4 июня.

Канон первый великомученику Иоанну-Владимиру, князю Сербскому.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, глас 4:

Крест, я́вльшийся тебе́ с Небесе́, све́тел пропове́дал еси́,/ просвети́в язы́ки я́сно, Влади́мире сла́вне,/ обагре́ньми крове́й твои́х украси́вся,/ сподо́бился еси́ по́честей нетле́нных,/ предстоя́й Тро́ице,/ тем со дерзнове́нием/ моли́ спасти́ся нам.

Ин тропа́рь, глас то́йже:

Крест, я́вльшийся тебе́ с Небе́с в блиста́нии, всем пропове́дал еси́,/ просвети́в язы́ки ве́рно, Влади́мире сла́вне./ Искупле́нием же, кровьми́ твои́ми возблиста́в,/ сподо́бился еси́ мзды неле́стныя, предстоя́ Тро́ице./ Те́мже дерзнове́нно моли́ Христа́ спасти́ся нам.

Кано́н. Гла́с 4.

Пе́снь 1.

Ирмос: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л е́сть.

Припев: Святы́й му́чениче Влади́мире, моли́ Бо́га о нас.

Боже́ственнаго страда́льца дне́сь пе́сньми почти́м,/ Иоа́нна, соше́дшеся вку́пе,/ Христо́ви порабо́тав чи́сте,/ я́ко друг при́сный.

Припев: Святы́й му́чениче Влади́мире, моли́ Бо́га о нас.

И́же вся доброде́тели твоя́ прови́дяй Бог,/ вта́йне твори́мая тобо́ю, Богому́дре страда́льче,/ лико́м пра́ведных сочета́я тя, сла́вне.

Сла́ва Отцу́ и Сы́ну и Свято́му Ду́ху:

Черто́га земна́го, блаже́нне, ошаява́яся,/ му́ченическую претерпе́л еси́ я́зву, свя́те Влади́мире,/ те́мже, раби́ твои́, хва́лим тя, всеизря́дне.

И ны́не и при́сно и во ве́ки веко́в. Ами́нь.

Богородичен: Моле́ния и моли́твы, Пречи́стая, ны́не Тебе́ прино́сим,/ да́ждь нам свы́ше, Блага́я, ми́лости Твоя́,/ ра́бски мо́лим Тя, Богоблаже́нная.

Пе́снь 3.

Ирмос: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибе́жище, и утвержде́ние.

Припев: Святы́й му́чениче Влади́мире, моли́ Бо́га о нас.

Исцели́ ве́рно ко хра́му твоему́ тща́щихся/ бед, и скорбе́й, и вся́ких неду́г, му́дре.

Припев: Святы́й му́чениче Влади́мире, моли́ Бо́га о нас.

До́бре и богоче́стне ты ца́рствовал еси́ на земли́,/ испо́лнь Боже́ственнаго Све́та,/ иде́же ны́не наслажда́ешися, веселя́ся.

Сла́ва Отцу́ и Сы́ну и Свято́му Ду́ху:

Святы́м на Небесе́х соводворя́яся,/ Христо́ви моли́ся да́ти нам оставле́ние грехо́в/ и искуше́ний избавле́ние.

И ны́не и при́сно и во ве́ки веко́в. Ами́нь.

Богородичен: Ви́девше лю́дие чуде́с Твои́х бога́тыя да́ры,/ Ма́ти Бо́жия Богоневе́сто,/ те́мже Тя сла́вим.

Седа́лен, гла́с 1.

Облиста́ нам па́мять пра́веднаго,/ я́ко со́лнце на земли́, лучи́ простира́я конце́м,/ и вся правосла́вныя воздви́же во умиле́нии зва́ти ему́:/ царю́, царе́й сла́во, ве́рно тя ублажа́ем.

Сла́ва, и ны́не, Богородичен:

Всех Творца́, Сы́на Твоего́ и Зижди́теля, Пренепоро́чная Чи́стая,/ Боже́ственная Ду́хом во чре́ве зачала́ еси́ и без нетле́ния родила́ еси́./ Его́же сла́вяще, Тя хва́лим, Де́во,/ я́ко пала́та Царя́ сла́вы и ми́рови прибе́жище.

Пе́снь 4.

Ирмос: Вознесе́на Тя ви́девши Це́рковь на Кресте́,/ Со́лнце Пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди.

Припев: Святы́й му́чениче Влади́мире, моли́ Бо́га о нас.

Вся твоя́ прови́дяй Бог, всеблаже́нне,/ я́же вта́йне моли́лся еси́, Иоа́нне Богому́дре:/ Христо́с тя просла́ви/ и со все́ми святы́ми счисля́я тя, я́ко Человеколю́бец.

Припев: Святы́й му́чениче Влади́мире, моли́ Бо́га о нас.

Ны́не тя сла́вим, Богому́дре Иоа́нне сла́вне:/ Христо́ви бо порабо́тав, род, вели́чество и сла́ву вре́менную,/ му́чениче, нивочто́же вмени́л еси́.

Сла́ва Отцу́ и Сы́ну и Свято́му Ду́ху:

Пе́сньми вси согла́сно тя хва́лим,/ я́ко приста́нища Небе́сная дости́гша,/ ве́трилы воскриля́емь Креста́ благода́тию,/ му́чениче, ра́дости тезоиме́нне.

И ны́не и при́сно и во ве́ки веко́в. Ами́нь.

Богородичен: Ма́ти Пречи́стая, Де́во Богороди́тельнице,/ Тя хва́лим, вси ро́ди челове́честии,/ Тобо́ю спаса́емии, и Тя мо́лим:/ изба́ви нас от бед моли́твами Твои́ми.

Пе́снь 5

Ирмос: Ты, Го́споди, мой Свет,/ в мир прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя.

Припев: Святы́й му́чениче Влади́мире, моли́ Бо́га о нас.

Побе́ду тебе́ Христо́с свы́ше подаде́ и кре́пость на сопроти́вныя,/ Богому́дре Иоа́нне всеблаже́нне.

Припев: Святы́й му́чениче Влади́мире, моли́ Бо́га о нас.

О блаже́нне, страда́льцев единонра́вне,/ сла́во пра́ведник,/ и нам, хва́лящим тя, предста́тель непребори́мый.

Сла́ва Отцу́ и Сы́ну и Свято́му Ду́ху:

Ви́девше ве́рнии чуде́с дарова́ния, Влади́мире че́стне,/ от свяще́ннаго ковче́га твоего́ точа́щаяся исцеле́ния.

И ны́не и при́сно и во ве́ки веко́в. Ами́нь.

Богородичен: О Влады́чице Богома́ти Чи́стая,/ при́зри на нас ны́не, недосто́йныя,/ ве́рою и любо́вию воспева́ющия Тя.

Пе́снь 6.

Ирмос: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию.

Припев: Святы́й му́чениче Влади́мире, моли́ Бо́га о нас.

Свы́ше Христо́с тебе́ вене́ц да́рует, о Иоа́нне всеблаже́нне,/ ра́ди в бде́ниих моли́тв твои́х,/ я́же вта́йне Бо́гу соверша́л еси́, благода́тне.

Припев: Святы́й му́чениче Влади́мире, моли́ Бо́га о нас.

Побе́ду тебе́ всех Бог да́рует, Иоа́нне Богому́дре,/ и мы почерпа́ем исцеле́ния от святы́х твои́х моще́й.

Сла́ва Отцу́ и Сы́ну и Свято́му Ду́ху:

Черто́га вре́меннаго избе́гл еси́, сла́вне,/ и греха́ сего́, и бесе́ды же́нския,/ жела́нием Креста́ в главу́ усече́ся.

И ны́не и при́сно и во ве́ки веко́в. Ами́нь.

Богородичен: Еди́на сло́вом Сло́во породила́ еси́,/ И́же безслове́сия вся́каго челове́ка изба́вльшаго/ Го́рняго Своего́ Ца́рствия прича́стники показа́вшаго.

Конда́к, гла́с 8.

Я́ко сокро́вище многоце́нное/ и исто́чник, точа́щ земны́м то́ки,/ неду́ги очища́ющия,/ нам подаде́ся те́ло твое́ свяще́нное,/ боле́знем разли́чным подаю́ще исцеле́ние/ и благода́ть Боже́ственную притека́ющим к нему́, да зове́м ти:/ ра́дуйся, кня́же Влади́мире.

И́кос:

Свы́ше подаде́ся тебе́ ца́рствия держа́ва, всечу́дне Иоа́нне, и Безпло́тных гла́сы,/ Или́рии ве́ру пропове́дал еси́ и вся просвети́л еси́./ Тем зове́м с любо́вию тебе́ такова́я:/ ра́дуйся, ве́рных князе́й сла́во;/ ра́дуйся, страда́льцев украше́ние;/ ра́дуйся, сете́й вра́жиих разруше́ние;/ ра́дуйся, догма́тов Христо́вы ве́ры утвержде́ние;/ ра́дуйся, возвыше́ние князе́й благочести́вых;/ ра́дуйся, глубине́ смире́ния вод Небе́сных;/ ра́дуйся, стяжа́вый ре́вность Предте́чеву;/ ра́дуйся, я́ко в рука́х твои́х жре́бий держи́ши;/ ра́дуйся, звездо́, светя́щая конце́м;/ ра́дуйся, исто́чниче Боже́стваннаго оставле́ния;/ ра́дуйся, и́мже пре́лесть угаси́ся;/ ра́дуйся, и́мже ве́ра утверди́ся;/ ра́дуйся, кня́же Влади́мире.

Пе́снь 7.

Ирмос: В пещи́ авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми взыва́ху:/ благослове́н еси́ в хра́ме сла́вы Твоея́, Го́споди.

Припев: Святы́й му́чениче Влади́мире, моли́ Бо́га о нас.

Ны́не в Вы́шнее Ца́рство всели́ тя Христо́с,/ благоче́стно послужи́вша Тому́, блаже́нне, и ве́рно зову́ща:/ благослове́н еси́, Бо́же оте́ц на́ших.

Припев: Святы́й му́чениче Влади́мире, моли́ Бо́га о нас.

Облада́еши все́ю Илли́рическою земле́ю, сла́вне,/ владе́я в ней и взыва́я:/ благослове́н еси́, Бо́же оте́ц на́ших.

Сла́ва Отцу́ и Сы́ну и Свято́му Ду́ху:

От Вы́шних тя Госпо́дь просла́ви, Влади́мире,/ и мы любо́вию пра́зднуем па́мять твою́, с тобо́ю взыва́юще:/ благослове́н еси́, Бо́же оте́ц на́ших.

И ны́не и при́сно и во ве́ки веко́в. Ами́нь.

Богородичен: Воспева́ем Тя, Влады́чице,/ всех Зижди́теля на объя́тиях носи́ла еси́;/ благослове́нна Ты в жена́х, Пренепоро́чная Присноде́во.

Пе́снь 8.

Ирмос: Ру́це распросте́р, Дании́л/ льво́в зия́ния в ро́ве затче́;/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели, о́троцы, взыва́юще:/ благослови́те, вся дела́ Госпо́дня, Го́спода.

Припев: Святы́й му́чениче Влади́мире, моли́ Бо́га о нас.

Возжела́л еси́ Крест Христо́в, сла́вне,/ и благода́ть прия́л еси́ цели́ти притека́ющия ти те́плою ве́рою и вопию́щия:/ вся дела́, по́йте Го́спода.

Припев: Святы́й му́чениче Влади́мире, моли́ Бо́га о нас.

Вся прови́дяй Бог дея́ния твоя́/ ны́не тебе́ дарова́ чуде́с пресла́вная, Ему́же пое́м:/ вся дела́, по́йте Го́спода.

Припев: Святы́й му́чениче Влади́мире, моли́ Бо́га о нас.

Па́мять твою́, Богому́дре, вси ве́рнии, пе́сньми сла́вим,/ и свято́е успе́ние твое́ воспева́ем,/ и Рожде́нному от Де́вы вопие́м:/ вся дела́, по́йте Го́спода.

Сла́ва Отцу́ и Сы́ну и Свято́му Ду́ху:

Нас, хва́лящих тя, Богому́дре,/ и притека́ющих ко хра́му твоему́, не пре́зри, но научи́ вопи́ти:/ Го́спода по́йте, дела́, и превозноси́те во ве́ки.

И ны́не и при́сно и во ве́ки веко́в. Ами́нь.

Богородичен: Неве́сто Неневе́стная, Госпоже́ Пречи́стая, Ма́ти безму́жная,/ славосло́вим Тя, Всесвята́я, вопию́ще:/ вся дела́, по́йте Го́спода.

Песнь 9

Ирмос: Ка́мень нерукосе́чный/ от несеко́мыя го́ры, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́./ Тем, веселя́щеся, Тя, Богоро́дице, велича́ем.

Припев: Святы́й му́чениче Влади́мире, моли́ Бо́га о нас.

Приими́ моли́твы, всеблаже́нне, от пою́щих тя с любо́вию/ и да́ждь твою́ благода́ть рабо́м твои́м.

Припев: Святы́й му́чениче Влади́мире, моли́ Бо́га о нас.

Царю́ Иоа́нне Богому́дре,/ нам, ве́рою приходя́щим ти,/ разреше́ние грехо́в испроси́ у Христа́ Бо́га.

Припев: Святы́й му́чениче Влади́мире, моли́ Бо́га о нас.

Побе́ду тебе́ всех Влады́ка подае́т свы́ше, страстоте́рпче свя́те,/ ты же не преста́й о нас моля́ся.

Припев: Святы́й му́чениче Влади́мире, моли́ Бо́га о нас.

Ви́дел еси́, я́ко други́й Константи́н, блаже́нне, Крест Госпо́день,/ его́же вожде́нием возше́л еси́ на ме́сто,/ иде́же ны́не притека́ющии прие́млют исцеле́ния.

Сла́ва Отцу́ и Сы́ну и Свято́му Ду́ху:

Пострада́л еси́ зако́нно любо́вию всех Царя́,/ и возсия́л еси́ в ми́ре заря́ми исцеле́ний,/ и тьму́ пре́лести отгна́л еси́, Правосла́вием удобря́емь.

И ны́не и при́сно и во ве́ки веко́в. Ами́нь.

Богородичен: Изба́ви нас от бед находя́щих/ и Го́рняго блаже́нства досто́йны покажи́, Богороди́тельнице,/ Тя велича́ющих.

Свети́лен

Христо́с возвели́чив тя в чудесе́х,/ я́коже Своего́ слугу́, Влади́мире-Иоа́нне,/ Сего́ моли́ да́ти грехо́в оставле́ние/ в пе́снех всечестну́ю па́мять твою́ соверша́ющим.

Сла́ва, и ны́не, Богоро́дичен:

Мари́е Чисте́йшая, злата́я кади́льнице,/ невмести́маго Божества́ прия́телище бы́вшее,/ в не́мже Оте́ц благоволи́, Сын же всели́ся,/ и Дух Святы́й, осени́в Тя, Отрокови́це, показа́ Богоро́дицу.

Молитва

О святы́й уго́дниче Бо́жий, великому́чениче Влади́мире! По́двигом до́брым подвиза́вся на земли́, восприя́л еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже взира́юще на святы́й твой о́браз, ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.