Шрифт

1 марта

Канон праведному Василию Павлово-Посадскому

Святому праведному Василию Павлово-Посадскому
Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропарь, глас 4:

Божественною свыше просветився благодатию/ и образ жития евангельскаго показав,/ правыя веры ревнитель/ и расколов врачеватель явился еси,/ праведне отче Василие./ Моли Человеколюбца Бога/ даровати душам нашим велию милость.

Величание:

Величаем тя,/ святый праведне Василие,/ и чтим святую память твою,/ ты бо молиши за нас/ Христа Бога нашего.

Стихира, глас 6:

Свыше просветився Божественною благодатию,/ разум совершен стяжал еси,/ Василие отче наш,/ темже, в мори житейстем преплавая,/ добрый кормчий верным явился еси/ и утопающим в бездне греховней/ надежду спасения подавал еси./ Ныне же, Небеснаго пристанища достиг,/ моли Человеколюбца Бога/ спастися душам нашим.

Канон, глас 8.

Песнь 1

Ирмос: Воду прошед, яко сушу,/ и египетскаго зла избежав,/ израильтянин вопияше:/ Избавителю и Богу нашему поим.

Припев: Святый праведный Василие, моли Бога о нас.

Слове Божий, Иисусе Христе,/ отверзи ми ум и даждь ми слово,/ да воспою память угодника Твоего, праведнаго Василия.

Припев: Святый праведный Василие, моли Бога о нас.

От добраго корене прозябл еси, святе Василие,/ темже, благочестие родителей твоих унаследовав,/ издетска добронравное житие возлюбил еси.

Сла́ва Отцу́ и Сы́ну и Свято́му Ду́ху:

Христос, Агнец Божий, вземляй грехи мира, доброту души твоя провидя,/ милостивно призре на тя, праведне Василие,/ и сугубую благодать подаде.

И ны́не и при́сно и во ве́ки веко́в. Ами́нь.

Богородичен: Образ чистаго Рождества Твоего, Пресвятая Дево,/ пророцы предначерташа многовидно,/ с нимиже Тя ублажаем.

Песнь 3

Ирмос: Небеснаго круга Верхотворче Господи,/ и Церкве Зиждителю,/ Ты мене утверди в любви Твоей,/ желаний краю, верных утверждение,/ Едине Человеколюбче.

Припев: Святый праведный Василие, моли Бога о нас.

Видев злую смерть хулителя иконы Богоматере и внимая гласу Божию,/ устрашился еси грядущаго воздаяния, отче Василие,/ и к покаянию притекл еси.

Припев: Святый праведный Василие, моли Бога о нас.

Божественнаго гласа послушав,/ в Берлюковскую пустынь устремился еси, святе,/ и тамо, душу слезами очистив,/ на Господа все упование возложил еси.

Сла́ва Отцу́ и Сы́ну и Свято́му Ду́ху:

На камени веры твердое основание положив,/ храм души твоея добродетельми украсил еси, праведне Василие./ Темже в скорбех и напастех непоколебим пребыл еси.

И ны́не и при́сно и во ве́ки веко́в. Ами́нь.

Богородичен: Лествица, юже древле образно Иаков виде, явилася еси, Богоневесто,/ Тобою бо к нам Бог сниде/ и нам небовосходен путь сотвори.

Седален, глас 3:

Мытареву покаянию подражая,/ страх Божий и смирение стяжал еси, праведне Василие,/ темже, и душу слезами очистив,/ плод обилен израстил еси/ и многия заблуждшия к вере истинней привел еси./ Моли Христа Бога спастися душам нашим.

Слава, и ныне, Богородичен:

Теплая Предстательнице и непобедимая,/ Упование известное и непоколебимое,/ Стено и Покрове и Пристанище прибегающим к Тебе, Приснодево Чистая,/ Сына Твоего и Бога моли со ангелы,/ умирение дати миру, и спасение, и велию милость.

Песнь 4

Ирмос: Услышах, Господи,/ смотрения Твоего таинство,/ разумех дела Твоя/ и прославих Твое Божество.

Припев: Святый праведный Василие, моли Бога о нас.

Совет наставника твоего,/ еже в мире жити и Церковь от неправых учений защищати,/ со тщанием соблюл еси, святе Василие,/ и многия люди во истинней вере утвердил еси.

Припев: Святый праведный Василие, моли Бога о нас.

Закон Бога Живаго на скрижалех сердца твоего написал еси, праведне Василие,/ и, в заповедех Его усердно поработав,/ Небеснаго Иерусалима достигл еси.

Сла́ва Отцу́ и Сы́ну и Свято́му Ду́ху:

Апостольское слово, еже не любити мира, ни яже в мире сем, всегда памятствуя,/ противу похотей плоти и козней диавола крепце вооружился еси, святе,/ и воин Христов непобедим явился еси.

И ны́не и при́сно и во ве́ки веко́в. Ами́нь.

Богородичен: К Тебе, Госпоже Пречистая, с верою прибегаем и умильно вопием:/ радуйся, Благодатная Богородице Дево, Покрове и Ограждение,/ Помощнице и Спасение душ наших.

Пе́снь 5

Ирмос: Просвети нас повелении Твоими, Господи,/ и мышцею Твоею высокою/ Твой мир подаждь нам,/ Человеколюбче.

Припев: Святый праведный Василие, моли Бога о нас.

Чтением слова Божия и писаньми святых отец просветився, праведне Василие,/ во искушениих мужески подвизался еси/ и началозлобнаго врага посрамил еси.

Припев: Святый праведный Василие, моли Бога о нас.

Светом Христовым осиян и благодатию Божиею просвещен, святе Василие,/ духовныма очима сокровенная зрел еси,/ ближния от злых обстояний ограждая.  

Сла́ва Отцу́ и Сы́ну и Свято́му Ду́ху:

Свет добродетельнаго жития твоего, отче Василие,/ единомудренную братию собра./ Тии же, подвигу твоему ревнующе,/ молитве и благочестию навыкоша.

И ны́не и при́сно и во ве́ки веко́в. Ами́нь.

Богородичен: Исцели, Чистая, душевныя наша страсти/ и телесныя немощи уврачуй,/ и спасение подаждь молитвами Твоими.

Песнь 6

Ирмос: Молитву пролию ко Господу/ и Тому возвещу печали моя,/ яко зол душа моя исполнися,/  и живот мой аду приближися,/ и молюся, яко Иона:/ от тли, Боже, возведи мя.

Припев: Святый праведный Василие, моли Бога о нас.

Злыя наветы, поношения и темничныя узы претерпел еси, святе,/ от лжебратии яко еретик оклеветаемь./ Обаче терпением и любовию вся превозмогл еси.

Припев: Святый праведный Василие, моли Бога о нас.

Ни пустынножителя, ни пастыря,/ но в мирстем чине делателя постави тя Премудрый Господь, блаженне Василие./ Ты же, добре потрудився,/ во ограду Церкве многия возвратил еси.

Сла́ва Отцу́ и Сы́ну и Свято́му Ду́ху:

Взыскуя иноческаго жительства,/ суеты мира сего удалитися возжелал еси, святе Василие./ Обаче, волю Божию от святаго Харалампия уведев,/ со усердием людем послужил еси.

И ны́не и при́сно и во ве́ки веко́в. Ами́нь.

Богородичен: Иже мирови мир подавшая/ и Начальника тишины рождшая,/ укроти волны страстей моих, Чистая,/ и на камени мя безстрастия утверди.

Кондак, глас 2:

Соблазны лукаваго века сего отверг/ и слезами покаяния ризы твоя убелив,/ приял еси от Бога многая дарования:/ недужныя исцеляти/ и совет благоразумен требующим подавати./ Ныне же, радуяся со ангелы,/ моли Господа, Василие праведне,/ даровати нам покаяние и велию милость.

Икос:

Ум и сердце имея Духом Святым просвещенныя,/ служил еси Богу и людем преподобием и правдою, отче Василие,/ и путем тесным шествовал еси, яко истинный ученик Христов./ Темже и Бог тя прослави/ и даром прозрения и исцеления обогати,/ мы же вопием ти:/ радуйся, угодниче Христов, Василие.

Песнь 7

Ирмос: От Иудеи дошедше отроцы/ в Вавилоне иногда/ верою Троическою пламень пещный попраша, поюще:/ отцев, Боже, благословен еси.

Припев: Святый праведный Василие, моли Бога о нас.

Нищету Христову возлюбив, праведне Василие,/ дом Духа Святаго явился еси,/ темже мудрый наставник людем,/ защитник обидимым и добрый помощник бедным показался еси.

Припев: Святый праведный Василие, моли Бога о нас.

Праведная жизнь твоя в вере и любви к Богу сродника твоего укрепи, святе Василие./ Ты же, мудрым советом того назидая,/ искати Царствия Небеснаго призывал еси.

Сла́ва Отцу́ и Сы́ну и Свято́му Ду́ху:

Бегая суеты мира сего, праведне Василие,/ Христа всем сердцем взыскал еси./ Ныне же, во славе Ему предстоя, взываеши:/ благословен еси, Господи Боже, во веки.

И ны́не и при́сно и во ве́ки веко́в. Ами́нь.

Богородичен: Божественными сиянии ангельских воинств обступаема/ и с чинми пророк и апостол честно службу приемлющи,/ Мати Божия, посети нас, Твоих раб,/ молящи Христа Бога нашего даровати нам велию милость.

Песнь 8

Ирмос: Царя Небеснаго,/ Егоже поют вои ангельстии,/ хвалите и превозносите во вся веки.

Припев: Святый праведный Василие, моли Бога о нас.

Аще и приял еси часть имения сродника твоего, святе Василие,/ обаче тленному богатству сердцем твоим не прилепился еси/ и сущим в нуждах щедрый податель был еси.

Припев: Святый праведный Василие, моли Бога о нас.

Подвигу преподобных отец ревнуя/ и слово святителя Филарета исполняя,/ основание иноческому жительству положил еси, праведне Василие,/ и вкупе с единомысленными братиями богоугодне пожил еси.

Сла́ва Отцу́ и Сы́ну и Свято́му Ду́ху:

Все упование на Бога возлагая, отче Василие,/ тяжкую болезнь со смирением терпел еси, благодарне взывая:/ Господи, Ты еси Прибежище от скорби, обдержащия мя. 

И ны́не и при́сно и во ве́ки веко́в. Ами́нь.

Богородичен: Немощным Крепость Ты воистинну, Пречистая Богомати,/ сего ради и мы, смиреннии, Тобою возвышаемся,/ всем Ты еси Покров и к Богу Ходатаица.

Песнь 9

Ирмос: Воистинну Богородицу,/ Тя исповедуем,/ спасеннии Тобою, Дево Чистая,/ с безплотными лики Тя величающе.

Припев: Святый праведный Василие, моли Бога о нас.

Прежде отшествия твоего, отче Василие,/ поучал еси братию любити слово Божие и молитву,/ хранити единомыслие и единодушие./ Темже и нас в сих добродетелех укрепи, молим тя.

Припев: Святый праведный Василие, моли Бога о нас.

Память смертную стяжав, страха Божия исполнился еси,/ имже возмогл еси, святе Василие, мимотекущия сласти мира сего нивочтоже вменити/ и козни вражия мужественне препобедити.

Сла́ва Отцу́ и Сы́ну и Свято́му Ду́ху:

В житии от Христа не отлучался еси, праведне Василие,/ в час кончины твоея во причастии Животворящих Таин с Ним соединился еси/ и ныне в Царствии Небеснем истее Пасхи нетленныя наслаждаешися.

И ны́не и при́сно и во ве́ки веко́в. Ами́нь.

Богородичен: Помяни нас в молитвах Твоих, Госпоже Дево Богородице,/ да не погибнем за умножение грехов наших./ Покрый нас от всякаго зла и лютых напастей,/ на Тя бо уповаем.

Светилен:

Яко светильник пресветлый, во мраце жития сего явился еси, праведне Василие,/ светом евангельским души заблуждших просвещая/ и в ограду церковную приводя./ Моли Христа Бога, да чада Света явимся.

Слава, и ныне, Богородичен:

Явилася еси, Богородице Дево, Вместилище Божественнаго Света,/ мглу души моея светом невещественным озари/ и вечнаго огня избави.

Молитва

О, пречудный угодниче Христов Василие! Ты, заповеди Господни возлюбив и иго Христово благое на рамо прием, в мире праведно пожил еси и, в подвизех потрудився, дары благодати от Бога приял еси. О спасении же заблуждших ревновавый, ты многия во ограду церковную возвратил еси. Темже Господь тя прослави и многими чудесы обогати.

Ныне же, престолу Божию предстоя, моли Пресвятую Троицу, да сохранит Отечество наше в мире глубоце, да утвердит в нем веру Православную, Церковь Русскую да соблюдет от расколов и ересей непоколебиму. Нам же, к раце мощей твоих припадающим и чтущим любовию святую память твою, дарует время на покаяние и в добродетелех преспеяние, да, в мире сем богоугодне поживше, Царствия Небеснаго достигнем, идеже вкупе с тобою прославим Отца и Сына и Святаго Духа во веки веков. Аминь.

Окончание

По прочтении канона и молитвы, чти:

Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:

Го́споди, поми́луй, трижды.

И отпуст.

Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.

Святому праведному Василию Павлово-Посадскому