5 июня.

Канон Обретению мощей святителя Леонтия епископа, Ростовскаго чудотворца.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Апо́столом соприча́стник и к Бо́гу моле́бник ве́рен, доброде́тельми возше́д на небе́сная, и любо́вь возложи́л еси́ к Лю́бящему тя́, и неве́рныя лю́ди обрати́л еси́ в ве́ру. Те́м ны́не, со Ангелы лику́я, предстои́ши престо́лу сла́вы все́х Царя́ Христа́ Бо́га: моли́ся, святи́телю Лео́нтие, да спасе́т ду́ши на́ша.

Кано́н святи́теля. Гла́с 6.

Пе́снь 1.

Ирмос: Яко по су́ху пешеше́ствовав Изра́иль по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.

Припев: Святи́телю о́тче Лео́нтие, моли́ Бо́га о нас.

Све́том Твоего́ Божества́, Христе́, мра́к неве́дения души́ моея́ озари́в, просвети́, Ми́лостиве, и да́ждь ми́ сло́во, Сло́ве, да воспою́ све́тло Твоего́ рачи́теля торжество́.

Припев: Святи́телю о́тче Лео́нтие, моли́ Бо́га о нас.

Ма́стию свяще́нною пома́зан бы́в от руки́ Вседержи́теля Бо́га, святи́телю сла́вне Лео́нтие, моли́ о хва́лящих твою́ па́мять, получи́ти грехо́в проще́ние и напа́стей избавле́ние.

Сла́ва Отцу́ и Сы́ну и Свято́му Ду́ху:

Души́ самово́льное житие́, и доброро́дство ве́ры стяжа́в, богопоруче́нныя тебе́ лю́ди, и че́стно наказа́в, преблаже́нне, свяще́нне Лео́нтие, приве́л еси́ я́ ко Христу́ Бо́гу.

И ны́не и при́сно и во ве́ки веко́в. Ами́нь.

Богородичен: Язы́ком избавле́ние Тобо́ю яви́ся, Пречи́стая Влады́чице, пре́жде па́дшим во тлю́ пра́деда Ада́ма преступле́нием: Ты́ бо Христа́ породила́ еси́, вся́ческих Творца́ и Го́спода.

Пе́снь 3.

Ирмос: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.

Припев: Святи́телю о́тче Лео́нтие, моли́ Бо́га о нас.

Свобо́ден сы́й у́м от страсте́й соблю́д, сосу́д освяще́н Ду́ха Пресвята́го бы́л еси́, всего́ себе́ пригво́ждь к Вы́шнему любо́вию, преблаже́нне.

Припев: Святи́телю о́тче Лео́нтие, моли́ Бо́га о нас.

Тво́й богоглаго́ливый язы́к бы́сть, прие́м Христа́ вну́трь, в се́рдцы глаго́лющь, Бо́жий вити́я, Лео́нтие, Тому́ помоли́ся за ны́.

Сла́ва Отцу́ и Сы́ну и Свято́му Ду́ху:

Креста́ Госпо́дня си́лою укрепля́яся, блаже́нне, поще́нием бо ве́рныя твоея́ моли́твы стремле́ния бесо́вская низложи́в, пове́ргл еси́.

И ны́не и при́сно и во ве́ки веко́в. Ами́нь.

Богородичен: Вели́ка сла́ва церко́вная, па́че дре́вняго собо́ра Изра́илева: Ты́ бо Це́рковь Бо́жия, Богоро́дице, в не́йже Христо́с пожи́в, спасе́ние соде́ла.

Седа́лен, гла́с 8.

Тве́рдостию ра́зума украша́яся, плотски́я тя́гости горды́ню попра́л еси́, и бы́л еси́ оби́телище избра́нно Ду́ха Пресвята́го, неукло́нным ра́зумом простира́яся к Лю́бящему тя́, те́м и ре́вностию боже́ственною разгара́яся, сла́вне, многоко́зненнаго стре́лы притупи́л еси́ и яви́вся Ангелом собесе́дник, святи́телю Лео́нтие, моли́ Христа́ Бо́га согреше́ний оставле́ние дарова́ти чту́щим любо́вию святу́ю па́мять твою́.

Сла́ва, и ны́не Богородичен:

Яко Всенепоро́чная Неве́сто Творцу́, я́ко неискусому́жная Ма́ти Изба́вителя, прия́телище я́ко су́щи Уте́шителя, Препе́тая, беззако́нию мя́ су́ща скве́рное оби́телище и бесо́м игра́лище в ра́зуме бы́вша, потщи́ся от те́х злоде́йства мя́ изба́вити и све́тлое жили́ще доброде́телей соверши́, Светоно́сная, Нетле́нная, отжени́ о́блак страсте́й и Вы́шняго прича́стия сподо́би и Све́та невече́рняго моли́твами Твои́ми.

Пе́снь 4.

Ирмос: Христо́с моя́ си́ла, Бо́г и Госпо́дь, честна́я Це́рковь боголе́пно пое́т, взыва́ющи, от смы́сла чи́ста, о Го́споде пра́зднующи.

Припев: Святи́телю о́тче Лео́нтие, моли́ Бо́га о нас.

Христа́ да похва́лим, вси́ ве́рнии, такова́го святи́теля да́вшаго, пречестно́е удобре́ние сла́вней це́ркви Своея́ Пречи́стыя Ма́тере.

Припев: Святи́телю о́тче Лео́нтие, моли́ Бо́га о нас.

Ду́ха дарова́нии благода́тию, сла́вне, в ри́зу свы́ше облача́яся, а́ки Ааро́н, незло́бием, преподо́бием и пра́вдою предста́л еси́ престо́лу Христо́ву.

Сла́ва Отцу́ и Сы́ну и Свято́му Ду́ху:

Духо́вен стяжа́в язы́к же и уста́ ти́хая честны́ми твои́ми словесы́, я́ко от пото́ка пи́щна, точа́ща уче́ния медото́чная, жи́знь безконе́чную исхода́тайствуй на́м.

И ны́не и при́сно и во ве́ки веко́в. Ами́нь.

Богородичен: Христа́ на́м, Бо́жию си́лу и му́дрость, Ты́ породи́вши, Пречи́стая Влады́чице, Богора́дованная Де́во, спаси́ лю́ди и гра́д, на Тя́ упова́ющия, Богоро́дице Пренепоро́чная.

Пе́снь 5

Ирмос: Бо́жиим све́том Твои́м, Бла́же, у́тренюющих Ти́ ду́ши любо́вию озари́, молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.

Припев: Святи́телю о́тче Лео́нтие, моли́ Бо́га о нас.

Блаже́н ты́ яви́лся еси́, и добро́ ти бы́сть, я́ко в моли́твах чи́стое и во бде́ниих кре́пкое, успе́шно пострада́л еси́, свяще́нный святи́телю, о́тче Лео́нтие: та́ко бо благослови́тся вся́к, боя́йся Го́спода.

Припев: Святи́телю о́тче Лео́нтие, моли́ Бо́га о нас.

Бо́жиим хране́нием блюдо́мо всечестно́е те́ло твое́, преблаже́нне Лео́нтие, мно́гими ле́ты земле́ю покрове́но, яви́ся невреди́мо, я́ко цве́т неувяда́емь, ве́рных сердца́ веселя́що.

Сла́ва Отцу́ и Сы́ну и Свято́му Ду́ху:

Гро́б честна́го твоего́ телесе́ показа́ся, ве́рных люде́й душа́м благослове́ние и телесе́м исцеле́ние, оби́льно излива́я, то́чит и вся́кия стра́сти тму́ отгоня́ет.

И ны́не и при́сно и во ве́ки веко́в. Ами́нь.

Богородичен: Бо́жиим укра́шена све́том, богопрера́дованная Ма́ти: Ты́ бо породила́ еси́ красне́йша па́че все́х сыно́в челове́ческих, и́стиннаго Бо́га, от ле́сти ми́р изба́вльшаго.

Пе́снь 6.

Ирмос: Жите́йское мо́ре, воздвиза́емое зря́ напа́стей бу́рею, к ти́хому приста́нищу Твоему́ прите́к, вопию́ Ти: возведи́ от тли́ живо́т мо́й, Многоми́лостиве.

Припев: Святи́телю о́тче Лео́нтие, моли́ Бо́га о нас.

Еди́нство Тро́ицы пропове́дал еси́ я́сно, святи́телю Лео́нтие, и нему́дрых сердца́ волну́ема укроти́л еси́, ра́вно славосло́вити ро́ждшагося Сло́ва, сопресто́льна Отцу́ и Ду́ху Свято́му.

Припев: Святи́телю о́тче Лео́нтие, моли́ Бо́га о нас.

Не терпя́ ви́дети вра́г ле́стное его́ погиба́ющее се́тование, подви́же устремле́ние людско́е на святопома́занную твою́ главу́, ты́ же моли́твами твои́ми разсла́блены и не́мощны пове́ргл еси́ я́.

Сла́ва Отцу́ и Сы́ну и Свято́му Ду́ху:

Богоразу́мием све́тло име́юще души́ своея́ у́мное, крася́т ра́ку моще́й твои́х, стека́ющеся к похвале́нию чуде́с твои́х празднолю́бцы, свяще́нный на́ш учи́телю.

И ны́не и при́сно и во ве́ки веко́в. Ами́нь.

Богородичен: Диви́т у́м же и слу́х Твое́ чревоноше́ние, Де́во господоимени́тая: ражда́еши бо Неви́димаго Бо́га, се́ уже́ ви́дима в на́шем существе́ я́ко Челове́ка, спаса́ющаго челове́ки.

Конда́к, гла́с 4.

Жития́ ра́ди чистоты́, Всеви́дец Госпо́дь све́т Сво́й насади́ в души́ твое́й, вразуми́ти лю́ди мно́гия твои́ми уче́нии, Лео́нтие преподо́бне.

Икос:

Новоразу́мному язы́ку, великоимени́тей стране́, блаже́нней земли́ святоразу́мен пропове́дник показа́лся еси́ боголе́пныя ве́ры Христо́вы: омраче́нная на́ша сердца́ озари́в, из глубины́ нече́стия исто́ргл еси́; пре́жде бо ны́ неве́жды су́щия, слове́с благода́тию укроти́в, наказа́л еси́ сла́вити пра́ведное и вели́кое в Тро́ице Божество́. Свяще́нный на́ш учи́телю, от кру́га небе́снаго посеща́й моли́твами твои́ми хва́лящия твою́ па́мять, Лео́нтие преподо́бне.

Пе́снь 7.

Ирмос: Росода́тельну у́бо пе́щь соде́ла Ангел преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́, Бо́же оте́ц на́ших.

Припев: Святи́телю о́тче Лео́нтие, моли́ Бо́га о нас.

Уче́ньми бо кре́пкими прему́дрых слове́с твои́х, я́ко чадолюби́вый оте́ц, незло́бивых дете́й мно́жество усво́ив Це́ркви, увеща́л еси́ вопи́ти: благослове́н Бо́г оте́ц на́ших.

Припев: Святи́телю о́тче Лео́нтие, моли́ Бо́га о нас.

Тобо́ю освяти́ Госпо́дь гра́д вели́кий сла́вный Росто́в, венцено́сче Лео́нтие, лю́дие бо его́, вразумле́ни тобо́ю, пою́т Христу́: благослове́н Бо́г оте́ц на́ших.

Сла́ва Отцу́ и Сы́ну и Свято́му Ду́ху:

Гася́ща у́бо свещу́ у честны́я твоея́ ра́ки, блаже́нне, устраши́в и не глаго́лати сотвори́в, твоея́ же святы́ни моли́твою исцеле́ние прия́т. С ни́мже и мы́, веселя́щеся, вопие́м Христу́: благослове́н Бо́г оте́ц на́ших.

И ны́не и при́сно и во ве́ки веко́в. Ами́нь.

Богородичен: Умертви́ся пресмыка́емый зми́й Твои́м Рождество́м, Пречи́стая Де́во, поро́ждши невмести́маго Бо́га небесы́. Спаси́ от бе́д хва́лящия Тя́, благослове́нная Чи́стая Присноде́во.

Пе́снь 8.

Ирмос: Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки.

Припев: Святи́телю о́тче Лео́нтие, моли́ Бо́га о нас.

Лику́ют чи́ни Ангельстии на небесе́х, и ве́рных со́нмища на земли́, твою́ па́мять похваля́юще, святи́телю Лео́нтие, Христа́ превозно́сят во ве́ки.

Припев: Святи́телю о́тче Лео́нтие, моли́ Бо́га о нас.

Тле́нныя ве́щи оттря́с и в небе́сныя ду́шу твою́ впери́в, я́ко же́ртва благоприя́тна, в воню́ благово́ния прине́слся еси́ Христу́, Его́же превозно́сим во ве́ки.

Сла́ва Отцу́ и Сы́ну и Свято́му Ду́ху:

Воспое́м усе́рдно пе́сньми Христа́ Бо́га, преподо́бнаго торжество́ ви́дяще, сла́вим. Вся́ бо де́йствует Христо́с, ели́ко хо́щет: Его́ бо сла́вящия прославля́ет во ве́ки.

И ны́не и при́сно и во ве́ки веко́в. Ами́нь.

Богородичен: На Тя́, Богома́ти Пречи́стая, небе́сный до́ждь сни́де, омыва́ющий скве́рну ду́ш на́ших, те́м Тя́ блажи́м, Чи́стую, во ве́ки.

Песнь 9

Ирмос: Бо́га челове́ком невозмо́жно ви́дети, на Него́же не сме́ют чи́ни Ангельстии взира́ти; Тобо́ю бо, Всечи́стая, яви́ся челове́ком Сло́во воплоще́нно, Его́же велича́юще, с небе́сными во́и, Тя́ ублажа́ем.

Припев: Святи́телю о́тче Лео́нтие, моли́ Бо́га о нас.

Яко звезда́ светоно́сная, яви́лся еси́, луча́ми духо́вными ве́рных сердца́ просвеща́я, све́том ра́зума боже́ственнаго, богому́дре Лео́нтие. Те́м, ны́не со Ангелы водворя́яся, спаса́й хва́лящия твою́ па́мять.

Припев: Святи́телю о́тче Лео́нтие, моли́ Бо́га о нас.

Де́лы духо́вными укра́шен, в пи́щи ра́йстей веселя́ся, помяни́ хва́лящия твою́ па́мять, заступа́я от бе́д и скорбе́й, преблаже́нне священносвяти́телю Лео́нтие, да непреста́нно тя́ ублажа́ем.

Сла́ва Отцу́ и Сы́ну и Свято́му Ду́ху:

Име́я Ца́рство непреме́нно, Царю́ сы́й вы́шних си́л, Христе́, десни́цы Твоея́ кре́постию вра́г нечести́вых вы́ю низве́рзи под но́зе наша.

И ны́не и при́сно и во ве́ки веко́в. Ами́нь.

Богородичен: Егда́ су́диши, Ми́лостиве, я́ростию не обличи́ мене́, ни гне́ва же сотвори́ проти́ву беззако́нием. Аще ли обличи́ши, то кто́ постои́т? Моли́твами ро́ждшия Тя́ чи́стыя Ма́тере огня́ гее́нскаго изба́витися мо́лимся и прича́стником бы́ти Ца́рства небе́снаго.

Свети́лен.

Сла́вно кра́сится дне́сь светоза́рное твое́ торжество́: во све́те сла́вы лица́ Бо́жия предстоя́, святи́телю, помяни́ на́с, хва́лящих твою́ па́мять.

Сла́ва, и ны́не, Богородичен:

По Бо́зе упова́ние иму́ще на Тя́, Пречи́стая Богоро́дице, мо́лимся: к Ро́ждшемуся из Тебе́ мольба́ми невреди́мых на́с да́же до конца́ сохрани́.

Молитва святителю Леонтию, епископу Ростовскому

О, свяще́нная главо́, пресла́вный чудотво́рче, первопа́стырю святы́я Росто́вския Це́ркве, святи́телю о́тче Лео́нтие! К тебе́ припа́даем и мо́лимся мы, смире́ннии и гре́шнии, и я́ко отца́ чадолюби́ваго про́сим: всели́ в сердца́ на́ша любо́вь твою́, е́юже к Бо́гу и бли́жним твои́м, при жи́зни твое́й преиспо́лнен был еси́, я́ко и ду́шу свою́ за па́ству твою́ положи́л еси́, му́ченически пострада́в от идолослужи́телей: научи́ нас, о́тче, тебе́ подража́ти ве́рно, Бо́га и бли́жних на́ших люби́ти и́скренно, и за́поведи Госпо́дни соверша́ти непогреши́тельно: да бу́дем и мы ча́да твоя́, не по и́мени то́кмо, но са́мым де́лом и всем житие́м на́шим. Моли́ся, уго́дниче Бо́жий, ко Христу́ Бо́гу, о святе́й правосла́вней Це́ркви и держа́ве Росси́йской: да пребу́дут в ми́ре и благостоя́нии и процвета́ют в благоче́стии христиа́нстем непоколеби́мы. Соблюди́ ца́рствующия гра́ды, град твой Росто́в и вся гра́ды и ве́си страны́ Росси́йския невреди́мы от вся́каго зла. При́зри благоутро́бно на вся́ку ду́шу христиа́нскую, ми́лости и по́мощи от тебе́ и́щущую: всем нам, в боле́знех цели́тель, в ско́рбех уте́шитель, в печа́лех изба́витель, в беда́х помо́щник, в час сме́ртный покрови́тель: да при по́мощи моли́тв твои́х святы́х, сподо́бимся и мы гре́шнии спасе́ние ве́чное получи́ти и ца́рство Христо́во унасле́довати. Ей, святи́телю Христо́в! Не посрами́ упова́ния на́шего, е́же по Бо́зе и Пресвяте́й Богоро́дице на тя кре́пко возлага́ем, но яви́ нам твое́ многомо́щное заступле́ние: да хва́лим, сла́вим и велича́ем вели́кое человеколю́бие ди́внаго во святы́х Свои́х Бо́га, Отца́ и Сы́на и Свята́го Ду́ха, во ве́ки веко́в. Ами́нь.