25 марта.

Канон второй преподобному Симеону Новому Богослову.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 3:

Боже́ственное озаре́ние, Симео́не о́тче,/ восприя́в в души́ твое́й,/ свети́ло в ми́ре показа́лся еси́ светле́йшее,/ разгоня́я того́ мракобе́сие/ и всех уверя́я иска́ти, ю́же погуби́ша, благода́ть Ду́ха,/ Его́же приле́жно моли́/ дарова́ти нам ве́лию ми́лость.

Тропа́рь, гла́с 1:

Вне́шния му́дрости пребыва́я неприча́стен,/ Боже́ственныя же преиспо́лнен был еси́ последи́/ и Но́вый Богосло́в вои́стинну все́ми позна́ся, Симео́не./ Сего́ ра́ди твою́ па́мять, о́тче му́дре, почита́юще, тебе́ вопие́м:/ Сла́ва тя просла́вльшему Христу́,/ Сла́ва тя ди́вна Показа́вшему,/ Сла́ва Де́йствующему тобо́ю всем исцеле́ния.

Кано́н иной, молебный. Гла́с 8.

Пе́снь 1.

Ирмос: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца спа́се,/ пе́снь Бо́гови воспева́юща.

Припев: Преподобне о́тче Симео́не, моли Бога о нас.

Тро́ице Свята́я и Еди́нице Присносу́щная,/ Светотво́рный Исто́чниче, от Него́же вся́ко дая́ние бла́го низхо́дит,/ просвети́ се́рдце мое́, я́ко да воспою́ досто́йно/ пра́во о Тебе́ учивша и богосло́вивша добре́йше.

Припев: Преподобне о́тче Симео́не, моли Бога о нас.

Вся глубины́ Свята́го Ду́ха в Боже́ственном Ду́се испыта́в, о́тче,/ си́ми потопле́н не был еси́, присносла́вне,/ но, обре́т би́серы многоце́нныя, изве́л еси́ Богосло́вия догма́ты.

Сла́ва Отцу́ и Сы́ну и Свято́му Ду́ху:

Зерца́ло, о́тче, пресве́тлое новоочище́нное соде́лав ум и се́рдце,/ бога́тно ты восприя́л еси́ мо́лнии Ду́ха и блаже́н яви́ся,/ Бо́га бо в се́рдце твое́м узре́л еси́, я́коже сам пове́даеши.

И ны́не и при́сно и во ве́ки веко́в. Ами́нь.

Богородичен: Ты яви́лася еси́, Де́во, о́браз Богоизвая́нный,/ украше́ние тва́ри, чу́до А́нгелов,/ подо́бие изнача́льныя добро́ты, всесли́чное вещество́ Сло́ва воплоще́ния и Бо́га неподража́емое подража́ние.

Пе́снь 3.

Ирмос: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.

Припев: Преподобне о́тче Симео́не, моли Бога о нас.

Ле́ствица показа́лся еси́ ты пе́сненная, прему́дре, кни́гою твое́ю вопия́/ и воззва́ние Боже́ственныя благода́ти сла́дкое,/ я́ко ве́сну, явля́я, ю́же по креще́нии, – увы́! – погуби́хом.

Припев: Преподобне о́тче Симео́не, моли Бога о нас.

Тебе́ распя́ся мир, о Симео́не преподо́бне, дея́нием,/ и ты, о́тче, ми́ру распя́лся еси́ му́дре умо́м,/ сугу́бое бо креста́ е́сть дея́ние, я́коже отцы́ глаго́лют сие́ преподо́бнии.

Сла́ва Отцу́ и Сы́ну и Свято́му Ду́ху:

С лучи́ Боже́ственными обща́яся, преподо́бне,/ и́миже естество́м прихо́дит тебе́ вся́ческих открове́ние,/ да́льняя зре́л еси́, я́коже зде су́ща, треблаже́нне,/ и, я́коже настоя́ща, – последи́ иму́щая бы́ти.

И ны́не и при́сно и во ве́ки веко́в. Ами́нь.

Богородичен: Я́коже коры́сть и сокро́вище обреты́й весели́тся,/ си́це обре́тше и аз, Де́во, Твое́ Боже́ственное и́мя/ и о́браз Твой, я́коже многоце́нное бога́тство,/ ра́дуюся, имену́я Тя и целу́я.

Седа́лен, гла́с 4.

От Богоно́сных еди́н и и́стинен явля́яся,/ от богосло́вов же тре́тий сый/ и от преподо́бных еди́н и ве́лий ты бы́сть/ ме́рностию, любо́вию соверше́нною, Симео́не Богому́дре, и чистото́ю вся́ческою,/ и си́ми вся́ческими доброде́тельми, и́миже возвы́сился еси́ ко Го́споду, преподо́бне.

Сла́ва, и ны́не, Богородичен:

Не умолчи́м никогда́, Богоро́дице,/ си́лы Твоя́ глаго́лати, недосто́йнии,/ а́ще бо Ты не бы предстоя́ла моля́щи,/ кто бы нас изба́вил от толи́ких бед,/ кто же бы сохрани́л доны́не свобо́дны?/ Не отсту́пим, Влады́чице, от Тебе́,/ Твоя́ бо рабы́ спаса́еши при́сно от вся́ких лю́тых.

Пе́снь 4.

Ирмос: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче.

Припев: Преподобне о́тче Симео́не, моли Бога о нас.

Ты, обре́т Со́лнце ино́е, мы́сленное, в се́рдце и пу́ть соде́яв све́том Его́,/ дости́гл еси́, му́дре, Ду́ха си́лою гор преми́рных,/ и слы́шал, и ви́дел еси́,/ я́же не ле́ть су́ть слы́шати и ви́дети стра́стному ко́ему челове́ку.

Припев: Преподобне о́тче Симео́не, моли Бога о нас.

Иису́с тебе́ Еди́н бя́ше при́сно попече́ние,/ пи́ща язы́ка, се́рдца поуче́ние, дыха́ние, живо́т,/ Свет и сла́дость сладча́йшая,/ теплота́, просвеща́ющая помышле́ние, веселя́щая се́рдце,/ попаля́ющая стра́сти и слез источа́юща то́ки.

Сла́ва Отцу́ и Сы́ну и Свято́му Ду́ху:

Что ми зла́то, что ми ка́мень сапфи́р,/ что ми ина́го живота́ вожделе́ние?/ Мне пи́ща, сла́ва и весе́лие Богодухнове́нная твоя́ су́ть списа́ния, о́тче,/ в ни́хже наслажда́юся и, сия́я, источа́ю от оче́с сладча́йшия сле́зы.

И ны́не и при́сно и во ве́ки веко́в. Ами́нь.

Богородичен: О Мариа́м, мировожделе́нное и́мя!/ Ты, Де́во, посреде́ Бо́га стои́ши и челове́ков,/ и у́бо Бо́га соде́лала еси́ Челове́ка, челове́ки же – бо́ги благода́тию./ Благодари́м, Де́во, посре́дство Твое́ сие́, и́мже ве́сь мир спасла́ еси́.

Пе́снь 5

Ирмос: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя е́сть чужда́я тьма́, окая́ннаго?/ Но обрати́ мя и к све́ту за́поведей Твои́х/ пути́ моя́ напра́ви, молю́ся.

Припев: Преподобне о́тче Симео́не, моли Бога о нас.

О, мно́гаго дерзнове́ния, и́мже ко Влады́це всех обогати́лся еси́,/ ты бо, я́коже дру́гу, собесе́довал еси́ Ему́ в се́рдце твое́м/ и, я́коже отце́м ча́до обнимаемое, возглаша́л еси́:/ Иису́се, Иису́се мой сладча́йший!

Припев: Преподобне о́тче Симео́не, моли Бога о нас.

Бо́жия быв уста́, я́коже Бо́жии словеса́ глаго́ля, блаже́нне,/ ты бо Богодухнове́нными уче́ньми твои́ми и словесы́/ изве́л еси́ от недосто́йных мно́жество честны́х/ и досто́йны Небе́снаго Ца́рствия яви́л еси́.

Сла́ва Отцу́ и Сы́ну и Свято́му Ду́ху:

Ка́ко изреку́ ве́лие на тебе́ бы́вшее чу́до благода́ти?/ Ты бо свет сый, Свет зря и Све́ту совокупля́яся,/ во све́те и глаго́леши, и му́дрствуеши, и составля́еши списа́ния твоя́ светообра́зная.

И ны́не и при́сно и во ве́ки веко́в. Ами́нь.

Богородичен: И́маши, Влады́чице ми́ра, и́маши во́лею Твое́ю си́лу сопу́тствующую,/ я́ко еди́на ро́ждшая всеси́льнаго Сло́ва и Го́спода./ Те́мже, а́ще то́кмо восхоте́ла ми еси́ спасти́ся,/ легко́ аз, Де́во, спасу́ся.

Пе́снь 6.

Ирмос: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.

Припев: Преподобне о́тче Симео́не, моли Бога о нас.

Ду́ха Боже́ственную благода́ть, преподо́бне о́тче, в се́рдце, я́ко исто́чник, стяжа́в,/ и во́ды живы́я Богому́дрия пото́ки источи́л еси́,/ и бразды́ душе́вныя, жа́ждею истоще́нный, напои́л еси́.

Припев: Преподобне о́тче Симео́не, моли Бога о нас.

Даде́ся ти и чуде́с си́ла, и исцеле́ний благода́ть, о о́тче,/ я́ко да ничи́мже ме́ньше бу́деши святы́х,/ те́мже, и живы́й, и уме́рый, твори́л еси́ чудеса́ мно́га, му́дре,/ и исцеле́ния си́лою Ду́ха.

Сла́ва Отцу́ и Сы́ну и Свято́му Ду́ху:

Удивля́хуся лю́дие, слу́шающе му́дрость слове́с твои́х,/ и, я́коже иногда́ иуде́е вопия́ху о Христе́,/ си́це си́и, о́тче, взыва́ху:/ благода́ть слове́с мно́гая и му́дрость ему́ отку́ду даде́ся?

И ны́не и при́сно и во ве́ки веко́в. Ами́нь.

Богородичен: Ру́це Твои́ и сосцы́, о Влады́чице, Сы́ну Твоему́ хода́тайствующи, яви́,/ совокупи́ с Твои́ми, Де́во, страда́ньми О́наго крест, и копие́, и я́звы, и тро́сть,/ и та́ко уми́лостиви Его́ к нам, мно́го согреши́вшим.

Конда́к, гла́с 3.

Све́том просвеще́н Трисо́лнечным, Богому́дре,/ Богосло́в яви́лся еси́ Пребоже́ственныя Тро́ицы./ Свы́ше прему́дростию слове́с обогати́вся,/ источи́л еси́ Богому́дрия Боже́ственныя струи́,/ от ни́хже пию́ще, вопие́м:/ ра́дуйся, треблаже́нне Симео́не Богонауче́нне.

Икос:

Пресвяты́й Дух, И́же пре́жде ры́бари некни́жныя умудри́/ и ри́торы и Богосло́вы их показа́,/ Той и в после́дняя времена́, в чи́стей твое́й душе́ всели́вся, Симео́не святе́йший,/ ри́тора ри́торов и Богосло́ва тя прему́дра из некни́жнаго и нему́драго соде́ла,/ добропи́шуща и ди́вно излага́юща догма́ты пресу́щественнаго Богосло́вия/ и та́инства Боже́ственнаго Све́та/ и я́же в души́ та́йно быва́ющая разли́чная де́йства Боже́ственныя благода́ти Свята́го Ду́ха,/ и́хже и мы чте́ния наслажда́ющеся, тя ублажа́ем, достоблаже́ннейше о́тче,/ я́ко преесте́ственна и Небе́сна челове́ка,/ и, святы́й пра́здник твой любо́вию соверша́юще, согла́сно вопие́м:/ ра́дуйся, треблаже́нне Симео́не преподо́бне.

Пе́снь 7.

Ирмос: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще:/ отце́в Бо́же, благослове́н еси́.

Припев: Преподобне о́тче Симео́не, моли Бога о нас.

Не памятозло́бив показа́лся еси́, христоподража́телен ве́сь и тиша́йший,/ враги́ бо, о́тче, и́же тя уби́ти иска́ху, благоде́тельствовал еси́ всегда́,/ до́ндеже их дарми́ дру́ги себе́ соде́лал еси́.

Припев: Преподобне о́тче Симео́не, моли Бога о нас.

Ты, ключе́й обогати́вся, Писа́ний Ду́ха благода́тию, преподо́бне,/ егда́ восхоте́л еси́, о́тче, отве́рзл еси́ нетру́дно/ и сло́вом показа́л еси́ сокро́вище Писа́ний утае́нное.

Сла́ва Отцу́ и Сы́ну и Свято́му Ду́ху:

Ты, очи́стив те́ло от страсте́й, треблаже́нне,/ ду́шу же свободи́в сладостра́стия и ум от пристра́стия,/ мертв был еси́ те́лом и пре́жде сме́рти плотски́я ду́хом воскреси́л еси́.

И ны́не и при́сно и во ве́ки веко́в. Ами́нь.

Богородичен: Боже́ственных сия́ний неистощи́мый исто́чник Ты, Де́во, была́ еси́,/ глуби́н сокрове́нных и непостижи́мости Бо́жия явле́ние/ и избра́нное Бо́гом пре́жде век наме́рение.

Пе́снь 8.

Ирмос: Седмери́цею пе́щь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

Припев: Преподобне о́тче Симео́не, моли Бога о нас.

Жела́ния Боже́ственная име́л еси́ в се́рдце твое́м, свя́те,/ я́же су́ть Бо́га Свет неизрече́нный,/ отону́дуже Богоприя́тен и обоже́н ве́сь был еси́,/ ве́сь пребыва́я в Возлю́бленном от Тебе́,/ и страстьми́ стражда́ Боже́ственныя одержи́мости и изступле́ния,/ и стиха́ми пе́сни любве́ спису́я.

Припев: Преподобне о́тче Симео́не, моли Бога о нас.

Тро́йчески узре́л еси́ Тро́ицу несозда́нную –/ Ум, Сло́во и Дух – умо́м, сло́вом и ду́хом,/ Еди́ницу же а́бие едини́чне воспе́л еси́,/ соедини́в воеди́но ум твой, сло́во и дух,/ и естество́м был еси́ по о́бразу Бо́жию,/ хоте́нием же показа́лся еси́ по подо́бию, о́тче.

Сла́ва Отцу́ и Сы́ну и Свято́му Ду́ху:

Глубины́ смире́ния дости́гл еси́, приснопа́мятне,/ е́же Сам Дух сотвори́ во утро́бе твое́й,/ отту́ду сподо́бился еси́ на высоту́ соверше́нства взы́ти, му́дре, ели́ко возмо́жно челове́ком,/ и Ду́ха испо́лнитися дарова́ний разли́чных,/ и А́нгел яви́тися, я́ко безпло́тный, во пло́ти.

И ны́не и при́сно и во ве́ки веко́в. Ами́нь.

Богородичен: Но́щь греха́ отвсю́ду обы́де мя, окая́ннаго,/ просвеще́ние бо бы́ти пи́щу непщева́х,/ отону́дуже измени́хся недо́брым измене́нием, к те́мным приходя́ деяниям./ Свет ро́ждшая, просвети́ мя, Де́во,/ и Боже́ственным измене́нием измени́ мя всего́.

Песнь 9

Ирмос: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бы́сть простра́ннейшее Небе́с/ Тем Тя, Богоро́дицу,/ А́нгелов и челове́к чинонача́лия велича́ют.

Припев: Преподобне о́тче Симео́не, моли Бога о нас.

Неве́сте Царя́ Христа́ – Це́ркви, му́дре, твоя́ словеса́ оста́вил еси́,/ я́ко невестину красну́ и пе́стру ри́зу,/ я́ко златоби́серный вене́ц, и сосу́д, и ковче́г,/ я́ко ого́рлицы же, и гри́вны, и пе́рстни, и ушеря́зи.

Припев: Преподобне о́тче Симео́не, моли Бога о нас.

Чин преступи́л еси́ ра́бский и нае́мников да́же превозше́л еси́/ и, я́коже сын отцу́, ны́не предстои́ши Христу́,/ и́скренний и и́стинный, зря́щий и зри́мый от Него́, обожа́емь несре́дственне,/ Христу́ сонасле́дник и насле́дник Бо́жий, свя́те.

Сла́ва Отцу́ и Сы́ну и Свято́му Ду́ху:

Вем, я́ко не сме́ет язы́к восхвали́ти тя, Симео́не,/ бо́га по благода́ти су́ща./ Но па́ки вем, я́ко твое́ человеколю́бие прие́млет и еди́ное наме́рение души́./ Сего́ ра́ди приими́ моя́ сия́ пе́ния, треблаже́нне,/ я́коже оте́ц отроча́те косноязы́чия.

И ны́не и при́сно и во ве́ки веко́в. Ами́нь.

Богородичен: Уте́шительницу предлага́ем к Бо́гу Тя, Де́во, раби́ Твои́ вси,/ те́мже, Чи́стая, моли́тву принеси́ Твоему́ Сы́ну, Отцу́ же и Ду́ху,/ Еди́ному всех Творцу́, Тро́ице Святе́й,/ я́ко да нас уще́дрит и спасе́т, всего́ ми́ра Спаси́тельнице.

Молитва:

О, богоно́сный и христоно́сный и духоно́сный о́тче Симео́не, Но́вый Богосло́ве, преподо́бных похвало́, иерее́в сла́во, богосло́вов услажде́ние, моли́твы у́мныя учи́телю, Бо́га просла́вльший и от Бо́га просла́вленный в житии́ твое́м, па́че же по сме́рти, земны́й а́нгеле и небе́сный челове́че, ра́досте духо́вная и душе́вное весе́лие нам, смире́нным твои́м рабо́м и недосто́йным твои́м сыно́м, со благогове́нием и любо́вию пра́зднующим свяще́нную и светоно́сную па́мять твою! Приими́ песнь сию́, ю́же прино́сим ти я́ко да́р ничто́жный и мале́йший, за вели́кия благода́тныя да́ры, и́хже вси́ наслади́хомся, прие́мше я́ от тебе́, из кни́ги свяще́нных слове́с твои́х, и не отве́ржи сию́, я́ко твоего́ великоле́пия недосто́йну: отню́д бо не́мощни есмы́, е́же досто́йно восхвали́ти тя, толи́каго богосло́ва ве́лия. И в житии́ сем сохраня́й нас моли́твами твои́ми от вся́каго вре́да душе́внаго и теле́снаго, ви́димых же и неви́димых враг, моля́ непреста́нно И́же в Тро́ице Бо́га, да сподо́бит и нас, смире́нных, та́инственно ощути́ти посреде́ се́рдца на́шего у́мная де́йства боже́ственныя благода́ти Свята́го Ду́ха, ю́же погуби́хом, увы! нераде́нием на́шим и страстьми́; в бу́дущем же ве́це изба́ви ны твои́ми си́льными хода́тайствы от стра́шнаго осужде́ния и му́ки ве́чныя, и сподо́би на́с ве́чнаго блаже́нства во Христе́ Иису́се, Го́споде на́шем, Ему́же подоба́ет вся́кая сла́ва, че́сть и поклоне́ние, со безнача́льным Его́ Отце́м и Пресвяты́м и Животворя́щим Его́ Ду́хом, ны́не и при́сно и во ве́ки веко́в. Аминь.