28 марта.

Канон святому мученику Агапию и с ним шести мученикам.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Стихи́ры, гла́с 8.

Му́ченицы Христо́вы седмочи́сленнии, / гони́телей стремле́ния / и ну́ждную сме́рть / в ничто́же вмени́сте, / но благоде́рзостно отлучи́вшеся / мужему́дренно к боре́нием / и победоно́сною сла́вою оде́явшеся, / причто́стеся пра́ведным все́м, / с ни́миже ва́с всегда́ сла́вяще, ублажа́ем.

Му́чениче страда́льче Ага́пие, / благи́х исто́чника, / жела́нных кра́йнейшее возлюби́в, / потща́лся еси́ испи́ти ча́шу муче́ния, / призыва́я Бо́га Жива́го Боже́ственное и́мя. / О, му́жества твоего́! / О, терпе́ния твоего́! / и́мже получи́ти сла́вы и све́тлости / я́ве сподо́бился еси́.

Му́ченицы преблаже́ннии, / на во́льное заколе́ние / са́ми себе́ преда́сте, / и зе́млю кровьми́ ва́шими освяти́сте, / и возду́х просвети́сте прехожде́нием. / Ны́не же живете́ на небесе́х, / к Све́ту невече́рнему / о на́с всегда́ / моля́щеся, богови́днейшии.

Сла́ва, и ны́не, богоро́дичен, гла́с и подо́бен то́йже:

Тя́ мо́лим, Пречи́стая, / Предста́тельницу на́шу, / смуща́емыя в печа́лех / не пре́зри до конца́ поги́бнути рабы́ Твоя́, / но ускори́ изъя́ти ны́ / настоя́щаго гне́ва и печа́ли, / о Богора́дованная Пресвята́я Чи́стая! / Ты́ бо на́м еси́ стена́ / и по́мощь необори́ма.

Кано́на. Гла́с 8.

Пе́снь 1.

Ирмос: Пои́м Го́сподеви, прове́дшему лю́ди Своя́ сквозе́ Чермно́е мо́ре, я́ко Еди́н сла́вно просла́вися.

Припев: Святии мученицы, молите Бога о нас.

В небе́сных, му́ченицы, су́ще жили́щах, ва́с хва́лящия на земли́ просвеще́ния сподо́бите.

Припев: Святии мученицы, молите Бога о нас.

Столпы́ Це́ркве яви́стеся, сте́ны разоря́юще идолонеи́стовства, страстоте́рпцы Христо́вы предо́блии.

Сла́ва Отцу́ и Сы́ну и Свято́му Ду́ху:

Уязви́лся еси́ любо́вию, му́чениче досточу́дне Ага́пие, Влады́ки все́х и умре́ти Его́ ра́ди предусе́рдствовал.

И ны́не и при́сно и во ве́ки веко́в. Ами́нь.

Богородичен: Заре́ю пресветле́йшею, из Тебе́, Де́во, возсия́вшею, души́ моея́ зе́ницы просвети́, я́ко да прославля́ю Тя.

Пе́снь 3.

Ирмос: Не́сть свя́т, я́ко Госпо́дь, и не́сть пра́веден, я́ко Бо́г на́ш, Его́же пое́т вся́ тва́рь: не́сть пра́веден, па́че Тебе́, Го́споди.

Припев: Святии мученицы, молите Бога о нас.

Огне́м разжига́яся любве́ Христо́вы, огни́ще погаси́л еси́, му́чениче Ага́пие, идолонеи́стовства тече́ньми крове́й твои́х, те́мже восхваля́ем тя́.

Припев: Святии мученицы, молите Бога о нас.

Ору́жия яви́стеся, посека́юще тмы́, блаже́ннии, де́монов благода́тию, и ны́не тма́м совокупи́стеся, ра́дующеся, мы́сленных си́л.

Сла́ва Отцу́ и Сы́ну и Свято́му Ду́ху:

Пу́ть соверши́вше муче́ния му́жески, отложе́нием те́ла Вы́шнее постиго́сте Ца́рство, в не́мже стяжа́сте, му́ченицы боже́ственнии, житие́.

И ны́не и при́сно и во ве́ки веко́в. Ами́нь.

Богородичен: Подо́бием пло́ти я́вльшагося из Твоего́ светоно́снаго чре́ва, Зижди́теля позна́хом, за милосе́рдие ми́лости, на́м, пою́щим Тя́, Ма́ти Присноде́во.

Пе́снь 4.

Ирмос: Из горы́ приосене́нныя, Сло́ве, проро́к, еди́ныя Богоро́дицы, хотя́ща воплоти́тися, богови́дно усмотри́, и со стра́хом славосло́вяше си́лу Твою́.

Припев: Святии мученицы, молите Бога о нас.

Вельми́ Христа́, Ага́пие, возлюби́в, страсте́м Того́ му́жески уподо́бился еси́, заколе́н бы́в, я́ко а́гнец, во́лею, великому́чениче досточу́дне.

Припев: Святии мученицы, молите Бога о нас.

Мечу́ себе́ са́ми вда́вше вседу́шно, му́ченицы му́дрии, кропле́нии крове́й обагри́сте ри́зу, в ню́же оде́явшеся, на небесе́х живе́те.

Сла́ва Отцу́ и Сы́ну и Свято́му Ду́ху:

О, ва́шея к Бо́гу те́плыя любве́! Ея́же ра́ди себе́ са́мых отверго́стеся до конца́ и, ну́жднейшую сме́рть подъе́мше, безсме́ртия сподо́бистеся.

И ны́не и при́сно и во ве́ки веко́в. Ами́нь.

Богородичен: Мѵ́ро во чре́ве Сло́ва прия́ла еси́, нескве́рная Чи́стая, ве́сь ми́р от злосмра́дия очи́стившаго вся́ких согреше́ний. Те́м ве́рно Тя́ ублажа́ем.

Пе́снь 5

Ирмос: От но́щи неве́дения богове́дением просвети́вый концы́, просвети́ мя́ у́тром человеколю́бия Твоего́, Го́споди.

Припев: Святии мученицы, молите Бога о нас.

Любо́вен дея́нием, я́коже и зва́нием бы́в, сла́вне, пострада́л еси́ за любо́вь Всецаря́, Христа́ Бо́га на́шего.

Припев: Святии мученицы, молите Бога о нас.

Глаго́л лю́таго мучи́теля попра́сте, святи́и му́ченицы, и, Христу́ вво́инившеся, полки́ де́монския погуби́сте.

Сла́ва Отцу́ и Сы́ну и Свято́му Ду́ху:

Свяще́нными по́двиги низлага́юще беззако́нных де́рзость, венце́м безсме́ртия, му́ченицы Христо́вы, увязо́стеся.

И ны́не и при́сно и во ве́ки веко́в. Ами́нь.

Богородичен: Песносло́вии боже́ственными Богоро́дицу, ве́рнии, ублажи́м, ра́дуйся, — глаго́люще, — две́рь, е́юже еди́н про́йде Госпо́дь.

Пе́снь 6.

Ирмос: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Припев: Святии мученицы, молите Бога о нас.

Со Алекса́ндрома двема́, Диони́сия два́ воспои́м, Ага́пия сла́внаго, Тимола́я и Роми́ла, кре́пко пострада́вшия и тмы́ вра́жия пора́товавшия.

Припев: Святии мученицы, молите Бога о нас.

Исцеле́ний ре́ки источа́юще, му́ченицы, стра́сти земноро́дных боже́ственне очища́ете. Сего́ ра́ди, ра́дующеся, ва́ша ве́рою восхваля́ем до́блести.

Сла́ва Отцу́ и Сы́ну и Свято́му Ду́ху:

Зако́нно свяще́нный по́двиг соверши́вше, зако́нно вседе́тельною дла́нию венча́стеся, седмочи́сленнии му́ченицы, небе́снии гра́ждане, Ангелом равностоя́телие.

И ны́не и при́сно и во ве́ки веко́в. Ами́нь.

Богородичен: Увяди́вшая сады́ безбо́жия, Всенепоро́чная, Твои́м святы́м прозябе́нием, прозя́бающую во мне́ вы́ну вра́жию зло́бу искорени́, Богоневе́сто.

Седа́лен, гла́с 8.

Седмочи́сленный ли́к святы́х му́ченик пострада́ кре́пко за Боже́ственную Тро́ицу, погуби́ мно́жества мы́сленных вра́г благода́тию и совокупи́шася тма́м небе́сных умо́в ду́хом. Те́х моли́твами уще́дри на́с, Человеколю́бче.

Пе́снь 7.

Ирмос: От Иуде́и доше́дше, о́троцы в Вавило́не иногда́, ве́рою тро́ическою пла́мень пе́щный попра́ша, пою́ще: отце́в Бо́же, благослове́н еси́.

Припев: Святии мученицы, молите Бога о нас.

Са́ми себе́ во́льно к заколе́нию, я́ко а́гнцы, преда́сте, не убоя́вшеся му́к, всехва́льнии ору́жницы, но благоду́шно взыва́юще: оте́ц на́ших Бо́же, благослове́н еси́.

Припев: Святии мученицы, молите Бога о нас.

Просве́щся любо́вию все́х Влады́ки, му́чениче Ага́пие, подклони́л еси́ вы́ю мечу́ и му́чеников счи́слился еси́ во́инству, взыва́я: оте́ц на́ших Бо́же, благослове́н еси́.

Сла́ва Отцу́ и Сы́ну и Свято́му Ду́ху:

Яко свети́льник, зрите́ся в дому́ Госпо́дни, му́ченицы сла́внии, седмосте́бленный, ми́р просвеща́ющий, вопию́ще, сия́нием благода́ти: оте́ц на́ших Бо́же, благослове́н еси́.

И ны́не и при́сно и во ве́ки веко́в. Ами́нь.

Богородичен: Свя́зана мя́ плени́цами несказа́нных прегреше́ний, разреши́, Всенепоро́чная, подаю́щи ми́ ту́чи сле́з, песнопою́щу из Тебе́ Возсия́вшему: оте́ц на́ших Бо́же, благослове́н еси́.

Пе́снь 8.

Ирмос: На горе́ святе́й просла́вльшася, и в купине́ огне́м Присноде́вы Моисе́ови та́йну я́вльшаго, Го́спода по́йте и превозноси́те во вся́ ве́ки.

Припев: Святии мученицы, молите Бога о нас.

Вра́чеве разли́чных неду́гов рукоде́йством Ду́ха показа́вшеся, вся́ на́ша неду́ги исцели́те, я́ко да восхваля́ем и славосло́вим ва́шу боже́ственную па́мять.

Припев: Святии мученицы, молите Бога о нас.

Возлюби́л еси́ Бо́га, от Того́, му́чениче, возлюби́лся еси́. Те́мже тя́, по́двиг боже́ственный соверши́вша, приве́д со единоревни́тели в небе́сныя, Ага́пие, черто́ги.

Сла́ва Отцу́ и Сы́ну и Свято́му Ду́ху:

Укре́пльшеся любо́вию Влады́ки, наси́лование низложи́сте преле́стника и, благосла́вно побе́дами украша́еми, в небе́сных, му́ченицы Госпо́дни, живете́ поко́ищах.

И ны́не и при́сно и во ве́ки веко́в. Ами́нь.

Богородичен: Исцели́ стра́сти се́рдца моего́, безстра́стия исто́чника ро́ждшая, и к животу́ мя́ Боже́ственному наста́ви, да Тя́ сла́влю, Ма́терь Спа́сову, во вся́ ве́ки.

Песнь 9

Ирмос: Вои́стинну Богоро́дицу, Тя́ испове́дуем, спасе́ннии Тобо́ю, Де́во Чи́стая, с безпло́тными ли́ки Тя́ велича́юще.

Припев: Святии мученицы, молите Бога о нас.

Кра́сни бы́вше боже́ственными благоле́потами муче́ния, Го́сподеви предстоите́ и с Ни́м, страстоте́рпцы, при́сно веселите́ся.

Припев: Святии мученицы, молите Бога о нас.

Во́инство Ангельское ва́с прие́млет, распря́гшияся теле́с, му́ченицы, к небе́сному гра́ду, к Све́ту невече́рнему.

Сла́ва Отцу́ и Сы́ну и Свято́му Ду́ху:

На́с, соверша́ющих дне́сь па́мять свяще́нную ва́шу, му́ченицы сла́внии, к Бо́гу помина́ти не преста́ните.

И ны́не и при́сно и во ве́ки веко́в. Ами́нь.

Богородичен: Све́том мя́ покая́ния, помраче́ннаго небреже́нием, Всенепоро́чная, просвети́, я́ко да пою́ и сла́влю вели́чия Твоя́.

Молитва

Святи́и му́ченицы Христовы! При́зрите с Небе́снаго черто́га на тре́бующих ва́шей по́мощи и не отве́ргните проше́ний на́ших; но я́ко при́снии благоде́тели и хода́таи на́ши, моли́те Христа́ Бо́га, да человеколюби́в и многоми́лостив сый, сохрани́т нас от вся́каго лю́таго обстоя́ния: от тру́са, пото́па, огня́, меча́, наше́ствия иноплеме́нников и междоусо́бныя бра́ни. Да не осу́дит нас гре́шных по беззако́ниям на́шим, и да не во зло обрати́м блага́я, да́руемая нам от всеще́драго Бо́га, но во сла́ву свята́го и́мени Его́ и в прославле́ние кре́пкаго ва́шего заступле́ния. Да моли́твами ва́шими даст нам Госпо́дь мир по́мыслов, воздержа́ние от па́губных страсте́й и от вся́кия скве́рны; и да укрепи́т во всем ми́ре Свою́ еди́ну Святу́ю, Собо́рную и Апо́стольскую Це́рковь, ю́же стяжа́л есть честно́ю Свое́ю кро́вию. Моли́теся приле́жно, святи́и му́ченицы, да утверди́т Христо́с Бог во Святе́й Свое́й Правосла́вной Це́ркви живы́й дух пра́выя ве́ры и благоче́стия; да вси чле́ны ея́, чи́стии от суему́дрия и суеве́рия, ду́хом и и́стиною покланя́ются Ему́ и усе́рдно пеку́тся о соблюде́нии Его́ за́поведей; да мы вси в ми́ре и благоче́стии поживе́м в настоя́щем ве́це и дости́гнем блаже́нныя ве́чныя жи́зни на Небеси́, благода́тию Го́спода на́шего Иису́са Христа́, Ему́же подоба́ет вся́кая сла́ва, честь и держа́ва со Отце́м и Святы́м Ду́хом, ны́не и при́сно и во ве́ки веко́в. Ами́нь.