Шрифт

21 марта.

Канон преподобному исповеднику Феофилакту, епископу Никомидийскому.

Преподобному исповеднику Феофилакту, епископу Никомидийскому
Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 6:

Тая́ся, пожи́л еси́, прехва́льне, но Христо́с тя́ показа́, я́ко свети́ло на све́щнице мы́сленнем, и скрижа́ли ти́ вручи́ уче́ний духо́вных, ими́же, озари́ и на́с.

Кано́н. Гла́с 8.

Пе́снь 1.

Ирмос: Пои́м Го́сподеви, прове́дшему лю́ди Своя́ сквозе́ Чермно́е мо́ре, я́ко Еди́н сла́вно просла́вися.

Припев: Преподобне исповедниче Феофилакте, моли Бога о нас.

Престо́лу Влады́чню, о́тче богоно́се Феофила́кте, предстоя́, ве́рою соверша́ющия па́мять твою́ сохрани́.

Припев: Преподобне исповедниче Феофилакте, моли Бога о нас.

Пома́за тя́ досто́йно благода́ть Ду́ха, всеблаже́нне, и́стины ра́ди и нра́вов твои́х ра́ди бла́гости.

Сла́ва Отцу́ и Сы́ну и Свято́му Ду́ху:

Да небе́сная, блаже́нне, получи́ши, земна́я попра́л еси́ вся́ и Христу́ Бо́гу после́довал еси́.

И ны́не и при́сно и во ве́ки веко́в. Ами́нь.

Богородичен: Ве́сь жела́ние, Иже из чре́ва Твоего́, Богоневе́стная, благоизво́лив роди́тися, сла́дость е́сть и Све́т незаходи́мый.

Пе́снь 3.

Ирмос: Ты́ еси́ утвержде́ние притека́ющих к Тебе́, Го́споди, Ты́ еси́ све́т омраче́нных, и пое́т Тя́ ду́х мо́й.

Припев: Преподобне исповедниче Феофилакте, моли Бога о нас.

Зако́ном ты́ повину́яся Влады́ки твоего́, сла́вне архиере́е, о зако́нех царе́й пребеззако́нных небре́гл еси́.

Припев: Преподобне исповедниче Феофилакте, моли Бога о нас.

Боже́ственное изображе́ние Христо́во и Пречи́стое почита́л еси́ че́стне, нече́ствующих нече́стия отмета́яся.

Сла́ва Отцу́ и Сы́ну и Свято́му Ду́ху:

Претерпе́л еси́ муче́ние со́вести пе́рвее по́стнически и ны́не му́ченическим увя́злся еси́ венце́м.

И ны́не и при́сно и во ве́ки веко́в. Ами́нь.

Богородичен: Да стезю́, Влады́ко, к святы́ни веду́щую, пока́жеши на́м, во утро́бу Пречи́стую всесвя́то всели́лся еси́.

Седа́лен, гла́с 8.

Пости́вся, преподо́бне о́тче му́дре, иера́рх пома́зался еси́, священноде́йствовати Боже́ственная та́инства, душа́м в снабде́ние. Христо́ву же ико́ну почествова́в, претерпе́л еси́ изгна́ния, ско́рби и многовре́менное заключе́ние. Те́мже, по кончи́не источа́я исцеле́ния, цели́ши стра́ждущия и просвеща́еши пою́щия, святи́телю Феофила́кте; моли́ Христа́ Бо́га грехо́в оставле́ние пода́ти чту́щим любо́вию святу́ю па́мять твою́.

Сла́ва, и ны́не, Богородичен:

В напа́сти многоплете́нныя впа́д от вра́г ви́димых и неви́димых, бу́рею одержи́мь безчи́сленных согреше́ний мои́х, и я́ко к те́плому заступле́нию и покро́ву моему́, Чи́стая, ко приста́нищу притека́ю Твоея́ бла́гости. Те́мже, Пречи́стая, из Тебе́ воплоще́нному безсе́менно моли́ся приле́жно о все́х рабе́х Твои́х, непреста́нно моля́щих Ти ся, Богоро́дице Пречи́стая, моля́щи Его́ при́сно согреше́ний оставле́ние дарова́ти воспева́ющим досто́йно сла́ву Твою́.

Пе́снь 4.

Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Припев: Преподобне исповедниче Феофилакте, моли Бога о нас.

Не устраши́лся еси́ огня́ искуше́ний, всеблаже́нне богодохнове́нне, не разсла́би си́лу твою́ пи́щная сла́дость, Феофила́кте.

Припев: Преподобне исповедниче Феофилакте, моли Бога о нас.

Храни́ло твои́м усто́м положи́ Бо́г, и устна́ма, преподо́бне, те́мже пребы́л еси́ непоколеби́мь нечести́вым, ста́вшим проти́ву тебе́.

Сла́ва Отцу́ и Сы́ну и Свято́му Ду́ху:

Терпя́, претерпе́л еси́ и́же на ка́мени но́зе твои́ поста́вльшаго, и вня́т тебе́ Вы́шний, Того́ о́бразу покло́ншуся.

И ны́не и при́сно и во ве́ки веко́в. Ами́нь.

Богородичен: Изба́вльшеся Рождество́м Твои́м грехо́внаго до́лга, Пренепоро́чная, ра́достно воспева́ние возсыла́ем Ти́, Богоневе́стная.

Пе́снь 5

Ирмос: Утренююще, вопие́м Ти́: Го́споди, спаси́ ны, Ты́ бо еси Бо́г на́ш, ра́зве Тебе́, ино́го не ве́мы.

Припев: Преподобне исповедниче Феофилакте, моли Бога о нас.

Ру́це твои́, преподо́бне богодохнове́нне, к Зижди́телю, о́тче, возде́емы, злочести́выя победи́ша.

Припев: Преподобне исповедниче Феофилакте, моли Бога о нас.

Держа́в ру́ку твою́, Вы́шний, богоно́се о́тче, наста́ви тя́ к небе́сному наслажде́нию.

Сла́ва Отцу́ и Сы́ну и Свято́му Ду́ху:

Стезю́ те́сную, Феофила́кте, ше́ствовав, к широте́ дости́гл еси́ рая́, чу́дне.

И ны́не и при́сно и во ве́ки веко́в. Ами́нь.

Богородичен: Тя́, Богоро́дицу, неве́дущии, Богома́ти, Све́та не и́мут ви́дети, ро́ждшагося из Тебе́, Пречи́стая.

Пе́снь 6.

Ирмос: Ри́зу мне́ пода́ждь све́тлу, одея́йся све́том, я́ко ри́зою, многоми́лостиве Христе́ Бо́же на́ш.

Припев: Преподобне исповедниче Феофилакте, моли Бога о нас.

Умертви́в чу́вствия воздержа́нно, над страстьми́ ца́рствовал еси́ и ны́не, Феофила́кте, безстра́стия наслажда́ешися светлостьми́.

Припев: Преподобне исповедниче Феофилакте, моли Бога о нас.

Образу Спа́сову покланя́тися вся́ научи́л еси́, де́лы и уче́нии просия́в я́ве, Феофила́кте.

Сла́ва Отцу́ и Сы́ну и Свято́му Ду́ху:

Облак тя́, ту́чу жи́зни источа́ющь, Христо́с показа́, о́тче, святи́телю Бо́жий Феофила́кте.

И ны́не и при́сно и во ве́ки веко́в. Ами́нь.

Богородичен: Красе́н па́че все́х челове́к Сы́н Тво́й, Пречи́стая, добро́тою Божества́, а́ще и пло́ть на́с ра́ди бы́сть.

Конда́к, гла́с 2.

Свети́льник све́тел показа́лся еси́ в конце́х, святи́телю Феофила́кте, единосу́щна Отцу́ и Ду́ху Сло́ва ты́ пропове́дав, боже́ственных оте́ц собо́р уясни́л еси́, Тро́ице уго́дник яви́лся еси́. Ейже предстоя́, моли́ непреста́нно о все́х на́с.

Пе́снь 7.

Ирмос: Отроцы евре́йстии в пещи́ попра́ша пла́мень дерзнове́нно и на ро́су о́гнь преложи́ша, вопию́ще: благослове́н еси́, Го́споди Бо́же, во ве́ки.

Припев: Преподобне исповедниче Феофилакте, моли Бога о нас.

Тече́ние Боже́ственное соверши́в и ве́ру твою́ соблю́д до конца́, твои́х боле́зней, му́дре, прия́л еси́ вене́ц, зовы́й: благослове́н еси́, Го́споди Бо́же, во ве́ки.

Припев: Преподобне исповедниче Феофилакте, моли Бога о нас.

На колесни́це Боже́ственных доброде́телей е́здяй, к высоте́ возне́слся еси́, Бо́гу же ны́не предстои́ши, зовы́й: благослове́н еси́, Го́споди Бо́же, во ве́ки.

Сла́ва Отцу́ и Сы́ну и Свято́му Ду́ху:

Ве́сть Созда́вый наедине́ сердца́ челове́ков, богоно́се, се́рдца твоего́ Боже́ственное и на престо́лех уче́ния посади́, Феофила́кте треблаже́нне.

И ны́не и при́сно и во ве́ки веко́в. Ами́нь.

Богородичен: К Тебе́ ны́не прибега́ю, Богоро́дице, и покро́ву Твоему́, и боже́ственному предста́тельству, изба́витися от лю́тых молю́ся прегреше́ний, Благослове́нная Всечи́стая, Бо́га пло́тию ро́ждшая.

Пе́снь 8.

Ирмос: Седмери́цею пе́щь халде́йский мучи́тель, Богочести́вым неи́стовно разжже́; си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Припев: Преподобне исповедниче Феофилакте, моли Бога о нас.

Иде́же веселя́щихся жили́ще, ны́не всели́лся еси́, испове́дниче и и́стины побо́рниче, и све́т тебе́ возсия́, я́коже пра́веднику, всему́дре, и му́ченическия пострада́вшу по́двиги, с ни́миже и взыва́еши: свяще́нницы, благослови́те, лю́дие, превозноси́те во вся́ ве́ки.

Припев: Преподобне исповедниче Феофилакте, моли Бога о нас.

Терпе́ния вене́ц прия́л еси́, богоприя́тне, во изгна́ния бо го́рькая всели́лся еси́, мзды́ ожида́я восприя́ти страда́ний твои́х, и благи́я не погреши́л еси́ наде́жды, Христу́ ны́не взыва́я: свяще́нницы, благослови́те, лю́дие, превозноси́те во вся́ ве́ки.

Сла́ва Отцу́ и Сы́ну и Свято́му Ду́ху:

Светоявле́нне па́мять твоя́, богоно́се, соверша́ется ны́не, испове́дания све́том светя́щися, святы́й бо о́браз Христо́в поче́л еси́, и Богоро́дицы, и святы́х все́х, с ни́миже ны́не воспева́еши: свяще́нницы, благослови́те, лю́дие, превозноси́те во вся́ ве́ки.

И ны́не и при́сно и во ве́ки веко́в. Ами́нь.

Богородичен: Богома́ти Пречи́стая, души́ моея́ я́звы и грехо́вныя стру́пы истреби́, Бо́га ро́ждшая, су́щаго над все́ми, Отрокови́це Чи́стая, от деви́ческих, Неискусобра́чная, ложе́сн. Его́же о́троцы благословя́т, свяще́нницы воспева́ют, лю́дие превозно́сят во вся́ ве́ки.

Песнь 9

Ирмос: Вои́стинну Богоро́дицу, Тя́ испове́дуем, спасе́ннии Тобо́ю, Де́во Чи́стая, с безпло́тными ли́ки Тя́ велича́юще.

Припев: Преподобне исповедниче Феофилакте, моли Бога о нас.

Вели́ких дарова́ний, о́тче, сподо́бился еси́, за Христа́ бе́дствовав умо́м терпели́вым, богоно́се богоблаже́нне.

Припев: Преподобне исповедниче Феофилакте, моли Бога о нас.

На́с, пою́щих тя́, блаже́нне, назира́й, от напа́стей и бе́д избавля́я, ерети́ческая сокруша́я кова́рства.

Сла́ва Отцу́ и Сы́ну и Свято́му Ду́ху:

Целому́дренно и пра́ведно, я́ко свяще́нник явле́н пожи́в, му́чениче, бы́л еси́ све́тел, багряни́цу себе́ истка́в от крове́й твои́х.

И ны́не и при́сно и во ве́ки веко́в. Ами́нь.

Богородичен: Яко у́тро, су́щим во тме́ и заблу́ждшим, Пра́вды Со́лнце иму́щи, на объя́тиих нося́щи, Де́во, Христа́, возсия́ла еси́.

Молитва

О свяще́нная главо́, преподо́бне о́тче, испове́дниче Феофилакте, не забу́ди убо́гих твои́х до конца́, но помина́й нас всегда́ во святы́х и благоприя́тных моли́твах к Бо́гу: помяни́ ста́до твое́, е́же сам упа́сл еси́, и не забу́ди посеща́ти чад твои́х моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ ду́ша со а́нгельскими во́инствы, со безпло́тными ли́ки, с небе́сными си́лами, у престо́ла Вседержи́телева предстоя́щи, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.

Окончание

По прочтении канона и молитвы, чти:

Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:

Го́споди, поми́луй, трижды.

И отпуст.

Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.

Преподобному исповеднику Феофилакту, епископу Никомидийскому