Шрифт

9 июня.

Канон святому праведному Иоанну Русскому, Исповеднику.

праведному Иоанну Русскому, Исповеднику
Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

От земли́ плене́ния твоего́ воззва́вый тя́ к небе́сным селе́нием Госпо́дь соблюда́ет невреди́мо и цельбоно́сно те́ло твое́, пра́ведне Иоа́нне, ты́ бо, в Росси́и я́тый и во Аси́ю прода́нный, посреде́ ага́рянскаго злоче́стия благоче́стно пожи́л еси́ во мно́зе терпе́нии и, се́яв зде́ слеза́ми, жне́ши та́мо неизглаго́ланною ра́достию. Те́мже моли́ Христа́ Бо́га спасти́ся душа́м на́шим.

Кано́н свята́го, гла́с 2.

Пе́снь 1.

Ирмос: Гряди́те, лю́дие, пои́м пе́снь Христу́ Бо́гу, разде́льшему мо́ре и наста́вльшему лю́ди, я́же изведе́ из рабо́ты Еги́петския, я́ко просла́вися.

Припев: Пра́ведне отче Иоа́нне, моли́ Бо́га о нас.

Пресве́тлым озаря́емь све́том Со́лнца пра́вды, просвеще́ние испроси́ мне́, омраче́нному, воспе́ти твое́, богосве́тле, светоза́рное торжество́.

Припев: Пра́ведне отче Иоа́нне, моли́ Бо́га о нас.

Уды вся умертви́в, му́дре, в чи́стом се́рдце твое́м име́л еси́ Христа́, умертви́вша и сте́рша главу́ зми́я и от я́да того́ изба́вльша челове́ческое естество́.

Сла́ва Отцу́ и Сы́ну и Свято́му Ду́ху:

В зако́не Госпо́дни поуча́яся, бы́л еси́, я́ко дре́во, е́же благи́й пло́д сво́й даде́ во вре́мя свое́, прия́л бо еси́ по кончи́не, достосла́вне, благода́ть врачева́ти призыва́ющия тя́.

И ны́не и при́сно и во ве́ки веко́в. Ами́нь.

Богородичен: Тя́, Всепе́тая Присноде́во, испове́дающии Богоро́дицу, утвержде́ние и предста́тельство и́мамы и, прибега́юще к Тебе́, бу́ри жите́йския и искуше́ний избавля́емся.

Пе́снь 3.

Ирмос: Утверди́ на́с в Тебе́, Го́споди, дре́вом умерщвле́й гре́х, и стра́х Тво́й всади́ в сердца́ на́с, пою́щих Тя́.

Припев: Пра́ведне отче Иоа́нне, моли́ Бо́га о нас.

Просия́ свято́е житие́ твое́, блаже́нне, во Аси́и и озаря́ет све́том чуде́с, но проси́ и на́м благода́ти, е́же хоте́ти и е́же де́яти, блага́я чту́щим па́мять твою́.

Припев: Пра́ведне отче Иоа́нне, моли́ Бо́га о нас.

Не да́л еси́ сна́ очи́ма твои́ма, до́ндеже успи́л еси́, достохва́льне, безчи́нная двиза́ния востаю́щия на ду́х пло́ти твои́ми ко Го́споду всено́щными моле́нии.

Сла́ва Отцу́ и Сы́ну и Свято́му Ду́ху:

Непобеди́мою си́лою Креста́ Христо́ва де́монская победи́в устремле́ния, яви́лся еси́ вино́вник спасе́ния мно́гих, помо́щник сы́й притека́ющих к моще́м твои́м.

И ны́не и при́сно и во ве́ки веко́в. Ами́нь.

Богородичен: Яко Черто́г одушевле́н Бо́жий и Кади́льницу мы́сленнаго и светоно́снаго Угля, велича́ем Тя́, Богоро́дице, зову́ще: ра́дуйся, Хода́таице спасе́ния на́шего.

По 3-й пе́сни, седа́лен, гла́с 4:

Бы́л еси́ пле́нник на земли́, богому́дре, вся́ко озлобле́ние претерпева́я, доброде́тели, я́коже фимиа́м благово́нен и же́ртву благоприя́тну, прине́сл еси́ Бо́гу, Его́же моли́ дарова́ти согреше́ний очище́ние чту́щим святу́ю па́мять твою́.

Сла́ва, и ны́не, Богородичен:

Ты прибе́жище на́ше еси́, и си́ла, и утеше́ние, Богоро́дице Пречи́стая: се́ бо Иже все́х Госпо́дь, ро́ждься от Тебе́, Де́ву боже́ственную Тя́ соблюде́ по рождестве́ и небесе́ и земли́ Цари́цу сотвори́, те́м Тя́ вси́ недосто́йными усты́ сла́вим.

Пе́снь 4.

Ирмос: Услы́шах, Го́споди, слу́х Тво́й и убоя́хся, разуме́х дела́ Твоя́, и диви́хся, и возопи́х: сла́ва си́ле Твое́й, Го́споди.

Припев: Пра́ведне отче Иоа́нне, моли́ Бо́га о нас.

Ду́шу свою́ украси́л еси́, плотско́е умертви́в мудрова́ние, те́мже небе́сных красо́т еси́ зри́тель.

Припев: Пра́ведне отче Иоа́нне, моли́ Бо́га о нас.

Пра́веден бы́л еси́ и незло́бив, и́стинен же и непоро́чен, ве́рен и богочести́в, прехва́льне.

Сла́ва Отцу́ и Сы́ну и Свято́му Ду́ху:

Боже́ственным смире́нием возвыша́емь, врага́ смири́л еси́, блаже́нне, на небеси́ и на земли́ сла́вен я́влься.

И ны́не и при́сно и во ве́ки веко́в. Ами́нь.

Богородичен: Спаса́й ста́до Твое́, Ма́ти Бо́жия, безвре́дно от вся́каго зла́: Тя́ бо во обстоя́ниих и́мамы избавле́ние.

Пе́снь 5

Ирмос: Просвеще́ние во тме́ лежа́щих, спасе́ние отча́янных, Христе́ Спа́се мо́й, к Тебе́ у́тренюю, Царю́ ми́ра, просвети́ мя сия́нием Твои́м, ино́го бо ра́зве Тебе́ Бо́га не зна́ю.

Припев: Пра́ведне отче Иоа́нне, моли́ Бо́га о нас.

Неблагоро́ден ра́б по те́лу сотво́рься, благоро́ден нра́в в души́ име́л еси́, прече́стне, все́ твое́ жела́ние на Бо́га Всеви́дца возложи́л еси́.

Припев: Пра́ведне отче Иоа́нне, моли́ Бо́га о нас.

Богоуго́дно тече́ние свое́ на земли́ соверши́вшу ти, со благоугоди́вшими Бо́гу ны́не лику́еши, моля́ся о почита́ющих преставле́ние твое́, богоизбра́нне.

Сла́ва Отцу́ и Сы́ну и Свято́му Ду́ху:

Чу́до зри́тся на тебе́, сла́вне, ка́ко по преставле́нии соблюда́ется неруши́мо, благово́нно и целе́бно те́ло твое́ судьба́ми Просла́вльшаго тя́.

И ны́не и при́сно и во ве́ки веко́в. Ами́нь.

Богородичен: Испо́лни уста́ на́ша хвале́ния Твоего́, Госпоже́, и покажи́ ны други́й десятостру́нный псалти́рь очище́нием сугу́быя чу́вств пятери́цы.

Пе́снь 6.

Ирмос: Гла́с глаго́л моле́бных от боле́зненныя, Влады́ко, души́ услы́шав, от лю́тых мя́ изба́ви: Еди́н бо еси́ на́шего спасе́ния вино́вен.

Припев: Пра́ведне отче Иоа́нне, моли́ Бо́га о нас.

Яко кри́н благово́нен, израсти́ тя Росси́я, и, я́ко ши́пок красе́н, бы́л еси́ посреде́ те́рния ага́рянскаго, облагово́нившей тя́ благода́ти Бо́жией.

Припев: Пра́ведне отче Иоа́нне, моли́ Бо́га о нас.

Яко фи́никс процве́т, благода́ти тезоиме́нне, сла́достию плодо́в, услажда́еши чу́вства ве́рных, я́ко ке́др несокруши́мь, я́влься бу́рею напа́стей и искуше́ний.

Сла́ва Отцу́ и Сы́ну и Свято́му Ду́ху:

Яко многоце́нное сокро́вище, в земли́ кры́ющееся, мо́щи своя́ яви́л еси́ благочести́вым в виде́нии, и те́ми неду́ги врачу́еши, подая́ от Бо́га освяще́ние лобыза́ющим я́.

И ны́не и при́сно и во ве́ки веко́в. Ами́нь.

Богородичен: Яко Ма́ти все́х даро́в Пода́теля яви́лася еси́, са́д многоцве́тен и ра́й сладкоды́шущь, плода́ми Ду́ха ущедря́ющь и благода́тьми облагоуха́ющь пою́щия Тя́.

Конда́к, гла́с 8:

В честне́й па́мяти твое́й, свя́те, весели́тся о тебе́ Росси́я, во благоче́стии тя́ воспита́вшая, и целе́бным моще́м твои́м ра́дуется Аси́я, иде́же у́зкий пу́ть проше́д страда́льческаго пле́на и по́стнических подвиго́в, сосу́д че́стен яви́лся еси́ Бо́жия благода́ти, ея́же проси́ и на́м, чти́телем твои́м, да зове́м ти́: ра́дуйся, Иоа́нне, благода́ти тезоимени́те.

Икос:

Ка́ко по достоя́нию восхва́лим тя́, доблему́дре, по́двиги твои́ми стра́сти умертви́вша, пло́ть порабо́тивша ду́ху и врага́ победи́вша? Кто́, слы́шав вели́кое твое́ терпе́ние и смире́ние, не удиви́тся? Еже ко все́м кро́тость и беззло́бие, к скорбя́щим сострада́ние, к су́щим в беда́х и неду́зех поможе́ние. В невече́рнем у́бо дни́ Ца́рствия Бо́жия, с пра́ведными пра́ведно наслажда́яся, моли́ся о чту́щих па́мять твою́, да зове́м ти́: ра́дуйся, Иоа́нне, благода́ти тезоимени́те.

Пе́снь 7.

Ирмос: Образу злато́му, на по́ле Деи́ре служи́му, трие́ Твои́ о́троцы небрего́ша безбо́жнаго веле́ния, посреде́ же огня́ вве́ржени, ороша́еми, поя́ху: благослове́н еси́, Бо́же оте́ц на́ших.

Припев: Пра́ведне отче Иоа́нне, моли́ Бо́га о нас.

Де́нь пра́зднственный соверша́ем дне́сь блаже́ннаго успе́ния твоего́, светоза́рне, в не́мже свети́льник нося́, по́лн еле́я благи́х де́л, вше́л еси́ в све́тлый черто́г и Жениху́ ду́ш вопие́ши: благослове́н еси́, Бо́же оте́ц на́ших.

Припев: Пра́ведне отче Иоа́нне, моли́ Бо́га о нас.

Ду́шу удобри́в, богому́дре, ра́лом моли́твы, воздержа́ние посе́яв и ороси́в е́ слеза́ми, пожа́л еси́ кла́сы чистоты́ и пра́ведности и с пра́ведными взыва́еши укре́пльшему тя́ Христу́: благослове́н еси́, Бо́же оте́ц на́ших.

Сла́ва Отцу́ и Сы́ну и Свято́му Ду́ху:

Святы́х ду́ши, пра́ведных ли́к и безпло́тных умо́в ополче́ние прия́ша тя́, сликовству́юща и́м, досточу́дне, нетле́нным одея́нием сла́вы укра́шенна и с ни́ми пою́ща: благослове́н еси́, Бо́же оте́ц на́ших.

И ны́не и при́сно и во ве́ки веко́в. Ами́нь.

Богородичен: На Тя́, Влады́чице, наде́жду мою́ от души́ возложи́х всю́ и ча́ю от Тебе́ боже́ственнаго утеше́ния, благода́тную по́мощь низпосли́ ми, стезю́ показу́я, к небеси́ возводя́щую, во е́же пе́ти: благослове́н еси́, Бо́же оте́ц на́ших.

Пе́снь 8.

Ирмос: В пе́щь о́гненную ко отроко́м евре́йским снизше́дшаго и пла́мень в ро́су прело́жшаго Бо́га, по́йте дела́ я́ко Го́спода, и превозноси́те во вся́ ве́ки.

Припев: Пра́ведне отче Иоа́нне, моли́ Бо́га о нас.

Святе́йших и Животворя́щих Та́ин возжеле́вшу тебе́, прехва́льне, приобщи́тися при исхо́де, принесе́ни бы́ша во я́блоце, и́хже прия́в, воспари́л еси́ к небе́сным.

Припев: Пра́ведне отче Иоа́нне, моли́ Бо́га о нас.

Добро́ту Созда́теля, ю́же зре́л еси́ зде́, я́ко в зерца́ле и гада́нии, ны́не, преше́д к вы́шним, ясне́йше зри́ши, разре́шшимся тебе́ зерца́лом, богоблаже́нне.

Сла́ва Отцу́ и Сы́ну и Свято́му Ду́ху:

Тече́ния сла́дкая исцеле́ний иска́пают по́тове твои́ и ско́рби твоя́ — ра́дование с ве́рою притека́ющим к моще́м твои́м во сла́ву Христа́ Бо́га на́шего.

И ны́не и при́сно и во ве́ки веко́в. Ами́нь.

Богородичен: Святе́йший хра́ме Спа́са на́шего, пресла́вный Его́ престо́ле, превысо́кое не́бо и раю́ слове́сный, отве́рзи на́м, Преблагослове́нная Богороди́тельнице, ра́йския две́ри.

Песнь 9

Ирмос: От Бо́га Бо́га Сло́ва, неизрече́нною му́дростию прише́дшаго обнови́ти Ада́ма, я́дию в тле́ние па́дшаго лю́те, от Святы́я Де́вы неизрече́нно воплоти́вшагося на́с ра́ди, ве́рнии, единому́дренно пе́сньми велича́ем.

Припев: Пра́ведне отче Иоа́нне, моли́ Бо́га о нас.

Бога́тство некра́домое собра́в, е́же ни че́рвь, ни тля́ тли́т, и, я́коже не́кий корабле́ц, отплы́в от земли́, приста́нища всепоко́йнаго и блаже́нства ве́чнаго дости́гл еси́.

Припев: Пра́ведне отче Иоа́нне, моли́ Бо́га о нас.

Го́рнее Ца́рство, Вы́шний гра́д, Бо́жий ра́й, пра́ведных наслажде́ние и све́т немерца́ющь обрести́ сподо́бился еси́, иде́же на́с помяни́, воспева́ющих тя́, всехва́льне.

Сла́ва Отцу́ и Сы́ну и Свято́му Ду́ху:

С со́нмом пра́ведных и все́х святы́х лику́я, приснопа́мятне, моли́ все́х Созда́теля и Бо́га, да сподо́бит спаса́емых ча́сти па́мять твою́ пра́зднующих.

И ны́не и при́сно и во ве́ки веко́в. Ами́нь.

Богородичен: Приими́, Влады́ко, хода́тайство о на́с Ма́тере Твоея́ и его́же просла́вил еси́, Иоа́нна пра́веднаго, и́хже мольба́ми не лиши́ на́с благи́х Твои́х, угото́ванных лю́бящим Тя́.

Свети́лен:

Ди́вное узре́вше зна́мение, ужасо́шася омраче́ннии ага́ряне: све́т бо блиста́ше, иде́же бе́ погребе́н Иоа́нн, и а́бие возвести́ша сие́ ве́рным, и́же, откопа́вше гро́б, с ра́достию обрето́ша нетле́нное, и благоуха́нное, и цельбоно́сное пра́веднаго те́ло, Христа́ Бо́га о не́м велича́юще.

Сла́ва, и ны́не, Богородичен:

Све́т благода́ти Рождество́м Твои́м возсия́, и просвети́ всю́ подсо́лнечную, и предста́теля тмы́ погуби́, Богороди́тельнице Пречи́стая, Ангелов похвало́ и челове́ков все́х спасе́ние, непреста́нными гла́сы Тя́ велича́ющих.

Молитва праведному Иоанну Русскому

О, великий угодниче Божий, святый праведный Иоанне Русский, просиявый в земли Ассии равноангельным житием твоим, ревностию о Господе и подвигами во исповедании веры Христовы, града Неопрокопиона и всея земли Эллады пресветлое украшение, богохранимей стране нашей, людем ея и во всем мире живущим православным христианом помоще и крепкое заступление! Благодарим Господа, дивнаго во святых Своих, в вере истинней непоколебимо тя утвердившаго, в стоянии за исповедание ея укрепившаго и доброе скончание подвига многотруднаго даровавшаго, последи же многая и великая чудеса нам явившаго чрез многоцелебную раку мощей твоих. Ныне, предстоя Небесному Царю, испроси у Него избавити вся грады и веси страны нашея и земли Эллады от глада, труса, мраза, огня, смертоносных болезней, от нашествий иноплеменных и междоусобных браней. Помози всем путешествующим, болящим, в заточении сущим, в скорбех и гонениих за святую веру Православную терпящим. Соедини всех православных людей любовию ко Христу Богу нашему и Церкви Его Святей, даруй нам дух любве и мира к братскому единению всех верных. Умоли Господа, да подаст нам дух покаяния и сокрушения о гресех наших и всесильною Своею благодатию да поможет и укрепит в борьбе со страстьми и похотьми, да дарует нам дух смирения и кротости, дух братолюбия и незлобия, дух ревности по Бозе и спасении ближних. Помяни и нас, грешных, молящихся тебе: страждущих и болящих исцели, скорбящих утеши, бедствующим скорую помощь подай, всем же чтущим и любящим тя испроси христианскую кончину живота безболезненну, непостыдну, мирну и добраго ответа на Страшнем Судищи Христове. Буди нам помощник и покровитель во спасение, да твоими молитвами сподобимся в нынешнем и будущем веце прославляти в Троице славимаго Бога, Отца и Сына и Святаго Духа, ныне и присно и во веки веков. Аминь.

Молитва вторая праведному Иоанну Русскому

О, святы́й новоявле́нный уго́дниче Бо́жий Иоа́нне Ру́сский! По́двигом до́брым подвиза́яся на земли́, восприя́л еси́ на Небесе́х вене́ц пра́вды, е́же угото́вал есть Госпо́дь всем лю́бящим Его́. Те́мже взира́юще на святы́й твой о́браз, ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́й Престо́лу Бо́жию, приими́ моле́ния на́ша, раб Бо́жиих (имена), и ко Всеми́лостивому Бо́гу принеси́, о е́же прости́ти нам вся́кое прегреше́ние и по́мощи нам ста́ти проти́ву ко́зней диа́вольских, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.

Окончание

По прочтении канона и молитвы, чти:

Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:

Го́споди, поми́луй, трижды.

И отпуст.

Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.

праведному Иоанну Русскому, Исповеднику