29 марта.

Канон преставлению святителя Серапиона, архиепископа Новгородского.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 8:

Тве́рдый адама́нт вои́стинну, о́тче, показа́лся еси́, во все́м подо́бяся Влады́це своему́ и Го́споду, святи́телю, непра́ведная изгна́ния, ра́дуяся, претерпе́л еси́, те́мже и Христо́с святи́телем и му́чеником слико́вна тя́ сотвори́ и дарова́ тя́ ста́ду твоему́, я́ко сокро́вище неотъе́млемо, чудесы́ все́х обогаща́юща, я́ко да и мы́, соше́дшеся к ра́це моще́й твои́х, любо́вию вопие́м: моли́ о на́с пречестны́й архиере́ю, Серапио́не о́тче на́ш.

Стихи́ра, гла́с 2:

Избра́н Бо́гом бы́в, пресла́вне, рукоположе́нием святи́тельства, непреста́нно Го́сподеви принося́ безкро́вныя Же́ртвы, чи́сте Тому́ послужи́в, яви́лся еси́ ве́сь освяще́н, святи́телю, предстоя́ престо́лу Святы́я Тро́ицы, созерца́я добро́ту неизрече́нную, наслажда́яся весе́лия присносу́щнаго и ра́дости неизглаго́ланныя, моли́ся Го́сподеви, Серапио́не приснопа́мятне, спасти́ся душа́м на́шим.

Кано́н вели́кому святи́телю Серапио́ну, архиепи́скопу Вели́каго Новагра́да и Пско́ва. Гла́с 8.

Пе́снь 1.

Ирмос: Пои́м Бо́гу, от го́рькия рабо́ты фарао́новы изба́вльшему Изра́иля и о́гненным столпо́м и све́тлым о́блаком наста́вльшему, я́ко просла́вися.

Припев: Святителю отче Серапионе, моли Бога о нас.

Отве́рзи устне́ мои́, Го́споди, просвети́ ми́ смы́сл помраче́нный, разреши́ ю́зу язы́ка моего́, я́ко да све́тло и ра́достно восхвалю́ до́бляго страда́льца Серапио́на, Твои́м страсте́м подража́теля.

Припев: Святителю отче Серапионе, моли Бога о нас.

Аще и гру́бо приноси́мое тебе́ пе́ние, но от усе́рдия приими́, о́тче, я́коже две́ ца́ты о́ноя вдови́цы прия́т Христо́с, и не лише́на мя́ сотвори́ Твои́х даро́в, и согреше́нием проще́ние испроси́.

Сла́ва Отцу́ и Сы́ну и Свято́му Ду́ху:

Блага́го Бо́га подража́тель бы́л еси́, преблаже́нне Серапио́не, ми́лость же к ни́щим и любо́вь нелицеме́рну ко все́м ра́вно стяжа́в, помина́я рече́нная: возлю́биши и́скренняго своего́, я́ко са́м себе́.

И ны́не и при́сно и во ве́ки веко́в. Ами́нь.

Богородичен: Всепе́тая Богоро́дице, Яже Всеми́лостиваго Бо́га поро́ждшая, ду́шу мою́, омраче́нную де́монскими прило́ги, просвети́, Всенепоро́чная, и ума́ моего́ уврачу́й изступле́ние, я́ко да по достоя́нию сла́влю Тя́.

Пе́снь 3.

Ирмос: Утвержде́ние мое́, Спа́се, еси́, прибе́жище мое́ и си́ла, поколеба́вшееся се́рдце мое́ утверди́ в стра́се Твое́м, я́ко не́сть свя́т, я́коже Ты́, Бо́г на́ш.

Припев: Святителю отче Серапионе, моли Бога о нас.

Го́спода своего́ во́лю сотвори́в, сугу́б тала́нт приобре́л еси́, сего́ ра́ди и благи́й о́н гла́с слы́шиши: до́брый ра́бе и ве́рный, вни́ди в ра́дость Го́спода своего́.

Припев: Святителю отче Серапионе, моли Бога о нас.

Душе́вную чистоту́ стяжа́в, без нея́же никто́ же у́зрит Го́спода, Серапио́не о́тче на́ш, стра́сти окая́нныя души́ моея́ и сла́сти теле́сныя утоли́ моли́твами си́.

Сла́ва Отцу́ и Сы́ну и Свято́му Ду́ху:

Егда́ у́бо Бо́гу производя́щу тя́ на лу́чшая, тогда́ мирска́я вся́ оплева́л еси́ и, благи́й яре́м на ра́мо взе́м, усе́рдно Тому́ после́довал еси́.

И ны́не и при́сно и во ве́ки веко́в. Ами́нь.

Богородичен: Живо́т ро́ждшая Ипоста́сный, Де́во Всенепоро́чная, се́рдца моего́ стру́пы исцели́ хода́тайствы Твои́ми, е́же к Сы́ну Своему́, Богоблагода́тная.

Седа́лен, гла́с 8:

Чистото́ю душе́вною и теле́сною па́че со́лнца облиста́л еси́, терпе́нием му́жествовав, велиа́ру главу́ сте́рл еси́, льсти́вно на тя́ вооружи́вшихся по́мощию Вседержи́теля под но́зе пове́ргл еси́, самоде́ржца непови́ннаго гне́ва не устраши́лся еси́, ни ласка́нием, ни лю́тым преще́нием непревра́тен пребы́л еси́, Серапио́не о́тче на́ш, сего́ ра́ди Христо́с побе́дным венце́м увязе́ тя́, те́м мо́лим тя́: моли́ спасти́ся и́же па́мять твою́ любо́вию почита́ющим.

Сла́ва, и ны́не, Богородичен:

Челове́к вражду́ющих и де́монская стреля́ния уста́вила еси́, Всенепоро́чная, хода́тайством Си́ к Сы́ну Твоему́ и Бо́гу на́шему, душа́м спасе́ние и телесе́м здра́вие подаю́щи ве́рою при́сно блажа́щим Тя́ и пресвято́е Рождество́ Твое́ почита́ющим.

Пе́снь 4.

Ирмос: Все́л еси́ на ко́ни — апо́столы Твоя́, Го́споди, и прия́л еси́ рука́ма Твои́ма узды́ и́х, и спасе́ние бы́сть ежде́ние Твое́ ве́рно пою́щим: сла́ва си́ле Твое́й, Го́споди.

Припев: Святителю отче Серапионе, моли Бога о нас.

Зе́льным поще́нием, и моли́твами непреста́нными, и чистото́ю серде́чною живу́ща в себе́ Христа́ име́л еси́, преблаже́нне святи́телю, во огра́ду бо вни́де Пречи́стыя Его́ Ма́тери, на Нея́же наде́жду всю́ возложи́л еси́.

Припев: Святителю отче Серапионе, моли Бога о нас.

Земна́я отри́нув, небе́сная насле́довал еси́, от си́лы бо в си́лу пре́йде, к преми́рному Ца́рствию, иде́же угото́ва ти ся, терпе́ния ра́ди твоего́, вене́ц нетле́нный и ве́чное весе́лие.

Сла́ва Отцу́ и Сы́ну и Свято́му Ду́ху:

Изволе́нием Бо́жиим и избра́нием по́стник сосло́вия па́стырь поставля́ешися и наста́вник, и́же ко спасе́нию, непреле́стным путе́м вводя́ ста́до свое́ во огра́ду небе́сную.

И ны́не и при́сно и во ве́ки веко́в. Ами́нь.

Богородичен: И ражда́еши, и де́вствуеши, Де́во Всенепоро́чная, иску́са бо му́жескаго не прие́мши, родила́ еси́ Бо́га воплоще́нна от пречи́стую бо́ку Твое́ю, Его́же моли́ о пою́щих Тя́.

Пе́снь 5

Ирмос: Утренюет ду́х мо́й к Тебе́, Бо́же, зане́ све́т повеле́ния прише́ствия Твоего́, и́миже у́бо озари́ у́м на́ш, Влады́ко, и наста́ви на стезю́ жи́зни.

Припев: Святителю отче Серапионе, моли Бога о нас.

Кре́пко вооружи́вся на неви́димыя враги́, я́коже тве́рдый адама́нт, вы́я и́х сокруши́л еси́ и, под но́зе попра́в, го́рдостная шата́ния низве́ргл еси́, Го́споду тя́ прославля́ющу, и́стиннаго Своего́ уго́дника.

Припев: Святителю отче Серапионе, моли Бога о нас.

Лука́вых де́монов ла́яния ста́до свое́ сохраня́я, Истиннаго Па́стыря Христа́ и́стинный учени́к бы́в, Серапио́не, сего́ ра́ди избра́нием первосвяти́теля наме́стник блаже́ннаго Се́ргия в вели́цей Ла́вре устроя́ешися.

Сла́ва Отцу́ и Сы́ну и Свято́му Ду́ху:

Ми́лостивно наказу́я, о́тче, о Христе́ поруче́нное тебе́ ста́до упасе́ на па́житех зако́на живоно́снаго: собо́ю бо о́браз показа́л еси́, возвеща́я пу́ть ко спасе́нию и е́же от злы́х премене́ние.

И ны́не и при́сно и во ве́ки веко́в. Ами́нь.

Богородичен: На́шего спасе́ния Хода́таица Ты́ яви́лася еси́, Всенепоро́чная, ду́шу мою́ окая́нную изба́ви де́монскаго мучи́тельства и пода́ждь прегреше́нием очище́ние, ра́зве бо Тебе́, раби́ Твои́, не име́ем Помо́щницы.

Пе́снь 6.

Ирмос: Из чре́ва а́дова во́пля моего́ услы́шал еси́ гла́с мо́й и изба́вил еси́ от тли́ живо́т мо́й, Многоми́лостиве.

Припев: Святителю отче Серапионе, моли Бога о нас.

О ученице́ свое́м провозвести́л еси́ иногда́, преблаже́нне Серапио́не святи́телю, — я́ко бу́дет се́й, — рече́, — па́стырь кинови́и сия́ вели́кия. Того́ ра́ди и поклони́лся еси́ ему́, не я́ко ученику́ своему́, но я́ко собесе́днику.

Припев: Святителю отче Серапионе, моли Бога о нас.

Проро́чества да́р ви́дяще, чу́днии ученицы́ твои́ не я́ко челове́ку, но я́ко Христу́ повину́ющеся во все́м, зря́ху бо тя́ по стопа́м ходя́ща блаже́ннаго Се́ргия, и после́дующа трудолю́бному его́ житию́, и о все́х моля́щася Бо́гу, хвалу́ возсыла́ху.

Сла́ва Отцу́ и Сы́ну и Свято́му Ду́ху:

Ра́зум от Бо́га прии́м благочести́выя па́че приводя́ к богоразу́мию, нечести́вым же уста́ загражда́я, Серапио́не святи́телю, в собра́нии бо бы́вшу ти́ святи́тельстем, самоде́ржца кро́ткими глаго́лы повину́в, кинови́ям поле́зная сотвори́л еси́.

И ны́не и при́сно и во ве́ки веко́в. Ами́нь.

Богородичен: Святейши херуви́м и серафи́м яви́лася еси́, Пречи́стая, Зижди́теля бо и́х несказа́нно родила́ еси́, не опали́вшися огне́м Божества́, и ны́не блажа́т Тя́ вси́ ро́ди, я́коже прорекла́ еси́, Препе́тая.

Конда́к, гла́с 3:

Яко венце́м пресве́тлым, украси́вся дне́сь, Вели́кий Новгра́д лику́ет в па́мять па́стыря своего́ и учи́теля, и, я́ко диади́му ца́рскую, возложи́вши, Ла́вра вели́кая о́на све́тло ра́дуется, иде́же просла́ви тебе́ Бо́г, уго́дника Своего́, и прояви́ после́днему ро́ду на́шему цельбоно́сныя мо́щи твоя́, святи́телю Серапио́не, Це́рковь же Бо́жия весели́тся, созыва́ющи мона́хов сосло́вие велегла́сно вопи́ти: ра́дуйся, гра́ду твоему́ похвало́, и оби́тели, и всея́ Росси́йския земли́ пресве́тлый свети́льниче.

Икос:

Из оте́чества ху́да и незна́ема вели́кий граждани́н небе́снаго Ца́рствия произы́де, я́ко из мра́чна о́блака пресве́тлая звезда́, провозсия́ дне́сь вели́кий Серапио́н и все́х озари́ чуде́с луча́ми, и́же с ве́рою приходя́щих к цельбо́носному его́ гро́бу и любе́зно целу́ющих ра́ку моще́й его́, не ве́рующих же далече́ отгоня́ и льсти́вая те́х шата́ния, я́ко паучи́ну, растерза́я и ка́знем предая́, да и ти́и науча́тся не ху́лити Бо́жия и́мене и Его́ уго́дников. Мы́ же, ве́рнии, обстоя́ще дне́сь свяще́нную его́ ра́ку, не очи́ма то́кмо ви́дяще, но серде́чною любо́вию ве́рно возопие́м: ра́дуйся, я́ко от младе́нства Бо́гу порабо́тав; ра́дуйся, я́ко мирска́я вся́ оплева́в; ра́дуйся, я́ко Христо́в яре́м на ра́мо взе́м, усе́рдно Тому́ после́довал еси́; ра́дуйся, я́ко вруче́нное ста́до до́бре упа́сл еси́; ра́дуйся, я́ко наме́стник бы́в блаже́ннаго Се́ргия и того́ стопа́м во все́м поревнова́л еси́; ра́дуйся, проро́чества да́р восприе́мый; ра́дуйся, я́ко чуде́с мно́гих де́латель яви́лся еси́; ра́дуйся, Прему́дрости Бо́жия престо́л украси́вый; ра́дуйся, чудесы́ гра́д сво́й озари́вый; ра́дуйся, я́ко сподо́бился еси́ непови́нным осужде́нием и с престо́ла [святи́тельскаго] сверже́нием ревнова́ти Златоу́сту Иоа́нну; ра́дуйся, я́ко обличи́л еси́ злоко́зненных, на тя́ вооружи́вшихся, мудрова́ние; ра́дуйся, страда́льче до́брый, во все́м подража́я Влады́ки своего́. Его́же моли́ о чту́щих святу́ю па́мять твою́, да вси́ в весе́лии се́рдца вопие́м ти́: ра́дуйся, святи́телю Серапио́не, Вели́кому Новугра́ду похвала́ и всея́ Росси́йския земли́ пресве́тлый свети́льниче.

Пе́снь 7.

Ирмос: Халде́йския пе́щи всепа́губную си́лу угаси́вше о́бразом Ангела снизше́дшаго, Зижди́телю ю́ноши взыва́ху: благослове́н еси́ и хва́льный, Бо́же оте́ц на́ших.

Припев: Святителю отче Серапионе, моли Бога о нас.

Терпе́нием свои́м и му́жеством возвесели́л еси́ Иже над все́ми Су́щаго Бо́га, и То́й тебе́ просла́ви, я́ко при́снаго Своего́ уго́дника, и чудесы́ обогати́л тя́ е́сть, я́ко и я́рость самоде́ржца на кро́тость возмо́гл еси́ преложи́ти и непови́нныя от сме́рти изба́вити, пою́щих: благослове́н Бо́г оте́ц на́ших.

Припев: Святителю отче Серапионе, моли Бога о нас.

Устроя́ет тя́ Госпо́дь Це́ркви Свое́й архиере́я, слове́сным овца́м па́стыря всеизря́дна, ты́ же, прему́дре Серапио́не, егда́ святи́тельства па́ству прии́м, к бо́льшим подвиго́м вдава́шеся, поя́ Христо́ви: благослове́н Бо́г оте́ц на́ших.

Сла́ва Отцу́ и Сы́ну и Свято́му Ду́ху:

Фараони́тская ка́знь за грехи́ на́ши егда́ прии́де на лю́ди твоя́, святи́телю, тогда́ приле́жно Бо́гу моля́шеся, призыва́я на по́мощь Того́ ро́ждшую Богоро́дицу, смертоно́сие уста́вил еси́ и, трие́м исцеле́ние пода́в, пе́ти научи́л еси́: благослове́н Бо́г оте́ц на́ших.

И ны́не и при́сно и во ве́ки веко́в. Ами́нь.

Богородичен: Христа́, Его́же родила́ еси́, моли́, Богоро́дице, да просвети́т ду́шу мою́ омраче́нную и лю́таго паде́ния изба́вит, я́ко да во хвале́нии сла́влю Тя́, Всенепоро́чная, Сы́ну Твоему́ вопия́: благослове́н Бо́г оте́ц на́ших.

Пе́снь 8.

Ирмос: Нече́стия орга́ны ину́ю пе́снь, благоче́стия же боговеща́ннии поя́ху гу́сли: благослови́те, дела́ Госпо́дня, Христа́ во ве́ки.

Припев: Святителю отче Серапионе, моли Бога о нас.

От вся́ких напа́стей и озлобле́ния изба́ви на́с, Серапио́не о́тче святи́телю, я́коже дре́вле гра́д сво́й спа́сл еси́ от запале́ния, и в ра́дости лю́ди своя́ вопи́ти научи́в: благослови́те, вся́ дела́ Госпо́дня, Го́спода.

Припев: Святителю отче Серапионе, моли Бога о нас.

Царю́ и Влады́це моля́ся, разсла́бленнаго исцели́л еси́, по́мощь име́я и заступле́ние Бо́жия Ма́тере, о́н бо проша́ше пи́щи, е́же к теле́сней потре́бе, ты́ же, святи́телю, пре́жде духо́вною пи́щею напита́в, здра́вие по́дал еси́ и пе́ти научи́л еси́: благослови́те, вся́ дела́ Госпо́дня, Го́спода.

Припев: Святителю отче Серапионе, моли Бога о нас.

Челове́цы веселя́хуся, ви́дяще пресла́вная чудеса́ твоя́, е́же возда́ ти́ Госпо́дь возме́здие проти́ву трудо́м твои́м, вра́г же вооружа́шеся льсти́вых наважде́ньми, изгна́нием на тя́ поуча́ется, ты́ же в ра́дости поя́ше: благослови́те, вся́ дела́ Госпо́дня, Го́спода.

Сла́ва Отцу́ и Сы́ну и Свято́му Ду́ху:

Ше́ствие егда́ творя́ше во изгна́ние от гра́да своего́, святи́телю, ре́чное стремле́ние моли́твою уста́вил еси́ и иду́щих с тобо́ю, па́че же по́сланных к тебе́, удиви́л еси́, и глаго́лаша: ди́внаго Бо́га на́шего, прославля́ющаго святы́я Своя́, по́йте, вся́ дела́ Госпо́дня, Го́спода.

И ны́не и при́сно и во ве́ки веко́в. Ами́нь.

Богородичен: Ще́драго и Всеми́лостиваго, Ма́ти сподо́бльшися бы́ти, Богоро́дице, щедро́ты низпосли́ на́м от неистощи́мых сокро́вищь Твои́х и пода́ждь в ну́ждах терпе́ние, моли́твами святи́теля Серапио́на, я́коже о́н претерпе́ Сы́на Твоего́ ра́ди, в весе́лии поя́ Ему́: благослови́те, вся́ дела́ Госпо́дня, Го́спода.

Песнь 9

Ирмос: Воспита́нная во свята́я святы́х и ро́ждшая Све́т вселе́нныя, Благода́тная, ра́дуйся, пе́сньми Рождество́ Твое́ велича́ем.

Припев: Святителю отче Серапионе, моли Бога о нас.

Рве́нием распаля́емь по Го́споде Бо́зе, поруга́ния и доса́ды, заточе́ния и изгна́ния претерпе́л еси́, помина́я Госпо́дни стра́сти, я́же претерпе́ и пострада́ на́шего ра́ди спасе́ния, бие́ния и оплева́ния, па́че же и сме́рть поно́сную, сего́ ра́ди, Серапио́не святи́телю, по́мощию Вседержи́теля льсти́вно на тя́ вооружи́вшихся шата́ния низложи́л еси́.

Припев: Святителю отче Серапионе, моли Бога о нас.

Фарисе́йскаго киче́ния отвраща́яся, Серапио́не преблаже́нне, Христо́во смире́ние име́л еси́: я́коже Он Отцу́ о распина́ющих моля́шеся: Отче, не поста́ви и́м греха́ сего́, не ве́дят бо что́ творя́т, — та́кожде и ты́ сотвори́л еси́, святи́телю, преступи́вших пред тобо́ю и необраща́ющихся проще́нию сподобля́еши, са́м взыску́я поги́бшаго.

Сла́ва Отцу́ и Сы́ну и Свято́му Ду́ху:

Легко́, я́коже оре́л, крило́ма небе́сную высоту́ дости́гл еси́, терпе́ния ра́ди по́честь прия́л еси́ от Мздовоздая́теля, и ны́не Госпо́дь показа́ на́м цельбо́носныя мо́щи твоя́, точа́щия исцеле́ния ве́рою приходя́щим. Те́м мо́лим тя́, святи́телю, помяни́ на́с, и́же ве́рою чту́щих тя́, да тя́ достодо́лжно ублажа́ем.

И ны́не и при́сно и во ве́ки веко́в. Ами́нь.

Богородичен: Из пречи́стых ложе́сн Твои́х, про́йде у́мное Со́лнце, Богоро́дице, просвеща́я и́же во тме́ седя́щих, омраче́нныя неве́дением, и приводя́ ко све́ту богоразу́мия, страда́вшим Его́ ра́ди нетле́нныя венцы́ подава́я и ве́чное ра́дование. Его́же моли́ о на́с, Влады́чице, не лиши́ти на́с десна́го стоя́ния в ча́с испыта́ния, да Тя́ вси́ велича́ем.

Свети́лен:

Мно́гими ле́ты покрове́ны бы́та честны́я мо́щи твоя́, ны́не же прояви́ Госпо́дь пресла́вно, после́днему ро́ду на́шему, ве́рным на исцеле́ние, неве́рным же на обличе́ние и посрамле́ние. Сего́ ра́ди велича́ем Христа́, тя́ просла́вльшаго.

Сла́ва, и ны́не, Богородичен:

Всеблага́я Влады́чице, я́же Всеще́драго Бо́га пло́тию ро́ждшая, поми́луй на́с, озло́бленных прило́ги лука́ваго, и устрани́вшихся Сы́на и Бо́га Твоего́ за́поведей, и греху́ рабо́тавших свои́м хоте́нием, привлецы́, Пречи́стая, к повеле́нием Бо́жиим и не лиши́ на́с ве́чнаго наслажде́ния моли́твами Си́.

Молитва святителю Серапиону, архиепископу Новгородскому

О, вели́кий святи́телю Бо́жий о́тче Серапио́не! Вонми́ мое́й сла́бой моли́тве, и предста́ни за мя, гре́шнаго и убо́гаго, пред Го́сподем, и испроси́ твои́ми усе́рдными моли́твами мно́жеству грехо́в мои́х проще́ние, да, получи́в по́мощь твою́, поживу́ во исправле́ние жития́ моего́. Ты, я́ко испо́лненный живо́ю струе́ю от Приснотеку́щаго Исто́чника воды́ живота́ ве́чнаго – Христа́ Иису́са, ороси́ се́рдце мое́ и возбуди́ жела́ние любви́ моея́ ко Го́споду, да путь маловре́меннаго жития́ поживу́ в поуче́нии за́поведем Его́ и в покая́нии серде́чнем. И, охраня́емь твои́ми те́плыми за мя моли́твами, улучу́ от благосе́рдаго Спа́са Го́спода на́шего Иису́са Христа́ благовре́менную в ну́ждах по́мощь и непосты́дный христиа́нский коне́ц живота́ моего́, прославля́я Его́ со все́ми, от ве́ка благоугоди́вшими Ему́, во ве́ки веко́в. Ами́нь.