феодору Тирону](img_i/003.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропа́рь, гла́с 2:
Ве́лия ве́ры исправле́ния, во исто́чнице пла́мене, я́ко на воде́ упокое́ния, святы́й му́ченик Фео́дор ра́довашеся: огне́м бо всесожже́гся, я́ко хле́б сла́дкий Тро́ице принесе́ся. Того́ моли́твами, Христе́ Бо́же, спаси́ ду́ши на́ша.
Кано́н. Гла́с 8.
Пе́снь 1.
Ирмос: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.
Припев: Великомучениче Феодоре, моли Бога о нас.
Боже́ственным по́двигом, му́чениче Христо́в, подви́гся и тече́ние сконча́в, ве́ру соблю́л еси́ Боже́ственную, пра́вды обре́л еси́ вене́ц.
Припев: Великомучениче Феодоре, моли Бога о нас.
Преесте́ственну сла́ву от Христа́ прии́м, страстоте́рпче, зе́млю всю́ обхо́диши, избавля́я вся́, ве́рою с благогове́нием к тебе́ притека́ющия.
Сла́ва Отцу́ и Сы́ну и Свято́му Ду́ху:
Небе́сный, сла́вне, лико́вник, со безпло́тными сы́й, на земли́ призыва́ющия тя́ от бе́д и напа́стей избавля́й.
И ны́не и при́сно и во ве́ки веко́в. Ами́нь.
Богородичен: Прему́дрость и Сло́во Отчее несказа́нно ро́ждшая, души́ моея́ лю́тую исцели́ я́зву и се́рдца боле́знь укроти́.
Пе́снь 3.
Ирмос: Ты́ еси́ утвержде́ние притека́ющих к Тебе́, Го́споди, Ты́ еси́ Све́т омраче́нных, и пое́т Тя́ ду́х мо́й.
Припев: Великомучениче Феодоре, моли Бога о нас.
Огнь муче́ний тя́ не устраши́, те́мже о́гнь напа́стей к тебе́ прибега́ющим утиша́еши, Фео́доре.
Припев: Великомучениче Феодоре, моли Бога о нас.
Изба́ви моли́твами твои́ми одержа́щия мя́ печа́ли, му́чениче Христо́в, все́ углажда́я жите́йское стропо́тство.
Сла́ва Отцу́ и Сы́ну и Свято́му Ду́ху:
Все́ се́рдце мое́ и помышле́ние простира́ю к тебе́ и ду́шу, твоея́, страстоте́рпче, по́мощи тре́буя.
И ны́не и при́сно и во ве́ки веко́в. Ами́нь.
Богородичен: Уста́ви непостоя́нное помышле́ний мои́х смуще́ние, Ма́ти Бо́жия, е́же к Сы́ну Твоему́ направля́ющи движе́ние.
Седа́лен, гла́с 4.
Му́ченическими добро́тами укра́шен, Царю́ Небе́сному, му́чениче, ра́дуяся, венцено́сец предстои́ши, Фео́доре: на кре́ст бо воздви́жен бы́л еси́ Его́ ра́ди и гвозде́й пригвожде́ние, и воло́вых жи́л, и ногте́й, и о́чных зе́ниц изверте́ние претерпе́л еси́ тве́рдо. Те́мже тя́ ве́рою почита́ем, превели́кий.
Сла́ва, и ны́не, богоро́дичен.
Иже на престо́ле херуви́мстем седя́й и в не́дрех Отчих водворя́яся, я́ко на престо́ле святе́м седи́т Свое́м, Влады́чице, в не́дрех Твои́х: вопло́щся бо Бо́г вои́стинну, воцари́ся над все́ми язы́ки, и разу́мно ны́не пои́м Ему́. Его́же умоли́ спасти́ся рабо́м Твои́м.
Пе́снь 4.
Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.
Припев: Великомучениче Феодоре, моли Бога о нас.
Прави́теля тя́ предлага́ю, Бо́жий уго́дниче, ты́ мя́ упра́ви ве́трилом Ду́ха и Боже́ственными ве́тры, пресла́вне.
Припев: Великомучениче Феодоре, моли Бога о нас.
От вся́каго, мо́лимся, изба́ви преще́ния, всеблаже́нне Фео́доре, тя́ ве́рою блажа́щия и Боже́ственную па́мять твою́ почита́ющия.
Сла́ва Отцу́ и Сы́ну и Свято́му Ду́ху:
Ни живо́т, ни сме́рть, ни настоя́щая, ни гряду́щая, ни о́гнь, ни ра́ны, от Христа́, богому́дре, отлучи́ша тебе́.
И ны́не и при́сно и во ве́ки веко́в. Ами́нь.
Богородичен: Под ле́том бы́вша, от Отца́ безле́тно возсия́вшаго, Богома́ти на́м родила́ еси́, Его́же моли́ спасти́ пою́щия Тя́.
Пе́снь 5
Ирмос: Утренююще, вопие́м Ти́: Го́споди, спаси́ ны, Ты́ бо еси Бо́г на́ш, ра́зве Тебе́, ино́го не ве́мы.
Припев: Великомучениче Феодоре, моли Бога о нас.
Му́чеников бы́в удобре́ние, му́чениче Христо́в, ве́рных по́мощь бу́ди и стена́ неруши́ма.
Припев: Великомучениче Феодоре, моли Бога о нас.
Едине́ния насла́ждься лу́чшаго, я́же па́че ума́ благи́х, Фео́доре, тя́ чту́щия спаси́.
Сла́ва Отцу́ и Сы́ну и Свято́му Ду́ху:
Побежда́емь любо́вию Зижди́теля, жите́йская оттря́сл еси́ пристра́стия и Бо́гу благоугоди́л еси́.
И ны́не и при́сно и во ве́ки веко́в. Ами́нь.
Богородичен: Его́же родила́ еси́, Де́во Всенепоро́чная, Бо́га Сло́ва, приле́жно моли́ о на́с, пою́щих Тя́.
Пе́снь 6.
Ирмос: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.
Припев: Великомучениче Феодоре, моли Бога о нас.
Побо́рник сы́й благоче́стия тепле́йший и пре́лести обличи́тель и́дольския бы́в, де́монов мечта́ния и страсте́й о́бразы души́ моея́ потреби́.
Припев: Великомучениче Феодоре, моли Бога о нас.
Утвержде́ние ми́ бу́ди и стена́, му́чениче, непобеди́ма, не́мощь и гни́лость ума́ моего́ утвержда́я, Фео́доре, твои́ми предста́тельствы и сохраня́я невре́дно.
Сла́ва Отцу́ и Сы́ну и Свято́му Ду́ху:
Во́инства тлетво́рнаго и тле́ннаго отре́клся еси́, во́инство же жи́зни, всеблаже́нне Фео́доре, до конца́ возлюби́л еси́, в не́мже победоно́сец показа́лся еси́, досточу́дне.
И ны́не и при́сно и во ве́ки веко́в. Ами́нь.
Богородичен: Возсия́ от Сио́на Вы́шняго благоле́пие прия́тием пло́ти по соедине́нию неизглаго́ланному, из Тебе́, Неискусобра́чная, оде́явся, и ми́р просвети́.
Конда́к, гла́с 8:
Ве́ру Христо́ву, я́ко щи́т, вну́трь прии́м в се́рдце твое́м, проти́вныя си́лы попра́л еси́, многострада́льче, и венце́м небе́сным венча́лся еси́ ве́чно, Фео́доре, я́ко непобеди́мый.
Икос:
На престо́ле све́та Носи́маго, благода́рственно ве́рою воспева́ем Тя́, я́ко дарова́ние боже́ственное дарова́л еси́ — до́бляго во страда́нии Фео́дора, в житии́ треблаже́ннаго, я́ко побо́рника су́щаго и́стины, благочести́вым по́мыслом Тя́ жела́юща, Христе́, кре́пка победи́теля на льсти́ваго, я́ко непобеди́мый.
Пе́снь 7.
Ирмос: От Иуде́и доше́дше, о́троцы, в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.
Припев: Великомучениче Феодоре, моли Бога о нас.
Тя́, живота́ моего́ предста́теля, и засту́пника и́мам спасе́ния моего́, и храни́теля, богому́дре, утвержде́ние даю́ща ве́рою зову́щим: оте́ц на́ших Бо́же, благослове́н еси́.
Припев: Великомучениче Феодоре, моли Бога о нас.
Яко красно́ заколе́ние са́м себе́ Го́сподеви и свяще́ннейшее приве́л еси́, всеблаже́нне, и огне́м муче́ний всесоже́глся еси́, сла́вне, вопия́: оте́ц на́ших Бо́же, благослове́н еси́.
Сла́ва Отцу́ и Сы́ну и Свято́му Ду́ху:
Живо́тнаго вдохнове́ния насыща́яся, блаже́нне, Боже́ственнаго Ду́ха, ду́хи отгоня́еши, неду́ги исцеля́еши и зове́ши, ра́дуяся: оте́ц на́ших Бо́же, благослове́н еси́.
И ны́не и при́сно и во ве́ки веко́в. Ами́нь.
Богородичен: Из утро́бы Твоея́ про́йде, вопло́щься, вся́ческих, Де́во, Госпо́дь. Те́м Тя́, Богоро́дицу, му́дрствующе правосла́вно, Сы́ну Твоему́ взыва́ем: оте́ц на́ших Бо́же, благослове́н еси́.
Пе́снь 8.
Ирмос: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.
Припев: Великомучениче Феодоре, моли Бога о нас.
Вся́ческими, прехва́льне, треволне́нии окружа́еми и напа́стьми жите́йскими содержи́ми, предста́теля скоре́йша, и помо́щника, и спобо́рника, вси́ ве́рнии, тя́ моли́твенника Влады́це приво́дим, вопию́ще: не преста́й моли́ти о воспева́ющих всечестну́ю твою́ па́мять.
Припев: Великомучениче Феодоре, моли Бога о нас.
Грехо́вными вери́гами свя́зан, пребога́те, и прегреше́ний мои́х плени́цами око́ван, прибега́ю к покро́ву твоему́, венцено́сче, разреше́ния прося́, но я́ко чу́дно ко Влады́це все́х, богому́дре, дерзнове́ние име́я, моли́ спасти́ся Христа́ пою́щим во ве́ки вся́.
Сла́ва Отцу́ и Сы́ну и Свято́му Ду́ху:
Му́ченическими светлостьми́ просве́щен, всехва́льне, Ангельским счи́слился еси́ чино́м, с ни́миже ра́дуяся и слику́я, му́чениче, при́сно, чудотво́рными исцеле́нии уясня́еши любо́вию тя́ чту́щия и ве́рно пою́щия: лю́дие, превозноси́те Христа́ во ве́ки вся́.
И ны́не и при́сно и во ве́ки веко́в. Ами́нь.
Богородичен: Пло́тию приобщи́ся к челове́ком, я́ко Благоутро́бен, Соде́тель и Творе́ц тва́ри, из Тебе́, Неискусобра́чная Богороди́тельнице, сию́ прие́м: те́мже Богоро́дицу, ве́рнии, Тя́ и́стинно сла́вим, вопию́ще и ве́рно пою́ще: лю́дие, превозноси́те Христа́ во ве́ки вся́.
Песнь 9
Ирмос: Тя́, Неискусобра́чную Ма́терь Бо́га Вы́шняго, Тя́, па́че ума́ ро́ждшую сло́вом вои́стинну Бо́га, вы́шшую пречи́стых си́л, немо́лчными славословле́нии велича́ем.
Припев: Великомучениче Феодоре, моли Бога о нас.
Бо́дра тя́ храни́теля, великому́чениче, стяжа́вше, враго́в злоу́мие удо́бь отгоня́ща и Це́рквам подаю́ща ми́р, страстоте́рпче, непреста́нно ублажа́ем.
Припев: Великомучениче Феодоре, моли Бога о нас.
Кре́пость тебе́ на де́моны дарова́ Влады́ка, стра́сти же души́ и телесе́ исцеля́ти, блаже́нне, всеблагочести́вейшим дерзнове́нием, моля́ся Спа́су, те́мже тя́ вси́ ублажа́ем.
Сла́ва Отцу́ и Сы́ну и Свято́му Ду́ху:
Зарю́ Трисо́лнечную и еди́нственную созерца́яй, Еди́но в Тре́х Божество́, и нача́ло пренача́льное, и исто́чник бла́гости, страстоте́рпче, тя́ пою́щия сохраня́й.
И ны́не и при́сно и во ве́ки веко́в. Ами́нь.
Богородичен: Изми́ мя́, Всенепоро́чная, мы́сленнаго плене́ния, избавле́ние воздаю́щи, Влады́чице, Сы́на Твоего́ распя́тие, е́же за все́х бы́вшее, избавле́ние, и ми́р, и спасе́ние пою́щим Тя́.
Свети́лен.
Искуси́вся, я́коже зла́то, огне́м и му́ками, досто́ин яви́лся еси́ да́р Бо́га Вы́шняго, Фео́доре страстоте́рпче, о на́с ны́не моли́ся.
Сла́ва, и ны́не, Богородичен:
Держа́вным Твои́м покро́вом от враго́в наве́та на́с, Чи́стая, Твоя́ рабы́, сохрани́ вся́ невреди́мы, Тя́ бо стяжа́хом, еди́ну прибе́жище в ну́ждах.
Молитва великомученику Феодору Тирону
О, пресла́вне, великому́чениче Фео́доре Ти́роне. Услы́ши моле́ние на́с ве́рных, велича́ющих тя́ и в смире́нии свое́м взыва́ющих к тебе́ от всея́ души́. От ю́ности показа́вый пла́менную ве́ру во Христа́ Го́спода и ра́ди нея́ жи́знь свою́ положи́вый, пода́ждь и на́м моля́щимся тебе́ душе́вныя си́лы, во е́же блюсти́ во вся́ дни́ чистоту́ пра́выя ве́ры. Запечатле́вый му́ченичеством испове́дание ве́ры в пещи́ о́гненней, бу́ди на́м о́бразом в ре́вности пропове́дывания И́стины Христо́вой. Огради́вый ве́рных от греха́ язы́чества и отсту́пничества, соблюди́ и на́с чи́стыми от ерети́ческих ко́зней и вся́каго диа́вольскаго навожде́ния. О, Преблаже́нне, великому́чениче Фео́доре, свои́м предста́тельством у Престо́ла Всевы́шняго умоли́ Го́спода Бо́га, да пода́ст на́м благода́тныя си́лы, во е́же напра́вити пути́ жи́зни на́шея по Сло́ву Бо́жию во спасе́ние ду́ш на́ших. Я́ко да твои́ми моли́твами получи́вше благода́ть и ми́лость, просла́вим все́х благи́х Исто́чника и Даропода́теля Бо́га, Еди́наго, в Тро́ице Святе́й Сла́вимаго, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![Святому великомученику Феодору Тирону Святому великомученику Феодору Тирону](img_b/003.jpg)