25 марта.

Канон святителю Григорию Двоеслову, папе Римскому.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Стихи́ры, гла́с 1:

Что́ тя́ нарече́м, Григо́рие? Милосе́рдия ли исто́чник, я́ко не иму́щим и бе́дным яви́лся еси́ благотвори́тель, и в ну́ждах ско́рый помо́щник, сего́ ра́ди и в ли́це святы́х жи́ти сподо́бился еси́. Моли́ся о душа́х на́ших.

Сти́х: Уста́ моя́ возглаго́лют прему́дрость, и поуче́ние се́рдца моего́ ра́зум.

Что́ тя́ возымену́ем, сла́вне? Кро́тостию бо украси́лся еси́, я́ко мно́жицею на трапе́зе посажда́я стра́нных и ни́щих, са́м служи́тель и́м показа́лся еси́, те́мже и сподо́бился еси́ насле́дник бы́ти в земли́ кро́тких, и прише́л еси́ в поко́й несконча́емый, в Ца́рство небе́сное.

Сти́х: Уста́ пра́веднаго поуча́тся прему́дрости, и язы́к его́ возглаго́лет су́д.

Ве́сь богоно́сец показа́ся, Григо́рие, язы́ком у́бо боже́ственная явля́я, де́лом же творя́ запове́данная Спа́сом, и́ноческие уста́вы преше́л еси́, име́ния твоя́ Бо́гу предпосла́в, чистоту́ и смире́ние возлюби́в, в нерукотворе́нных оби́телех всели́лся еси́, о́тче, во ве́ки.

Сла́ва, гла́с 2:

Пра́вило ве́ры и о́браз кро́тости тя́ позна́хом, о́тче святи́телю Григо́рие, и чистоты́ рачи́теля и столпа́ Правосла́вия, Ангелом единонра́вна и моли́твенника о душа́х на́ших.

И ны́не, гла́с то́йже:

О, чудесе́ но́ваго, все́х дре́вних чуде́с! Кто́ бо позна́ Ма́терь, без му́жа ро́ждшую и на руку́ нося́щую всю́ тва́рь Содержа́щаго? Бо́жие е́сть изволе́ние Ро́ждшееся. Его́же я́ко Младе́нца, Пречи́стая, Твои́ма рука́ма носи́вшая, и ма́тернее дерзнове́ние к Нему́ иму́щая, не преста́й моля́щи о чту́щих Тя́, уще́дрити и спасти́ ду́ши на́ша.

Тропа́рь, гла́с 1:

Ми́лости и благоутро́бия сокро́вище, е́же все́м отве́рзл еси́, правове́рия учи́телю и архиере́ов Боже́ственное удобре́ние, о́тче святи́телю Григо́рие, ни́щих бы́л еси́ засту́пник. Те́м моли́ Христа́ Бо́га, спасти́ся душа́м на́шим.

Кано́н святи́теля, гла́с 2.

Пе́снь 1.

Ирмос: Гряди́те лю́дие, пои́м пе́снь Христу́ Бо́гу, разде́льшему мо́ре и наста́вльшему лю́ди, я́же изведе́ из рабо́ты еги́петския, я́ко просла́вися.

Припев: Святителю отче Григорие, моли Бога о нас.

До́браго ко́рене свяще́нная розга́ бы́л еси́, житие́м, ве́рою и любо́вию процве́л еси́, и насле́дник небе́снаго ца́рствия яви́лся еси́.

Припев: Святителю отче Григорие, моли Бога о нас.

Венце́м смире́ния, а́ки не́коею дража́йшею у́тварию украси́лся еси́, вся́ мирска́я возненави́дев Христа́ ра́ди, и убо́гих возлюби́в, Ца́рство небе́сное насле́довал еси́.

Сла́ва Отцу́ и Сы́ну и Свято́му Ду́ху:

Аще в ю́ностнем телеси́ у́м соверше́н стяжа́л еси́, бога́тство твое́ не на украше́ние су́етное, но на созида́ние оби́телей, и учрежде́ние убо́гих и стра́нных истощи́л еси́, те́м и Христо́с украси́ тя́ нетле́нием.

И ны́не и при́сно и во ве́ки веко́в. Ами́нь.

Богородичен: Кто́ досто́йно изочте́т вели́чия чуде́с Твои́х, Богоблагода́тная, я́ко родила́ еси́ Еди́наго от Тро́ицы, Христа́ Бо́га на́шего, Его́же моли́ спасти́ся на́м.

Пе́снь 3.

Ирмос: Процвела́ е́сть пусты́ня я́ко кри́н Го́споди, язы́ческая неплодя́щая це́рковь, прише́ствием Твои́м, в не́йже утверди́ся мое́ се́рдце.

Припев: Святителю отче Григорие, моли Бога о нас.

Процве́л еси́ Дави́дски, святи́телю, в житии́ твое́м, егда́ Ангелу Бо́жию во о́бразе навкли́ра три́жды в еди́н де́нь ми́лостыню пода́л еси́, и́же пребы́сть с тобо́ю во вся́ дни́ живота́ твоего́.

Припев: Святителю отче Григорие, моли Бога о нас.

Толи́каго ра́ди нестяжа́ния и кра́йняго к убо́гим милосе́рдия, Госпо́дь нарече́ тя́ первопресто́льника Це́ркве Своея́, и наме́стника верхо́внаго Своего́ апо́стола Петра́, с ни́мже моли́ся о на́с, свя́те Григо́рие.

Сла́ва Отцу́ и Сы́ну и Свято́му Ду́ху:

Боже́ственным озаря́емь све́том, на престо́ле святи́тельстем се́д, лю́ди благоразу́мием упа́сл еси́, науча́я я́ правосла́вным догма́там, Христу́ приве́л еси́. Но и на́с не забу́ди, святи́телю, присеща́я святы́ми твои́ми моли́твами.

И ны́не и при́сно и во ве́ки веко́в. Ами́нь.

Богородичен: Безсе́менно во чре́ве Бо́га зачала́ еси́, и ражда́еши несказа́нно воплоще́нна, на Него́же зре́ти не сме́ют, Чи́стая, небе́сныя си́лы, Присноде́во.

Седа́лен, гла́с 6:

Аще у́бо Дави́д глаго́лет: блаже́н разумева́яй на ни́ща и убо́га; то кольми́ па́че блаже́н еси́ ты́, святи́телю Григо́рие, я́ко убо́гим и стра́нным име́ние твое́ расточи́л еси́, того́ ра́ди Ангелы и Самаго́ Христа́ Го́спода прия́ти и на трапе́зе твое́й учреди́ти сподо́бился еси́, но помина́й на́с, мо́лим тя́, во святы́х твои́х моли́твах, и́хже досто́йно ны́не прино́сиши Го́споду.

Сла́ва, и ны́не, Богородичен:

Не́бо небеси́ не довле́ет Тебе́, Влады́ко, но на́с ра́ди обнища́в всели́лся еси́ во утро́бу смиренному́дрыя Твоея́ Ма́тере, Ея́ же мольбы́ приими́ о на́с, Го́споди, и поми́луй ны́.

Пе́снь 4.

Ирмос: Услы́шах, Го́споди, слу́х Твоего́ смотре́ния, и просла́вих Тя́, Еди́не Человеколю́бче.

Припев: Святителю отче Григорие, моли Бога о нас.

Кра́йним милосе́рдием, свя́те, стяжа́л еси́ некра́домое бога́тство, я́ко не су́щу ти́ еще́ во святи́тельстве, мно́гая во оби́тели твое́й чудеса́ соде́лал еси́.

Припев: Святителю отче Григорие, моли Бога о нас.

Бо́жиим нарече́нием избра́н бы́л еси́ па́пою, но скры́лся еси́ в пусты́нныя места́, убега́я то́ль высо́каго са́на и почита́ния челове́ческаго, Бо́жиим же про́мыслом показа́ся то́ ме́сто, на не́м же бы́л еси́ в столпе́ о́гненне.

Сла́ва Отцу́ и Сы́ну и Свято́му Ду́ху:

Егда́ Бо́жиим изволе́нием прия́л еси́ святи́тельский са́н, усугу́бил еси́ попече́ние о ни́щих и убо́гих, его́же да стяжи́м и мы́, помоли́ся о на́с ко Го́споду.

И ны́не и при́сно и во ве́ки веко́в. Ами́нь.

Богородичен: Мо́лим Тя́, Чи́стая, Яже Бо́га безсе́менно заче́нши, при́сно моли́ти за рабы́ Твоя́.

Пе́снь 5

Ирмос: Све́та Пода́телю, и веко́в Тво́рче, Го́споди, во све́те Твои́х повеле́ний наста́ви на́с: ра́зве бо Тебе́, ино́го Бо́га не зна́ем.

Припев: Святителю отче Григорие, моли Бога о нас.

Восше́д на апо́стольский престо́л, я́ко свети́льник возсия́л еси́, свя́те Григо́рие, уче́нии я́же о Святе́й Тро́ице, Ейже ны́не моли́ся о чту́щих тя́.

Припев: Святителю отче Григорие, моли Бога о нас.

Не та́ко благоро́дством по пло́ти, я́коже смире́нием и милосе́рдием просия́л еси́, отону́дуже и даро́в невеще́ственных сподо́бился еси́.

Сла́ва Отцу́ и Сы́ну и Свято́му Ду́ху:

Ца́рства Христо́ва насле́дник потща́лся еси́ бы́ти, зла́та и сребра́ не пощади́л еси́ убо́гих ра́ди, и сего́ ра́ди восприе́млеши от Христа́ стокра́тное мздовоздая́ние.

И ны́не и при́сно и во ве́ки веко́в. Ами́нь.

Богородичен: Несказа́нно зача́тие и не пости́жен е́сть о́браз рожде́ния, Бо́га бо пло́тию родила́ еси́, и на рука́х Твои́х носи́ла, Ма́ти Де́во Пресвята́я, Его́же моли́ о воспева́ющих Тя́.

Пе́снь 6.

Ирмос: Бе́здна мя́ мно́га грехо́вная окружа́ет, и вопию́ Ти, проро́ка подража́яй: от тли́ мя́, Го́споди, возведи́.

Припев: Святителю отче Григорие, моли Бога о нас.

Бе́здну милосе́рдия, смире́ния ве́рх, и любве́ твоея́, свя́те Григо́рие, кто́ испове́сть, и́миже украси́л еси́ ду́шу твою́ для́ Ца́рства Христо́ва.

Припев: Святителю отче Григорие, моли Бога о нас.

Любвеоби́льный исто́чник в тебе́, о́тче показа́ся, егда́ не то́чию о приходя́щих к тебе́ милосе́рдовав, но и во Иерусали́ме странноприи́мницу созда́л еси́, да упоко́ятся стра́ннии и ни́щии.

Сла́ва Отцу́ и Сы́ну и Свято́му Ду́ху:

Тща́ние еди́но тебе́, о́тче, да не иму́щии пребу́дут безбе́дны, сего́ ра́ди в го́ру Сина́йскую, по вся́ ле́та живота́ твоего́, мно́гую на препита́ние и́ноком ми́лостыню посыла́л еси́.

И ны́не и при́сно и во ве́ки веко́в. Ами́нь.

Богородичен: Бе́здну милосе́рдия и неисчерпа́емый исто́чник бла́гости, позна́хом Тя́, Богома́ти Де́во Влады́чице, те́м Тя́ велича́ем.

Конда́к, гла́с 2:

Яко Петро́ва престо́ла наме́стника, столпа́ Правосла́вия и милосе́рдия исто́чник, святи́теля Григо́рия, ве́рнии вси́ восхва́лим, то́й у́бо язы́ком веща́я, де́лом же соверша́я Спа́сова глаго́лания, сего́ ра́ди и просла́вился еси́, я́ко боже́ственный таи́нник Бо́жия благода́ти.

Икос:

Не то́чию е́же стяжа́ти, но и своя́ име́ния со усе́рдием истощи́л еси́ на созида́ние оби́телей и дово́льствуя стра́нных и ни́щих, те́м Христо́с па́стыря и наме́стника Петро́ва престо́ла устроя́ет тя́, его́же нра́вы украси́лся еси́, и просла́вился еси́, я́ко боже́ственный таи́нник Бо́жия благода́ти.

Пе́снь 7.

Ирмос: Образу злато́му, на по́ле Деи́ре служи́му, трие́ Твои́ о́троцы небрего́ша безбо́жнаго веле́ния, посреде́ же огня́ вве́ржени, ороша́еми, поя́ху: благослове́н еси́, Бо́же оте́ц на́ших.

Припев: Святителю отче Григорие, моли Бога о нас.

Жену́, усумне́вшуюся о пречи́стых та́йнах Христо́вых, уве́рил еси́, претвори́в хле́б в ви́д са́маго и́стаго те́ла челове́ческаго, и па́ки претвори́в е́ в хле́б.

Припев: Святителю отче Григорие, моли Бога о нас.

Житие́м равноа́нгельным и ди́вными чудесы́ Це́рковь Христо́ву украси́л еси́, те́м лю́дие взыва́ху о тебе́: благослове́н Бо́г оте́ц на́ших.

Сла́ва Отцу́ и Сы́ну и Свято́му Ду́ху:

Ду́х Святы́й в ви́де голуби́не пока́зовашеся над тобо́ю, егда́, о́тче, писа́л еси́ боговдохнове́нныя твоя́ бесе́ды, и́хже с любо́вию наслажда́ющеся, взыва́ем: благослове́н Бо́г оте́ц на́ших.

И ны́не и при́сно и во ве́ки веко́в. Ами́нь.

Богородичен: Вся́кий ро́д и во́зраст чти́м Тебе́, Богороди́тельнице, и непреста́нно пое́м: благослове́н Бо́г оте́ц на́ших.

Пе́снь 8.

Ирмос: Неизрече́нною му́дростию соста́вльшаго вся́ческая Бо́га Сло́ва и от не су́щих во е́же бы́ти приве́дшаго, благослови́те, дела́, я́ко Го́спода, и превозноси́те во вся́ ве́ки.

Припев: Святителю отче Григорие, моли Бога о нас.

Бесе́ды твоя́ во умиле́ние, святи́телю, приво́дят чту́щих я́, я́коже бо река́ вели́кая очища́ет ае́р, та́ко и си́и отго́нят злосмра́дие от ду́ш на́ших, при́сно взыва́ющих: Го́спода по́йте и превозноси́те во вся́ ве́ки.

Припев: Святителю отче Григорие, моли Бога о нас.

Не то́чию препода́л еси́ Це́ркве Христо́ве исправле́ния, о́тче Григо́рие, но и Литурги́ю Преждеосвяще́нных, Ду́хом Бо́жиим наставля́емь, соста́вил еси́, ю́же свята́я Це́рковь соверша́я по вся́ Четыредеся́тницы, во умиле́нии взыва́ет: Го́спода по́йте и превозноси́те во вся́ ве́ки.

Сла́ва Отцу́ и Сы́ну и Свято́му Ду́ху:

Собра́л еси́ сказа́ния жити́й святы́х во Итали́йстей стране́ богоуго́дно пожи́вших и поуче́ния душеспаси́тельная, и са́м сподо́бился еси́ впи́сан бы́ти в кни́гу живота́, те́м взыва́еши: Го́спода по́йте и превозноси́те во вся́ ве́ки.

И ны́не и при́сно и во ве́ки веко́в. Ами́нь.

Богородичен: Из Отца́ проше́дшаго пре́жде ве́к безле́тнаго Бо́га Сло́ва, и в после́дняя возсия́вша из Де́вы, по́йте и превозноси́те во вся́ ве́ки.

Песнь 9

Ирмос: Безнача́льна Роди́теля Сы́н, Бо́г и Госпо́дь, вопло́щься от Де́вы, на́м яви́ся, омраче́нная просвети́ти, собра́ти расточе́нная, те́м Всепе́тую Богоро́дицу, велича́ем.

Припев: Святителю отче Григорие, моли Бога о нас.

Боже́ственных твои́х слове́с наслади́вшеся, Григо́рие, в твое́й па́мяти торжеству́юще, вопие́м ти́: моли́ о на́с Го́спода, да изба́вимся прегреше́ний.

Припев: Святителю отче Григорие, моли Бога о нас.

Аще и те́лом подвиза́лся еси́ на земли́, но со безпло́тными сподо́бился предста́ти Го́споду на небеси́, иде́же моли́ся о на́с, свя́те Григо́рие.

Сла́ва Отцу́ и Сы́ну и Свято́му Ду́ху:

Ду́хом в вы́шнем Сио́не живе́ши ны́не и назира́еши свы́ше призыва́ющия тя́, святи́телю Григо́рие, те́м мо́лим тя́, испроси́ на́м у Христа́ очище́ния и ве́лия ми́лости.

И ны́не и при́сно и во ве́ки веко́в. Ами́нь.

Богородичен: Кре́посте моя́, Пречи́стая Богороди́тельнице, моли́ со все́ми святы́ми изба́вити мя́ гее́нны и ве́чнаго осужде́ния.

Свети́лен:

Тро́ичным све́том освеща́емь, и во све́тлости святы́х лику́я, о Григо́рие му́дре! Пода́ждь и на́м благода́ть, да воспева́ем непреста́нно Све́та Невече́рняго — Отца́, Сы́на и Свята́го Ду́ха.

Сла́ва, и ны́не, Богородичен:

Предста́тельство Твое́ воспева́ем, Богороди́тельнице, заступи́ на́с от жите́йских страсте́й прило́га и просвети́ на́с све́том Твои́м, Влады́чице.

Молитва

О пречестна́я и свяще́нная главо́ и благода́ти Свята́го Ду́ха испо́лненная, Спа́сово со Отце́м обита́лище, вели́кий архиере́е, те́плый наш засту́пниче, святи́телю Григо́рие, предстоя́ у Престо́ла всех Царя́ и наслажда́яся све́та единосу́щныя Тро́ицы и херуви́мски со А́нгелы возглаша́я песнь трисвяту́ю, вели́кое же и неизсле́дованное дерзнове́ние име́я ко всеми́лостивому Влады́це, моли́ спасти́ся па́ствы Христо́вы лю́дем, благостоя́ние святы́х церкве́й утверди́: архиере́и благоле́пием святи́тельства украси́, мона́шествующыя к по́двигом до́браго тече́ния укрепи́, ца́рствующий град и вся гра́ды и страны до́бре сохрани́, и ве́ру святу́ю непоро́чну соблюсти́ умоли́, мир весь предста́тельством твои́м умири́, от гла́да и па́губы изба́ви ны, и от нападе́ния иноплеме́нных сохрани́, ста́рыя уте́ши, ю́ныя наста́ви, безу́мныя умудри́, вдови́цы поми́луй, си́роты заступи́, младе́нцы возрасти́, пле́нных возврати́, немощству́ющыя и моля́щияся тебе́ от всех напа́стей и бед хода́тайством твои́м свободи́: моли́ о нас Всеще́драго и Человеколюби́ваго Христа́ Бо́га на́шего, да и в день Стра́шнаго Прише́ствия Его́ от шу́ияго стоя́ния изба́вит нас, и ра́дости святы́х прича́стники сотвори́т со все́ми святы́ми во ве́ки веко́в. Ами́нь.