9 июня.

Канон священномученику Ферапонту Сардийскому.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропарь, глас 4:

И нpа́вом пpича́стник,/ и пpесто́лом наме́стник апо́столом быв,/ дея́ние обpе́л еси́, Богодухнове́нне,/ в виде́ния восхо́д,/ сего́ pа́ди сло́во и́стины испpавля́я,/ и ве́pы pа́ди постpада́л еси́ да́же до кpо́ве,/ священному́чениче Ферапо́нте,/ моли́ Хpиста́ Бо́га// спасти́ся душа́м на́шим.

Кано́н, творе́ние Ио́сифово, гла́с 6.

Пе́снь 1.

Ирмос: Яко по су́ху пешеше́ствовав Изра́иль по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.

Припев: Священному́чениче Ферапо́нте, моли́ Бо́га о нас.

Со свяще́нными ли́ки на небесе́х лику́я всегда́, чту́щия на земли́ святу́ю па́мять твою́, страсте́й и бе́д лю́тых, Ферапо́нте, изба́ви.

Припев: Священному́чениче Ферапо́нте, моли́ Бо́га о нас.

Простира́емо в ми́ре свяще́нное и честно́е твое́ страда́ние, возставля́ет ве́рныя в то́, сла́вити тя́, све́тло до́блествовавша, му́дре Ферапо́нте, благода́тию.

Сла́ва Отцу́ и Сы́ну и Свято́му Ду́ху:

Богосия́нну тя́ звезду́, мы́сленное со́лнце показа́в, по́двиг твои́х све́том и чуде́с сия́нием ве́рныя озаря́ет, свяще́нно восхваля́ющия тя́.

И ны́не и при́сно и во ве́ки веко́в. Ами́нь.

Богородичен: Свяще́нный ли́к проро́ческий предсказа́ше издале́ча, хотя́щу Тя́ бы́ти Бо́жию Роди́тельницу, Чи́стая, вы́шшу херуви́м и вся́кия тва́ри.

Пе́снь 3.

Ирмос: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.

Припев: Священному́чениче Ферапо́нте, моли́ Бо́га о нас.

Уго́дник бы́л еси́ Христо́в, и́стинно нося́ и подо́бно, му́чениче, твое́ зва́ние вои́стинну, и цели́ши ду́ш и теле́с всегда́ неду́ги.

Припев: Священному́чениче Ферапо́нте, моли́ Бо́га о нас.

Кро́вь, с ма́стию сме́шшися, твое́ свяще́нство светле́йше твори́т, святи́телю и па́стырю, му́чениче и врачу́ боля́щих, те́мже восхваля́ем тя́.

Сла́ва Отцу́ и Сы́ну и Свято́му Ду́ху:

Цели́ши стра́сти лю́тыя ве́рно приступа́ющих, и неду́ги уставля́еши, и духо́в лука́вых очища́еши вре́д Христо́вым призыва́нием боже́ственным, всеблаже́нне.

И ны́не и при́сно и во ве́ки веко́в. Ами́нь.

Богородичен: Разуме́ти рождества́ Твоего́, Чи́стая, неизглаго́ланную глубину́ недоуме́ет у́м челове́чь: Бо́г бо, излия́в Себе́ за милосе́рдие, во утро́бе Твое́й, всего́ мя обнови́.

Седа́лен, гла́с 1.

Уго́дниче Христо́в, пострада́в зако́нно, яви́лся еси́ и́стинен святи́тель и му́ченик. Те́мже мо́лим тя́: ду́ш на́ших, свя́те, ны́не уврачу́й неудобьисце́льныя стра́сти, Человеколю́бца и Воли́теля ми́лости Христа́ умоли́.

Сла́ва, и ны́не, Богородичен:

Наста́ви на́с на пу́ть покая́ния, укло́ньшияся при́сно к безпу́тием зо́л и Преблага́го прогне́вавшия Го́спода, Неискусобра́чная благослове́нная Мари́е, прибе́жище отча́янных челове́ков, Бо́жие жили́ще.

Пе́снь 4.

Ирмос: Христо́с моя́ си́ла, Бо́г и Госпо́дь, честна́я Це́рковь боголе́пно пое́т, взыва́ющи, от смы́сла чи́ста, о Го́споде пра́зднующи.

Припев: Священному́чениче Ферапо́нте, моли́ Бо́га о нас.

Очи́стив пе́рвее от страстны́я молвы́ ду́шу, прия́л еси́, священноде́йственне, пома́зание боже́ственно свя́то и при кончи́не страда́льческим украси́лся еси́ венце́м.

Припев: Священному́чениче Ферапо́нте, моли́ Бо́га о нас.

Зна́мении всегда́ и боже́ственными чудесы́ сия́я, ви́дишися и облиста́еши всю́ подсо́лнечную, благода́ть от Бо́га прие́м, святи́телю досточу́дне.

Сла́ва Отцу́ и Сы́ну и Свято́му Ду́ху:

Упа́сл пе́рвее лю́ди благода́тию, безкро́вными же́ртвами, я́ко святи́тель, свяще́нно освя́щь и, я́ко а́гнец, закла́н бы́в, Го́сподеви приведе́ся.

И ны́не и при́сно и во ве́ки веко́в. Ами́нь.

Богородичен: Яко две́рь, веду́щую к боже́ственному вхо́ду, я́ко ра́й боже́ственный, я́ко разу́мно ме́сто освяще́ния, я́ко добро́ту Иа́ковлю, Де́ву ублажи́м.

Пе́снь 5

Ирмос: Бо́жиим све́том Твои́м, Бла́же, у́тренюющих Ти́ ду́ши любо́вию озари́, молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.

Припев: Священному́чениче Ферапо́нте, моли́ Бо́га о нас.

Боже́ственным сия́нием озари́вся, яви́лся еси́ пресве́тлая звезда́, просвеща́я подсо́лнечную боже́ственными зна́мении Бо́жиим Ду́хом, Ферапо́нте, святи́телю богоблаже́нне.

Припев: Священному́чениче Ферапо́нте, моли́ Бо́га о нас.

Яко всесожже́ние свяще́нно, я́ко приноше́ние, о́тче, прия́тно и же́ртва соверше́нна, пло́тию пострада́вшему Сло́ву прине́слся еси́, Ферапо́нте святи́телю, му́ченик бы́в.

Сла́ва Отцу́ и Сы́ну и Свято́му Ду́ху:

Ча́шу налия́в всекрасно́ испове́дания вои́стинну, кре́пким твои́м страда́нием все́х напоя́еши, Ферапо́нте преподо́бне, с высо́ким пропове́данием призыва́я.

И ны́не и при́сно и во ве́ки веко́в. Ами́нь.

Богородичен: По рожде́нии стра́шнем пребыла́ еси́ де́вою, я́коже пре́жде: Бо́г бо бе́ рожде́йся, устроя́яй вся́ во́лею, безневе́стная Мари́е, Богоблагода́тная.

Пе́снь 6.

Ирмос: Жите́йское мо́ре, воздвиза́емое зря́ напа́стей бу́рею, к ти́хому приста́нищу Твоему́ прите́к, вопию́ Ти: возведи́ от тли́ живо́т мо́й, Многоми́лостиве.

Припев: Священному́чениче Ферапо́нте, моли́ Бо́га о нас.

Житие́ твое́ боже́ственно, жи́знь боголе́пна и сла́вна сме́рть, му́ченическими сия́я добро́тами, чуде́с светлостьми́ озаря́я сердца́ пою́щих тя́.

Припев: Священному́чениче Ферапо́нте, моли́ Бо́га о нас.

Плодови́ту ло́зу тя́ виногра́да и́стиннаго, разу́мнаго позна́хом, испове́дания гро́здие и́стинно принося́, источа́ющее терпе́ния, богому́дре, вино́ изря́дно.

Сла́ва Отцу́ и Сы́ну и Свято́му Ду́ху:

Хра́м тво́й показа́ся врачевство́ свяще́нно, облегча́я благода́тию вся́кия боле́зни немощны́х и реша́ неду́ги, святи́телю богому́дре, досточу́дне.

И ны́не и при́сно и во ве́ки веко́в. Ами́нь.

Богородичен: Сло́во во утро́бе Твое́й одебеле́ без се́мене, и Челове́к яви́ся соверше́н, обновля́я естество́ богоподо́бно, я́коже еди́н ве́сть, Боговмести́мая две́ре, Всенепоро́чная.

Пе́снь 7.

Ирмос: Росода́тельну у́бо пе́щь соде́ла Ангел преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́, Бо́же оте́ц на́ших.

Припев: Священному́чениче Ферапо́нте, моли́ Бо́га о нас.

Страсте́й треволне́ние укроти́в воздержа́нием, преподо́бне, пострада́в же, наводне́нием погаси́л еси́ твои́х крове́й пре́лести запале́ние, священному́чениче Христо́в, Ферапо́нте преподо́бне.

Припев: Священному́чениче Ферапо́нте, моли́ Бо́га о нас.

Соверши́лся еси́ мѵ́ром пома́зания, священнотаи́нниче преподо́бне, и, соверши́в свяще́нники и наро́д, я́ко па́стырь, соверши́л еси́ тече́ние до́брое, закла́н бы́в за Христа́, Ферапо́нте, му́чениче му́дре.

Сла́ва Отцу́ и Сы́ну и Свято́му Ду́ху:

Тече́нием крове́й твои́х погрузи́л еси́ вра́жия полки́, чуде́с же сия́нием мра́к страсте́й разоря́еши, Ферапо́нте, вои́стинну чудоде́йственник я́влься и вра́чь немощны́х.

И ны́не и при́сно и во ве́ки веко́в. Ами́нь.

Богородичен: Седя́й в не́дрех Роди́теля неопи́санно, Чи́стая, в не́дрех Твои́х ны́не седи́т, опи́сан, Твои́м обложе́н зра́ком, за е́же спасти́ Ада́ма, но́в Ада́м бы́в.

Пе́снь 8.

Ирмос: Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки.

Припев: Священному́чениче Ферапо́нте, моли́ Бо́га о нас.

Безкро́вны же́ртвы Бо́гу прине́сл еси́ и поже́рлся еси́, я́ко а́гнец чи́ст, непоро́чен; де́монския же́ртвы потреби́л еси́, красота́ страда́льцев, Ферапо́нте святи́телю.

Припев: Священному́чениче Ферапо́нте, моли́ Бо́га о нас.

Рая́ жи́тель боже́ствен бы́в, и святы́х Ангелов яви́лся еси́ соприча́стник, му́ченическою сия́я све́тлостию, му́чениче страстоно́сче и служи́телю Спа́сов.

Сла́ва Отцу́ и Сы́ну и Свято́му Ду́ху:

Го́рдаго зми́я ты́ смири́л еси́ смире́нием се́рдца, сопроти́влься сему́ му́жески и му́ченическою кро́вию обагри́в, святи́телю, свяще́нную оде́жду твою́.

И ны́не и при́сно и во ве́ки веко́в. Ами́нь.

Богородичен: Изба́вльшеся пе́рвыя кля́твы Рождество́м Твои́м, Всеблагослове́нная Отрокови́це Богора́дованная, Гаврии́лов Тебе́ гла́с возсыла́ем: ра́дуйся, вино́вна все́х спасе́нию.

Песнь 9

Ирмос: Бо́га челове́ком невозмо́жно ви́дети, на Него́же не сме́ют чи́ни Ангельстии взира́ти; Тобо́ю бо, Всечи́стая, яви́ся челове́ком Сло́во воплоще́нно, Его́же велича́юще, с небе́сными во́и, Тя́ ублажа́ем.

Припев: Священному́чениче Ферапо́нте, моли́ Бо́га о нас.

Ви́дети сла́ву Вседержи́теля жела́я, непра́ведную претерпе́л еси́ сме́рть, и твое́ю возше́л еси́ кро́вию, святи́телю сла́вне, я́коже на колесни́це, и, к небесе́м восте́кл, ра́дуяся, почи́л еси́.

Припев: Священному́чениче Ферапо́нте, моли́ Бо́га о нас.

Яко све́т, я́ко у́тро, на́м возсия́л еси́ све́тлыми заря́ми, озаря́я концы́, святи́телю и па́стырю богодохнове́нне, и страсте́й реши́ши омраче́ние. Те́мже тя́ почита́ем и благоче́стно ублажа́ем.

Припев: Священному́чениче Ферапо́нте, моли́ Бо́га о нас.

Сы́й с ли́ки, богоблаже́нне, патриа́рх и му́ченик, апо́стол, и пра́ведник, и преподо́бных, с ни́ми моли́ся разреше́ние согреше́ний все́м дарова́ти, творя́щим благоче́стно боже́ственную па́мять твою́.

Сла́ва Отцу́ и Сы́ну и Свято́му Ду́ху:

Твоего́ хра́ма, му́чениче, благоле́пие, блиста́нии чуде́с всегда́ просвеща́емо, ве́рою приступа́ющим в ду́се разреша́ет страсте́й мра́к, уставля́ет неду́ги, му́чениче святи́телю и па́стырю досточу́дне.

И ны́не и при́сно и во ве́ки веко́в. Ами́нь.

Богородичен: Све́том Твои́м, Богоблагода́тная, в жена́х Де́во, просвети́ мя, молю́ся, и огня́ ве́чнаго мя́ изба́ви; я́ко да велича́ю Тя́, я́ко да Тя́ сла́влю, я́ко да по до́лгу воспою́ вели́чия Твоя́.

Молитва

О пречестна́я и свяще́нная главо́ и благода́ти Свята́го Ду́ха испо́лненная, Спа́сово со Отце́м обита́лище, вели́кий архиере́е, те́плый наш засту́пниче, священному́чениче Ферапо́нте, предстоя́ у Престо́ла всех Царя́ и наслажда́яся све́та единосу́щныя Тро́ицы и херуви́мски со А́нгелы возглаша́я песнь трисвяту́ю, вели́кое же и неизсле́дованное дерзнове́ние име́я ко всеми́лостивому Влады́це, моли́ спасти́ся па́ствы Христо́вы лю́дем, благостоя́ние святы́х церкве́й утверди́: архиере́и благоле́пием святи́тельства украси́, мона́шествующыя к по́двигом до́браго тече́ния укрепи́, ца́рствующий град и вся гра́ды и страны до́бре сохрани́, и ве́ру святу́ю непоро́чну соблюсти́ умоли́, мир весь предста́тельством твои́м умири́, от гла́да и па́губы изба́ви ны, и от нападе́ния иноплеме́нных сохрани́, ста́рыя уте́ши, ю́ныя наста́ви, безу́мныя умудри́, вдови́цы поми́луй, си́роты заступи́, младе́нцы возрасти́, пле́нных возврати́, немощству́ющыя и моля́щияся тебе́ от всех напа́стей и бед хода́тайством твои́м свободи́: моли́ о нас Всеще́драго и Человеколюби́ваго Христа́ Бо́га на́шего, да и в день Стра́шнаго Прише́ствия Его́ от шу́ияго стоя́ния изба́вит нас, и ра́дости святы́х прича́стники сотвори́т со все́ми святы́ми во ве́ки веко́в. Ами́нь.