6 июня.
Канон явлению чудотворнаго образа Великорецкаго, святителя Николая, архиепископа Мир Ликийских, чудотворца
![Явления чудотворнаго образа Великорецкаго, святителя Николая Явления чудотворнаго образа Великорецкаго, святителя Николая](img_i/018.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропарь, глас 2:
Мирликийская страна хвалится тобою, отче Николае, / и град Барский радуется / в пренесении честных мощей твоих. / Веселятся же и града Хлынова и всея Вятския страны людие / явления ради честнаго образа твоего, / неоскудно черплюще источник исцелений, / молитвами твоими, святе, // моли Христа Бога спастися душам нашим.
Стихира, глас 7:
Егда Божиим промыслом / от Великия реки во град Хлынов принесен бысть чудотворный твой образ, святителю, / тогда исполнися весь град благоухания, / и стекошася всенародное множество / желающих зрети священнолепное подобие пастыря своего, / исполнишася радости, со слезами вопиюще ти: / о великий Николае, / защищение граду нашему, / молим тя, святителю, / моли Пресвятую Троицу, / да подаст мир мирови // и душам нашим велию милость.
Канон великому святителю и вселенскому чудотворцу Николаю. Глас 2.
Песнь 1
Ирмос: Грядите, людие, поим песнь Христу Богу, раздельшему море и наставльшему люди, яже изведе из работы египетския, яко прославися.
Припев: Святителю о́тче Николае, моли́ Бо́га о нас.
Отверзи ми, Христе, устне недостойнии. Агнче незлобивый, язык мой уясни, и сердце мое просвети, ум мой озари, светом твоего Богоразумия, да возмогу воспевати память явления чудотворнаго образа святителя Николая, его же на земли удивил еси.
Припев: Святителю о́тче Николае, моли́ Бо́га о нас.
Приидите, вернии, духом Божественным веселящеся верно, восхвалим святителя Николая, к чудотворному его образу припадающе и вопиюще: спаси всех нас молитвами си, блаженне.
Припев: Святителю о́тче Николае, моли́ Бо́га о нас.
Моли о нас Святую Троицу, святителю Николае, яко да послет нам свет Лица Своего, празднующим любовию пречестное явление образа твоего, преблаженне.
Припев: Пресвятая Богородице, спаси нас.
Богородичен: Правоверно чтущия Тя люди, и иконе твоей, святей, любезно покланяющияся, о Божия Мати, спаси и от клевет злых человек избави.
Припев: Святителю о́тче Николае, моли́ Бо́га о нас.
Божий Слове, Милостивый Христе Царю, презри многая моя согрешения, и отверзи моя косноязычная уста, и дух прав обнови во утробе моей, и даждь ми, Христе, слово разума, да воспою угодника Твоего святителя Николая.
Припев: Святителю о́тче Николае, моли́ Бо́га о нас.
Приидем, братие, к чудотворному образу святителя Николая и облобызаем сердечныма устнама, принимающе неоскудныя дары от трудоположника Христова и Спаса душ наших.
Сла́ва Отцу́ и Сы́ну и Свято́му Ду́ху:
Божиим промыслом и Святаго Духа действом чудотворный твой образ, святителю, от Великия реки принесен бысть во град Хлынов, источая нам реки исцеления, блаженне.
И ны́не и при́сно и во ве́ки веко́в. Ами́нь.
Богородичен: Со апостолы со святителем моли, Богородице, Сына Своего и Господа помиловатися всем поющим Тя и славящим, и на иконах Тя чтущим, и поклоняющимся достойно, и любовию облобызающим.
Песнь 3
Ирмос: Процвела́ есть пусты́ня, я́ко крин, Го́споди, / язы́ческая неплодя́щая Це́рковь / прише́ствием Твои́м, / в не́йже утверди́ся мое́ се́рдце.
Припев: Святителю о́тче Николае, моли́ Бо́га о нас.
Направляеши, отче, хромых, и очи просвящаеши слепых, ходити же твориши расслабленных, и отгониши духи лукавыя от притекающих к чудотворному ти образу, святителю Николае.
Припев: Святителю о́тче Николае, моли́ Бо́га о нас.
Светел честный праздник преставления твоего, святителю Николае, светлейший же явление чудотворнаго образа твоего, его же вси славяще, любовию тя почитаем.
Припев: Святителю о́тче Николае, моли́ Бо́га о нас.
Почерпите, человецы, просвещение, и благодать Божию, и милость. И главы и души верно освятите, прикоснувшеся чудотворному образу святителя Николая.
Припев: Пресвятая Богородице, спаси нас.
Богородичен: Кто изрещи достойно может чудес Твоих, Чистая, глубину. Тобою бо весь мир помилован, хвалу Ти приносит и избавляется от бед лютых и различных зол, врагов же и напастей.
Припев: Святителю о́тче Николае, моли́ Бо́га о нас.
Николае блаженне, душа твоя почивает на небесех со Христом во Царствии Небеснем. Зде же честный образ твой с верою к нему приходящим подает исцеления Божественнаго Духа детелию, и силою, и благодатию.
Припев: Святителю о́тче Николае, моли́ Бо́га о нас.
Святителем слава, священником благолепие и нищим помощник ты явися, богомудре отче, и столп добродетельный. Поминай всех, Николае, почитающих чудотворный образ твой.
Сла́ва Отцу́ и Сы́ну и Свято́му Ду́ху:
Явление чудотворнаго твоего образа яко солнце возсия нам, святителю Николае, радуемся, целующе его, яко божественный кивот, верою и любовию, преславне.
И ны́не и при́сно и во ве́ки веко́в. Ами́нь.
Богородичен: Припадаем Ти, Пречистая Богородице, со умилением глаголюще: избави нас, Мати Христа Бога, всякия прелести, разлучающия от Бога. И сподоби в день судный получити от Христа милости не отпасти деснаго предстояния.
Седален, глас 4:
Ныне, преблаженне Николае, душа твоя почивает на небесех, предстоя престолу Христову. Честный же образ твой принесеся с Великия реки во град Хлынов, от него же подаеши исцеления приходящим к нему с верою и молиши Христа Бога о всех нас.
Слава, и ныне, Богородичен, глас тойже:
Пречистая Богородице, приими недостойную молитву мою и сохрани мя от напрасныя смерти и даруй ми прежде конца покаяние, Тебе бо имею надежду, раб твой.
Песнь 4
Ирмос: Прише́л еси́ от Де́вы не хода́тай, ни А́нгел, / но Сам, Го́споди, вопло́щся, / и спасл еси́ всего́ мя, челове́ка. / Тем зову́ Ти: сла́ва си́ле Твое́й, Го́споди.
Припев: Святителю о́тче Николае, моли́ Бо́га о нас.
Вся сотворшаго и всю вселенную кормящаго Сына Божия и ангельскаго Царя Превечнаго Спаса Христа умоли, святителю Николае, да подаст царем нашим, и архиерею, и людем здравие, и земныя плоды умножит, и грехи отпустит.
Припев: Святителю о́тче Николае, моли́ Бо́га о нас.
Память священную явления образа твоего, святителю, творящих от всяких спаси прегрешений, и печалей, и напастей, твое божественное даруй заступление, всех Царю предстоя, отче Николае.
Припев: Святителю о́тче Николае, моли́ Бо́га о нас.
Молися, святителю, за град твой и люди, належащую скорбь нашу пременити и грехов прощение испроси, блаженне.
Припев: Пресвятая Богородице, спаси нас.
Богородичен: Милосердия Твоего сподобимся, Милостивая и Благолюбивая Владычице, и геенны избави мя, и тьмы оноя кромешныя, да верою и любовию почитаю Тя.
Припев: Святителю о́тче Николае, моли́ Бо́га о нас.
Помолися Христу Богу, преблаженне Николае, о приходящих с верою во святый храм твой и хотящих от чудотворнаго образа твоего почерпсти исцеления неоскудную благодать.
Припев: Святителю о́тче Николае, моли́ Бо́га о нас.
Образ священнолепнаго твоего подобия показал еси верным людем, душам освящение, и телесем исцеление, и страстем избавление, от него же цельбы почерпаем.
Сла́ва Отцу́ и Сы́ну и Свято́му Ду́ху:
Исцеления приемлют приходящии прикосновением чудотворнаго ти образа, разслаблении и слепии, и иными различными болезньми одержимии, призыванием святаго твоего имене, отче Николае.
И ны́не и при́сно и во ве́ки веко́в. Ами́нь.
Богородичен: Избави нас от напастей, и скорбей, и печалей различных, и язык нашествия, Владычице Всепетая, яко да Тя славим, Надежду душам нашим.
Пе́снь 5
Ирмос: Просвеще́ние во тьме лежа́щих, / спасе́ние отча́янных, Христе́, Спа́се мой, / к Тебе́ у́тренюю, Царю́ мира, / просвети́ мя сия́нием Твои́м, / ино́го бо, ра́зве Тебе́, бо́га не зна́ю.
Припев: Святителю о́тче Николае, моли́ Бо́га о нас.
Крепость немощным, и слепым прозрение, и хромым благотечение, блаженне, подая духовною силою, иже верою к чудотворному твоему образу приходящим, граду Хлынову и всей вселенней, светильниче Николае.
Припев: Святителю о́тче Николае, моли́ Бо́га о нас.
Молися прилежно за ны, избавление подати, отче святителю, от всех бед, яже на ны приходят, ускори, святе, на помощь нашу.
Припев: Святителю о́тче Николае, моли́ Бо́га о нас.
Воистину Христос Бог наш показа тя в напастех тихое пристанище и забрало, Николае блаженне, сиротам же всем утешение.
Припев: Пресвятая Богородице, спаси нас.
Богородичен: Пречистая Владычице, рождши земным Правителя и Господа, похотей моих злолютое укроти смущение и тишину подаждь сердцу моему.
Припев: Святителю о́тче Николае, моли́ Бо́га о нас.
Царю Христе, вышних сил крепостию десницы Твоея правоверным и благоразумным царем нашим под ноги покори врагов нечестивых, и люди Твоя спаси, и земныя плоды умножи молитвами Твоего святителя Николая.
Припев: Святителю о́тче Николае, моли́ Бо́га о нас.
Во всех странах произыде вещание, яко граду нашему явися чудотворный образ преславен святителя Николая, источая исцелений множество всем приходящим к нему с верою.
Сла́ва Отцу́ и Сы́ну и Свято́му Ду́ху:
Яко велика столпа и твердо забрало дарова тя Христос граду сему, идеже ныне от чудотворнаго ти образа точиши чудес струи, преблаженне Николае.
И ны́не и при́сно и во ве́ки веко́в. Ами́нь.
Богородичен: О, Господа моего Мати, Ты Надежда отчаянным, Помощь всем грешником, не презри, Милостивая Царице, мене окаяннаго, люте и пребезмерно согрешившаго паче человеческаго естества.
Песнь 6
Ирмос: В бе́здне грехо́вней валя́яся, / неизсле́дную милосе́рдия Твоего́ призыва́ю бе́здну: / от тли, Бо́же, мя возведи́.
Припев: Святителю о́тче Николае, моли́ Бо́га о нас.
Честным явлением чудотворнаго твоего образа, святителю, прославися честная церковь твоя, имущая в себе благодати сокровище неоскудное и пречудное.
Припев: Святителю о́тче Николае, моли́ Бо́га о нас.
Иже любовию тебе почитающим и честнаго образа твоего явление совершающим торжество, блаженне Николае, разрешение грехов, житию исправление и всем людем пременение, милосерде, испроси.
Припев: Святителю о́тче Николае, моли́ Бо́га о нас.
Празднующим светло память явления образа твоего, святителю, царем нашим и архиерею мир испроси, и междоусобныя брани укроти, и избави нас от нахождения поганых, и клеветником челюсти сокруши.
Припев: Пресвятая Богородице, спаси нас.
Богородичен: Кто нас избавит от муки вечныя и от смерти душевныя, аще не Ты воздержеши пречистеи руце, Богородице, Сыну Своему и Богу нашему, да спасет нас Твоим покровом, Преблагословенная, неимущих помощи неоткудуже.
Припев: Святителю о́тче Николае, моли́ Бо́га о нас.
Яко шипок и яко крин сельный сладкоуханен, святителю, и яко кипарис, и яко миро божественно и благовоние, образ твой благоухает чудеса, смрадныя недуги отгоняющи, Николая всечестне.
Припев: Святителю о́тче Николае, моли́ Бо́га о нас.
Днесь веселится Христова Церковь, празднственную радость духовную составльши в памяти явления чудотворнаго образа твоего, вкупе же и пренесения во град Хлынов, святителю, Юже непоколебиму спаси твоими иже ко Спасу благориятными молитвами, Николае священне.
Сла́ва Отцу́ и Сы́ну и Свято́му Ду́ху:
О святителю Николае, како тя возможем воспети достойно, не может бо язык человеческий изглаголати твоя различныя исцеления и многая дарования всем человеком.
И ны́не и при́сно и во ве́ки веко́в. Ами́нь.
Богородичен: О, Пресвятая Владычице Богородице, не имамы помощи иныя, разве Тебе, молися Сыну Своему и Богу нашему со святителем Николаем, да соблюдет царей православных и сохранит царство их нерушимо и да спасет нас, верою и любовию Тя почитающим.
Кондак, глас 3:
Яко звезда пресветлая, / от Великия реки произшедши, / пречестный образ священнолепнаго ти подобия, / святителю Николае, / лучами чудес твоих град Хлынов и всех озаряющий / притекающих с верою к чудотворному образу твоему, / сего ради вси верно и благочестно прославляем тя, // велия таинника Божия благодати.
Икос:
Воспоем ныне святителя песньми, граду Хлынову и всей Вятской стране и вселенной всей пастыря и учителя, да молитвами его просветимся, сей бо явися болящим исцеление, обидимым избавление, в бедах сущим всем спасение, присно подавая притекающим к чудотворному образу его, яко святитель очищен душею и телом, и истинен Церкви предстатель и поборник, и великий таинник Божия благодати.
Песнь 7
Ирмос: Образу златому, на поле Деире служиму, трие Твои отроцы небрегоша безбожнаго веления, посреде же огня ввержени, орошаеми, пояху: благословен еси, Боже отец наших.
Припев: Святителю о́тче Николае, моли́ Бо́га о нас.
О премудре Николае, молим тя, блаженне, моли Христа Бога нашего за царей православных и за архиерея, и всем верным спасение испроси, и миру смирение, и свобождение от грех, и умоли Царствию быти наследником.
Припев: Святителю о́тче Николае, моли́ Бо́га о нас.
Воздержи руце твои к Богу, святе Николае, моли за ны прилежно помиловати град твой Хлынов и всю страну Вятскую избавитися глада, труса, и огненнаго запаления и нашествия иноплеменных.
Припев: Святителю о́тче Николае, моли́ Бо́га о нас.
Недугом всяким цельба и врачевание душам неизживуще чудотворный твой образ бысть, от Бога бо благодатию исцелений обогатися, Николае прехвальне.
Припев: Пресвятая Богородице, спаси нас.
Богородичен: Всенепорочная Мати Божия, возсияй ми покаяния лучу и разори мрак безмерных ми зол, лукавыя и хульныя отжени, Дево, помыслы сердца моего.
Припев: Святителю о́тче Николае, моли́ Бо́га о нас.
Возсияв чудесы, святителю, вселенную просветил еси, сего ради богомудре, совокупльшеся, тебе ублажаем, чудотворный твой образ зряще и поюще: отец наших Боже, благословен еси.
Припев: Святителю о́тче Николае, моли́ Бо́га о нас.
Милостивно преклоняяся от лютых изымаеши бед, чудне Николае молящих тя и поющих: отец наших Боже, благословен еси.
Сла́ва Отцу́ и Сы́ну и Свято́му Ду́ху:
Благоприятна бысть, богомудре, твоя молитва ко Господу, ибо верою нарицающих имя твое, святителю, спасает Христос от искушений, и избавляет недуг всяческих душевных же и телесных, и здравие благое подает поющим: отец наших Боже, благословен еси.
И ны́не и при́сно и во ве́ки веко́в. Ами́нь.
Богородичен: Бога, Егоже родила еси, Пречистая Марие, Тому помолися рабом Твоим подати прегрешением оставление, поющим: отец наших Боже, благословен еси.
Песнь 8
Ирмос: В пещь о́гненную ко отроко́м евре́йским снизше́дшаго / и пла́мень в ро́су прело́жшаго Бо́га / по́йте, дела́, я́ко Го́спода / и превозноси́те во вся ве́ки.
Припев: Святителю о́тче Николае, моли́ Бо́га о нас.
Божественному притекающе храму святителя Николая, свет приимем и к чудотворному образу его прикасающеся, всегда радующеся, священне, подательно благодати приимше, вопием: вся дела благословите Господня Господна.
Припев: Святителю о́тче Николае, моли́ Бо́га о нас.
Иже твое совершающе торжество, Николае, праведным собеседниче, твоими молитвами, да улучим Царствие вышнее, вопиюще: благословите вся дела Господня Господна.
Припев: Святителю о́тче Николае, моли́ Бо́га о нас.
К чудотворному твоему образу приступающе, благоухания Божественнаго разума исполняемся, преблаженне Николае, смрада избавляющеся страстей, иже любовию тя чтущия, отче преподобне.
Припев: Пресвятая Богородице, спаси нас.
Богородичен: Избави, Богородиче, от обышедших ны печалей, бед же и скорбей, и всех различных недуг, отравы же и чародейства, и бесовскаго мечтания, и от напрасныя смерти, молимся.
Припев: Святителю о́тче Николае, моли́ Бо́га о нас.
Всемирный сей праздник церковнаго светильника во псалмех и пениих верно совершаем, взирающе на чудотворный его образ, воспоем Христа: благословите, пойте и превозносите Его во веки.
Припев: Святителю о́тче Николае, моли́ Бо́га о нас.
Неусыпающа имамы тя, мудре, верных собори молитвенника, умоляюща морская волнения свирепая, напастей же пременяюща и лютых и всяческих нас избавляюща, вопиющих Христови: благословите, пойте и превозносите Его во веки.
Сла́ва Отцу́ и Сы́ну и Свято́му Ду́ху:
Струи целебныя храм твой, святителю, требующим источает всегда, пристанище являяся необуреваемо и страстем отгонительно почитающим чудотворный твой образ и Христу зовущим: благословите, пойте и превозносите Его во веки.
И ны́не и при́сно и во ве́ки веко́в. Ами́нь.
Богородичен: Освети ум мой и просвети мое сердце, Пресвятая Мати Божия, и одержащих мя лютых избави, да Тя славлю, Богородице Приснодево, и зову Господа: благословите, пойте и превозносите Его во веки.
Песнь 9
Ирмос: Безнача́льна Роди́теля Сын, Бог и Госпо́дь, / вопло́щся от Де́вы, нам яви́ся, / омраче́нная просвети́ти, собра́ти расточе́нная. / Тем Всепе́тую Богоро́дицу велича́ем.
Припев: Святителю о́тче Николае, моли́ Бо́га о нас.
Певцем, иже тебе, святителю Николае, похвальная поющим, помощи низпосли свыше, да всегда тебе в песнех величаем.
Припев: Святителю о́тче Николае, моли́ Бо́га о нас.
Благодарное сие пение приносящих ти, отче, с вышними милостивно назирай и моли Избавителя спасти всех, иже образу твоему чудотворному покланяющихся.
Припев: Святителю о́тче Николае, моли́ Бо́га о нас.
Божиим смотрением и святительским благословением, рукою моею недостойною приносимое чудотворному твоему образу похваление, преблаженне Николае, не отрини, но приими, моли Христа Бога, да избавимся шуяго стояния.
Припев: Пресвятая Богородице, спаси нас.
Богородичен: Низложи вознесенныя, и победи полки иноплеменных, Дево Чистая, хотящия бранем, и Своя рабы невредны от них сохрани, Отроковице, да Тя непрестанно величаем.
Припев: Святителю о́тче Николае, моли́ Бо́га о нас.
Да входят ныне во святый храм к чудотворному образу святителя Николая благочестия духовнии держатели, архиереи и священнии собори и всяк возраст, припадающе, просят почерпсти исцеления, здравия и спасения, Христа величающе, да направит нас на путь мирен.
Припев: Святителю о́тче Николае, моли́ Бо́га о нас.
Удивися во всем мире, Николае, чудотворный твой образ, чудесы сияя, яко солнце от всех зол всех исцеляя, тем же молим тя: проси нам у Христа, да направит нас на путь мирен.
Сла́ва Отцу́ и Сы́ну и Свято́му Ду́ху:
Явился еси граду сему, богоблаженне Николае, столп непоколебим и стена нерушимая, прибежище же великое притекающих с верою к чудотворному образу твоему, темже молим тя: проси нам у Христа Бога, да направит нас на путь мирен.
И ны́не и при́сно и во ве́ки веко́в. Ами́нь.
Богородичен: Устнами смиренными принесох Ти препростре сие, Всепетая, пение, понеже груб есмь многогрешный и недостоин по достоянию воспети Тя, но от усердия на твоя щедроты надеяся, яко Спасителя всего мира родила еси, не возгнушайся, Царице, приими сие со святителем Николаем и спаси мя молитвами его, да направит мя Господь на путь мирен.
Светилен:
Всемирную радость в пусте месте явленно благоговейный муж узрети сподобися светозарными лучами сияющий образ святителя Николая. Промыслом же Божиим во град Хлынов принесенну, идеже и доныне с верою приходящии приемлют от него прошения неоскудно.
Слава, и ныне, Богородичен:
Святая Всенепорочная, Благоуханный Сосуде, моли Всемилостиваго Христа, Егоже родила еси, цареви убо здравие и победная, и ига работнаго дата ослабу людем Твоим.
Молитва святому и великому чудотворцу Николаю
О великий архиерее, треблаженне Николае Мирликийский и всея вселенныя преславный чудотворче! Осиявый всю подсолнечную чудесы, скоро от всяких бед и скорбей изымая с верою призывающих тя, тихое обуреваемым пристанище и сущим в напастех теплый предстателю, присный к Богу молитвенниче о чтущих любовию святую ти память, присетивый благодатию, юже богатно приял еси от Бога, и славный град Хлынов, всю страну Вятския земли ради явления честнаго образа твоего. И за еже преславно исцелений источник верным людем от образа твоего богатно излиял еси. Призри и ныне, святителю Христов, последняго рода сего на народ и заступи град сей и всея Вятския страны люди, их же сам возлюбил еси, блаженне, избавляя от всяких бед, и скорбей, и напастей, и варварскаго нахождения, и междоусобныя брани, от глада же и губительства, от тлетворных ветр. Услыши мольбу, скорый в бедах заступниче, усердно тя на помощь призывающих прияти благодать ради предстательства твоего к Богу, тебе бо предлагаем преславнаго молитвенника и ходатая о спасении душ наших. Ко Излиявшему Себе о нас, Иже и зрак рабий приим, и в подобии человечестем быв, и о спасении нашем кровь Свою излиял, первее пострада, понос нам оставль образ, Иже и паки приидет со славою судити живым и мертвым, и воздаст комуждо по делом его, Его умолити молим тя, блаженне, страшнаго и нелицеприемнаго Судию, призирающаго на землю и творящаго ю трястися, не точию о граде, но людех сих, и о всей Вятстей стране, [и о царствующаго града о христолюбивых царех, и о болярах, и о князех,] и о всем христолюбивом воинстве, и всея великия России о всяком граде и стране, и о всем православном христианстве. Много бо дерзновение имаши к Богу, о святителю Христов, истинный пастырю словеснаго Его стада, положивый душу свою о порученных ти душах, простри и ныне преподобнии твои руце и умоли благость Его о смирившихся от грех, испроси благодать требующим щедрот Его, милостивно приемля нас в заступление свое. Избави ны от всяких бед, и зол, и бесовскаго обстояния, навет же и злохитрства борющих, но свободи и изми ны от видимых и невидимых враг, и в жизни сей согрешением нашим прощение испроси, и спасенных нас Христу представи в день Страшнаго Пришествия Его. И Царствия Его Небеснаго улучите сподоби, присно моля за ны, недостойныя рабы. Его же испросим вси со слезами: о святителю Христов, о них же и молимся ти, блаженне, их же и надеемся получити ради теплаго предстательства твоего к Богу, Ему же о нас присно молися, блаженне, да молитвами свободившеся от грех, получим милость ныне, и присно, и во веки веков. Аминь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![Явления чудотворнаго образа Великорецкаго, святителя Николая Явления чудотворнаго образа Великорецкаго, святителя Николая](img_b/018.jpg)