29 июня.

Канон священномученику Гермогену, епископу Тобольскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, глас 7:

Во святи́телех ди́вен показа́лся еси́, / ре́вностию по Бо́зе окрыля́ем, священному́чениче Гермоге́не. / И па́стве Сиби́рстей путево́ждь во страда́ниих явля́яся, / с ца́рственными страстоте́рпцами у́зы и заключе́ния разделя́я, / и страда́льчески путь сконча́вше: / на Небесе́х мзду трудо́в твои́х восприя́л еси́, // моли́ся за наро́д наш ко Го́споду.

Велича́ние:

Велича́ем тя, / священному́чениче Гермоге́не, / и чтим честна́я страда́ния твоя́, / я́же за Христа́ претерпе́л еси́.

Кано́н священному́ченика, глас 2.

Песнь 1

Ирмос: Гряди́те, лю́дие, / пои́м песнь Христу́ Бо́гу, / разде́льшему мо́ре и наста́вльшему лю́ди, / я́же изведе́ из рабо́ты еги́петския: // я́ко просла́вися.

Припе́в: Священному́чениче Гермоге́не, моли́ Бо́га о нас.

Перворожде́нна от Отца́, Христа́ возлюби́л еси́, по́двигом Его́ жизнь свою́ освяща́я, ду́ши на́ша просвети́, я́ко да воспева́ем тя.

Припе́в: Священному́чениче Гермоге́не, моли́ Бо́га о нас.

О, розго́ плодоно́сная земли́ Херсо́нския, в Сиби́рь отдале́нную прише́л еси́, тепло́ любве́ Боже́ственныя прине́сши лю́дем правосла́вным, и ны́не моли́ Христа́ Бо́га спасти́ся душа́м на́шим.

Сла́ва Отцу́ и Сы́ну и Свято́му Ду́ху:

До́брое зерно́ ве́ры Правосла́вныя от пле́вел очища́я и горя́ любо́вию ко Го́споду, уче́ньми богосло́вскими ю́ные сердца́ просвети́л еси́, бли́жним ра́дость присносу́щную да́руя.

И ны́не и при́сно и во ве́ки веко́в. Ами́нь.

Богородичен: Воплоще́ннаго Бо́га из Тебе́ ве́мы, Су́щаго пре́жде всея́ тва́ри, и пре́жде всех век: те́мже Тя и́стинную Богоро́дицу воспева́ем.

Песнь 3

Ирмос: Утверди́ нас в Тебе́, Го́споди, / дре́вом умерщвле́й грех, / и страх Твой всади́ // в сердца́ нас, пою́щих Тя.

Припе́в: Священному́чениче Гермоге́не, моли́ Бо́га о нас.

Избра́нный досто́йно на служе́ние архиере́йское во гра́де Сара́тове, иде́же по́двигом до́брым подвиза́лся, любо́вь наро́дную стяжа́л еси́.

Припе́в: Священному́чениче Гермоге́не, моли́ Бо́га о нас.

Горе́ име́я о́чи серде́чныя, и́ноков оте́чески наставля́л еси́ ревнова́ти о чистоте́ мона́шескаго жития́, о́тче блаже́нне, и путе́м кре́стным ше́ствовати науча́я.

Сла́ва Отцу́ и Сы́ну и Свято́му Ду́ху:

Па́стырь благогове́йный яви́лся еси́, слу́жбы церко́вныя со слеза́ми покая́ния и умиле́ния соверша́я, те́мже у Престо́ла Всевы́шняго ны́не предстои́ши.

И ны́не и при́сно и во ве́ки веко́в. Ами́нь.

Богородичен: От ме́ртвости ум наш отрясла́ еси́, Победи́вшаго смерть нам ро́ждшая, и оде́жду нам истка́ла еси́ нетле́ния, Деви́це, Рождество́м Твои́м.

Ин конда́к священному́ченика, глас 5:

Утвержде́ние ве́ры Правосла́вныя, / и любви́ Христо́вой пропове́дание, / па́ствы Сиби́рския похвало́, Це́ркви Ру́сския сла́во, / испове́дничество и му́ченичество за Христа́ подъя́л еси́, / свиде́тельствуя да́же до сме́рти пред лице́м богобо́рцев, / моли́твенно в ру́це Бо́жии ду́шу свою́ преда́в, / священному́чениче Гермоге́не, // моли́ Христа́ Бо́га спасти́ся душа́м на́шим.

Седа́лен священному́ченика, глас 4:

Егда́ Ду́хом просвеще́н быв Боже́ственным, свире́пство люде́й безбо́жных дерзнове́нием па́стырским посрами́л еси́, и му́ченическую кончи́ну, Христа́ ра́ди, прия́л еси́, сла́вне, и ны́не, предстоя́ Святе́й Тро́ице во сла́ве, моли́ дарова́ти нам ве́лию ми́лость.

Сла́ва, и ны́не, Богородичен:

Ма́терь Твою́ приво́дим Ти в моли́тву, лю́дие Твои́, Христе́ Бо́же, мольба́ми Ея́ щедро́ты Твоя́ даждь нам, Благи́й.

Песнь 4

Ирмос: Услы́шах, Го́споди, / смотре́ния Твоего́ та́инство, /  разуме́х дела́ Твоя́, // и просла́вих Твое́ Божество́.

Припе́в: Священному́чениче Гермоге́не, моли́ Бо́га о нас.

Святи́телю ди́вный, досто́ин па́стырь Христо́ва ста́да яви́лся еси́, о́вцы своя́ от расхище́ния спаса́я, моли́ся о душа́х на́ших.

Припе́в: Священному́чениче Гермоге́не, моли́ Бо́га о нас.

Во дни сму́ты па́стве свое́й о́браз ве́рно по́дал еси́, презира́я зло́бу безбо́жных супоста́тов, от ни́хже за и́мя Христо́во ско́рби мно́гия претерпе́л еси́; моли́ся, святи́телю, о чту́щих па́мять твою́.

Сла́ва Отцу́ и Сы́ну и Свято́му Ду́ху:

Я́коже сад благоцвету́щ, сла́вный град Тобо́льск возлюби́л еси́, святи́телю, во времена́ нестрое́ний па́ству свою́ ве́рно упа́сл еси́, и ны́не моли́твами твои́ми правосла́вныя лю́ди сохраня́еши невреди́мы, Гермоге́не пресла́вне.

И ны́не и при́сно и во ве́ки веко́в. Ами́нь.

Богородичен: Твои́м све́том просвети́, Пречи́стая, омраче́нную ду́шу мою́, Я́же Свет ро́ждшая Ипоста́сный и Преве́чный.

Пе́снь 5

Ирмос: Све́та Пода́телю, / и веко́в Тво́рче, Го́споди, / во све́те Твои́х повеле́ний наста́ви нас: // ра́зве бо Тебе́, ино́го Бо́га не зна́ем.

Припе́в: Священному́чениче Гермоге́не, моли́ Бо́га о нас.

Име́яй любо́вь к ча́дам свои́м духо́вным, нощны́я моли́твы ко Христу́ возноси́л еси́, святи́телю, да сохрани́т лю́ди Своя́ в и́стинней ве́ре.

Припе́в: Священному́чениче Гермоге́не, моли́ Бо́га о нас.

Томле́ние души́ претерпева́я и предви́дя у́зы своя́ от неве́рных челове́к, Гефсима́нским моле́нием моли́лся еси́, живо́т свой Бо́гу предая́; и ны́не о нас Христу́ моли́ся, му́жество душа́м на́шим дарова́ти.

Сла́ва Отцу́ и Сы́ну и Свято́му Ду́ху:

Егда́ прии́де вре́мя испыта́ния и крова́выя сму́ты, я́ко адама́нт ве́ры Правосла́вныя, яви́лся еси́, о́тче Гермоге́не, и ны́не, я́ко ка́мень драги́й, сия́еши на Небеси́, во Ца́рствии Христа́, Бо́га на́шего.

И ны́не и при́сно и во ве́ки веко́в. Ами́нь.

Богородичен: Любо́вь к Тебе́, Чи́стая, наде́жду тве́рдую и ве́ру несомне́нную стяжа́хом, Богоро́дице: спаси́ ду́ши на́ша.

Песнь 6

Ирмос: В бе́здне грехо́вней валя́яся, / неизсле́дную милосе́рдия Твоего́ призыва́ю бе́здну: // от тли, Бо́же, мя возведи́.

Припе́в: Священному́чениче Гермоге́не, моли́ Бо́га о нас.

Ят бысть и в темни́цу от беззако́нных вве́ржен, слу́жбу Бо́жию та́мо не оста́вил еси́, па́ству свою́ в моли́твах помина́я, и Бо́га моля́ о сохране́нии ста́да церко́внаго. (Два́жды)

Сла́ва Отцу́ и Сы́ну и Свято́му Ду́ху:

Име́яй ве́лие терпе́ние и смире́ние, освети́л и облагоуха́л еси́ мрак темни́цы своея́, по́лчища бесо́вския моли́твою сокруша́я, испове́дниче Христо́в, Гермоге́не пресла́вне.

И ны́не и при́сно и во ве́ки веко́в. Ами́нь.

Богородичен: Ми́ра всего́ взе́млющаго грехи́, Христа́ ро́ждши, Пречи́стая, не преста́й прося́щи грехо́в проще́ние дарова́ти рабо́м Твои́м.

Конда́к, глас 4:

По́двиг святи́тельский до́бре сверши́вшаго / и тече́ние му́ченическое му́жественно сконча́вшаго, / прославля́ем тя, священному́чениче Гермоге́не, / я́ко предста́теля пред Го́сподем // за страну́ Росси́йскую.

И́кос:

Ча́да церко́вная, / досто́йно вознесе́м хвалу́ до́блестному страда́льцу и во́ину Христо́ву, / мо́лит бо Спа́са исцели́ти ду́ши на́ша от страсте́й, / Це́рковь же Свою́ сохрани́ти в ми́ре и единомы́слии, / те́мже вопие́м ему́: / от бед изба́ви ны при́сно моли́твами твои́ми.

Песнь 7

Ирмос: О́бразу злато́му на по́ле Деи́ре служи́му, / трие́ Твои́ о́троцы небрего́ша безбо́жнаго веле́ния, / посреде́ же огня́ вве́ржени, ороша́еми, поя́ху: // благослове́н еси́, Бо́же оте́ц на́ших.

Припе́в: Священному́чениче Гермоге́не, моли́ Бо́га о нас.

Егда́ беззако́ннии лю́дие кончи́ну угото́ваша ти, честны́й о́тче, убоя́вшеся испове́дничества твоего́, Госпо́дь незри́мо укрепля́ше тя благода́тию Свое́ю, е́юже ны́не прославля́ешися.

Припе́в: Священному́чениче Гермоге́не, моли́ Бо́га о нас.

Несомне́нную наде́жду иму́щи на Го́спода, ве́рныя ча́да твоя́ потща́шася об освобожде́нии твое́м, о́тче Гермоге́не, и та́ко но́выя священному́ченицы Ефре́м, Петр и Михаи́л яви́лися суть.

Сла́ва Отцу́ и Сы́ну и Свято́му Ду́ху:

И́стинно темни́цу свою́ учи́лищем духо́вным наре́кл еси́, и к кончи́не пра́ведней предугото́вился еси́, моли́тв прося́ у ми́ра всего́ о душе́ свое́й. Моли́ся ны́не о душа́х на́ших.

И ны́не и при́сно и во ве́ки веко́в. Ами́нь.

Богородичен: К   Богоро́дице   притеце́м, су́щии в печа́лех, благоче́стно взыва́юще: благослове́нна, Я́же Бо́га пло́тию ро́ждшая.

Песнь 8

Ирмос: В пещь о́гненную ко отроко́м евре́йским снизше́дшаго, / и пла́мень в ро́су прело́жшаго Бо́га, / по́йте дела́ я́ко Го́спода, // и превозноси́те во вся ве́ки.

Припе́в: Священному́чениче Гермоге́не, моли́ Бо́га о нас.

А́ще во тьме нощне́й и глубине́ вод кончи́ну му́ченическую прия́л еси́, Гермоге́не пресла́вне, но ны́не па́че со́лнца сия́еши пред Престо́лом сла́вы Го́спода на́шего, моля́ся о всех нас.

Припе́в: Священному́чениче Гермоге́не, моли́ Бо́га о нас.

Подо́бно дре́вним страстоте́рпцам Бо́гу угоди́л еси́, вене́ц сла́вный стяжа́в кончи́ною свое́ю, святи́телю, сего́ ра́ди дерзнове́ние стяжа́в ко Го́споду, моли́ся кре́пость в страда́ниих и ве́лие долготерпе́ние нам дарова́ти.

Сла́ва Отцу́ и Сы́ну и Свято́му Ду́ху:

Ре́чная глубина́ те́ло твое́ свято́е не удержа́ла есть, и, я́ко сосу́д благово́нный, изнесла́ есть, благослове́ние моли́твами твои́ми да́руя и проше́ния исполня́я всем, с ве́рою притека́ющим к тебе́.

И ны́не и при́сно и во ве́ки веко́в. Ами́нь.

Богородичен: Еди́на к Бо́гу руководи́тельница и вход, Еди́на хода́таица ве́чных благ, Еди́на боля́щих посеще́ние, Еди́на па́дших исправле́ние, Влады́чице, поми́луй мя еди́наго, па́че всех согреши́вшаго.

Песнь 9

Ирмос: От Бо́га Бо́га Сло́ва, / неизрече́нною му́дростию, прише́дшаго обнови́ти Ада́ма, / я́дию в тле́ние па́дшаго лю́те, / от Святы́я Де́вы неизрече́нно Воплоти́вшагося нас ра́ди, // ве́рнии, единому́дренно пе́сньми велича́ем.

Припе́в: Священному́чениче Гермоге́не, моли́ Бо́га о нас.

Со благогове́нием покланя́емся Го́споду, чуде́сно яви́вшему честно́е те́ло твое́, о́тче, ве́рным ча́дом твои́м: Ему́же ны́не благода́рственныя моли́твы прино́сим.

Припе́в: Священному́чениче Гермоге́не, моли́ Бо́га о нас.

Любо́вию чту́щих тя не оста́ви, святи́телю Гермоге́не, хода́тайствуя о нас пред Бо́гом, да земно́е по́прище досто́йно соверши́ти возмо́жем.

Сла́ва Отцу́ и Сы́ну и Свято́му Ду́ху:

Архипа́стырское служе́ние до́бре соверши́л еси́, я́ко а́гнец слове́сный, от А́гнца Бо́жия дар му́ченичества восприя́л еси́, и ны́не, предстоя́ Престо́лу Всевы́шняго, моли́ся о нас ко Го́споду спасти́ся душа́м на́шим.

И ны́не и при́сно и во ве́ки веко́в. Ами́нь.

Богородичен: Ве́рнии, Тя,  Богоро́дицу Пречи́стую, Де́ву и Ма́терь Сло́ва, единому́дренно пе́сньми велича́ем.

Свети́лен:

Но́вым му́чеником Ру́сским соедини́лся еси́, священному́чениче пресла́вне, и ны́не моли́ся о земно́м оте́честве твое́м у Престо́ла Вседержи́теля, и нас к де́лу любве́ и еди́нства церко́внаго упра́ви, и прича́стники Ца́рствия Бо́жия соде́лай.

Сла́ва, и ны́не, Богородичен:

А́нгелом и челове́ком яви́лася еси́, Влады́чице, гла́сы раб Твои́х услы́ши, и от вся́ких бед изба́ви нас святы́ми моли́твами Твои́ми.

Моли́тва ко священному́ченику Гермоге́ну

О, па́стырю до́брый, святы́й священному́чениче Гермоге́не, от ю́ности твоея́ Го́споду Иису́су Христу́ усе́рдно после́дуя, все́ю душе́ю Того́ возлюби́л еси́; в учи́тельстве до́бре подвиза́яся и епи́скопство досто́йно восприя́в, Це́ркви Правосла́вней послужи́л еси́, мно́гия ско́рби претерпе́в, ве́ру сохрани́в и Бо́га просла́вив, напосле́док же му́ченическим венце́м венча́лся еси́: и ны́не в Небе́сных оби́телех пребыва́яй, па́ству свою́ назира́еши и духо́вно окормля́еши. Услы́ши моле́бный глас чад свои́х, пред святы́ми твои́ми моща́ми [пред свято́ю ико́ною твое́ю] предстоя́щих и ме́сто погребе́ния твоего́ чту́щих, засту́пника и хода́тая тя пред Го́сподем ве́дущих. Умоли́ Го́спода Бо́га, да утверди́т в стране́ Росси́йстей ве́ру правосла́вную, да да́рует па́стырем и па́стве ре́вность о благоче́стии и спасе́нии, отроко́м уча́щимся — нау́к разуме́ние, всем же — друг ко дру́гу любо́вь и согла́сие, заблу́ждших да обрати́т и соедини́т Це́ркви Свое́й Святе́й, е́реси и раско́лы да упраздни́т, и вся правосла́вныя христиа́ны да спасе́т и поми́лует, и сподо́бит Небе́снаго Ца́рствия, иде́же ты ра́достно по труде́х и по́двизех ны́не почива́еши, прославля́я со все́ми святы́ми Бо́га, в Тро́ице сла́вимаго, Отца́ и Сы́на и Свята́го Ду́ха, в безконе́чныя ве́ки. Ами́нь.