28 июня.
Канон святому пророку Амосу
![Святому пророку Амосу Святому пророку Амосу](img_i/078.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропа́рь, гла́с 2:
Проро́ка Твоего́ Амо́са па́мять, Го́споди, пра́зднующе, те́м Тя́ мо́лим: спаси́ ду́ши на́ша.
Кано́н, гла́с 7.
Пе́снь 1.
Ирмос: Истря́сшему Бо́гу фарао́на в мо́ри Чермне́м, пе́снь побе́дную пои́м, я́ко просла́вися.
Припев: Проро́че Бо́жий Амо́се, моли́ Бо́га о нас.
Очи́стив мо́й у́м от страсте́й мра́чнаго по́мысла, проро́ка Твоего́, Влады́ко, Амо́са пе́ти озари́.
Припев: Проро́че Бо́жий Амо́се, моли́ Бо́га о нас.
Таи́нник я́влься и́же па́че ума́ та́ин Бо́жиих, сподо́бился еси́ прозре́ти, сла́вне, быва́емая.
Сла́ва Отцу́ и Сы́ну и Свято́му Ду́ху:
Яко нескве́рное Бо́жие и чи́стое поко́ище я́влься, я́же Ду́ха, Амо́се, прия́л еси́ Боже́ственную де́тель.
И ны́не и при́сно и во ве́ки веко́в. Ами́нь.
Богородичен: Ты́ па́дшую Ада́мову проро́чески возста́вила еси́ ски́нию, Спа́са и Бо́га, Пречи́стая, во чре́ве носи́вши.
Пе́снь 3.
Ирмос: Утверди́ся ве́рою Христо́ва Це́рковь, и́бо непреста́нно пе́сньми вопие́т, пою́ще: Свя́т еси́, Го́споди, и Тя́ пое́т ду́х мо́й.
Припев: Проро́че Бо́жий Амо́се, моли́ Бо́га о нас.
Ты́, беззако́нныя облича́я, Амо́се, Госпо́дню пра́вду пока́зовал еси́, вопия́, богоявле́нне: Свя́т еси́, Го́споди, спаса́яй ду́ши на́ша.
Припев: Проро́че Бо́жий Амо́се, моли́ Бо́га о нас.
Показа́лся еси́ сто́лп, проро́че, Но́ваго Заве́та, отъе́мля сего́ покро́в и ве́рою зовы́й: Свя́т еси́, Го́споди, спаса́яй ду́ши на́ша.
Сла́ва Отцу́ и Сы́ну и Свято́му Ду́ху:
Навы́к Боже́ственная, проро́че богоглаго́льниче, Амо́се боже́ственне, просвеща́я лю́ди, вопия́л еси́: Свя́т еси́, Го́споди, спаса́яй ду́ши на́ша.
И ны́не и при́сно и во ве́ки веко́в. Ами́нь.
Богородичен: Утверди́хся, испове́дав Боже́ственное Твое́ рождество́, и Предста́тельницу Тя́, Де́во, богате́я, зову́: ра́дуйся, Богоневе́стная, наде́ждо моя́ и по́моще.
Седа́лен, гла́с 3.
Боже́ственный орга́н Уте́шителев, подглаша́емь Сего́, блаже́нне, благода́тию всегда́ я́сно, проро́к бы́л еси́: возглаша́еши бо безве́стных явле́ние и озаря́еши ве́рою притека́ющия, Амо́се сла́вне, Христа́ Бо́га моли́ дарова́ти на́м ве́лию ми́лость.
Сла́ва, и ны́не, Богородичен:
Боже́ственнаго естества́ не отлу́чся, пло́ть бы́в во чре́ве Твое́м, но Бо́г вочелове́чся и пребы́сть, Иже по рождестве́ Ма́терь Тя́ Де́ву, я́ко пре́жде рождества́, сохрани́в Всенепоро́чну, еди́н Госпо́дь, Того́ приле́жно моли́ дарова́ти на́м ве́лию ми́лость.
Пе́снь 4.
Ирмос: Услы́шах, слу́х Тво́й, Го́споди, я́ко яви́лся еси́ на земли́, за е́же спасти́ ны. Те́м вопие́м: сла́ва си́ле Твое́й, Го́споди.
Припев: Проро́че Бо́жий Амо́се, моли́ Бо́га о нас.
Служа́щия глухи́м и́долом обличи́л еси́ лю́ди Изра́илевы, те́м плене́нным бы́ти си́м ре́кл еси́, досточу́дне.
Припев: Проро́че Бо́жий Амо́се, моли́ Бо́га о нас.
Проро́ка тя́, и́же пе́рвее па́стыря показа́ Бо́г, восприе́м, священноявле́нне Амо́се. Те́м тя́ вси́ ве́рою ублажа́ем.
Сла́ва Отцу́ и Сы́ну и Свято́му Ду́ху:
Яко зерца́ло, Свята́го Ду́ха прие́м, блиста́нием светолу́чная, Амо́се, все́м проявля́еши, ра́дуяся, благоче́стие.
И ны́не и при́сно и во ве́ки веко́в. Ами́нь.
Богородичен: Сло́во в Тя́ всели́ся, Чи́стая, существо́ мое́ возобрази́, па́дшее пре́жде преступле́нием.
Пе́снь 5
Ирмос: К Тебе́ у́тренюю и Тебе́ вопию́, Благоутро́бне Го́споди: омраче́нную грехми́ ду́шу мою́, све́том озари́в за́поведей Твои́х, наста́ви.
Припев: Проро́че Бо́жий Амо́се, моли́ Бо́га о нас.
Умерщвле́нныя сне́дною стрело́ю, блаже́нне, укори́л еси́, я́ко непщу́ющим испа́днути вну́тренним, и прело́жно бы́ти, и тле́нно наслажде́ние.
Припев: Проро́че Бо́жий Амо́се, моли́ Бо́га о нас.
Бога́тыми светоли́тии осия́емь, яви́лся еси́ богоглаго́лив и собесе́дник Бо́жий, возвеща́я все́м благоче́стия и́стинный пу́ть.
Сла́ва Отцу́ и Сы́ну и Свято́му Ду́ху:
Изба́вити вся́, тя́ пою́щия, блаже́нне, моли́ от льще́ний и се́тей вра́жиих и све́том осия́ти небе́сным Ца́рства Христо́ва.
И ны́не и при́сно и во ве́ки веко́в. Ами́нь.
Богородичен: Богоро́дицу испове́дающии Тя́, Ма́ти Де́во, непрее́мнаго Ца́рствия и пи́щи Тобо́ю, Богома́ти, получи́ти да сподо́бимся.
Пе́снь 6.
Ирмос: Ио́на из чре́ва а́дова вопия́ше: возведи́ от тли́ живо́т мо́й. Мы́ же Тебе́ вопие́м: Всеси́льне Спа́се, поми́луй на́с.
Припев: Проро́че Бо́жий Амо́се, моли́ Бо́га о нас.
Све́тлыми и́стины заря́ми сия́я, зауши́л еси́ лжи́ проро́ка, кре́пко облича́я и предглаго́ля того́ потребле́ние. [Дважды.]
Сла́ва Отцу́ и Сы́ну и Свято́му Ду́ху:
Омрачи́л еси́ пре́лести пла́мень, проро́че, я́ко со́лнце, благоче́стия зарю́ все́м возсия́я, я́ко Ду́ха сия́ние восприи́м.
И ны́не и при́сно и во ве́ки веко́в. Ами́нь.
Богородичен: Пречи́стаго Твоего́ де́вства пою́, Де́во, несказа́нное и честно́е рождество́ и сла́влю, Пречи́стая, и́мже спаса́юся тли́ и сме́рти.
Конда́к, гла́с 4.
Очи́стив Ду́хом, проро́че, твое́ светоза́рное се́рдце, сла́вный Амо́се, проро́чествия да́р свы́ше прие́мь, возопи́л еси́ велегла́сно во страна́х: се́ Бо́г на́ш, и не приложи́тся и́н к Нему́.
Пе́снь 7.
Ирмос: В пе́щь о́гненную вве́ржени, преподо́бнии о́троцы о́гнь в ро́су преложи́ша, воспева́нием си́це вопию́ще: благослове́н еси́, Го́споди, Бо́же оте́ц на́ших.
Припев: Проро́че Бо́жий Амо́се, моли́ Бо́га о нас.
Еже предглаго́лал еси́, Боже́ственное спасе́ние яви́ся, Амо́се, проро́че чу́дне, просвеще́нии благоче́стия осия́я ми́р, вопия́л еси́: благослове́н еси́, Го́споди, Бо́же оте́ц на́ших. [Дважды.]
Сла́ва Отцу́ и Сы́ну и Свято́му Ду́ху:
Вжиля́емь Боже́ственною си́лою, богопроти́вными враги́ неврежде́н бы́л еси́, терпели́вно, я́коже адама́нт, пребы́л еси́, зовы́й: благослове́н еси́, Го́споди, Бо́же оте́ц на́ших.
И ны́не и при́сно и во ве́ки веко́в. Ами́нь.
Богородичен: Непостижи́мое рождество́ Де́вы славосло́вим, и́мже сме́рти изба́вихомся. Его́же ра́ди ро́ждшеся в нетле́ние, зове́м: благослове́н еси́, Го́споди, Бо́же оте́ц на́ших.
Пе́снь 8.
Ирмос: Еди́наго Безнача́льнаго Царя́ сла́вы, Его́же благословя́т небе́сныя си́лы и трепе́щут чи́ни Ангельстии, по́йте, свяще́нницы, лю́дие, превозноси́те Его́ во ве́ки.
Припев: Проро́че Бо́жий Амо́се, моли́ Бо́га о нас.
Ве́сь восте́кл еси́ на го́рнюю высоту́, и навы́кл еси́ неизрече́нных ра́зума, и бы́л еси́ сказа́тель Сло́ва воплоще́ния, Амо́се. Те́мже тя́ воспева́ем во вся́ ве́ки.
Припев: Проро́че Бо́жий Амо́се, моли́ Бо́га о нас.
Ума́ острото́ю все́х Влады́ку разуме́ти, я́коже е́сть мо́щно, сподо́бился еси́, науча́юща тя́ неизрече́нных ра́зуму, зовы́й: свяще́нницы, по́йте, лю́дие, превозноси́те во вся́ ве́ки.
Сла́ва Отцу́ и Сы́ну и Свято́му Ду́ху:
Блаже́нство, и ра́дость несказа́нную, и Ца́рство небе́сное, я́ко проро́к, получи́л еси́, небе́сных ви́дче, зовы́й благоче́стно: лю́дие, превозноси́те Его́ во вся́ ве́ки.
И ны́не и при́сно и во ве́ки веко́в. Ами́нь.
Богородичен: Во двою́ естеству́ от Тро́ицы Еди́наго боголе́пно без се́мене, Богома́ти, родила́ еси́ Спа́са ми́ра. Те́м Тя́, ве́рнии, любо́вию превозно́сим во ве́ки.
Песнь 9
Ирмос: Всепе́тая, небе́с превы́шшая, Безнача́льное Сло́во безсе́менно заче́ншая и воплоще́ннаго Бо́га ро́ждшая челове́ком, те́м Тя́ вси́ велича́ем.
Припев: Проро́че Бо́жий Амо́се, моли́ Бо́га о нас.
Бы́в проро́ческим явле́нием богодви́жимь язы́к, Боже́ственная веща́ющь, все́м возвести́л еси́, Амо́се, Боже́ственное милосе́рдие. Те́мже вси́ тя́ при́сно ублажа́ем. [Дважды.]
Сла́ва Отцу́ и Сы́ну и Свято́му Ду́ху:
Несказа́нно проро́ческое благосла́вие: и́бо Святы́й Ду́х, в си́х все́лься, светоли́тия Своего́ показа́ прича́стники, от ни́хже, вси́ ве́рнии, просвеща́емся.
И ны́не и при́сно и во ве́ки веко́в. Ами́нь.
Богородичен: Ме́ртвости и тли́ мою́ ри́зу отъя́ла еси́, Де́во, спаси́тельную ри́зу — воплоще́ннаго Бо́га — ро́ждши челове́ком. Те́м Тя́ вси́ при́сно велича́ем.
Молитва
О прехва́льный и пречу́дный проро́че Бо́жий Амо́се! Услы́ши нас, гре́шных и непотре́бных, в час сей предстоя́щих пред свято́ю твое́ю ико́ною и усе́рдно прибега́ющих к хода́тайству твоему́. Моли́ о нас Человеколю́бца Бо́га, да пода́ст нам дух покая́ния и сокруше́ния о гресе́х на́ших и всеси́льною свое́ю благода́тию да помо́жет нам оста́вити пути́ нече́стия, преспева́ти же во вся́ком де́ле бла́зе; да укрепи́т нас в борьбе́ со страстьми́ и похотьми́ на́шими; да всади́т в се́рдце на́ше дух смире́ния и кро́тости, дух братолю́бия и незло́бия, дух терпе́ния и целому́дрия, дух ре́вности к Сла́ве Бо́жией и спасе́нию бли́жних. Упраздни́ моли́твами твои́ми, проро́че, злы́я обы́чаи ми́ра, па́че же поги́бельный и тлетво́рный дух ве́ка сего́, заража́ющий христиа́нский род неуваже́нием к Боже́ственней правосла́вной ве́ре, к уста́вом Святы́я Це́ркве и к за́поведем Госпо́дним, непочте́нием к роди́телем и власте́м предержа́щим, и низверга́ющий люде́й в бе́здну нече́стия, развраще́ния и поги́бели. Отврати́ от нас, пречу́дне проро́че, предста́тельством твои́м пра́ведный гнев Бо́жий и изба́ви вся гра́ды и ве́си Оте́чества на́шего от бездо́ждия и гла́да, от стра́шных бурь и землетрясе́ний, от смертоно́сных язв и боле́зней, от наше́ствия враго́в и междоусо́бныя бра́ни. Укрепи́ твои́ми моли́твами, пресла́вне, предержа́щия вла́сти на́ша в вели́цем и многотру́днем по́двизе народоправле́ния, благопоспе́шествуй им во всех благи́х дея́ниих и начина́ниих к водворе́нию ми́ра и пра́вды в стране́ на́шей. Посо́бствуй христолюби́вому во́инству во бране́х со врага́ми на́шими. Испроси́, проро́че Бо́жий, от Го́спода па́стырем на́шим святу́ю ре́вность по Бо́зе, серде́чное попече́ние о спасе́нии пасо́мых, му́дрость во уче́нии и управле́нии, благоче́стие и кре́пость, во искуше́ниих, судия́м испроси́ нелицеприя́тие и безкоры́стие, правоту́ и сострада́ние к оби́димым, всем нача́льствующим попече́ние о подчине́нных, ми́лость и правосу́дие, подчине́нным же поко́рность и послуша́ние ко власте́м и усе́рдное исполне́ние свои́х обя́занностей; да та́ко в ми́ре и благоче́стии пожи́вше в сем ве́це, сподо́бимся прича́стия ве́чных благ в Ца́рствии Го́спода и Спа́са на́шего Иису́са Христа́, Ему́же подоба́ет честь и поклоне́ние со безнача́льным Его́ Отце́м и Пресвяты́м Ду́хом во ве́ки веко́в. Ами́нь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![Святому пророку Амосу Святому пророку Амосу](img_b/078.jpg)