9 июня.
Канон первый преподобному Ферапонту Можайскому, Лужецкому
![Ферапонту Можайскому, Лужецкому Ферапонту Можайскому, Лужецкому](img_i/024.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропа́рь, гла́с 4:
Житие́м чи́стым просвети́вся, в моли́твах и посте́х пусты́ни яви́лся еси́ до́брое прозябе́ние и, духо́вному твоему́ учи́телю после́дствуя, у́м сво́й к небе́сным упра́вль, ста́ду твоему́ наста́вник бы́л еси́, те́м тя́ мо́лим, о́тче Ферапо́нте: моли́ Христа́ Бо́га спасти́ся душа́м на́шим.
Пе́рвый кано́н. Гла́с 5.
Пе́снь 1.
Ирмос: Пои́м, Го́сподеви, сотво́ршему ди́вная чудеса́ в Чермне́м мо́ри, пе́снь побе́дную, я́ко просла́вися.
Припев: Преподо́бне о́тче Ферапо́нте, моли́ Бо́га о нас.
Воспева́еши ны́не, преподо́бне, изба́вившему тя́ от истле́ния и просла́вившему тя́ Бо́гу.
Припев: Преподо́бне о́тче Ферапо́нте, моли́ Бо́га о нас.
Отче Ферапо́нте, да́ждь на́м сло́во воспе́ти Го́спода, Иже в тебе́ сла́вно просла́вися.
Сла́ва Отцу́ и Сы́ну и Свято́му Ду́ху:
Стена́л еси́ в ми́ре от рабо́ты суете́, но изведе́ тя́ Госпо́дь Бо́г в свобо́ду и́ноческаго чи́стаго жития́.
И ны́не и при́сно и во ве́ки веко́в. Ами́нь.
Богородичен: Пречи́стая Ма́ти Христа́ Бо́га, исцели́ неду́ги на́ша благода́тию Сы́на Твоего́.
Пе́снь 3.
Ирмос: На ка́мени за́поведей Твои́х коле́блющагося мя́ утверди́, вознеси́ ро́г мо́й в ра́зуме повеле́ний Твои́х, да, хваля́ся, вопию́ Тебе́: не́сть свя́т, па́че Тебе́, Го́споди си́л.
Припев: Преподо́бне о́тче Ферапо́нте, моли́ Бо́га о нас.
О Го́споде Бо́зе укрепля́л еси́ зде́ вы́ну се́рдце твое́, сего́ ра́ди ны́не вознесе́ся ро́г тво́й в Бо́зе твое́м, мы́ же весели́мся о спасе́нии твое́м.
Припев: Преподо́бне о́тче Ферапо́нте, моли́ Бо́га о нас.
Изнемо́же кре́пость пло́ти твоея́ от поста́ и трудо́в твои́х, но ду́х тво́й препоя́сася си́лою Бо́жиею и сра́дуется ны́не со Ангелы.
Сла́ва Отцу́ и Сы́ну и Свято́му Ду́ху:
Ми́лостынями и благотворе́нии ижди́л еси́ вся́ име́ния твоя́ Го́спода ра́ди, те́мже и Госпо́дь обогати́ тя во Ца́рствии Свое́м.
И ны́не и при́сно и во ве́ки веко́в. Ами́нь.
Богородичен: Пречи́стая Де́во, де́вственников ли́ки Тобо́ю хва́лятся, и на́с сопричти́ к ли́ку му́дрых де́в.
Седа́лен, гла́с 4:
Ангельски пожи́в на земли́, дне́сь со Ангелы лику́ет богоно́сный Ферапо́нт и с ни́ми о на́с мо́лится ко Спа́су все́х, те́мже взыгра́ем, бра́тие, и превознесе́м чадолю́бнейшаго сего́ отца́ на́шего Ферапо́нта.
Пе́снь 4.
Ирмос: Услы́шах, Го́споди, слу́х Тво́й и убоя́хся, разуме́х смотре́ние Твое́ и просла́вих Тя́, Еди́не Человеколю́бче.
Припев: Преподо́бне о́тче Ферапо́нте, моли́ Бо́га о нас.
Ра́зумом вня́л еси́ гла́су Го́спода Судии́ и, ужа́сся, скры́лся еси́ в пусты́ню, но ны́не со святы́ми весели́шися о Бо́зе, Спа́се твое́м.
Припев: Преподо́бне о́тче Ферапо́нте, моли́ Бо́га о нас.
Егда́ вни́де в се́рдце твое́ тре́пет стра́шнаго суда́ Бо́жия, тогда́ отгна́л еси́, преподо́бне, слеза́ми и посто́м вся́ стра́сти твоя́.
Сла́ва Отцу́ и Сы́ну и Свято́му Ду́ху:
Преподо́бный гла́с моли́твы усте́н твои́х слы́шашеся в де́брех пусты́нных, и услы́ша его́ Госпо́дь с высоты́ и даде́ тебе́ побе́ду за пе́сни Ему́.
И ны́не и при́сно и во ве́ки веко́в. Ами́нь.
Богородичен: Отжени́ от на́с ско́рбь, гла́д и вся́кую ну́жду, Ма́ти Бо́га Пречи́стая, всеси́льным хода́тайством Твои́м.
Пе́снь 5
Ирмос: От но́щи покланя́ющияся Тебе́, Христе́, поми́луй и ми́р да́руй: зане́, све́т, повеле́ния Твоя́ бы́ша исцеле́ния рабо́м Твои́м, Человеколю́бче.
Припев: Преподо́бне о́тче Ферапо́нте, моли́ Бо́га о нас.
До но́щи от у́тра и от но́щи да́же до у́тра воспева́л еси́ Бо́гу, и повеле́ния Его́ бы́ша тебе́ све́том на земли́, преподо́бне.
Припев: Преподо́бне о́тче Ферапо́нте, моли́ Бо́га о нас.
О и́стине и пра́вде ревнова́л еси́ зде́ и со пра́ведными причте́н еси́ ны́не на небеси́.
Сла́ва Отцу́ и Сы́ну и Свято́му Ду́ху:
Бе́гал еси́ лжи́, я́ко я́да, и на́с от путе́й лжи́вых отво́диши ко Христу́, Истине и Животу́.
И ны́не и при́сно и во ве́ки веко́в. Ами́нь.
Богородичен: Не и́мамы ина́го заступле́ния и по́мощи, ра́зве Тебе́, Влады́чице, помози́ на́м и спаси́ на́с.
Пе́снь 6.
Ирмос: От ки́та проро́ка изба́вил еси́, мене́ же из глубины́ грехо́в возведи́, Го́споди, и спаси́ мя.
Припев: Преподо́бне о́тче Ферапо́нте, моли́ Бо́га о нас.
От всего́ се́рдца вопия́л еси́ ко Го́споду, и услы́шан еси́ от Него́, и ра́дуешися во све́те лица́ Его́.
Припев: Преподо́бне о́тче Ферапо́нте, моли́ Бо́га о нас.
Мы́слию зре́л еси́ Бо́га, в хра́ме Бо́жием стоя́, и се́ ны́не Бо́га зри́ши лице́м к лицу́ в селе́нии небе́снем.
Сла́ва Отцу́ и Сы́ну и Свято́му Ду́ху:
Устрани́л е́сть нетле́ние от те́ла твоего́ Госпо́дь Бо́г тво́й, Ему́ же ты́ пе́л еси́ со гла́сом хвале́ния и испове́дания.
И ны́не и при́сно и во ве́ки веко́в. Ами́нь.
Богородичен: Отве́рзи щедро́ты Твоя́, Богоро́дице, и приведи́ на́с в селе́ния Го́спода сла́вы, я́же Он обеща́ ве́рным Свои́м.
Конда́к, гла́с 4:
Преблаги́й Спа́с на́ш Христо́с умно́жил е́сть ми́лость Свою́ к на́м, дарова́в на́м в засту́пника и цели́теля преподо́бнаго отца́ на́шего Ферапо́нта, и́же просвеща́ет на́с о́бразом свята́го жития́ своего́ и ны́не моли́твами свои́ми огражда́ет оби́тель свою́ от враго́в и от разруше́ния, страну́ сию́ от гла́да и напра́сныя сме́рти, чту́щих же па́мять его́ все́х от боле́зней и от лю́тых страсте́й.
Икос:
От младе́нчества твоего́ и да́же до престаре́ния те́лом и душе́ю рабо́тал еси́ Го́споду Иису́су Христу́ и Пречи́стей Его́ Ма́тери, и се́ ны́не душа́ твоя́ ликовству́ет в Его́ небе́сных оби́телях, те́ло же твое́, зде́ почива́я, сия́ет чудесы́. Сего́ ра́ди вопие́м ти́ ра́достно: ра́дуйся, во сле́д Христа́ неукло́нно ше́дый; ра́дуйся, сло́во Его́ соблюда́вый тве́рдо; ра́дуйся, во сла́ву Христа́ Бо́га подвиза́выйся; ра́дуйся, Пречи́стую Христа́ Ма́терь неумо́лчно сла́вивый; ра́дуйся, от Христа́ и от Ма́тери Его́ просла́вленный; ра́дуйся, имы́й дерзнове́ние ве́лие ко Христу́; ра́дуйся, защи́тниче оби́тели Луже́цкия; ра́дуйся, храни́телю страны́ Можа́йския; ра́дуйся, побо́рниче кре́пкий за держа́ву Росси́йскую; ра́дуйся, добропобе́дный во́ин Правосла́вныя Це́ркве; ра́дуйся, все́м призыва́ющим тя́ подаю́щий ско́рую по́мощь от Христа́ Бо́га. Ра́дуйся, Ферапо́нте, уго́дниче Христо́в и чудотво́рче.
Пе́снь 7.
Ирмос: Огня́ гаси́лище — отроко́в моли́тва, ороша́ющая пе́щь, пропове́дница чудесе́, не опаля́ющи, ниже́ сожига́ющи песносло́вцы Бо́га оте́ц на́ших.
Припев: Преподо́бне о́тче Ферапо́нте, моли́ Бо́га о нас.
Ты́ слеза́ми мно́гими угаси́л еси́ пла́мень страсте́й твои́х и ны́не ро́сным ду́хом прохлажда́ешися в раи́, вопия́: Бо́же, благослове́н еси́.
Припев: Преподо́бне о́тче Ферапо́нте, моли́ Бо́га о нас.
Царю́ царе́й, преподо́бне, с духо́вными ча́ды твои́ми на земли́ воспева́л еси́ вы́ну: Бо́же, благослове́н еси́.
Сла́ва Отцу́ и Сы́ну и Свято́му Ду́ху:
Усрами́шася и́щущии тебе́ зла́я, ты́ же, изба́влься от бе́д, пое́ши Бо́гу: Бо́же, благослове́н еси́.
И ны́не и при́сно и во ве́ки веко́в. Ами́нь.
Богородичен: Фимиа́м благоуха́нный Го́сподеви моли́твы Твоя́, Богороди́тельнице, и́миже и на́с сподо́би пе́ти Бо́гу: благослове́н еси́.
Пе́снь 8.
Ирмос: Творца́ тва́ри, Его́же ужаса́ются Ангели, по́йте, лю́дие, и превозноси́те во вся́ ве́ки.
Припев: Преподо́бне о́тче Ферапо́нте, моли́ Бо́га о нас.
Естество́м теле́сным зно́й и мра́з, сне́г и до́ждь, о́гнь и бу́рю претерпе́л еси́ Го́спода ра́ди, ду́хом поя́ и превознося́ Его́ во ве́ки.
Припев: Преподо́бне о́тче Ферапо́нте, моли́ Бо́га о нас.
Рыка́ние звере́й ди́виих и во́пли пти́ц нощны́х не заглуши́ша гла́са твоего́, немо́лчно воспева́вша Бо́гу и превозноси́вша Его́ во ве́ки.
Сла́ва Отцу́ и Сы́ну и Свято́му Ду́ху:
Ангелоподо́бно бы́л еси́ смире́н се́рдцем, преподо́бен и пра́веден, все́ю душе́ю поя́ Го́спода и превознося́ Его́ во ве́ки.
И ны́не и при́сно и во ве́ки веко́в. Ами́нь.
Богородичен: Пречи́стая Де́во, сподо́би на́с с проро́ки и с му́ченики сла́вити Го́спода, пою́ще и превознося́ще Его́ во ве́ки.
Песнь 9
Ирмос: Яко сотвори́ Тебе́ вели́чия Си́льный, Де́ву я́вль Тя́ чи́сту по рождестве́, я́ко ро́ждшую без се́мене Своего́ Творца́, те́м Тя́, Богоро́дице, велича́ем.
Припев: Преподо́бне о́тче Ферапо́нте, моли́ Бо́га о нас.
Отче Ферапо́нте, благослове́н Бо́г, воздви́гнувый на́м тя́, о́трока Своего́, во огражде́ние на́ше твои́м заступле́нием.
Припев: Преподо́бне о́тче Ферапо́нте, моли́ Бо́га о нас.
Ны́не сотвори́ тебе́ Бо́г ми́лость, всели́в тя́ в небе́сныя оби́тели, да привлече́ши в ни́х и на́с, ве́рно чту́щих тя́.
Сла́ва Отцу́ и Сы́ну и Свято́му Ду́ху:
Ты́ служи́л еси́ Христу́ и Пречи́стей Ма́тери Его́ вся́ дни́ живота́ твоего́ на земли́, преподо́бне, укрепи́ и на́с служи́ти Им всегда́.
И ны́не и при́сно и во ве́ки веко́в. Ами́нь.
Богородичен: Умоли́ небе́снаго Домовлады́ку, Пречи́стая, умудри́ти и спасти́ ду́ши на́ша моли́твами уго́дника Его́ Ферапо́нта, отца́ на́шего.
Свети́лен, гла́с 8:
Мно́гим посто́м и моле́нием неусы́пным очи́стив сво́й у́м от вся́кия стра́сти, и сла́дость душе́вныя чистоты́ вкуси́в, все́х на́с, ча́д свои́х, о́тче, зове́ши к чистоте́, глаго́ля на́м словесы́ апо́стольскими: отложи́м, ча́да, дела́ те́мная, я́ко во дни́ благообра́зно да хо́дим, не козлогласова́нии и пия́нствы, не рве́нием и за́вистию, но облецы́теся Го́сподем на́шим Иису́сом Христо́м и пло́ти уго́дия не твори́те в по́хоти.
Молитва преподобному Ферапонту Белоезерскому, Можайскому
О, всечестны́й и преблаже́нный о́тче наш Ферапо́нте! Тебе́ даде́ся благода́ть моли́тися о нас, и ве́мы, я́ко, предстоя́ Престо́лу Го́спода, при́сно явля́еши любо́вь твою́ к нам непреста́нными о нас твои́ми хода́тайствы. Но поне́же мы ежеча́сно умножа́юще грехи́ на́ша, кра́йняго твоего́ отвраще́ния досто́йни сотвори́хомся, сего́ ра́ди в покая́нии, со слеза́ми припа́дающе, мо́лим тя: не премени́ твое́й ми́лости к нам на гнев за нече́стия и скве́рны на́ша, яви́ у́бо нам ми́лость твою́ до конца́ и согреша́ющих нас очи́сти твои́ми моли́твами, возведи́ к покая́нию, укрепи́ на дела́ блага́я, сохрани́ в Правосла́вии и во вся́кой святы́ни. Да́руй нам пребыва́ти в ми́ре, тишине́ и братолю́бии, испроси́ нам времена́ безмяте́жна и изоби́лие плодо́в земны́х, изба́ви от огня́, и от потопле́ния, и от лю́тых боле́зней, и от смертоно́сныя я́звы. Посли́ тружда́ющимся благи́й успе́х, путеше́ствующим путь безпреткнове́нный, в мо́ри пла́вающим приста́нище ти́хое, плене́нным осла́бу и освобожде́ние, си́рым по́мощь и заступле́ние, во́инству на́шему ве́рность, му́жество и побе́ду и всем нам вся поле́зная ко вре́менней и ве́чней жи́зни. Да, любо́вию твое́ю огражде́ннии, благода́рственная всегда́ пое́м просла́вившему тя Го́споду Иису́су Христу́, Ему́же подоба́ет вся́кая сла́ва и честь со Безнача́льным Его́ Отце́м и с Пресвяты́м и Животворя́щим Его́ Ду́хом во ве́ки веко́в. Ами́нь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![Ферапонту Можайскому, Лужецкому Ферапонту Можайскому, Лужецкому](img_b/024.jpg)