29 июня.

Канон преподобному Тихону Калужскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Яко свети́льник пресве́тлый, яви́лся еси́ в Росси́йстей земли́, преподо́бне о́тче на́ш Ти́хоне, в пусты́ни всели́вся, в не́йже преходя́ жесто́кое жи́тельство, я́ко безпло́тен, пожи́л еси́, сего́ ра́ди и чуде́с дарова́нием обогати́ тя Бо́г. Те́м и мы́, притека́юще к ра́це моще́й твои́м, уми́льно глаго́лем: о́тче преподо́бне, моли́ Христа́ Бо́га спасти́ся душа́м на́шим.

Кано́н свята́го, гла́с 8.

Пе́снь 1.

Ирмос: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Припев: Преподо́бне о́тче Ти́хоне, моли́ Бо́га о нас.

Всего́ себе́ Вседержи́телю Бо́гу возложи́в, богому́дре, к Тому́ жела́нием и любо́вию у́м тво́й впери́л еси́, да, со Христо́м пребыва́я, жи́знь ве́чную насле́дуеши.

Припев: Преподо́бне о́тче Ти́хоне, моли́ Бо́га о нас.

Упова́нием на Бо́га Всеблага́го укрепля́емь, преблаже́нне Ти́хоне, к бу́дущим бла́гим простира́лся еси́ посто́м и моли́твами.

Сла́ва Отцу́ и Сы́ну и Свято́му Ду́ху:

Ди́вно житие́ твое́, всеблаже́нне, ку́пно же и смире́ние, е́же от ю́ности стяжа́л еси́, сего́ ра́ди от всего́ ми́ра отлучи́в себе́, бы́л еси́ мона́х благоиску́сен, цветы́й в доброде́телех.

И ны́не и при́сно и во ве́ки веко́в. Ами́нь.

Богородичен: Вопло́щься из пречи́стых ложе́сн Твои́х, Де́во Всечи́стая, Бо́жие Сло́во, все́м изъясни́ ве́лию боже́ственную любо́вь: челове́ческое бо естество́ ли́ку Ангельскому совокупи́ и в небе́сная возведе́.

Пе́снь 3.

Ирмос: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, еди́не Человеколю́бче.

Припев: Преподо́бне о́тче Ти́хоне, моли́ Бо́га о нас.

Вели́ко к Бо́гу дерзнове́ние стяжа́л еси́, преподо́бне Ти́хоне, посто́м и моли́твами, Его́же ми́лостива бы́ти к на́м испроси́.

Припев: Преподо́бне о́тче Ти́хоне, моли́ Бо́га о нас.

Вре́менных и до́льних возгнуша́вся, высо́кая, при́сно пребыва́ющая, возлюби́л еси́, боже́ственным раче́нием распаля́я боголюби́вую твою́ ду́шу, и, сотвори́в Всевы́шняго во́лю, восприя́л еси́ блага́я небе́сная.

Сла́ва Отцу́ и Сы́ну и Свято́му Ду́ху:

Жела́я, преподо́бне, насыща́тися при́сно пребыва́ющия сла́дости, бы́лии самора́сленными в пусты́ни пита́лся еси́ и та́ко по́двиг жития́ твоего́ соверша́л еси́, ны́не же наслажда́ешися присносу́щных бла́г.

И ны́не и при́сно и во ве́ки веко́в. Ами́нь.

Богородичен: Твою́ по́мощь пода́ждь ми́, рабу́ Твоему́, Де́во Влады́чице, вразуми́ и руково́дствуй мя́ на пути́ спасе́ния, изба́ви мя́ бе́д и скорбе́й, я́ко ро́ждшая все́х Избавле́ние.

Седа́лен, гла́с 4:

Многомяте́жие ми́ра и непостоя́нную суету́, я́ко пра́х, вмени́в и стяжа́в жи́знь Ангельску, Бо́гу угоди́л еси́; те́мже и на́с от тлетво́рных страсте́й изба́ви, мо́лимся, твою́ па́мять при́сно в пе́снех почита́ющих, блаже́нне Ти́хоне, о́тче на́ш.

Сла́ва, и ны́не, Богородичен:

Яко невозде́ланная, Де́во, лоза́, красне́йший Гро́зд прозябла́ еси́, источа́ющь на́м вино́ спасе́ния, все́х веселя́щее ду́ши же и телеса́. Те́мже, я́ко вину́ Тя до́брых блажа́ще при́сно, со Ангелом вопие́м Ти́: ра́дуйся, Благода́тная.

Пе́снь 4.

Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Припев: Преподо́бне о́тче Ти́хоне, моли́ Бо́га о нас.

Пото́ки сле́зными пусты́ню напои́л еси́, блаже́нне, се́мя трудо́в твои́х се́я в не́й, те́мже и стори́чный пло́д ра́достне пожа́л еси́, вопия́: сла́ва си́ле Твое́й, Го́споди.

Припев: Преподо́бне о́тче Ти́хоне, моли́ Бо́га о нас.

Помина́я, преподо́бне Ти́хоне, после́дний де́нь жи́зни сея́, на вся́к ча́с гото́вился еси́ ко исхожде́нию, благи́ми де́лы украша́я ду́шу твою́, ожида́я прише́ствия Влады́ки твоего́.

Сла́ва Отцу́ и Сы́ну и Свято́му Ду́ху:

Моля́ся не преста́й, о́тче на́ш Ти́хоне, о святе́й оби́тели и пусты́ни твое́й, ю́же мно́гими труды́ возде́лал еси́, прося́ избавле́ния от злы́х обстоя́ний и скорбе́й вся́ческих, да тя́ вси́, я́ко отца́ чадолюби́ва, непреста́нно воспева́ем.

И ны́не и при́сно и во ве́ки веко́в. Ами́нь.

Богородичен: Яко Богоизбра́нну Отрокови́цу, произше́дшую из чре́сл ца́рских, Ца́рь все́х, Христо́с Госпо́дь возлюби́в и вы́шшу херуви́м и серафи́м показа́в, ве́сь, Богоро́дице, всели́ся в Тя́.

Пе́снь 5

Ирмос: Просвети́ на́с повеле́нии Твои́ми, Го́споди, и мы́шцею Твое́ю высо́кою Тво́й ми́р пода́ждь на́м, Человеколю́бче.

Припев: Преподо́бне о́тче Ти́хоне, моли́ Бо́га о нас.

Яко дре́во благора́сленно при вода́х, насажде́н бы́в, о́тче преподо́бне Ти́хоне, ве́тви доброде́телей мно́ги израсти́л еси́, под се́нь твою́ вся́ прие́мля, хотя́щия спасе́ния.

Припев: Преподо́бне о́тче Ти́хоне, моли́ Бо́га о нас.

Моли́твенник те́пл в жи́зни се́й бы́л еси́, блаже́нне о́тче на́ш Ти́хоне, хода́тайствы твои́ми здра́вие все́м подава́я неоску́дное, те́м и ны́не па́че в моли́тву предлага́ем тя́, прося́ще тобо́ю прия́ти ми́лости и грехо́в оставле́ние.

Сла́ва Отцу́ и Сы́ну и Свято́му Ду́ху:

Ца́рство небе́сное стяжа́л еси́ произво́льною нището́ю, отону́дуже источа́еши оби́льно дарова́ния духо́вных исцеле́ний все́м, ве́рно почита́ющим пречестну́ю твою́ па́мять, преподо́бне о́тче на́ш Ти́хоне.

И ны́не и при́сно и во ве́ки веко́в. Ами́нь.

Богородичен: Возсия́ из Тебе́ мы́сленное Со́лнце и све́тлыя лучи́ Своего́ Божества́ простре́, Богоро́дице Влады́чице, те́м Тя́ вси́ непреста́нными пе́нии велича́ем.

Пе́снь 6.

Ирмос: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя.

Припев: Преподо́бне о́тче Ти́хоне, моли́ Бо́га о нас.

Честно́е те́ло твое́, преподо́бне, мно́гое исцеле́ние источа́ет ве́рою приходя́щим к цельбоно́сному твоему́ гро́бу, о́тче на́ш Ти́хоне.

Припев: Преподо́бне о́тче Ти́хоне, моли́ Бо́га о нас.

Непреста́нными твои́ми к Бо́гу, о́тче на́ш Ти́хоне, моли́твами небе́сных селе́ний дости́гл еси́, иде́же е́сть све́т неизрече́нный и наслажде́ние преподо́бных, с ни́ми же предстои́ши все́х Бо́гу, о́тче Ти́хоне.

Сла́ва Отцу́ и Сы́ну и Свято́му Ду́ху:

Но́щь тебе́, я́ко де́нь, блаже́нне, вменя́шеся: не да́л бо еси́ поко́я телеси́ твоему́, ни сна́ очесе́м, ни ве́ждам дрема́ния, до́ндеже дости́гл еси́ поко́я небе́снаго.

И ны́не и при́сно и во ве́ки веко́в. Ами́нь.

Богородичен: Расто́ргни мои́х прегреше́ний рукописа́ние и да́руй ми́ разреше́ние от одержа́щих мя́ печа́лей и страсте́й Твои́ми моли́твами, Влады́чице.

Конда́к, гла́с 8:

Оте́чества удали́вся, преподо́бне, в пусты́ню всели́лся еси́, иде́же жесто́кое житие́ твое́ показа́л еси́ и, мно́гих доброде́тельми удиви́в, дарова́ние чуде́с от Христа́ прия́л еси́. Те́мже помина́й на́с, чту́щих па́мять твою́, да зове́м ти́: ра́дуйся, преподо́бне Ти́хоне, о́тче на́ш.

Икос:

Возлюби́в, преподо́бне о́тче на́ш Ти́хоне, Христо́вы Боже́ственныя за́поведи и возненави́дев ми́ра сего́ наслажде́ние, оста́вив оте́чество, прите́кл еси́ усе́рдно в пусты́ню и бы́л еси́ в не́й свети́льник, просвеща́яй зде́шния страны́ блиста́нием духо́вным. Те́мже со тща́нием приходя́ще к цельбоно́сному твоему́ гро́бу, зове́м ти́: ра́дуйся, преподо́бне Ти́хоне, о́тче на́ш.

Пе́снь 7.

Ирмос: От Иуде́и доше́дше, о́троцы, в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.

Припев: Преподо́бне о́тче Ти́хоне, моли́ Бо́га о нас.

Му́жески в пусты́ни подвиза́лся еси́ и, зарю́ духо́вную восприе́м, взя́лся еси́ к высоте́ небе́сней, преподо́бне о́тче Ти́хоне, иде́же и ны́не со Ангелы прославля́ешися.

Припев: Преподо́бне о́тче Ти́хоне, моли́ Бо́га о нас.

Молча́нием в пусты́ни язы́к тво́й обузда́л еси́ и немяте́жным житие́м во пло́ти Ангельски, о́тче на́ш Ти́хоне, пожи́л еси́.

Сла́ва Отцу́ и Сы́ну и Свято́му Ду́ху:

Вои́стинну благи́я жи́зни сподо́бился еси́, преподо́бне о́тче Ти́хоне, чистото́ю и поще́нием сию́ обре́т, и ны́не со безпло́тными чи́ны Бо́гу предстои́ши.

И ны́не и при́сно и во ве́ки веко́в. Ами́нь.

Богородичен: Разуме́ти рождества́ Твоего́, Чи́стая, неизглаго́ланную глубину́ недоуме́ет у́м челове́чь: Бо́г бо, истощи́в Себе́ за милосе́рдие, воплоще́нием Свои́м всего́ мя́ обнови́.

Пе́снь 8.

Ирмос: Царя́ Небе́снаго, Его́же пою́т во́и Ангельстии, хвали́те и превозноси́те во вся́ ве́ки.

Припев: Преподо́бне о́тче Ти́хоне, моли́ Бо́га о нас.

Сле́зными пото́ки, преподо́бне о́тче на́ш Ти́хоне, зе́млю се́рдца твоего́ напои́л еси́ и, предстоя́ в моли́твах, непоколеби́мь, Творца́ все́х славосло́вил еси́.

Припев: Преподо́бне о́тче Ти́хоне, моли́ Бо́га о нас.

Бо́дренными твои́ми бде́нии, блаже́нне Ти́хоне, и ча́стыми воздыха́нии благода́ть Ду́ха Свята́го возрасте́ в тебе́, о́тче, и сла́вна тя́ показа́.

Сла́ва Отцу́ и Сы́ну и Свято́му Ду́ху:

Поще́ния страда́ньми и до́блестными по́двиги твои́ми, преблаже́нне о́тче Ти́хоне, кла́сы Боже́ственныя возрасти́л еси́, и́миже пита́еши благоче́стно почита́ющия па́мять твою́.

И ны́не и при́сно и во ве́ки веко́в. Ами́нь.

Богородичен: Всеблага́я Влады́чице, Преблага́го Бо́га пло́тию ро́ждшая, озло́бленное страстьми́ мое́ се́рдце очи́сти, да ве́рою и любо́вию сла́влю Тя́.

Песнь 9

Ирмос: Вои́стинну Богоро́дицу, Тя́ испове́дуем, спасе́ннии Тобо́ю, Де́во Чи́стая, с безпло́тными ли́ки Тя́ велича́юще.

Припев: Преподо́бне о́тче Ти́хоне, моли́ Бо́га о нас.

Пучи́ною сле́з твои́х, преподо́бне о́тче Ти́хоне, злонача́льнаго зми́я потопи́л еси́ и я́ко победоно́сец изря́ден к небе́сным возше́л еси́, иде́же непреста́нно со Ангельскими ли́ки сла́виши все́х Бо́га.

Припев: Преподо́бне о́тче Ти́хоне, моли́ Бо́га о нас.

Житие́ незло́биво име́л еси́, преподо́бне о́тче Ти́хоне, и укра́шено по́ты страда́ния, прехва́льне, того́ ра́ди боже́ственныя ра́дости испо́лнися ду́х тво́й.

Сла́ва Отцу́ и Сы́ну и Свято́му Ду́ху:

Хва́лится тобо́ю, преподо́бне о́тче на́ш Ти́хоне, гра́д тво́й Калу́га, я́ко венце́м ца́рским обложи́вся, име́я мо́щи твоя́ в преде́лех свои́х, я́ко до́бра стра́жа от Го́спода.

И ны́не и при́сно и во ве́ки веко́в. Ами́нь.

Богородичен: Препе́тая Де́во, Бо́га пло́тию ро́ждшая, сла́вящия Тя́ прича́стники Боже́ственнаго Све́та покажи́ и изба́ви ны́ гее́нны о́гнены и вся́каго вре́да вра́жия моли́твами Твои́ми.

Свети́лен:

Мра́з нощны́й претерпе́л еси́, и тяготу́ ва́ра дневна́го поне́сл еси́, и си́х ра́ди ве́чное наслажде́ние восприя́л еси́, Христо́в уго́дниче, блаже́нне Ти́хоне, моли́ спасти́ся душа́м на́шим.

Сла́ва, и ны́не, Богородичен:

По Бо́зе на Тя́ упова́ем, Пресвята́я Де́во Богоро́дице, и мо́лимся Тебе́: Твои́ми мольба́ми к Сы́ну Твоему́ и Бо́гу на́шему неврежде́нны до конца́ ны́ сохрани́.

Молитва преподобному Тихону Калужскому

О священная главо, великий чудотворче, преподобне отче наш Тихоне, преблаженне и преславне, Духа Святаго исполнение, постников похвало, монашествующих славо, пустыни украсителю, теплый о нас молитвенниче, ныне со ангельскими воинствы предстоя у Престола всех Царя славы Господа и наслаждаяся света Единосущныя Троицы, и с Горними силами воспевая Трисвятую песнь, яко дерзновение имея, молися Всемилостивому Владыце спасти вся, верующия во имя Его; испроси мир и тишину Святым Церквам ниспослати, вере православной укрепление, видимыя и невидимыя враги низложити, грады наши утвердити, мир весь умирити. Моли милостиваго Бога, да твоим благоприятным ходатайством вся православныя христианы избавит Он от глада, губительства, труса, потопа, огня, меча, от нашествия иноплеменник и междоусобныя брани, старыя да подкрепит, юныя да наставит, немудрыя умудрит, болящия исцелит, плененныя и юзники свободит, сироты заступит, младенцы воспитает и вся люди сохранит от всех бед и напастей, и от нападения вражия, и смертоносныя язвы, и тлетворных ветр, и от всякаго зла. Днесь же с верою приходящих рабов твоих, со страхом и любовию припадающих к многоцелебным мощем твоим и образ подобия твоего любезно целующих, яко теплый наш заступниче, сохрани и в скорбных обстояниих наших предстани, душевных и телесных страстей свободи; в день Страшнаго суда шуияго стояния избави и с десными овцами молитвами твоими стати сподоби и слышати блаженный оный глас Владыки, Христа Бога нашего: «Приидите, благословеннии Отца Моего, наследуйте уготованное вам Царство от сложения мира». Емуже подобает всякая слава, честь и поклонение, со Безначальным Его Отцем и со Пресвятым, и Благим, и Животворящим Его Духом, ныне и присно и во веки веков. Аминь.