28 июня.

Канон первый блаженному великомученику князю Лазарю Сербскому.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 3:

Красоту́ возжеле́в сла́вы Бо́жия, в земне́й Тому́ благоугоди́л еси́ и, поруче́нный ти́ тала́нт до́бре возде́лав, усугуби́л еси́, о не́мже и подвиза́вся до кро́ве. Отону́дуже и мзду́ боле́зней твои́х, я́ко му́ченик, прия́л еси́ от Христа́ Бо́га: Его́же моли́ спасти́ся пою́щим тя́, Ла́заре.

Велича́ние:

Велича́ем тя́, святы́й и пра́ведный, и́же во царе́х Се́рбских, кня́же Ла́заре, и чте́м святу́ю па́мять твою́, ты́ бо мо́лиши за на́с Христа́ Бо́га на́шего.

Кано́н свята́го. Гла́с 4.

Пе́снь 1.

Ирмос: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.

Припев: Достоблаже́нне кня́же Ла́заре, моли́ Бо́га о нас.

Лику́я со Ангельскими собо́ры при́сно, у престо́ла Боже́ственнаго, светови́дныя зари́ исполня́емь, омраче́нную ду́шу мою́ озари́ти моли́ся, я́ко да по до́лгу возмогу́ воспе́ти па́мять твою́, Ла́заре.

Припев: Достоблаже́нне кня́же Ла́заре, моли́ Бо́га о нас.

Аще и по достоя́нию восхвали́ти тя́ недоуме́ем, чту́щии тя́, но, ели́ко по си́ле, пе́снь плете́м сла́вней твое́й па́мяти, пропове́дающе твое́ житие́ и страда́ние: я́коже любоча́ден, приими́ сие́, а́ще и не по достоя́нию хвале́ние.

Сла́ва Отцу́ и Сы́ну и Свято́му Ду́ху:

Зача́ло доброде́тельнаго твоего́ жития́, стра́х Госпо́день взя́л еси́ от ю́ности, Ла́заре, и се́й име́л еси́, наставля́ющь тя́ к пути́ пра́вому, и́мже ше́ствуя, во дворы́ Госпо́дни вше́л еси́.

И ны́не и при́сно и во ве́ки веко́в. Ами́нь.

Богородичен: Ангельских си́л ве́мы Тя́ превы́шшую, лю́дие ве́рнии, Спа́са и Бо́га прославля́ем, Де́во Всепе́тая, и, Богоро́дицу Тя́ от души́ сла́вяще, мо́лимся: от супоста́тных наше́ствия пою́щия Тя́ изба́ви.

Пе́снь 3.

Ирмос: Твоя́ песносло́вцы, Богоро́дице, живы́й и незави́стный Исто́чниче, ли́к Себе́ совоку́пльшия, духо́вно утверди́, в боже́ственней Твое́й сла́ве, венце́в сла́вы сподо́би.

Припев: Достоблаже́нне кня́же Ла́заре, моли́ Бо́га о нас.

Ра́зума от пеле́н испо́лнен ты́ бы́л еси́ и благода́ти Боже́ственныя, вся́ческих доброде́телей оби́лен, ни́щим же и убо́гим твое́ бога́тство расточи́л еси́, сего́ ра́ди тя́ Христо́с на небесе́х мно́гим бога́тством обогати́.

Припев: Достоблаже́нне кня́же Ла́заре, моли́ Бо́га о нас.

Авраа́му на земли́ страннолю́бием подо́бяся, име́л еси́ десни́цу благопода́тну: стра́нныя, и больны́я, и мимоходя́щия прие́мля, сподо́бился еси́ и Бо́га прия́ти в тебе́, Ла́заре.

Сла́ва Отцу́ и Сы́ну и Свято́му Ду́ху:

Преиспещре́нный и сла́вный до́м тво́й, достоблаже́нне Ла́заре, его́же на земли́ доброде́тельными ле́потами украси́л еси́, жела́я ве́чных бла́г получи́ти, му́дре, отню́дуже и Ца́рствия небе́снаго сподо́бился еси́.

И ны́не и при́сно и во ве́ки веко́в. Ами́нь.

Богородичен: О, Господоимени́тая Де́во Всенепоро́чная! возбране́ние име́я и по́мощь Твоея́ моли́твы, до́блий во́ин Твоего́ Сы́на и Бо́га первонача́льника безбо́жнаго победи́, себе́ же исхода́таи сла́ву му́ченическую.

Седа́лен, гла́с 8.

Прему́дростию и ра́зумом украше́н, му́жеским и тве́рдым сия́я смы́слом, бла́г же, и кро́ток, и ми́лостив бы́л еси́ и вруче́нную ти́ па́ству до́бре упа́сл еси́, язы́ческих же наше́ствий непра́ведное заколе́ние претерпе́л еси́, те́мже и вене́ц боле́зней твои́х прия́л еси́. Сего́ ра́ди вопие́м ти́, Ла́заре: моли́ Христа́ Бо́га согреше́ний оставле́ние дарова́ти, чту́щим любо́вию святу́ю па́мять твою́.

Сла́ва, и ны́не, Богородичен:

Яко Всенепоро́чная Неве́сто Творца́, я́ко Неискусому́жная Ма́ти Изба́вителя, прия́телище я́ко су́щи Уте́шителя, Всепе́тая, беззако́нию мя́ су́ща скве́рно оби́телище и де́монов игра́лище в ра́зуме бы́вша, потщи́ся от си́х злоде́йствия мя́ изба́вити и све́тлое жили́ще доброде́телей соверши́, Светоно́сная Нетле́нная, отжени́ о́блак страсте́й, и вы́шняго прича́стия сподо́би, и све́та невече́рняго моли́твами Твои́ми.

Пе́снь 4.

Ирмос: Седя́й в сла́ве на Престо́ле Божества́ во о́блаце ле́гце, при́иде Иису́с Пребоже́ственный, Нетле́нною Дла́нию и спасе́ зову́щия: сла́ва, Христе́, си́ле Твое́й.

Припев: Достоблаже́нне кня́же Ла́заре, моли́ Бо́га о нас.

Хра́м Бо́жий яви́лся еси́ по достоя́нию, хра́м бо Тому́ благоле́пен соде́лал еси́, все́х приводя́щ во удивле́ние, оби́лием кипя́ вся́ким, Ла́заре, в не́мже и ли́ки и́ноческия собра́л еси́.

Припев: Достоблаже́нне кня́же Ла́заре, моли́ Бо́га о нас.

Вве́ренный тебе́ тала́нт держа́вный, Ла́заре, не в земли́ скры́л еси́, я́ко ра́б лени́вый, но де́лав, я́ко ра́б бо́дрый своего́ Влады́ки, его́же и многоусугу́бленна Тому́ прине́сл еси́.

Сла́ва Отцу́ и Сы́ну и Свято́му Ду́ху:

Авситиди́йскаго Иова житию́ всекра́сному подо́бяся, му́дростию и ра́зумом просвеще́н яви́лся еси́, смире́нием се́рдца укра́шен и высото́ю жития́ сия́я, и па́че си́х высоча́йшая испра́вил еси́, Ла́заре.

И ны́не и при́сно и во ве́ки веко́в. Ами́нь.

Богородичен: Лю́дие ве́рнии, сла́вящии Тя́, Ма́терь Бо́жию, припа́дающе, мо́лимся чистоте́ Твое́й: моли́ся, Влады́чице, со святы́м му́чеником о чту́щих Тя́: вся́ бо мо́жеши, я́ко Христа́ ро́ждши, Богоблаже́нная.

Пе́снь 5

Ирмос: Ужасо́шася вся́ческая о Боже́ственней сла́ве Твое́й: Ты́ бо, неискусобра́чная Де́во, име́ла еси́ во утро́бе над все́ми Бо́га, и родила́ еси́ Безле́тнаго Сы́на, все́м, воспева́ющим Тя́, ми́р подава́ющая.

Припев: Достоблаже́нне кня́же Ла́заре, моли́ Бо́га о нас.

Ио́сифа целому́дреннаго чистоте́ и боже́ственному житию́ подо́бяся, пшеницеда́тель и ми́лостив ни́щим бы́л еси́: сию́ посе́яв в бразда́х, нището́ю изсо́хших, отону́дуже во вре́мя плодо́в весе́лием рукоя́ти пожа́л еси́.

Припев: Достоблаже́нне кня́же Ла́заре, моли́ Бо́га о нас.

Твоего́ ра́ди ми́лования, е́же на земли́ стяжа́л еси́, пра́вды ра́ди твоея́, приобре́тение стои́т тебе́ нетле́нно, е́же и получи́в, обре́л еси́ трудо́в твои́х возме́здие и живе́ши с ли́ки пра́ведник и му́ченик, ра́дуяся.

Сла́ва Отцу́ и Сы́ну и Свято́му Ду́ху:

Иже нището́ю угнета́емии лю́те и и́же в плене́ных и вся́ких ну́ждах озлобля́емии тру́бят в подсо́лнечней, Ла́заре, твои́х, досточу́дне, ми́лований пучи́ну неизсле́диму.

И ны́не и при́сно и во ве́ки веко́в. Ами́нь.

Богородичен: Без се́мене Сло́во Бо́жие, Неискусобра́чная, о Богоро́дице, родила́ еси́, я́коже То́й благоизво́ли, Его́же ра́ди, Бо́га, му́жески сла́вный му́ченик Ла́зарь, пропове́дуя, вожделе́нно пострада́.

Пе́снь 6.

Ирмос: Боже́ственное сие́ и всечестно́е соверша́юще пра́зднество, богому́дрии, Богома́тере, прииди́те, рука́ми воспле́щим, от Нея́ ро́ждшагося Бо́га сла́вим.

Припев: Достоблаже́нне кня́же Ла́заре, моли́ Бо́га о нас.

О, всекра́сныя ку́пли твоея́, свя́те! О, чу́днаго твоего́ измене́ния! Маловре́менною бо сла́вою ве́чную искупи́л еси́, в не́йже ны́не живе́ши, о на́с моли́ся.

Припев: Достоблаже́нне кня́же Ла́заре, моли́ Бо́га о нас.

Житию́ твоему́, Ла́заре, кто́ не удиви́тся, собра́л бо еси́, я́коже пчела́ благоразу́мная, мно́жество цветови́дных доброде́телей: в ни́хже, красу́яся, на́с облагоуха́еши.

Сла́ва Отцу́ и Сы́ну и Свято́му Ду́ху:

Еже по достоя́нию чу́днаго твоего́ жития́, досто́йно жела́ему сла́ву, ты́ от Христа́ Бо́га получи́л еси́, иде́же ны́не предстои́ши, в ри́зу све́тлу от доброде́телей облече́н, ра́дуяся.

И ны́не и при́сно и во ве́ки веко́в. Ами́нь.

Богородичен: Ма́ти Присноде́во, я́ко Чи́стую Тя́, Сло́во Чи́стое возлюби́, из Тебе́ вопло́щся, обнови́ челове́ка и Своего́ уго́дника просла́ви чудесы́.

Конда́к, гла́с 8.

Возбра́нника благоче́стия всеизря́дна и му́ченика о и́стине непосты́дна, че́стне и по до́лгу восхваля́ет тя́ ста́до твое́, богому́дре, но́ я́ко име́я дерзнове́ние ко Христу́ Бо́гу, тебе́ сла́вящим смире́ние испроси́, да зове́м ти́: ра́дуйся, Ла́заре приснопа́мятне.

Икос:

Имать тебе́ твое́ оте́чество и па́ства, я́ко жи́ва и по сме́рти: да́р прече́стен и бога́тство неиждива́емое, засту́пника вели́ка и возбра́нника кре́пка, о благолюбе́зне; те́мже и в де́нь сконча́ния твоего́ пе́сни достохва́льныя прино́сим ти́, и, велича́юще тя́, взыва́ем тебе́ такова́я: ра́дуйся, отца́ благочести́ва прозябе́ние; ра́дуйся, ма́тере благогове́йныя прижи́тие; ра́дуйся, я́ко от ю́ности после́довал еси́ за́поведем Бо́жиим; ра́дуйся, сто́лпе Правосла́вия непоколеби́мый; ра́дуйся, зда́телю и краси́телю святы́х церкве́й; ра́дуйся, оби́льное ми́лование ни́щих; ра́дуйся, па́стырю до́брый, положи́вый ду́шу твою́ о лю́дех Бо́жиих; ра́дуйся, я́ко о благоче́стии кро́вь твою́ излия́л еси́; ра́дуйся, я́ко си́х ра́ди с му́ченики причте́ся и водворе́ние с ни́ми получи́л еси́; ра́дуйся, я́ко тобо́ю украси́шася правосла́внии; ра́дуйся, я́ко сла́ва о тебе́ протече́ по вселе́нней; ра́дуйся, на́ш засту́пниче и изба́вителю. И сия́ тебе́ прино́сим, свя́те, я́ко досто́йну, и мо́лим тя́: возме́здие сла́вящим тя́ пода́ждь и вся́каго озлобле́ния на́с изба́ви, да зове́м ти́: ра́дуйся, Ла́заре приснопа́мятне.

Пе́снь 7.

Ирмос: Не послужи́ша тва́ри богому́дрии, па́че Созда́вшаго, но, о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бо́г, благослове́н еси́.

Припев: Достоблаже́нне кня́же Ла́заре, моли́ Бо́га о нас.

О Бо́зе ве́рою усе́рдною возмога́я, мно́жество хра́мов святы́х обнови́л еси́, мно́жайшия же от основа́ния воздви́гл еси́ Го́споду в славосло́вие, и́хже ра́ди до́м Ду́ха Свята́го себе́ соде́лал еси́, вопия́: благослове́н Бо́г оте́ц на́ших.

Припев: Достоблаже́нне кня́же Ла́заре, моли́ Бо́га о нас.

Испещре́нну ле́ствицу, и до небе́с досяжу́щу, на земли́, я́ко худо́г, хитре́ц Ла́заре, устро́ил еси́: бы́ша во тебе́, я́коже степе́ни ле́ствичныя, блага́я дела́, и́миже восте́к, иде́же жела́л еси́, зовы́й: благослове́н Бо́г оте́ц на́ших.

Сла́ва Отцу́ и Сы́ну и Свято́му Ду́ху:

Ра́зума све́тлости в доброде́тели жития́ и пре́жде страда́ния ты́, му́дре, испо́лнь бы́л еси́, красне́йший же яви́лся еси́ по по́двизех чуде́сных. Те́мже тя́ я́ко Бо́жия уго́дника почита́ем, зову́ще: благослове́н Бо́г оте́ц на́ших.

И ны́не и при́сно и во ве́ки веко́в. Ами́нь.

Богородичен: Ада́м от тли́ рождество́м Твои́м изба́вися, кроме́ бо тле́ния челове́ческаго ро́ждши, те́мже тле́ния зла́го мя́, Отрокови́це, изба́ви мольба́ми Твоего́ Ла́заря, Влады́чице.

Пе́снь 8.

Ирмос: Отроки благочести́выя в пещи́ Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки.

Припев: Достоблаже́нне кня́же Ла́заре, моли́ Бо́га о нас.

Заре́ю солнцеви́дною достоле́пно, Ла́заре, украше́н и багряни́цею, ю́же от крове́й твои́х очервле́нною, бы́л еси́ оде́ян, держа́ кре́ст твое́ю руко́ю, Христу́, просла́вльшему тя́, предстои́ши. Те́м мо́лим тя́: труда́м твои́м ве́чновати Ему́ моли́ся.

Припев: Достоблаже́нне кня́же Ла́заре, моли́ Бо́га о нас.

Услы́ши мольбы́ и пе́ния гла́с люде́й твои́х, свя́те, вонми́ воздыха́нию ста́да твоего́, я́ко отечестволю́бец, и проти́вися гне́вне на на́с вою́ющим: ве́мы бо многомо́щную моли́тву пра́веднаго.

Припев: Достоблаже́нне кня́же Ла́заре, моли́ Бо́га о нас.

Ма́лаго и худа́го моле́ния на́шего не пре́зри, мо́лим тя́, жи́телю вы́шняго Ца́рствия Ла́заре, но призира́й на твое́ ста́до, я́коже при животе́ и по сме́рти, и смире́ние испроси́ ро́ду на́шему и хва́лящим тя́.

Сла́ва Отцу́ и Сы́ну и Свято́му Ду́ху:

Да ра́дуется дне́сь мно́жество боже́ственное: яви́ся бо на за́паде пресве́тлая звезда́, во вре́мя после́днее сия́ющи досточу́дными луча́ми свои́х исправле́ний и озаря́я ве́рныя, Ла́заре всебога́те. Те́мже торжеству́им, зову́ще: благослови́те, вся́ дела́ Госпо́дня, Го́спода и превозноси́те во вся́ ве́ки.

И ны́не и при́сно и во ве́ки веко́в. Ами́нь.

Богородичен: Ангелов Ти́ гла́с, Богоневе́сто, приноша́ем: ра́дуйся, Помо́щнице ве́рно чту́щих Тя́ челове́ков, проро́ков сбытие́, апо́столов и му́чеников украше́ние боголе́пное.

Песнь 9

Ирмос: Вся́к земноро́дный да взыгра́ется, Ду́хом просвеща́емь, да торжеству́ет же безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.

Припев: Достоблаже́нне кня́же Ла́заре, моли́ Бо́га о нас.

Ра́дующися во всепра́зднственный де́нь твоего́ сконча́ния, Це́рковь ве́рных дне́сь, со все́ми окре́стными совоку́пльшися, пра́зднует, храни́теля и засту́пника бо́дра стяжа́вши: ю́же огражда́й твои́м предста́тельством, я́ко да тя́ велича́ем.

Припев: Достоблаже́нне кня́же Ла́заре, моли́ Бо́га о нас.

Украси́в ду́шу твою́ боже́ственными ле́потами, кра́сному Сло́ву сла́вен предстои́ши во дерзнове́нии мно́зе. Сего́ ра́ди мо́лим тя́: свы́ше на́с, певцы́ твоя́, назира́й ми́лостивно, наро́ду на́шему победи́тельная на супоста́ты испроси́, я́ко да тя́ ублажа́ем.

Припев: Достоблаже́нне кня́же Ла́заре, моли́ Бо́га о нас.

Иже празднолю́бных собо́ри, и́же в торжество́ ны́не хвали́маго Ла́заря собра́вшеся, наслади́мся торжества́ спасе́ннаго, зря́ще проро́ческих дне́сь сбы́вшихся слове́с: е́же пра́ведницы во ве́ки живу́т и от Го́спода си́м прославле́ние, Его́же велича́ем.

Сла́ва Отцу́ и Сы́ну и Свято́му Ду́ху:

Многоце́нное бога́тство и неиждива́емое — те́ло твое́ стяжа́в, хра́м тво́й, свя́те, крася́щеся тобо́ю, и взыва́ет, веселя́ся: вели́чит сла́ва моя́ Го́спода, дарова́вшаго мое́ украше́ние, покро́в и заступле́ние от супоста́тов.

И ны́не и при́сно и во ве́ки веко́в. Ами́нь.

Богородичен: Истинную Богоро́дицу ве́дый му́ченик Ла́зарь, и из Тебе́ рожде́ннаго Бо́га пропове́дуя, к безбо́жному мно́жеству от Того́ любве́ ополчи́ся, и му́жески проти́вися да́же и до сме́рти, Богоро́дице, Тя́ велича́ем.

Свети́лен.

Оте́чество твое́, израсти́вшее тя́, твои́ми пелена́ми хва́лится, по́двиги же и страда́ньми красу́ется, но́вый в му́ченицех Ла́заре, светле́ется же и це́рковь Спа́са и Бо́га, сокро́вище бога́тое иму́щи — святы́я твоя́ мо́щи; мы́ же, ве́рнии, па́мять твою́ соверша́юще, моле́бно зове́м: изба́ви почита́ющих тя́ озлобле́ния вся́каго твои́ми моли́твами.

Сла́ва, и ны́не, Богородичен:

Приими́ моле́ние, Всечи́стая Ма́ти Бо́жия Сло́ва, Твои́х люде́й, ве́рно сла́вящих Тя́, Богоро́дицу, и сохраня́й Твое́ ста́до ненаве́тно сопроти́вными, непреста́нно сла́вящее Тя́, Непосты́дную Засту́пницу: ины́я бо Помо́щницы не и́мамы, ра́зве Тебе́, Влады́чице.

Молитва

О святы́й уго́дниче Бо́жий, му́чениче кня́же Ла́заре! По́двигом до́брым подвиза́вся на земли́, восприя́л еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже взира́юще на святы́й твой о́браз, ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.