5 июня.
Канон преподобному исповеднику Михаилу Синадскому.
![Канон преподобному исповеднику Михаилу Синадскому Канон преподобному исповеднику Михаилу Синадскому](img_i/097.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропарь, глас 8:
В тебе́, о́тче, изве́стно спасе́ся, е́же по о́бразу:/ прии́м бо крест, после́довал еси́ Христу́,/ и де́я учи́л еси́ презира́ти у́бо плоть, прехо́дит бо,/ прилежа́ти же о души́, ве́щи безсме́ртней.// Те́мже и со А́нгелы сра́дуется, преподо́бне Михаи́ле, дух твой.
Кано́н. Гла́с 2.
Пе́снь 1.
Ирмос: Во глубине́ постла́ иногда́/ фараони́тское всево́инство преоруже́нная си́ла,/ вопло́щшееся же Сло́во всезло́бный грех потреби́ло е́сть,/ препросла́вленный Госпо́дь, сла́вно бо просла́вися.
Припев: Преподо́бне о́тче Михаи́ле, моли́ Бо́га о нас.
Неизглаго́ланным возсия́ просвеще́нием, о́тче, воздержа́ния,/ святи́тель Бо́жий был еси́, Михаи́ле чу́дне, ца́рское нося́ свяще́ние/ и Христо́ву пасы́й ты Це́рковь, преблаже́нне.
Припев: Преподо́бне о́тче Михаи́ле, моли́ Бо́га о нас.
Вити́йствуя усты́ све́тлыми, всем сказа́л еси́/ благоче́стно боговеща́нная уче́ния, Михаи́ле пребога́те,/ ересе́й облича́я хулы́, и благоче́стия побо́рник был еси́, преблаже́нне.
Припев: Преподо́бне о́тче Михаи́ле, моли́ Бо́га о нас.
Дарова́ний Боже́ственных быв, блаже́нне, сосу́д,/ всем ве́рным проявле́ние ты пре́дал еси́, Михаи́ле всехва́льне,/ богоподо́бно житие́ стяжа́в и пра́вдою оде́ян, я́ко ри́зою.
Сла́ва Отцу́ и Сы́ну и Свято́му Ду́ху:
Свяще́нному о́бразу Христо́ву и Бо́жия Ма́тере че́стне покланя́яся,/ пребы́л еси́, Михаи́ле всеосвяще́нне,/ и ху́льное языкобо́лие низложи́л еси́ ерети́чествующих,/ словесы́ и страда́нии побежда́я.
И ны́не и при́сно и во ве́ки веко́в. Ами́нь.
Богородичен: Из чре́ва Твоего́, Пресвята́я Чи́стая, возсия́в нам со́лнце,/ богоде́льными блиста́нии уясни́, отгна́в вся́ку де́монскую темнообра́зную молву́,/ препросла́вленный Госпо́дь, сла́вно бо просла́вися.
Пе́снь 3.
Ирмос: На ка́менимя ве́ры утверди́в,/ разшири́л еси́ уста́ моя́ на враги́ моя́,/ возвесели́ бо ся дух мой, внегда́ пе́ти:/ не́сть свят, я́коже Бог наш,/ и не́сть пра́веден, па́че Тебе́, Го́споди.
Припев: Преподо́бне о́тче Михаи́ле, моли́ Бо́га о нас.
Теку́щими притяжа́л еси́, Богоглаго́ливе, непреходи́мая и пребыва́ющая во ве́ки,/ разли́чно бо пожи́л еси́, взыва́я:/ не́сть свят, я́коже Бог наш, и не́сть пра́веден, па́че Тебе́, Го́споди.
Припев: Преподо́бне о́тче Михаи́ле, моли́ Бо́га о нас.
Излия́ся во устна́х твои́х Боже́ственная благода́ть, разшири́в уста́ твоя́,/ и прия́л еси́ прему́дрости дарова́ния, и вопия́л еси́:/ не́сть свят, я́коже Бог наш, и не́сть пра́веден, па́че Тебе́, Го́споди.
Сла́ва Отцу́ и Сы́ну и Свято́му Ду́ху:
Покори́л еси́ стра́сти воздержа́нием, просвети́л еси́ ум твой виде́нием,/ был еси́ де́телен, взыва́я:/ не́сть свят, я́коже Бог наш, и не́сть пра́веден, па́че Тебе́, Го́споди.
И ны́не и при́сно и во ве́ки веко́в. Ами́нь.
Богородичен: Мари́ю, Пречи́стую Богоро́дицу, воспое́м,/ я́ко Хода́таицу спасе́ния я́вльшуюся, Богому́дрии, и вопие́м:/ не́сть непоро́чны, я́коже Ты, Всенепоро́чная, и не́сть пречи́сты, па́че Тебе́, Влады́чице.
Седа́лен, гла́с 1.
Освяти́в себе́ житие́м соверше́нным, яви́лся еси́ свяще́нник Бо́га Вы́шняго,/ от Него́же укрепля́емь, ерети́чествующих уста́ загради́л еси́,/ на Христо́ву ико́ну отверза́емая,/ и, го́ним, о́тче, тече́ние сконча́л еси́.
Сла́ва, и ны́не Богородичен:
Безневе́стная Чи́стая Богоро́дице Де́во,/ еди́на ве́рных Предста́тельнице и покро́ве,/ бед, и скорбе́й, и лю́тых обстоя́ний всех изба́ви,/ на Тя упова́ние, Отрокови́це, иму́щих,/ и ду́ши на́ша спаси́ Боже́ственными моли́твами Твои́ми.
Пе́снь 4.
Ирмос: Прише́л еси́ от Де́вы, не хода́тай, ни А́нгел,/ но Сам, Го́споди, вопло́щся,/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди.
Припев: Преподо́бне о́тче Михаи́ле, моли́ Бо́га о нас.
Жела́я венца́ сла́вы,/ оста́вил еси́ пло́ти угожде́ние, священнотаи́нниче преизря́дне,/ все же житие́ твое́, я́ко благово́нну же́ртву, Бо́гу прине́сл еси́.
Припев: Преподо́бне о́тче Михаи́ле, моли́ Бо́га о нас.
Охро́мше от пра́выя стези́, впадо́ша в ров е́реси,/ и́же ны́не я́вльшеся отчужде́ни, и́хже обличи́л еси́,/ Христо́в почита́я о́браз, преблаже́нне.
Припев: Преподо́бне о́тче Михаи́ле, моли́ Бо́га о нас.
Восприя́л еси́ твои́х страда́ний бога́тно воздая́ния, Михаи́ле всече́стне,/ с Небе́сными си́лами ны́не веселя́ся и лику́я со А́нгелы, досточу́дне.
Припев: Преподо́бне о́тче Михаи́ле, моли́ Бо́га о нас.
Язы́к твой показа́ся Ду́ха тро́сть, Михаи́ле пресла́вне,/ смотре́ние плотско́е писа́ти поучи́вся Вседержи́теля Сло́ва, всехва́льне.
Сла́ва Отцу́ и Сы́ну и Свято́му Ду́ху:
Сия́я свяще́нною и честно́ю оде́ждею свяще́ния твоего́,/ испове́данием украси́лся еси́,/ позо́р быв А́нгелов и челове́ков, всече́стне.
И ны́не и при́сно и во ве́ки веко́в. Ами́нь.
Богородичен: Напра́ви, Богоро́дице, жи́знь мою́,/ повеле́нии Боже́ственными управля́ющи вопло́щшагося Сло́ва из Тебе́,/ и к све́ту наста́ви, Де́во Ма́ти, Мари́е Богоневе́сто.
Пе́снь 5
Ирмос: Просвеще́ние во тьме́ лежа́щих,/ спасе́ние отча́янных, Христе́ Спа́се мой,/ к Тебе́ у́тренюю, Царю́ ми́ра,/ просвети́ мя сия́нием Твои́м:/ ино́го бо, ра́зве Тебе́, бо́га не зна́ю.
Припев: Преподо́бне о́тче Михаи́ле, моли́ Бо́га о нас.
От ю́ности возложи́вся Сло́ву, священноявле́нне,/ Боже́ственно бо возложе́ние я́влься, украси́лся еси́ де́йственным виде́нием/ и, прему́дрости плод собра́в, был еси́ па́стырь, Михаи́ле, достоприя́тен.
Припев: Преподо́бне о́тче Михаи́ле, моли́ Бо́га о нас.
Глаго́л Бо́жий, бога́тно всели́выйся в тя, Богому́дре,/ ре́ки источи́ уче́ний,/ и́миже пита́ющеся, весели́мся, блаже́нне,/ тя хода́тая я́ве иму́ще, ми́лостива нам Христа́ содева́юща.
Сла́ва Отцу́ и Сы́ну и Свято́му Ду́ху:
И́же Боже́ственною си́лою вся украси́в, тя ны́не, Богоявле́ние,/ свяще́ния та́йнаго украси́ ми́ром, прове́дый твою́ све́тлость:/ яви́лся бо еси́ свяще́нник Бо́жий велему́др.
И ны́не и при́сно и во ве́ки веко́в. Ами́нь.
Богородичен: БРа́вен нам по всему́ бы́ти сподо́бивыйся, в Тя всели́ся, Богома́ти,/ преве́чно от Отца́ возсия́вый и роди́ся из Тебе́, Всенепоро́чная,/ Челове́к вку́пе и Бог всеси́лен.
Пе́снь 6.
Ирмос: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.
Припев: Преподо́бне о́тче Михаи́ле, моли́ Бо́га о нас.
В спаси́тельную оде́жду, прехва́льне, Боже́ственнаго весе́лия оде́явся,/ испове́дания вене́ц от Бо́га прия́л еси́ досто́йно.
Припев: Преподо́бне о́тче Михаи́ле, моли́ Бо́га о нас.
Претерпе́в го́рькая заточе́ния, му́дре,/ в простра́нную широту́ дости́гл еси́ рая́,/ с му́ченики лику́я, Богому́дре пребога́те.
Сла́ва Отцу́ и Сы́ну и Свято́му Ду́ху:
Учени́к быв Христа́ Бо́га,/ Сего́ страсте́м, блаже́нне, поревнова́л еси́,/ беды́ прие́мля до́блественне за Це́рковь Его́, Богодухнове́нне.
И ны́не и при́сно и во ве́ки веко́в. Ами́нь.
Богородичен: У́мно научи́шася несказа́нному вси проро́цы Твоему́, Пречи́стая, Рождеству́,/ духо́вно вообража́юще и предглаго́люще всем бу́дущая.
Конда́к, гла́с 8.
Я́ко архиере́й всече́стен и благоче́стия священнострада́лец,/ преще́ния злоимени́таго не убоя́вся,/ ерети́ческое того́ противле́ние победи́л еси́,/ свобо́дным гла́сом велегла́сно вопия́:/ ико́не покланя́юся Христо́ве и Пречи́стыя Того́ Ма́тере./ Сего́ ра́ди тя почита́ем, Михаи́ле.
Пе́снь 7.
Ирмос: Богопроти́вное веле́ние беззако́ннующаго мучи́теля/ высо́к пла́мень вознесло́ е́сть,/ Христо́с же простре́ Богочести́вым отроко́м ро́су духо́вную,/ Сын благослове́н и препросла́влен.
Припев: Преподо́бне о́тче Михаи́ле, моли́ Бо́га о нас.
Не терпя́ше язы́ка твоего́ Боже́ственнаго веща́ния зве́рь злоимени́тый, Михаи́ле свяще́нне,/ но в заточе́ниих тя осужда́ет да́льных:/ оба́че стыдя́шеся, твою́, священнопропове́дниче, зря тве́рдость.
Припев: Преподо́бне о́тче Михаи́ле, моли́ Бо́га о нас.
Направля́ется, прему́дре, уче́нии твои́ми Христо́в всесвяще́нный правосла́вный сонм:/ был бо еси́ орга́н, священноде́йственниче Михаи́ле, Ду́хом бряца́я,/ вопия́ вели́чия Вседержи́теля.
Сла́ва Отцу́ и Сы́ну и Свято́му Ду́ху:
Му́дре обличи́л еси́ злоимени́тых пита́телей, Ма́нента ху́льное нече́стие,/ Христо́ву пречи́стую, о́тче, ико́ну я́сно и Богома́тере пропове́дуя и святы́х,/ Михаи́ле преподо́бне.
И ны́не и при́сно и во ве́ки веко́в. Ами́нь.
Богородичен: Воплоще́ния была́ еси́ Бо́жия Сло́ва, и Де́во Всенепоро́чная, красе́н сосу́д:/ из Тебе́ бо воеприя́т, за милосе́рдие мно́гое, всего́ мя, челове́ка./ Сый благослове́н и препросла́влен.
Пе́снь 8.
Ирмос: В пе́щь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га,/ по́йте, дела́, я́ко Го́спода,/ и превозноси́те во вся ве́ки.
Припев: Преподо́бне о́тче Михаи́ле, моли́ Бо́га о нас.
На суди́щи став, Богопропове́дниче Михаи́ле, не устраши́лся еси́ преще́ния беззако́нных,/ но свобо́дным гла́сом вопия́л еси́:/ ико́ну пречи́стую чту Спа́са Христа́ и святы́х всех.
Припев: Преподо́бне о́тче Михаи́ле, моли́ Бо́га о нас.
Нра́вом тве́рдым и кре́пким спле́тся, му́дре, с богобо́рцы,/ победи́тель яви́лся еси́,/ де́лом и сло́вом я́вль, я́коже бя́ше ле́по/ ико́ну пречи́стую чти́ти Спа́са Христа́ и святы́х всех.
Сла́ва Отцу́ и Сы́ну и Свято́му Ду́ху:
На первообра́зную ве́дый ико́нную че́сть, священноявле́нне, преходя́щу, о́тче,/ Богодухнове́нным Писа́нием после́дуя, вся учи́л еси́/ чти́ти ико́ну Христо́ву и всех святы́х.
И ны́не и при́сно и во ве́ки веко́в. Ами́нь.
Богородичен: Струю́ исцеле́ний нам непреста́нно ве́рным, Чи́стая, источа́еши:/ ея́же оби́льную благода́ть почерпа́юще, Твое́ пое́м рождество́ пречи́стое/ и превозно́сим во вся ве́ки.
Песнь 9
Ирмос: Безнача́льна Роди́теля Сын, Бог и Госпо́дь,/ вопло́щся от Де́вы, нам яви́ся,/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем.
Припев: Преподо́бне о́тче Михаи́ле, моли́ Бо́га о нас.
Безме́рным сия́я ны́не просвеще́нием, пребога́те,/ Све́ту вели́кому я́ко предстоя́,/ жела́нный тебе́ коне́ц получи́ти, о́тче, сподо́бился еси́,/ к нему́же, тща́ся, текл еси́, благоче́стно пожи́в, преблаже́нне.
Припев: Преподо́бне о́тче Михаи́ле, моли́ Бо́га о нас.
Ви́дети сподо́бился еси́ па́че ума́ све́тлость,/ ю́же на земли́ проявле́нно, о́тче, стяжа́л еси́,/ но, хода́тайствуя, изба́вити твоя́ ученики́ Христа́ умоли́,/ тя ны́не хва́лящия и чту́щия, досточу́дне.
Сла́ва Отцу́ и Сы́ну и Свято́му Ду́ху:
Укре́плься Боже́ственною благода́тию,/ му́дрости твоея́ сия́нии богобо́рных на́глость, му́дре, погаси́л еси́,/ заря́ми отону́дными, я́ко исто́чник, вну́трь стяжа́в,/ Михаи́ле чу́дне, христопропове́дниче свяще́нне.
И ны́не и при́сно и во ве́ки веко́в. Ами́нь.
Богородичен: Я́коже руно́, Пренепоро́чная, До́ждь Небе́сный во утро́бе прие́мши,/ нам родила́ еси́ безсме́ртие даю́щаго,/ благоче́стно Того́ воспева́ющим и Тя, Всепе́тую Богоро́дицу, пропове́дающим.
Молитва
О свяще́нная главо́, преподо́бне о́тче, преблаже́нне а́вво Михаи́ле, не забу́ди убо́гих твои́х до конца́, но помина́й нас всегда́ во святы́х и благоприя́тных моли́твах к Бо́гу: помяни́ ста́до твое́, е́же сам упа́сл еси́, и не забу́ди посеща́ти чад твои́х моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ ду́ша со а́нгельскими во́инствы, со безпло́тными ли́ки, с небе́сными си́лами, у престо́ла Вседержи́телева предстоя́щи, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![Канон преподобному исповеднику Михаилу Синадскому Канон преподобному исповеднику Михаилу Синадскому](img_b/097.jpg)