Шрифт

10 марта.

Канон Святителю Тарасию, архиепископу Константинопольскому.

Святителю Тарасию, архиепископу Константинопольскому

Тропа́рь, гла́с 4:

Пра́вило ве́ры и о́браз кро́тости, воздержа́ния учи́теля, яви́ тя ста́ду твоему́, я́же веще́й и́стина, сего́ ра́ди стяжа́л еси́ смире́нием высо́кая, нището́ю бога́тая, о́тче Тара́сие, моли́ Христа́ Бо́га спасти́ся душа́м на́шим.

Кано́н, гла́с 2.

Пе́снь 1.

Ирмос: Гряди́те, лю́дие, пои́м пе́снь Христу́ Бо́гу, разде́льшему мо́ре и наста́вльшему лю́ди, я́же изведе́ из рабо́ты еги́петския, я́ко просла́вися.

Припев: Святителю отче Тарасие, моли Бога о нас.

Наведе́ния, и плене́ния, и рабо́ты грехо́вныя мя́ изба́ви и к покая́нию наста́ви, Ще́дре, наводя́ мя ско́ро к любви́ Твое́й.

Струи́ жи́зни име́я, му́дре, се́рдце твое́, Це́ркве бы́л еси́ я́ко река́ Бо́жия, напо́лнившися уче́ньми, и сея́ напоя́я, о́тче, бразды́.

Ма́стию тво́й ве́рх честны́й Ду́хом Боже́ственным пома́зася, Тара́сие, на браду́ бога́тно, я́ко Ааро́ню, сни́де на оме́ты твоя́, я́ко роса́ Аермо́нская.

Богородичен: Се́ вопие́т Иса́ия, Де́во Чи́стая: сове́та вели́каго Ангела, во утро́бе Твое́й заче́нши без се́мене, родила́ еси́ и Де́ва пребыва́еши по Рождестве́, Чи́стая.

Пе́снь 3.

Ирмос: Утверди́ на́с в Тебе́, Го́споди, дре́вом умерщвле́й гре́х, и стра́х Тво́й всади́ в сердца́ на́с, пою́щих Тя́.

Все́м утвержде́ние сердца́м бы́л еси́ хле́бом слове́с твои́х, святи́телю, умаща́я же, я́ко еле́ем, весели́ши, я́ко вино́м, сердца́ на́ша.

Теплото́ю ра́зума и ре́вностию ве́ры отце́в бы́л еси́ верхо́вник, и ерети́ческая противле́ния я́ко су́щая а́дова врата́ разори́л еси́.

Возде́в к Бо́гу преподо́бныя ру́ки твоя́, ми́р ста́ду твоему́ испроси́. Те́мже и к Вы́шнему насле́дию возше́д, почи́л еси́.

Богородичен: Стра́нно Рождество́, стра́нно происхожде́ние во утро́бе обновля́ется Де́вы, и естество́, попо́лзшееся в тле́ние, от ле́сти воздви́же.

Седа́лен, гла́с 3.

Де́лы просия́л еси́ богоразу́мия, заре́ю облиста́л еси́ Це́рковь, е́реси умертви́л еси́ словесы́ твои́ми, нищелю́бие и любо́вь источи́л еси́, Авра́амову странноприя́тию подо́бяся, о́тче Тара́сие, Христа́ Бо́га моли́, дарова́ти на́м ве́лию ми́лость.

Сла́ва, и ны́не, Богородичен:

Боже́ственная ски́ния была́ еси́ Сло́ва, еди́на Пречи́стая Ма́ти Де́во, чистото́ю Ангелы превозше́дшая, па́че все́х мене́ пе́рсть бы́вша, оскверне́на плотски́ми прегреше́ньми, очи́сти моли́тв Твои́х боже́ственными вода́ми, подаю́щи, Чи́стая, ве́лию ми́лость.

КрестоБогородичен:

Нескве́рная Агница Сло́ва, нетле́нная Де́ва Ма́ти, на Кресте́ зря́щи пове́шена из Нея́ без боле́зни прозя́бшаго, ма́терски подо́бно рыда́ющи, вопия́ше: увы́ Мне́, Ча́до Мое́, ка́ко стра́ждеши во́лею, хотя́ изба́вити от страсте́й безче́стия челове́ка?

Пе́снь 4.

Ирмос: Пою́ Тя, слу́хом бо, Го́споди, услы́шах и ужасо́хся: до мене́ бо и́деши, мене́ ища́, заблу́ждшаго. Те́м мно́гое Твое́ снизхожде́ние, е́же на мя́, прославля́ю, Многоми́лостиве.

По́том благоче́стия все́ял еси́ Боже́ственное сло́во Це́ркви и пожа́л еси́ кла́с, Тара́сие, Правосла́вия; на земли́ кро́тких всели́лся еси́ и с ни́ми ра́дуешися, веселя́ся.

Его́же рече́ Иса́ия, преподо́бне, боже́ственный стра́х во чре́ве прия́л еси́ Ду́хом и роди́л еси́ Це́ркви, и́мже ересе́й прозябе́ния разбива́ются о ка́мень ве́ры.

Излия́нием сле́з, преподо́бне, отмы́л еси́ скве́рны и ко исто́чнику дости́гл еси́, в не́мже неодожде́нное пи́во сла́дости присносу́щныя пролива́емо, к жела́нием ты́ приспе́л еси́ кра́йним.

Богородичен: Без се́мени заче́нся, Всенепоро́чная, Бо́г Сло́во во утро́бе Твое́й происхо́дит сообра́зно непрело́жно к челове́ческому ро́ду. Того́ о рабе́х Твои́х моли́ при́сно, от бе́д спасти́ся душа́м на́шим.

Пе́снь 5

Ирмос: Све́та Пода́телю и веко́в Тво́рче, Го́споди, во све́те Твои́х повеле́ний наста́ви на́с: ра́зве бо Тебе́, ино́го Бо́га не зна́ем.

Си́лою слове́с твои́х не́мощь нечести́вых обличи́л еси́, и сою́зом связа́л еси́ боже́ственныя любве́ ста́до твое́, и наде́ждею и ве́рою сохраня́еши невреди́мо.

Оттря́с воздержа́нием пи́щу, пита́л еси́ твою́ ду́шу, хле́б име́я чи́стыя моли́твы, поуче́ние же боже́ственное и вознося́щее смире́ние.

Ты́ ри́зу, му́дре, церко́вную оте́чески истка́л еси́, в ню́же Христо́с честны́м о́бразом оде́яв тя́ ве́ры ра́ди, и правосла́вия уясни́л еси́ уче́ния.

Богородичен: Тя́ Предста́тельницу, Чи́стая, и наде́жди кре́пкое основа́ние, и подпо́р, и покро́в, и сте́ну и́мамы вси́, и к Ца́рствию приводя́щий мо́ст.

Пе́снь 6.

Ирмос: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́.

Же́ртва и заколе́ние бы́в, повину́л еси́ себе́ Бо́гу ве́рою и соблюда́еши безкро́вныя слу́жбы Его́ соверше́ние.

Ны́не в невеще́ственную сла́ву преше́д от земли́, веще́ственными страстьми́ оскве́рншуюся, преподо́бне, ду́шу мою́ приле́жною моли́твою твое́ю исцели́.

Острога́л еси́ дебельство́ писа́ния ра́зума глубо́ким истонче́нием, Це́ркви бы́л еси́ скоропи́сца, Тара́сие, тро́сть.

Богородичен: Недоуме́нием покрыва́ется Рождество́ Твое́, стра́нно бо, Де́во, дои́ши Пита́теля, и млеко́м пита́еши Невеще́ственнаго, и на руку́ держи́ши Зижди́теля.

Конда́к, гла́с 3.

Правосла́вными догма́ты Це́рковь уясни́в, и Христо́ву, блаже́нне, честну́ю ико́ну почита́ти и покланя́тися все́х научи́в, обличи́л еси́ иконобо́рцов безбо́жное веле́ние. Сего́ ра́ди вопие́м ти́: о о́тче, ра́дуйся, му́дре Тара́сие!

Пе́снь 7.

Ирмос: Образу злато́му на по́ле Деи́ре служи́му, трие́ Твои́ о́троцы небрего́ша безбо́жнаго веле́ния, посреде́ же огня́ вве́ржени, ороша́еми, поя́ху: благослове́н еси, Бо́же оте́ц на́ших.

Прему́дрости ча́ша яви́лся еси́, доброде́тельми испо́лнена, и, созва́в пропове́данием высо́каго жития́ твоего́, наслади́л еси́ ста́до, богому́дре, и с ни́м, о́тче, взыва́еши: благослове́н еси́, Бо́же оте́ц на́ших.

Оби́тели та́мошния и наслажде́ния честна́я предвари́л еси́, и ра́дуешися с Бо́гом твои́м, и весели́шися у́бо. Те́мже тя́ чту́ще, преблаже́нне, со дерзнове́нием взыва́ем: благослове́н еси́, Бо́же оте́ц на́ших.

Му́жеством ра́зума препоя́сан в чре́сла, Тара́сие, и житие́м оде́ян, вводя́щим в ве́ру, на трапе́зу Вы́шняго Царя́ восте́кл еси́, поя́: благослове́н еси́, Бо́же оте́ц на́ших.

Богородичен: Без Отца́ из Тебе́, Иже без ма́тере из Отца́, прохо́дит, и чистоты́ Твоея́ зна́мения сохра́нь невре́дна, показа́ пречи́сто рождество́ и де́вство нескве́рно: обновля́ется бо в Тебе́ зако́на рождество́.

Пе́снь 8.

Ирмос: В пещи́ о́трочестей прообрази́л еси́ иногда́ Твою́ Ма́терь, Го́споди, о́браз же Сия́ из огня́ изыма́ше, неопа́льно входя́щия. Юже пое́м, я́вльшуюся Тобо́ю конце́м дне́сь, и превозно́сим во вся́ ве́ки.

Ты́, я́ко о́блак у́тренний, и я́ко ка́пля ка́плющая, и роса́, яви́лся еси́, благотворе́ния бога́тство собра́л еси́ на земли́, а́лчущих сердца́ ума́стил еси́ и све́тлу вже́гл еси́, му́дре, душе́вную свещу́.

Святи́тельства оде́ждею де́л твои́х све́том просве́щся, и яви́лся еси́ целому́дрия клю́чь, воздержа́ния пи́ща, и́стинныя моли́твы учи́тель, и покая́ния пу́ть, и зако́н жития́.

Покая́ния вре́мя и обраще́ния пло́д принеси́, и смоко́вницы непло́дныя посече́ния преще́ния, душе́ моя́, кля́твы убо́йся, напита́й же Христа́ доброде́телей благопло́дием.

Богородичен: Не забу́ди гла́са, Предста́тельнице стра́шная, ра́б Твои́х, но от вся́кия беды́ моли́твами Твои́ми и вся́каго преще́ния исхити́, преклоня́ет бо Бо́га Твоя́ Ма́терняя моли́тва.

Пе́снь 9.

Ирмос: От Бо́га Бо́га Сло́ва, неизрече́нною му́дростию прише́дшаго обнови́ти Ада́ма, я́дию в тле́ние па́дшаго лю́те, от Святы́я Де́вы неизрече́нно воплоти́вшагося на́с ра́ди, ве́рнии, единому́дренно пе́сньми велича́ем.

Увяди́л еси́, о́тче, кова́рствия и стре́лы вра́жия огне́м воздержа́ния и чистоты́ у́гльми, пло́ти ве́щный гне́в попали́л еси́ и́стинно, о́наго светозаре́ния, Тара́сие, сподо́бився.

С патриа́ршескими ли́ки водворя́яся, пое́ши пе́снь Ангельскую с ни́ми: свя́т, свя́т, свя́т Оте́ц роди́тель, и Сы́н рожде́йся, и Ду́х, исходя́й неразде́льно; Тро́ице Свята́я, сла́ва Тебе́!

Яко вше́дшу в вы́шняя с Па́влом, вопие́м: преблаже́нне, Бо́жие блаже́нство, Це́ркви утвержде́ние,Импера́тору побе́ду, на́м же дарова́ти очище́ние, чту́щим тя́ любо́вию, Тара́сие, помоли́ся.

Богородичен: Вопло́щься неизрече́нно от чи́стых Твои́х крове́й, я́ко со́лнце, яви́ся на́м, Пречи́стая Ма́ти безневе́стная, ве́к все́х Иже пе́рвее, Отцу Собезнача́лен Сы́н, и тму́ отгна́в, просвети́ вся́ческая.

Молитва первая святителю Тарасию, архиепископу Константинопольскому

О, всехва́льный святи́телю Христо́в и чудотво́рче Тара́сие! Приими́ сие́ ма́лое моле́ние от на́с гре́шных, к тебе́ прибега́ющих, и те́плым твои́м предста́тельством умоли́ Го́спода и Бо́га на́шего Иису́са Христа́, я́ко да, призре́в на ны́ ми́лостивно, да́рует на́м согреше́ний на́ших во́льных и нево́льных проще́ние, и по вели́цей Свое́й ми́лости изба́вит на́с от бе́д, печа́лей, ско́рби и боле́зней душе́вных и теле́сных, обдержа́щих на́с; да пода́ст земли́ плодоно́сие, и вся́, я́же на по́льзу настоя́щаго жития́ на́шего потре́бная; да да́рует на́м сконча́ти житие́ сие́ привре́менное в покая́нии, и да сподо́бит на́с гре́шных и недосто́йных Небе́снаго Ца́рствия Своего́, со все́ми святы́ми сла́вити Его́ безконе́чное милосе́рдие, со Безнача́льным Его́ Отце́м и Святы́м и Животворя́щим Его́ Ду́хом, во ве́ки веко́в. Ами́нь.

Молитва вторая святителю Тарасию, архиепископу Константинопольскому

О, пречестна́я и свяще́нная главо́ и благода́ти Свята́го Ду́ха испо́лненная, Спа́сово со Отце́м обита́лище, вели́кий архиере́е, те́плый на́ш засту́пниче, святи́телю Тара́сие, предстоя́ у Престо́ла все́х Царя́ и наслажда́яся све́та Единосу́щныя Тро́ицы и херуви́мски со а́нгелы возглаша́я пе́снь трисвяту́ю, вели́кое же и неизсле́дованное дерзнове́ние име́я ко Всеми́лостивому Влады́це, моли́ спасти́ся па́ствы Христо́вы лю́дем, благостоя́ние святы́х церкве́й утверди́, архиере́и благоле́пием святи́тельства украси́, мона́шествующия к подвиго́м до́браго тече́ния укрепи́, ца́рствующий гра́д и вся́ гра́ды страны́ до́бре сохрани́ и ве́ру святу́ю непоро́чну соблюсти́ умоли́, ми́р ве́сь предста́тельством твои́м умири́, от гла́да и па́губы изба́ви ны́, и от нападе́ния иноплеме́нных сохрани́, ста́рыя уте́ши, ю́ныя наста́ви, безу́мныя умудри́, вдови́цы поми́луй, сироты́ заступи́, младе́нцы возрасти́, плене́нныя возврати́, немощству́ющия исцели́, и везде́ те́пле призыва́ющия тя́ и с ве́рою припа́дающия и моля́щияся тебе́ от вся́ких напа́стей и бе́д хода́тайством твои́м свободи́, моли́ о на́с Всеще́драго и Человеколюби́ваго Христа́ Бо́га на́шего, да и в де́нь стра́шнаго прише́ствия Его́ от шу́ияго стоя́ния изба́вит на́с и ра́дости святы́х прича́стники сотвори́т со все́ми святы́ми во ве́ки веко́в. Ами́нь.

Святителю Тарасию, архиепископу Константинопольскому