1 марта.

Канон священномученику Памфилу Кесарийскому пресвитеру и иже с ним.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропарь, глас 4:

И нpа́вом пpича́стник,/ и пpесто́лом наме́стник апо́столом быв,/ дея́ние обpе́л еси́, Богодухнове́нне,/ в виде́ния восхо́д,/ сего́ pа́ди сло́во и́стины испpавля́я,/ и ве́pы pа́ди постpада́л еси́ да́же до кpо́ве,/ священному́чениче Памфиле,/ моли́ Хpиста́ Бо́га// спасти́ся душа́м на́шим.

Кано́н. Гла́с 4.

Пе́снь 1.

Ирмос: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зными Моисе́овыма рука́ма Амали́кову си́лу в пусты́ни победи́л е́сть.

Припев: Священномучениче Памфиле, моли Бога о нас.

Си́лою Всесвята́го Ду́ха дванадесяточи́сленный собра́вся по́лк, кре́пко злочести́вых безбо́жное и лука́вое ополче́ние я́ко победоно́сец победи́.

Припев: Священномучениче Памфиле, моли Бога о нас.

Посрами́ся, страстоте́рпцем му́чеником вра́г прирази́вся, сво́й бо ту́л льсти́вый испраздни́в горча́йше, низложи́ти не возмо́же до́блейших кре́пости.

Сла́ва Отцу́ и Сы́ну и Свято́му Ду́ху:

Гне́в е́ллинскаго шата́ния попра́сте Боже́ственным ра́зумом му́ченицы Христо́вы и му́дростию укра́шени, е́йже проти́витися не возмого́ша благоче́стию проти́вницы.

И ны́не и при́сно и во ве́ки веко́в. Ами́нь.

Богородичен: Облак, пра́вды Со́лнце на́м возсия́вшую, Отча Сы́на Единоро́днаго, Богоро́дице Всепе́тая, всеблагоче́стно сла́вяще, вы́ну Тя́ блажи́м.

Пе́снь 3.

Ирмос: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище, и утвержде́ние.

Припев: Священномучениче Памфиле, моли Бога о нас.

Просия́л еси́ благоче́стно де́лом, и сло́вом, и честны́м пома́занием, му́чениче Христо́в Памфи́ле, свяще́нства, богому́дре.

Припев: Священномучениче Памфиле, моли Бога о нас.

Якоже цевни́ца всеблаголе́пна, испове́данием устро́ена, пою́щи веща́ния, Христо́вы му́ченицы со́брани бы́сте.

Сла́ва Отцу́ и Сы́ну и Свято́му Ду́ху:

Теку́ще к ра́зуму небе́снаго и честна́го зва́ния, я́ко победи́телие вене́ц от Влады́ки прия́сте.

И ны́не и при́сно и во ве́ки веко́в. Ами́нь.

Богородичен: Всели́ся в ны́ в вы́шних Живы́й, Пречи́стая, вы́ше естества́, пло́ть бо из Тебе́ прие́м, облече́ся.

Седа́лен, гла́с 4.

Дванадеся́тный ли́к боже́ственных му́ченик, вои́стинну проти́ву мучи́телей враго́в ополчи́вся тве́рдо, си́х ору́жии ве́ры победи́ и, венце́м от Бо́га оде́явся, Ангельским же лико́м причте́ся. С ни́миже мо́лит всегда́ изба́витися от напа́стей же, и скорбе́й, и ве́чных му́к того́ блажа́щим.

Сла́ва, и ны́не, Богородичен:

Удиви́ся Ио́сиф, е́же па́че естества́ зря́ и внима́ше мы́слию, и́же на руно́ до́ждь, в безсе́менном зача́тии Твое́м, Богоро́дице, купину́, огне́м неопали́мую, же́зл Ааро́нов прозя́бший, и, свиде́тельствуя, обру́чник Тво́й и храни́тель свяще́нником взыва́ше: Де́ва ражда́ет и по Рождестве́ па́ки Де́ва пребыва́ет.

Пе́снь 4.

Ирмос: Вознесе́на Тя́ ви́девши Це́рковь на Кресте́, Со́лнце Пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.

Припев: Священномучениче Памфиле, моли Бога о нас.

Укра́шено Боже́ственными апо́стол и проро́к дарова́ньми, ликостоя́ние яви́ся му́ченик Твои́х, си́х равночи́сленно, Влады́ко, я́вльшееся промышле́нием Твои́м.

Припев: Священномучениче Памфиле, моли Бога о нас.

От разли́чных собра́вшеся жи́тельств, я́ко вма́ле всеце́л о́браз Це́ркве спаса́ти сподо́бистеся, согла́сно зову́ще: сла́ва си́ле Твое́й, Го́споди.

Сла́ва Отцу́ и Сы́ну и Свято́му Ду́ху:

Направля́емь дла́нию Влады́ки, и́же Того́ ра́ди во́льную сме́рть подъя́т собо́р прехва́льный му́чеников, взыва́юще: сла́ва си́ле Твое́й, Го́споди.

И ны́не и при́сно и во ве́ки веко́в. Ами́нь.

Богородичен: Богоглаго́ланьми оглаша́еми, Богоро́дице, и́же о Тебе́, и ви́дяще си́х сбы́тия, — ра́дуйся, — Тебе́ вопие́м, — Де́во Всенепоро́чная, изба́вленнии Рождество́м Твои́м.

Пе́снь 5

Ирмос: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.

Припев: Священномучениче Памфиле, моли Бога о нас.

Не терпя́ су́щим на земли́ послужи́ти, о Памфи́ле, боже́ственное житие́, е́же от младе́нства име́яше, страда́нием уясни́л еси́.

Припев: Священномучениче Памфиле, моли Бога о нас.

Боже́ственною седи́ною и му́дростию укра́шен, ко гра́ду свято́му устреми́вся Уа́л, я́ко му́ченик венча́ся.

Сла́ва Отцу́ и Сы́ну и Свято́му Ду́ху:

Ум име́я Христо́в, я́ко Па́влу тезоимени́т прехва́льне, му́ченическим венце́м, зако́нно пострада́в, украси́лся еси́.

И ны́не и при́сно и во ве́ки веко́в. Ами́нь.

Богородичен: Испра́вила еси́, Богоро́дице Чи́стая, Евино поползнове́ние, ро́ждши Бо́га Сло́ва, низве́рженных паде́ние испра́вльшаго.

Пе́снь 6.

Ирмос: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Припев: Священномучениче Памфиле, моли Бога о нас.

Наде́ждами ве́чныя жи́зни утвержда́еми, теле́с раздробле́ния, ра́дующеся, терпя́ху до́блии, боже́ственных проро́к Твои́х, Спа́се, купноиме́ннии.

Припев: Священномучениче Памфиле, моли Бога о нас.

Сме́ртию жи́знь лу́чшую купи́ша, Самуи́л и Илия́, Дании́л и боже́ственный Иереми́я, и к си́м Иса́ия великоимени́тый.

Сла́ва Отцу́ и Сы́ну и Свято́му Ду́ху:

Свети́льники све́тлы Бо́гу ны́не Еги́пет возсиява́ет, и́же дре́вле глубо́кою тмо́ю покрыва́емый неве́дения, богоразу́мия све́том обогати́вся.

И ны́не и при́сно и во ве́ки веко́в. Ами́нь.

Богородичен: Го́ру Тя́ Дании́л зря́ше, Всенепоро́чная, из нея́же отсече́ся Ка́мень, сокруши́вый вся́кий пре́лести о́браз и испо́лнив богоразу́мия вся́ концы́.

Конда́к, гла́с 4.

Муче́нием стра́шным предлежа́щим Госпо́дни страда́льцы до́блии в небоя́зненном ра́дующеся мудрова́нии, си́м собесе́доваша, о пло́ти неради́вше, те́мже насле́дствоваша ве́чнующую сла́ву, о на́с моля́щеся при́сно, восхваля́ющих и́х по́двиги.

Пе́снь 7.

Ирмос: В пещи́ авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.

Припев: Священномучениче Памфиле, моли Бога о нас.

Све́тлым лице́м и ума́ чистото́ю, му́чениче, предзря́ бу́дущую ра́дость, му́ки преоби́дел еси́, стру́жемь неми́лостивно, всеблаже́нне Порфи́рие.

Припев: Священномучениче Памфиле, моли Бога о нас.

Юноши три́ в пещи́ спасы́й Бо́г, Се́й, страстоте́рпче блаже́нне, тя́, Его́ ра́ди во огни́ жего́ма, я́ве прие́млет, благово́нну же́ртву, Порфи́рие.

Сла́ва Отцу́ и Сы́ну и Свято́му Ду́ху:

Кре́постию души́ твоея́ укра́шен и телесе́, всю́ мучи́теля, Селевки́е, кре́пость низложи́л еси́, всехва́льне, — благослове́н еси́, Бо́же мо́й, — зовы́й, — и Го́споди.

И ны́не и при́сно и во ве́ки веко́в. Ами́нь.

Богородичен: Яко Богоро́дица, Красне́йшаго всея́ тва́ри родила́ еси́, Бо́жие бо была́ еси́ и́стинно оби́телище всесвято́е: благослове́на Ты́ в жена́х, Всенепоро́чная Влады́чице.

Пе́снь 8.

Ирмос: Ру́це распросте́р, Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели, о́троцы, взыва́юще: благослови́те, вся́ дела́ Госпо́дня, Го́спода.

Припев: Священномучениче Памфиле, моли Бога о нас.

Зако́ном ты́ повину́яся Христо́вым, отве́ргл еси́ вся́, всему́дре Селевки́е, я́ко во́ин же бы́л еси́ и благоче́стия учи́тель, о сирота́х и вдова́х попече́ние име́я и взыва́я: благослови́те, вся́ дела́ Госпо́дня, Го́спода.

Припев: Священномучениче Памфиле, моли Бога о нас.

Заре́ю сия́я мы́сленною, ста́рче сла́вный и му́чениче Феоду́ле, и ра́б и́скренний бы́л еси́ Влады́це, подо́бяся, Его́же Кре́ст жела́я, ра́дуяся, претерпе́л еси́, — благослови́те, — поя́, — вся́ дела́ Госпо́дня, Го́спода.

Сла́ва Отцу́ и Сы́ну и Свято́му Ду́ху:

Хра́м яви́вся, Иулиа́не, Боже́ственнаго Ду́ха, нра́вов бла́гостию украси́лся еси́, испо́лнь у́бо благогове́ния и све́тлости, испо́лнь же ве́ры яви́вся, сожига́емь ве́сь, — благослови́те, — вопия́, — вся́ дела́ Госпо́дня, Го́спода.

И ны́не и при́сно и во ве́ки веко́в. Ами́нь.

Богородичен: Безма́терне Сло́во, из Отца́ Сы́й, пе́рвее, безо́тчее же бы́сть из Тебе́, второ́е, Всечи́стая, вопло́щься пе́рвее Безпло́тный, за милосе́рдие восхоте́в спасти́ пою́щия: благослови́те, вся́ дела́ Госпо́дня, Го́спода.

Песнь 9

Ирмос: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.

Припев: Священномучениче Памфиле, моли Бога о нас.

Еди́ну небе́сную име́ти жи́знь жела́юще, страстоте́рпцы, привре́менную и тле́нную велему́дренно преоби́десте и ны́не сла́дости лу́чшия и блаже́нныя наслажда́етеся.

Припев: Священномучениче Памфиле, моли Бога о нас.

Вну́трь ны́не Боже́ственнаго рая́ лику́ете усе́рдно, озаре́ний Исто́чнику предстоя́ще, му́ченицы сла́внии, от Него́же почерпа́юще, заря́ми просвеща́етеся.

Сла́ва Отцу́ и Сы́ну и Свято́му Ду́ху:

Все́х ве́рою творя́щих пресве́тлую твою́ па́мять, дванадеся́тный ли́че, ны́не помина́я ко Влады́це Христу́, с тобо́ю, жили́ща сподо́битися помоли́ся.

И ны́не и при́сно и во ве́ки веко́в. Ами́нь.

Богородичен: Яко Ма́ти Еди́наго Влады́ки, все́х тва́рей превы́шши была́ еси́, Де́во Мари́е. Те́мже, ве́рнии, Тя́ вси́, Всенепоро́чная, ны́не ра́дующеся и веселя́щеся, велича́ем.

Молитва

О святы́й уго́дниче Бо́жий, священному́чениче Памфиле! По́двигом до́брым подвиза́вся на земли́, восприя́л еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже взира́юще на святы́й твой о́браз, ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.