12 марта.
Канон преподобному исповеднику Прокопию Декаполиту.
![Преподобному исповеднику Прокопию Декаполиту Преподобному исповеднику Прокопию Декаполиту](img_i/016.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропа́рь, гла́с 8:
Сле́з твои́х тече́ньми пусты́ни безпло́дное возде́лал еси́, и и́же из глубины́ воздыха́ньми во сто́ трудо́в уплодоноси́л еси́, и бы́л еси́ свети́льник вселе́нней, сия́я чудесы́, Проко́пие о́тче на́ш, моли́ Христа́ Бо́га спасти́ся душа́м на́шим.
Кано́н. Гла́с 6.
Пе́снь 1.
Ирмос: Яко по су́ху пешеше́ствовав Изра́иль по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.
Припев: Преподобне исповедниче Прокопие, моли Бога о нас.
Благоче́стия любо́вию объя́т бы́в и Боже́ственным раче́нием треволне́ния мирска́я оттря́сл еси́, преподо́бне, Бо́гу побе́дную пе́снь взыва́я, я́ко просла́вися.
Припев: Преподобне исповедниче Прокопие, моли Бога о нас.
Светоно́сное твое́ житие́, и све́тлое души́, и спротяже́нное, благоче́стию срастворе́нно доброде́тели воображе́ние, в тебе́, преподо́бне, я́ве соде́лаша.
Сла́ва Отцу́ и Сы́ну и Свято́му Ду́ху:
Преесте́ственным уче́нием и светоза́рным Христо́вым освеща́емь, страстны́я прило́ги воздержа́нием увяди́л еси́, вопия́ побе́дную пе́снь Вседержи́телю.
И ны́не и при́сно и во ве́ки веко́в. Ами́нь.
Богородичен: Воплоще́нное Сло́во боголе́пно заче́нши, Пречи́стая, е́же пре́жде безпло́тное, на́м па́че естества́ родила́ еси́, Чи́стая, по Рождестве́ Де́ва пребы́вши.
Пе́снь 3.
Ирмос: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.
Припев: Преподобне исповедниче Прокопие, моли Бога о нас.
Твоя́ богоприя́тная душа́, ве́ры ра́ди ре́вностию распаля́ема, блаже́нне, беззако́нных го́рькое неи́стовство и я́рость, богоно́се, держа́вно разори́ла е́сть.
Припев: Преподобне исповедниче Прокопие, моли Бога о нас.
Твои́ми кровьми́ обагри́вся, му́ченическим страда́нием уподо́бился еси́, треблаже́нне, ра́ны нечести́вых му́жественною душе́ю претерпе́л еси́ терпели́вно, Проко́пие.
Сла́ва Отцу́ и Сы́ну и Свято́му Ду́ху:
Подъя́л еси́, преподо́бне, сугу́бы по́двиги му́дре, е́реси облича́я и льво́в стремле́ния му́жески претерпе́в богому́дренно, прему́дре Проко́пие.
И ны́не и при́сно и во ве́ки веко́в. Ами́нь.
Богородичен: Му́дрость и Сло́во Отчее, е́же пре́жде все́х ве́к напосле́док време́н неизрече́нно вопло́щься от Неискусому́жныя Ма́тере , Богоро́дицу Сию́ соде́ла.
Седа́лен, гла́с 4.
Воздержа́ния добро́тами укра́шен, муче́ния кровьми́ уясни́л еси́ ду́шу и па́че со́лнца просия́л еси́, чудоно́сне Проко́пие преподо́бне.
Сла́ва, и ны́не, Богородичен:
Те́плое заступле́ние су́щим в беда́х, и помо́щницу на́шу, и к Бо́гу премене́ние, Еюже тли́ изба́вихомся, Богоро́дицу, ве́рнии, ублажа́ем.
Пе́снь 4.
Ирмос: Христо́с моя́ си́ла, Бо́г и Госпо́дь, честна́я Це́рковь боголе́пно пое́т, взыва́ющи, от смы́сла чи́ста, о Го́споде пра́зднующи.
Припев: Преподобне исповедниче Прокопие, моли Бога о нас.
Напая́я, преподо́бне, сле́зными тече́ньми се́рдце твое́, блаже́нне, доброде́телей се́мя возде́лал еси́ по́мыслом чи́стым, преподо́бне Проко́пие.
Припев: Преподобне исповедниче Прокопие, моли Бога о нас.
Земно́е мудрова́ние Боже́ственному Ду́ху повину́л еси́, о́тче, по́стническое житие́ прие́м и сочета́емь лико́м му́ченическим, всеблаже́нне.
Сла́ва Отцу́ и Сы́ну и Свято́му Ду́ху:
Яко му́ченик боже́ствен и и́стиннейш по благоче́стии, ерети́ческое обличи́л еси́ безу́мие, неи́стовство бо му́жески безбо́жных пренебре́гл еси́.
И ны́не и при́сно и во ве́ки веко́в. Ами́нь.
Богородичен: Зако́нных кроме́ уста́вов, Всенепоро́чная, заче́нши Зижди́теля, и без тли́ Сего́ породила́ еси́, и Богоро́дица и́стинная и госпо́дственно была́ еси́.
Пе́снь 5
Ирмос: Бо́жиим све́том Твои́м, Бла́же, у́тренюющих Ти́ ду́ши любо́вию озари́, молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.
Припев: Преподобне исповедниче Прокопие, моли Бога о нас.
Освяще́нна по́стнически и сконча́вшася кро́вию, о́тче, достойно почита́ем: па́мять бо пра́ведных с похвала́ми при́сно ве́рно соверша́ется и помина́ется.
Припев: Преподобне исповедниче Прокопие, моли Бога о нас.
Му́дре все́ претворя́я и устроя́я к лу́чшему, я́коже хо́щет Госпо́дь, злочеству́ющих скверноуби́йство твои́м воздержа́нием и муче́ния сла́вою преложи́.
Сла́ва Отцу́ и Сы́ну и Свято́му Ду́ху:
На ра́мо взе́м кре́стное всеору́жие, о́тче, Христу́ после́довал еси́, вся́ за́дняя забве́нию творя́, к пре́дним тече́нием простира́яся.
И ны́не и при́сно и во ве́ки веко́в. Ами́нь.
Богородичен: Пое́м, Пречи́стая, из Тебе́ в пло́ть стра́стну же и ме́ртвенну оде́явшагося Го́спода и обоже́ну соде́лавшаго соедине́нием неслия́нным по Ипоста́си.
Пе́снь 6.
Ирмос: Жите́йское мо́ре, воздвиза́емое зря́ напа́стей бу́рею, к ти́хому приста́нищу Твоему́ прите́к, вопию́ Ти: возведи́ от тли́ живо́т мо́й, Многоми́лостиве.
Припев: Преподобне исповедниче Прокопие, моли Бога о нас.
Преходя́, приснопа́мятне, от сла́вы вои́стинну по́стническия, восте́кл еси́ к му́чеников сла́ве и че́сти, твое́ю кро́вию в багряни́цу очервле́ну оде́ян.
Припев: Преподобне исповедниче Прокопие, моли Бога о нас.
Теку́щих непостоя́нное преоби́дев, душе́ю и по́мыслом богому́дренным, приснопребыва́ющим, благи́м и конца́ не иму́щим благоче́стно впери́лся еси́, всеблаже́нне.
Сла́ва Отцу́ и Сы́ну и Свято́му Ду́ху:
Воздержа́нием благомо́щным и кро́тостию Христо́с зря́ тя́ обогати́вшася, человеколю́бне призре́ на тя́ и сла́вы показа́ прича́стника, страстоте́рпче пресла́вне.
И ны́не и при́сно и во ве́ки веко́в. Ами́нь.
Богородичен: Всенепоро́чная Влады́чице, души́ моея́ тя́жкая и лю́тая сокруше́ния рукодея́ньми исцели́ та́йными, действи́тельныя лечбы́ Сы́на Твоего́ полага́ющи Стра́сти.
Конда́к, гла́с 4.
Денни́цу дне́сь Це́рковь иму́щи, вся́кую злосла́вия мглу́ разгоня́ет, почита́ющи Тя́, небеснотаи́нниче, Проко́пие пресла́вне.
Пе́снь 7.
Ирмос: Росода́тельну у́бо пе́щь соде́ла Ангел преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́, Бо́же оте́ц на́ших.
Припев: Преподобне исповедниче Прокопие, моли Бога о нас.
Яко пресве́тло житие́ твое́, богому́дре, бы́сть по́стничеством, та́ко яви́ся твое́ я́ве страда́ние тве́рдо, Христа́ бо просла́вил еси́, вопия́: благослове́н еси́, Бо́же оте́ц на́ших.
Припев: Преподобне исповедниче Прокопие, моли Бога о нас.
Целому́дрия чистото́ю, чу́дный о́тче, препоя́сався, му́жеством же муче́ния вене́ц све́тел прия́л еси́ благода́тию, зовы́й: благослове́н еси́, Бо́же оте́ц на́ших.
Сла́ва Отцу́ и Сы́ну и Свято́му Ду́ху:
Не покланя́ющиися о́бразу Твоему́ Пречи́стому, Спа́се, нечести́вии раба́ Твоего́ я́звят, стру́жуще лю́те, пою́ща и глаго́люща к Тебе́: благослове́н еси́, Бо́же оте́ц на́ших.
И ны́не и при́сно и во ве́ки веко́в. Ами́нь.
Богородичен: Веселя́щеся Рождество́м Твои́м, Всенепоро́чная, вси́ Тя́ ублажа́ем. Того́ бо ра́ди ны́не плотска́го мы́ изба́вльшеся тле́ния, вопие́м Ему́: благослове́н еси́, Бо́же оте́ц на́ших.
Пе́снь 8.
Ирмос: Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки.
Припев: Преподобне исповедниче Прокопие, моли Бога о нас.
Разреше́н от тли́ и пре́жде сме́рти я́влься, преста́вился еси́ отсю́ду к нетле́нней, преподо́бне, жи́зни, сме́рть прие́м ле́ствицею све́тло, Проко́пие богому́дре.
Припев: Преподобне исповедниче Прокопие, моли Бога о нас.
Испо́лнен яви́лся еси́ зари́ благода́тныя и к незаходи́мому Све́ту, о́тче, отше́л еси́, вся́ко ве́щное отложи́в жела́ние. Те́мже тя́ почита́ем, Проко́пие богому́дре.
Сла́ва Отцу́ и Сы́ну и Свято́му Ду́ху:
Вооруже́н си́лою Боже́ственнаго Ду́ха, лука́вствия духо́в победи́л еси́ полки́. Те́мже небе́сныя две́ри тебе́ отверзо́шася, блаже́нне, воспева́ющу Христа́ во ве́ки вся́.
И ны́не и при́сно и во ве́ки веко́в. Ами́нь.
Богородичен: Блажа́т вси́ ро́ди, Влады́чице, я́коже прорекла́ еси́, Еди́на Богоблаже́нная, Тя́, и́стинную Богоро́дицу Пречи́стую, Юже превозно́сим во вся́ ве́ки.
Песнь 9
Ирмос: Бо́га челове́ком невозмо́жно ви́дети, на Него́же не сме́ют чи́ни Ангельстии взира́ти; Тобо́ю бо, Всечи́стая, яви́ся челове́ком Сло́во воплоще́нно, Его́же велича́юще, с небе́сными во́и, Тя́ ублажа́ем.
Припев: Преподобне исповедниче Прокопие, моли Бога о нас.
Пострада́ти зако́нно, му́чениче, изво́лив, страсте́й стремле́ния воздержа́нием умертви́л еси́ и плотска́я взыгра́ния, уго́дниче Христо́в: те́мже безстра́стия ны́не безсме́ртное с безпло́тными во́инствы обре́л еси́ наслажде́ние.
Припев: Преподобне исповедниче Прокопие, моли Бога о нас.
Судии́ пра́ведному све́тло предстои́ши, я́ко победи́тель, венцы́ неувяда́емыя прие́мь, приле́жно, Проко́пие, моля́ся о соверша́ющих твою́ свяще́нную па́мять и боже́ственный пра́здник преставле́ния твоего́.
Сла́ва Отцу́ и Сы́ну и Свято́му Ду́ху:
Заря́ми Тре́ми ны́не озаря́емь, от Еди́наго несказа́нно происходя́щими Божества́, пребога́тнаго насле́дия сподо́бился еси́ и кра́снаго весе́лия, ра́дуяся с преми́рными во́инствы, о́тче Проко́пие.
И ны́не и при́сно и во ве́ки веко́в. Ами́нь.
Богородичен: Тле́нен Сло́во Бо́жие нетле́нное зра́к прие́мь, челове́ки в нетле́ние облече́, благоволе́нием Отчим всели́вся в Тя́, Обра́дованную. Те́мже, Пречи́стая, с небе́сными во́инствы Тя́ велича́ем.
Молитва
О свяще́нная главо́, преподо́бне о́тче, преблаже́нне а́вво Проко́пие, не забу́ди убо́гих твои́х до конца́, но помина́й нас всегда́ во святы́х и благоприя́тных моли́твах к Бо́гу: помяни́ ста́до твое́, е́же сам упа́сл еси́, и не забу́ди посеща́ти чад твои́х моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ ду́ша со а́нгельскими во́инствы, со безпло́тными ли́ки, с небе́сными си́лами, у престо́ла Вседержи́телева предстоя́щи, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![Преподобному исповеднику Прокопию Декаполиту Преподобному исповеднику Прокопию Декаполиту](img_b/016.jpg)