2 июня.
Канон святому мученику Фалалею.
![Святому мученику Фалалею Святому мученику Фалалею](img_i/006.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропарь, глас 4:
Му́ченик Твой, Го́споди, Фалале́е,/ во страда́нии свое́м вене́ц прия́т нетле́нный от Тебе́, Бо́га на́шего:/ име́яй бо кре́пость Твою́,/ мучи́телей низложи́,/ сокруши́ и де́монов немощны́я де́рзости./ Того́ моли́твами// спаси́ ду́ши на́ша.
Кано́н, гла́с 8.
Пе́снь 1.
Ирмос: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.
Припев: Святы́й му́чениче Фалале́е, моли́ Бо́га о нас.
Омо́ченою багряни́цею страда́льческими кровьми́ благоукра́шенно Це́рковь Христо́ва оде́яна, хва́лится в страстоно́сцех и краси́тся.
Припев: Святы́й му́чениче Фалале́е, моли́ Бо́га о нас.
Си́лу непобеди́му от Бо́га прие́м, страстоте́рпче, во тма́х враго́в воева́л еси́ еди́н, в по́двизех страда́ния, Фалале́е.
Сла́ва Отцу́ и Сы́ну и Свято́му Ду́ху:
Ве́щь отве́рг плотску́ю и невеще́ственных житие́ на земли́ пожи́в, Фалале́е, Ангельским ликостоя́нием счи́слился еси́.
И ны́не и при́сно и во ве́ки веко́в. Ами́нь.
Богородичен: Земноро́днии Рождество́м Твои́м от земли́ к небе́сней высоте́ вознесо́хомся, вои́стинну Чи́стая Богоро́дице, и Ангельским ликостоя́нием причто́хомся.
Пе́снь 3.
Ирмос: Ты́ еси́ утвержде́ние притека́ющих к Тебе́, Го́споди, Ты́ еси́ све́т омраче́нных, и пое́т Тя́ ду́х мо́й.
Припев: Святы́й му́чениче Фалале́е, моли́ Бо́га о нас.
Ма́сть пома́за главу́ твою́, сла́вне, Христо́ва, сего́ ра́ди пре́лести не прине́сл еси́ ма́сти целе́ние кро́вь твоя́ все́м челове́ком источи́ и от земли́ кро́вь нече́стия отмы́ла е́сть, Фалале́е.
Припев: Святы́й му́чениче Фалале́е, моли́ Бо́га о нас.
Пло́ть покори́л еси́ тебе́ ра́ди Кре́ст прие́мшему, му́чениче Христо́в, и жи́зни нетле́нныя сподо́бился еси́, блаже́нне.
Сла́ва Отцу́ и Сы́ну и Свято́му Ду́ху:
Паде́ся мучи́тель под но́зе твои́, сла́вне, низложе́н бы́в твои́м терпе́нием и сопротивле́нием, Фалале́е.
И ны́не и при́сно и во ве́ки веко́в. Ами́нь.
Богородичен: Разреши́ Рождество́ Твое́ согреше́ний на́ших до́лги и пра́вде вся́ ве́рныя привяза́.
Седа́лен, гла́с 4.
Светови́ден показа́вся, страстоте́рпче, безбо́жия омраче́ние отри́нул еси́ и к ка́знем и сме́рти отлучи́лся еси́. Те́мже, сконча́в твоя́ вели́кия по́двиги, вели́кое прия́л еси́ насле́дие и сла́ву ника́коже мимоходя́щую, до́блий страда́льче Фалале́е сла́вне.
Сла́ва, и ны́не, Богородичен:
По Бо́зе во Тво́й, Богоро́дице, прибега́ю смире́нный покро́в боже́ственный и, припа́дая, молю́ся: поми́луй, Пречи́стая, я́ко превзыдо́ша главу́ мою́ греси́, и бою́ся, Влады́чице, му́ки, и трепе́щу, моле́ние сотвори́, Чи́стая, к Сы́ну Твоему́ от си́х изба́вити мя́.
Пе́снь 4.
Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́, и просла́вих Твое́ Божcтво́.
Припев: Святы́й му́чениче Фалале́е, моли́ Бо́га о нас.
Просвеще́на тя́, сла́вне, заре́ю доброде́телей, Христо́с прия́т на суди́щи страда́ния, я́коже в черто́зе, и просла́вил е́сть.
Припев: Святы́й му́чениче Фалале́е, моли́ Бо́га о нас.
Исцеле́ние тя́ даде́ Влады́ка все́м ве́рным, Фалале́е, и твои́ми боже́ственными моли́твами цели́ши стра́сти ду́ш на́ших.
Сла́ва Отцу́ и Сы́ну и Свято́му Ду́ху:
Пото́цы крове́й твои́х мѵ́ро исцеле́ния все́м источа́ют и отгоня́ют смра́д неду́гов, Фалале́е, и скорбе́й.
И ны́не и при́сно и во ве́ки веко́в. Ами́нь.
Богородичен: Якоже неистощи́мое, Влады́чице, Тя́ дарова́ний сокро́вище иму́ще, незави́стныя да́ры от Тебе́ чуде́с вси́ прие́млем.
Пе́снь 5
Ирмос: Просвети́ на́с повеле́нии Твои́ми, Го́споди, и мы́шцею Твое́ю высо́кою Тво́й ми́р пода́ждь на́м, Человеколю́бче.
Припев: Святы́й му́чениче Фалале́е, моли́ Бо́га о нас.
Облак боле́зней и му́к не покры́ све́тлости терпе́ния твоего́: просия́л бо еси́, страстоте́рпче, па́че со́лнца.
Припев: Святы́й му́чениче Фалале́е, моли́ Бо́га о нас.
Расты́й мы́сленно в Лива́не ве́ры, благово́ние вся́ко дхну́л еси́ муче́ния, пресла́вне Фалале́е.
Сла́ва Отцу́ и Сы́ну и Свято́му Ду́ху:
Ору́жием, му́дре, оде́ян страда́ния, возду́шным ше́ствием возше́л еси́ к боже́ственней высоте́ благода́ти, Фалале́е.
И ны́не и при́сно и во ве́ки веко́в. Ами́нь.
Богородичен: Скве́рну страстны́х помышле́ний очи́щши ду́шу мою́, Богоневе́сто, Твои́ми моли́твами, чи́ста мя́ Бо́гу предста́ви.
Пе́снь 6.
Ирмос: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.
Припев: Святы́й му́чениче Фалале́е, моли́ Бо́га о нас.
Служа́ живо́му Бо́гу и Творцу́ всея́ тва́ри, служе́ния мирски́х отри́нул еси́, Фалале́е, те́м тя́ просла́ви Подвигополо́жник во страда́ниих и чудесе́х.
Припев: Святы́й му́чениче Фалале́е, моли́ Бо́га о нас.
Просте́рл еси́ прозябе́ния, я́коже ма́слина плодови́та, терпе́ния, му́дре, на высоту́ разумева́емь, те́мже источи́л еси́ еле́й чуде́с ве́рным, му́чениче Фалале́е.
Сла́ва Отцу́ и Сы́ну и Свято́му Ду́ху:
Свещу́ душе́вную еле́ем, му́чениче Фалале́е, доброде́телей разу́мно укра́шь, сла́вне, огне́м страда́ния возже́гл еси́. Те́мже в черто́г боже́ственный дости́гл еси́.
И ны́не и при́сно и во ве́ки веко́в. Ами́нь.
Богородичен: Бы́хом ме́ртвии — безсме́ртни, Боже́ственною благода́тию Рождества́ Твоего́, и тле́ния пе́рваго изба́вихомся, Богоро́дице Пречи́стая, и нетле́ния оде́ждею украси́хомся.
Конда́к, гла́с 3.
Му́чеником сострада́лец я́влься и ору́жник, во́ин изря́дный Царя́ сла́вы бы́л еси́, искуше́ньми и му́кою возвыше́ние идолослужи́телей попра́л еси́, сего́ ра́ди честну́ю твою́ пое́м па́мять, му́дре Фалале́е.
Икос:
Хра́бра Христо́ва и́стины служи́теля, я́ко тве́рда страда́льца и пропове́дника ве́ры, низложи́вшаго вра́жию ко́знь, и́долов обличи́вшаго все́ неи́стовство душегу́бное, пе́сньми и хвала́ми вси́ воспое́м ны́не и благоче́стно похва́лим: я́ко бо а́гнец, посреде́ волко́в пребеззако́нных предста́в, пропове́дает благоче́стно Госпо́день зако́н, его́же творя́ще единомы́сленно, честну́ю пое́м па́мять прему́драго Фалале́я.
Пе́снь 7.
Ирмос: От Иуде́и доше́дше, о́троцы, в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.
Припев: Святы́й му́чениче Фалале́е, моли́ Бо́га о нас.
Возше́д на высоту́ Христо́ва благоче́стия, му́чениче Фалале́е, и́дольския возгнуша́лся еси́ до́лу влеку́шия ле́сти и непреста́нно взыва́еши: оте́ц на́ших Бо́же, благослове́н еси́.
Припев: Святы́й му́чениче Фалале́е, моли́ Бо́га о нас.
Водру́жся на ка́мени Зижди́теля любве́, му́чениче Фалале́е, муче́ний треволне́нии ника́коже поколеба́лся еси́, Сего́ боже́ственныя ве́ры, и благода́рно Того́ пое́ши, я́ко Благоде́теля.
Припев: Святы́й му́чениче Фалале́е, моли́ Бо́га о нас.
От незави́стных во́д духо́вныя благода́ти поче́рп чуде́с, прося́щим незави́стно сия́ все́м раздава́еши, Фалале́е, вопия́: оте́ц на́ших Бо́же, благослове́н еси́.
Сла́ва Отцу́ и Сы́ну и Свято́му Ду́ху:
Ди́вен я́ко сы́й во святы́х все́х, еди́не Человеколю́бче, удиви́, Ще́дрый, моли́твами Фалале́я бога́тыя ми́лости Твоя́ пою́щим, Христе́, Твое́ смотре́ние.
И ны́не и при́сно и во ве́ки веко́в. Ами́нь.
Богородичен: Да вся́ привлече́т к небе́сней сла́ве Творе́ц вся́ческих, из Тебе́, Богоро́дице, благоизво́ли роди́тися и на́м, я́ко Человеколю́бец и Благоде́тель, Бо́г пло́тию примеси́тися.
Пе́снь 8.
Ирмос: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.
Припев: Святы́й му́чениче Фалале́е, моли́ Бо́га о нас.
Отло́жь непостоя́нную му́дрость, му́чениче сла́вне, хва́лящихся е́ллин в плете́ниих, ра́зум непа́дающий и сло́во непоколе́блемое Влады́ки все́х и Бо́га привле́кл еси́, вопия́ Ему́ непреста́нно: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.
Припев: Святы́й му́чениче Фалале́е, моли́ Бо́га о нас.
Превзе́мься, Фалале́е, от земны́х ду́хом, Творца́ и Изба́вителя зря́ ума́ чистото́ю, и боле́зни претерпе́л еси́, стражда́ до́блественною душе́ю, посе́м и зовы́й: благослови́те, свяще́ннии, Влады́ку, лю́дие, превозноси́те Его́ во ве́ки.
Сла́ва Отцу́ и Сы́ну и Свято́му Ду́ху:
Му́ченическими кровьми́ обагри́в оде́жду, Фалале́е, се́ю оде́ялся еси́ мы́сленно, ца́рское я́ко украше́ние, и со все́ми страда́льцы и му́ченики в небе́сных кро́вех лику́еши, вопия́, непреста́нно: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.
И ны́не и при́сно и во ве́ки веко́в. Ами́нь.
Богородичен: Иже от не су́щих вся́ сло́вом составле́й, пло́ть челове́чу от Тебе́ прия́т еди́н Безсме́ртный, за милосе́рдие, Чи́стая, да обнови́т, я́ко Бо́г Благоде́тель, вся́, пою́щия: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.
Песнь 9
Ирмос: Устраши́ся вся́к слу́х неизрече́нна Бо́жия снизхожде́ния, я́ко Вы́шний во́лею сни́де да́же и до пло́ти, от деви́ческаго чре́ва бы́в Челове́к. Те́мже Пречи́стую Богоро́дицу, ве́рнии, велича́ем.
Припев: Святы́й му́чениче Фалале́е, моли́ Бо́га о нас.
Цве́ты ны́не доброде́телей, страстоте́рпче, мы́сленный исплете́нный вене́ц страда́ния, я́коже ка́мением, сего́ украси́л еси́ и удобри́л еси́ кра́сными, Фалале́е, ра́нами, и́мже обложе́н, в небе́сный черто́г вше́л еси́.
Припев: Святы́й му́чениче Фалале́е, моли́ Бо́га о нас.
Уязви́лся еси́ стрело́ю мы́сленною терпе́ния, и уязвля́яй те́ло твое́ вра́г злонача́льный, изнемо́г, на земли́ паде́ся; ты́ же, укрепля́емь душе́ю, к высоте́, Фалале́е, взя́лся еси́ небе́сней, воспева́я укре́пльшаго тя́ Го́спода.
Припев: Святы́й му́чениче Фалале́е, моли́ Бо́га о нас.
Яви́шася исцеле́ние ве́рным крове́й твои́х ка́пли, Фалале́е, неду́ги отмыва́юще, и исцеле́ния чуде́с точа́ще, и огнепале́ния лю́тая, угаша́юще благода́тию Венцеда́вца Христа́, и тя́ пе́сненно сла́вящия ороша́юще.
Сла́ва Отцу́ и Сы́ну и Свято́му Ду́ху:
Позна́на бы́ша все́м земноро́дным страда́нием возда́ния твоя́, Фалале́е, преиму́ща бо па́че наде́жды дарова́ния источа́ют, и́миже и на́с, благоче́стно и ве́рно чту́щия твоя́ боре́ния, от се́рдца прося́щия, посети́.
И ны́не и при́сно и во ве́ки веко́в. Ами́нь.
Богородичен: Возвы́си, Влады́чице Чи́стая, души́ моея́ до́лу влеку́щее мудрова́ние к пресве́тлому и боже́ственному жела́нию, Твоего́ Сы́на и Бо́га, да, любо́вию Его́ при́сно огнепале́н и пленя́емь, к Нему́ доброде́телию прибли́жуся.
Молитва
О святы́й уго́дниче Бо́жий, му́чениче Фалале́е! По́двигом до́брым подвиза́вся на земли́, восприя́л еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже взира́юще на святы́й твой о́браз, ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![Святому мученику Фалалею Святому мученику Фалалею](img_b/006.jpg)