13 марта.

Канон преподобным отцам Печерским и всем святым в Малой России просиявшим.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 2:

Егда́ снидо́сте во гробы́/ и саме́х себе́ заключи́сте,/ тогда́, стра́сти умертви́вше плотски́я,/ спогребо́стеся Христу́, Богоно́снии,/ и диа́вольския в подзе́мных разруши́сте огра́ды,/ сего́ ра́ди Ангели венцы́ с Небе́с вам подаю́т.

Кано́н. Гла́с 8.

Пе́снь 1.

Ирмос: Во́ду проше́д, я́ко су́шу,/ и еги́петскаго зла избежа́в, изра́ильтянин вопия́ше:/ Изба́вителю и Бо́гу на́шему пои́м.

Припев: Преподо́бнии отцы́ Пече́рстии, моли́те Бо́га о нас.

Мно́гими окруже́нный опечале́ньми,/ от грехо́в мои́х напа́дающими мне неща́дно,/ к вам притека́ю, о Богоно́снии!/ дви́жа ва́ша моли́твы в по́мощь.

Припев: Преподо́бнии отцы́ Пече́рстии, моли́те Бо́га о нас.

Анто́ние Богоно́се и Феодо́сие Богому́дре,/ в Росси́и и́ноком первонача́льницы и наста́вницы,/ пе́рвую мя погу́бльша ума́ добро́ту/ ва́шими к Бо́гу хода́тайствы па́ки удо́брите,/ наставля́юще мя ко покая́нию.

Припев: Преподо́бнии отцы́ Пече́рстии, моли́те Бо́га о нас.

Стефа́не всехва́льне и Ни́коне всече́стне,/ Христо́ва ста́да бы́вший предводи́теле/ и о́ное упа́сший Богоуго́дно в неусы́пных стра́жах нощны́х,/ Бо́га мне ва́шими благоприя́тными моли́твами уми́лостивите.

Припев: Преподо́бнии отцы́ Пече́рстии, моли́те Бо́га о нас.

Сла́ву ми́ра сего́ и вся кра́сная нивочто́же вмени́вый, всеизря́дне Варлаа́ме,/ сла́вы небе́сныя прича́стника покажи́ мя/ твои́ми моли́твами.

Сла́ва Отцу́ и Сы́ну и Свято́му Ду́ху:

Боже́ственне Влади́мире царю́,/ Рома́не же с Дави́дом, му́чеников красота́, ча́да су́ще о́наго,/ со Еле́ною, ва́шею прабабою,/ Бо́гу мя предста́вите.

И ны́не и при́сно и во ве́ки веко́в. Ами́нь.

Богородичен: Твои́ми моли́твами к Своему́ Сы́ну, Богоро́дице,/ ско́ро спаси́ мя от лю́тых:/ Тебе́ бо помо́щницу су́щий в беда́х вси стяжа́хом всегда́.

Пе́снь 3.

Ирмос: Небе́снаго кру́га Верхотво́рче, Го́споди,/ и Це́ркве Зижди́телю,/ Ты ме́не утверди́ в любви́ Твоей,/ жела́ний кра́ю, ве́рных утвержде́ние,/ Еди́не Человеколю́бче.

Припев: Преподо́бнии отцы́ Пече́рстии, моли́те Бо́га о нас.

Безме́зднии враче́ве яви́стеся,/ исцеле́ния пресла́вно соверша́ющий, Дамиа́не и Ага́пите блаже́ннии,/ темже и аз к вам прихожду́, о святи́и:/ исцели́те ми я́звы душе́вныя и теле́сныя, не́мощну су́щу.

Припев: Преподо́бнии отцы́ Пече́рстии, моли́те Бо́га о нас.

Ониси́форе блаже́нне,/ предви́девый вся и предве́щая я́сне,/ со Иереми́ем же Матфе́е,/ я́ко проро́цы, предви́дяще,/ беды́, належа́щия ско́ро, мя изба́вите моли́твами ва́шими.

Припев: Преподо́бнии отцы́ Пече́рстии, моли́те Бо́га о нас.

Исаа́кий, премно́гими страда́нии низложи́вый диа́вольскую пре́лесть,/ Тя, Христе́, мо́лит:/ изба́ви нас от того́ искуше́ний и спаси́, Многоми́лости́ве.

Припев: Преподо́бнии отцы́ Пече́рстии, моли́те Бо́га о нас.

Лавре́нтие, затвори́вый себе Го́сподеви и дерзнове́ние мно́гое стяжа́вый отту́ду к Нему́,/ не преста́й моли́ся всегда́,/ е́же изъя́тися нам от разли́чных страсте́й.

Сла́ва Отцу́ и Сы́ну и Свято́му Ду́ху:

Предвари́те, раби́ Бо́жии,/ пре́жде да́же не поглоти́т мя до конца́ всегуби́тель,/ изба́вите вско́ре ду́шу мою от лю́тых и мир вожделе́нный да́руйте.

И ны́не и при́сно и во ве́ки веко́в. Ами́нь.

Богородичен: Зол мно́жество смуща́ет мя отвсю́ду,/ и беззако́ний потоцы обурева́ют мя,/ потщи́ся, предвари́ и настоя́щия ну́жды изми́ мя, Влады́чице,/ хода́тайством Твои́м.

Седа́лен, гла́с 8.

Пове́ленная от Бо́га тепле́ исполня́юще/ и сове́том Того́ пра́во ше́ствующий,/ в пусты́нях, и гора́х, и разсе́линах земны́х обита́ша великоду́шнии по́стницы,/ вся́каго лише́ни челове́ческаго утеше́ния,/ те́мже труды́ плодо́в свои́х пожина́юще, ны́не с Го́сподем ра́дуются.

Сла́ва, и ны́не, Богородичен:

Безпло́тных Твои́х, Христе́, и Предте́чи Твоего́,/ и учени́к, проро́к и му́ченик, преподо́бных и всех святы́х/ и Богоро́дицы Неискусому́жныя и благи́я Ма́тере Твоея́ моли́твами/ умоле́н быв, даждь нам во све́те Твое́м ходи́ти/ и сподо́би нас улучи́ти Ца́рствие Твое за милосе́рдие ми́лости Твоея́.

Пе́снь 4.

Ирмос: Услы́шах, Го́споди,/ смотре́ния Твоего́ та́инство, разумех дела́ Твоя́/ и просла́вих Твое́ Божество́.

Припев: Преподо́бнии отцы́ Пече́рстии, моли́те Бо́га о нас.

Али́пие, до́бре соблюды́й о́браз Бо́жий в души́ твоей/ и зра́ки изобразу́я святы́х,/ не́мощны́я исцели́вый тро́стию свое́ю,/ изобрази́ и во мне доброде́тельныя ви́ды, все́славне.

Припев: Преподо́бнии отцы́ Пече́рстии, моли́те Бо́га о нас.

Григо́рие всеблаже́нне, чуде́с благода́ть от Бо́га прие́мый/ и тезоиме́ние от дел подо́бных ны́не предвари́в,/ удиви́ и на нас твои́ми моли́твами Его благода́ть.

Припев: Преподо́бнии отцы́ Пече́рстии, моли́те Бо́га о нас.

Моисе́я, чистоты́ храни́теля кре́пкаго,/ яко она́го прекра́снаго Ио́сифа,/ дви́жем, Христе́, к Тебе́ в моли́тву: поми́луй нас.

Припев: Преподо́бнии отцы́ Пече́рстии, моли́те Бо́га о нас.

Иоа́нне многострада́льне,/ и́же смире́нное те́ло свое́ стесне́нии неосла́бными порабоще́й и жи́во погребы́йся,/ жела́я разреши́тися и со Христо́м соедини́тися, от тли мя изба́ви.

Сла́ва Отцу́ и Сы́ну и Свято́му Ду́ху:

Про́хоре всеблаже́нне,/ хле́бы су́щими от был́ий и со́лию от пе́пела/ гла́дом та́ющия препита́вый,/ умоли́ Христа́ препита́ти и нас,/ душе́вным гла́дом исчеза́ющих.

И ны́не и при́сно и во ве́ки веко́в. Ами́нь.

Богородичен: Не оста́ви ме́не, к Тебе́ прибега́ющая в ра́дование бе́сом бы́ти, Влады́чице,/ но необори́мая Твоя моли́тва да низложи́т сих сове́тования.

Пе́снь 5

Ирмос: Просвети́ нас повеле́нии Твои́ми, Го́споди,/ и мы́шцею Твое́ю высо́кою Твой мир пода́ждь нам,/ Человеколю́бче.

Припев: Преподо́бнии отцы́ Пече́рстии, моли́те Бо́га о нас.

Ма́рко, его́же повеле́ния ме́ртвии послу́шаху,/ умерщвле́на мя паде́нии возста́вив,/ моли́твами твои́ми спаси́.

Припев: Преподо́бнии отцы́ Пече́рстии, моли́те Бо́га о нас.

Фео́филе треблаже́нне,/ сле́з ра́ди очи́стивый славолю́бия оскверне́ние,/ и мне моли́ дарова́тися избавле́нию.

Припев: Преподо́бнии отцы́ Пече́рстии, моли́те Бо́га о нас.

Всеблаже́нне Иоа́нне,/ иже бра́та твоего́ по преставле́нии подвиже́нием те́ла твоего́ поче́т,/ и спасл еси того,/ Творца́ нам ми́лостива сотвори́.

Припев: Преподо́бнии отцы́ Пече́рстии, моли́те Бо́га о нас.

Одушевле́нная бы́вше сокро́вища,/ от сребролюби́ваго мучи́теля, тле́нна сокро́вища у вас истязу́ющаго,/ пострада́вшии непови́нне,/ Небе́сных сокро́вищ прича́стника мя покажи́те,/ Васи́лие и Фео́доре всеблаже́ннии.

Сла́ва Отцу́ и Сы́ну и Свято́му Ду́ху:

И́овлю терпе́нию подо́бяся,/ многовре́менную боле́знь претерпе́л еси́ усе́рдно/ и, ны́не в неболе́зненном сый поко́и,/ боле́зней мя вся́ких изба́ви, равноа́нгельне Пи́мене.

И ны́не и при́сно и во ве́ки веко́в. Ами́нь.

Богородичен: Виждь наша нало́ги, Многоми́лостиве,/ и сия́ яко Бог обле́гчи,/ прие́мь о нас моля́щуюся Ма́терь Твою,/ Юже Ти во умилостивле́ние приво́дим.

Пе́снь 6.

Ирмос: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молюс́я, яко Ио́на:/ от тли, Бо́же, возведи́ мя.

Припев: Преподо́бнии отцы́ Пече́рстии, моли́те Бо́га о нас.

Спиридо́не незло́биве,/ иже о́гненную пещь ма́нтиею свое́ю угаси́л еси,/ яко огнь, любовь вжег в се́рдце твое́м, о́тче, ко Го́споду,/ я́же на ны Велиа́рова угаси́ стреля́ния, молю́ тя.

Припев: Преподо́бнии отцы́ Пече́рстии, моли́те Бо́га о нас.

Никодиме, по́стников сия́ние,/ и́же никогда́же устне́ возбрани́л еси воспева́ти во псалме́х Влады́ку,/ не преста́й моля́ся Ему приле́жно/ изба́вити вся от тли, и бед, и скорбе́й, преподо́бне.

Припев: Преподо́бнии отцы́ Пече́рстии, моли́те Бо́га о нас.

Распны́йся умерщвле́нием пло́ти пе́рвее,/ от иуде́й же распны́йся второ́е, кре́пкий Евстра́тие,/ и мно́гое дерзнове́ние у Христа́ обре́т,/ от бе́д изба́ви мя.

Припев: Преподо́бнии отцы́ Пече́рстии, моли́те Бо́га о нас.

Изба́ви мя твои́ми моли́твами, Ни́коне сла́вне,/ и́же мы́шцею Христо́вою высо́кою от плене́ния изба́влен,/ спасл еси своего́ мучи́теля.

Сла́ва Отцу́ и Сы́ну и Свято́му Ду́ху:

Безсме́ртие обре́т о Христе́, Безсме́ртнем Царе́ и Бо́зе, Афана́сие блаже́нне,/ по сконча́нии свое́м пожи́л еси во мно́гих ле́тех, пла́ча всегда́,/ те́мже ныне оживи́ мя.

И ны́не и при́сно и во ве́ки веко́в. Ами́нь.

Богородичен: СПречи́стая, Очище́ние ро́ждши, Отцу́ Примири́вшаго мир,/ вем, Чи́стая, яко раздражи́х Его безме́рными мои́ми согреше́нии,/ но молю́: уми́лостиви ми Того́ паки/ Ма́терними Твои́ми мольба́ми.

Конда́к, гла́с 8.

Отцы всечестни́и, ли́че Богокра́сный,/ чуде́с мно́гих исто́чницы, ми́ро источа́ющий,/ сокро́вища краснобога́тная Госпо́дня, в земли́ сокрове́нная/ не преста́йте, мо́лим вы, о нас моли́тися ко Го́споду, да зове́м вам:/ ра́дуйтеся, всему́ ми́ру свети́льницы.

И́кос:

А́нгельски пожи́вшия земли́/ и А́нгелом равностоя́тели я́вльшияся на Небеси́,/ с те́мижде и неизрече́нныя о́ныя наслажда́ющийся доброты́,/ достоблаже́нныя отцы́ на́ши, помо́щники и засту́пники те́плыя,/ прииди́те, ве́рнии, восхва́лим, к ним вопию́ще:/ ра́дуйся, Анто́ние, со́лнцу подо́бный свети́льниче;/ ра́дуйся, зерца́ло и о́бразе всем преподо́бным Росси́йским;/ ра́дуйся, вторы́й Моисе́е, мы́сленный скрижа́ли, доброде́тели твоя́ нам от горы́ святы́я принесы́й./ Ра́дуйся, Феодо́сие, ангелови́дный челове́че;/ ра́дуйся, звездо́ у́тренняя, тьму неве́дения прогоня́ющая;/ ра́дуйся, забра́ло необори́мое от враг ви́димых и неви́димых./ Ра́дуйтеся, вси преподо́бнии отцы́ на́ши Пече́рстии;/ ра́дуйтеся, земни́и а́нгели и Небе́снии челове́цы;/ ра́дуйтеся, благоуха́ннии цве́ти ра́йстии;/ ра́дуйтеся, пребога́тая сокро́вища сокрове́нная в земли;/ ра́дуйтеся, би́серие многоце́ннии, от пеще́ры, аки от мо́ря, просия́вший;/ ра́дуйтеся, на́ша похвало́ и всем прибега́ющим к вам изба́вители от бед;/ ра́дуйтеся, всему ми́ру свети́льницы.

Пе́снь 7.

Ирмос: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще;/ отце́в Бо́же, благослове́н еси́.

Припев: Преподо́бнии отцы́ Пече́рстии, моли́те Бо́га о нас.

Нико́лае чу́дне, помо́щниче в ско́рбех,/ иже о саме́м еди́нем сло́ве исцеля́еши стра́сти немощны́х,/ изъяви́ся ско́ро, и от обдержа́щих мя скорбе́й изба́ви,/ и боле́зни се́рдца моего́ облегчи́.

Припев: Преподо́бнии отцы́ Пече́рстии, моли́те Бо́га о нас.

Ера́зме мудре, иже бога́тство свое истощи́л еси во благоле́пие хра́ма Бо́жия,/ твои́ми моли́твами храм мя покажи́ духо́вный.

Припев: Преподо́бнии отцы́ Пече́рстии, моли́те Бо́га о нас.

Сребролю́бия потопи́вый зми́я слез ту́чами, Аре́фо сла́вне,/ я́ко име́я дерзнове́ние, моли́ся о нас ко Го́споду.

Припев: Преподо́бнии отцы́ Пече́рстии, моли́те Бо́га о нас.

Ти́те блаже́нне, гне́внаго бе́са смире́нием попра́вый,/ и Пи́мене, по́стником единоревни́телю,/ изба́вите мя от искуше́ний бесо́вских ва́шими моли́твами.

Сла́ва Отцу́ и Сы́ну и Свято́му Ду́ху:

Анто́ние муче́ниче и тве́рдый Евста́фие, вку́пе со Иоа́нном/ горды́ню Олге́рдову до земли́ низложи́вший,/ умерщвля́ющий мя стра́сти успи́те.

И ны́не и при́сно и во ве́ки веко́в. Ами́нь.

Богородичен: На моле́ние мое ныне умилосе́рдися и ра́дость в печа́ли ме́сто да́руй ми,/ да пою́ Тя, Влады́чице, и вопию́ Сы́ну Твоему́:/ благослове́н Бог оте́ц на́ших.

Пе́снь 8.

Ирмос: Царя́ Небе́снаго,/ Его́же пою́т вой А́нгельстии,/ хвали́те и превозноси́те во вся ве́ки.

Припев: Преподо́бнии отцы́ Пече́рстии, моли́те Бо́га о нас.

О Ку́кше му́чениче,/ свяще́нником пра́вило, по́стником и преподо́бным украше́ние,/ иже в про́поведи Ева́нгелия/ со ученико́м твои́м честны́м коне́ц прие́м, чко апо́стол,/ моли́твами твои́ми и мене́ на путь спасе́ния наста́ви.

Припев: Преподо́бнии отцы́ Пече́рстии, моли́те Бо́га о нас.

Не́сторе Богому́дре,/ жити́й святы́х спаса́телю перве́йший и ревни́телю о́нем до́брый,/ сла́вы о́нех моли́твами твои́ми яви́ мя о́бщника.

Припев: Преподо́бнии отцы́ Пече́рстии, моли́те Бо́га о нас.

Полика́рпе сла́вне,/ те́хже жития́ святы́х коне́чнее исписа́вый и во еди́но собра́вый,/ в кни́зе живо́тней твои́ми моли́твами и мне написа́тися сподо́би.

Припев: Преподо́бнии отцы́ Пече́рстии, моли́те Бо́га о нас.

Я́ко жи́ви су́ще, Богоно́снии, и по сме́рти/ блаже́нному Диони́сию от среды́ гробо́в отвеща́сте:/ вои́стину воскре́се Госпо́дь!/ умерщвле́нна мя страстьми́ оживи́те.

Сла́ва Отцу́ и Сы́ну и Свято́му Ду́ху:

Евфроси́нию, ра́дование По́лотское и де́вам сия́ние,/ Христе́ мой, Тебе́ привожду моли́твенницу,/ ея́же ра́ди спаси́ мя.

И ны́не и при́сно и во ве́ки веко́в. Ами́нь.

Богородичен: Царя́ Небе́снаго ро́ждшая,/ дерзнове́ние Ма́тернее яко иму́щи к Нему́, Де́во,/ избави нас от бед.

Песнь 9

Ирмос: Вои́стину Богоро́дицу,/ Тя испове́дуем,/ спасе́ннии Тобо́ю, Де́во Чи́стая,/ с Безпло́тными ли́ки Тя велича́юще.

Припев: Преподо́бнии отцы́ Пече́рстии, моли́те Бо́га о нас.

Михаи́ле, Иларио́не, Пе́тре, Алекси́е,/ Ио́но, Фо́тие и Киприа́не, Боже́ственнии иера́рси,/ Ефре́ме, Нико́лае, Ники́то, Иса́ие,/ Ми́но же, Луко́ и Феокти́сте,/ Бога нам уми́лостивите.

Припев: Преподо́бнии отцы́ Пече́рстии, моли́те Бо́га о нас.

Лео́нтие, Стефа́не и Ге́рмане, Ни́фонте,/ Мари́не, Евфи́мие, Лавре́нтие же, Диони́сие и Си́моне,/ я́ко прие́мшии власть от Бо́га,/ проси́те и мне оставле́ние.

Припев: Преподо́бнии отцы́ Пече́рстии, моли́те Бо́га о нас.

Си́моне иера́рше, и́же А́гнца Бо́жия пе́рвее принося́й в же́ртву Вседержи́телю,/ последи́ же и себе́ сама́го, яко а́гня, приведы́й в же́ртву,/ спаси́ мя твои́ми моли́твами.

Припев: Преподо́бнии отцы́ Пече́рстии, моли́те Бо́га о нас.

Священному́чеников украше́ние, Мака́рие блаже́нне,/ иже пре́жде да́же прия́ти́ престо́л земли́ чу́вственный,/ на престо́лы мы́сленныя препосла́лся еси́,/ Бо́гу мя примири́.

Сла́ва Отцу́ и Сы́ну и Свято́му Ду́ху:

Привожду́ Ти, о Всеще́дре, Иулиани́ю,/ при́сносветя́щую свещу́, еле́ем благода́ти обдержи́мую,/ ея́же моли́твами от всякаго зла соблюди́ мя.

И ны́не и при́сно и во ве́ки веко́в. Ами́нь.

Богородичен: Со святы́ми А́нгелы, с Боже́ственными Апо́столы,/ со сла́вными му́ченики и все́ми преподо́бными/ Твоего́ моли́ Сы́на и Бо́га, Богороди́тельнице Пречи́стая,/ от бед изба́вити ду́ши на́ша.

Моли́тва к преподо́бным отцем Печерстим

Преблаже́ннии, присносла́внии, преподо́бнии отцы́, святи́и первонача́льницы Пече́рстии, Анто́ние и Феодо́сие, свы́ше Бо́гом дарова́ннии, дво́ице благода́тная, сою́зом соверше́нства, любо́вию к Бо́гу и бли́жнему соедине́нная, не то́чию в жи́зни сей вре́менной друголю́бне труди́внгаися о по́льзе душе́вней и́ночествующих и в ми́ре благоче́стно живу́щих, но и по отше́ствии свое́м в жизнь ве́чную обеща́вшийся посо́бствовати всем и моли́тися ко Го́споду Бо́гу и Пресвяте́й Богоро́дице о спасе́нии всех, наипа́че гре́шников, от ни́хже пе́рвый есмь аз. К вам, уго́дником Бо́жиим и Пресвяты́я Богоро́дицы, яко и́стинным хода́таем спасе́ния, притека́я, смире́нно молю́ся: предста́ните мне в по́мощь, у́зами грехо́в свя́занному, и помоли́теся о мне, ку́пно же и всех насле́дников Богоуго́днаго ва́шего жития́ и насле́дников Ца́рствия Небе́снаго подви́гните на многомогу́щия моли́твы, всех бо вас, недосто́йный, призыва́ти на заступле́ние дерза́ю, жела́я от всех грехо́в мои́х ва́ми свобожде́ние получи́ти. Вси преподо́бнии отцы́ Пече́рстии, Богоуго́дно труди́вшийся и нетле́нно в пеще́рах почива́ющии, святи́и иера́рси, священнонача́льницы, священнои́ноцы, по́стницы, му́ченицы, де́вственницы, чудотво́рцы, вы есте род и́збран, ца́рское свяще́ние, язы́к свят, лю́ди обновле́ния, извести́телие доброде́телей из тьмы тле́нныя сея́ жи́зни Призва́вшаго вас в чу́дный свет, вас бо не земля́ потаи́ла есть, аще же ки́их и потаи́ла, под спу́дом почива́ющих, но, ве́рую, я́ко всех Не́бо прия́ло есть, и яко сла́вы ва́шея испове́сти, та́ко и име́н ва́ших исчести́ ми не возмо́жно, мно́жеству бо зве́здному уподо́бистеся, ра́зве Сам, исчита́яй мно́жество звезд и всем им имена́ нарица́яй, испове́данный от вас на земли́ Царь сла́вы, Христо́с, всех вас, преподо́бных Свои́х, по и́мени напи́санных на Небесе́х, исчита́ет и соверше́нно испове́дует пред Отце́м Свои́м Небе́сным, помози́те мне, гре́шному, в сокруше́нии и смире́нии се́рдца моего́ припада́я, молю́ся вам, свет су́ще ми́ру и свети́льницы, из-по́д спу́да пеще́рнаго поста́влени душа́ми на све́щнице Небе́сном, осиява́йте мя, омраче́ннаго наве́ты вра́жиими, све́том благода́ти свы́ше, да в не́м ходя́щ, не преткну́ о камень ноги́ моея. Вы есте́ сосу́ди, в честь избра́ннии, испо́лненнии благода́ти Бо́жия оби́льно, молю́: сподо́бите мя, гре́шнаго, от исполне́ния ва́шего прия́ти. Вы есте́ соль земли́, аз же есмь земля́, бу́дите мне со́лию, соблюда́юще всеце́ло ду́шу и те́ло мое от согни́тия грехо́внаго. Вси вы, преподо́бнии Пече́рстии, враче́ве благода́тнии, исцеля́ющий всяк неду́г и вся́ку я́зю в лю́дех, молю́ся вам, святи́и: исцели́те и моя́ душе́вныя и теле́сныя я́звы, да досто́йно просла́вляю Бо́га в души́ и телеси́ мое́м, всех вас во все́м благодаря́. Вы бы́сте а́лчущий и жа́ждущии пра́вды, ны́не же блаже́ннаго обе́да в Ца́рствии Бо́жии досто́йно насыща́етеся. Смире́нно коле́на се́рдца моего́ преклоня́я, молю́ вас: подади́те и мне, а́лчущему и жа́ждущему, тоя́жде благода́ти поне́ от крупи́ц, па́дающих от трапе́зы ва́шея, и насы́тите ду́шу мою тщу и ду́шу а́лчущу испо́лните благ. О всеще́дрии госпо́дие, всех вас до́брый Па́стырь пасе́т, и ничто́же вас уже лиши́т. Ва́шими благоприя́тными моли́твами соде́лайте, да и ме́не, аще и недосто́йнаго, ничто́же лиши́т бла́го, мо́жете бо, преподо́бнии вси, всем вся о укрепля́ющем всех вас Иису́се Христе́. Бу́дите, уго́дницы Бо́жий, и мне, окая́нному, вси вся, да с про́чими все́ми и ме́не, к вам всеусе́рдно притека́ющаго, приобря́щете. Аще бо мно́го мо́жет моли́тва еди́наго пра́веднаго, поспешеству́емая во благо́е, кольми́ па́че вас, пра́ведных и преподо́бных мно́гих, мо́гут моли́твы вся у всеми́лостиваго Бо́га. Не два и́ли трие ́во имя Христо́во со́брани есте́, и не два совеща́стеся на земли́ проси́ти во и́мя Христо́во Отца́ Небе́снаго, но ве́лие мно́жество вас, о преподо́бнии, помоли́теся о мне, еди́ном от гре́шных, аз же ве́рую, я́ко Бог, прославля́емый в сове́те всех вас, преподо́бных Свои́х, услы́шит проше́ние собра́нных и совеща́нных во имя Его́. Изгуби́х, окая́нный, грехопаде́ньми мои́ми благода́ть Бо́жию, вы, святи́и Пече́рстии, мно́жеством свои́м поищи́те, молю́, вои́стину обря́щете. Увы́ мне! затворе́ны предо́ мною, недосто́йным, две́ри милосе́рдия, вы, преподо́бнии уго́дницы Бо́жии, вси потолцы́те, и отве́рзутся ра́ди вас мне, гре́шному, яко да и аз к ва́шему мно́жественному числу́ с бо́льшею ва́шею сла́вою ва́шими святы́ми моли́твами причте́н бы́ти сподо́блюся. О достохва́льнии, преподо́бнии отцы́ Пече́рстии! вы есте́ ра́дование Царя́ Небе́снаго, вы благоприя́тная же́ртва Вы́шняго, вы гра́ждане но́ваго Иерусали́ма, вы насле́дницы Ца́рствия Бо́жия! Тако бо вси теко́сте, я́ко и жела́емое пости́гнусте. Молю́, и мои́м нога́м благо́е тече́ние в пути́ за́поведей Госпо́дних соде́лайте и жела́емое пости́гнути гре́шнаго мене́ сподо́бите ва́шими многомо́щными хода́тайствы, да, вшед в дом Ца́рствия Ве́чнаго, возра́дуюся и возвеселю́ся, благодаря́ всех вас, преподо́бных, о таково́й любви́ ва́шей ко бли́жнему, и ку́пно с ва́ми восхвалю́ и возвели́чу во хвале́нии Еди́наго в Тро́ице Пресвяте́й, от всея тва́ри на Небеси и на земли́ хвали́маго, благослови́маго и покланя́емаго Всеми́лостиваго Бо́га, Отца́ и Сы́на, и Свята́го Ду́ха, с Пречи́стою и Присноблаже́нною Де́вою Богоро́дицею, ны́не, и при́сно, и во ве́ки веко́в. Ами́нь.