23 марта.

Канон святому мученику Кодрату и дружину его.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропарь, глас 4:

Му́ченицы Твои́, Го́споди,/ во стра́даниих свои́х венцы́ прия́ша нетле́нныя от Тебе́, Бо́га на́шего:/ иму́ще бо кре́пость Твою́,/ мучи́телей низложи́ша,/ сокруши́ша и де́монов немощны́я де́рзости./ Тех моли́твами// спаси́ ду́ши на́ша.

Кано́н. Гла́с 4.

Пе́снь 1.

Ирмос: Триста́ты кре́пкия, Рожде́йся от Де́вы, безстра́стия во глубине́, души́ трича́стное потопи́, молю́ся, да Тебе́, я́ко в тимпа́не, во умерщвле́нии телесе́ побе́дное воспою́ пе́ние.

Припев: Святый мучениче Кодрате с дружиною, молите Бога о нас.

Му́чеников свяще́нных, свяще́нно страда́вших, свяще́нный и чу́дный наста́ пра́здник, светозаре́нием Ду́ха вся́ световодя́щи, соше́дшеся, празднолю́бцы, по до́лгу си́х ублажи́м.

Припев: Святый мучениче Кодрате с дружиною, молите Бога о нас.

Яко со́лнце све́тлое, доброде́телей светоно́сием возсия́л еси́ на́м, Кодра́те страда́льче, светолу́чными твои́ми сия́нии тму́ многобо́жия отгоня́, блаже́нне, и просвеща́я ве́рных составле́ния.

Сла́ва Отцу́ и Сы́ну и Свято́му Ду́ху:

Ка́мень жи́зни Иису́са Спа́са возвеща́юще Бо́га, пострада́сте тве́рдо, и исто́чник свяще́ния, ка́мень, прие́мшии, крове́й тече́ния соде́ласте, му́ченицы сла́внии.

И ны́не и при́сно и во ве́ки веко́в. Ами́нь.

Богородичен: От тиме́ния страсте́й, помышле́ний треволне́ния, от стре́л вра́жиих, от вся́каго прило́га сопроти́вна спаси́, Чи́стая Богороди́тельнице, ду́ши пою́щих Твое́ несказа́нное Рождество́, Всенепоро́чная.

Пе́снь 3.

Ирмос: Яко непло́ды роди́ от язы́к Це́рковь, и мно́гое в ча́дех изнемо́же со́нмище, чу́дному Бо́гу на́шему возопии́м: Свя́т еси́, Го́споди.

Припев: Святый мучениче Кодрате с дружиною, молите Бога о нас.

Тве́рдии адама́нти, убива́емии мече́м и боле́зней ви́дом приобща́ющеся терпели́вно, чу́дному Бо́гу на́шему взыва́ху: Свя́т еси́, Го́споди.

Припев: Святый мучениче Кодрате с дружиною, молите Бога о нас.

Прему́дростию Кодра́т богода́нною упраздни́ е́ллинскую му́дрость, любопре́ния стражда́, и свои́ми кровьми́, Ду́хом Боже́ственным удобря́яся.

Сла́ва Отцу́ и Сы́ну и Свято́му Ду́ху:

С Кодра́том Ане́кта и с Па́влом Криске́нта, Киприа́на боже́ственнаго и Диони́сия, ве́рнии, благочестному́дренно пе́сньми венча́ем, ве́рою пострада́вших.

И ны́не и при́сно и во ве́ки веко́в. Ами́нь.

Богородичен: Ниже́ небе́сный у́м па́че ума́ Рождества́ Твоего́ мо́жет сказа́ти, Отрокови́це, Ума́ бо пе́рваго во утро́бе Сло́во, Чи́стая, зачала́ еси́, вся́ческая сло́вом соста́вльшаго.

Пе́снь 4.

Ирмос: Седя́й в сла́ве на Престо́ле Божества́ во о́блаце ле́гце, при́иде Иису́с Пребоже́ственный, Нетле́нною Дла́нию и спасе́ зову́щия: сла́ва, Христе́, си́ле Твое́й.

Припев: Святый мучениче Кодрате с дружиною, молите Бога о нас.

Му́дростию твои́х слове́с нему́дрыя посрами́л еси́, и наказа́нием богови́дных уче́ний твои́х, му́чениче Кодра́те, улови́л еси́ боже́ственнаго Ане́кта, Влады́це твоему́ приво́диши терпели́ва му́ченика.

Припев: Святый мучениче Кодрате с дружиною, молите Бога о нас.

От пеле́н присво́ился еси́ вся́ Сотво́ршему, изде́тска соверше́нна му́жа смы́сл избра́в и прему́дрости возжеле́в, ве́сь бы́л еси́ чисте́йшее, му́чениче, Христо́во оби́телище.

Сла́ва Отцу́ и Сы́ну и Свято́му Ду́ху:

Шестосве́тлый све́щник му́чеников Твои́х, Го́споди, та́йным еле́ем напои́вся, отгна́ многобо́жия но́щь и озари́ зову́щия: сла́ва, Христе́, си́ле Твое́й.

И ны́не и при́сно и во ве́ки веко́в. Ами́нь.

Богородичен: Свята́я Богоро́дица, в Не́йже всели́тися благоволи́, я́ко благово́нен хра́м, Сло́во Отчее единосу́щное, не опали́ ложе́сн, не боле́знова, и́бо роди́ Емману́ила, Бо́га и Челове́ка.

Пе́снь 5

Ирмос: Просвеще́ние Твое́, Го́споди, низпосли́ на́м и от мглы́ прегреше́ний разреши́ ны, Бла́же, Тво́й ми́р да́руяй.

Припев: Святый мучениче Кодрате с дружиною, молите Бога о нас.

Просвеще́нием ра́зума неразу́мия мглу́ отгоня́, Го́сподеви приво́диши собо́р страда́лец, му́дре Кодра́те, с ни́ми венча́емь.

Припев: Святый мучениче Кодрате с дружиною, молите Бога о нас.

По́стнически пе́рвее победи́в страсте́й привозста́ния, второ́е погуби́л еси́ держа́ву злочести́вых, Кодра́те му́чениче, пострада́в крепча́йше.

Сла́ва Отцу́ и Сы́ну и Свято́му Ду́ху:

Исполня́ется невла́жный ка́мень пролия́ньми честны́х твои́х крове́й и струи́ све́тлы дае́т ве́рным, освяща́я Боже́ственными манове́ньми.

И ны́не и при́сно и во ве́ки веко́в. Ами́нь.

Богородичен: Созда́вый, Пречи́стая, Еву от ребра́, из Твоея́ чи́стыя утро́бы зи́ждется, спасти́ Ада́ма за благоутро́бие восхоте́в, я́ко Человеколю́бец.

Пе́снь 6.

Ирмос: Возопи́, прообразу́я погребе́ние тридне́вное, проро́к Ио́на, в ки́те моля́ся: от тли́ изба́ви мя́, Иису́се, Царю́ си́л.

Припев: Святый мучениче Кодрате с дружиною, молите Бога о нас.

Шесточи́сленный страстоте́рпец ли́к на́м возсия́, я́коже зве́зды на церко́вней честне́й тве́рди, ве́рныя просвеща́яй и пре́лести тму́ разгоня́яй.

Припев: Святый мучениче Кодрате с дружиною, молите Бога о нас.

Пучи́ну му́к преидо́сте, му́ченицы, нево́лненно и вы́шнюю тишину́ получи́сте, ве́рных приста́нище бы́вше и моли́твенницы тепле́йшии.

Сла́ва Отцу́ и Сы́ну и Свято́му Ду́ху:

Да похва́лим со Ане́ктом Кодра́та сла́внаго и с Па́влом Диони́сия, Криске́нта, Киприа́на, Христо́ва виногра́да добропло́дныя ро́зги.

И ны́не и при́сно и во ве́ки веко́в. Ами́нь.

Богородичен: Онебеси́ла еси́ озе́мствованное естество́, Всенепоро́чная, челове́ков и истле́вшее сие́ новосоде́лала еси́, сего́ ра́ди, Отрокови́це, вси́ немо́лчными гла́сы Тя́ сла́вим.

Седа́лен, гла́с 4.

Терпе́нием лю́тых умертви́л еси́ го́рдаго врага́, страстоте́рпче, ме́чную сме́рть претерпе́л еси́, вку́пе со стра́ждущими с тобо́ю всему́дрыми, Кодра́те. Те́мже пра́зднуем честну́ю ва́шу па́мять, вопию́ще: помяни́те на́с ко Влады́це, непобеди́мии му́ченицы.

Пе́снь 7.

Ирмос: Спасы́й во огни́ авраа́мския Твоя́ о́троки и халде́и уби́в, я́же Пра́вда пра́ведно уловля́ше, препе́тый Го́споди, Бо́же оте́ц на́ших, благослове́н еси́.

Припев: Святый мучениче Кодрате с дружиною, молите Бога о нас.

Во огни́ муче́ний свы́ше прие́млюще ро́су терпе́ния, со о́троки до́блии взыва́ху му́ченицы: препе́тый Го́споди, Бо́же оте́ц на́ших, благослове́н еси́.

Припев: Святый мучениче Кодрате с дружиною, молите Бога о нас.

Одожде́нием честны́я кро́ве ва́шея, страстоте́рпцы, ка́мень невла́жный пре́жде испо́лнися, струи́ пролива́ющь исцеле́ний пою́щим: Бо́же оте́ц, благослове́н еси́.

Сла́ва Отцу́ и Сы́ну и Свято́му Ду́ху:

Яко мирополо́жница мы́сленная, ми́ро врачева́ний, Кодра́те, моще́й твои́х ра́ка источа́ет, страсте́й отгоня́щи злосмра́дие и опаля́ющи де́монов ополче́ния си́лою Боже́ственною.

И ны́не и при́сно и во ве́ки веко́в. Ами́нь.

Богородичен: Благослове́н Пло́д благослове́нныя утро́бы Твоея́, Его́же благословя́т небе́сныя си́лы и челове́честии собо́ри, на́с изба́вльшаго от кля́твы дре́вния, Благослове́нная.

Пе́снь 8.

Ирмос: Изба́вителю все́х Всеси́льне, посреде́ пла́мене благоче́ствовавшия, снизше́д, ороси́л еси́ и научи́л еси́ пе́ти: вся́ дела́, благослови́те, по́йте Го́спода.

Припев: Святый мучениче Кодрате с дружиною, молите Бога о нас.

Просве́щся страда́ний све́тлостию, венцено́сец Го́споду предстои́ши со страда́вшими с тобо́ю, сла́вне, воспева́я, Кодра́те: вся́ дела́, благослови́те, по́йте Го́спода.

Припев: Святый мучениче Кодрате с дружиною, молите Бога о нас.

Доброде́телей све́том удобря́емь, при кончи́не му́ченическую све́тлость насле́довал еси́, всему́дре, воспева́я, Кодра́те: вся́ дела́, благослови́те, по́йте Го́спода.

Сла́ва Отцу́ и Сы́ну и Свято́му Ду́ху:

Предогражде́ния Кори́нф стяжа́, святы́х честны́я мо́щи, и врачева́ние безме́здно хра́м, иде́же ве́рою вся́к притека́яй боле́зней и страсте́й изменя́ется.

И ны́не и при́сно и во ве́ки веко́в. Ами́нь.

Богородичен: Изба́вльшеся кля́твы прама́терния Тобо́ю, Чи́стая Богома́ти, благослове́нная Влады́чице, благослови́м Тя́ ве́рою и песносло́вим, Пресвята́я Де́во Богоневе́сто.

Песнь 9

Ирмос: Ева у́бо неду́гом преслуша́ния кля́тву всели́ла е́сть, Ты́ же, Де́во Богоро́дице, прозябе́нием чревоноше́ния ми́рови благослове́ние процвела́ еси́. Те́м Тя́ вси́ велича́ем.

Припев: Святый мучениче Кодрате с дружиною, молите Бога о нас.

Гное́ния ва́ша му́ченическая испуща́ют благово́ние, по́лно благода́ти, кро́ви си́х целе́б излива́ют то́ки Боже́ственным Ду́хом и стра́сти душетле́нныя исцеля́ют, я́же досто́йно ублажи́м.

Припев: Святый мучениче Кодрате с дружиною, молите Бога о нас.

Красе́н я́зв добро́тами бы́в, Ангелом уподо́бился еси́: кро́вию же излия́нною, Кодра́те, все́д, я́ко на колесни́цу, возлете́л еси́ к Вы́шним Ца́рством, по́чести боле́зней прие́мля.

Припев: Святый мучениче Кодрате с дружиною, молите Бога о нас.

Источа́я боже́ственную сла́дость из у́ст, страда́льческий собо́р увеща́л еси́, му́чениче Кодра́те, страда́ти с тобо́ю, Ане́кта, и Па́вла, и Криске́нта, Киприа́на же и боже́ственнаго Диони́сия, с ни́миже лику́еши, досточу́дне.

Сла́ва Отцу́ и Сы́ну и Свято́му Ду́ху:

Де́нь пра́здника ва́шего страда́ния, страстоте́рпцы, вси́ почита́ем, в се́й бо, вене́ц нетле́ния взе́мше, сы́нове бы́сте све́та же и дне́, лику́юще о́крест престо́ла Всецаря́.

И ны́не и при́сно и во ве́ки веко́в. Ами́нь.

Богородичен: Явльшися все́х Творца́ Роди́тельница па́че вся́каго ума́, Всенепоро́чная, небе́с вы́шши показа́лася еси́ и все́ми влады́чествующи, Де́во Богороди́тельнице нескве́рная, те́м Тя́ вси́ непреста́нно велича́ем.

Молитва

Святи́и му́ченицы Христовы! При́зрите с Небе́снаго черто́га на тре́бующих ва́шей по́мощи и не отве́ргните проше́ний на́ших; но я́ко при́снии благоде́тели и хода́таи на́ши, моли́те Христа́ Бо́га, да человеколюби́в и многоми́лостив сый, сохрани́т нас от вся́каго лю́таго обстоя́ния: от тру́са, пото́па, огня́, меча́, наше́ствия иноплеме́нников и междоусо́бныя бра́ни. Да не осу́дит нас гре́шных по беззако́ниям на́шим, и да не во зло обрати́м блага́я, да́руемая нам от всеще́драго Бо́га, но во сла́ву свята́го и́мени Его́ и в прославле́ние кре́пкаго ва́шего заступле́ния. Да моли́твами ва́шими даст нам Госпо́дь мир по́мыслов, воздержа́ние от па́губных страсте́й и от вся́кия скве́рны; и да укрепи́т во всем ми́ре Свою́ еди́ну Святу́ю, Собо́рную и Апо́стольскую Це́рковь, ю́же стяжа́л есть честно́ю Свое́ю кро́вию. Моли́теся приле́жно, святи́и му́ченицы, да утверди́т Христо́с Бог во Святе́й Свое́й Правосла́вной Це́ркви живы́й дух пра́выя ве́ры и благоче́стия; да вси чле́ны ея́, чи́стии от суему́дрия и суеве́рия, ду́хом и и́стиною покланя́ются Ему́ и усе́рдно пеку́тся о соблюде́нии Его́ за́поведей; да мы вси в ми́ре и благоче́стии поживе́м в настоя́щем ве́це и дости́гнем блаже́нныя ве́чныя жи́зни на Небеси́, благода́тию Го́спода на́шего Иису́са Христа́, Ему́же подоба́ет вся́кая сла́ва, честь и держа́ва со Отце́м и Святы́м Ду́хом, ны́не и при́сно и во ве́ки веко́в. Ами́нь.