2 июня.
Канон преподобному Стефану Пиперскому
![Преподобному Стефану, Пиперскому Преподобному Стефану, Пиперскому](img_i/007.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропа́рь, гла́с 4:
Яко дре́вним святы́м отце́м подража́тель, по́стническое житие́ возлюби́вый, посто́м, и моли́твами и слеза́ми напая́емь, себе́ огради́л еси́. Те́мже и по преставле́нии твое́м те́ло твое́ яви́ся це́ло и благоуха́нно, е́же с любо́вию целу́ем, Стефа́не о́тче на́ш, моли́ Христа́ Бо́га, спасти́ся душа́м на́шим.
Кано́н преподо́бнаго, гла́с 4.
Пе́снь 1.
Ирмос: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зными Моисе́овыма рука́ма Амали́кову си́лу в пусты́ни победи́л е́сть.
Припев: Преподо́бне о́тче Стефа́не, моли́ Бо́га о нас.
Пода́ждь ми, Сло́ве Бо́жий, сло́во, отве́рзи уста́ моя́ недосто́йная и очи́сти се́рдце мое́, я́ко да возмогу́ по достоя́нию воспе́ти преподо́бнаго уго́дника Твоего́.
Припев: Преподо́бне о́тче Стефа́не, моли́ Бо́га о нас.
Са́м Ты́, Христе́, просла́вил еси́ Стефа́на, да́руй и мне́ е́же мощи́, просла́вити я́ко подоба́ет, честно́е сие́ торжество́ его́.
Сла́ва Отцу́ и Сы́ну и Свято́му Ду́ху:
Све́том боже́ственным просвети́л еси́ се́рдце свое́, преподо́бне, от ю́ности своея́ удали́лся еси́ мирска́го пристра́стия, те́м и небе́сная восприя́л еси́ наслажде́ния.
И ны́не и при́сно и во ве́ки веко́в. Ами́нь.
Богородичен: Без се́мене, Отчею во́лею, от Боже́ственнаго Ду́ха зачала́ еси́ Сы́на, и пло́тию родила́ еси́ Бо́га, на́шего ра́ди спасе́ния.
Пе́снь 3.
Ирмос: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище, и утвержде́ние.
Припев: Преподо́бне о́тче Стефа́не, моли́ Бо́га о нас.
Возмуще́ния жите́йскаго избе́г, иска́л еси́ ти́хаго приста́нища, оба́че не име́я его́ в оби́тели Мора́чстей от злы́х ага́рян, всели́лся еси́ в пеще́ре Терма́нстей.
Припев: Преподо́бне о́тче Стефа́не, моли́ Бо́га о нас.
Воздержа́нием пло́ть свою́ удручи́вый, в бде́нии нощны́ми возвы́сил еси́ ду́шу свою́, побежда́я стремле́ния лю́тых страсте́й, блаже́нне Стефа́не.
Сла́ва Отцу́ и Сы́ну и Свято́му Ду́ху:
Оста́вль пеще́ру, зане́ в не́й не име́л еси́ поко́я, обре́л еси́ бли́з гра́да Спу́жа лу́чшее ме́сто, зово́мое Збо́рна Гла́вица, иде́же всели́лся еси́, о́тче Стефа́не.
И ны́не и при́сно и во ве́ки веко́в. Ами́нь.
Богородичен: Ве́дуще, благоче́стно пропове́дуем Тя́, и́стинную Бо́жию Ма́терь, Пренепоро́чная, Тобо́ю бо к на́м Зижди́тель прибли́жися.
Седа́лен, гла́с 8:
Оте́чество свое́ оста́вил еси́ и, я́коже Авраа́м други́й пресе́льник бы́в, кре́ст сво́й взе́м, Христу́ после́довал еси́, пло́ть свою́ воздержа́нием и труды́ умертви́л еси́, и по сме́рти от Бо́га благода́ть прия́л еси́ неду́ги исцеля́ти, с ве́рою приходя́щим к ра́це моще́й твои́х, преподо́бне Стефа́не. Те́мже моли́ Христа́ Бо́га, согреше́нием оставле́ние дарова́ти все́м, чту́щим любо́вию святу́ю па́мять твою́.
Сла́ва, и ны́не, Богородичен:
Стена́ непобеди́мая на́м, христиа́ном, еси́, Богоро́дице Де́во: к Тебе́ [бо] прибега́юще, невреди́ми пребыва́ем и, па́ки согреша́юще, и́мамы Тя́ моли́твенницу. Сего́ ра́ди, благодаря́ще, вопие́м Ти́: ра́дуйся, Благода́тная, Госпо́дь с Тобо́ю.
Пе́снь 4.
Ирмос: Вознесе́на Тя́ ви́девши Це́рковь на Кресте́, Со́лнце Пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.
Припев: Преподо́бне о́тче Стефа́не, моли́ Бо́га о нас.
Мо́ря стра́стнаго пучи́ною обурева́емии, к Тебе́, Иису́се всеблаги́й, прибега́юще, вопие́м: от тиме́ния страсте́й изба́ви на́с, да в тишине́ ду́ха уго́днику Твоему́ пе́снь хвале́бную принесе́м, его́же просла́вил еси́.
Припев: Преподо́бне о́тче Стефа́не, моли́ Бо́га о нас.
Страннолю́бие свяжа́л еси́, и любо́вь к Бо́гу и бли́жним в се́рдце свое́м всели́л еси́, преподо́бне Стефа́не.
Сла́ва Отцу́ и Сы́ну и Свято́му Ду́ху:
Благода́тию свы́ше, блиста́еши чудесы́, Стефа́не, о́тче на́ш, сего́ ра́ди молю́ся ти́: грехми́ отемне́нное се́рдце мое́, све́том моли́тв твои́х просвети́, я́ко да и а́з благода́рственно воспою́ па́мять твою́.
И ны́не и при́сно и во ве́ки веко́в. Ами́нь.
Богородичен: Сни́де, я́ко до́ждь на руно́, во утро́бу Твою́ Госпо́дь, я́коже дре́вле рече́ проро́к, Всенепоро́чная, Ему́же взыва́ем: сла́ва си́ле Твое́й, Го́споди.
Пе́снь 5
Ирмос: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.
Припев: Преподо́бне о́тче Стефа́не, моли́ Бо́га о нас.
Честно́е житие́ от ю́ности твоея́ потща́лся еси́ сохрани́ти, те́мже ви́дев сие́ Пресвяты́й Ду́х, всели́ся в тя́, преподо́бне о́тче.
Припев: Преподо́бне о́тче Стефа́не, моли́ Бо́га о нас.
За́поведи Госпо́дни сохраня́я в се́рдце свое́м, пропове́дник Ева́нгелия наро́ду своему́ бы́л еси́, возводя́ его́ к небеси́, и́же слу́шая тя́, моли́твенно призыва́ет с тобо́ю, о́тче Стефа́не, пресвято́е и́мя Христо́во.
Сла́ва Отцу́ и Сы́ну и Свято́му Ду́ху:
Ме́сто освяти́ся, в не́мже честны́я мо́щи твоя́ положи́шася, преподо́бне, и по исхо́де седми́х ле́т изнесе́ны бы́ша из гро́ба и, чудесы́ просла́вленныя, положе́ни бы́ша в це́рковь Рождества́ Пресвяты́я Богоро́дицы, имену́емыя Пи́перская ке́ллия.
И ны́не и при́сно и во ве́ки веко́в. Ами́нь.
Богородичен: Влады́чице всея́ тва́ри, Богоро́дице Де́во Мари́е, неизрече́нно ро́ждши Бо́га Сло́ва, Его́же, Пречи́стая, моли́, безслове́сных страсте́й на́с изба́вити, да в ми́ре се́рдцем и усты́ воспева́ем Его́ пресвято́е и́мя.
Пе́снь 6.
Ирмос: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.
Припев: Преподо́бне о́тче Стефа́не, моли́ Бо́га о нас.
Ища́ ми́рнаго приста́нища, преподо́бне о́тче Стефа́не, преходи́л еси́ из оби́тели свята́го Луки́ в Мора́чcкую оби́тель, иде́же прия́л еси́ постриже́ние, зате́м и рукоположе́ние. Оба́че, не име́я зде́ поко́я от ага́рян, преше́л еси́ в пеще́ру Терма́нскую, я́же в пле́мени Ро́вачстем.
Припев: Преподо́бне о́тче Стефа́не, моли́ Бо́га о нас.
Всели́вся зде́, обходи́л еси́ вся́ селе́ния благочести́вых люде́й Пи́перския о́бласти, уча́ все́х ве́ре и благоче́стию.
Сла́ва Отцу́ и Сы́ну и Свято́му Ду́ху:
Возлюби́в лю́ди сия́ и ме́сто, яви́лся еси́, о́тче, свои́м духо́вным ча́дом, те́плое жела́ние свое́, име́ти зде́ себе́ ке́ллию, лю́ди же и це́рковь. Еже бы́сть от люде́й с любо́вию испо́лнено.
И ны́не и при́сно и во ве́ки веко́в. Ами́нь.
Богородичен: Твою́ по́мощь да́ждь ми́, и изба́ви мя́ от бе́д, и скорбе́й, и прегреше́ний мои́х, Яже ро́ждши все́х Избавле́ние.
Конда́к, гла́с 7:
Прииди́те вси́ правосла́вия пито́мцы, в Скенде́рии живу́щии наро́ды, в си́х времене́х после́дних, свети́ло ве́ры показа́вшаго, сего́ преподо́бнаго Стефа́на, восхва́лим Христа́ Бо́га на́шего, к Нему́же вопие́м: изба́ви на́с от вра́г ве́ры на́шея, да в ми́ре воспева́ем: Аллилу́ия.
Икос:
От благочести́вых роди́телей благопло́дный пло́д яви́лся еси́, о́тче Стефа́не, Христо́вы за́поведи измла́да возлюби́л еси́, удаля́яся ми́ра сего́ наслажде́ния: посто́м, бде́нием и моли́твами немо́лчная славосло́вия Пресвяте́й Тро́ице возноси́л еси́ о наро́де свое́м многострада́льнем. Сего́ ра́ди и мы́, велича́юще Пресвяту́ю Тро́ицу — Бо́га на́шего, вопие́м ти́: ра́дуйся, Ангеле земны́й и челове́че небе́сный, Ангелы удиви́вый чистото́ю жития́ твоего́, и челове́ки научи́вый благоугожда́ти Бо́гу; ра́дуйся, свети́льниче по́лный Боже́ственныя благода́ти, сия́я чудесы́ и си́лы озаря́я души́ челове́ческия; ра́дуйся, при́сный на́ш моли́твенниче о душа́х на́ших ко Го́споду [и] засту́пниче, мо́лиши бо ся непреста́нно о все́х на́с, бли́жних свои́х.
Пе́снь 7.
Ирмос: Юноши три́ в Вавило́не, веле́ние мучи́телево на бу́йство прело́жше, посреде́ пла́мене вопия́ху: благослове́н еси́, Го́споди, Бо́же оте́ц на́ших.
Припев: Преподо́бне о́тче Стефа́не, моли́ Бо́га о нас.
Якоже Ло́т дре́вле Содо́ма избеже́, та́ко и ты́, преподо́бне, оста́вил еси́ свое́ родно́е ме́сто, ища́ приста́нища ми́рнаго, везде́ вопия́: благослове́н еси́, Го́споди, Бо́же оте́ц на́ших.
Припев: Преподо́бне о́тче Стефа́не, моли́ Бо́га о нас.
Си́лою Христо́вою вооружи́вся, преподо́бне, стра́шен яви́лся еси́ бесо́м и враго́м непоро́чныя ве́ры на́шея, взе́м же кре́ст сво́й, после́довал еси́ Христу́, вопия́ немо́лчно: благослове́н еси́, Го́споди, Бо́же оте́ц на́ших.
Сла́ва Отцу́ и Сы́ну и Свято́му Ду́ху:
Храня́ще и́стинное правове́рие по́сле ко́совскаго пораже́ния, хра́брый наро́д се́рбский в Че́рней Горе́, возра́довася, егда́ при́иде в Пи́перах преподо́бный, ему́же воздвиго́ша ке́ллию и хра́м, иде́же ку́пно велича́ху Бо́га, зову́ще: благослове́н еси́, Го́споди, Бо́же оте́ц на́ших.
И ны́не и при́сно и во ве́ки веко́в. Ами́нь.
Богородичен: Благослове́н вои́стинну Пло́д пречи́стаго чре́ва Твоего́, Его́же славосло́вят небе́сныя си́лы и преподо́бных собо́ры восхваля́ют, Изба́вльшаго на́с дре́вния кля́твы, благослове́нная Богома́ти.
Пе́снь 8.
Ирмос: Вся́ дела́ Бо́жия и вся́ тва́рь, благослови́те Го́спода, я́ко челове́ком от земли́ возсия́ Све́т, и вселе́нную всю́ просвети́, и жи́знь ве́чную ми́ру дарова́, по́йте, лю́дие, и превозноси́те Его́ во ве́ки.
Припев: Преподо́бне о́тче Стефа́не, моли́ Бо́га о нас.
Изде́тска потща́лся еси́, преподо́бне Стефа́не, науче́н роди́тельми, свою́ со́весть, и се́рдце и ду́шу предста́вити Го́споду, сего́ ра́ди и Христо́с тя́ чудесы́ прославля́ет. Те́м и вопие́ши: Го́спода по́йте и превозноси́те во вся́ ве́ки.
Припев: Преподо́бне о́тче Стефа́не, моли́ Бо́га о нас.
Оби́лием благода́ти и одожде́нием слове́с твои́х, бли́жния лю́ди своя́ напои́л еси́, и си́м мно́г пло́д Влады́це Христу́ возрасти́л еси́, богому́дре.
Сла́ва Отцу́ и Сы́ну и Свято́му Ду́ху:
Яко Ангела тя́ ве́мы, зане́ ангелоподо́бно на земли́ пожи́л еси́, чистоту́ души́ и те́ла соблю́л еси́, ны́не же, о́тче Стефа́не, водворя́ешися душе́ю та́мо, иде́же ничто́же скве́рно вхо́дит, на земли́ же нетле́нным свои́м те́лом [пребыва́еши] и, с ве́рными свои́ми людми́, пое́ши немо́лчную пе́снь Бо́гу, Препе́тому и Превозноси́мому во ве́ки.
И ны́не и при́сно и во ве́ки веко́в. Ами́нь.
Богородичен: Ангельское целова́ние прино́сим Ти́ с любо́вию, Богоро́дице Пречи́стая: ра́дуйся, Благода́тная, Госпо́дь с Тобо́ю. Ты́ же ра́дости сподо́би на́с, по до́лгу ублажа́ющия Тя́ и ро́ждшагося от Тебе́ Го́спода, пою́щия и превознося́щия во ве́ки.
Песнь 9
Ирмос: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.
Припев: Преподо́бне о́тче Стефа́не, моли́ Бо́га о нас.
Чу́жд бы́л еси́ превозноше́ния тщесла́внаго, [в] смире́нии же глубо́цем житие́ свое́ препроводи́л еси́, все́м окружа́ющим ты́ бы́л еси́ о́браз смире́ния и терпе́ния, и́хже науча́л еси́ бежа́ти душегу́бныя горды́ни и велича́ти Христа́ Жизнода́вца, богоизбра́нниче Стефа́не.
Припев: Преподо́бне о́тче Стефа́не, моли́ Бо́га о нас.
Побе́дное одоле́ние ро́ду на́шему, на сопроти́вныя да́руй моли́твами твои́ми, Стефа́не преподо́бне, Це́ркви же единомы́слие устро́й, во е́же бы вси́ ве́рнии лю́дие спасе́ние улучи́ли.
Сла́ва Отцу́ и Сы́ну и Свято́му Ду́ху:
От недосто́ных мои́х усте́н приноси́мое ти́ ма́лое, от усе́рдия, хвале́ние, приими́, богоизбра́нниче о́тче Стефа́не, и огня́ ве́чнаго изба́витися ми́, молю́ся, я́ко да честну́ю па́мять твою́ при́сно воспева́ю.
И ны́не и при́сно и во ве́ки веко́в. Ами́нь.
Богородичен: Безсе́менно ро́ждшая пло́тию Ипоста́сное Сло́во Пребезнача́льнаго Отца́, моли́ся Ему́, Богоро́дице Всепе́тая, спасти́ ду́ши пою́щих Тя́.
Свети́лен:
Посто́м тече́ние свое́ соверши́в, яви́лся еси́ украше́ние доброде́тельми, сла́ва Це́ркве, и ра́дость своего́, ве́рнаго Бо́гу, наро́да се́рбскаго, и́же тя́ стяжа́ моли́твеника, сего́ ра́ди, преподо́бне о́тче, помина́й чту́щия честну́ю па́мять твою́.
Сла́ва, и ны́не, Богородичен:
Предста́тельницу Тя́, Пресвята́я Де́во, мы́, гре́шнии, иму́ще, мо́лимся Ти́: не забу́ди Твоя́ рабы́ ма́терними Твои́ми моли́твами, у Сы́на Твоего́ и Бо́га на́шего, дарова́ти все́м на́м ве́лию ми́лость.
Молитва
О свяще́нная главо́, преподо́бне о́тче, преблаже́нне а́вво Стефа́не, не забу́ди убо́гих твои́х до конца́, но помина́й нас всегда́ во святы́х и благоприя́тных моли́твах к Бо́гу: помяни́ ста́до твое́, е́же сам упа́сл еси́, и не забу́ди посеща́ти чад твои́х моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ ду́ша со а́нгельскими во́инствы, со безпло́тными ли́ки, с небе́сными си́лами, у престо́ла Вседержи́телева предстоя́щи, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![Преподобному Стефану, Пиперскому Преподобному Стефану, Пиперскому](img_b/007.jpg)