30 июня.

Канон святым мученикам Мануилу, Савелу и Исмаилу.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Му́ченицы Твои́, Го́споди, во страда́ниих свои́х венцы́ прия́ша нетле́нныя от Тебе́, Бо́га на́шего: иму́ще бо кре́пость Твою́, мучи́телей низложи́ша, сокруши́ша и де́монов немощны́я де́рзости. Те́х моли́твами спаси́ ду́ши на́ша.

Канон святы́х, гла́с 8.

Пе́снь 1.

Ирмос: Истря́сшему в мо́ри мучи́тельство фарао́не и Изра́иля су́шею наста́вльшему, пои́м Христу́, я́ко просла́вися во ве́ки.

Припев: Святии му́ченицы, моли́те Бо́га о нас.

Пое́м пе́снь вси́ Зижди́телю и Вседержи́телю Бо́гу, страстоте́рпцев досто́йно поче́тшему, сла́внаго Ману́ила и страда́вшия с ни́м, во ве́ки.

Припев: Святии му́ченицы, моли́те Бо́га о нас.

Оте́ческое служе́ние отве́ргше огнепоклоне́ние, гони́теля стремле́ние возрази́ша и бы́ша страда́льцы е́же в Тро́ице честны́м испове́данием.

Сла́ва Отцу́ и Сы́ну и Свято́му Ду́ху:

Яко единочи́слени Тро́ице, пострада́вше Ея́ ра́ди, достоле́пно венча́стеся, му́ченицы, моли́теся у́бо непреста́нно изба́вити все́х на́с от бе́д.

И ны́не и при́сно и во ве́ки веко́в. Ами́нь.

Богородичен: Еже от Де́вы рождество́ вы́ше естества́, Рожде́йся утаи́ кня́зя тмы́, я́коже пи́шет, и отве́рзе Еде́м Богоро́дицу Ю испове́дающим.

Пе́снь 3.

Ирмос: Не́сть свя́т, я́ко Госпо́дь, и не́сть пра́веден, я́ко Бо́г на́ш, Его́же пое́т вся́ тва́рь: не́сть пра́веден па́че Тебе́, Го́споди.

Припев: Святии му́ченицы, моли́те Бо́га о нас.

Не́сть, святи́и, по достоя́нию восхвали́ти свяще́нное ва́ше страда́ние, и́мже увязо́стеся небоплете́нными венцы́, Бо́гу, Изба́вителю на́шему, моля́щеся спасти́ся на́м.

Припев: Святии му́ченицы, моли́те Бо́га о нас.

Огне́м опаля́еми, неоскудева́еми умо́м, ра́нами око́вани, боле́зньми изощре́ни, небокова́ннии мечи́ бы́сте, му́ченицы, на нечести́выя враги́.

Сла́ва Отцу́ и Сы́ну и Свято́му Ду́ху:

Посрами́ся томи́тель, паде́нием ужа́сным па́дся отсту́пник и беззако́нник, Христу́ укре́пльшу му́ченик тро́ицу до́бле ополчи́тися на нече́стие его́.

И ны́не и при́сно и во ве́ки веко́в. Ами́нь.

Богородичен: Саму́ю Тебе́ приво́дим, ро́ждшую Тя́ пло́тию, на мольбу́ держа́ве Твое́й, Христе́ Бо́же на́ш, и му́чеников собо́ры, те́х мольба́ми умири́ ми́р Тво́й.

Седа́лен, гла́с 1.

Яко трисве́тлая свеща́, огне́м Тро́ическим вже́гшеся, пе́рсов, огню́ служа́щих, тму́ попали́сте и Христа́ со дерзнове́нием пропове́дасте, возсия́вшаго от Неискусому́жныя Де́вы, и блаже́нную прия́ете кончи́ну, тричи́сленнии му́ченицы.

Сла́ва, и ны́не, Богородичен:

Наста́ви ны́ на пу́ть покая́ния, укло́ншияся при́сно к безпу́тием зо́л и Преблага́го прогне́вавшия Го́спода, Неискусобра́чная благослове́нная Мари́е, прибе́жище отча́янных челове́ков, Бо́жие жили́ще.

Пе́снь 4.

Ирмос: Из горы́ приосене́нныя, Сло́ве, проро́к, еди́ныя Богоро́дицы, хотя́ща воплоти́тися богови́дно усмотри́ и со стра́хом славосло́вяше си́лу Твою́.

Припев: Святии му́ченицы, моли́те Бо́га о нас.

От ко́рене волше́бна тро́ица благослове́нная, отца́ неблагочести́ва, ма́тере же благоче́ствующия, му́ченик прозябе́, бра́тия, возрасти́вшая плоды́ благоче́стия.

Припев: Святии му́ченицы, моли́те Бо́га о нас.

Зве́зды неле́стны бы́сте ве́ры, я́ко со́лнце, я́ве возсия́вше ми́ру, трисия́нная тро́ица, светоне́сный Ману́ил, Саве́л и со Исма́илом.

Сла́ва Отцу́ и Сы́ну и Свято́му Ду́ху:

Моли́теся трие́, я́коже еди́н, Тро́ице да́ти очище́ние и оставле́ние согреше́ний творя́щим ве́рою и́стинною, святи́и му́ченицы, па́мять ва́шу.

И ны́не и при́сно и во ве́ки веко́в. Ами́нь.

Богородичен: Пала́та красна́ все́х Царя́ показа́ся вои́стинну, и престо́л Вы́шняго, и вы́шши тва́ри Богома́ти, и Предста́тельница ду́ш на́ших.

Пе́снь 5

Ирмос: От но́щи неве́дения богове́дением просвети́вый концы́, просвети́ мя у́тром человеколю́бия Твоего́, Го́споди.

Припев: Святии му́ченицы, моли́те Бо́га о нас.

Достодо́лжно вси́ му́чеников соверша́ем па́мять: си́х бо кро́вию ве́сь освяти́ся мирски́й возду́х.

Припев: Святии му́ченицы, моли́те Бо́га о нас.

Нощеборю́щую дре́вле ве́рных Це́рковь, му́ченицы сию́ просвети́ша заре́ю пра́выя и́х ве́ры.

Сла́ва Отцу́ и Сы́ну и Свято́му Ду́ху:

Авраа́мова не́дра му́ченическия ду́ши прия́ша, и́миже, я́коже о́браз напи́сан, вы́шнее Ца́рство пропове́дается.

И ны́не и при́сно и во ве́ки веко́в. Ами́нь.

Богородичен: Яже от Тро́ицы еди́наго воплоще́нна ро́ждши Бо́га вои́стинну, Богома́ти, моли́ бе́д изба́вити рабы́ Твоя́.

Пе́снь 6.

Ирмос: Ри́зу мне́ пода́ждь све́тлу, одея́йся све́том, я́ко ри́зою, многоми́лостиве Христе́ Бо́же на́ш.

Припев: Святии му́ченицы, моли́те Бо́га о нас.

Избего́ша скве́рны мы́сленныя святи́и му́ченицы, спа́сшеся без волне́ния, окормле́нием Креста́ наставля́еми.

Припев: Святии му́ченицы, моли́те Бо́га о нас.

Кро́ви ва́ша, зи́нувши, земля́ покры́, святи́и, и внеза́пу мо́щи в до́льних сокро́вищах сокрове́ни бы́ша.

Сла́ва Отцу́ и Сы́ну и Свято́му Ду́ху:

Умири́ ми́р, Бо́же, и спаси́, я́ко Милосе́рд, ста́до Твое́ неврежде́но моли́твами сла́вных страстоте́рпец Твои́х.

И ны́не и при́сно и во ве́ки веко́в. Ами́нь.

Богородичен: Без си́мене заче́нши Бо́га, Зижди́теля естества́ нетли́нно родила́ еси́, Того́ моли́, Богома́ти, спасти́ся на́м.

Конда́к, гла́с 2.

Ве́рою Христо́вою уя́звлени, всеблаже́ннии, и Сего́ ве́рно испи́вше ча́шу, пе́рсская служе́ния и де́рзость на зе́млю низложи́сте, Тро́ицы равночи́сленнии, моли́твы творя́ще о все́х на́с.

Икос:

Иже испе́рва боже́ственною Твое́ю добро́тою, Иису́се Жизнода́вче, озари́ мя я́ве, я́ко да воспою́ му́ченики, за Тя́ подви́гшияся да́же до сме́рти, и вра́жию всю́ кре́пость низложи́вшия до́бле, и и́дольския ле́сти отбе́гшия, кре́стною си́лою укрепля́еми. Му́ки бо претерпе́вше, Тро́ическую сла́ву восприя́ша, Того́ у́бо о все́х моли́те.

Пе́снь 7.

Ирмос: В нача́ле зе́млю основа́вый, и небеса́ сло́вом утверди́вый, благослове́н еси́ во ве́ки, Го́споди, Бо́же оте́ц на́ших.

Припев: Святии му́ченицы, моли́те Бо́га о нас.

Трие́ от еди́наго све́та свети́льники возжже́ Христо́ва светоно́сная Це́рковь, венцено́сца и победоно́сца сла́внаго Ману́ила и страда́вшия с ни́м.

Припев: Святии му́ченицы, моли́те Бо́га о нас.

Халде́йское оста́вльше оте́чество, волше́бныя отбего́ша ве́ры трие́ Тро́ице честни́и ору́жницы, вопию́ще: благослове́н еси́ во ве́ки, Го́споди Бо́же оте́ц на́ших.

Сла́ва Отцу́ и Сы́ну и Свято́му Ду́ху:

Трие́ во огни́, и́же о Аза́рии, халде́йския избего́ша слу́жбы, и трие́ ору́жницы, и́же от Перси́ды, пострада́вше по Христе́, и́же о Ману́иле.

И ны́не и при́сно и во ве́ки веко́в. Ами́нь.

Богородичен: В жена́х не роди́ де́ва, то́кмо Ты́ еди́на, Де́во Богоро́дице: отца́ бо до́ле и ма́тере горе́, Младе́нцу вся́ко не бе́: сугу́б бо бе́ Христо́с.

Пе́снь 8.

Ирмос: На горе́ святе́й просла́вльшася, и в купине́ огне́м Присноде́вы Моисе́ови та́йну я́вльшаго, Го́спода по́йте и превозноси́те во вся́ ве́ки.

Припев: Святии му́ченицы, моли́те Бо́га о нас.

Воздержа́нием вжили́вше те́ло, благоче́стием укре́пльше ду́х, страда́льческое совокупи́ша все́ удержа́ние к неви́димым князе́м тмы́ Христо́вы страстоте́рпцы.

Припев: Святии му́ченицы, моли́те Бо́га о нас.

Якоже цве́ты, венцы́ венча́ема му́ченик Христо́ва Це́рковь неве́стническою оде́ждою оде́яся, кро́вию омоче́ною, я́ко от нетле́ния обагре́ния му́ченик.

Сла́ва Отцу́ и Сы́ну и Свято́му Ду́ху:

Ча́сти, Христе́, спаса́емых, и жре́бия улучи́ти Твои́х му́ченик, и неотъе́млемыя сла́вы сподо́бил еси́ испове́дающих еди́наго Тя́, Сы́на Отча и Де́вы.

И ны́не и при́сно и во ве́ки веко́в. Ами́нь.

Богородичен: Яко еди́наго ро́ждши от Тро́ицы, моля́щи не преста́й, Богоро́дице, да изба́вимся от беззако́ний на́ших и сподо́бимся явле́ния Его́ и Ца́рствия.

Песнь 9

Ирмос: Проявле́нное на горе́ законополо́жнику во огни́ и купине́, Рождество́ Присноде́вы, в на́ше ве́рных спасе́ние, пе́сньми немо́лчными велича́ем.

Припев: Святии му́ченицы, моли́те Бо́га о нас.

Трегу́бным у́жем ва́с совокупи́ благода́ть, Ману́иле, Саве́ле и Исма́иле, незы́блемою ве́рою собра́вши единому́дренный нра́в и́же по Христе́ испове́дания ва́шего.

Припев: Святии му́ченицы, моли́те Бо́га о нас.

Иулиа́на смра́днаго и отсту́пника, льсти́ваго мучи́теля треплете́нною пра́щею победи́сте, Тро́ицы ору́жницы, трие́ увязо́стеся венцы́ вку́пе.

Сла́ва Отцу́ и Сы́ну и Свято́му Ду́ху:

Достопа́мятное чу́до му́ченик, по кончи́не бо зия́нием земля́ покры́вши, пома́ле, я́ко светолу́чны зве́зды, от земны́х не́др облиста́ша.

И ны́не и при́сно и во ве́ки веко́в. Ами́нь.

Богородичен: Яже от Твое́ю боку́ ро́ждшая несказа́нным сло́вом е́же от Безнача́льна Отца́ пресу́щное Сло́во, Богома́ти, и в ма́терех Де́ва, спаса́й ду́ши воспева́ющих Тя́.

Свети́лен:

Чу́дная и треплете́нная во плени́цах златы́х, му́ченик наста́ всесвяще́нная па́мять: вели́каго вои́стинну Ману́ила, и Саве́ла, и Исма́ила пресла́вных, и все́х ве́рных сердца́ озаря́ет све́том и ду́ши весели́т.

Сла́ва, и ны́не, Богородичен:

Яко иму́щи милосе́рдие и ми́лость вели́ку, при́зри, Всепе́тая Богоро́дице Де́во, на мое́ смире́ние, и страсте́й молву́ и собла́зн жития́ разори́, Отрокови́це, и огня́ гее́нскаго изба́ви мя́ Твои́ми моли́твами.

Молитва

Святи́и му́ченицы Ману́иле, Саве́ле и Исма́иле! При́зрите с Небе́снаго черто́га на тре́бующих ва́шей по́мощи и не отве́ргните проше́ний на́ших; но я́ко при́снии благоде́тели и хода́таи на́ши, моли́те Христа́ Бо́га, да человеколюби́в и многоми́лостив сый, сохрани́т нас от вся́каго лю́таго обстоя́ния: от тру́са, пото́па, огня́, меча́, наше́ствия иноплеме́нников и междоусо́бныя бра́ни. Да не осу́дит нас гре́шных по беззако́ниям на́шим, и да не во зло обрати́м блага́я, да́руемая нам от всеще́драго Бо́га, но во сла́ву свята́го и́мени Его́ и в прославле́ние кре́пкаго ва́шего заступле́ния. Да моли́твами ва́шими даст нам Госпо́дь мир по́мыслов, воздержа́ние от па́губных страсте́й и от вся́кия скве́рны; и да укрепи́т во всем ми́ре Свою́ еди́ну Святу́ю, Собо́рную и Апо́стольскую Це́рковь, ю́же стяжа́л есть честно́ю Свое́ю кро́вию. Моли́теся приле́жно, святи́и му́ченицы, да утверди́т Христо́с Бог во Святе́й Свое́й Правосла́вной Це́ркви живы́й дух пра́выя ве́ры и благоче́стия; да вси чле́ны ея́, чи́стии от суему́дрия и суеве́рия, ду́хом и и́стиною покланя́ются Ему́ и усе́рдно пеку́тся о соблюде́нии Его́ за́поведей; да мы вси в ми́ре и благоче́стии поживе́м в настоя́щем ве́це и дости́гнем блаже́нныя ве́чныя жи́зни на Небеси́, благода́тию Го́спода на́шего Иису́са Христа́, Ему́же подоба́ет вся́кая сла́ва, честь и держа́ва со Отце́м и Святы́м Ду́хом, ны́не и при́сно и во ве́ки веко́в. Ами́нь.