24 марта.
Канон святителю Евфимию, архиепископу Новгородскому, чудотворцу.
![Святителю Евфимию, архиепископу Новгородскому Святителю Евфимию, архиепископу Новгородскому](img_i/035.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропа́рь, гла́с 4:
Избра́н бы́в Бо́гови от ю́ности, святи́телю Евфи́мие, и, сего́ ра́ди архиере́йства са́ном почте́н бы́в, упа́сл еси́ лю́ди, и́же тебе́ Бо́гом вруче́нныя; те́мже и по преставле́нии чуде́с дарова́ния от Го́спода прия́л еси́ исцеля́ти разли́чныя неду́ги. Того́ моли́ о на́с, соверша́ющих честну́ю па́мять твою́, да тебе́ вси́ непреста́нно ублажа́ем.
Стихи́ра, гла́с 6:
Благоуха́ет честна́я ра́ка моще́й твои́х, Евфи́мие святи́телю, все́м ве́рным исцеле́ние душа́м и телесе́м да́рующи. Те́мже тя́ мо́лим, богодарова́нное твое́ ста́до в ми́ре соблюсти́, да вси́ тя́ я́ко и́стиннаго па́стыря и моли́твенника к Бо́гу непреста́нно велича́ем.
Кано́н святи́теля Евфи́мия. Гла́с 2.
Пе́снь 1.
Ирмос: Гряди́те, лю́дие, пои́м пе́снь Христу́ Бо́гу, разде́льшему мо́ре и наста́вльшему лю́ди, я́же изведе́ из рабо́ты Еги́петския, я́ко просла́вися.
Припев: Святителю отче Евфимие, моли Бога о нас.
Яко река́ прему́дрости и ра́зума, святи́телю Евфи́мие, бы́л еси́, ка́плю и мне́ да́руй, да возмогу́ и а́з ма́лое руки́ моея́ хвале́ние твоему́ вели́честву принести́, блаже́нне.
Припев: Святителю отче Евфимие, моли Бога о нас.
Судо́м Бо́жиим и челове́ческим избра́нием архиере́йства ма́стию пома́зан бы́в, святи́телю Евфи́мие, па́стырь преизря́ден бы́л еси́, же́ртвы Бо́гу вся́чески принося́, свяще́нне.
Сла́ва Отцу́ и Сы́ну и Свято́му Ду́ху:
Источа́ют прему́драя уче́ния устне́ твои́, святи́телю, боже́ственную сла́дость иму́ще, е́юже напита́вшеся, ча́да твоя́, тебе́ любо́вию непреста́нно почита́ем.
И ны́не и при́сно и во ве́ки веко́в. Ами́нь.
Богородичен: Иже на́с ра́ди из Тебе́, Де́во, в челове́ка премно́гою бла́гостию облеки́йся, свяще́нных собо́ры, Того́ возлю́бльшия, просла́вил е́сть.
Пе́снь 3.
Ирмос: Утверди́ на́с в Тебе́, Го́споди, дре́вом умерщвле́й гре́х, и стра́х Тво́й всади́ в сердца́ на́с, пою́щих Тя́.
Припев: Святителю отче Евфимие, моли Бога о нас.
Житие́ по Бо́зе стяжа́в, святи́телю, в посте́ и моли́тве мно́го вре́мя пре́был еси́, вери́ги тя́жки нося́ на те́ле твое́м, я́же ны́не зря́ще, чуди́мся терпе́нию твоему́.
Припев: Святителю отче Евфимие, моли Бога о нас.
Де́лы и словесы́ Боже́ственными укра́шен бы́в, святи́телю Евфи́мие, Це́рковь Христо́ву благоче́стно упа́сл еси́, те́мже и ра́дости сподо́бился еси́ Го́спода твоего́, на́с помина́й, тебе́ сла́вящих.
Сла́ва Отцу́ и Сы́ну и Свято́му Ду́ху:
Житие́ твое́, блаже́нне, доброде́тельми уясни́л еси́, те́мже твоя́ исправле́ния по мно́гим страна́м пропове́даются, о́тче, и, от земли́ преше́д, дости́гл еси́ е́же та́мо со святы́ми пребыва́ния.
И ны́не и при́сно и во ве́ки веко́в. Ами́нь.
Богородичен: Пала́ту кра́сную неизрече́ннаго бога́тства, Де́во, зна́ем и по до́лгу Тя́ сла́вим, спа́сшиися Рождество́м Твои́м, Всенепоро́чная.
Седа́лен, гла́с 8.
Умная очеса́, святи́телю, я́ко всегда́ име́я к Бо́гу просте́рта, у́жем желе́зным обложи́в себе́, блаже́нне, мно́гажды всю́ но́щь без сна́ пребы́л еси́, удруча́я пло́ть твою́, преблаже́нне; вери́ги же, я́же на тебе́, не позна́ни бы́ша, да́же до исхо́да е́же отсю́ду. Те́мже и Христо́с, Его́же ра́ди жесто́кое житие́ претерпе́л еси́, да́рует тебе́ неболе́зненное е́же на небесе́х житие́. Того́ моли́, святи́телю Евфи́мие, согреше́ний оставле́ние дарова́ти, чту́щим любо́вию свяще́нную па́мять твою́.
Сла́ва, и ны́не, Богородичен:
Яко де́ву и еди́ну в жена́х, Тя́, без се́мене ро́ждшую Бо́га пло́тию, вси́ ублажа́ем, ро́ди челове́честии: о́гнь бо всели́ся в Тя́ Божества́, и я́ко Младе́нца дои́ши Зижди́теля и Го́спода. Те́м, Ангельский и челове́ческий ро́д, досто́йно сла́вим пресвято́е Рождество́ Твое́ и согла́сно вопие́м Ти́: моли́ Христа́ Бо́га согреше́ний оставле́ние дарова́ти покланя́ющимся ве́рою пресвято́му Рождеству́ Твоему́.
Пе́снь 4.
Ирмос: Прише́л еси́ от Де́вы, не хода́тай, ни Ангел, но Са́м, Го́споди, вопло́щся, и спа́сл еси́ всего́ мя челове́ка. Те́м зову́ Ти́: сла́ва си́ле Твое́й, Го́споди.
Припев: Святителю отче Евфимие, моли Бога о нас.
Храни́тель бу́ди оте́честву твоему́ и лю́дем, святи́телю, избавля́я вра́г наше́ствия, гла́да же и па́губы, да, моли́твами твои́ми спа́сшеся, тебе́ вси́ я́ко засту́пника велича́ем.
Припев: Святителю отче Евфимие, моли Бога о нас.
Любому́дренно душе́вный кора́бль в ти́хое приста́нище управля́я, святи́телю, моли́твам и ми́лостыни прилежа́л еси́, тле́нное бога́тство в нетле́нное, богоблаже́нне, прелага́я. Те́мже и прия́л еси́ небе́сное бога́тство.
Сла́ва Отцу́ и Сы́ну и Свято́му Ду́ху:
Чи́сто о́ко душе́вное име́я, зри́тельно небе́снаго восхо́да, те́мже на земли́ жи́знь твою́ до́бре упра́вил еси́, святи́телю. Сего́ ра́ди це́рковь Бо́га Жива́го, Евфи́мие, бы́л еси́.
И ны́не и при́сно и во ве́ки веко́в. Ами́нь.
Богородичен: Бо́г, из Тебе́ роди́вся, Госпоже́ Всенепоро́чная, от облада́юща врага́ ми́р Тебе́ ра́ди изба́ви, святи́тельский же ли́к, же́ртву Тому́ принося́щий, возвели́чи.
Пе́снь 5
Ирмос: Све́та Пода́телю и веко́в Тво́рче, Го́споди, во све́те Твои́х повеле́ний наста́ви на́с: ра́зве бо Тебе́, ино́го Бо́га не зна́ем.
Припев: Святителю отче Евфимие, моли Бога о нас.
Блаже́нную жи́знь, святи́телю Евфи́мие, на земли́ пожи́л еси́ и отсю́ду к небе́сному житию́ сла́вно преше́л еси́. Те́мже, и по преставле́нии твое́м ра́ку твою́ обстоя́ще и любе́зно покланя́ющеся тебе́, свяще́ние почерпа́ем.
Припев: Святителю отче Евфимие, моли Бога о нас.
Преосвяще́нствован душе́ю и те́лом, о́тче, бы́л еси́, све́тло Влады́чней трапе́зе предстои́ши, Же́ртву Тому́ Безкро́вную принося́. Те́мже я́ко священнотаи́нник приле́жно о на́с моли́ся.
Сла́ва Отцу́ и Сы́ну и Свято́му Ду́ху:
Дре́вняго Корни́лия моли́тве и ми́лостыни подо́бяся, ми́лостив к тре́бующим, о́тче, бы́л еси́, те́м от Христа́ Бо́га досто́йно слы́шиши: моли́твы твоя́ и ми́лостыни взыдо́ша предо Мно́ю. Сего́ гла́са и на́м услы́шати, блаже́нне, помоли́ся.
И ны́не и при́сно и во ве́ки веко́в. Ами́нь.
Богородичен: Свяще́нными гла́сы Тя́, добро́ту Иа́ковлю, пое́м, пло́тски ро́ждшую ми́рови Све́т, Иже от Све́та, просвеща́ющий архиере́йския собо́ры.
Пе́снь 6.
Ирмос: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́.
Припев: Святителю отче Евфимие, моли Бога о нас.
Сы́н све́та и дне́, святи́телю, бы́л еси́, те́мже и всели́лся еси́, иде́же све́т невече́рний и поко́ища пра́ведных, того́ све́та моли́ получи́ти все́м, па́мять твою́ пра́зднующим.
Припев: Святителю отче Евфимие, моли Бога о нас.
Свяще́нныя и пречестны́я хра́мы в сла́ву святы́х мно́гия воздви́гл еси́, те́мже и мно́гия святы́я име́л еси́ хода́таи, промышля́ющия тебе́ поле́зная, но, я́ко с ни́ми водворя́яся, о на́с моли́ся.
Сла́ва Отцу́ и Сы́ну и Свято́му Ду́ху:
Све́тло лице́ в жи́зни име́я, блаже́нне, потща́лся еси́ светле́йшу и ду́шу твою́ Христу́ предста́вити, е́же и получи́л еси́, Евфи́мие. Те́мже бу́ди те́плый моли́твенник, я́ко святи́тель о чту́щих тя́.
И ны́не и при́сно и во ве́ки веко́в. Ами́нь.
Богородичен: Во утро́бу Твою́ всели́вся, все́ челове́ческое существо́ обожи́ и святи́телей ли́к мно́жество свяще́нно привлече́ сла́вити Тя́, Богоневе́сто.
Конда́к, гла́с 8.
Яко архиере́ем сопресто́льник и святи́телем изря́дный побо́рник бы́л еси́, святи́телю Евфи́мие, не преста́й сохраня́я оте́чество твое́, гра́д же и лю́ди, и́же тебе́ ве́рою почита́ющия и честны́м моще́м твои́м покланя́ющияся, да велегла́сно тебе́ вси́ вопие́м: ра́дуйся, святи́телю богому́дре.
Икос:
Ева́нгельскому словеси́ вня́т, преподо́бне, душе́вный ра́зум впери́в к просвеще́нию светолу́чныя зари́, душетле́нныя стра́сти до конца́ потреби́л еси́. Доброде́тельным же житие́м Ангелом и челове́ком преди́вен показа́лся еси́. И сего́ ра́ди вели́каго Нова́града архиере́йства сподо́бився, Це́рковь украси́л еси́, лю́ди просвети́л еси́ и до конца́ в правосла́вии утверди́л еси́, да вси́ велегла́сно вопие́м ти́: ра́дуйся, Евфи́мие, святи́телю богому́дре.
Пе́снь 7.
Ирмос: Те́лу злато́му прему́дрыя де́ти не послужи́ша, и в пла́мень са́ми поидо́ша, и бо́ги и́х обруга́ша, среди́ пла́мене возопи́ша и ороси́ я́ Ангел: услы́шася уже́ у́ст ва́ших моли́тва.
Припев: Святителю отче Евфимие, моли Бога о нас.
Вели́кий Но́вград, и́же в себе́ тебе́ стяжа́вый, ра́достию ра́дуется, святи́телю Евфи́мие: тя́ бо, я́ко сте́ну име́я тве́рду и сто́лп необори́м, Христа́ воспева́ет, тебе́ сему́ дарова́вшаго.
Припев: Святителю отче Евфимие, моли Бога о нас.
Иже пре́жде тебе́ бы́вшим архиере́ом красота́ бы́л еси́, блаже́нне, святи́телей удобре́ние, мона́хов о́браз, Христо́вы же Це́ркве преизря́дный па́стырь яви́лся еси́, богоблаже́нне о́тче Евфи́мие.
Сла́ва Отцу́ и Сы́ну и Свято́му Ду́ху:
Илиину́ ре́вность восприи́м, святи́телю, те́мже ни преще́ния, ни моле́ния согреша́ющих возмого́ша увеща́ти тя́, е́же те́х о согреше́ниих не облича́ти. Ты́ же не преста́л еси́, до́ндеже коне́чнее о́нех испра́вил еси́.
И ны́не и при́сно и во ве́ки веко́в. Ами́нь.
Богородичен: Кра́сную обре́т и до́брую в жена́х Тя́, Пречи́стая, прекра́сное Сло́во всели́ся в пречи́стое чре́во Твое́, вся́ ли́ки святи́телей освя́щ, зову́щия: благослове́н Бо́г оте́ц на́ших.
Пе́снь 8.
Ирмос: В пе́щь о́гненную ко отроко́м евре́йским снизше́дшаго и пла́мень в ро́су прело́жшаго Бо́га, по́йте дела́ я́ко Го́спода, и превозноси́те во вся́ ве́ки.
Припев: Святителю отче Евфимие, моли Бога о нас.
Судо́м Бо́жиим и всенаро́дным избра́нием отню́дуже при́зван бы́л еси́, преподо́бне, на престо́л вели́кия Це́ркве, та́мо па́ки отхо́диши промышле́нием твоего́ Влады́ки, да отню́дуже сия́ прия́л еси́, па́ки та́мо чи́ста того́ с душе́ю Бо́гу преда́си.
Припев: Святителю отче Евфимие, моли Бога о нас.
Пречестна́я ра́ка, богоблаже́нне, иде́же положено́ бы́сть честно́е те́ло твое́, святи́телю, благово́ние и освяще́ние все́м, ве́рою приходя́щим, испуща́ет, от души́ Христу́ вопию́щим: благослови́те, вся́ дела́, Го́спода и превозноси́те Его́ во ве́ки.
Сла́ва Отцу́ и Сы́ну и Свято́му Ду́ху:
Христо́с тя́ святи́теля избра́, я́ко не́кое свети́ло, могу́ща тве́рдь церко́вную просвеща́ти и свои́ми уче́ньми лю́ди, тебе́ вруче́нныя, наставля́ти Творцу́ вопи́ти: благослови́те, вся́ дела́, Го́спода и превозноси́те Его́ во ве́ки.
И ны́не и при́сно и во ве́ки веко́в. Ами́нь.
Богородичен: Уны́л име́я по́мысл и ду́шу, сластьми́ отягче́ну, к Тебе́ прибега́ю, Богороди́тельнице Чи́стая, и вопию́ Ти: воздви́гни и спаси́ мя, окая́ннаго и осужде́ннаго.
Песнь 9
Ирмос: От Бо́га Бо́га Сло́ва, неизрече́нною му́дростию прише́дшаго обнови́ти Ада́ма, я́дию в тле́ние па́дшаго лю́те, от Святы́я Де́вы неизрече́нно воплоти́вшагося на́с ра́ди, ве́рнии, единому́дренно пе́сньми велича́ем.
Припев: Святителю отче Евфимие, моли Бога о нас.
Оби́тель, в не́йже сподо́бился еси́ яре́м Христо́в прия́ти, та́мо вся́ дни́ твоя́ ве́рою и ду́хом кроме́ телесе́ неразлу́чен, о́тче, пребы́л еси́, те́мже и по преставле́нии та́мо повелева́еши положи́тися, иде́же и чуде́с дарова́ния от Го́спода, святи́телю Евфи́мие, прия́л еси́.
Припев: Святителю отче Евфимие, моли Бога о нас.
Руко́ю мое́ю недосто́йною приноси́мое тебе́ с трудо́м хвале́ние, святи́телю Евфи́мие, не пре́зри, но приими́ и моли́ Творца́ твоего́ и Влады́ку та́мошняго мя́ изба́вити ве́чнаго муче́ния, тебе́ ве́рою почита́юща.
Сла́ва Отцу́ и Сы́ну и Свято́му Ду́ху:
Певцы́ твоя́, тебе́ и́скренно воспева́ющия и твою́ па́мять честну́ю, святи́телю Евфи́мие, ве́рою прославля́ющия, освяти́ и просла́ви и от бе́д избавля́й, и напа́стей, и та́мо ве́чнаго муче́ния, да тебе́ всегда́ воспева́ют.
И ны́не и при́сно и во ве́ки веко́в. Ами́нь.
Богородичен: Пощади́ мя, Го́споди, пощади́, егда́ хо́щеши ми́ суди́ти, и не осуди́ мене́ во о́гнь, да не я́ростию обличи́ши мене́, мо́лит Тя́ Де́ва, Тебе́ ро́ждшая, Христе́, Ангельстии собо́ри и святи́телей совокупле́ния.
Свети́лен.
Дне́сь святи́теля Евфи́мия све́тлая наста́ па́мять, ве́рныя просвеща́ет и тму́ пре́лести разоря́ет, ве́рою приходя́щим к честны́м того́ моще́м.
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Све́т возсия́ безле́тный от Отца́ пре́жде ве́к, в ле́то ны́не напосле́док, из Тебе́, Де́во, яви́ся на спасе́ние ми́ра. К Нему́же не преста́й о лю́дех Твои́х моля́щися.
Молитва святителю Евфимию, архиепископу Новгородскому
О́тче святи́телю Евфи́мие! Ты от ю́ности твоея́ Христа́ возлюби́л еси́, и благода́тию Его́ укрепля́ем, вся плотска́я мудрова́ния умертви́л еси́, чи́стым же житие́м и кро́тким нра́вом Го́сподеви угоди́л еси́, и по благода́ти Его́ на престо́ле святи́тельства был еси́, и яви́лся еси́, па́стве Христо́ве Вели́каго Нова́гра́да па́стырь изря́ден, полага́я ду́шу твою́ о ста́де твое́м. Те́мже и по сме́рти твое́й просла́ви тя Пастыренача́льник Христо́с подая́нием чуде́с, от тебе́ истека́ющих, подая́ нам тебе́ о́браз доброде́тельнаго жития́ и те́плаго моли́твенника. Те́мже и аз гре́шный и уны́лый, припа́дая к моще́м твои́м, молю́ся тебе́ усе́рдно: уго́дниче Христо́в, да́ждь ми ру́ку по́мощи, воздви́гни мя моли́твами твои́ми из глубины́ грехо́вныя. Се бо волна́ми страсте́й плотски́х и уны́ния, и ины́ми тьмочи́сленными жите́йскими треволне́нии обурева́юся и погиба́ю. Бу́ди у́бо мне, многогре́шному, те́плый ко Христу́ предста́тель и моли́твенник, да и аз, от потопле́ния грехо́внаго изба́влен, ко приста́нищу непоро́чнаго жития́ благода́тию Христо́вою дости́гну, и чи́стым житие́м просла́влю Спаси́теля моего́, Кро́вию Свое́ю мене́ искупи́вшаго, и, та́ко житие́ сконча́в, получу́ живо́т ве́чный во Ца́рствии Небе́снем, иде́же сла́вится пречестно́е и великоле́пое и́мя Отца́, и Сы́на, и Свята́го Ду́ха, ны́не и при́сно и во ве́ки веко́в. Ами́нь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![Святителю Евфимию, архиепископу Новгородскому Святителю Евфимию, архиепископу Новгородскому](img_b/035.jpg)