6 июня.

Канон второй преподобному Никите столпнику Переяславскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Правосла́вным смы́слом ю́ношская возжеле́ния возненави́дев и до́блественныя нра́вы восприи́м, врага́ победи́л еси́, и во благоразу́мии Бо́гу угоди́л еси́, и свы́ше от Него́ прие́м да́р чуде́с, бе́сы прогоня́ти, неду́ги исцеля́ти, Ники́то пресла́вне, моли́ Христа́ Бо́га, да спасе́т ду́ши на́ша.

Други́й кано́н. Гла́с 8.

Пе́снь 1.

Ирмос: Сокруши́вшему бра́ни мы́шцею Свое́ю и прове́дшему Изра́иля сквозе́ Чермно́е мо́ре, пои́м Ему́, я́ко Изба́вителю на́шему Бо́гу, я́ко просла́вися.

Припев: Преподо́бне о́тче Ники́то, моли́ Бо́га о нас.

Пе́ние приими́ от усте́н недосто́йных, Человеколю́бче Го́споди, и пода́ждь ми́ отверзе́ние усто́м и гла́с умиле́ния, да возмогу́ воспе́ти уго́дника Твоего́, Ники́ту преди́внаго.

Припев: Преподо́бне о́тче Ники́то, моли́ Бо́га о нас.

Не́навистию возненави́дев суету́ ми́ра, вся́ соде́янная с пла́чем испове́дал еси́ духо́вному твоему́ наста́внику и запреще́ние любе́зно от души́ восприя́л еси́.

Сла́ва Отцу́ и Сы́ну и Свято́му Ду́ху:

Ели́ко име́я друго́в любле́ния, и подру́жия совокупле́ния, и домо́вное пребыва́ние, во́лею все́х оттщети́вся, Христа́ еди́наго приобре́л еси́.

И ны́не и при́сно и во ве́ки веко́в. Ами́нь.

Богородичен: Мольбу́ приноша́ю от усте́н недосто́йных, сию́ приими́, Влады́чице, я́ко вдо́выя о́ныя две́ ца́те, неде́йственна бо е́сть. Те́мже со умиле́нием вопию́ Ти: о Пребога́тая, сла́ва Рождеству́ Твоему́, Пречи́стая!

Пе́снь 3.

Ирмос: Утверди́ся се́рдце мое́ в Го́споде, вознесе́ся ро́г мо́й в Бо́зе мое́м, разши́ришася на враги́ моя́ уста́ моя́, возвесели́хся о спасе́нии Твое́м.

Припев: Преподо́бне о́тче Ники́то, моли́ Бо́га о нас.

Матфе́й, мы́тницу оста́вль, евангели́ст показа́ся; ты́ же, преподо́бне, суету́ ми́ра отве́рг в мона́шеская оде́явся, Христу́ угоди́л еси́ и чудотво́рец показа́лся еси́.

Припев: Преподо́бне о́тче Ники́то, моли́ Бо́га о нас.

Лука́вое со́нмище оста́вль, Христо́в яре́м на ся́ возложи́л еси́, труды́ же и по́двиги твои́ми все́х удивля́я и ко спасе́нию наставля́я.

Сла́ва Отцу́ и Сы́ну и Свято́му Ду́ху:

Блу́днаго гла́сом вопия́ и со воздыха́нием в пе́рси бия́, Бо́гу прибли́жился еси́ и ра́дости ве́чныя сподо́бился еси́ и непреста́ннаго, Ники́то, весе́лия.

И ны́не и при́сно и во ве́ки веко́в. Ами́нь.

Богородичен: Напа́стьми мно́гими одержи́мь с боле́зньми и пла́чем вопию́ Ти: изба́ви, Богоро́дице, от одержа́щих мя́ скорбе́й и ве́чнаго муче́ния и Ца́рствия Сы́на Твоего́ сподо́би мя́.

Седа́лен, гла́с 5:

Те́лом возше́д на сто́лп, у́м же возвы́сив на преми́рная, труды́ ко трудо́м прилага́еши, жела́я дости́гнути угото́ванных тебе́ бла́г на небесе́х, и́хже получи́в, помина́й на́с, почита́ющих свяще́нную па́мять твою́.

Други́й седа́лен, гла́с 4:

Яко всесве́тлая звезда́, возсия́в светоза́рными доброде́тельми, богоно́се, всю́ ду́шу просвети́л еси́ Ду́хом. Те́м преше́л еси́ к невече́рнему Све́ту, разреша́я страсте́й на́ших те́мныя о́блаки, па́мять твою́ при́сно творя́щих се́рдца пра́востию.

Сла́ва, и ны́не, Богородичен:

Нечи́стых по́мысл мои́х мно́жество и безме́стных мы́слей обурева́ния кто́ изрещи́ мо́жет, Всенепоро́чная? Настоя́ния же безпло́тных вра́г мои́х кто́ испове́сть и си́х зло́бу? Но Твое́ю мольбо́ю, Блага́я, си́х мне́ все́х избавле́ние да́руй.

Пе́снь 4.

Ирмос: Проро́к Авваку́м у́мныма очи́ма прови́де, Го́споди, прише́ствие Твое́, те́м и вопия́ше: от ю́га прии́дет Бо́г. Сла́ва си́ле Твое́й, сла́ва снизхожде́нию Твоему́.

Припев: Преподо́бне о́тче Ники́то, моли́ Бо́га о нас.

При́сно име́л еси́ к Бо́гу моли́твенника, духо́внаго твоего́ наста́вника, я́коже втора́го Моисе́я, изве́дшаго из Еги́пта дре́вняго Изра́иля, науча́юща тя́ воспева́ти: сла́ва си́ле Твое́й, Го́споди.

Припев: Преподо́бне о́тче Ники́то, моли́ Бо́га о нас.

Не довле́ тебе́, преподо́бне, многотру́дное пребыва́ние, желе́за тя́жкая на ся́ возлага́еши и труды́ к трудо́м прилага́еши, вопия́ Христу́: сла́ва си́ле Твое́й, Го́споди.

Сла́ва Отцу́ и Сы́ну и Свято́му Ду́ху:

Ше́ствия небеси́ явля́я, сто́лп водрузи́л еси́ и от сего́ стезю́ в моли́твенный хра́м ископа́л еси́, иде́же приле́жно вопия́ Христу́: сла́ва си́ле Твое́й, Го́споди.

И ны́не и при́сно и во ве́ки веко́в. Ами́нь.

Богородичен: Возста́ви мя́, ни́зу лежа́щаго, моли́твами Твои́ми, Пречи́стая, и на покая́ния стези́ наста́ви, да, возбну́в от глубины́ неча́яния, узрю́ све́т богоразу́мия и воспою́ заступле́ние Твое́, Препе́тая.

Пе́снь 5

Ирмос: Го́споди Бо́же на́ш, ми́р да́ждь на́м, Го́споди Бо́же на́ш, стяжи́ ны, Го́споди, ра́зве Тебе́ ино́го не ве́мы, и́мя Твое́ имену́ем.

Припев: Преподо́бне о́тче Ники́то, моли́ Бо́га о нас.

Пе́ния соверша́я, исходя́ в нощи́ от столпа́, два́ исто́чника ископа́л еси́, от ни́хже и до ны́не, с ве́рою почерпа́юще, прие́млют благода́ть исцеле́ний.

Припев: Преподо́бне о́тче Ники́то, моли́ Бо́га о нас.

Сопе́рник прелука́вый, а́ки зми́й превели́к, посреде́ ке́ллии твоея́ изы́де, устраша́я тя́, ты́ же сего́, блаже́нне, попра́л еси́ и без ве́сти моли́твою до конца́ сотвори́л еси́.

Сла́ва Отцу́ и Сы́ну и Свято́му Ду́ху:

Неду́г ослабле́ния удо́в име́я, благочести́вый Михаи́л, княже́ние тогда́ содержа́й во гра́де Черни́гове, моли́твами твои́ми исцеле́ние получи́.

И ны́не и при́сно и во ве́ки веко́в. Ами́нь.

Богородичен: Христа́ Иису́са ро́ждшая, Пречи́стая, Сего́ моли́ при́сно изба́вити от бе́д рабы́ Твоя́, ве́рою и́мя Твое́ призыва́ющия: ра́зве бо Тебе́, Влады́чице, ино́го заступле́ния не и́мамы.

Пе́снь 6.

Ирмос: Яко во́ды морски́я, Человеколю́бче, волна́ми жите́йскими обурева́юся, те́мже, я́ко Ио́на, та́ко вопию́ Ти́: возведи́ от тли́ живо́т мо́й, благоутро́бне Го́споди.

Припев: Преподо́бне о́тче Ники́то, моли́ Бо́га о нас.

Преди́вно бы́сть чу́до: еще́ бо держа́вному Михаи́лу, ни оби́тели дости́гшу, ни столпа́ ви́девшу, то́кмо же́зл тво́й в ру́це прии́м и о се́м укрепи́вся, исцеле́ние получи́ и прии́де во оби́тель твою́ здра́в.

Припев: Преподо́бне о́тче Ники́то, моли́ Бо́га о нас.

Ра́достно благочести́вый Михаи́л кня́зь, прие́мля от тебе́ благослове́ние, са́м тебе́ испове́да, ка́ко велиа́р во о́бразе чернца́, двакра́ты поноси́ тебе́, сказу́я тебе́, от жития́ сего́ отше́дша.

Сла́ва Отцу́ и Сы́ну и Свято́му Ду́ху:

Держа́вный Михаи́л кня́зь, доше́д ме́ста, иде́же исцеле́ние получи́, повеле́ водрузи́ти Честны́й Кре́ст в сла́ву Бо́гу и в па́мять чудеси́ преди́внаго отца́.

И ны́не и при́сно и во ве́ки веко́в. Ами́нь.

Богородичен: Все́ вре́мя живота́ моего́ во страсте́х изжи́х и ны́не моле́ния приноша́ю Ти́, Пречи́стая: разреше́ние пода́ждь ми́, Всепе́тая, и ве́чнаго мя́ изба́ви осужде́ния, Ты́ бо ми́ру Блага́я Помо́щница.

Конда́к, гла́с 8:

Христа́ ра́ди от твои́х рабо́в ну́ждную сме́рть претерпе́л еси́ и вене́ц нетле́ния от Него́ восприя́л еси́, приходя́щим же с ве́рою от честна́го твоего́ гро́ба подае́ши цельбы́, о Ники́то преподо́бне, моли́твенниче о душа́х на́ших.

Икос:

Земны́й Ангел, небе́сный челове́к бы́л еси́, преподо́бне, посто́м и бде́нием ду́шу просвети́в, алка́нием, и жа́ждею, и на земли́ лега́нием Бо́гу угоди́л еси́ и вся́ку доброде́тель мона́шескаго жития́ испра́вил еси́, к си́м же и ну́ждную сме́рть от твои́х рабо́в восприи́м, возше́л еси́ к жела́емому Христу́, ра́дуяся, о Ники́то преподо́бне, моли́твенниче о душа́х на́ших.

Пе́снь 7.

Ирмос: От Иуде́и доше́дше, о́троцы, в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.

Припев: Преподо́бне о́тче Ники́то, моли́ Бо́га о нас.

Не ржа́ покры́ тя́жкая о́на желе́за, но труды́ твоя́ и по́ты си́х просвети́ша, и, я́ко зла́то, блеща́хуся: любве́ же ра́ди Госпо́дни не чу́л еси́ си́х на телеси́ твое́м, усе́рдно вопия́: оте́ц на́ших Бо́же, благослове́н еси́.

Припев: Преподо́бне о́тче Ники́то, моли́ Бо́га о нас.

Му́тнии умо́м уби́йцы, зря́ще блиста́ние о́но на телеси́ твое́м, мня́ще мно́жество зла́та нося́щу ти́, о уби́йстве твое́м умы́слиша. Ты́ же от си́х, преподо́бне, ну́ждную сме́рть восприя́л еси́, вопия́ Христу́: оте́ц на́ших Бо́же, благослове́н еси́.

Сла́ва Отцу́ и Сы́ну и Свято́му Ду́ху:

Обрето́ша во вре́мя у́тренняго клепа́ния честно́е те́ло твое́, те́пло лежа́що, ду́шу же отше́дшу ко Го́споду, оби́тели же, испо́лньшися благово́ния, вси́ возопи́ша со слеза́ми: оте́ц на́ших Бо́же, благослове́н еси́.

И ны́не и при́сно и во ве́ки веко́в. Ами́нь.

Богородичен: Це́рковь освяще́на Бо́гу бы́вши, Мари́е Богороди́тельнице, Сего́ моли́, я́ко Человеколю́бца, Чи́стая, уще́дрити лю́ди согреши́вшия и спасти́ от бе́д лю́тых и страсте́й треволне́ния.

Пе́снь 8.

Ирмос: Покрыва́яй вода́ми превы́спренняя Своя́, полага́яй мо́рю преде́л песо́к и содержа́й вся́, Тя́ пое́т со́лнце, Тя́ сла́вит луна́, Тебе́ прино́сит пе́снь вся́ тва́рь, я́ко Соде́телю все́х во ве́ки.

Припев: Преподо́бне о́тче Ники́то, моли́ Бо́га о нас.

Неразу́мнии о́ни уби́йцы жела́емаго зла́та не получи́ша, честны́я же вери́ги в реку́ Во́лгу вверго́ша; пресве́тлым луча́м над ни́ми в нощи́ я́вльшимся, я́ко и ве́сь гра́д Яросла́вль осия́вшим.

Припев: Преподо́бне о́тче Ники́то, моли́ Бо́га о нас.

Кресты́ три́ и вери́ги тя́жки, верху́ воды́ пла́вающе, обрето́шася, и си́х боголюби́вии взе́мше, во гра́д Яросла́вль внесо́ша, и мно́зи, разли́чными неду́ги одержи́мии, исцеле́ние от си́х получи́ша.

Сла́ва Отцу́ и Сы́ну и Свято́му Ду́ху:

Ты́ са́м, преподо́бне, обре́тшему яви́вся, три́ кресты́, ре́кл еси́, и тя́жкая желе́за, по́честь трудо́в мои́х, ско́ро положе́ни да бу́дут на гро́бе мое́м. Он же, стра́хом и ра́достию одержи́м бе́, по словеси́ твоему́ та́ко сотвори́.

И ны́не и при́сно и во ве́ки веко́в. Ами́нь.

Богородичен: Твоя́ ми́лости на мне́ удиви́вши, Чи́стая, уя́звенную ду́шу мою́ исцели́, и бу́дущаго муче́ния изба́ви, и Ца́рствия Сы́на Твоего́ сподо́би мя́.

Песнь 9

Ирмос: Тя́, Неискусобра́чную Ма́терь Бо́га Вы́шняго, Тя́, па́че ума́ ро́ждшую сло́вом вои́стинну Бо́га, вы́шшую пречи́стых си́л, немо́лчными славословле́нии велича́ем..

Припев: Преподо́бне о́тче Ники́то, моли́ Бо́га о нас.

Моли́ за ны́, о́тче преподо́бне, — держа́вный вопия́ше, — и испроси́ ми́ру ми́р, на́м же здра́вие и на враги́ одоле́ние; тебе́ бо моли́твенника те́пла ко Влады́це предлага́ем.

Припев: Преподо́бне о́тче Ники́то, моли́ Бо́га о нас.

Ра́ку твою́ лобыза́юще, ца́рие благочести́вии уми́льно глаго́лют: испроси́ у Христа́, преподо́бне, на́м же и ча́дом на́шим здра́вие, и спасе́ние и ве́лию ми́лость.

Сла́ва Отцу́ и Сы́ну и Свято́му Ду́ху:

Ку́пно за святи́телей, и за вся́ правосла́вныя моли́ся, преподо́бне, да вси́, па́мять твою́ све́тло пра́зднующе, в пе́снех Христа́ велича́ем.

И ны́не и при́сно и во ве́ки веко́в. Ами́нь.

Богородичен: Льва́ рыка́ющаго на мя́ ути́ши, Пречи́стая, мене́ же цельбы́ боже́ственныя сподо́би, да узрю́ све́т богоразу́мия и ра́достно воспою́ Рождество́ Твое́, Богоро́дице.

Свети́лен:

Вся́ жития́ оста́вль, Христа́ приобре́л еси́, трудополо́жно пожи́в и сме́рть ну́ждную восприя́т; те́м па́мять твою́, Ники́то, почита́ем.

Сла́ва, и ны́не, Богородичен:

Бо́га на́м, Пречи́стая, родила́ еси́, и вси́, прароди́тельныя кля́твы изба́вльшеся, воспева́ем Тя́, Препе́тая.

Молитва преподобному Никите Столпнику, Переяславскому

О, всечестна́я главо́, преподо́бне о́тче преблаже́нне, Ники́то преподобному́чениче! Не забу́ди ни́щих твои́х до конца́, но помина́й нас всегда́ во святы́х свои́х и благоприя́тных моли́твах к Бо́гу и не забу́ди присеща́ти чад свои́х. Моли́ за ны, о́тче благи́й и избра́нниче Христо́в, я́ко име́яй дерзнове́ние к Небе́сному Царю́, и не премолчи́ за ны ко Го́споду, и не пре́зри нас, ве́рою и любо́вию чту́щих тя. Помина́й нас, недосто́йных, у Престо́ла Вседержи́телева и не преста́й моля́ся за нас ко Христу́ Бо́гу: тебе́ бо дана́ бысть благода́ть моли́тися за ны. Не мним бо тя ме́ртва су́ща, а́ще бо и те́лом преста́вился еси́ от нас, но и по сме́рти у́бо жив пребыва́еши. Не отступа́й от нас ду́хом, сохраня́я и соблюда́я нас от стрел вра́жиих и вся́кия пре́лести бесо́вския, засту́пниче и моли́твенниче наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ душа́ со а́нгельскими во́инствы, со Безпло́тными ли́ки, с Небе́сными си́лами у Престо́ла Вседержи́теля Бо́га досто́йно весели́тся. Ве́дуще у́бо тя вои́стинну и по сме́рти жи́ва су́ща, тебе́ припа́даем, и тебе́ мо́лимся, и ми́лися де́ем, е́же моли́тися о нас Всеси́льному Бо́гу о по́льзе душ на́ших, и испроси́ нам вре́мя на покая́ние и невозбра́нно прейти́ от земли́ на Не́бо, и го́рьких мыта́рств, и возду́шных князе́й, и ве́чныя му́ки изба́вится нам, и Небе́сному Ца́рствию насле́дником бы́ти со все́ми пра́ведными, от ве́ка угоди́вшими Ему́, Го́споду на́шему Иису́су Христу́. Ему́же подоба́ет вся́кая сла́ва, честь и поклоне́ние со Безнача́льным Его́ Отце́м и Святы́м Ду́хом, ны́не и при́сно и во ве́ки веко́в. Ами́нь.