25 марта.

Канон преподобному исповеднику Феофану Сигрианскому.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 5:

Воздержа́нием житие́ украси́в и, у́ды умертви́в, победи́л еси́ вра́жия ко́зни, о́тче Феофа́не; преста́вился еси́ к Бо́гу в ве́чную жи́знь, я́ко досто́ин прича́стник, моля́ся непреста́нно поми́ловати ду́ши на́ша.

Кано́н. Гла́с 4.

Пе́снь 1.

Ирмос: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зными Моисе́овыма рука́ма Амали́кову си́лу в пусты́ни победи́л е́сть.

Припев: Преподобне исповедниче Феофане, моли Бога о нас.

Бо́га, пло́тию я́вльшагося, стопа́м после́довал еси́, благоче́стием, о́тче, разже́гся, я́ко отсю́ду зва́ние прие́м, е́же пои́стинне тезоиме́нно, я́ко промышле́нием прообразова́ся.

Припев: Преподобне исповедниче Феофане, моли Бога о нас.

Насла́ждся жела́ннейшим раче́нием Влады́ки твоего́, пренебре́гл еси́ любо́вь мирску́ю; сраствори́в же ся Боже́ственней любви́, жите́йскую красоту́ в ничто́же вмени́л еси́, всеблаже́нне.

Сла́ва Отцу́ и Сы́ну и Свято́му Ду́ху:

Устреми́вся зверови́дно, гоня́ше Ле́в, томи́тель избра́нныя, не терпя́ зре́ти почита́ему ико́ну Христо́ву, с ни́миже и тя́, Феофа́не, изгна́нию осуди́.

И ны́не и при́сно и во ве́ки веко́в. Ами́нь.

Богородичен: Две́рь, я́же к на́м Твоего́, Го́споди, сни́тия, Восто́к, и Со́лнце, и Све́т та́инственно Тя́ нарица́емаго преесте́ственно облиста́, сугу́ба естество́м Богочелове́ка.

Пе́снь 3.

Ирмос: Не му́дростию, и си́лою, и бога́тством хва́лимся, но Тобо́ю, Отчею ипоста́сною Му́дростию, Христе́: не́сть бо свя́т, па́че Тебе́, Человеколю́бие.

Припев: Преподобне исповедниче Феофане, моли Бога о нас.

Све́та Боже́ственнаго испо́лнен ви́ден бы́л еси́, Феофа́не, любо́вию сраствори́вся Жела́емому, блаже́нне. Те́мже твою́ сла́вную па́мять почита́ем.

Припев: Преподобне исповедниче Феофане, моли Бога о нас.

Отре́к злочести́ваго Льва́ повеле́ния, преда́ния благоче́стно церко́вная удержа́л еси́. Те́мже тя́ Христо́с чудесы́ просла́ви.

Сла́ва Отцу́ и Сы́ну и Свято́му Ду́ху:

Вжиля́емо наде́ждею и ве́рою, преподо́бне, твоея́ пло́ти неможе́ние, душе́вною кре́постию утвержда́емь, Бо́гу присво́ил еси́ те́ло купнора́бное.

И ны́не и при́сно и во ве́ки веко́в. Ами́нь.

Богородичен: Созда́вый в нача́лех от пе́рсти мя́, челове́ка, зи́ждется мене́ ра́ди во чре́ве Твое́м, Всенепоро́чная, дре́внее паде́ние исправля́я.

Седа́лен, гла́с 8.

Рачи́тель любве́ Иису́совы бы́в, отрази́л еси́ сла́сти и жите́йский мяте́ж, и, мона́шествовав, пожи́л еси́ на земли́, я́ко небе́сный Ангел, и чуде́с то́чиши дарова́ния, преподо́бне. Те́мже во светоно́сней и святе́й твое́й па́мяти ве́рно восхваля́ем тя́ и согла́сно вопие́м ти́: богоно́се Феофа́не, моли́ Христа́ Бо́га прегреше́ний оставле́ние дарова́ти чту́щим любо́вию святу́ю па́мять твою́.

Сла́ва, и ны́не, Богородичен:

Яко де́ву и еди́ну в жена́х, Тя́, без се́мене ро́ждшую Бо́га пло́тию, вси́ ублажа́ем, ро́ди челове́честии: о́гнь бо всели́ся в Тя́ Божества́, и я́ко Младе́нца дои́ши Зижди́теля и Го́спода. Те́м, Ангельский и челове́ческий ро́д, досто́йно сла́вим пресвято́е Рождество́ Твое́ и согла́сно вопие́м Ти́: моли́ Христа́ Бо́га согреше́ний оставле́ние дарова́ти покланя́ющимся ве́рою пресвято́му Рождеству́ Твоему́.

Пе́снь 4.

Ирмос: Вознесе́на Тя́ ви́девши Це́рковь на Кресте́, Со́лнце Пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.

Припев: Преподобне исповедниче Феофане, моли Бога о нас.

Небе́сное угото́вася жили́ще я́ко страда́льцу, тебе́, сла́вне: от земны́я бо, ра́дуяся, преложи́лся еси́ ски́нии, вопия́ Влады́це твоему́: сла́ва си́ле Твое́й, Го́споди.

Припев: Преподобне исповедниче Феофане, моли Бога о нас.

Венцено́сец, Феофа́не, показа́лся еси́, честно́е бо изображе́ние Христо́во, богоно́се блаже́нне, не отве́рглся еси́ чествова́ти. Те́м и взыва́л еси́: сла́ва си́ле Твое́й, Го́споди.

Припев: Преподобне исповедниче Феофане, моли Бога о нас.

Проти́вяся повеле́нию мучи́теля злочести́ваго, преподо́бный плотска́го неможе́ния отню́д небреже́, взыва́я Созда́вшему: сла́ва си́ле Твое́й, Го́споди.

Сла́ва Отцу́ и Сы́ну и Свято́му Ду́ху:

Возвели́чился еси́ чудесы́, богоно́се, и́бо Христо́с возмзди́ тя́ за терпе́ние. Те́мже исцеле́ния то́чиши тре́бующим, я́коже от исто́чника, свяще́ннейше.

И ны́не и при́сно и во ве́ки веко́в. Ами́нь.

Богородичен: Превы́шши Ангел показа́лася еси́, Еди́на: Сове́та бо Вели́каго Ангела родила́ еси́ — Сло́во, вся́ просвети́вшаго, ве́рою зову́щия: сла́ва си́ле Твое́й, Го́споди.

Пе́снь 5

Ирмос: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.

Припев: Преподобне исповедниче Феофане, моли Бога о нас.

Сло́вом всеблагочести́вым правосла́вно пропове́да преподо́бный Феофа́н ве́ры повеле́ния, ду́хом сия́я.

Припев: Преподобне исповедниче Феофане, моли Бога о нас.

Бога́тство всеразли́чно богому́дренне разда́л еси́ по повеле́нию Влады́ки, в нищете́ живу́щим после́дуя, всехва́льне.

Сла́ва Отцу́ и Сы́ну и Свято́му Ду́ху:

Име́я твою́ ду́шу по о́бразу Созда́вшаго, пречи́стей Влады́чней покланя́лся еси́ ико́не, любо́вию облобыза́я.

И ны́не и при́сно и во ве́ки веко́в. Ами́нь.

Богородичен: Све́та безле́тнаго на́м, под ле́ты бы́вшаго, родила́ еси́, Богома́ти, су́щим во тме́ жития́, и ми́р просвети́ла еси́.

Пе́снь 6.

Ирмос: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Припев: Преподобне исповедниче Феофане, моли Бога о нас.

Напра́ви к доброде́тели житие́ мое́, преподо́бне, поще́ния стезю́ моли́твами твои́ми, блаже́нне, углажда́я, по не́йже кре́пко правоше́ствовати мя́, о́тче, сподо́би.

Припев: Преподобне исповедниче Феофане, моли Бога о нас.

Целому́дренно твою́ жи́знь соверши́л еси́, преподо́бне, с му́дростию, ю́же име́л еси́, с му́жеством же пра́вду, и кру́гом доброде́телей яви́лся еси́ украша́емь.

Сла́ва Отцу́ и Сы́ну и Свято́му Ду́ху:

На благосла́вие му́ченическое вше́л еси́, Феофа́не, Богома́тере Отрокови́цы и му́чеников, о́тче, ико́ны я́ко поче́л еси́, гони́телем сопротивля́яся.

И ны́не и при́сно и во ве́ки веко́в. Ами́нь.

Богородичен: Всю́ Тя освяти́ Сло́во Свято́е, во Твою́ всели́вся утро́бу освяще́нную неизрече́нным сло́вом, Богоро́дице, Его́же моли́ спасти́ся рабо́м Твои́м.

Конда́к, гла́с 2.

Свы́ше прие́м Боже́ственное открове́ние, со тща́нием изше́л еси́ от среды́ молвы́ жите́йския, и уедини́вся, преподо́бне, чуде́с прия́л еси́ де́йство и проро́чества досто́инство, бога́тства и супру́жницы лиши́вся.

Икос:

На земли́ ничто́же предпоче́т, после́довал еси́, ра́дуяся, зову́щему Христу́, и и́го Его́ прия́т на ра́мо твое́ усе́рдно, поко́й обре́л еси́ в души́ твое́й. Его́же и мне́, ни́щему и уны́лому, низпосли́, глаго́лющему и ника́коже соверша́ющему, но еще́ упражня́ющемуся в жите́йских ве́щех и чудя́щемуся, ка́ко все́х избежа́л еси́, сожи́тельницы и бога́тства лиши́вся?

Пе́снь 7.

Ирмос: В пещи́ авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.

Припев: Преподобне исповедниче Феофане, моли Бога о нас.

Еже по о́бразу стяжа́в и по подо́бию, житие́м пресве́тлым, о́тче, прии́м, обою́ду украси́лся еси́, благослове́н еси́ в хра́ме, — вопия́, — сла́вы Твоея́, Го́споди.

Припев: Преподобне исповедниче Феофане, моли Бога о нас.

Испове́дания венце́м, о́тче, украси́лся еси́, де́лом обличи́л еси́ словеса́ злочести́вых, ве́рныя же извести́л еси́, благослове́н еси́ в хра́ме, — вопия́, — сла́вы Твоея́, Го́споди.

Сла́ва Отцу́ и Сы́ну и Свято́му Ду́ху:

Ума́ тверде́йшим усе́рдием теле́сныя, о́тче, боле́зни подъя́л еси́ терпели́вно, благода́рно Влады́це твоему́ вопия́: благослове́н еси́ в хра́ме сла́вы Твоея́, Го́споди.

И ны́не и при́сно и во ве́ки веко́в. Ами́нь.

Богородичен: Яко Богоро́дицу и Цари́цу всея́ тва́ри, вси́ ве́рнии, пое́м Тя́, Чи́стую, и — е́же ра́дуйся! — Тебе́ взыва́ем: благослове́нна Ты́ в жена́х еси́, Всенепоро́чная Влады́чице.

Пе́снь 8.

Ирмос: Ру́це распросте́р, Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели, о́троцы, взыва́юще: благослови́те, вся́ дела́ Госпо́дня, Го́спода.

Припев: Преподобне исповедниче Феофане, моли Бога о нас.

Ви́дя блаже́нне, тве́рдость твоего́ противле́ния, Ле́в мучи́тель во изгна́ние тя́ осуди́ горча́йшее, вселука́вый, с весе́лием же вопия́, сие́ претерпе́л еси́: благослови́те, вся́ дела́ Госпо́дня, Го́спода.

Припев: Преподобне исповедниче Феофане, моли Бога о нас.

На первообра́зное ви́дя ико́ны че́сть преходя́щу, на три́знище поте́кл еси́, я́ко страда́лец зако́ннейший и, победи́тель показа́вся, вене́ц прия́л еси́, взыва́я: благослови́те, вся́ дела́ Госпо́дня, Го́спода.

Припев: Преподобне исповедниче Феофане, моли Бога о нас.

Небе́сную вме́сто земны́я ски́нию тебе́ даде́ вся́ческих Госпо́дь, вме́сто бо тесноты́ обре́л еси́ широту́ ра́дования в ра́йстей сла́дости, с му́ченики вопия́: благослови́те, вся́ дела́ Госпо́дня, Го́спода.

Сла́ва Отцу́ и Сы́ну и Свято́му Ду́ху:

Све́том облиста́лся еси́ мы́сленным Боже́ственнаго Ду́ха, блаже́нне Феофа́не, те́мже исцеле́ния то́чиши ны́не ве́рою к тебе́ притека́ющим и святу́ю твою́ ра́ку любо́вию почита́ющим и вопию́щим: благослови́те, вся́ дела́ Госпо́дня, Го́спода.

И ны́не и при́сно и во ве́ки веко́в. Ами́нь.

Богородичен: Боже́ственною си́лою содержа́й тва́рь всю́ и управля́я я́ве, рука́ми держи́тся Твои́ми, Пречи́стая, я́ко Младе́нец, присносу́щный и сопресто́льный Отцу́ и Боже́ственному Ду́ху. Ему́же вопие́м: благослови́те, вся́ дела́ Госпо́дня, Го́спода.

Песнь 9

Ирмос: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.

Припев: Преподобне исповедниче Феофане, моли Бога о нас.

Все́ бога́тство расточи́л еси́ убо́гим, богоно́се, пра́вду твою́ я́ве восприе́млеши, тебе́ возсия́вшую, вме́сто тле́нных пожина́я ве́чно пребыва́ющая.

Припев: Преподобне исповедниче Феофане, моли Бога о нас.

Неду́ги исцеля́еши, всеблаже́нне, Уте́шителевою си́лою, де́моны я́ве отго́ниши де́йством Сего́, преблаже́нне. Те́м, ве́рнии, зря́ще, тя́, богоно́се, ублажа́ем.

Припев: Преподобне исповедниче Феофане, моли Бога о нас.

Тво́й светоно́сный, богому́дре, преставле́ния де́нь вся́ призыва́ет ве́рныя к прича́стию освяще́ния, его́же и ны́не, ра́дующеся, соверша́ем, свяще́ннейше.

Сла́ва Отцу́ и Сы́ну и Свято́му Ду́ху:

Дае́ши мне́ незави́стен да́р, похвале́ний тебе́ словеса́ спле́тшему усе́рдно, богому́дре, единонра́вна тебе́, я́коже тезоиме́нна сего́ показа́в мольба́ми твои́ми благоприя́тными, всеблаже́нне.

И ны́не и при́сно и во ве́ки веко́в. Ами́нь.

Богородичен: Зако́н похва́л побежда́ется боже́ственною сла́вою Твое́ю, Де́во, но, я́ко Блага́ и Благосе́рда, Тя́ пою́щих приими́ похвалу́, грехо́в очище́ние воздаю́щи, Богоневе́стная.

Молитва

О свяще́нная главо́, преподо́бне о́тче, преблаже́нне а́вво Феофане, не забу́ди убо́гих твои́х до конца́, но помина́й нас всегда́ во святы́х и благоприя́тных моли́твах к Бо́гу: помяни́ ста́до твое́, е́же сам упа́сл еси́, и не забу́ди посеща́ти чад твои́х моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ ду́ша со а́нгельскими во́инствы, со безпло́тными ли́ки, с небе́сными си́лами, у престо́ла Вседержи́телева предстоя́щи, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.