6 июня.

Канон преподобному Симеону Столпнику Дивногорцу

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 1:

Пусты́нный жи́тель, и в телеси́ Ангел, и чудотво́рец показа́лся еси́, богоно́се о́тче на́ш Симио́не, посто́м, бде́нием, моли́твою небе́сная дарова́ния прии́м, исцеля́еши неду́жныя и ду́ши ве́рою притека́ющих к тебе́. Сла́ва Да́вшему тебе́ кре́пость, сла́ва Венча́вшему тя́, сла́ва Де́йствующему тобо́ю все́м исцеле́ния.

Кано́н преподо́бнаго. Гла́с 8.

Пе́снь 1.

Ирмос: Колесницегони́теля фарао́ня погрузи́ чудотворя́й иногда́ Моисе́йский же́зл, крестообра́зно порази́в и раздели́в мо́ре, Изра́иля же беглеца́, пешехо́дца спасе́, пе́снь Бо́гови воспева́юща.

Припев: Преподо́бне о́тче Симео́не, моли́ Бо́га о нас.

Богосло́вия вои́стинну вина́ е́сть па́мять твоя́, чудоде́йственный о́тче Симео́не, и сия́ние соше́дшимся все́м чи́стыми сердцы́ пе́ти тоя́ вели́чество и досточу́дное житие́ твое́.

Припев: Преподо́бне о́тче Симео́не, моли́ Бо́га о нас.

От гла́са Крести́телева и виде́ния благовести́ся твое́й сла́вней ма́тери, и тя́, благово́нно и божестве́нное жили́ще, всеблаже́нне о́тче, зача́т же и роди́, Триипоста́снаго Божества́.

Припев: Преподо́бне о́тче Симео́не, моли́ Бо́га о нас.

Па́че естества́ пра́вды носи́ло Бо́жиих дарова́ний, от пеле́н, о́тче, ма́терних хотя́ща бы́ти, проразуме́в вели́кий Предте́ча, шу́яго сосца́ тебе́ отвраща́тися повелева́ет и к десно́му прилепля́тися.

Сла́ва Отцу́ и Сы́ну и Свято́му Ду́ху:

Чи́сто из нача́ла прии́м житие́, пребога́те, ба́нею, о́тче, пакибытия́ да́р духо́вный, от младе́нства боже́ственне твоея́ души́ благоле́пие показа́л еси́, со́лнца светле́йши.

И ны́не и при́сно и во ве́ки веко́в. Ами́нь.

Богородичен: Пресла́вная, возглаго́лашася о Тебе́ в ро́дех родо́в, Бо́га Сло́ва во чре́ве вмести́вшая, чиста́ же пребы́вши, Богоро́дице Мари́е, те́мже Тя́ вси́ почита́ем, су́щее по Бо́зе заступле́ние на́ше.

Пе́снь 3.

Ирмос: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, еди́не Человеколю́бче.

Припев: Преподо́бне о́тче Симео́не, моли́ Бо́га о нас.

От млады́х ногте́й подви́жник изря́ден изра́сл еси́, рачи́тель же боже́ственныя добро́ты те́плый. Те́м от ложе́сн тя́ проуве́дев Влады́ка, Симео́не, освяти́л е́сть, о́тче пресла́вне.

Припев: Преподо́бне о́тче Симео́не, моли́ Бо́га о нас.

Умудри́вся от мла́да, чудотво́рче преподо́бне о́тче, во́зраста и́стинным ра́зумом, Ду́ха непостижи́маго самови́дно сподо́бился еси́ ви́дети, си́лами окружа́ема.

Припев: Преподо́бне о́тче Симео́не, моли́ Бо́га о нас.

Души́ чу́вства от ужа́снаго, преподо́бне о́тче, просвети́в виде́ния, чу́ден ра́зум благи́х стяжа́л еси́ и и́нако иму́щим, Симео́не, небла́зненно житие́ показа́л еси́.

Сла́ва Отцу́ и Сы́ну и Свято́му Ду́ху:

Явственно тебе́ предста́ по́сланный Ангел, Ангельское, богоно́се, завеща́ житие́, целова́ти ра́достно, но́г же я́вльшагося прикосну́лся еси́, о́тче, стопа́м.

И ны́не и при́сно и во ве́ки веко́в. Ами́нь.

Богородичен: Всели́вся в Де́ву теле́сне, Го́споди, яви́лся еси́ челове́ком, я́коже подоба́ше ви́дети Тебе́, Юже и показа́л еси́ я́ко и́стинную Богоро́дицу и ве́рных Помо́щницу, еди́не Человеколю́бче.

Седа́лен, гла́с 8.

Пре́жде зача́тия, о́тче, освяти́вся, роди́тельнице пода́лся еси́ прекра́сно прозябе́ние, хотя́щь бы́ти сосу́д Боже́ственнаго Ду́ха, Его́же си́лою возра́с, уязви́л еси́ лука́вых духо́в мно́жество жезло́м ве́ры; те́мже, со сла́вою отше́д, бы́л еси́ ве́рных сто́лп непоколеби́мь и свети́льник све́тел, Симео́не досточу́дне. Моли́ Христа́ Бо́га согреше́ний оставле́ние дарова́ти чту́щим любо́вию святу́ю па́мять твою́.

Сла́ва, и ны́не, Богородичен:

В напа́сти многоплете́нныя впа́д от вра́г ви́димых и неви́димых, бу́рею одержи́мь безчи́сленных согреше́ний мои́х, и я́ко к те́плому заступле́нию и покро́ву моему́, Чи́стая, ко приста́нищу притека́ю Твоея́ бла́гости. Те́мже, Пречи́стая, из Тебе́ Воплоще́нному безсе́менно моли́ся приле́жно о все́х рабе́х Твои́х, непреста́нно моля́щихтися, Богоро́дице Пречи́стая, моля́щи Его́ при́сно согреше́ний оставле́ние дарова́ти, воспева́ющим досто́йно сла́ву Твою́.

Пе́снь 4.

Ирмос: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра Отча, и на́шу нищету́ посети́в. Те́м с проро́ком Авваку́мом зову́ Ти: си́ле Твое́й сла́ва, Человеколю́бче.

Припев: Преподо́бне о́тче Симео́не, моли́ Бо́га о нас.

Пребы́ти вну́трь ника́коже ми́ра претерпе́л еси́ еще́, о́тче, име́я наставля́ющую тя́ Бо́жия Ду́ха си́лу: в непроходи́мых же пусты́нях живы́й и со зверьми́ ходя́ без боя́зни, отроча́ сы́й, и боле́зньми весели́лся еси́ теле́сными.

Припев: Преподо́бне о́тче Симео́не, моли́ Бо́га о нас.

Скача́, я́коже еле́нь, по гора́м, жела́л еси́, о́тче, богото́чных исто́чников и, обре́т сия́, Симео́не, боголю́бия жа́жду преиспо́лнил еси́: от ни́хже богосло́вия насы́щся, источа́еши при́сно, лице́ Христо́во зря́.

Припев: Преподо́бне о́тче Симео́не, моли́ Бо́га о нас.

Белообразу́юща тя́, я́коже на колесни́це, зре́л еси́, преподо́бне, носи́ма, у́мныма, о́тче, очи́ма: столпо́м же све́тлым отроча́ наставля́емь, боже́ственный Иоа́нн стоя́ на степе́ни, пре́жде твоего́ к нему́ восхожде́ния.

Сла́ва Отцу́ и Сы́ну и Свято́му Ду́ху:

Наста́влен бы́в, сла́вне, от благода́ти, да́нныя тебе́, я́коже от си́лы в боже́ственную си́лу, ше́ствуеши ко Иоа́ннове хра́мине богому́дреннаго, с ни́мже по́двигом любе́зно боре́ние проходя́, яви́лся еси́, я́коже Ангел.

И ны́не и при́сно и во ве́ки веко́в. Ами́нь.

Богородичен: Ты́ ве́рных похвала́ еси́, Безневе́стная, Ты́ Предста́тельница, Ты́ прибе́жище христиа́н, стена́ и приста́нище: к Сы́ну бо Твоему́ мольбы́ но́сиши, Всенепоро́чная, и спаса́еши от бе́д ве́рою и любо́вию Богоро́дицу Чи́стую Тя́ ве́дущия.

Пе́снь 5

Ирмос: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся.

Припев: Преподо́бне о́тче Симео́не, моли́ Бо́га о нас.

Красоты́ испо́лнь, я́ко благоле́пен де́тищ, о́тче, Госпо́дь я́вственно предста́, на степе́ни стоя́ния твоего́ су́щу, и облиста́в сла́вою терпе́ния, я́коже проси́л еси́, Себе́ показа́в распина́ема.

Припев: Преподо́бне о́тче Симео́не, моли́ Бо́га о нас.

Возсия́ заре́ю открове́ний все́ житие́ твое́, и́мже боже́ственнаго мѵ́ра благово́ния бы́в испо́лнен, супроти́вныя страда́льчески, Христо́в уго́дниче, де́монския ссе́кл еси́ полки́.

Сла́ва Отцу́ и Сы́ну и Свято́му Ду́ху:

Возвы́сился еси́ виде́нии боже́ственными, всеблаже́нне, ума́ чистото́ю и, исто́чник му́дрости живоно́сныя, то́ки источа́ющее се́рдце име́я, от Бо́га уче́ньми, ду́ши боля́щих просвети́л еси́.

И ны́не и при́сно и во ве́ки веко́в. Ами́нь.

Богородичен: Ма́тернее дерзнове́ние, е́же к Сы́ну Твоему́, иму́щи, Пречи́стая, сро́днаго промышле́ния, е́же о на́с, не пре́зри, моли́мся, я́ко Тебе́ и еди́ну, христиа́не, ко Влады́це очище́ние ми́лостивно предлага́ем.

Пе́снь 6.

Ирмос: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя.

Припев: Преподо́бне о́тче Симео́не, моли́ Бо́га о нас.

Вели́к, я́коже Моисе́й, доброде́тельми чу́дный бы́в, о́тче, на высо́к сто́лп ма́нием боже́ственным возше́д, взя́тся Ду́хом, и, си́лу просвети́тельную прие́м, я́коже о́н, просла́вился еси́.

Припев: Преподо́бне о́тче Симео́не, моли́ Бо́га о нас.

Истощи́ сво́й вра́г стре́л душетле́нный ту́л, неи́стовно, богоно́се, стреля́я, и души́ твоея́ столпа́ не поколеба́: на ка́мени бо неразсе́днем Христо́ве кре́пко утверди́лся еси́.

Сла́ва Отцу́ и Сы́ну и Свято́му Ду́ху:

Яко терпя́щу по́ты удо́бь воздержа́ния, чу́дный о́тче, я́влься Влады́ка тебе́, же́зл кре́пости Христо́с вруча́ет и си́м тебе́ немощны́х неду́ги повелева́ет цели́ти.

И ны́не и при́сно и во ве́ки веко́в. Ами́нь.

Богородичен: Мари́е, Влады́чнее селе́ние, све́тлыми де́вства заря́ми светови́дно, я́ко кри́н, сия́я посреди́ терно́внаго смеше́ния, Тебе́ молю́ся, Благо́й: согреше́ний ми́ да́руй проще́ние.

Конда́к, гла́с 2.

Вы́шняя жела́я, до́льная отложи́в, и, я́ко не́бо, сто́лп соде́лавый, те́м облиста́л еси́ чуде́с заре́ю, преподо́бне, и Христу́, все́х Бо́гу, мо́лишися непреста́нно о все́х на́с.

Икос:

Всесве́тлая блаже́ннаго па́мять, други́й яви́ся де́нь спасе́ния на́м, сия́нием поще́ния но́щь глубо́кую страсте́й отгоня́щий и всеизря́дными дея́ньми просвеща́ющий. В ню́же све́тло, я́ко зве́зды, я́вльшеся, вси́ ве́рнии, пе́ния в весе́лии Симео́ну свети́льнику принесе́м: свы́ше бо зря́, просвеща́ет ны́ и дае́т умире́ние неизглаго́ланно, Христа́ Бо́га моля́ непреста́нно о все́х на́с.

Пе́снь 7.

Ирмос: Халде́йския пе́щи всепа́губную си́лу угаси́вше о́бразом Ангела снизше́дшаго, Зижди́телю ю́ноши взыва́ху: благослове́н еси́ и хва́льный, Бо́же оте́ц на́ших.

Припев: Преподо́бне о́тче Симео́не, моли́ Бо́га о нас.

Юношески, богоно́се, мудрова́ния мирски́я ле́сти, тщи́я же сла́вы, низпа́дания бе́гая, в молча́нии жи́ти возлюби́л еси́, и ду́хом вопия́ непреста́нно: благослове́н Бо́г оте́ц на́ших.

Припев: Преподо́бне о́тче Симео́не, моли́ Бо́га о нас.

Крестообра́зно простира́я дла́ни твоя́ и моли́тву де́йствуяй, Христа́ во сла́ве со Ангелы очи́ма явле́нно, богоно́се, узре́л еси́, на го́ру сию́ ди́вную взы́ти повелева́юща.

Припев: Преподо́бне о́тче Симео́не, моли́ Бо́га о нас.

Неботе́чне нра́вом иды́й, о́тче, к столпу́, возше́л еси́ на него́, пре́жде сего́ ты́ Влады́ки боже́ственным повину́вся веле́нием, дости́гл еси́ горы́ сея́, ю́же чу́дно чу́дну са́м именова́л еси́.

Сла́ва Отцу́ и Сы́ну и Свято́му Ду́ху:

Высо́кий ве́рх, я́коже небе́сный ра́й, благово́нными насажде́н цветы́ вся́кими, обре́т, всели́лся еси́, жили́ще же сие́ чудоде́йственне, богоначерта́нно водрузи́л еси́.

И ны́не и при́сно и во ве́ки веко́в. Ами́нь.

Богородичен: Во све́те Госпо́дни ходя́щии, прииди́те, воспои́м боже́ственный гра́д Царя́ ца́рствующих, Мари́ю Пречи́стую, Богоро́дицу и́стинную, я́ко упова́ние ду́ш на́ших.

Пе́снь 8.

Ирмос: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Припев: Преподо́бне о́тче Симео́не, моли́ Бо́га о нас.

Боголе́пными, преподо́бне, души́ твоея́ си́лами трисве́тлому спримеси́лся еси́ сия́нию, от него́ науча́емь, я́ко от еди́наго Божества́, Сему́ пред столпо́м твои́м требога́тен хра́м сла́вно созда́л еси́ и несозда́нную чти́ти научи́л еси́ в не́м Тро́ицу во ве́ки.

Припев: Преподо́бне о́тче Симео́не, моли́ Бо́га о нас.

Всеси́льное Ду́ха Свята́го де́йство, богови́дно все́льшееся в тя́, богогла́се, стица́тися подви́же от коне́ц все́х, от духо́в лука́вых томи́мыя, и, си́х исцеля́я ва́ийным твои́м жезло́м, науча́еши Зижди́теля пе́ти во ве́ки вся́.

Припев: Преподо́бне о́тче Симео́не, моли́ Бо́га о нас.

Юношеское мудрова́ние плотско́е повину́л еси́, о́тче, посто́м и моле́нием ду́ху, утро́бы же разгоре́ние угаси́в, потреби́л еси́ и, я́ко не яды́й, па́че челове́ка яви́лся еси́, пи́щею небе́сною пита́яся то́кмо, вино́вна же сему́ пое́ши во ве́ки.

Сла́ва Отцу́ и Сы́ну и Свято́му Ду́ху:

Ликостоя́ние боже́ственное ученико́в тебе́, чу́дный о́тче, вруча́ет Христо́с Госпо́дь, и́хже любо́вию прие́м, уче́нии осия́л еси́ к воздержа́ния простре́тися тече́нию. С ни́миже почива́я во Ца́рствии, Царя́ все́х славосло́виши во вся́ ве́ки.

И ны́не и при́сно и во ве́ки веко́в. Ами́нь.

Богородичен: О на́с моли́ Сы́на Твоего́ и Го́спода, вои́стинну и чи́сто вопию́щих Ти́ и Тя́, Богома́терь, испове́дающих, Чи́стая, грехо́в прося́щи разреше́ния, улучи́ти же спасе́ние ве́рно пою́щим: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Песнь 9

Ирмос: Устраши́ся вся́к слу́х неизрече́нна Бо́жия снизхожде́ния, я́ко Вы́шний во́лею сни́де да́же и до пло́ти, от деви́ческаго чре́ва бы́в Челове́к. Те́мже Пречи́стую Богоро́дицу, ве́рнии, велича́ем.

Припев: Преподо́бне о́тче Симео́не, моли́ Бо́га о нас.

Хле́бы ма́лыми, Симео́не, насы́щшаго мно́жество челове́к мно́гое, Христа́, треблаже́нне, моли́твами твои́ми подража́я, во огра́де твое́й пра́здныя жи́тницы пшени́цы напо́лнил еси́ благослове́нии твои́ми и от гла́да изба́вил еси́ ста́до твое́.

Припев: Преподо́бне о́тче Симео́не, моли́ Бо́га о нас.

Глаго́лы Ма́рфы, честны́я и преподо́бныя твоея́ ма́тере, всеблаже́нне, моле́ньми тя́ моля́ще умоли́ти Христа́, не отре́клся еси́ тоя́ испо́лнити проше́ния и Бо́жий гра́д Бо́жия гне́ва изба́вил еси́.

Припев: Преподо́бне о́тче Симео́не, моли́ Бо́га о нас.

Уве́дев кончи́ну, Симео́не, подвиго́в твои́х, разре́шся от телесе́, пренеизглаго́ланное в вы́шних, всеблаже́нне, обоже́ние, к нему́же отсю́ду возлете́в, ра́дуешися ду́хом, зря́ того́ ра́ди триипоста́сное сия́ние.

Сла́ва Отцу́ и Сы́ну и Свято́му Ду́ху:

Ма́нием, о́тче Симео́не, и промышле́нии твои́ми от жития́ к тебе́ многомяте́жнаго моли́твами устреми́вшияся, в приста́нище твое́, от вся́ких врага́ страсте́й свободи́ и па́мять твою́ пра́зднующия све́тло сохраня́й.

И ны́не и при́сно и во ве́ки веко́в. Ами́нь.

Богородичен: Спаси́ мя, Ма́ти Бо́жия, ро́ждшая Христа́, Спа́са моего́, Бо́га и Челове́ка, сугу́ба естество́м, а не Ипоста́сию, Единоро́дна же от Отца́, из Тебе́ же пе́рвенца тва́ри вся́кия. Те́мже вси́ Тя́ при́сно велича́ем.

Свети́лен.

От пусты́ни облиста́в, вселе́нную просвеща́еши, мона́хов мно́жества ра́дуются о твое́й па́мяти, о Симео́не богоно́се, не преста́й о ми́ре моля́ся.

Молитва

О свяще́нная главо́, преподо́бне о́тче, преблаже́нне о́тче Симео́не, не забу́ди убо́гих твои́х до конца́, но помина́й нас всегда́ во святы́х и благоприя́тных моли́твах к Бо́гу: помяни́ ста́до твое́, е́же сам упа́сл еси́, и не забу́ди посеща́ти чад твои́х моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ ду́ша со а́нгельскими во́инствы, со безпло́тными ли́ки, с небе́сными си́лами, у престо́ла Вседержи́телева предстоя́щи, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.