22 марта.

Канон иной святым 40 мученикам, в Севастийстем езере мучившимся.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 1:

Боле́зньми святы́х, и́миже о Тебе́ пострада́ша, умоле́н бу́ди, Го́споди, и вся́ на́ша боле́зни исцели́, Человеколю́бче, мо́лимся.

Ин тропа́рь, гла́с 1:

Страстоте́рпцы всечестни́и, во́ини Христо́вы четы́редесяте, тве́рдии ору́жницы, сквозе́ бо о́гнь и во́ду проидо́сте и Ангелом согра́ждане бы́сте, с ни́миже моли́теся Христу́ о и́же ве́рою хва́лящих ва́с. Сла́ва Да́вшему ва́м кре́пость, сла́ва Венча́вшему ва́с, сла́ва Подава́ющему ва́ми все́м исцеле́ния.

Стихи́ра, гла́с 2:

Проро́чески у́бо вопия́ше Дави́д во псалме́х: проидо́хом сквозе́ о́гнь и во́ду, и изве́л ны́ еси́ в поко́й. Вы́ же, му́ченицы Христо́вы, саме́ми де́лы сло́во исполня́юще, проидо́сте сквозе́ о́гнь и во́ду и внидо́сте в Ца́рство небе́сное. Те́мже моли́теся, четы́редесяте су́ще страда́льцы, дарова́ти на́м ве́лию ми́лость.

Други́й кано́н, гла́с 2

Пе́снь 1.

Ирмос: Гряди́те лю́дие, пои́м пе́снь Христу́ Бо́гу, разде́льшему мо́ре и наста́вльшему лю́ди, я́же изведе́ из рабо́ты еги́петския, я́ко просла́вися.

Припев: Святии мученицы Севастийстии, молите Бога о нас.

Бо́га на́м, му́ченицы четы́редесяте, ны́не благопреме́нна сотвори́те моли́твами ва́шими, чи́стою се́рдца любо́вию призыва́ющим ва́с.

Припев: Святии мученицы Севастийстии, молите Бога о нас.

На небесе́х трисо́лнечнаго сия́ния заря́ми просвеща́еми, четы́редесяте, на земли́ изме́рзшия зимо́ю напа́стей, покры́йте ны́, пою́щия вы́.

Сла́ва Отцу́ и Сы́ну и Свято́му Ду́ху:

Неразори́ма благоче́стия и непоколеби́мая Це́ркве забра́ла, четы́редесяте, христоимени́тое зва́ние лю́те смуща́емаго ны́не умири́те.

И ны́не и при́сно и во ве́ки веко́в. Ами́нь.

Богородичен: Преесте́ственно над все́ми су́щаго родила́ еси́ Зижди́теля и Го́спода, пло́ть бы́вша на́с ра́ди, челове́к, Де́во Богоро́дице Ма́ти Неискусому́жная.

Пе́снь 3.

Ирмос: Утверди́ на́с в Тебе́, Го́споди, дре́вом умерщвле́й гре́х, и стра́х Тво́й всади́ в сердца́ на́с, пою́щих Тя́.

Припев: Святии мученицы Севастийстии, молите Бога о нас.

Во́инство му́ченическое и спряже́нный ли́че му́ченик венцено́сец, Влады́це предстоя́ще, восхваля́ющия вы́ при́сно спаса́йте.

Припев: Святии мученицы Севастийстии, молите Бога о нас.

Езером страсте́й обурева́емии и волно́ю напа́стей лю́тых, к ва́м, четы́редесятем Христо́вым во́ином, прибега́ем.

Сла́ва Отцу́ и Сы́ну и Свято́му Ду́ху:

В не́дрех Авраа́мовых согрева́емии и сла́вною оде́ждею украша́емии, зимо́ю обстоя́ния свя́занных разреши́ти помоли́теся.

И ны́не и при́сно и во ве́ки веко́в. Ами́нь.

Богородичен: Утвержде́ние бу́ди, и прибе́жище, и покро́в, Де́во Богоневе́сто, ве́рою к Тебе́ прибега́ющим и Бо́жию Тя́ Ма́терь испове́дающим.

Седа́лен, гла́с 8.

Христу́ вво́инившеся му́ченически, врага́ низложи́вше страда́льчески, де́лы испо́лнисте проро́ка глаго́лы: сквозе́ бо о́гнь и во́ду му́жески проидо́сте, поко́й обре́тше, жи́знь нетле́нную. Те́мже небе́сными укра́шшеся венцы́, с ли́ки веселите́ся безпло́тных, блаже́ннии страстоте́рпцы прехва́льнии, моли́те Христа́ Бо́га грехо́в оставле́ние дарова́ти чту́щим любо́вию святу́ю па́мять ва́шу.

Сла́ва, и ны́не, Богородичен:

В напа́сти многоплете́нныя впа́д от вра́г ви́димых и неви́димых, бу́рею одержи́мь безчи́сленных согреше́ний мои́х, и я́ко к те́плому заступле́нию и покро́ву моему́, Чи́стая, ко приста́нищу притека́ю Твоея́ бла́гости. Те́мже, Пречи́стая, из Тебе́ Воплоще́нному безсе́менно моли́ся приле́жно о все́х рабе́х Твои́х, непреста́нно моля́щих Ти ся, Богоро́дице Пречи́стая, моля́щи Его́ при́сно согреше́ний оставле́ние дарова́ти воспева́ющим досто́йно сла́ву Твою́.

Пе́снь 4.

Ирмос: Услы́шах, Го́споди, слу́х Твоего́ смотре́ния, и просла́вих Тя́, Еди́не Человеколю́бче.

Припев: Святии мученицы Севастийстии, молите Бога о нас.

Просвеще́ние на́м, му́ченицы, от Бо́га бы́сте, в сия́ние бо облеко́стеся неприсе́нное.

Припев: Святии мученицы Севастийстии, молите Бога о нас.

Богоизбра́нный, моли́ся, собо́ре му́ченик венцено́сный, изба́вити бе́д воспева́ющия тя́.

Припев: Святии мученицы Севастийстии, молите Бога о нас.

Све́т непристу́пный, святи́и, Христо́в ви́дети сподо́бльшеся, су́щия во тме́ сия́ти удосто́йте.

Сла́ва Отцу́ и Сы́ну и Свято́му Ду́ху:

Облиста́юще, сла́внии, мы́сленным Христа́ светонаставле́нием, к зари́ Боже́ственней руково́дствуйте.

И ны́не и при́сно и во ве́ки веко́в. Ами́нь.

Богородичен: Песносло́вяще, Чи́стая, из утро́бы Твоея́ вопло́щшагося, Тя́ славосло́вим, я́ко Бо́жию Ма́терь.

Пе́снь 5

Ирмос: Све́та Пода́телю, и веко́в Тво́рче, Го́споди, во све́те Твои́х повеле́ний наста́ви на́с: ра́зве бо Тебе́, ино́го Бо́га не зна́ем.

Припев: Святии мученицы Севастийстии, молите Бога о нас.

Неи́стовства ерети́ческаго, четы́редесяте, и ны́не изба́вите Христо́ву честну́ю Це́рковь, в не́йже ро́ждшеся, в толи́ко досто́инство и сла́ву премину́сте.

Припев: Святии мученицы Севастийстии, молите Бога о нас.

Явльшеся на́м, четы́редесяте Христо́вы му́ченицы богоза́рнии, огневи́днии свети́льницы, просвеща́ют ве́рным благоче́стия пу́ть спаси́тельный.

Сла́ва Отцу́ и Сы́ну и Свято́му Ду́ху:

От земли́ преста́вистеся к небе́сней се́ни, му́ченицы, иде́же Христу́ Подвигополо́жнику предстоя́ще, Боже́ственныя мя́ ра́дости улучи́ти сподо́бите.

И ны́не и при́сно и во ве́ки веко́в. Ами́нь.

Богородичен: Яко непостижи́мое и неудобозри́мое вся́кому, Влады́чице, е́же па́че ума́ та́инство, Отрокови́це, Боже́ственнаго Твоего́ рождества́: су́щаго бо вои́стинну Бо́га на́м родила́ еси́.

Пе́снь 6.

Ирмос: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же мя́ возведи́.

Припев: Святии мученицы Севастийстии, молите Бога о нас.

Бо́дрствующии и тре́звеннии храни́телие ро́да челове́ческаго яви́стеся, держа́внии, и моли́твенницы моле́ний, помо́щницы же печа́льных поста́вистеся.

Припев: Святии мученицы Севастийстии, молите Бога о нас.

Непристу́пными сия́юще добро́тами в Це́ркви Христо́ве, всехва́льнии, искуше́ний изба́вите с любо́вию ва́с почита́ющих.

Сла́ва Отцу́ и Сы́ну и Свято́му Ду́ху:

Беся́щихся мучи́телей всеизря́днии дре́вле потреби́телие пре́лести бы́сте, и на́м ны́не по́мощь ско́рая и стена́ бу́дите.

И ны́не и при́сно и во ве́ки веко́в. Ами́нь.

Богородичен: На Тя́ упова́ние возложи́х, Ма́ти Присноде́во, спасе́ния моего́ и Тя́ Предста́тельницу положи́х жи́зни, тве́рду же и непоколеби́му.

Конда́к, гла́с 6.

Все́ во́инство ми́ра оста́вльше, на небесе́х Влады́це прилепи́стеся, страстоте́рпцы Госпо́дни четы́редесять, сквозе́ о́гнь бо и во́ду проше́дше, блаже́ннии, досто́йно восприя́сте сла́ву с небе́с и венце́в мно́жество.

Икос:

На престо́ле непристу́пнем седя́щему, просте́ршему не́бо, я́ко ко́жу, и зе́млю утверди́вшему, и собра́вшему во́ды в со́нмы и́х, вся́ от не су́щих сотво́ршему бы́ти и все́м подаю́щу дыха́ние и живо́т, прие́млющему от арха́нгел пе́ние, и от Ангел покланя́емому, и от все́х сла́вимому, Христу́ Вседержи́телю, Зижди́телю и Бо́гу на́шему, припа́даю, недосто́йный, принося́ мое́ моле́ние, сло́ва благода́ти прошу́: да возмогу́ благоче́стно воспе́ти и а́з святы́я, я́же Са́м показа́в победи́тели, дарова́в и́м сла́ву с небе́с и венце́в мно́жество.

Пе́снь 7.

Ирмос: Образу злато́му, на по́ле Деи́ре служи́му, трие́ Твои́ о́троцы небрего́ша безбо́жнаго веле́ния, посреде́ же огня́ вве́ржени, ороша́еми, поя́ху: благослове́н еси́, Бо́же оте́ц на́ших.

Припев: Святии мученицы Севастийстии, молите Бога о нас.

Наста́ све́тло ле́тняя ва́ша па́мять, всебога́тии, просвеща́ющи дале́че сия́ющая поста́ све́тлостию. Сию́ пра́зднующе ве́рою, с ва́ми воспева́ем: благослове́н еси́, Бо́же оте́ц на́ших.

Припев: Святии мученицы Севастийстии, молите Бога о нас.

Реши́телие страсте́й и свети́льницы, издале́ча сия́ющии, ми́ра очище́ние, пре́лести разруше́ние, велегла́снии и́стины пропове́дницы, лжи́ прогони́телие все́м яви́стеся, пою́ще: благослове́н еси́, Бо́же оте́ц на́ших.

Припев: Святии мученицы Севастийстии, молите Бога о нас.

Свети́ла мы́сленная, сия́юще на́м, яви́стеся, му́ченицы, обурева́емыя спаса́ете и наставля́ете пла́вающия, жития́ волну́ющияся бу́рею, Христу́ воспева́юще: благослове́н еси́, Бо́же оте́ц на́ших.

Сла́ва Отцу́ и Сы́ну и Свято́му Ду́ху:

Красно́ Бо́гу и Ангелом возжеле́нно, четы́редесяте богособра́нное, и богодухнове́нное, и пресве́тлое ополче́ние, боже́ственное и стра́шное всеору́жие вопию́ще и глаго́люще: благослове́н еси́, Бо́же оте́ц на́ших.

И ны́не и при́сно и во ве́ки веко́в. Ами́нь.

Богородичен: Свети́льник Све́та, и о́блак све́тел, и свяще́ния ме́сто показа́ся, Неискусобра́чная, и́бо святы́х Свята́го Сло́ва прия́т несказа́нно. Его́же пою́ще, взыва́ем: благослове́н еси́, Бо́же оте́ц на́ших.

Пе́снь 8.

Ирмос: В пе́щь о́гненную ко отроко́м евре́йским снизше́дшаго, и пла́мень в ро́су прело́жшаго Бо́га, по́йте дела́, я́ко Го́спода, и превозноси́те во вся́ ве́ки.

Припев: Святии мученицы Севастийстии, молите Бога о нас.

Претво́ршеся к жи́зни и́стинней, е́же о Христе́ ны́не сокрове́нней, к зи́мней и боле́зненней кончи́не, до́блии, кре́пко вда́стеся, спасе́ния и оставле́ния прося́ще на́м.

Припев: Святии мученицы Севастийстии, молите Бога о нас.

От земли́ к небе́сным преше́дше, страда́льцы венцено́сцы, Це́ркви му́ченик победоно́сных ли́че, бе́д, страсте́й, обстоя́ний избавле́ния проси́те на́м и спасе́ния.

Припев: Святии мученицы Севастийстии, молите Бога о нас.

Расто́рг сме́рти у́зы Спа́с, страда́льцем побе́ды подаде́ на сме́рть: четы́редесять бо, мра́зом согрева́еми, поя́ху и спасе́ния все́м ве́рным прося́ще.

Сла́ва Отцу́ и Сы́ну и Свято́му Ду́ху:

Напа́стей прило́ги, нападе́ние страсте́й, де́монов искуше́ния боже́ственный страстоно́сец ли́к моли́твою изыма́ет я́ве от пою́щих Христа́ во ве́ки.

И ны́не и при́сно и во ве́ки веко́в. Ами́нь.

Богородичен: Умерщвле́нныя и к пе́рсти сме́ртней и тле́нию сведе́нныя воскреси́ла еси́, еди́на, Нача́льника жи́зни ро́ждши, Христа́ Бо́га на́шего, Влады́чице Де́во, Чи́стая Богороди́тельнице.

Песнь 9

Ирмос: От Бо́га Бо́га Сло́ва, неизрече́нною му́дростию прише́дшаго обнови́ти Ада́ма, я́дию в тле́ние па́дшаго лю́те, от Святы́я Де́вы неизрече́нно воплоти́вшагося на́с ра́ди, ве́рнии, единому́дренно пе́сньми велича́ем.

Припев: Святии мученицы Севастийстии, молите Бога о нас.

Преесте́ственныя зари́, и ра́дости несказа́нныя, и сла́вы сподо́бистеся улучи́ти, ны́не же любо́вию чту́щия ва́с напа́стей, и бе́д, и лука́вствия изба́вите вра́жия, Христо́вы во́ини, му́ченицы четы́редесяте.

Припев: Святии мученицы Севастийстии, молите Бога о нас.

Си́лу, пребога́тии, Боже́ственную с небесе́ прие́мше и кре́пость, соу́зницы Христо́вы, льсти́ прогони́телие бы́сте, отгоня́ще вся́ку и́дольскую мглу́ непостоя́нную и просвеща́юще ми́р, му́ченицы четы́редесяте.

Припев: Святии мученицы Севастийстии, молите Бога о нас.

Укра́шшеся добро́тою честна́го муче́ния и Боже́ственнаго прича́стницы бы́вше естества́, вои́стинну ра́дуетеся, Све́ту сраствори́вшеся светле́йшему и чи́стому, Христо́вы во́ини, му́ченицы четы́редесяте.

Сла́ва Отцу́ и Сы́ну и Свято́му Ду́ху:

Ны́не Христу́ предстоя́ще благочести́вым дерзнове́нием и отону́ду Божества́ све́том облиста́еми, сла́внии, восхваля́ющия вы́ заре́ю освети́тися трисия́нною, приле́жно моли́те, му́ченицы четы́редесяте.

И ны́не и при́сно и во ве́ки веко́в. Ами́нь.

Богородичен: Явльшийся, Де́во, души́ моея́ примра́к све́та Твоего́ невеще́ственными блиста́ньми озари́, две́ре Боже́ственнаго Све́та, и огня́ ве́чнаго изба́витися сподо́би, Чи́стая, ве́рою и любо́вию пе́сньми Тя́ велича́ющаго.

Свети́лен.

Десяти́цу четверочи́сленную, победоно́сный по́лк, во́инство святы́х му́ченик воспои́м досто́йно, огне́м бо, и сту́дению, и водо́ю посрами́ша вражде́бных полки́ и от Христа́ Спа́са венцы́ прия́ша сла́вы.

Сла́ва:

Ли́к четверодесяточи́сленный му́чеников четы́редесяти, Пребоже́ственныя Тро́ицы доброде́телей четвери́чных, огня́, возду́ха, воды́ и земли́, стихи́й четы́рех, пе́сньми боже́ственными да воспое́тся, я́ко за Христа́ пострада́вший, все́х Влады́це.

И ны́не, Богородичен:

Влады́ку всея́ тва́ри ро́ждши, Ма́ти Де́во, и вся́ческих, я́ко су́щи Отрокови́ца, о Влады́чице Богоро́дице, страсте́й мучи́тельствующих мя́ исхити́ и проводи́ к милосе́рдия осия́нию и к прекра́сной Па́сце воскре́сшаго Сы́на Твоего́.

Молитва 40 мученикам Севастийским

О, святи́и, сла́внии страстоте́рпцы Христо́вы, четы́редесяте, во гра́де Севасти́и Христа́ ра́ди му́жественно пострада́вшии, чрез огнь бо и во́ду проидо́сте, и я́ко дру́зи Христо́вы в поко́й Небе́снаго Ца́рствия вше́дше, и́мате ве́лие дерзнове́ние ко Пресвяте́й Тро́ице хода́тайствовати о ро́де христиа́нском: наипа́че же о почита́ющих святу́ю па́мять ва́шу, и с ве́рою и любо́вию вас призыва́ющих. Испроси́те у всеще́драго Бо́га проще́ние согреше́ний на́ших и жития́ на́шего исправле́ние, да в покая́нии и нелицеме́рной любви́ друг ко дру́гу пожи́вше, со дерзнове́нием предста́нем Стра́шному Суди́щу Христо́ву, и ва́шим предста́тельством одесну́ю Пра́веднаго Судии́ предста́нем. Ей, уго́дницы Бо́жии, бу́дите нам защи́тницы от всех враг ви́димых и неви́димых, да под кро́вом святы́х ва́ших моли́тв изба́вимся от всех бед, зол и напа́стей до после́дняго дне жи́зни на́шея, и та́ко просла́вим вели́кое и достопокланя́емое и́мя Вседе́тельныя Тро́ицы, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.