18 марта.
Канон Святому мученику Конону Исаврийскому.
![Святому мученику Конону Исаврийскому Святому мученику Конону Исаврийскому](img_i/028.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропа́рь, гла́с 4:
Яко де́вственника преди́вна и му́ченика непоколеби́ма, блаже́ннаго страда́льца, на бе́сы вла́сть прии́мшаго, Ко́нона пе́сньми восхва́лим и к нему́ возопии́м: моли́ Христа́ Бо́га, да спасе́т ду́ши на́ша.
Кано́н. Гла́с 6.
Пе́снь 1.
Ирмос: Яко по су́ху пешеше́ствовав Изра́иль по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.
Припев: Святый мучениче Кононе, моли Бога о нас.
Песносло́вии тя́ боже́ственными Христо́ва похвали́ти му́ченика и тве́рдаго подви́жника, мое́ помышле́ние све́том, и́же в тебе́ прея́вственно, му́чениче, озари́.
Припев: Святый мучениче Кононе, моли Бога о нас.
Науче́н боже́ственным, Ангельским, блаже́нне, наказа́нием, я́коже Ангел на земли́ вои́стинну преизя́ществовал еси́ пло́тию, по́хоти обуздова́я и удобря́яся.
Сла́ва Отцу́ и Сы́ну и Свято́му Ду́ху:
Зако́ны Боже́ственныя соблю́д, е́ллинскаго беззако́ния, преподо́бне, возгнуша́лся еси́ проявле́нно и мно́ги приве́л еси́ к Бо́гу уче́ньми и свяще́нными уве́рив чудесы́.
И ны́не и при́сно и во ве́ки веко́в. Ами́нь.
Богородичен: Украси́вшися добро́тою доброде́телей, Кра́снаго родила́ еси́ па́че все́х челове́ков, Свои́ми, Всенепоро́чная, на́с красота́ми му́дре украша́ющаго.
Пе́снь 3.
Ирмос: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.
Припев: Святый мучениче Кононе, моли Бога о нас.
Украси́в Боже́ственными доброде́тельми, преподо́бне, ду́шу твою́, жили́ще сию́ Отца́, и Сы́на, и Ду́ха, вои́стинну Свята́го, му́чениче, соверши́л еси́.
Припев: Святый мучениче Кононе, моли Бога о нас.
Иже дре́вле пре́лести во глубину́ впа́дшии окая́нне, в явле́нную высоту́ высо́кими твои́ми уче́нии возво́дятся далечесия́тельно, му́чениче Ко́ноне, воспе́вающе тя́.
Сла́ва Отцу́ и Сы́ну и Свято́му Ду́ху:
Хра́м бы́в Бо́жий, призыва́нии боже́ственными низложи́л еси́, всеблаже́нне, предста́в во хра́ме истука́ннаго, наставля́я заблу́ждшия к боже́ственному разуме́нию.
И ны́не и при́сно и во ве́ки веко́в. Ами́нь.
Богородичен: Еди́н Святы́й из Тебе́ ражда́ется, Пресвята́я, па́че ума́ же и сло́ва, освяща́я земна́я, скве́рным врага́ сове́том страсте́м рабо́тающия.
Седа́лен, гла́с 8.
Христо́вым всеору́жием вооружи́вся, де́монов яви́лся еси́ всегуби́тель и бы́л еси́ же́ртва ве́рных неразру́шна, непристу́пен име́я сто́лп ве́ры, к высоте́ взима́еши на́с чуде́с твои́х. Отню́дуже и побе́ды от Бо́га венцы́ досто́йно прия́л еси́, му́чениче Ко́ноне многострада́льне. Сего́ ра́ди вопие́м ти́: моли́ Христа́ Бо́га прегреше́ний оставле́ние дарова́ти чту́щим любо́вию святу́ю па́мять твою́.
Сла́ва, и ны́не, Богородичен:
В напа́сти многоплете́нныя впа́д от вра́г ви́димых и неви́димых, бу́рею одержи́мь безчи́сленных согреше́ний мои́х, и я́ко к те́плому заступле́нию и покро́ву моему́, Чи́стая, ко приста́нищу притека́ю Твоея́ бла́гости. Те́мже, Пречи́стая, из Тебе́ воплоще́нному без се́менне моли́ся приле́жно о все́х рабе́х Твои́х, непреста́нно моля́щих Ти ся, Богоро́дице Пречи́стая, моля́щи Его́ при́сно согреше́ний оставле́ние дарова́ти воспева́ющим досто́йно сла́ву Твою́.
Пе́снь 4.
Ирмос: Христо́с моя́ си́ла, Бо́г и Госпо́дь, честна́я Це́рковь боголе́пно пое́т, взыва́ющи, от смы́сла чи́ста, о Го́споде пра́зднующи.
Припев: Святый мучениче Кононе, моли Бога о нас.
Хра́мы низложи́л еси́ безбо́жных, свя́те, и бо́ги поги́бели коне́чней, му́чениче, преда́л еси́, чудоде́йствуя и соверша́я досточу́дная зна́мения.
Припев: Святый мучениче Кононе, моли Бога о нас.
Свя́то, преподо́бне, ше́ствующу тебе́, де́монский ро́д Бо́жие Сло́во покори́ тебе́ и тя́ чуде́с мно́гими показа́ньми просла́ви.
Сла́ва Отцу́ и Сы́ну и Свято́му Ду́ху:
Вельми́ любя́ тя Преблаги́й, Михаи́ла тебе́, вели́каго наказа́теля, даде́, науча́юща тя́, велича́йший Ко́ноне, я́ве превели́ким та́йнам.
И ны́не и при́сно и во ве́ки веко́в. Ами́нь.
Богородичен: Свята́я Влады́чице, Всесвято́е воплоти́вшая Сло́во, освяще́ние души́ мое́й да́руй, руководя́щи м́ой у́м, безпу́тиями порева́емый.
Пе́снь 5
Ирмос: Бо́жиим све́том Твои́м, Бла́же, у́тренюющих Ти́ ду́ши любо́вию озари́, молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.
Припев: Святый мучениче Кононе, моли Бога о нас.
Тече́нием крове́й твои́х свяще́нных хлами́ду тебе́ самому́ му́ченическую прея́вственно обагри́в, му́чениче доблему́дренне, и живе́ши, ра́дуяся, в вы́шних жили́щах и све́тлостех.
Припев: Святый мучениче Кононе, моли Бога о нас.
Просте́р тя́, блаже́нне, злоу́мный, ве́сь просте́рт к Бо́гу у́м, приснопа́мятне, иму́щаго, ра́нами ссеца́ет, призыва́ющаго и́мя вели́кое Вседержи́теля.
Сла́ва Отцу́ и Сы́ну и Свято́му Ду́ху:
Благода́тию вжили́вся, терпе́л еси́ ка́пли я́звенныя, му́ченически украша́яся, и безбо́жие, Ко́ноне, побежда́я, и безсме́ртия сподобля́емь.
И ны́не и при́сно и во ве́ки веко́в. Ами́нь.
Богородичен: Изба́вльшеся вся́кия прароди́тельныя, Пречи́стая, кля́твы, Тобо́ю благослове́ние получи́хом. Те́мже благослови́м, и велича́ем, и любо́вию Тя́ чти́м, и ублажа́ем.
Пе́снь 6.
Ирмос: Жите́йское мо́ре, воздвиза́емое зря́ напа́стей бу́рею, к ти́хому приста́нищу Твоему́ прите́к, вопию́ Ти: возведи́ от тли́ живо́т мо́й, Многоми́лостиве.
Припев: Святый мучениче Кононе, моли Бога о нас.
Облиста́в, я́ко со́лнце, светолу́чными доброде́тельми и пресла́вными чудесы́, терпе́нием же страда́ний вельми́ украша́яся, просвеща́еши концы́, великоимени́тый му́чениче, хва́лящия тя́.
Припев: Святый мучениче Кононе, моли Бога о нас.
Ра́н добро́тами красне́йший показа́вся, чудоде́йствуеши изря́дная, и у́мер, па́ки по погребе́нии прогоня́я неду́ги и отгоня́ пре́лести, блаже́нне, ду́хи.
Сла́ва Отцу́ и Сы́ну и Свято́му Ду́ху:
Стра́сти уврачу́й ду́ш на́ших, му́дре, и пло́ти отжени́ неможе́ния, изря́днейший вра́чь на́м, чту́щим тя́, от Бо́га да́н еси́, Ко́ноне сла́вне.
И ны́не и при́сно и во ве́ки веко́в. Ами́нь.
Богородичен: Призре́ Госпо́дь на Тя́ и Тобо́ю посеще́ние соде́ла уда́льшимся, Пречи́стая, от Него́. Те́мже, я́коже рекла́ еси́, ро́ди спаса́емых ублажа́ют Тя́.
Конда́к, гла́с 3:
Чистото́ю я́ко Ангел на земли́ пожи́в, отону́дуже собесе́дник Ангелом бы́ти сподо́бился еси́, и роди́тели ко Христо́ву позна́нию приве́л еси́, и, еди́наго Бо́га в Тро́ице испове́дав, пострада́л еси́ до кро́ве, му́чениче Ко́ноне, моли́ Его́ непреста́нно о все́х на́с.
Пе́снь 7.
Ирмос: Росода́тельну у́бо пе́щь соде́ла Ангел преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́, Бо́же оте́ц на́ших.
Припев: Святый мучениче Кононе, моли Бога о нас.
Све́т тебе́ незаходи́мый возсия́, возненави́девшему страсте́й тму́, преподо́бне, весе́лие же прия́т тя́, до́брый по́двиг сконча́вша тща́нием. Те́мже помина́й на́с, предстоя́ Христу́.
Припев: Святый мучениче Кононе, моли Бога о нас.
Се́рдце твое́ кро́тко и мудрова́ние смире́нно яви́ся, преподо́бне, и́мже погуби́л еси́ возноше́ния вся́ врага́, возвыша́емь Боже́ственными доброде́тельми и чудесы́ стра́шными, Ко́ноне, му́чеников основа́ние.
Сла́ва Отцу́ и Сы́ну и Свято́му Ду́ху:
Стра́шен все́м де́моном бы́л еси́, си́м повелева́я винова́тися твои́м свяще́нным, богому́дре, веле́нием, Бо́гу тя́ просла́вльшу, Того́ де́лы до́брыми на земли́, Ко́ноне, просла́вльшаго.
И ны́не и при́сно и во ве́ки веко́в. Ами́нь.
Богородичен: Во́лею вся́ соде́ловаяй, во Твою́ восхоте́в всели́тися пренепоро́чную, Богоро́дице, утро́бу вои́стинну, еди́н во святы́х сове́тех прославля́емый Бо́г, я́ко вели́кий и стра́шный.
Пе́снь 8.
Ирмос: Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки.
Припев: Святый мучениче Кононе, моли Бога о нас.
Тве́рдо сопроти́вился еси́ суему́дренному, мня́щу тебе́ повину́ти, че́сти чужди́м принести́, страда́льче, о́нем ме́рзостным. Те́м, я́ко зако́нно пострада́в, просла́вился еси́.
Припев: Святый мучениче Кононе, моли Бога о нас.
Де́монскими уязви́вшиися прило́ги уче́нии боже́ственными твои́ми исцелева́ются и ско́рбных избавле́ние прие́млют, воспева́юще благода́ть твою́, богому́дре.
Сла́ва Отцу́ и Сы́ну и Свято́му Ду́ху:
Неду́гов вся́ких здра́вие почерпи́те, к ра́це преподо́бнаго ве́рою приступа́ющии: источа́ет бо я́ве Ду́ха благода́тию и пото́ки страсте́й изсуша́ет.
И ны́не и при́сно и во ве́ки веко́в. Ами́нь.
Богородичен: Мольбу́ Зижди́телю Бо́гу принеси́ ду́ши на́ша спасти́, Богора́дованная, и страсте́й одержа́ния на́с изба́вити и злоде́йственных челове́к искуше́ния.
Песнь 9
Ирмос: Бо́га челове́ком невозмо́жно ви́дети, на Него́же не сме́ют чи́ни Ангельстии взира́ти; Тобо́ю бо, Всечи́стая, яви́ся челове́ком Сло́во воплоще́нно, Его́же велича́юще, с небе́сными во́и, Тя́ ублажа́ем.
Припев: Святый мучениче Кононе, моли Бога о нас.
Яко кора́бль, ви́ден бы́л еси́, препла́вающь мирску́ю немо́кренно, богоно́се, бу́рю, до́брых бре́мя спаса́ющь к кра́сным приста́нищем поко́я, и Ца́рствия Бо́жия, и све́тлости.
Припев: Святый мучениче Кононе, моли Бога о нас.
Кресто́м, я́ко броня́ми, оде́явся, вра́жия, всеблаже́нне, обнажи́л еси́ полки́ и нога́м твои́м кра́сным порабо́тил еси́, ра́б же Влады́це и́скренний бы́в, порабоще́нныя враго́м избавля́я.
Сла́ва Отцу́ и Сы́ну и Свято́му Ду́ху:
О на́с, любо́вию восхваля́ющих тя́, па́мять сотвори́, Христу́, венцено́сец, предстоя́ с вы́шними безчи́сленными си́лами, я́ко да моли́твами твои́ми обря́щем ми́лость и злолю́тых измене́ние, Ко́ноне всехва́льне.
И ны́не и при́сно и во ве́ки веко́в. Ами́нь.
Богородичен: Све́том Твои́м мя́, Де́во, просвети́, но́щию при́сно уны́ния одержи́ма, и к земли́ погорбле́на, и де́юща вся́к гре́х ра́зума развраще́нием, я́ко да, Тобо́ю спаса́емь, пою́ Тя́, Многопе́тую.
Молитва первая мученику Конону Исаврийскому
Святы́й му́чениче Ко́ноне! При́зри с небе́снаго черто́га на тре́бующих твоея́ по́мощи и не отве́ргни проше́ний на́ших, но, я́ко при́сный благоде́тель и хода́тай на́ш, моли́ Христа́ Бо́га, да, человеколюби́в и многоми́лостив сы́й, сохрани́т на́с от вся́каго лю́таго обстоя́ния: от тру́са, пото́па, огня́, меча́, наше́ствия иноплеме́нников и междоусо́бныя бра́ни. Да не осу́дит на́с гре́шных по беззако́нием на́шим, и да не во зло́ обрати́м блага́я, да́руемая на́м от Всеще́драго Бо́га, но во сла́ву свята́го и́мене Его́ и в прославле́ние кре́пкаго твоего́ заступле́ния. Да моли́твами твои́ми да́ст на́м Госпо́дь ми́р по́мыслов, воздержа́ние от па́губных страсте́й и от вся́кия скве́рны и да укрепи́т во все́м ми́ре Свою́ Еди́ну Святу́ю, Собо́рную и Апо́стольскую Це́рковь, ю́же стяжа́л е́сть честно́ю Свое́ю Кро́вию. Моли́ся приле́жно, святы́й му́чениче, да благослови́т Христо́с Бо́г держа́ву, да утверди́т во святе́й Свое́й Правосла́вней Це́ркви живы́й ду́х пра́выя ве́ры и благоче́стия, да вси́ чле́ны ея́, чи́стии от суему́дрия и суеве́рия, ду́хом и и́стиною покланя́ются Ему́ и усе́рдно пеку́тся о соблюде́нии Его́ за́поведей, да мы́ вси́ в ми́ре и благоче́стии поживе́м в настоя́щем ве́це и дости́гнем блаже́нныя ве́чныя жи́зни на небеси́, благода́тию Го́спода на́шего Иису́са Христа́, Ему́же подоба́ет вся́кая сла́ва, че́сть и держа́ва со Отце́м и Святы́м Ду́хом, ны́не и при́сно и во ве́ки веко́в. Ами́нь.
Молитва вторая мученику Конону Исаврийскому
О, святы́й му́чениче Ко́ноне! Услы́ши мольбы́ на́ши и приими́ усе́рдие се́рдца на́шего, тебе́ приноси́мое. В де́встве непоро́чном с супру́гою свое́ю до конца́ дне́й пожи́вший и с не́ю Креще́ние и Святы́е Та́йны от Архистрати́га Бо́жия Михаи́ла получи́вший. За Христа́ же́стоко заму́ченный и кро́вию свое́ю, за Бо́га Жива́го проли́тую, врачева́ние и ра́дость стра́ждущим дарова́л еси́. Не оста́вь, святы́й Ко́ноне, пресла́вный му́чениче, все́х исцеля́вый и все́м благотвори́вый в земно́й жи́зни свое́й, младе́нцев на́ших, о́спенным неду́гом боля́щих, испроси́ у Го́спода, да и ми́мо и́дет па́губа сме́ртная, да преложи́тся печа́ль на́ша в ра́дость и да вы́йдут они́ невреди́мы из по́сланнаго свы́ше в ю́ный во́зраст и́х искуше́ния и, обретя ми́лость пред Го́сподом, сотвори́вшим все́ еди́ным сло́вом Свои́м, просла́вят Влады́ку все́х во ве́ки веко́в. Ами́нь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![Святому мученику Конону Исаврийскому Святому мученику Конону Исаврийскому](img_b/028.jpg)