29 июня.

Канон святителю Тихону Амафунтскому.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 1:

Пусты́нный жи́тель, и в телеси́ Ангел, и чудотво́рец яви́лся еси́, богоно́се о́тче на́ш Ти́хоне: посто́м, бде́нием, моли́твою небе́сная дарова́ния прии́м, исцеля́еши неду́жныя и ду́ши ве́рою приходя́щих ти́. Сла́ва Да́вшему тебе́ кре́пость, сла́ва Венча́вшему тя́, сла́ва Де́йствующему тобо́ю все́м исцеле́ния.

Канон свята́го, гла́с 8.

Пе́снь 1.

Ирмос: Колесницегони́теля фарао́ня погрузи́ чудотворя́й иногда́ Моисе́йский же́зл, крестообра́зно порази́в и раздели́в мо́ре, Изра́иля же беглеца́, пешехо́дца спасе́, пе́снь Бо́гови воспева́юща.

Припев: Святи́телю о́тче Ти́хоне, моли́ Бо́га о нас.

Виде́нии па́че ума́ исполня́емь, Ти́хоне блаже́нне, и отту́ду боже́ственныя зари́ насыща́яся, пода́ждь пою́щим тя́ благода́тный гла́с, и́мже яви́мся досто́йни твоя́ доброде́тели пове́дати.

Припев: Святи́телю о́тче Ти́хоне, моли́ Бо́га о нас.

Прие́мся пути́ лу́чшаго от ю́ности, все́ прароди́тельное име́ние, я́коже пра́х, ми́мо те́кл еси́ и, ни́щим разда́в, воздая́ние обре́л еси́ стори́цею, глаго́лом, блаже́нне, ве́ровав Го́спода твоего́.

Сла́ва Отцу́ и Сы́ну и Свято́му Ду́ху:

Иже в вы́шних Почива́яй, се́рдце твое́ доброде́телей до́м обре́т, всели́ся и в тебе́ упоко́ися: со Отце́м бо, я́коже рече́, оби́тель в тебе́ сотвори́, предочище́ну Ду́хом.

И ны́не и при́сно и во ве́ки веко́в. Ами́нь.

Богородичен: Бо́г Челове́к бы́сть из утро́бы Твоея́, Пречи́стая, и Де́ву па́ки Тя́ по рождестве́ сохрани́, естество́ же обожи́в, е́же подо́бию сопроти́вно, даде́ пе́рвое достоя́ние.

Пе́снь 3.

Ирмос: Утверже́й в нача́ле небеса́ ра́зумом и зе́млю на вода́х основа́вый, на ка́мени мя́, Христе́, за́поведей Твои́х утверди́, я́ко не́сть свя́т, па́че Тебе́, еди́не Человеколю́бче.

Припев: Святи́телю о́тче Ти́хоне, моли́ Бо́га о нас.

Зла́то и сребро́, я́коже зе́млю попира́емую, вмени́л еси́ и, я́ко уме́ты, мирску́ю сла́ву, неукло́нно бо тво́й у́м возве́л еси́ к нетле́нным, я́же и получи́в, всели́лся еси́, Ти́хоне богому́дре пребога́те.

Припев: Святи́телю о́тче Ти́хоне, моли́ Бо́га о нас.

Яко да лу́чшую жи́знь и ве́чно пребыва́ющую получи́ши, свяще́нный Ти́хоне, преоби́дел еси́ жи́знь тле́нную, му́чениче, произволе́нием все́м де́лу са́м себе́ вда́в.

Сла́ва Отцу́ и Сы́ну и Свято́му Ду́ху:

Стоя́л еси́ на суди́щи иногда́ мучи́тельсте, испове́дая Христа́ Царя́ со дерзнове́нием, не ужаса́яся ра́н, ни сме́рти, чу́дне, враги́ вспя́ть твои́ми глаго́лы улови́л еси́.

И ны́не и при́сно и во ве́ки веко́в. Ами́нь.

Богородичен: Не отри́нул еси́, Христе́, облещи́ся в смердя́щаго и дале́че Тебе́ бы́вша грехо́м, но от ложе́сн прие́м Деви́ческих нищету́ мою́, боготвори́ши и спаса́еши за мно́гую бла́гость.

Седа́лен, гла́с 4.

Улучи́ти жела́я ве́чную жи́знь, от страсте́й очи́стил еси́ твою́ ду́шу вои́стинну, богому́дре о́тче на́ш. Те́мже свяще́ния прия́л еси́ зарю́, дарова́ния исцеле́ний излива́еши ве́рою к покро́ву твоему́ притека́ющим, Ти́хоне блаже́нне.

Сла́ва, и ны́не, Богородичен:

Еди́на, ро́ждшая Творца́ всему́, еди́на, украси́вшая челове́чество Рождество́м Твои́м, Богоневе́сто, изба́ви мя́ от се́ти льсти́ваго врага́, поста́ви мя́ на ка́мени Христо́вых хоте́ний, Того́ моля́щи приле́жно, Его́же воплоти́ла еси́.

Пе́снь 4.

Ирмос: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра Отча, и на́шу нищету́ посети́в. Те́м с проро́ком Авваку́мом зову́ Ти: си́ле Твое́й сла́ва, Человеколю́бче.

Припев: Святи́телю о́тче Ти́хоне, моли́ Бо́га о нас.

Прие́м, о́тче, кре́пость Ду́ха, непобеди́мь яви́лся еси́ и неутоли́мь и укрепля́еши, я́коже воево́да, во́ины, ко устремле́нию призыва́я. Те́мже и без кро́ве твою́ побе́ду поста́вль, муче́ния вене́ц прия́л еси́.

Припев: Святи́телю о́тче Ти́хоне, моли́ Бо́га о нас.

Освя́щся, Ти́хоне, Бо́гу, соверша́я свяще́нныя зако́ны, пожи́л еси́, а не я́коже ная́тый па́стырь, но по ста́де ду́шу твою́ полага́я. Те́мже, во́лки уби́в, к па́жити живоно́сней Христо́во наста́вил еси́ ста́до.

Сла́ва Отцу́ и Сы́ну и Свято́му Ду́ху:

Твою́ честну́ю вои́стинну почита́ет па́мять Ки́прский о́стров, лику́я со все́ю земле́ю, и е́же в не́м излия́нием чуде́с пове́дая, приложи́ к виде́нию ны́не едина́че зре́ти хотя́щим са́д пресла́внаго прозябе́ния.

И ны́не и при́сно и во ве́ки веко́в. Ами́нь.

Богородичен: Све́т от Све́та, просия́в безле́тно, Сы́не Оте́чь, в после́дняя от ложе́сн проше́л еси́ Деви́ческих, всего́ Ада́ма, дре́вле умерщвле́ннаго, Собо́ю исправля́я. Те́мже Твою́ Ма́терь, Богоро́дицу вои́стинну, чту́ще, ве́рнии, пропове́даем.

Пе́снь 5

Ирмос: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся.

Припев: Святи́телю о́тче Ти́хоне, моли́ Бо́га о нас.

Истиннаго виде́ния, сла́вне, бы́в, Ти́хоне, испо́лнен, тщи́я му́дрости рача́щия обличи́л еси́, де́монскую пре́лесть отгоня́, и ба́сни вся́, и ки́прская дела́ ме́рзкая.

Припев: Святи́телю о́тче Ти́хоне, моли́ Бо́га о нас.

Чи́сто житие́ име́я, е́же па́че ума́ де́лы соверша́я, всеосвяще́нным о́бразом трапе́зе боже́ственней предста́ Христо́ве. Те́мже моли́твами твои́ми, богому́дре Ти́хоне, де́монския хра́мы опрове́ргл еси́.

Сла́ва Отцу́ и Сы́ну и Свято́му Ду́ху:

Распя́тся, я́коже Па́вел, ми́ру, и ми́р распя́, пребога́те, себе́, не жи́л еси́ пло́ти, но Бо́гу и Ду́ху, богоно́се Ти́хоне. Те́мже улучи́л, и́хже жела́л еси́, и на́с, твои́х рабо́в, помяни́.

И ны́не и при́сно и во ве́ки веко́в. Ами́нь.

Богородичен: Неискусобра́чная яви́лася еси́ Ма́ти, светле́йши со́лнца: кто́ бо от ве́ка слы́ша Де́ву доя́щу? На Тебе́ же вся́ боголе́пно, Де́во Ма́ти, устро́ишася, ро́ждшей Зижди́теля Твоего́.

Пе́снь 6.

Ирмос: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Припев: Святи́телю о́тче Ти́хоне, моли́ Бо́га о нас.

Де́монское сплете́ние от твоего́ ста́да отгоня́, чу́дне, и и́дольскую прогоня́ ле́сть многобо́жную, стра́шен показа́лся еси́ сопроти́вным, богоглаго́ливе Ти́хоне прему́дре.

Припев: Святи́телю о́тче Ти́хоне, моли́ Бо́га о нас.

Просла́ви тя́ Бо́г, Иже тобо́ю просла́вленный, в зна́мениях стра́шна, в чудесе́х вели́ка на́м дарова́в, богоно́се Ти́хоне, ве́рно тя́ блажа́щим.

Сла́ва Отцу́ и Сы́ну и Свято́му Ду́ху:

Освяти́л еси́ твою́, му́дре, жи́в, честну́ю зе́млю и, преше́д от нея́ ко прия́тию небе́сному, чудесы́ просла́вил еси́ пресла́вными, Ти́хоне, Влады́це дру́же и́скренний.

И ны́не и при́сно и во ве́ки веко́в. Ами́нь.

Богородичен: Умерщвле́ния ми́ пло́д, и́же дре́вле естество́м в раи́, жи́зни же Ты́ пло́д, Боже́ственный ра́й, Богоро́дице, процвела́ еси́, и́мже пита́яся, не ктому́ сме́рти порабоще́н бу́ду.

Конда́к, гла́с 3.

В по́стничестве, свя́те, боголюбе́зном пребы́в, Уте́шителеву си́лу с высоты́ прия́л еси́, и́дол низложи́ти пре́лести, лю́ди же спасти́, де́моны отгна́ти, неду́ги исцеля́ти. Сего́ ра́ди почита́ем тя́ я́ко Бо́жия дру́га, Ти́хоне блаже́нне.

Пе́снь 7.

Ирмос: Халде́йская пе́щь, огне́м распаля́емая, ороша́шеся Ду́хом, Бо́жиим предстоя́нием, о́троцы поя́ху: благослове́н еси́, Бо́же оте́ц на́ших.

Припев: Святи́телю о́тче Ти́хоне, моли́ Бо́га о нас.

Уста боже́ственная бы́в, челове́ки от недосто́инства ты́ досто́йны соде́лал еси́, многочу́дне Ти́хоне. Те́мже тя́ Христо́с чудесы́ и по кончи́не вои́стинну просла́ви.

Припев: Святи́телю о́тче Ти́хоне, моли́ Бо́га о нас.

В жела́нии бы́в о́нех наде́жд, всего́ мирска́го, о́тче, пристра́стия му́дре отре́клся еси́. Те́мже и возвести́л еси́, я́коже проро́к, му́дре Ти́хоне, твою́ кончи́ну.

Сла́ва Отцу́ и Сы́ну и Свято́му Ду́ху:

Соше́дшеся, празднолю́бцы, та́йными виде́нии Ки́пр про́йдем и сада́ де́лание пресла́вно ви́дим, от него́же ми́р объе́млет чи́сто спасе́ние.

И ны́не и при́сно и во ве́ки веко́в. Ами́нь.

Богородичен: Пло́д чре́ва Твоего́, Богоро́дице Де́во, Онаго прича́щшимся безсме́ртие источа́ет: Евин бо до́лг Ты́ разреши́ла еси́, Бо́га ро́ждши.

Пе́снь 8.

Ирмос: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Припев: Святи́телю о́тче Ти́хоне, моли́ Бо́га о нас.

Свяще́ннейшу истка́л еси́ оде́жду твою́, прехва́льне Ти́хоне, доброде́телей укра́шь добро́тами, те́мже и явле́ние, я́коже от благово́ния, сказу́я, твою́ кончи́ну су́щим о́крест тебе́ провозвеща́я, сла́вити Спа́са устроя́л еси́, блаже́нне: Христа́ превозноси́те во ве́ки.

Припев: Святи́телю о́тче Ти́хоне, моли́ Бо́га о нас.

Зако́н телесе́ забы́в, я́коже безпло́тен, те́кл еси́, иде́же вене́ц тебе́ вы́шняго зва́ния, богому́дре, угото́вася: не бо пло́ти и кро́ви, Ти́хоне, обеща́лся еси́ пожи́ти. Те́мже добро́ты зри́ши Христо́ва Ца́рства, с Ни́м ца́рствуя во вся́ ве́ки.

Сла́ва Отцу́ и Сы́ну и Свято́му Ду́ху:

Победоно́сец бы́л еси́ на вся́ враги́ Христо́вы, со́вестным муче́нием держа́лся еси́ и, нра́вом жря́ себе́ во́льным, Ти́хоне му́дре, пред все́ми бо мучи́тели вопия́л еси́: Христо́с Бо́г е́сть, и бого́в лжеиме́нных па́мять да поги́бнет во ве́ки.

И ны́не и при́сно и во ве́ки веко́в. Ами́нь.

Богородичен: Пресвята́я Влады́чице, ми́ру Помо́щнице, ско́рбных кре́пкое прибе́жище, еди́на Засту́пнице су́щих в ну́ждах рабо́в Твои́х, Твое́ достоя́ние изми́ от бе́д и скорбе́й разли́чных, да ве́рою вопие́м: ра́дуйся, ми́ра ра́досте и спасе́ние.

Песнь 9

Ирмос: Устраши́ся вся́к слу́х неизрече́нна Бо́жия снизхожде́ния, я́ко Вы́шний во́лею сни́де да́же и до пло́ти, от деви́ческаго чре́ва бы́в Челове́к. Те́мже Пречи́стую Богоро́дицу, ве́рнии, велича́ем.

Припев: Святи́телю о́тче Ти́хоне, моли́ Бо́га о нас.

Пе́ние тебе́, Ти́хоне, свяще́нно, от усте́н недосто́йных приноси́мо, приими́, воздая́ние подава́я, грехо́в избавле́ние моли́твами твои́ми к Бо́гу: хода́тая бо тя́ вси́ предлага́ем, чту́щии твою́ ве́рно па́мять.

Припев: Святи́телю о́тче Ти́хоне, моли́ Бо́га о нас.

Пома́за тя́ Ду́х Чи́стый и Пресвяты́й еле́ем ра́дости, пресла́вне, дарова́ний мно́жеством украси́, и ца́рствовати с Ни́м сла́вно сподо́бися, Ти́хоне всеосвяще́нне, свяще́нников удобре́ние и похвала́.

Припев: Святи́телю о́тче Ти́хоне, моли́ Бо́га о нас.

О, твои́х, Ти́хоне свяще́нне, благода́ти чуде́с! Не мо́жет сказа́ти язы́к челове́чь ви́димое: от невла́жна бо прозябе́ния ло́знаго пе́рвее, ны́не ско́рым манове́нием пресла́вно твори́т гре́зн зре́л.

Сла́ва Отцу́ и Сы́ну и Свято́му Ду́ху:

Побе́ды мне́ на стра́сти моли́твами твои́ми пода́ждь, молю́ся, и сподо́би улучи́ти мя́, Ти́хоне, человеколю́бия Бо́жия и благи́х наслажде́ния и красоты́ Его́ прия́ти, любо́вию те́пле блажа́щаго.

И ны́не и при́сно и во ве́ки веко́в. Ами́нь.

Богородичен: Спаси́ мя́, Ма́ти Бо́жия, я́же ми́рови спасе́ние ро́ждшая, моли́твами Твои́ми от многообра́зных находя́щих ми́ и многоплете́нных искуше́ний, на Тя́ бо наде́жду спасе́ния моего́ возложи́х ве́рно, ра́б Тво́й.

Молитва

О пречестна́я и свяще́нная главо́ и благода́ти Свята́го Ду́ха испо́лненная, Спа́сово со Отце́м обита́лище, вели́кий архиере́е, те́плый наш засту́пниче, святи́телю Ти́хоне, предстоя́ у Престо́ла всех Царя́ и наслажда́яся све́та единосу́щныя Тро́ицы и херуви́мски со А́нгелы возглаша́я песнь трисвяту́ю, вели́кое же и неизсле́дованное дерзнове́ние име́я ко всеми́лостивому Влады́це, моли́ спасти́ся па́ствы Христо́вы лю́дем, благостоя́ние святы́х церкве́й утверди́: архиере́и благоле́пием святи́тельства украси́, мона́шествующыя к по́двигом до́браго тече́ния укрепи́, ца́рствующий град и вся гра́ды и страны до́бре сохрани́, и ве́ру святу́ю непоро́чну соблюсти́ умоли́, мир весь предста́тельством твои́м умири́, от гла́да и па́губы изба́ви ны, и от нападе́ния иноплеме́нных сохрани́, ста́рыя уте́ши, ю́ныя наста́ви, безу́мныя умудри́, вдови́цы поми́луй, си́роты заступи́, младе́нцы возрасти́, пле́нных возврати́, немощству́ющыя и моля́щияся тебе́ от всех напа́стей и бед хода́тайством твои́м свободи́: моли́ о нас Всеще́драго и Человеколюби́ваго Христа́ Бо́га на́шего, да и в день Стра́шнаго Прише́ствия Его́ от шу́ияго стоя́ния изба́вит нас, и ра́дости святы́х прича́стники сотвори́т со все́ми святы́ми во ве́ки веко́в. Ами́нь.