28 июня.

Канон второй блаженному великомученику, князю Лазарю, Сербскому.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 3:

Красоту́ возжеле́в сла́вы Бо́жия, в земне́й Тому́ благоугоди́л еси́ и, поруче́нный ти́ тала́нт до́бре возде́лав, усугуби́л еси́, о не́мже и подвиза́вся до кро́ве. Отону́дуже и мзду́ боле́зней твои́х, я́ко му́ченик, прия́л еси́ от Христа́ Бо́га: Его́же моли́ спасти́ся пою́щим тя́, Ла́заре.

Стихи́ры, гла́с 2.

Ки́ими похва́льными пе́сньми воспое́м Ла́заря, и́же торжеству́ вино́внаго? Сла́вен бо в житии́ на земли́ показа́лся еси́, сла́внейший же от до́брых де́л яви́вся, за́поведем после́дуя Влады́ки твоего́. Но а́ще и недоуме́ем, хвали́ти досто́йне, укрепи́ ны, му́дре, пою́щих тя́, и проси́ от Христа́ ве́лию ми́лость.

Ки́ими язы́ки бре́нными украси́м Ла́заря му́драго? Та́ко просия́вшаго в после́дния на́ша ро́ди, и́же от ю́ности Бо́жиим Ду́хом возлю́бленнаго, благоче́стия столпа́ непоколеби́маго, преиспещре́нна добро́тами доброде́телей, о лю́дях свои́х моля́ща Бо́га. Ему́же моли́ся, богоприя́тне, и испроси́ сла́вящим тя́ ми́р и ве́лию ми́лость.

Ко́е по достоя́нию пе́ние принесе́м ти́, Ла́заре? На земли́ бо пожи́л еси́ во благоче́стии и чистоте́, украси́вся доброде́тельми вои́стинну, по́двиг же до́брый и тече́ние соверши́в, ага́рянскому наше́ствию и горды́ни сопроти́вился еси́, му́дре, не терпя́ благоче́стию разоря́ему зре́тися; отню́дуже я́ко му́ченик ра́ди боле́зней твои́х мзду́ прия́л еси́, му́ченическая ме́ста насле́довал еси́, с ни́миже проси́ на́м ми́р и ве́лию ми́лость.

Сла́ва, гла́с 4:

Дне́сь Це́рковь Правосла́вная та́йно ликовству́ет, но́вою оде́явшися оде́ждею, я́ко порфи́рою и ви́ссоном, но́ваго Ла́заря, и, се́ю оде́яна, крася́щися, взыва́ет: вели́чит сла́ва моя́ Го́спода, дарова́вшаго ми́ моего́ краси́теля. И па́ки со дерзнове́нием зове́м: Иже просла́вивый Твоего́ страда́льца, Христе́ Бо́же, умири́ ми́р и спаси́ ду́ши на́ша.

И ны́не, Богородичен:

При́зри на моле́ния Твои́х ра́б, Всенепоро́чная, утоля́ющи лю́тая на ны́ воста́ния, вся́кия ско́рби на́с изменя́ющи, Тя́ бо еди́ну тве́рдое и изве́стное утвержде́ние и́мамы, и Твое́ предста́тельство стяжа́хом, да не постыди́мся, Влады́чице, Тя́ призыва́ющии, потщи́ся на умоле́ние Тебе́ ве́рно вопию́щих: ра́дуйся, Влады́чице, все́х по́моще, ра́досте и покро́ве, и спасе́ние ду́ш на́ших.

Ин кано́н свята́го, гла́с 8.

Пе́снь 1.

Ирмос: Колесницегони́теля фарао́ня погрузи́ чудотворя́й иногда́ Моисе́йский же́зл, крестообра́зно порази́в и раздели́в мо́ре, Изра́иля же беглеца́, пешехо́дца спасе́, пе́снь Бо́гови воспева́юща.

Припев: Святы́й му́чениче кня́же Ла́заре, моли́ Бо́га о нас.

Иже на тя́ разсвире́певшии иноплеме́нницы потреби́шася, я́ко Дафа́н и Авиро́н окая́ннии: тебе́ бо неви́димо храня́ще боже́ственная си́ла, Бо́гу вся́ко над ни́ми тя́ устро́ившу, мно́гим по́слежде тобо́ю промышля́я заступле́ние.

Припев: Святы́й му́чениче кня́же Ла́заре, моли́ Бо́га о нас.

Ви́дев Созда́вший еди́н сердца́ челове́ков, богому́дре Ла́заре, се́рдца твоего́, е́же к Нему́, нра́ва же кро́ткое и незло́бивое, на престо́ле ца́рствующих посади́ и па́стыря тя́ христокра́сных люде́й устро́и.

Припев: Святы́й му́чениче кня́же Ла́заре, моли́ Бо́га о нас.

Егда́ на стра́жи твое́й ста́л еси́ богода́нныя ти́ вла́сти, Ла́заре, тогда́ недрема́нное о́ко стяжа́л еси́, к соблюде́нию богода́ннаго ти́ ста́да, о не́мже труди́вся до сме́рти, отню́дуже и мзду́ прия́л еси́ трудо́в твои́х.

Сла́ва Отцу́ и Сы́ну и Свято́му Ду́ху:

Новопросия́вшая звезда́ яви́лся еси́ на за́паде, сия́я све́тлыми луча́ми твои́х моще́й все́м ве́рным, па́че же твоему́ оте́честву, и си́х привлача́ к пресве́тлому сия́нию твои́х по́двиг и избавля́я те́х от тмы́ несве́тлыя, Ла́заре, и от приходя́щих то́е расхи́тити звере́й.

И ны́не и при́сно и во ве́ки веко́в. Ами́нь.

Богородичен: Вседе́рзостную кре́пость иноплеме́нников, о Влады́чице, потреби́, лю́ди же ве́рныя, Тебе́ сла́вящия, спаси́; цари́ же ве́рныя устро́й и укрепи́, и́же Сы́ну и Бо́гу Твоему́ пе́снь воспева́ющих.

Пе́снь 3.

Ирмос: Утверже́й в нача́ле небеса́ ра́зумом и зе́млю на вода́х основа́вый, на ка́мени мя́, Христе́, за́поведей Твои́х утверди́, я́ко не́сть свя́т, па́че Тебе́, еди́не Человеколю́бче.

Припев: Святы́й му́чениче кня́же Ла́заре, моли́ Бо́га о нас.

Иже на высоту́ хулу́ глаго́лавый, го́рдым о́ком ви́дев твоя́ поле́зная, Ла́заре, ле́стными ухищре́ньми укра́сти тя́ покуси́ся; ты́ же, Му́дрость су́щую — Христа́ Бо́га в дому́ се́рдца твоего́ имы́й, того́ под но́зе твои́ покори́л еси́, вопия́: не́сть свя́т, па́че Тебе́, Го́споди.

Припев: Святы́й му́чениче кня́же Ла́заре, моли́ Бо́га о нас.

Беся́щася пе́рсянина я́ко ви́дев, со мно́жеством язы́к на тя́ прише́дша, дави́дски, Ла́заре, к боре́нию того́ изше́л еси́ и, я́коже о́наго втора́го победи́л еси́ Голиа́фа, взыва́я: не́сть свя́т, па́че Тебе́, Го́споди.

Сла́ва Отцу́ и Сы́ну и Свято́му Ду́ху:

Яко побо́рнику Правосла́вия и му́ченику неле́стну хвалу́ и сла́ву вси́ тебе́, ве́рнии, прино́сим, Ла́заре: богора́тнаго бо зве́ря, я́ко не убоя́вшася рещи́: прииди́те, и потреби́м пра́вую ве́ру сла́вящих от земли́, и не помяне́тся и́мя Правосла́вия в ни́х, — кре́пко низложи́л еси́.

И ны́не и при́сно и во ве́ки веко́в. Ами́нь.

Богородичен: Благопремене́нна сотвори́, Влады́чице Всепе́тая, бо́дрыми Твои́ми моли́твами от Твоея́ утро́бы я́вльшагося челове́ком пло́тию, я́ко да обря́щем, Тебе́ сла́вящии, грехо́в оставле́ние и насле́дницы яви́мся сла́вы Сы́на и Бо́га Твоего́.

Седа́лен, гла́с 8.

Прему́дростию и ра́зумом украше́н, му́жеским и тве́рдым сия́я смы́слом, бла́г же, и кро́ток, и ми́лостив бы́л еси́ и вруче́нную ти́ па́ству до́бре упа́сл еси́, язы́ческих же наше́ствий непра́ведное заколе́ние претерпе́л еси́, те́мже и вене́ц боле́зней твои́х прия́л еси́. Сего́ ра́ди вопие́м ти́, Ла́заре: моли́ Христа́ Бо́га согреше́ний оставле́ние дарова́ти, чту́щим любо́вию святу́ю па́мять твою́.

Сла́ва, и ны́не, Богородичен:

Яко Всенепоро́чная Неве́сто Творца́, я́ко Неискусому́жная Ма́ти Изба́вителя, прия́телище я́ко су́щи Уте́шителя, Всепе́тая, беззако́нию мя́ су́ща скве́рно оби́телище и де́монов игра́лище в ра́зуме бы́вша, потщи́ся от си́х злоде́йствия мя́ изба́вити и све́тлое жили́ще доброде́телей соверши́, Светоно́сная Нетле́нная, отжени́ о́блак страсте́й, и вы́шняго прича́стия сподо́би, и све́та невече́рняго моли́твами Твои́ми.

Пе́снь 4.

Ирмос: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра Отча, и на́шу нищету́ посети́в. Те́м с проро́ком Авваку́мом зову́ Ти: си́ле Твое́й сла́ва, Человеколю́бче.

Припев: Святы́й му́чениче кня́же Ла́заре, моли́ Бо́га о нас.

Яко Гедео́н всекре́пкий, к наше́дшему мно́жеству пе́рсскому дерзну́л еси́, хра́мы моли́твенныя и сосу́ды святы́я не терпя́ зре́ти пожига́емы, любя́ о си́х умре́ти и ду́шу твою́ положи́ти; от ни́х же главно́е усече́ние претерпе́л еси́, взыва́я: сла́ва си́ле Твое́й, Го́споди.

Припев: Святы́й му́чениче кня́же Ла́заре, моли́ Бо́га о нас.

Всекре́пким твои́м усе́рдием спле́лся еси́ велехва́льному пе́рсянину и, того́ победи́в, взыва́л еси́: да пролие́тся кро́вь моя́ о любви́ Христа́ моего́, изво́лих бо примета́тися в дому́ Бо́га моего́ па́че, не́жели жи́ти ми́ в тле́нных.

Сла́ва Отцу́ и Сы́ну и Свято́му Ду́ху:

Досточу́ден и му́жествен в бра́нех бы́л еси́, но́вый в му́ченицех Ла́заре, ра́ны мно́гия и главно́е отсече́ние любве́ ра́ди Бо́жия от беззако́нных претерпе́л еси́, ду́х же пре́дал еси́ в ру́це Бо́гу, ра́дуяся.

И ны́не и при́сно и во ве́ки веко́в. Ами́нь.

Богородичен: Возсия́л еси́ от Де́вы, я́коже от о́блака звезда́ озаря́ющая, показу́я му́чеником красоту́ и все́м, до́бре подвиза́вшимся и страстьми́ распе́ншимся, Ще́дре, си́лу Твою́.

Пе́снь 5

Ирмос: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся.

Припев: Святы́й му́чениче кня́же Ла́заре, моли́ Бо́га о нас.

Да подви́жится к твоему́ похвале́нию вся́к язы́к, я́ко хва́лен ста́ду твоему́ бы́л еси́ во́ждь, и я́ко, си́х приве́д, упа́сл еси́ на па́житех живо́тных, и я́ко засту́пник те́м в животе́ и по сме́рти яви́вся, и я́ко о не́м подвиза́лся еси́ до сме́рти.

Припев: Святы́й му́чениче кня́же Ла́заре, моли́ Бо́га о нас.

Нача́льствующу тебе́ ста́ду христоимени́тому в зве́рских нахожде́ниих, не нае́мник, но па́стырь до́брый бы́л еси́, за́поведи Пастыренача́льника потща́лся еси́ испо́лнити, расхища́ющим ста́до Христо́во возбраня́я, убие́н бы́л еси́.

Сла́ва Отцу́ и Сы́ну и Свято́му Ду́ху:

Светя́щую тя́ свещу́ во дни́ и нощи́, Ла́заре, твоя́ честны́я светоза́рныя мо́щи стяжа́вши, Це́рковь весели́тся, просвеща́ема дне́сь заре́ю, ю́же свы́ше прия́л еси́ Ду́ха Свята́го осене́нием, и́миже вся́кия ле́сти избежа́вши, тя́ прославля́ет.

И ны́не и при́сно и во ве́ки веко́в. Ами́нь.

Богородичен: Ду́шу мою́ озари́, омраче́нную прегреше́ньми и ослепле́нную лю́тыми похотьми́, Яже Со́лнце ро́ждшая Пра́ведное, Присноде́во: ели́ка бо хо́щеши, мо́жеши.

Пе́снь 6.

Ирмос: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Припев: Святы́й му́чениче кня́же Ла́заре, моли́ Бо́га о нас.

Страны́ вся́ окре́стныя, Ла́заре, пропове́дуют твое́ житие́ и по́двиги, изря́днее же твое́ оте́чество, свя́те; труби́т же и Це́рковь Свята́я, па́мять твою́ сла́вящи, я́ко о то́й кро́вь твою́ излия́л еси́, но́вый в му́ченицех Ла́заре.

Припев: Святы́й му́чениче кня́же Ла́заре, моли́ Бо́га о нас.

Гобзу́юща тя́ в поле́зных я́ко ви́де пе́рсянин, на тя́ свире́по рыка́я, со мно́жеством язы́к прихо́дит, от ни́хже и главно́е отсече́ние претерпе́л еси́, я́ко му́ченик, того́же возгнеще́ние ве́чному огню́ мече́м соде́лал еси́.

Сла́ва Отцу́ и Сы́ну и Свято́му Ду́ху:

Бо́г, Иже во гро́бе забве́ния не оста́ви твое́ те́ло, земно́му же естеству́ повеле́ не растли́ти, но це́ло и облагоуха́емо явля́ет, все́х ве́рных чу́вствия и зре́ние во удивле́ние привлача́.

И ны́не и при́сно и во ве́ки веко́в. Ами́нь.

Богородичен: Иже вся́ приведы́й от небытия́ в бытие́, Иже от Де́вы Неискусому́жныя на́с ра́ди вопло́щся, Исмаи́ля врага́ покори́, борю́щаго на́с, ро́ду на́шему побе́ду да́руя, мольба́ми Твоего́ Ла́заря и Ро́ждшия Тя́, Сло́ве Бо́жий.

Конда́к, гла́с 8.

Возбра́нника благоче́стия всеизря́дна и му́ченика о и́стине непосты́дна, че́стне и по до́лгу восхваля́ет тя́ ста́до твое́, богому́дре, но́ я́ко име́я дерзнове́ние ко Христу́ Бо́гу, тебе́ сла́вящим смире́ние испроси́, да зове́м ти́: ра́дуйся, Ла́заре приснопа́мятне.

Икос:

Имать тебе́ твое́ оте́чество и па́ства, я́ко жи́ва и по сме́рти: да́р прече́стен и бога́тство неиждива́емое, засту́пника вели́ка и возбра́нника кре́пка, о благолюбе́зне; те́мже и в де́нь сконча́ния твоего́ пе́сни достохва́льныя прино́сим ти́, и, велича́юще тя́, взыва́ем тебе́ такова́я: ра́дуйся, отца́ благочести́ва прозябе́ние; ра́дуйся, ма́тере благогове́йныя прижи́тие; ра́дуйся, я́ко от ю́ности после́довал еси́ за́поведем Бо́жиим; ра́дуйся, сто́лпе Правосла́вия непоколеби́мый; ра́дуйся, зда́телю и краси́телю святы́х церкве́й; ра́дуйся, оби́льное ми́лование ни́щих; ра́дуйся, па́стырю до́брый, положи́вый ду́шу твою́ о лю́дех Бо́жиих; ра́дуйся, я́ко о благоче́стии кро́вь твою́ излия́л еси́; ра́дуйся, я́ко си́х ра́ди с му́ченики причте́ся и водворе́ние с ни́ми получи́л еси́; ра́дуйся, я́ко тобо́ю украси́шася правосла́внии; ра́дуйся, я́ко сла́ва о тебе́ протече́ по вселе́нней; ра́дуйся, на́ш засту́пниче и изба́вителю. И сия́ тебе́ прино́сим, свя́те, я́ко досто́йну, и мо́лим тя́: возме́здие сла́вящим тя́ пода́ждь и вся́каго озлобле́ния на́с изба́ви, да зове́м ти́: ра́дуйся, Ла́заре приснопа́мятне.

Пе́снь 7.

Ирмос: Бо́жия снисхожде́ния о́гонь устыде́ся в Вавило́не иногда́, сего́ ра́ди о́троцы в пещи́, ра́дованною ного́ю, я́ко во цве́тнице, лику́юще поя́ху: благослове́н еси́, Бо́же оте́ц на́ших.

Припев: Святы́й му́чениче кня́же Ла́заре, моли́ Бо́га о нас.

Не терпя́, богому́дре, зре́ти хра́мом моли́твенным безбо́жными пожига́емым и ста́до христоимени́тое расхища́емо, ре́вностию Бо́жия любве́ разже́гся, изше́л еси́, и му́ченическое от си́х главно́е отсече́ние претерпе́л еси́, зовы́й: благослове́н Бо́г оте́ц на́ших.

Припев: Святы́й му́чениче кня́же Ла́заре, моли́ Бо́га о нас.

С ли́ки Ангельскими в све́тлем пребыва́нии и с му́ченическими собо́ры водворя́яся я́ко му́ченик, Ла́заре, у престо́ла все́х Царя́ и Бо́га на́шего, лику́я, зове́ши: благослове́н Бо́г оте́ц на́ших.

Сла́ва Отцу́ и Сы́ну и Свято́му Ду́ху:

Дне́сь весели́тся вся́ка душа́ ве́рных, собра́вшихся на свято́е торжество́, во всесвяты́й хра́м тво́й, и, зря́ще в не́м, я́коже со́лнце, святы́я твоя́ мо́щи, ра́дуется, взыва́юще: благослове́н Бо́г оте́ц на́ших.

И ны́не и при́сно и во ве́ки веко́в. Ами́нь.

Богородичен: Восхваля́ем Тя́, похвалу́ му́чеников и ве́рных спасе́ние, вси́ ро́ди челове́честии, Пренепоро́чная: Бо́га бо родила́ еси́ и пребыва́еши Де́вою нетле́нна, Ему́же зове́м: благослове́н Бо́г оте́ц на́ших.

Пе́снь 8.

Ирмос: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Припев: Святы́й му́чениче кня́же Ла́заре, моли́ Бо́га о нас.

Не пожда́в сме́рти есте́ственныя, но́, я́коже жела́в, получи́л еси́, всекра́сное твое́ житие́ муче́нием удобротвори́л еси́, и преше́л еси́ к вы́шним оби́телем, иде́же зри́ши добро́ту неизрече́нную, и, я́ко му́ченик име́я дерзнове́ние, зове́ши: о́троцы, благослови́те, свяще́нницы, воспо́йте, лю́дие, превозноси́те Христа́ во вся́ ве́ки.

Припев: Святы́й му́чениче кня́же Ла́заре, моли́ Бо́га о нас.

Полку́ богосо́бранному предсия́я, я́коже звезда́ благозра́чная, и си́х во све́тлая селе́ния приве́л еси́ путе́м страда́льческим, и лико́м му́ченическим приче́т си́х с собо́ю, кре́пко бо о благоче́стии кро́вь твою́ пролия́л еси́, свя́те, зовы́й: о́троцы, благослови́те, свяще́нницы, воспо́йте, лю́дие, превозноси́те Христа́ во вся́ ве́ки.

Сла́ва Отцу́ и Сы́ну и Свято́му Ду́ху:

Во сла́ву и све́тлость боже́ственную преше́д ду́хом, я́ко любоча́ден, на́с, си́рых, не оста́вил еси́, но́, я́коже Илия́ Елиссе́ю ми́лоть во утеше́ние, си́це честно́е те́ло твое́ це́ло и благоуха́нно на́м оста́вил еси́, любя́ и по сме́рти пито́мцы твоя́, пою́щия: о́троцы, благослови́те, свяще́нницы, воспо́йте, лю́дие, превозноси́те Христа́ во вся́ ве́ки.

И ны́не и при́сно и во ве́ки веко́в. Ами́нь.

Богородичен: Сы́н Единоро́дный, Иже пре́жде ве́к неви́димый, напосле́док же веко́в Пе́рвенец бы́сть, ви́дим пло́тию из Тебе́, Ма́ти Де́во, на́с ра́ди вочелове́чися, да земны́я обожи́т, Бо́г спасе́ния моего́, Ему́же зове́м: благослови́те, вся́ дела́ Госпо́дня, Го́спода и превозноси́те во вся́ ве́ки.

Песнь 9

Ирмос: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее небе́с. Те́м Тя́, Богоро́дицу, Ангелов и челове́к чинонача́лия велича́ют.

Припев: Святы́й му́чениче кня́же Ла́заре, моли́ Бо́га о нас.

Тебе́ мо́лим, свя́те, приле́жно: о Це́ркви ве́рней помоли́ся, о не́й же и кро́вь твою́ му́ченически излия́л еси́, правосла́вней же ве́ре кре́пость на е́реси враго́в испроси́, смире́ние же — чту́щим тя́, Ла́заре.

Припев: Святы́й му́чениче кня́же Ла́заре, моли́ Бо́га о нас.

Яко ши́пок багрянови́дный, и я́блоко благово́нно, я́ко кри́н се́льный и я́ко ммро благоуха́нно, ра́ка твоя́, Ла́заре, на́с облагоуха́ющи, весели́т: ю́же и посреде́ иму́ще, я́коже сокро́вище многоце́нное, то́ю красу́емся, Спа́са велича́юще.

Сла́ва Отцу́ и Сы́ну и Свято́му Ду́ху:

В пра́здник святы́я твоея́ па́мяти, Ла́заре, соше́дшеся, ли́цы веселя́тся, с ни́миже и мы́ пе́сньми тя́ почита́ем. Прииди́ же и ты́, свя́те, и предначина́й торже́ственная, озлобле́ния же на́с вся́каго изба́ви, я́ко твое́ есмы́ ста́до.

И ны́не и при́сно и во ве́ки веко́в. Ами́нь.

Богородичен: О, Всепе́тая Цари́це, Яже Безнача́льнаго ро́ждши Царя́ Сла́вы! пою́щим Тя́ согреше́ний проще́ние и житию́ устрое́ние благоприбы́тно пода́ждь Твоего́ Ла́заря мольба́ми.

Свети́лен.

Оте́чество твое́, израсти́вшее тя́, твои́ми пелена́ми хва́лится, по́двиги же и страда́ньми красу́ется, но́вый в му́ченицех Ла́заре, светле́ется же и це́рковь Спа́са и Бо́га, сокро́вище бога́тое иму́щи — святы́я твоя́ мо́щи; мы́ же, ве́рнии, па́мять твою́ соверша́юще, моле́бно зове́м: изба́ви почита́ющих тя́ озлобле́ния вся́каго твои́ми моли́твами

Стихи́ры, гла́с 4.

До́бляго исполни́теля за́поведей Бо́жиих, соше́дшеся, восхва́лим по достоя́нию но́ваго Ла́заря, блага́го ко́рене о́трасль сладча́йшую, сла́внаго в житии́ земна́го влады́чествия, красне́йшаго же в доброде́телех показа́вшася, и́же вся́кою доброде́телию оби́льнаго, и со Ангелы Христу́ предстоя́щаго, и о и́же па́мять Его́ с любо́вию пою́щих моля́щагося.

До́бляго и му́жественнаго во бра́нех и адама́нта тверде́йшаго, побо́рника всеи́стинна о Правосла́вии, благоче́стия столпа́ непоколеби́маго, чу́днаго Ла́заря ублажи́м, ревни́теля и подража́теля Авраа́ма о́наго, и́же о и́стине му́ченика я́вльшагося, у Христа́ предстоя́щаго, о на́с моля́щагося.

Кро́вию новоизлия́нною твое́ю ве́рных Це́рковь украша́ется, па́че же труды́ твои́ми соде́ланная, я́ко о то́й сию́ излия́л еси́, и, се́ю обагри́вшися, та́йно лику́ет, веселя́щися, и почита́ет достопа́мятное твое́ сконча́ние, му́чеников удобре́ние и держа́вных похвало́, Ла́заре, и мо́лимтися: огражда́й сию́ от обстоя́ний.

Сла́ва, гла́с 8:

Нача́ло доброде́тельнаго твоего́ жития́, стра́х Бо́жий в ду́шу твою́ всели́л еси́, и́мже окормля́емь, стезю́ десну́ю не погреши́л еси́, и, се́ю ше́ствуя, Тому́ угоди́л еси́, и да́нный ти́ тала́нт до́бре возде́лал еси́, о не́мже главно́е отсече́ние прия́л еси́, отону́дуже и мно́жае Христо́ви присво́ился еси́. Те́мже боже́ственная селе́ния и гра́д небе́сный всекра́сную твою́ ду́шу прия́т, иде́же ны́не лику́еши бли́з Царя́ и Бо́га, те́м мо́лим тя́: моли́ о сла́вящих тя́ любо́вию, Ла́заре.

И ны́не, Богородичен:

Чи́стая Де́во, Сло́ва врата́, Бо́га на́шего Ма́ти, моли́ спасти́ся на́м.

Молитва

О святы́й уго́дниче Бо́жий, му́чениче кня́же Ла́заре! По́двигом до́брым подвиза́вся на земли́, восприя́л еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже взира́юще на святы́й твой о́браз, ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.