28 июля.

Канон преподобному Иерониму блаженному, Стридонскому.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 3:

Вели́ка име́ет тя́ предста́теля, богому́дре, правосла́вных собра́ние, я́коже у́бо преподо́бных еси́ собесе́дник и Боже́ственныя прему́дрости соприча́стник, та́ко, пречу́дне Иерони́ме, Христу́ Бо́гу моли́ся дарова́ти на́м ве́лию ми́лость.

Велича́ние:

Ублажа́ем тя́, преподо́бне о́тче Иерони́ме, и чте́м святу́ю па́мять твою́, наста́вниче мона́хов и собесе́дниче Ангелов.

Кано́н свята́го. Гла́с 8.

Пе́снь 1.

Ирмос: Колесницегони́теля фарао́ня погрузи́ чудотворя́й иногда́ Моисе́йский же́зл, крестообра́зно порази́в и раздели́в мо́ре, Изра́иля же беглеца́, пешехо́дца спасе́, пе́снь Бо́гови воспева́юща.

Припев: Преподо́бне о́тче Иерони́ме, моли́ Бо́га о нас.

Тебе́, богопропове́днику, приношу́ похвалу́ и молю́ся сло́ву да́тися ми́ твои́ми к Бо́гу моли́твами, я́ко да возглашу́ вели́чия, богому́дре, честна́го жи́тельства твоего́.

Припев: Преподо́бне о́тче Иерони́ме, моли́ Бо́га о нас.

От Далма́тския земли́ бога́тый благода́тию израсте́ и украси́ся доброде́тельми сла́вный Иерони́м, му́дростию же и разуме́нием веща́ний Ду́ха, я́ко преи́скренен Бо́гу бы́сть.

Сла́ва Отцу́ и Сы́ну и Свято́му Ду́ху:

Глаго́лы боже́ственнаго Григо́рия носи́л еси́ в храни́лищи свое́м, я́ко того́ таи́нник, богатносве́тле, и я́ко после́дователь Христа́ и апо́столов Его́, я́ко прича́стник богосло́вия, блаже́нне.

И ны́не и при́сно и во ве́ки веко́в. Ами́нь.

Богородичен: Неудержи́мыми на ны́ сме́рть устремле́нии напада́ше, но, Твоему́ Рождеству́ прибли́жившися, поги́бе и, прирази́вшися, упраздни́ся, Богоро́дице Де́во: Жи́знь бо, вои́стинну присносу́щную, воплоще́нну родила́ еси́.

Пе́снь 3.

Ирмос: Утвержде́й в нача́ле небеса́ ра́зумом и зе́млю на вода́х основа́вый, на ка́мени мя́, Христе́, за́поведей Твои́х утверди́, я́ко не́сть свя́т, па́че Тебе́, Еди́не Человеколю́бче.

Припев: Преподо́бне о́тче Иерони́ме, моли́ Бо́га о нас.

Украша́яся добро́тою нра́ва, многолюбе́зен бы́л еси́ все́м, и уго́дник Бо́жий преподо́бен, и во отце́х сла́вен, преблаже́нне.

Припев: Преподо́бне о́тче Иерони́ме, моли́ Бо́га о нас.

Умо́м чи́стым обогати́вся, е́ллинскую му́дрость, иуде́йскую и лати́нскую уве́дел еси́, халде́ев же и пе́рсов, но преда́л еси́ себе́ Самопрему́дрости — Христу́, сла́вне.

Сла́ва Отцу́ и Сы́ну и Свято́му Ду́ху:

За любо́вь Христо́ву посту́ прилежа́л еси́ и вся́ческим воздержа́ния трудо́м, и́хже ра́ди бы́л еси́ богому́др, Бо́гови благоуха́ние и челове́ком утеше́ние.

И ны́не и при́сно и во ве́ки веко́в. Ами́нь.

Богородичен: Поро́ка в Тебе́ и скве́рны не́сть отню́д, Де́во, пребыва́лище же па́че яви́лася еси́ небе́сных доброде́телей: в Тебе́ бо всели́ся вся́кая святы́ня, Влады́чице.

Седа́лен, гла́с 5.

Иерони́ма пе́сньми, ве́рнии, почти́м, поче́тшаго де́лы Христа́ Го́спода и научи́вша на́с спаси́тельным стезя́м и е́же в Бо́га и́стиннаго ве́ровати благоче́стно: те́плый бо сы́й на́ш предста́тель мо́лится о ми́ре и спасе́нии ду́ш на́ших.

Сла́ва, и ны́не, Богородичен:

Ра́дуйся, свята́я горо́ и богопрохо́дная, ра́дуйся, одушевле́нная купино́ и неопали́мая, ра́дуйся, еди́на к Бо́гу ми́рови мо́сте, преводя́й ме́ртвыя к ве́чному животу́; ра́дуйся, нетле́нная Отрокови́це, неискусому́жно ро́ждшая Спа́са ду́ш на́ших.

Пе́снь 4.

Ирмос: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра Отча и на́шу нищету́ посети́в. Те́м с проро́ком Авваку́мом зову́ Ти́: си́ле Твое́й сла́ва, Человеколю́бче.

Припев: Преподо́бне о́тче Иерони́ме, моли́ Бо́га о нас.

В Вифлее́м прише́л еси́, богоно́сне, и та́мо подвиза́лся еси́ до конца́ ева́нгельски, вселе́н бы́в с преподо́бными, я́ко преподо́бный, на небеси́, иде́же и мо́лишися о ве́рою пою́щих тя́.

Припев: Преподо́бне о́тче Иерони́ме, моли́ Бо́га о нас.

Яко избра́нник, я́ко святы́х оте́ц собесе́дник, в Святе́й Земли́ пожи́л еси́, в не́йже Христо́с я́ко Челове́к поживе́ и я́ко Бо́г спасе́ на́с. Те́м, достоблаже́нне, почита́ем па́мять твою́.

Сла́ва Отцу́ и Сы́ну и Свято́му Ду́ху:

Бо́жия уго́дника пе́сньми ублажа́ю, Иерони́ма терпеливому́драго, у́зкий пу́ть возлю́бльша и изгна́ние прие́мша, его́же, Го́споди, моли́твами грехо́в разреше́ние, я́ко Бо́г ми́лостив, пода́ждь на́м.

И ны́не и при́сно и во ве́ки веко́в. Ами́нь.

Богородичен: Неве́сту Бо́жию Тя́ и Ма́терь ве́мы, Богоро́дице, Тебе́ бо, я́ко мирово́нный шипо́к, обре́т Сло́во Бо́жие, цвету́щ во удо́лии смире́ннаго челове́чества, возжеле́ Твоея́ добро́ты, и, от Тебе́ Плотоно́сец произше́д, ве́рныя облагоуха́.

Пе́снь 5

Ирмос: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́, окая́ннаго, но обрати́ мя и к све́ту за́поведей Твои́х пути́ моя́ напра́ви, молю́ся.

Припев: Преподо́бне о́тче Иерони́ме, моли́ Бо́га о нас.

Новососта́вленна е́сть твоя́ всечестна́я па́мять, преподо́бне, а́ще и дре́вня сия́ ле́ты. Те́мже, прехва́льне, я́коже от дре́вних бы́л еси́, и от но́вых бу́ди достохва́лен.

Припев: Преподо́бне о́тче Иерони́ме, моли́ Бо́га о нас.

Превосхо́диши мно́жайших, всеизря́дне, богому́дрием, и исполня́еши весе́лия и сла́дости ве́рныя, и к высоте́ Боже́ственней возво́диши, я́ко благода́ти Бо́жией обита́лище.

Сла́ва Отцу́ и Сы́ну и Свято́му Ду́ху:

Блаже́нства удосто́ился еси́, достоблаже́нне, сострада́телен и ми́лостив бы́в, стра́нныя и безпокро́вныя упокоева́я, ни́щим помога́я и наги́я одева́я.

И ны́не и при́сно и во ве́ки веко́в. Ами́нь.

Богородичен: Украси́лася еси́, Де́во, я́ко красне́йшее Сло́во ро́ждшая, Его́же при́сно моли́ уще́дрити притека́ющия к Тебе́ и соблюсти́ от вся́каго де́монскаго вре́да на Тя́ упова́ющия.

Пе́снь 6.

Ирмос: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Припев: Преподо́бне о́тче Иерони́ме, моли́ Бо́га о нас.

На земли́ просла́ви тя́ Госпо́дь, свя́те, богому́дрыми бо писа́нии твои́ми све́тиши конце́м, я́ко со́лнце, Иерони́ме светоза́рне.

Припев: Преподо́бне о́тче Иерони́ме, моли́ Бо́га о нас.

Умертви́в плотски́я стра́сти воздержа́нием, написа́л еси́, благоу́мне, кни́ги же и сви́тки, учи́тельныя и изъясня́юща сло́во Бо́жие.

Сла́ва Отцу́ и Сы́ну и Свято́му Ду́ху:

Све́тлый в по́стниках и вели́кий в му́дрости бы́в, ти́тло наста́вника ве́рных прия́л еси́, ны́не благохвали́мый на́ми, богоглаго́ливе.

И ны́не и при́сно и во ве́ки веко́в. Ами́нь.

Богородичен: Зачала́ еси́ вои́стинну Бо́га Сло́ва во утро́бе Твое́й, и Сего́ па́че естества́, Пречи́стая, родила́ еси́, Его́же ми́лостива сотвори́ на́м в де́нь су́дный.

Конда́к, гла́с 8.

В преподо́бных преподо́бнейшаго и в блаже́нных блаже́ннейшаго учи́теля, пе́сньми восхва́лим Иерони́ма достохва́льнаго, ве́рных наста́вника и засту́пника, любо́вию тому́ зову́ще: ра́дуйся, о́тче богому́дре.

Икос:

Якоже други́й Ангел, Иерони́ме о́тче, ви́ден бы́л еси́, на земли́ живя́, и неве́рнии у́бо и злосла́внии лю́те вопия́ху на тя́, правосла́внии же, ра́дующеся, взыва́ху тебе́ такова́я: ра́дуйся, о́трасле Далмати́и боже́ственная; ра́дуйся, благи́й пло́д ея́ и сы́н; ра́дуйся, Земли́ Святы́я воспита́ние свято́е; ра́дуйся, благоче́ствующих похвало́; ра́дуйся, я́ко списа́ния твоя́ све́тят, я́ко све́т; ра́дуйся, я́ко по́стничество твое́ похваля́ется, я́коже ле́по; ра́дуйся, кра́йний дру́же му́драго Августи́на; ра́дуйся, проше́ния испо́лнивый сего́; ра́дуйся, ве́рных учи́телю; ра́дуйся, враго́в неве́рных сопротивобо́рче; ра́дуйся, узре́вый небе́сный гра́д; ра́дуйся, воспева́яй в не́м Бо́гу боже́ственную пе́снь. Ра́дуйся, о́тче богому́дре.

Пе́снь 7.

Ирмос: Бо́жия снизхожде́ния о́гнь устыде́ся в Вавило́не иногда́, сего́ ра́ди о́троцы в пещи́, ра́дованною ного́ю, я́ко во цве́тнице лику́юще, поя́ху: благослове́н еси́ Бо́же, оте́ц на́ших.

Припев: Преподо́бне о́тче Иерони́ме, моли́ Бо́га о нас.

Ума́ чистото́ю прия́л еси́ благода́ть бога́тную от Бо́га, твори́ти же и глаго́лати вся́ к по́льзе души́, богопропове́дниче, благословля́я Бо́га оте́ц на́ших.

Припев: Преподо́бне о́тче Иерони́ме, моли́ Бо́га о нас.

Пчеле́ трудолю́бней поревнова́в, пи́сьменныя собра́л еси́ цве́ты, я́коже в со́те, се́рдцем и умо́м сие́ состроя́я и те́м услажда́я ве́рных.

Сла́ва Отцу́ и Сы́ну и Свято́му Ду́ху:

Испо́лненный благода́ти Госпо́дней, я́ко вои́стинну избра́нник, бу́ди хода́тай о на́с, вопию́щих и пою́щих: благослове́н еси́, Бо́же оте́ц на́ших.

И ны́не и при́сно и во ве́ки веко́в. Ами́нь.

Богородичен: Неве́стник пречи́ст, е́же па́че сло́ва Сло́ва воплоще́ния, и черто́г, и престо́л, правому́дрствующе, Тя́ Богороди́тельнице, имену́ем, сла́вяще Рождество́ Твое́.

Пе́снь 8.

Ирмос: Седмери́цею пе́щь халде́йский мучи́тель, Богочести́вым неи́стовно разжже́; си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Припев: Преподо́бне о́тче Иерони́ме, моли́ Бо́га о нас.

Свяще́нно плещи́ дне́сь, гра́де Дави́дов, пе́сньми Спа́су твоему́, и́бо со ины́ми твои́ми Иерони́ма богому́драго и́маши в гра́жданех свои́х, вопия́: лю́дие, превозноси́те Го́спода во вся́ ве́ки.

Припев: Преподо́бне о́тче Иерони́ме, моли́ Бо́га о нас.

В се́рдце положи́в восхожде́ние, богому́дре, и Творцу́ вы́ну соединя́яся, возше́л еси́ от дея́ния в зре́ние духо́вне и, кра́ю жела́ний предстоя́, пое́ши: лю́дие, превозноси́те Го́спода во вся́ ве́ки.

Сла́ва Отцу́ и Сы́ну и Свято́му Ду́ху:

Стра́нна, тобо́ю соверше́нная, преподо́бне, от за́пада бо устремля́ешися к восто́ку, подвиза́яся те́плейше в Вифлее́ме, иде́же дву́м оби́телем во́ждь быва́еши и по кончи́не сказу́еши небе́сная.

И ны́не и при́сно и во ве́ки веко́в. Ами́нь.

Богородичен: Све́т пе́рвый ро́ждшая, Ангелы, вторы́я све́ты, составле́й и све́т первонача́льный и свети́ла два́ произведы́й, ко все́м же ду́шу, я́ко све́т, вдохну́вый, просвети́ ума́ моего́ мра́к, Богоро́дице.

Песнь 9

Ирмос: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски и чре́во Твое́ бы́сть простра́ннейшее небе́с. Те́м Тя́, Богоро́дицу, Ангелов и челове́к чинонача́лия велича́ют.

Припев: Преподо́бне о́тче Иерони́ме, моли́ Бо́га о нас.

Весели́тся Ангелов боже́ственный ли́к, прие́м тя́, всеизя́щне: Ангельски бо ты́ пожи́л еси́ на земли́, блаже́нне, свяще́нных учи́телей добро́то и по́стников похвало́.

Припев: Преподо́бне о́тче Иерони́ме, моли́ Бо́га о нас.

Прославля́ется па́мять твоя́ благоче́стно на земли́, и ны́не обита́еши со Августи́ном на небеси́, о на́с моля́ся и о соиме́нных тебе́, почита́ющих тя́, богоно́се, и о́браз тво́й лобыза́ющих.

Сла́ва Отцу́ и Сы́ну и Свято́му Ду́ху:

Яко у́тро, возсия́л еси́ и, я́ко со́лнце, заше́л еси́ к небе́сным, иде́же возжеле́л еси́ бы́ти, оста́вив писа́ния твоя́, чу́дне, я́ко сокро́вище, от ни́хже источа́ются благода́ть и весе́лие небе́сное.

И ны́не и при́сно и во ве́ки веко́в. Ами́нь.

Богородичен: Сохрани́в Тя́ Де́ву, от Твои́х возсия́вшее ложе́сн Невече́рнее Со́лнце ве́рнаго служи́теля Своего́ прича́стника Своего́ све́та и ра́дости неизрече́нныя сотвори́, с ни́мже моли́ся уще́дрити Тя́ велича́ющия.

Свети́лен:

Пло́ть покори́в ду́ху, подвиза́лся еси́ во пло́ти, а́ки безпло́тен, те́мже и вы́шший бы́в, сподо́бился еси́, Иерони́ме, хвали́ти все́х Влады́ку со Ангелы.

Сла́ва:

Труда́ми твои́ми и по́ты Вифлее́м умасти́вся, вопие́т ти́, богоно́сному: о Иерони́ме богому́дре, ты́ моя́ похвала́ и мона́шествующих удобре́ние!

И ны́не, Богородичен:

Сла́дость Ангелов, скорбя́щих ра́дость, христиа́н Предста́тельница, Де́во Ма́ти Госпо́дня, заступи́ на́с и изба́ви ве́чных му́к моли́твами Твои́ми.

Молитва преподобному Иерониму Стридонскому

О, свяще́нная главо́, преподо́бне о́тче, преблаже́нне а́вво Иерони́ме! Не забу́ди убо́гих твои́х до конца́, но помина́й нас всегда́ во святы́х и благоприя́тных моли́твах к Бо́гу: помяни́ ста́до твое́, е́же сам упа́сл еси́, и не забу́ди посеща́ти чад твои́х моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ душа́ со а́нгельскими во́инствы, со безпло́тными ли́ки, с Небе́сными си́лами, у Престо́ла Вседержи́телева предстоя́щи, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.