14 марта.

Канон преподобномученице Евдокии Илиопольской.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 8:

Пра́востию у́мною ду́шу твою́ привяза́вши в любо́вь Христо́ву, тле́нных, и кра́сных, и вре́менных забы́тием претекла́ еси́, я́ко Сло́ва учени́ца: поще́нием стра́сти пе́рвее умертви́вши, страда́льчески второ́е врага́ посрами́ла еси́. Те́м Христо́с сугу́бых венца́ сподо́би тя́, сла́вная Евдоки́е; преподо́бная страстоте́рпице, моли́ Христа́ Бо́га спасти́ся душа́м на́шим.

Кано́н, гла́с 2.

Пе́снь 1.

Ирмос: Гряди́те, лю́дие, пои́м пе́снь Христу́ Бо́гу, разде́льшему мо́ре и наста́вльшему лю́ди, я́же изведе́ из рабо́ты еги́петския, я́ко просла́вися.

Припев: Святая преподобномученице Евдокие, моли Бога о нас.

Душе́вное озлобле́ние услади́ти ми́, Благи́й, благоизво́ли страстоно́сицы Твоея́ Евдоки́и мольба́ми, и сию́ воспе́ти, Сло́ве, пода́ждь ми́.

Припев: Святая преподобномученице Евдокие, моли Бога о нас.

Кто́ Твою́, Христе́, благосе́рдия пучи́ну я́ве испове́сть? я́ко спасе́ния соде́ла приста́нище, дре́вле прегреше́ний глубину́ су́щую.

Припев: Святая преподобномученице Евдокие, моли Бога о нас.

Якоже земля́ блага́я, твоя́ душа́, пресла́вная, до́ждь прия́т уче́ния Ге́рмана преподо́бнаго, и кла́с благоче́стия пло́д принесе́.

Сла́ва Отцу́ и Сы́ну и Свято́му Ду́ху:

Мы́сленный у́гль в се́рдцы — Христа́ — прие́мши, всечестна́я, креще́нием, я́коже хвра́стие, ле́сть и плотски́я стра́сти вои́стинну попали́ла еси́.

И ны́не и при́сно и во ве́ки веко́в. Ами́нь.

Богородичен: Богоподо́бное селе́ние вои́стинну Ты́ яви́лася еси́, небе́с простра́ннейши и честне́йши, Богоро́дице Де́во, и ны́не о Тебе́ ра́дуется Ангельский ли́к.

Пе́снь 3.

Ирмос: Утверди́ на́с в Тебе́, Го́споди, дре́вом умерщвле́й гре́х, и стра́х Тво́й всади́ в сердца́ на́с, пою́щих Тя́.

Припев: Святая преподобномученице Евдокие, моли Бога о нас.

Утвержде́ние, Христе́, и сте́ну необори́му в пе́рсех преподо́бная Твоя́ стяжа́вши, прило́ги не поколеба́ся врага́, но сего́ до конца́ потреби́.

Припев: Святая преподобномученице Евдокие, моли Бога о нас.

Возжела́вши Христо́вы красоты́ и Сего́ любо́вию снеда́ема, страда́нием сочта́лася еси́ Ему́, Евдоки́е богому́драя и всесла́вная.

Сла́ва Отцу́ и Сы́ну и Свято́му Ду́ху:

Креще́нием Христо́вым, и слеза́ми твои́ми, и по се́м кровьми́ муче́ния очи́стившися, хра́м была́ еси́ Тро́ице и ме́сто свяще́ния.

И ны́не и при́сно и во ве́ки веко́в. Ами́нь.

Богородичен: От Анны ра́дость ро́ду процвела́ еси́ и ражда́еши, Де́во, Царя́, и сра́дуются рождеству́ Твоему́ жены́, разре́шшеся Тобо́ю от кля́твы.

Седа́лен, гла́с 8.

Просве́щшися заре́ю Боже́ственною, преле́стную оста́вила еси́ тму́ и житие́ восприя́ла еси́ с пло́тию невеще́ственное, благода́тьми Боже́ственными испо́лнившися Ду́ха, ма́лым провеща́нием ме́ртвыя воскреси́ла еси́. Те́м при кончи́не муче́ния венце́м боже́ственне украси́лася еси́ и льсти́ваго посрами́ла еси́, Евдоки́е равноа́нгельная, моли́ Христа́ Бо́га прегреше́ний оставле́ние дарова́ти чту́щим любо́вию святу́ю па́мять твою́.

Сла́ва, и ны́не, Богородичен:

Яко де́ву и еди́ну в жена́х, Тя́, без се́мене ро́ждшую Бо́га пло́тию, вси́ ублажа́ем, ро́ди челове́честии, о́гнь бо всели́ся в Тя́ Божества́, и я́ко младе́нца млеко́м пита́еши Зижди́теля и Го́спода. Те́м, Ангельский и челове́ческий ро́д, досто́йно сла́вим пресвято́е рождество́ Твое́ и согла́сно вопие́м Ти́: моли́ Христа́ Бо́га согреше́ний оставле́ние дарова́ти покланя́ющимся ве́рою пресвято́му Рождеству́ Твоему́.

Пе́снь 4.

Ирмос: Услы́шах, Го́споди, слу́х Твоего́ смотре́ния, и просла́вих Тя́, Еди́не Человеколю́бче.

Припев: Святая преподобномученице Евдокие, моли Бога о нас.

Безбо́жия пучи́ну реко́ю боже́ственных твои́х крове́й, Евдоки́е сла́вная, изсуши́ла еси́.

Припев: Святая преподобномученице Евдокие, моли Бога о нас.

Яже пе́рвее уловля́ющая блу́дными безу́мныя мре́жами, ны́не к Ца́рству Бо́жию уловля́ет ве́рныя.

Сла́ва Отцу́ и Сы́ну и Свято́му Ду́ху:

Еже без пра́вды со́браное тебе́ бога́тство тле́нное расточи́вши пра́ведно, нетле́ния бога́тство насле́довала еси́.

И ны́не и при́сно и во ве́ки веко́в. Ами́нь.

Богородичен: Све́т возсия́л еси́, Го́споди, и́же в нощи́ и тме́ прегреше́ния, от Чи́стыя Де́вы воплоща́емь.

Пе́снь 5

Ирмос: Све́та Пода́телю и веко́в Тво́рче, Го́споди, во све́те Твои́х повеле́ний наста́ви на́с: ра́зве бо Тебе́, ино́го Бо́га не зна́ем.

Припев: Святая преподобномученице Евдокие, моли Бога о нас.

Све́т Невече́рний, озари́в вои́стинну сла́вную, от стра́стныя изъя́т мглы́ и, к безстра́стия пути́ наве́д, всесве́тлу показа́.

Припев: Святая преподобномученице Евдокие, моли Бога о нас.

Царя́ Бо́га, я́коже вневе́стившися Сы́ну, возста́вила еси́ честны́м Его́ призыва́нием уме́ршаго лю́те царе́ва сы́на, пресла́вная.

Сла́ва Отцу́ и Сы́ну и Свято́му Ду́ху:

Му́жеским по́мыслом на суди́щи Христа́, сла́вная, испове́дуеши, Бо́га воплоще́нна, и, мече́м во главу́ усе́чена, лику́еши с му́ченики.

И ны́не и при́сно и во ве́ки веко́в. Ами́нь.

Богородичен: Якоже наде́жду Твое́ предста́тельство ве́рнии иму́ще и беда́ми го́рьких боле́зней окруже́ни, к Тебе́ усе́рдно, Де́во, прибега́ем, Влады́чице.

Пе́снь 6.

Ирмос: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́.

Припев: Святая преподобномученице Евдокие, моли Бога о нас.

Яко тепла́ ре́вность ве́ры твоея́, му́ченице Евдоки́е, е́юже попра́ла еси́ неве́рных настоя́ние и побе́ду пожа́ла еси́ страда́ния.

Припев: Святая преподобномученице Евдокие, моли Бога о нас.

Сле́зныя то́ки совоку́пльши муче́ния ка́плям кро́ве твоея́, еди́ну от обою́ ча́шу спасе́ния соверши́ла еси́.

Сла́ва Отцу́ и Сы́ну и Свято́му Ду́ху:

Яже пре́жде смра́да испо́лнена, мно́жеством нечистоты́ су́щи, ны́не благово́ния испо́лнися и с деви́ческими ли́ки весели́тся.

И ны́не и при́сно и во ве́ки веко́в. Ами́нь.

Богородичен: Яже ми́ра ра́дость, Богоро́дице Чи́стая, ра́дуйся, Тебе́ зову́щих со Ангелом ве́рно Твоея́ ра́дости сподо́би и печа́ль на́шу разори́.

Конда́к, гла́с 4:

Во страда́нии твое́м до́бре подвиза́вшися, и по сме́рти на́с освяща́еши чуде́с излия́нии, всехва́льная, ве́рою прибега́ющия в Боже́ственную це́рковь твою́, и, торжеству́юще, мо́лим тя́, преподо́бная му́ченице Евдоки́е: да изба́вимся неду́г душе́вных и чуде́с благода́ть почерпе́м.

Икос:

Страстоте́рпческая це́рковь поро́да яви́ся, среде́ стяжа́вши са́д безсме́ртия, те́ло сея́ честно́е, и́же сего́ объе́млющии плоды́ ве́твьми кре́пко освяща́ются, зря́ще же, удивля́ются, ка́ко вои́стинну ме́ртво те́ло источа́ет исцеле́ния, вразумля́я вся́? Те́м со тща́нием прииди́те, ны́не вси́ со мно́ю, смире́нным, и, очи́щше скве́рну, чуде́с благода́ть почерпе́м.

Пе́снь 7.

Ирмос: Образу злато́му на по́ле Деи́ре служи́му, трие́ Твои́ о́троцы небрего́ша безбо́жнаго веле́ния, посреде́ же огня́ вве́ржени, ороша́еми, поя́ху: благослове́н еси, Бо́же оте́ц на́ших.

Припев: Святая преподобномученице Евдокие, моли Бога о нас.

Иже дре́вле уловля́яй, одожде́нии зло́бными всю́ объе́мь тя́, вра́г льсте́ц, попира́емь твои́ми нога́ми, вельми́ зва́ше: увы́ мне́, победи́хся, — глаго́ля, — Евдоки́е прехва́льная, твои́м непрело́жным к Бо́гу присвое́нием, чи́стая.

Припев: Святая преподобномученице Евдокие, моли Бога о нас.

Воздержа́нием мно́гим мудрова́ния твоея́ пло́ти умертви́вши, ме́ртвым подава́еши воскресе́ние к Бо́гу дерзнове́нием твои́м и к Нему́ несомне́нною, Евдоки́е, мольбо́ю твое́ю: и́бо во́лю твори́т боя́щихся Его́.

Сла́ва Отцу́ и Сы́ну и Свято́му Ду́ху:

Стра́сти Христо́вы, я́коже украше́ние боголе́пно, на вы́и твоея́ души́ нося́щи, сего́ привлекла́ еси́ нетле́ния жела́нием, отону́дуже тя́ обручи́ неве́сту, непоро́чно зову́щую: благослове́н Бо́г оте́ц на́ших.

И ны́не и при́сно и во ве́ки веко́в. Ами́нь.

Богородичен: Пе́рвее Гедео́н, провозвеща́я Твое́, Чи́стая, Боже́ственное рождество́ я́ве, окри́н но́сит, по́лн воды́, ю́же от руна́ оцеди́: все́ бо в Тя́ Божество́ всели́ся, Пречи́стая, благослове́н Пло́д чре́ва Твоего́.

Пе́снь 8.

Ирмос: В пе́щь о́гненную ко отроко́м евре́йским снизше́дшаго и пла́мень в ро́су прело́жшаго Бо́га, по́йте дела́ я́ко Го́спода, и превозноси́те во вся́ ве́ки.

Припев: Святая преподобномученице Евдокие, моли Бога о нас.

Якоже прише́дши умо́м ко и́стинному Рачи́телю, удо́бь терпи́ши плотски́я я́звы и огня́ го́рькую боле́знь, му́ченице всесла́вная, благословя́щи Христа́ во ве́ки вся́.

Припев: Святая преподобномученице Евдокие, моли Бога о нас.

Треволне́ния бе́д сокруши́ла еси́ кре́стным я́дрилом и душе́вное корми́ло в Ца́рствия Бо́жия приста́нища спасла́ еси́, сла́вная, благословя́щи Христа́ во ве́ки.

Сла́ва Отцу́ и Сы́ну и Свято́му Ду́ху:

Безобра́зия страсте́й совлекла́ся еси́ и ду́шу обложи́ла еси́ кра́сною оде́ждею безстра́стия, те́мже Христо́с, тя́ неве́сту обручи́в, в небе́сныя всели́ хра́мы.

И ны́не и при́сно и во ве́ки веко́в. Ами́нь.

Богородичен: Свобожда́ется Тобо́ю пра́баба, Богоро́дице, осужде́ния, и се́ ны́не жены́ стра́ждут за Христа́, и ра́дуется естество́ же́нское, я́коже первому́ченица вопие́т, де́ва Фе́кла.

Песнь 9

Ирмос: От Бо́га Бо́га Сло́ва, неизрече́нною му́дростию прише́дшаго обнови́ти Ада́ма, я́дию в тле́ние па́дшаго лю́те, от Святы́я Де́вы неизрече́нно воплоти́вшагося на́с ра́ди, ве́рнии, единому́дренно пе́сньми велича́ем.

Припев: Святая преподобномученице Евдокие, моли Бога о нас.

Лица́ твоего́ зре́ние духо́вною заре́ю, я́коже со́лнце, возсия́вши, чи́стая, стра́нно показа́шеся виде́ние зря́щим неве́рным, и́бо, я́коже возлюби́вши Христа́, от Него́ просла́вилася еси́ досто́йно, всечестна́я.

Припев: Святая преподобномученице Евдокие, моли Бога о нас.

Души́ твоея́ свещу́ вже́гши, му́ченице, еле́ем крове́й твои́х све́тло, ра́дующися, ны́не возшла́ еси́ в Боже́ственный неве́стник Христо́в с му́дрыми де́вами, с ни́миже помина́й все́х, ве́рою хва́лящих тя́.

Припев: Святая преподобномученице Евдокие, моли Бога о нас.

От терно́вныя пре́лести, я́ко шипо́к, богому́драя, сладкоуха́нен, израсла́ еси́ кра́сно, и ве́рных облагово́нила еси́ ду́ши, Евдоки́е, неве́рных же отрази́ла еси́ тве́рдо смра́д преле́стный, те́мже тя́ блажи́м.

Сла́ва Отцу́ и Сы́ну и Свято́му Ду́ху:

Соверша́ющих любо́вию моле́бную па́мять твою́, к Бо́гу и Изба́вителю, му́ченице чи́стая, моли́твами от вся́ких бе́д спаси́ и мою́ душе́вную скве́рну, и́же ху́до тя́ воспе́вшаго, отмы́й.

И ны́не и при́сно и во ве́ки веко́в. Ами́нь.

Богородичен: О на́с моля́щи Сы́на Твоего́ не преста́й, Де́во, Человеколю́бца Бо́га, Тя́ бо наде́жду стяжа́хом и Твои́м предста́тельством избавля́емся бе́д, и страсте́й, и прегреше́ний, и боле́зней, ве́рою Тя́ сла́вящии.

Молитва преподобномученице Евдокии Илиопольской

О, свята́я уго́днице Бо́жия, преподобному́ченице Евдоки́е! По́двигом до́брым подвиза́вшися на земли́, восприя́ла еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже взира́юще на святы́й твой о́браз, ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.